查看完整版本 : 《救殭清道夫》看後感

Medalmore 2017-7-4 01:18 AM

《救殭清道夫》看後感

講真吖...我話你聽我鍾意睇殭屍片一定係老點你!我睇佢都係因為...林明禎!我好老實既!

林明禎我係唔識佢呀,係覺得佢係靚囉...不過都係講笑!我睇呢套戲,係因為...有人講過話佢既角色,係類似一眉道人入面既殭屍仔,但就換咗個女仔去做,即管睇下囉...以往我都有睇一眉道人!

其實套戲得個九十零分鐘,好聽D就係節奏明快冇拖泥帶水,但難聽講...其實一大堆野冇交代過!你入面咁多人俾殭屍咬過,咁快就清晒場?就算你話最後張春天D血係抗殭屍毒既疫苗,都救唔切咁多人掛!

仲有...其實各部份都真係講得好短,先嚟張春天個老豆點死,你好快就交代咗...呢個都還算,但入面各人既戲份,除咗錢小豪可能多少少之外,其他既真係似客串,棠哥做張春天老豆既出場時間,可能同做張春天阿嘛既音音姐差唔遠!成套戲幾乎BabyJohn玩晒咁滯...我都仲未講林明禎,其實佢既戲份,都唔係多錢小豪幾多咋!

仲有呢排幾乎轉親去77台都見到佢既李尚正(個電視台真奇妙),佢做既野又係十分費解,話佢去邀功打大佬又做得唔夠盡,又好突然,臨尾衰咗又居然可以抽身走人...想點呀?

仲有錢小豪,一睇佢個款就知,佢最後一定俾殭屍咬,只係估唔到佢唔使死啫!

總之呢成套戲所作既「交代」,由張春天點解入隊,受訓既過程,佢同女殭屍產生感情,去到最後打大佬...真係好「明快」!快到你打個喊怒都幾乎捉唔切!

鬧就鬧完喇,但套戲其實都有讚既地方...

其實套戲話就話BabyJohn幾乎由頭帶到尾,不過佢算係做到主角做到既野,表現唔曳!至於女主角小夏,其實林明禎已經響僅有既戲份,做到應該要做既野,至少我係覺得佢可愛程度,不下於一眉道人入面既殭屍仔既!

仲有...我最後又係估唔到,套戲話就話叫「救殭清道夫」,但實際上去到最後,卻係要靠殭屍(小夏),去打低大殭屍救晒所有人!但佢下場就...

仲有一樣題外話,我都估唔到套戲入面首主題曲(長相廝守),近排都唱得幾hit,都幾好聽既...

總之我覺得呢套戲...如果「道X星期幾影院」或者「乜乜電影台」播佢既話,其實都唔使轉台,可以繼續睇落去,但如果入場買飛睇...特價時段會比較值!

成套戲始終係個故事描寫得幾水過鴨背,到喉唔到肺,甚至其實女主角出場係嫌出得太遲!仲有...其實入面大把好演員,甚至連獎門人同簷Sir都客串,感覺上係浪費咗一大班好演員囉...佢地個個交晒貨架喇!
頁: [1]
查看完整版本: 《救殭清道夫》看後感