查看完整版本 : 【有片】地表最強柴田叔掀起兩大世界級高潮

KFC朗 2017-8-9 02:33 PM

【有片】地表最強柴田叔掀起兩大世界級高潮

日本馬壇上半年大賽期已過,暑假嘅賽事全部都集中於細場舉行。雖然好多明星馬都會選擇抖暑回一回氣,但有少數亦會趁呢段時間熱身提早準備下半季。好似上周日喺新潟競馬場舉行嘅泥地千八米三級賽榆樹錦標,就有應屆阿聯酋打吡亞軍「誘人魔力」復出。「誘人魔力」早前曾去過美國參戰三冠尾關貝蒙錦標,可惜賽前因傷退出,結果飛越半個地球都白行一趟。今次喺三級賽場合作戰,仲要配番最佳拍檔有地表最強騎手之稱嘅李慕華,自然被捧成只得1.5倍嘅大熱。之不過,今次地表最強發揮就唔係太強,塞足一條直路之下,即使最後隻馬撲上個勢都幾勁,都最後無力挽回失地,只得第三名。至於頭馬就係由21歲小將木幡巧也策騎嘅66倍巨冷Rose Princedom。

以為李慕華表演世界級塞車就掀起賽事「高潮」?未算呀。同場老將柴田善臣表演世界級出閘就更搶鏡。馬匹出閘唔聽話其實都好常見,不過好似呢隻大冷門T M Anmut咁,起步時好似選港姐咁施施然散步行出閘廂就包你未見過。而更勁嘅地方係,睇到騎師冇乜意欲去修正,將順住隻馬走演繹得淋漓盡致,場面相當搞笑。咁搞法呢路人馬最終有冇被罰?答案係...人就冇事,馬就要被停賽一個月,再經試閘合格先可以出賽喇。

2017年 榆樹錦標↓↓↓ 
http://bit.ly/2wp2Xzx
頁: [1]
查看完整版本: 【有片】地表最強柴田叔掀起兩大世界級高潮