查看完整版本 : 《上帝的男高音》看後感

Medalmore 2015-5-16 03:45 AM

《上帝的男高音》看後感

其實呢套戲,我都可以話係睇個故事!之前睇唱Opera的保羅,又係講唱歌劇,不過保羅就係慢慢奮鬥搏上去,但男高音呢套呢...卻係一個天生一把靚聲,點知一夜間冇晒,之後睇佢點爬番起身...

睇呢套戲,之前我以為佢係韓片...劉智泰喎!但係...成套戲基本上都冇乜(唔係完全冇)點講韓國,反之日本仲多,而對白大部份都係英文,甚至連字幕介紹都係半隻韓文字都冇(用英文),所以我出番嚟戲院,其實我define唔到呢套戲屬於邊度既戲(我睇既預告就係日文)!

不過都冇緊要,至少劉智泰、伊勢谷友介等人既英文,我都聽得明既...

其實個故事既流程,都算陳舖直述,驚喜唔係咁強烈,劉智泰由頭到尾睇佢點風光、點樣跌入谷底、又點樣爬番起身,其實佢都做得算係咁架喇,最後一幕雖然係短,但都有少少驚喜啦!

至於其他演員,做佢老婆既車藝蓮,佢個角色雖然佢冇因為佢老公落難而離開佢,但感覺上覺得佢算幾脆弱,至少先叫佢老公放棄事業果個係佢...

而其餘既演員,經理人個助手睇佢條線算係幾有理想,但再睇落又唔算有太大發揮空間,反而果位寸過馬頭咕哩果個外籍女歌手,睇佢點樣俾劉智泰寸,同埋點樣搞到佢老婆試音不成...都分別睇得幾令人大快人心同咬牙切齒...

反而經理人伊勢谷友介,本身算係主僕關係,但佢卻都唔計佢錢,諗晒辦法幫佢企番起身(雖然醫劉智泰果個醫生個名,係佢老婆搵出嚟既),呢D真係夠老友喇!

其實成套戲算係平穩,高潮就最後一剎那都算既,但勝在套戲睇落唔算太悶,基本上可以話買飛入去攞得番個本啦!

總之又係果句啦...呢套唔算係韓片,佢只係一套搵韓國人嚟拍既...但話佢係日本片定西片好呢?到而家我都搞唔清楚!

不過算啦!我總叫冇入錯戲院睇呢套戲既...
頁: [1]
查看完整版本: 《上帝的男高音》看後感