查看完整版本 : 【打倒昨日的我】地表最強返法國反咬鄉里

KFC朗 2017-9-5 07:22 PM

【打倒昨日的我】地表最強返法國反咬鄉里

今個禮拜除咗上演韓國盃及韓國短途錦標之外,法國都有兩場凱旋門大賽前哨戰,福伊錦標以、尼爾錦標喺尚蒂伊馬場舉行。雖然近期戰無不勝嘅Enable冇份跑,但被視為佢嘅主要對手,應屆有馬紀念賽冠軍「里見光鑽」就將會出戰福伊錦標,令呢場熱身賽一樣有睇頭。

今年福伊錦標參賽陣容唔算太強,「地表最強騎手」李慕華返祖家法國倒戈策騎「里見光鑽」,理所當然成為大熱門, 多間歐洲外圍莊家已將佢嘅獨贏賠率調低至少於兩倍,而其他較有支持嘅馬匹,僅得今年根利錦標冠軍「繁星布」,以及去年此賽盟主「銀色海浪」。至於另一匹日本代表,由川田將雅策騎嘅「里見貴族」就淪為全場最冷。

日本隊追逐凱旋門大賽之夢,多年來都未贏過,但其實佢哋跑前哨戰成績一向唔錯。過往,「神鷹」、「黃金巨匠」贏過福伊錦標,「高情厚意」及「豐收節」曾揚威尼爾錦標,而前三駒之後都喺正本戲跑入前四名。如果「里見光鑽」今場出水準,就算之後贏唔到Enable,演出都應該唔會太失威囉!
頁: [1]
查看完整版本: 【打倒昨日的我】地表最強返法國反咬鄉里