樂天賜 2017-11-9 04:42
好耐無上嚟嘞, 成年幾囉. 不過最近有D新見聞, 一間好細嘅老牌竹館, 頭牌幫D熟客, 幫到可以一D竹館規矩都無嘅. 即係擺到明俾D老正係度搵食.
咁出類拔萃嘅奇皅, 唔囉出嚟講比大家師兄聽, 等各位開下眼界都好.
前一排, 要去九龍東辦D鎖碎事. 幾次去左九龍東, 係等時間期間, 路過見到一間舊樓地下嘅竹館. 心想入去玩一兩個鐘, 睇下有無運行都好.
嗰陣子, 入過嗰間竹館6-7次, 打埋10零個鐘頭度. 有D咁嘅見識.
[1] 一個老人痴呆樣嘅70歲倒嘅阿婆, 聽D人私語, 阿婆週不時贏錢, 而且次次贏10幾底至肯收手.
後來我同嗰個阿婆打左10幾鋪牌倒, 佢出D橋就係悶死你, 著隻著隻牌扮諗, 要半分鐘至打一隻牌, 等同枱D人燥左, D人就會打錯牌, 之後D牌弱晒, 比阿婆入到位. 因為佢扮老人痴呆, 好多人都由得佢.
嗰次我都由得佢, 叫自己唔好中招. 結果10鋪牌下來, 阿婆輸左幾底. 因為我係生客, 其他兩位係常客. 所以阿婆見做唔到我世界, 出招嘞.
我坐阿婆上家, 一鋪阿婆做莊, 開牌嗰陣, 我仲未摸尾牌, 阿婆就急急打第一隻牌出泥, 我一見佢打牌我就嗌住話我未摸尾牌. 紛亂間阿婆下家就摸牌打.
我即刻叫頭家, 頭家未出聲, 個頭牌就已經老遠走埋嚟.
個頭牌係50幾歲嘅女士, 問左阿婆同睇下枱面兩隻牌, 頭牌就同我講, :[你摸尾牌遲左, 個莊牌都打左, 咁竹館規矩, 咁你就小相公啦, 無得拗.]
我好平和咁同頭牌講: [我未摸尾牌, 阿婆就打牌, 佢一邊打牌, 隻牌都未落地, 我已經嗌住話我未摸尾牌, 佢唔理我嗌住, 佢都照打隻牌落個海度, 咁點可能判我小相公呀.]
頭牌問都唔問其他兩個同枱, 就話: [ 無得講嘞, 竹館規則, 無得違反嘅.]
我當堂好嬲, 因為佢係女人, 唔通同佢嘈咩. 跟住有個同枱先至出聲話係, 聽住我嗌未摸尾牌嘅.
個頭牌仲未肯反判, 頭牌問阿婆係未呀? 阿婆扮晒老人痴呆樣, 唔答頭牌.
結果頭牌再問清楚其他同枱兩個客, 都話阿婆打隻牌未落枱面就聽到我嗌未摸尾牌.
個頭牌先至話判返我摸番尾牌.
就咁, 阿婆D橋用唔到, 打多3鋪阿婆仲係輸, 阿婆就起身轉枱嘞.
[2] 一個40歲嘅女士, 坐我上家, 隻隻牌都渣半分鐘至打, 隻隻都係咁, 幾鋪下來, 我就頂唔順佢出呢D屎橋嚟洞D同枱. 我就催佢快D.
女士望我一眼, 都未出聲, 個女頭牌就走埋嚟同我講: [先生, 打麻雀, 要比人諗架喎.]
我就同個頭牌講:[阿姐, 佢啱啱諗左半分鐘至打隻5同出嚟, 嗱, 妳睇下佢依家手牌, 隻5同駛唔駛諗過至打.]
頭牌望下女士副牌, 無出聲. 我跟住話: [同佢打左成個鐘頭, 佢時時用呢招, 左遲D牌嚟打, 想人地燥, 我打左幾十年牌唔通邊D係真係諗牌同邊D係出緊橋, 唔識分咩.]
頭牌好狠咁望左我一眼, 唔再出聲.
以上兩件事同日發生, 因為我轉過枱.
之後打左幾鋪, 無晒癮. 話左無底, 去厠所之後, 走人. 行到出竹館門口, 係街上門口見到頭牌企定定睇住我. 正想開口同我講野, 我都扮睇唔到, 走左.
心諗, 我又唔係無端去佢竹館搞事, 只係明比人洞, 唔通我唔出聲咩. 咁同頭牌無野好講架.
