查看完整版本 : <廣東話出師表,超堅!>

05ho 2018-11-23 07:05 PM

<廣東話出師表,超堅!>

我同你講:你伯爺撈世界撈到一半就拉佐柴。宜家個場又分成三忽,益州又就快俾人掠埋,家下真係幾大鑊。好彩你老豆班𡃁夠姜,劈起友黎唔要命,你估佢地為你啊?!俾面你老豆咋!所以唔好話我話你丫,識諗嘅就的起心肝搞好個社團佢,咪搞到你老豆死都唔眼閉呀。唔好成日以為自己成隻狗咁,班契弟個個都睇你頭架,唔好俾面唔要面!

屋企同場口都係你地頭,邊個唔識做就打埋去,千祈唔好就住就住。下面班𡃁見到就無晒嘢講啦。好似喪郭啊、費爺啊、老董啊佢地都係你死鬼老豆D手足,得閒就同佢地斟下,無壞既。向寵條契弟雖然霎下霎下,之但係佢又幾識撈,你死鬼老豆舊時都幾睇重佢嘎。有時間同佢飲下茶,有著數實會預埋你。黐埋啲夠雷氣嘅,踢走班仆街,先漢咪風生水起囉;黐埋啲仆街,踢走班夠雷氣嘅,後漢咪冚家鏟囉。喪郭、費爺、老董、向寵都係義氣仔女,拍住佢哋社團一定可以好快撈番起。

唔怕同你講,你世伯我原先喺南陽耕田㗎咋,個勢立立亂,好彩就話執翻條命仔,諗都無諗過出嚟行。難得你死鬼老豆唔嫌我縮骨,日日嚟痴飯食,問哩問路,仲煩過伯爺婆,我頂佢唔順唯有出嚟陪佢撈世界。後尾俾人踩場係我出去頂,俾大耳窿追數又係我出去頂,頂下頂下都成二十幾碌咯。

你個死鬼老豆知我有料,死唔斷氣都要交晒D生意俾我。日又捱夜又捱,又驚死撈得唔好你老豆半夜翻嚟搵我,咪喺五月份帶班𡃁過大海,果度真係毛都唔多條!宜家好啦,南邊個場俾我哋擺平左,班契弟又搵晒架撐,你好去劈友啦。邊個唔順超既就斬開佢幾廿椂,掟落鹹水海餵鯊魚,將我哋個啲場攞晒翻嚟。嗱,你死鬼老豆就交帶我咁多嘞,其他你去搵我之前講果幾條友喇。

世侄,我幫你劈埋今次友,撈唔掂你就捉我去祭旗。如果個場口唔夠旺,就去揾喪郭果幾條茂利同你拆。其餘既嘢,就睇你自己啦!

我就走㗎啦,寫呢篇嘢真係寫到成殼眼淚鼻涕,都唔知寫緊乜,你自己執生。

source: 人人粵韻

Kingsourceman 2018-11-24 01:05 AM

就算用廣東話口語寫,宜家D後生都係明一半......
試用網語寫?

前來外圍的神童 2018-11-25 05:21 AM

[quote]原帖由 [i]05ho[/i] 於 2018-11-23 07:05 PM 發表 [url=https://www.discuss.com.hk/redirect.php?goto=findpost&pid=490981414&ptid=27868831][img]https://www.discuss.com.hk/images/common/back.gif[/img][/url]
我同你講:你伯爺撈世界撈到一半就拉佐柴。宜家個場又分成三忽,益州又就快俾人掠埋,家下真係幾大鑊。好彩你老豆班𡃁夠姜,劈起友黎唔要命,你估佢地為你啊?!俾面你老豆咋!所以唔好話我話你丫,識諗嘅就的起心肝搞好個社團佢,咪搞到你老豆死都唔眼閉呀。唔好成日以為自己成隻狗咁,班契弟個個都睇你頭架,唔好俾面唔要面!

屋企同場口都係你地頭,邊個唔識做就打埋去,千祈唔好就住就住。下面班𡃁見到就無晒嘢講啦。好 ... [/quote]


武侯寫給皇叔的一封另類情書。
頁: [1]
查看完整版本: <廣東話出師表,超堅!>