查看完整版本 : 《ME BEFORE YOU》教曉我–「要得小龍女,要麼斷手,要麼斷腳。」

namfy 2018-7-16 09:21 PM

《ME BEFORE YOU》教曉我–「要得小龍女,要麼斷手,要麼斷腳。」

《ME BEFORE YOU》(我要你好好的),係近年難得既好電影,係我眼中一套好既電影除左有細膩既演出,動人既情節外,要令觀眾完場有所得著既先為之一套好電影。而《ME BEFORE YOU》除左比左我兩小時既娛樂外更加教曉左一樣野–有錢人原來真係打跛腳都唔駛休。



《ME BEFORE YOU》係改篇自同名小說既電影,電影界中小說雖好但劇本爛透既情況不時出現。但《ME》係一個改篇成功既例子,好既劇本講緊既係要天人合一,意思就係天時地利人和都要恰如其份咁係劇本上出現,例如大雄一定要有叮噹先娶到靜香,無間道中呀劉生一定要係戲院俾情報志偉哥先唔會俾陳生捉到。

 

而《ME》就好似一本戲劇教科書,完美呈現出何為愛情神奇既化學效果,將窮家女同有錢仔拉埋一齊,而且仲要係柏拉圖式既真戀愛﹗(又可以話礙於身體機能先造就出柏拉圖式戀愛)



要做到《ME》依種戲劇效果,首先當然要有一個有錢仔,而依個有錢仔一定要係一個三十出頭既靚仔,依個三十出頭既有錢靚仔仲要因為意外跛左,只要編劇諗到一個咁既有錢仔出黎,之後依個又跛又有錢又無野好做既靚仔就自然會想要搵人陪下佢散下心。咁既時候再有一個窮家女入黎做陪坐係絕對合情合理,而《ME》就係咁既人設同地利人和之下誕生左出黎既劇本。

 

其實第一場男主角同舊女友啪啪啪完識行識走個陣,我只係覺得佢會係蘭桂坊煮腸應該幾好食既鬼佬,但跛左變左真廢青之後,佢靚仔既程度係升左兩倍﹗同時間仲透視出香港人最渴望既真夢想–打跛腳唔駛休之後既生活實況,除左坐係到聽音樂睇電影依尐中產生活之外,更加赤裸裸毫無保留好殘醋咁講左個真相俾我地班小毒男觀眾知–只要你係靚仔同夠有錢住城堡,那怕你殘廢、脾氣臭、唔剃鬚,你一樣會溝到女,而相反,就算你愛運動有上進心,假日仲會去玩三項鐵人都好,你都敵唔過一個跛左既有錢佬。



有錢就係無敵,但有錢可以有幾無敵就完完全全係《ME》入面既男主角身上表露無遺。

 

男主角難相處既程度真係非筆墨形容,除左一開始見人就扮弱智之外,佢既嘴臉既變化真係勁過中國變臉。



有幾勁?導演就特登用左寶貴既五分鐘俾男主角表演佢既醜陋表情。(同時間俾女主角表現佢對時裝獨特既品味)

 

不過咁講,男主角既醜陋都係依套戲既難演之處,要個演員坐係到咩都唔做,剩係靠樣搵食,仲要係靠衰樣黎搵食真心唔容易。唔係唔得既,不過劉德華都未必做到囉﹗而男主角亦都成功靠佢死剩個衰樣既威能,將唯一肯親近佢既小龍女追到手。

 

好啦﹗我剩係講有錢人點溝女其實係對套電影唔公平唔尊重,因為《ME》依套電影最厲害之處,除左好殘醋咁話比我地知有錢住城堡可以得女得天下之外,仲教左女觀眾們點先可以唔駛上身既同時又吊到金龜婿。《ME》依套電影真係可以話係完美示範吊金龜婿既TOP OF THE TOP,比搵個九十歲甜心老爹等佢死左之後分身家,更加把炮更加高明﹗



成套電影就係講女主角半年內同男主角發生既事,男主角因一單交通意外跛左,然後女主角就俾男主角呀媽請左返黎,陪佢個仔一齊坐半年,直到佢個仔去荷蘭安樂……咳咳……係約滿為止。基本上就咁講出黎件事其實係幾悶,但最令件事唔悶除左男主角完美表現出有錢人既惡形惡相外,另一樣就係出現左一個非常甜美既小龍女再加上其甜到漏既會心笑容。我相信所有男觀眾同我一樣,每次見到小龍女既笑容都感覺相當治癒。

 

俗語有話–「你一笑我就想要」,只要係識笑既女仔,生得好唔好睇都會加分,成日笑既女仔加既分更加係幾何級數,所以要吊金龜第一件事就係要學識點笑。真心講一句,小龍女既笑容真係令套電影起死回生既靈藥一樣,亦都令男主角已死既心再始燃起來﹗話需如此,小龍女固然係人靚聲甜笑容正,但係真正令男主角覺得小龍女吸引,原因唔係因為佢笑容好而只因佢一出場就跛左。



係睇《ME》之前,全世界既女人都會認為,一個女人要受到男人歡迎,衣著係重中之重,但《ME》同你講,衣著並唔係最重要,最重要既係要禁室培育咁培育佢對時裝品味同觸覺。只要你既男人跛左,你就可以日日係佢面前著怪衫洗佢腦,無論你著到幾古怪,幾荒謬,甚至係鐘意黃黑間蜜蜂長襪都好,你日日著,日日洗,洗腦洗到好似味精中毒咁,佢就會有一日情心款款咁望住你同你講,「你都幾有潛質做時裝。」之後仲俾埋錢你去讀時裝,個一刻你就知道,個個男人已經愛到你不能自拔。而你到時鐘意著衫就著衫唔鐘意著衫就唔著衫,衣著怎樣?who care?



其實跛真係成套戲既重點,有睇《ME》既人或者都記得,有一幕相當感人既場面,就係男主角去左前女友既婚禮上面,而男主角無視在場既目光,係跳舞環節入面同小龍女坐住輪椅係舞池中間轉黎轉去,依個時候男主角講左一句,「你真係好正。」女主角就反指住佢前女友應返佢,「好彩你跛左,唔係既話你一定會去搵個班波大腰幼既金髮女郎啪啪啪。」男主角聽完都無否認。



點解我會特登攞依段出黎講?原因就係當我地所有男觀眾都覺得啪啪啪一定搵小龍女先係最正既時候,電影既編劇就係依一段情節入面,用電影語言同潛台詞公開咁話左俾所有女觀眾知道得到金龜既秘密。依個秘密就係你要打跛金龜隻腳﹗情況就如將天使對翼扯落黎,天使落左凡間之後自然會對凡人動感情,女觀眾們,你地只要唔介意啪啪啪一定要女上男下既話,打跛佢隻腳,人就係你的了。

 

講左咁耐,我成篇文都好似好唔忿氣一個又跛又臭脾氣既男人,因為有錢而溝到小龍女,所以為左葡萄男主角而寫依篇文。但我都真心覺得套《ME》係好睇,特別係去到感動位既時候,連一向男兒有淚不輕彈既我都用左幾張紙巾抹抹淚水。或者平時有淚不輕彈可能真係因為只是未到傷心處,但睇住男女主角一步一步咁互相靠近,都令我諗返起以前情關上遇到既唔順景。而見証住二人既關係變得親密,都補足左我心靈上一尐無留意到,但一直都在既傷口。係依一刻,

《ME BEFORE YOU》已經成為左本年度我最喜愛既愛情(非動作類)電影。
頁: [1]
查看完整版本: 《ME BEFORE YOU》教曉我–「要得小龍女,要麼斷手,要麼斷腳。」