查看完整版本 : 不打‧短評43:被偷走的那五年(有內容)

港產不打 2013-9-24 11:25 AM

不打‧短評43:被偷走的那五年(有內容)

不打評價:正場價$50

不打總評:算係黃真真近年顛峰之作,可惜一半好一半差,名副其實毀譽參半

我想黃真真應該適合去韓國發展,前作【傾城之淚】根本係韓國片【真的愛你】強國版
今套【被偷走的那五年】,亦完全符合韓國片一貫既特質
節奏慢、故作煽情、刻意催淚、永遠有交通意外、主角患絕症、結局總會有人死既悲劇結局
爭在冇強姦、冇講兄妹/姊弟戀,反而近年韓國片最成功既笑中有淚,偏偏學唔到

套戲頭半部其實開得好好,度蜜月車禍一醒就冇左五年記憶
女主角逐步追尋真相,透過角色既互動同懸念既佈局交代五年內既人與事
鋪排有序,層層推進,回憶現實穿插,成功牽住觀眾走,重塑男女主角既感情,細膩而不俗套
利用失憶逐步交代女主角之前既種種不是,恢復記憶既過程原來係兩人既反省同覺悟
失憶反而成為兩人感情既契機,最後男主角再一次向她求婚,重拾當年甜蜜
佈局精準,一氣呵成,顧勿論求婚過程係唔係抄youtube片,截至呢度我真心讚俾$70

只可惜套戲只係播左粒幾鐘,導演之後再次韓風入骨,又玩絕症真係好老土
做唔做手術糾糾纏纏,之後硬加禿頭、半身不遂、女角咬喉自殺等等好堆砌既催淚場口
最後直頭好似係想探討安樂死咁,煽情再煽情,拖完又拖,令全套戲大打折扣

套戲和六月上既國產片【分手合約】實在太相似,同樣中段女主角患上絕症
不過佢明顯處理得務實而合理得多,結局亦拍出廝守一生既情操,遇見另一對小情人既神來之筆
同樣是白百何,演技更上一層樓,失憶前後既人格落差更演繹得收放自如
至於彭于晏對張孝全,一個型一個俊,兩個都演活出男人既深情和浪漫,值得一讚

坦白講香港女導演已經唔多,殿堂級有張婉婷、許鞍華、岸西、張艾嘉(四位前輩我真心讚)
當代既只有我一向力撐既麥曦茵同佢黃真真,近期【聖誕玫瑰】楊采妮算係唯一新血
香港電影業界已經非常男性主導,類型歸邊,唔係sell打sell動作,就係sell女sell低俗
拍愛情既,已經要數到葉念琛條粉腸,so sad
我們實在需要更多女性既角度同視野,平衡一下,百花齊放,希望大家多多支持!

Youtube:港產不打
Facebook:港產
Weibo:港產不打_微博
************************
港產不打
全職非牟利網絡打手
100%支持本地製作
乜戲都打,淨係唔打港產
************************
頁: [1]
查看完整版本: 不打‧短評43:被偷走的那五年(有內容)