[3] 另一日, 我係嗰間竹館打左45分鐘倒, 贏左10底倒, 運氣好似唔錯, 坐我對面嘅男人就輸左, 不過每每會整番鋪自摸, 又輸唔去.
我正在諗, 阿哥真好運, 我今日咁好運, 本來贏晒3家嘅, 佢死唔斷氣咁, 輸3幾鋪實執番鋪自摸嘅.
後來比佢嘅手勢吸引左, 有D奇怪. 原來佢間中有一鋪會右手掌"洞"起左, 掌背向外. 放左係枱邊. 跟住佢就會食胡嘅. 所以佢係輸唔死嘅.
嗰鋪佢又係咁. 我即刻數佢洞起嗰手牌, 少左一隻. 我即刻同佢講, : [你有無搞錯呀, 你隻右手原來渣住隻牌架, 你點可渣住隻麻雀嚟打牌架, 全香港竹館都唔比人渣住隻牌嚟打架啦.]
佢笑笑口, 面慒慒, 扮晒唔識野答: [係咩, 我唔知喎.]
我問企係隔離個頭家, 個頭家居然答: [係唔可以將D麻雀攞離開枱面.] 我即刻反問: [你都無答我, 我係問可唔可以用手渣住隻牌嚟打牌呀.]
個頭家先至口窒窒咁話: [係唔得嘅.] 個男人笑笑口放番底手上面隻牌係番枱面副牌度.
唔怪得知佢唔會輸啦, 原來佢極可能行老正橋, 換牌嘅.
打埋嗰鋪牌我都起身嘞. 望下個男人, 我話: [你好野, 做左咁多鋪我都睇唔倒.] 個男人笑笑口咁望住我, 一臉得戚咁, 好似話"你奈得我何咩".
[4] 呢一次就係最離譜. 搞到我就算去嗰區做D野, 有間隙時間都唔再去嗰間竹館打牌. 真係擺明間竹館比D老正係度出老千洞D客人, 而且D老千係可以開晒口話, 係呀. 吹咩.
嗰次我坐低, 半個鐘頭就贏左5-6底. 好順. 點知對家個30幾歲嘅男人就開始出D老正白痴橋, 手執自己KAN踫出嘅牌, 係度拍打枱面. 我就同佢講: [放低KAN牌啦, 竹館規則嚟架.] 佢唔放低, 我叫頭家埋嚟, 頭家望下佢. 比左個眼色. 個男人就放低左KAN牌, 個頭家擰開面, 個男人就照攞番起KAN牌嚟拍打枱面如故, 仲用輕視嘅眼光嚟望住我笑.
我下家個女人, 又係30零歲度, 就手渣住牌泥打, 我叫個女人放番手渣隻牌係副牌度, 個女人扮唔知我講乜. 真係唔知佢係味出老千換到牌, 總之個女人就係咁嘅情況下連食兩鋪自摸.
我望下企係隔離嘅頭家, 佢聽到晒我地嘅對話, 但係佢唔出聲.
經過之前見頭家同我對家個男人打眼色之後. 我都廢事再同頭家講嘞. 佢地擺明有路嘅.
其間嗰女人扮白馬同我對家個男人講:[佢講乜野呀.]
個男人話: [佢話叫我地守竹館規矩喎, 守得咁多咩, 唔駛理佢.]
就係打埋嗰鋪牌, 我就起身走. 起身時我大聲同佢地講, 特登要10呎外個女頭牌聽到嘅. [你地有無搞撚錯呀, 竹館規矩唔駛理, 做晒D出橋嘅動作, 咁你地味擺明係度搵笨, 我仲同你打牌, 我未係好ON 居.]
我轉身, 頭也不回便離開了嗰間竹館, 之後就算有去嗰區辦事, 有空隙時間都唔再入去嘞.
一來已經好少去竹館, 一個月才兩三次, 每次兩個鐘頭. 自己牌癮無以前咁大, 二來呢間竹館擺明比老千係度出老千搵D客人笨嘅. 我梗係再唔入去打牌啦.
本來有開佢名嘅衝動. 不過回想差不多成10年來我係呢度 UP 野, 幾咁唔公正嘅事, 我都無開竹館名嘅.
竹館都要養好多伙計架. 算啦. 總之去竹館打牌大家小心. 睇到個勢.
有D竹館真係放任老千係度搵食架. 好似呢間標題竹館咁, 講到明叫D老千係度搵食, 總之入嚟幫襯就得嘅, 呢D竹館, 各位師兄一定唔好去, 隨非係老千啦咁就有買襯手嘞, D頭家任老千係佢個場搵食, 仲幫埋老千口叫D客唔好多事, 咁D老千係呢個場就一定有安樂茶飯食嘅.
