查看完整版本 : 不打‧短評141:點五步 (有內容)

港產不打 2016-9-14 04:00 AM

不打‧短評141:點五步 (有內容)

不打評價:3D價 $77

不打總評:比《狂舞派》更貼地、比《樹大招風》更夠薑,個人推為本年最佳港產片!

「一Team人,贏係一齊贏,輸係一齊輸。」
「一踏上投球丘,就要全力以赴,輸贏就係靠呢半步。」
你或許會留意到,【點五步】充滿呢類熱血青春金句。
但我會聚焦係林海峰嘅自述:
「今日我地贏左一場比賽,但輸左一樣好重要嘅野。」
「呢度已經變左我唔再熟悉嘅地方,面對改變,有人選擇去適應,有人選擇去逃避。」
「我冇左佢嘅庇護下,反而重新認識自己。」
無論係頭場佔中嘅第一shot,結局棒球滾翻去佔中嘅首尾呼應
真實沙燕隊呢場比賽應該係1983年而唔係簽署中英聯合聲明嘅1984年
導演明顯係想講政治,多過講棒球
如果你仍然當【點五步】係一般運動青春片睇,似乎睇低左佢一線!

當然政治隱喻片可能有部份觀眾覺得洗腦,又黃又藍好煩
但呢套唔會,嚴格黎講佢亦唔算係一部黃絲電影
套戲最想帶出嘅主題,其實係「打唔一定嬴,但放棄就一定輸!」
寄喻香港人,要踏出「面對問題」的半步 (一步都冇,其實已經好保守)
究竟係要去適應,定係要去抗爭,套戲其實冇明顯立場
談的只是「本土精神」,但不代表就是被當今政壇騎劫了的「本土精神」
從來本土只代表土生土長的香港,冇話過代表「激進」「抗爭」甚至乎「勇武」
【點五步】宣揚嘅其實係一種新一代嘅香港人精神
唔係陳腔濫調、堅離地、要捱要忍呢類上一輩加諸俾後輩嘅所謂「獅子山精神」
而係要喚醒香港人,「不認輸、不放棄」嘅「本土精神」
自己前途,自己決定,你點揀都好,行左定行右,進定退都唔緊要
最重要係唔好逃避,唔好當冇事發生,唔好麻木視而不見
踏出「前途自決」嘅半步

可能你會話,又政治隱喻?!似乎係繼神作【十年】之後嘅跟風之作
但【點五步】其實係2013年創意香港「首部劇情電影計劃」大專組的勝出作品
開拍時【十年】根本未上,更加談唔上跟風
不過自從神作【十年】之後,好多政治隱喻片,都係因為意識形態和政治立場而被推崇
但呢套反而唔係,因為佢其實做到一個幾好嘅平衡
你撇開政治隱喻唔理,純睇一班邊青如何重拾自我、茁壯成長,其實都work
好多人話套戲對棒球賽嘅敘述、對棒球呢個運動嘅描述係粗略
但導演本心明顯唔係講場波點樣逆轉勝、點樣以弱勝強
贏果場比賽只係忠於現實,其實棒球只係一個成長過程
導演最想拍嘅其實係果場比賽對眾球員嘅影響
令到佢地重拾自我、改變人生嘅啟發
重點係表述佢地嘅轉變、佢地嘅成長
呢方面導演和編劇都拿掐得好準確,亦拍得細膩動人
青春片嘅元素:叛逆、義氣、汗水、友情、迷失、承諾、講粗口、嚐禁果、談未來等等全部都有
神就神在,導演成功將棒球賽和現今嘅政治局勢完美融合
無論係對話和自述、剪接和插敘、場面調度和蒙太奇,都互相補完,表裡歸一
做到港產片鮮有一個故事兩層意義,不露骨、不矯情,但卻做到觸動人心、熱血共鳴
相對【危城】嘅避重就輕、【選老頂】嘅花生抽水、【江湖悲劇】嘅堅離地
明顯高出幾班

