查看完整版本 : 不打‧快語52:魔獸爭霸---戰雄崛起 (少少內容)

港產不打 2016-6-14 06:19 PM

不打‧快語52:魔獸爭霸---戰雄崛起 (少少內容)

亮 點:
1. 頭三部係史上最成功嘅即時戰略RTS遊戲系列之一,之後係世界上最大持續付費嘅大型多人線上角色扮演MMORPG遊戲,全球每月付費用戶顛峰時超過1,200萬戶,由1994年發行第一部,出到而家仲出緊,足足雄霸GAME壇超過廿年,保守估計全球FANS超過1億,淨係呢1億人入場睇都唔野少!
2. 遊戲足足出左13部、官方小說19套、漫畫11套,仲有桌遊和卡牌遊戲,世界觀宏大,設定浩瀚!
3. 遊戲創辦公司暴雪娛樂,係遊戲界享負盛名,出品嘅遊戲雖然不多,但多數較受歡迎,而且獲得極高評價,暴雪以有heart有創意及勇於嘗試嘅經營方向獲得玩家普遍支持。呢套係佢投資開拍嘅第一套真人電影,由對外宣佈到今年上映,足足磨劍十年,無論信譽、熱誠、budget、質素一定有保証!
4. 導演係名門之後、殿堂級歌手David Bowie個仔Duncan Jones,佢成名作係2009年【月刧餘生Moon】,以超低成本,接近一人一景(其實戲內複製人係由兩個演員分飾),拍出真正科幻味道嘅神作,集身份認同/混淆、複製人vs主人、人與AI戀愛、企業陰謀、未來能源問題等等科幻議題於一身,之後【危機解密Source Code】更加驚為天人,成功將懸疑緝凶片加入科幻元素,扭出集「Time Loop」、「蝴蝶效應」、「平行世界」等鬥智鬥力作品,叫好叫座,奠定科幻劇情片大師地位,今套魔獸由佢擔任導演兼編劇,觀眾拭目以待,佢點樣係魔幻片撞出科幻味道!
5. 總投資額$1.6億美金,CGI特技打造魔獸世界,還原100%遊戲場面、角色、道具,集體回憶返晒黎!
6. 吳彥祖全力演出大反派Gul'dan,雖然樣都見唔到,但肢體動作入型入格備受好評!
7. 對於fans/機迷,戲內隱藏大量會心微笑或令人期待嘅彩蛋,睇得到嘅會好過癮!

打 位:
1. 魔獸世界觀宏大,設定浩瀚,角色及種族繁多,人物關係千絲萬縷,情節跨越幾代恩怨情仇,呢個黎到電影其實變成難題,就算預左拍三部曲,除非你上中下三集連續上映,否則終歸一套還一套,兩個多小時內容取捨係必然嘅,導致今集魔獸世界,只能集中講人類和獸人,fans會體諒,但其他觀眾會頓覺魔獸世界變左簡單正邪對決,成個世界觀扭曲到膠晒!
2. 情節取捨上明顯過份簡單,開門→侵略→抗戰為主軸,法師入魔加獸人叛變,雙方各自無間道來推進劇情,其實相當單薄,淺白到震既外族侵略,仲要順序式直白式交代,冇懸念冇扭橋冇伏筆冇前後呼應,平鋪直敘嘅極至,本人非常失望!
3. 冇劇情就只好睇打鬥場面,但千軍萬馬對戰可以拍到了無張力,戰鬥場面單調乏味,兩場武將單挑拍得求其,最後對決10秒斬爆袋果下全場著左,我睇果場真頭有人爆粗,小聲四起!
4. 遊戲出藍係咁我明,因為要就遊戲玩法及視點,但電影入面整兩條藍閃電劈開,好hea,好冇電影感!
5. 打入魔法師果場仲著火,一般荷里活腦殘打怪拍法,泥膠人望落去就凶狠,但打落就含得能,法師其實咁屈機,照計一條電都收佢地皮,偏偏糾糾纏纏最終被泥膠人壓死,好欺場!成場戲打得一d都唔精彩!
6. 角色刻劃粗糙,人人都腦殘,國王攻打可以完全無策略一味爆無雙、男主角又係魯莽九衝冇計策、堂堂兩國領導可以就咁帶幾個兵仔去私會,有埋伏獸人明知叛亂已被識穿,理應一回去就同族人逃走or直接發爛仲等乜,人類聯軍個個做佈景版,天空之城上面個個法師又袖手旁觀,黑色果團野攪咁大場龍鳳原來為左講句「黑暗內有光明」,總之情節同角色都係腦殘,以魔獸世界呢個咁酷嘅brand黎講完全敗筆,摧毀原著!
7. 男主角無端端愛上女半獸人,完全無感情鋪排,果場獠牙咀戲想點?!
8. 導演一向強於拍劇情片,第一次拍咁大budget嘅娛樂片handle唔到,亦唔太掌握到爆谷片觀眾究竟想睇乜?加上唔係導演自創故事,背負太多包袱和制肘,影響左導演發揮,今套雖然爛,但唔會影響我對導演嘅評價和支持!
9. 人不和,暴雪同電影公司意見不合,電影公司和導演又鬧不和,導演透露公映版本足足剪走左導演版本40分鐘片段,套戲明顯已經完全扭曲晒,暴雪亦透露將效法Marvel唔再假手於人,未來會自組製作公司拍攝另外兩部,自己品牌自己拍,因此呢套電影可以視為實驗品或是過渡性質,基於以上種種不利因素,電影好難唔爛

一 句:
縱然傷了fans嘅心,但我真係覺得爛,爛在劇情簡單角色腦殘對陣兒戲對戰沉悶。

(支持我既請like我fanpage,些些)
**************************
港產不打
要救香港電影,首先票價要減!
**************************
[img]https://scontent-hkg3-1.xx.fbcdn.net/v/t1.0-9/13413052_1022155914537558_6406864106987509157_n.jpg?oh=f33ae2d681b1ede9a1eaedeae862cf06&oe=57C483F0[/img]

chan198999 2016-6-14 11:57 PM

雖然簡單其實都有埋到,其實個守望者一開始就已經慢慢變壞緊,一路都有埋伏筆。

所以不是突然間變了壞人。

魔獸世界中魔法師都是要儲氣,所以他是不能隨便放電,都要集氣(想想他站著唸魔法,根本漏洞超大和明顯)。而且他還要念咒語開門,所以不能夠浪費太多時間去攻擊敵人,所以石像巨魔才用得上來保護他唸咒,其實他都被魔能控制了。

事實上不算得上腦殘,起碼主角有質疑過。當然一個和平各種族都合作時代的國王,可能無咩疑心和缺乏謀略經驗是好正常。西方皇帝可不像中國的皇帝一樣,不停在宮廷上角力和平衡利益。

而最後這段一擊ko好明顯,就是想跳脫一路以往這種荷里活式的勝利,即是主角要打生打死,突然間敵人一個漏洞或突然間場地玩死敵人就勝利了。

(至於這段我看的時候這段的確幾出奇不意,但我看這場沒有人批評過,甚至個個讚魔獸好睇!可能因為我們看imax,實感大好多)

至於個閃電見仁見志,我就不覺得怪,不竟這是魔法。

其他部分無咩意見,不竟被人cut了40分鍾。

其實好可能連鋪排氣氛的地方都cut了,所以看魔獸的時候,總是有種氣氛是來得快去得快的感覺。

[[i] 本帖最後由 chan198999 於 2016-6-15 12:01 AM 編輯 [/i]]
頁: [1]
查看完整版本: 不打‧快語52:魔獸爭霸---戰雄崛起 (少少內容)