查看完整版本 : 《Miss Change》看後感

Medalmore 2013-10-6 09:26 PM

《Miss Change》看後感

呢套戲我都係無意中發現到,好似香討都有人share過出嚟,中文譯做「變裝小姐」...

雖然話呢套係屬三級片類似,但講真...佢三級果部份,我覺得似乎冇乜必要,唔係話彈裸露果位第二女主角唔夠靚,身材唔夠好,而係我只係覺得,真係可以唔需要,冇咗呢part既話,呢套戲其實只屬2B級...

本身呢套戲係講一個其貌不揚既戇男,鍾意一個女同事又唔敢講,後來俾佢遇到一位火辣美女瞓響垃圾堆度,無厘頭咁帶咗人返屋企,點鬼知又意外咁靈魂入咗去個女美女體內,之後串連一D趣事...

講真換身戲同劇集我都睇唔少,呢套戲呢...事實上驚喜麻麻!成套戲既細節,講真似乎只係水到鴨背,講到唔湯唔水!

套戲話就話換身戲種,但係...換咗身後既男主角(不論第一定第二),其實講佢地變咗做女人之後,我唔覺得有乜驚喜,甚至...有乜謂呢?但無可否認,飾演果位變咗身,外表係女人,靈魂係男人果位第一女主角,佢都算係做到擺明係女兒身男人心既神情,再加上佢外表條件真係好好,基本上如果佢再有多D機會演出,其實佢紅得起既...

至於兩位男主角,講真作為宅男果位第一男主角,講真...似乎韓國都唔少呢D小人物演員,佢既表現亦冇乜特別!而第二男主角,外表唔錯,又有六舊腹肌,都唔錯既,但係...我已經講完對佢同套戲佢所值得講既野喇!而第一男主角既暗戀對象,即係有裸露戲份果位第二女主角,講真...如果唔係要搵人拍裸露鏡頭,又係果句...冇乜野好講!

其實成套戲唔係話差到一文不值,至少我都冇睇到要割櫈,至少第一女主角...你唔睇佢演技都睇下佢既外貌都唔會太悶既!但以佢成百四分鐘既片長,其實我睇哂佢都要分成兩三次...

不過套戲有一度我有D疑問,例如作為一個「空軀殼」既第一女主角,其實響第一男主角未響垃圾堆執佢返嚟之前,佢已經響酒吧度同第二男主角交過手;而佢響俾第一男主角執佢返屋企途中,以及男主角響沖完涼返出嚟客廳之前,佢其實係似一個飲醉咗既女人,本身係有反應同有郁過既,咁點解會突然間話佢變咗做「死人」呢?咁之前佢「上手」果個靈魂去咗邊呢?定係佢突然間變咗個「換身器」呢?我覺得佢真係冇乜點交代呢個美女既來歷,確係有點失望!而第一男主角最後就咁將佢棄置響巴士站...又係唔知想點!

講真要評呢套戲,可以咁講:
1. 選角我就冇一個識,但至少一女係驚喜,二男都歡喜,但其餘...算啦!都還可以既!
2. 故事就捉到鹿唔識脫角,題材係可以既,但話哂最近都唔少換身戲,呢套戲...可惜!
3. 主角表現就...只係第一女主角表現較突出,但我都略嫌佢既戲份唔多夠!其餘既...二男呢個花花公司...又係太少描述!一男同二女...講真佢地只係交到功課,真係唔突出!

總之呢套戲如果你真係冇野好做既話,你姑且可以睇,不過...你又唔好諗住瞓唔著睇佢,佢可以催眠到你...尤其係你男觀眾!
頁: [1]
查看完整版本: 《Miss Change》看後感