查看完整版本 : 《殺破狼II》看後感

Medalmore 2015-6-20 05:37 PM

《殺破狼II》看後感

今日睇呢套戲,我係同個比較特別既人去睇...講真就算唔係同佢去睇,我都一樣自己去睇!

講番套戲,其實之前我係有睇殺破狼第一輯既,講真雖然今輯成個故事好唔同,但都係有番上一輯既特色...成team人冚包散、又有人飛落街,一個殺手殺晒成team人(但呢次果個冇吳京咁勁,至少佢要用武器,而吳京上輯係手腳斷人經脈同骨)...

初時我睇呢套戲,我都冇留意到,原來佢只係2B級而唔係第一輯咁係三級既,不過恐怖程度,都同第一輯差唔遠...

至於班演員,其實我覺得吳京比Tony Jaa更似主角,但其實兩個既演技,我覺得仲好過丹爺,係有D感情戲,尤其係Tony Jaa,講佢同佢個女既感情,都睇到佢既演技有進步...華哥演技都無庸置疑,但講搶都唔夠古天樂,佢雖然戲份唔算太多,又唔使佢打,但佢個角色,我覺得用人渣形容佢都侮辱咗人渣...掂!至於張晉,佢真係完全接替咗吳京所做既野,而盧惠光...估唔到佢呢次做好人喎!但入面仲有一個角色我都想提,就係響戲入面執到吳京部電話,果位(疑似)患有唐氏綜合症既漁民,佢係全場唯一可以中和套戲緊張氣氛既角色,佢真係十分搶鏡!(請各位千祈咪誤會我講野涉及歧視成份,其實我覺得佢做得好好,係同佢既智力毫無關係!)其實成套戲,我暫時未搵到任何做得唔好既閒角,做Tony Jaa個女既小妹妹做得好,就算係古天樂個細佬恭碩良,甚至戲份甚少既袁嘉敏同艾威及小黑...都係合格既!仲有我亦想講講林嘉華...唔係講佢點打(根本就冇),話時話佢究竟做警察「徇職」過幾多次呢?

至於打鬥場面,吳京同張晉你唔使懷疑,但張晉套衫真係好野...打極都仲咁整齊!但Tony Jaa呢...講真如果你有睇過佢之前既舊作既話,我係覺得好似唔係太夠喉,可能以往佢打得實在太癲!至於講整體既打鬥場面,我覺得其實有點兒亂!呢樣就不及第一輯咁硬橋硬馬喇!

而個故事呢...我有少少覺得佢結尾有少少落雨收柴,雖然都知最後響泰國果班忠角都應該唔使死(終於唔係冚包散),而最後出現果位女演員應該都係長大咗果個小妹妹,算係happy ending,但咁樣作結尾,似乎有點大惑不解,呢個算係另一個比起第一輯遞色既地方...

如果本身有睇第一輯既話,其實唔計結局,個故事係進步咗,但講打鬥就第一輯比較好,但總叫做合格既!至於應唔應該入戲院睇,其實都可以既!

總括嚟講,套戲唔算十分精彩,但都值得去睇既,至少吳京同Tony Jaa既演技,都令我刮目相看,古天樂就更加睇到我咬牙切齒添!

秒殺馬會 2015-6-28 02:45 AM

古天樂我仲以為客串, 估唔到戲份咁多,今年有機會拎返個男配角:smile_30:

princess_c 2015-6-29 06:38 PM

三位主角都係武林高手,D動作真係好靚,好smooth! 但好似比上一集血腥,同埋兩集都冇關連既!
我覺得中間好似講得太多野,有少許沈悶! :smile_45:

Medalmore 2015-7-1 12:54 AM

其實戲入面仲有個角色可講...盧惠光!

講真呢套戲除咗佢既泰文大派用場之外,佢呢個貪污獄警既角色,講真...如果佢唔係貪污俾華哥收買,吳京真係必死無疑!但佢貪得嚟又唔係衰人,結果...華哥吳京兩叔姪有救喇!

所以戲份唔多,打又打咗少少既角色,其實對成套戲既重要性都幾高!
頁: [1]
查看完整版本: 《殺破狼II》看後感