查看完整版本 : 虎門 > 廣州 > 常平 (2日)

龍滾神州 2014-12-24 02:13 AM

虎門 > 廣州 > 常平 (2日)

相信有唔少版友都有諗過踩去廣州玩下的,小弟最近就踩咗一轉, 所以想同大家分享下。
本來想深圳廣州來回的,但因為時間、體力同天氣等因素,最後選擇咗虎門出發,常平完成。過程大致如下:

[b]羅湖 > 東莞虎門:  [/b]
之前一晚睇歐聯,起身已經11點!由於夜晚約咗晌廣州生活個老友聚舊食飯,又想早D去遊下珠江,於是改變計劃由羅湖火車站坐大巴直達虎門(我住晌附近)。不過就算早起身,我都唔會踩去虎門的,而係坐地鐵去到機場東再踩過去。咁羅湖至虎門呢段路,我都成日踩,好熟了,如果有興趣,可以由羅湖到龍華,石岩,光明,寶安,到長安鎮再上虎門,又或者晌到南山,再轉上廣深公路(107國道)直去長安,再轉上虎門。

[b]虎門 > 廣州南沙:[/b]
[b]解放路 -稔州路- 輪渡路-渡輪過海[/b]
由虎門過南沙,要過海,但上唔至虎門大橋,點呢?答案係坐渡輪。個渡輪碼頭晌虎門北面大約10KM,睇地圖唔難搵。渡輪係俾汽車過海的,但人同單車可以免費跟過去。班次好密,船程大約15分鐘,可以吹下海風,欣賞虎門大橋,又唔使錢,爽!

[b]南沙 > 廣州番禺:[/b]
[b]環市大道北-市南大道-番禺大道-市橋[/b]
落咗船就係南沙,一路向番禺方向前進,路程大約30KM。呢度係開發中地段,人少車人,可以keep住20-30KM/H前行(小弟慢腳),但亦要留意,成程幾乎冇補給!由於呢日只係朝早食左個包,開始餓了... 好彩到咗番禺,終於比較多人,而呢度我比較熟,於是就駛入市橋,晌大家樂食個tea兼hea下。

[b]番禺 > 廣州市中心: [/b]
[b]大北路-番禺大道-迎賓路-洛溪大橋-廣州大道-廣州塔[/b]
呢段路最難踩最辛苦。番禺個一段仲好,但已經越來越多車了,去到廣州中心地段,又撞啱放工時間,塞死!而且呢段路成日要過河,即係要同其他汽車/摩托一齊上天橋,都咪話唔危險!千辛萬苦,終於去到海心沙,呢度有個海濱公園俾人跑步踩車,欣賞下珠江夜景同廣州塔呀咁(見圖),總算有D滿足感。呢晚同老友食完飯,就搵酒店過夜。

[b]廣州 > 東莞城: [/b]
[b]黃埔大道-107國道[/b]
第朝起身再同個frd食茶仔,吹一輪水起程,已經11點!原本計劃,係沿107國道經莞城、長安返深圳,咁其實都夠時間,但由於呢兩日氣溫急跌咗幾度,而我又帶唔夠衫,凍到痴線,所以只能日頭踩(事實我之後都病咗幾日),於是我改為踩到到常平,再坐火車番深圳。由廣州市中心去到莞城非常簡單,就係沿黃埔大道/107國道行,車流唔多,都算好踩,但貨車多,塵多!

[b]東莞城 >常平:  [/b]
[b]莞樟路-銀朗北路-常朗路-常平大道[/b]
由於目的地改咗做常平,所以入咗莞城之後就轉為向東行,上莞樟路(對,呢條路直通樟木頭),呢段路比較窄,貨車多,要小心。東莞又係我比較熟既地方,加上時間充裕,所以我揀我熟既路,即經寮步到大朗再到常平,而唔係最快既路。Anyway,去到常平5點幾,搵間茶仔食下嘢,食完剛好見到有深圳大巴,於是就買飛上車番歸。

至於常平到羅湖路線,之前有位倩信師兄有分享過,大家可以參考:
http://www.discuss.com.hk/viewthread.php?tid=23034668&extra=page%3D7

總括嚟講,去廣州行107國道會簡單啲,但塵多,有些路段車多。想有啲新鮮感,就去坐渡輪,南沙呢段都好踩,但係入到廣州就比較麻煩。

athlon1126 2014-12-24 06:41 PM

多謝分享:loveliness: :loveliness:

966912 2014-12-27 10:08 PM

很好的分享
頁: [1]
查看完整版本: 虎門 > 廣州 > 常平 (2日)