驚歎嘅係,新晉導演陳志發及編劇黃智揚係剛剛畢業嘅香港浸會大學電影學院畢業生
作為書院派第一套上畫嘅電影作品,完全唔覺係學生作品
無論係劇本、攝影、剪接都達到業界水準,意識和技術都完全成熟
足證港產片新生代,其實係有實力
而家拍來拍去都仲係班食緊老本嘅老屎忽
演來演去都係果班演員
業界有冇真正反思過?
港產片嘅衰落,其實係邊個做成?
青黃不接?定你地唔俾新人接?

【點五步】獲香港電影發展基金撥款二百萬拍攝,而且唔可以再搵贊助及融資
其實拍開野都知,要拍一部上得戲院畫面質素唔差而又最少於90分鐘嘅電影
二百萬真係拍條毛?!
唔好話俾演員費,唔好話埋班隊crew嘅人工
租機租燈租power van租場道具砌景梳頭化妝服裝美指教練樣樣都係錢
以上只係中期拍攝,後期仲要剪接調色特技配音配樂上字幕出DCP
二百萬真係mission impossible,完唔完成到都成問題,莫講話拍得好
除左吹雞搵學生做義工幫手,真係冇乜其他方法

上映前鬧出網絡罵戰,匿名指控訴諸套戲以「夢想」作包裝,實則剝削學生
甚至有人提議罷睇?!
坦白講行內消費學生夢想嘅例子多不勝數,呢類行業惡習亦不限於創意產業
平時有大片有商業片你唔罷、係要罷睇一套真係冇錢嘅學生作品,有乜意思?
而且成件事好透明,套戲得兩球全行都知
黎得做野嘅學生預左係做義工,有份做嘅冇屌作為外人嘅網民屌乜春?!
而且問題嘅核心,你唔妥、覺得蝕底,物米撚做囉?!
如果你有技術有才能有bargaining power,你自己同人揮價囉
商業社會,從來有人肯做嘅價,就係市價,冇話合唔合理架
你覺得蝕桌,物唔接囉,你唔想做義工,物唔做囉,可以做完覆桌屌返轉頭架咩?!
今次事件最值得屌嘅,其實係主辦「首部劇情電影計劃」嘅商務及經濟發展局、創意香港
點解資助額只有二百萬咁少?!點解資助額咁離地同行業完全脫節?!

其實「點五步」仲有另一個意思
有睇嘅觀眾就明
我相信係代表導演、代表新一代對香港現狀不滿嘅宣示

p.s. 男主角林耀聲、胡子彤和女主角談善言都演得好好,繼續努力!
p.s. 我其實係沙田友,對於自小係沙田長大嘅我黎講,套戲好有感覺,沙燕橋係集體回憶!沙田友必看!
p.s. 好喜歡佢以棒球作POV果幕,跟住投手姿勢,好深印象
p.s. 好喜歡佢以「口」字型屋邨嘅走廊比擬為棒球場去練習跑壘,係心思,係地道
p.s. 曾蔭權中鞋果場有驚喜

Facebook專頁:港產不打
(支持我既請like我fanpage,些些)
**********************************
港產不打
要救香港電影,首先票價要減!
**********************************
[img]https://www.movieexpress.com.hk/info/wp-content/uploads/2016/09/1000x1407_movie13883postersweeds_on_fire-hk_2-1000x640.jpg[/img]

dogdogchiV 2016-9-14 11:27 AM

//唔係陳腔濫調、堅離地、要捱要忍呢類上一輩加諸俾後輩嘅所謂「獅子山精神」//


「獅子山精神」就係要捱要忍, 系港英極權下掙扎求存既精神
呢個係無可爭議既定義

無人要加上班黃絲度
係班黃絲要拎「獅子山精神」個名泥自抬身價
頁: [1]
查看完整版本: 不打‧短評141:點五步 (有內容)