查看完整版本 : 《長城》看後感

Medalmore 2017-1-3 11:32 PM

《長城》看後感

今年第一套睇既戲,就係長城...講起上嚟,我好似都好耐冇睇過一套,我睇到幾乎由頭笑到落尾既戲!

其實如果話以演員行先係入戲院睇呢套戲,我諗響香港,可能想睇劉華既人,應該會多過真正男主角麥迪文...除非你話我聽你想入去睇鹿唅、張涵予甚至彭于晏!咁你不如講你最近睇完女醫明妃傳,你鍾意咗黃軒!不過我會話你聽,我想睇景甜...我有睇特殊身份架!

可能我真係唔係諗住入場睇劉華,否則...失望囉!佢戲份真係似一個叫做戲份較多既男配角,可能戲入面另外兩位外國演員仲多戲份過佢,但更可惜就係鹿唅既發揮仲多過佢!佢響入面做咩?講英文囉!成套戲入面係得佢同景甜兩位中國人係識英文...但我又有個疑問喇!點解浪費咗響戲面等同閒角,但本身又係響外國長大既彭于晏呢?我諗你聽佢講英文,係會舒服過劉華講喎!都好在景甜D英文都唔失禮!

不過成套戲...講真景甜同麥迪文幾乎係由頭帶到尾,話好出色又唔講得,但都還可以既!劉華就...我都係想講鹿唅多D!唔係唔想講劉華,但佢真係俾唔到乜野印象俾我,淨係講鹿唅死,都死得型過佢啦!

講我講套戲既內容觀感之前,我先想講講另一樣野...戲服!點解我想講戲服呢?因為...其實套戲係咪想攞奧斯卡最佳服裝設計呢?真係好鬼顏色鮮艷既啫!仲要有Cyber feel喎!不過...景甜套衫...其實身為殿帥(未做之前佢都係將領)既佢,除咗冇帶頭盔之外,到底同其他女兵又有乜分別呢?不過睇落又似春麗(係冇兩個髮髻啫),又似吞食天地入面既趙雲!但講真...果陣打緊仗...有冇可能搞到D盔甲咁靚呀大佬!仲要咁閃...打仗醒神D?

好喇好喇...講番套戲!或者初初我冇睇過預告,我係估唔到套戲打既唔係人而係怪獸!不過都算喇...佢地打仗既情況,我唔理特技,我唔理視覺效果,打得精唔精彩,話晒都算係咁啦...都唔太血腥!但我好想問...究竟佢地係去打怪獸,定係去做怪獸既大餐呢?個個搵條繩跳落去同怪獸揪?結果跳下彈下...三幾次咪變咗鱷魚潭入面舊肉囉!

上面我所講既野,已經解釋咗點解我係由頭笑到落尾!但咁都無傷大雅,唔通一路睇一路鬧好咩!基本上如果你唔帶任何期望入場,呢百零分鐘都唔係咁難捱既...至少期間我都冇去廁所吖!第時如果電視會播,冇野做都會睇下既,不過值唔值得買飛入場睇既就...

200apple 2017-1-26 05:48 AM

*** 作者被禁止或刪除 內容自動屏蔽 ***

ngszewoo 2017-3-15 10:00 AM

waste of time and money

moviecinema 2017-5-8 06:15 AM

*** 作者被禁止或刪除 內容自動屏蔽 ***
頁: [1]
查看完整版本: 《長城》看後感