查看完整版本 : 【冠軍在望】96日103W 巴西神蘇又食大四喜

KFC朗 2017-8-10 02:32 PM

【冠軍在望】96日103W 巴西神蘇又食大四喜

外號巴西神蘇嘅蘇兆輝自從同藍營結束合作關係後,近年喺英國同香港兩頭炒散。雖然佢來港客串取得不俗成績,而喺英國就冇乜機會好似莫雅、戴圖理咁跑大賽,但佢都冇選擇長駐香港,咁做法無非都係為咗再次贏得英國冠軍騎師。巴西神蘇上年爭冠最後階段先被高俊誠爬頭,結果衛冕失敗。好彩騎者今年個頭就開得好靚,尋日佢喺布萊頓馬場,更憑兩歲馬Al Ozzdi取得今季第100W添!

蘇兆輝今次破百嘅時間其實只係用咗96日,相比2015年120日同2016年137日快得多。其中原因當然係佢以勤力見稱,無論大場細場都照跑可也,所以截至現時為止佢今年嘅上陣次數達到487次,係全英騎師之冠,堅係勁過新界隻牛。而尋日騎者都係連跑兩場,先喺布萊頓憑Al Ozzdi、Whiteley及Overhaugh Street連中三元,之後就趕去金頓搶多W先收工,完全冇時間慶祝自己達成嘅壯舉。

難怪巴西神蘇賽後接受記者訪問時都笑言呢日只係business as usual(一切照常)。不過佢都補充話好開心可以咁快贏到100W,自己目標當然係想做冠軍,但依家仲係言之尚早, 會盡力做好啲,騎得幾多得幾多,把握好每一次機會。目前蘇兆輝喺英國騎師榜以103場大幅拋離第二位68場嘅咸頓酋長主帥高俊誠,睇嚟今年好有機會成功復仇。
頁: [1]
查看完整版本: 【冠軍在望】96日103W 巴西神蘇又食大四喜