查看完整版本 : 《神奇女俠》看後感

Medalmore 2017-7-2 09:17 PM

《神奇女俠》看後感

其實「神奇女俠」呢個名,我第一次聽同見呢個造型,竟然係睇韓劇花樣男子!

唔係朋友講,我都唔知佢同超人係同出一門,而且...我都未聽過DC!Marvel就聽過...

我朋友都忠告過我,DC既電影係偏悶,之前超人VS蝙蝠俠就係例子...不過佢同我講都冇用,一嚟我冇睇過呢套戲,二嚟...佢係響買咗飛之後先講!

其實入場睇初初個半個鐘,我係覺得套戲有點悶,或者我未ready好,套戲係回顧番神奇女俠既典故,甚至我都唔知,成套戲就係神奇女俠既回憶錄...我都睇介紹就衝入去睇嘛!不過唔好誤會,我唔係捧女主角場,而係...只係朋友介紹入去睇啫!

講真女主角外型同造型都無可挑剔架喇,至於話好唔好睇,其實唔係想像中咁悶,但你話邊個做得特別出色,我又講唔出,唯一驚喜就係見到「路平教授」做最後大佬!但講真...佢既出現我一睇就已經feel到,佢應該唔會係簡單既人囉!

成個故事基本上除咗頭半個鐘我未ready好,係覺得有點悶之外,雖然片長成兩個幾鐘,但又唔算太拖,都還可以接受既...

不過整體嚟講,我又唔覺得套戲有乜特別,只係我朋友話接受唔到最後以「龍珠」式絕招打低大佬啫!

總之呢...買飛入場睇又未至於跌錢,但確實驚喜久奉!如果睇西片睇得太多以男人作為英雄既故事覺得悶既話,咪不妨睇下呢個女英雄囉!
頁: [1]
查看完整版本: 《神奇女俠》看後感