查看完整版本 : 【日系放送】自視甚高?三歲馬后要創造歷史

KFC朗 2017-10-3 03:46 PM

【日系放送】自視甚高?三歲馬后要創造歷史

10月8日舉行嘅1800米二級賽每日王冠,大多被視為年長馬挑戰秋季天皇賞嘅熱身戰。不過,睇番個報名表就發覺有少少奇怪,事關除咗幾匹日本一級賽中堅分子例如「神燈光照」、「不撓真鋼」同埋「豐收節」呢啲馬參戰之外,今年嘅日本橡樹大賽盟主Soul Stirring亦都有報名。如果Soul Stirring跑今個月15號舉行嘅雌馬三冠尾關秋華賞,唔跑早前舉行嘅玫瑰錦標,轉跑每日王冠呢個部署照計就趕咗少少,但幕後卻表明Soul Stirring唔會跑秋華賞,反而將會轉攻月尾29號舉行嘅秋季天皇賞,所以每日王冠將會係呢匹三歲馬后最佳試金石。

講到秋季天皇賞,因為路程同秋華賞一樣係2000米,所以甚少三歲馬女會捨易取難,咁早就去挑戰年長馬。講到近10年都只係得一匹Oken Sakura喺2010年以三歲馬女嘅身份去跑秋季天皇賞,最後以過百倍嘅大冷門身份殺入一席第四,而且呢個已經算係一個好成績喇!因為咁多年來係從未有三歲馬女贏過呢項2000米一級賽嘅所以Soul Stirring決定越級挑機,成功嘅話就真係可以創造歷史。

其實講到今年嘅秋季天皇賞,當中預計都有唔少硬嘢。爭取同年天皇賞春秋制霸嘅日本馬王「北部玄駒」當然唔易應付啦。仲有贏過香港瓶嘅「里見皇冠」同埋杜拜草地大賽冠軍「不撓真鋼」呢啲馬喺度,想贏都真係唔容易。究竟Soul Stirring嘅幕後係自視過高定係精心部署,跑完禮拜日嘅每日王冠,或者可以估到個大概啦。
頁: [1]
查看完整版本: 【日系放送】自視甚高?三歲馬后要創造歷史