完了.
[[i] 本帖最後由 樂天賜 於 2017-11-9 11:59 AM 編輯 [/i]]
樂天賜 2017-11-9 18:20
間間竹館都會有老正架啦.
有無呢間咁猖狂, 當然有啦, 不過竹館頭家甚至頭牌可以幫D老正幫到出晒面就真係呢間最"出"嘞.
若果有老正係度行法, 咁嘅竹館就唔去, 咁就所有竹館都唔駛去.
所以一路我都無所謂, 發現老正就轉枱, 遇上問題就出口問下D頭家得唔得之瑪, 通常頭家點幫熟客都唔會將d竹館規則唔理嘅. 就只有呢間竹館, 就次次D頭家都幫D老正嘅, 就係呢間第一次見. 況且頭家同D老正打晒眼色嘅都見唔少. 不過D老千仲大聲過D頭家嘅就未見過.
令到我唔再入呢間竹館嘅最後打牌嗰次, 就係嗰對疑似老正男女大大聲開到口話係呢間竹館打牌唔駛守竹館規矩. 咁我就鬧完佢地之後, 我就無再入過呢間竹館.
嗰對男女大大聲咁講, 表明D老正跟本唔將D頭家或者連頭牌都無放入眼內, 亦有可能係一家人嚟.
唔再入去打牌講明D, 就係感覺到間竹館"話事"嘅唔係頭家, 而係D老千. 咁你明白未.
[[i] 本帖最後由 樂天賜 於 2017-11-9 06:32 PM 編輯 [/i]]
樂天賜 2017-11-10 04:37
10年以來, 我係呢度講嘅竹館見聞, 一為娛樂, 二為比大家看看竹館發生嘅鎖事. 大家知所警惕.
若果老千橋大家唔關心, 咁就當我無講過, 我亦都無必要去說服一D唔知嘅人, 又或者本來就係老千嘅人.
一D唔用心去學老千術. 只係出埋D白痴老千橋嘅人, 比如用牌拍枱, 出口術. 呢D看似無所謂嘅所謂小動作, 其實亦係老千法嘅一種.
大家有無感覺到而家係竹館D客人已經警覺好多, 幾年前我都已經係度講過, 同枱4個人打左成半個鐘頭都無出聲, 一次嗰位女士諗左一陣牌, 突然間講左一句: [打呢隻牌出去會輸架喎.] 我就同佢講: [小姐你唔可以講呢鋪牌D野架喎, 呢D係出口術, 你點可以提醒人你將會打嗰隻牌會輸架.] 個女人好嬲咁鬧我: [我唔講得野架?] 我都未答佢. 其他兩個同枱男士就已突然一齊開口話: [係, 小姐打緊牌係唔可以講野嘅.]
呢D咁嘅警覺性己經係竹館形成左, 大家依家係竹館打牌係唔係發覺D人比幾年前少出聲左.
亦時不時會有人鬧其他人出口術, 有D場D頭家己經對客人打牌中用麻雀拍枱, 視作為"幾咁閒"到依家D頭家接到投訴就會叫D人唔好拍枱.
至於所謂常見嘅小動作, 其實就係行緊D白痴老千橋或者係出老千術前嘅通常第一個動作.
就以個男人手渣住KAN牌拍枱為例子. 就係明顯嘅白痴老千術. 打緊牌點可能比你間中遮掩D己露出嚟嘅牌唔比人睇到架. 隨時可能做成同枱錯判出牌情況而打錯牌, 咁仲唔係出老千! 至於拍枱騷擾其他人打牌呢樣更加係白痴到無輪嘅老千術一種啦. 呢條白痴橋依家D人都唔多行啦. 10次行呢條橋9次比同枱制止啦.
至於手渣一隻牌同埋KAM低一隻牌嚟打, 就係通常無咁高手嘅老千換牌時第一個動作, 呢條橋係竹館規則係唔准架.
若果有人認為只視呢D係小動作唔重要, 咁就由得佢. 不過我遇上同枱有人行呢D橋, 我就轉枱嘞, 無謂比D老千厄錢呀.
至於開名就無謂嘞. 9年前我係度講過比高手老千頻頻換牌嗰次我都無開名啦. 到依家我, 事隔9年, 我都唔會開嗰間竹館嘅名. 竹館伙記多要做生意架, 總之自己小心D好啦.