查看完整版本 : 《深夜食堂》看後感

Medalmore 2015-5-30 02:36 AM

《深夜食堂》看後感

其實我一早都知有呢套電視劇,不過我就唔覺得個故事吸引所以冇睇...

不過我有個朋友之前係咁推介我睇呢套同名電影,我都覺得奇怪,不過我免為其難都同佢睇...

但當我今日去睇呢套戲之前,我卻發現一個我都估唔到既情況,就係...呢套劇只係上咗兩日,但當我今日下晝去睇番各戲院既賣飛情況,我發現放工打後既場次,除咗地方吊晒腳既星影匯之外,各個有得上既戲院都爆到七彩,甚至油尖旺區既戲院,早響中午已經得番第一行!搞咩呀?隔離院做《壹獄壹世界》都冇咁誇張啦!

咁樣反而令我有興趣,睇下套戲有幾好睇...

成套戲兩個鐘,講真成套戲我都唔覺得有故事可言,之前睇波叔既戲,除咗大鈍材者之外,其實我唔係咁buy好似Burno咁樣冇故事可言既戲,但呢套我卻唔係咁諗...

成套戲你唔好諗有乜野吸引既演員,至少靚仔靚女呢套戲可以話欠奉,但係咁...成套戲卻係平實得十分自然,睇落去唔會反感!之前果度我話套戲冇故事可言,我諗我應該作出一點更正,其實係應該話係每個人都有自己既故事,不過只係套戲將各人既故事講晒出嚟,但就冇乜關連性,而拉埋佢地故事既橋樑,就係個老闆、食堂同埋食物!

成套戲本身分三節,講真我比較鍾意第二節果個女仔果段,第三節都唔差,係頭果節就略嫌冇乜野令我會記得...或者第二節個女仔,可以話由pat爛泥重新做番個正常人,令人比較感動...

本身套戲叫「深夜食堂」,其實本來我仲以為成個故事淨係講夜晚(以前我睇過一套港產片,除咗開頭之外,幾乎成套戲都係講夜晚既),但原來佢都有日間既情節,呢個我就估唔到喇!

至於各人既表現,其實我又唔係咁想評邊個做得好同唔好,因為成套戲除咗老闆之外,各人物都有佢既作用,有時亦有d令人發笑既地方!

總之睇呢套戲,我覺得係令人有種溫暖既感覺,雖然高低位欠奉,亦冇誇張既特技,背景音樂亦好平實,但其實睇落又唔會悶,都算幾好睇...所以今日我睇果場全院滿座,都唔係冇佢道理既!
頁: [1]
查看完整版本: 《深夜食堂》看後感