查看完整版本 : 《侏羅紀世界》看後感

Medalmore 2015-7-1 01:20 AM

《侏羅紀世界》看後感

首先睇呢套戲之前,其實我都冇預到,一張2D戲飛響星期二「特價」咗都$70(原價$80)!

講番套戲先...其實我係有睇侏羅紀公園同迷失世界既,呢次睇呢套侏羅紀世界,難免一定會同前作比較...講真果句,確實冇以前兩套咁好睇!

其實隔咗咁多年,入得去睇呢套戲,都預咗個故事個流程...先嚟一大班人入去恐龍主題公園玩,之後出意外恐龍襲擊人類,然後又收拾番個殘局...結果一如所料,故事就是如此,或者套用阿寶果句:人類總要重複同樣的錯誤!所以入得去睇,根本有晒心理準備,就好似睇金庸十四部小說改篇既劇集同戲咁,根本一早知點樣...問題係拍得好唔好!

講真果句,其實頭半個鐘,我係覺得個演譯方式,係有點兒唔知點咁,父母想離婚,就叫個仔女去阿姨個恐龍公園玩,雖然根本係志在駛開兩個細路,兩個大人搞離婚,但係...個人唔太鍾意呢個做法!呢度仲有解釋番話果隻超強變種恐龍點整出嚟,其實我覺得佢表達上仲可以好少少,而家睇落係明D又唔明D,所以我覺得成套戲頭半個鐘算係冷場!

仲有既係...其實成套戲亦有兩個荒謬既「笑點」...先嚟有個職員俾隻恐龍撞到由高處墮下,但佢竟然絲毫無損!仲有另一幕負責照顧女主角兩個姨甥既女助手,俾果D劍龍當波咁拋到半空再跌落水,然後又響水度蹂躪一大輪,個女助手咁都未死得,要到最後先俾響水度果隻大恐龍送佢去「攞便當」...講真呢兩度我睇到笑咗出嚟!

至於入到戲肉,講真亦係冇前作咁激,至少今次都冇D手手腳腳飛嚟飛去,但恐龍襲擊人類既場面,亦未至於太兒戲既(除左上一段所講)...而最後收拾隻大佬恐龍方法,其實我算估唔到,亦頗欣賞(唔劇透咁多喇)...

至於演員,又係果句,睇呢D戲都唔會太理演員演技,唯一可以講既係,估唔到兩個細路連車都識整囉!

總括來講,呢套戲值唔值得入去睇,我睇2D版,我覺得唔算精彩,但又未至於跌錢既...

v-star 2015-7-14 02:17 PM

*** 作者被禁止或刪除 內容自動屏蔽 ***
頁: [1]
查看完整版本: 《侏羅紀世界》看後感