查看完整版本 : 【落樓無事】意國型男又密謀炮製二歲王者

KFC朗 2017-8-9 02:31 PM

【落樓無事】意國型男又密謀炮製二歲王者

日本騎師榜形勢最近峰迴路轉,原本上半年係由杜滿萊及李慕華兩大洋將領先,但因為本地薑戸崎圭太趁住暑假不斷喺細場發力,目前佢已經以114W嘅明顯優勢,帶離以99W排第二嘅杜滿萊,只要繼續保持呢個勢,睇嚟戸崎都可以第三度獲封日本冠軍兼可以成功捍衛大和民族尊嚴。至於上周日曾經歷落樓意外嘅杜滿萊,佢雖然失落一哥位置,但仍以23億Yen位列獎金榜第一,帶離戸崎近5億,荷包腫脹度自然遠超對方,果然重質好過重量。

數字唔及人,獎金就咁多,當然同意國型男吼實大賽發功有關。今年佢勝出二月錦標同寶塚紀念賽兩場G1,再另加多場分級賽,一早Mark定晒實力份子自然係佢強項。而最近又有一隻可能係未來馬王嘅實力馬落到佢手中。講緊嘅就係不敗馬王「范高爾」同日本馬后「伏特加」嘅兩歲17冠囝囝Tanino Frankel今週出戰新潟競馬場一場千八米新馬戰,將會交由杜滿萊執韁。前年杜滿萊同練馬師角居勝彥曾經將同樣係超良血,「夏威夷王」同「西沙里奧」嘅囝囝「醋丈夫」帶上最佳兩歲雄馬嘅寶座。珠玉在前,又睇吓Tanino Frankel有意國型男助陣,可唔可以幫成績向來一般嘅「伏特加」子嗣威番次啦。
頁: [1]
查看完整版本: 【落樓無事】意國型男又密謀炮製二歲王者