查看完整版本 : 風癩/風疹/癮疹/蕁麻疹呢一年嘅經歷

想分享一下我患風癩/風疹/癮疹/蕁麻疹呢一年嘅經歷，雖然呢個唔算係咩嚴重大病，但係我發覺身邊越來越多親朋戚友都發過呢個病，不過每個個案都些小差異，而上網搵資料又唔係好多，就算有都係香港以外嘅資料，同埋大部分都係理論，並非由真實個案去剖析。最近網上又見到好多人有呢個問題，所以響呢度分享一下由發病到痊癒嘅經歷，等大家唔使浪費咁多時間同金錢，同埋比信念各位個病係會醫好，唔須要絕望，不過我所講嘅方法未必適合所有人，始終不同人嘅體質會有不同反應，尤其是小童，所以使用前最好試一下有冇副作用，確保自己冇問題先好繼續使用！都幾長，分開咗八段，要啲時間睇！或者當古仔睇完就算！

1/ 病發初期
其實我身體一直都算幾好，四十幾歲，唔煙唔酒，每星期仲有去做下Gym，保持身體健康，手腳靈活，冇乜病痛，好幾年都無須睇醫生，
响2017年大概五月左右，氣溫時冷時熱，時晴時雨，上班路上非常熱，行到返公司已經一身汗，最弊入到公司後又好似殮房咁凍！終於染上感冒，由於冇睇開醫生，是但去睇西醫食下藥，過兩星期就好返，不過冇幾耐雙手同手指無端端起咗啲紅疹，一塊塊好似蚊咬咁，痕一兩日再搽下藥膏又冇事，跟著幾個月都斷斷續續咁起感冒唔斷尾，因為上班地點同時間問題，每次都睇唔同嘅西醫，應該係見到邊間開門又冇乜人等就睇。唔知點解個感冒會咁長手尾，拖咗幾個月都未完全好番！如是者去到十月中秋，工作關系要出差，臨上機前兩日又再次起紅疹，但係今次除咗手之外，仲有心口都有，因為要上機，所以就睇番之前個醫生，醫生話可能我中秋節食得太多野，譬如月餅鹹蛋黃都會引起敏感，然後開咗支粉紅色藥膏比我，話痕就搽下，咁出差幾日就日日搽，但係都只係暫時止下紅腫，有時候癢癢難耐，唯有死忍！
到回港後，發覺啲紅疹持續咁起，於是去同一個醫生覆診，點知醫生睇完縐哂眉話不如寫醫生紙比你去睇皮膚專科，又開啲藥膏就算，因為啲專科醫生非常難約，要預早一星期先有位，咁我就搵第二個家庭醫生睇住先，當聽下不同意見，點知佢話小小敏感搽下藥膏飲多啲水就得，嘩搽完冇好轉不特止仲起多咗，開始遍佈全身，連埋腳掌都起埋，我發覺最痛苦原來係對腳掌起紅疹，感覺好痕，但係又搲唔到，又比對鞋刮下刮下，啲紅疹搲完刮完會變大，原本兩個黃豆咁大粒又會黐埋兼變到好似雞蛋咁大，嗰種痛苦真係難以形容！最慘紅疹過後，相同位置會變瘀，掂到都痛！着著對鞋嘅時候係對腳痛到唔想行！好彩過一晚又會退番哂，好似乜都冇發生過咁！但係日日瞓醒後會响全身不同地方咁發出嚟。有時响雙手、心口、頸、背成部、肚、PatPat、大腿、腳掌等，亦試過塊臉、腫到成個豬頭咁！[attach]9373119[/attach][attach]9373120[/attach]

2/ 尋找坊間偏方

之後我聽人講話食龜靈膏會好，咁我就去太子好出名嗰間試下食佢地嘅極品龜靈膠，講咗個病情比個店員聽，佢就加埋包藥粉比我撈嚟食，記得好多年前試食過一啖，覺得非常難食，打死都唔會再食，唔知點解今次唔使三分鐘就飲完一盅，價錢好似差不多四百蚊都幾貴下，店員仲千叮萬囑一定要戒口，講咗一大堆食物都話唔食得，同埋要食三至五日，視乎情況，咁我就好聽話晚晚放公都去食一盅，又聽佢話戒口，乜都唔敢食，五日話咁快就過，結果身上嘅紅疹冇停過，仲有蔓延跡象，當然立即停止冇再去食。

3/皮膚專科
之後拿拿聲約皮膚專科睇。醫生話我患嘅係風疹或者叫蕁麻疹，不過未肯定係急性定慢性，因為醫學上出疹超過六星期先定為慢性，急性嚟講就算唔睇醫生或者唔理佢都會自己好返，如果慢性嘅話就麻煩得多！而我只係持續出咗四星期，醫生就開咗一大堆藥丸比我服食兩星期，叫甚麼第一代第二代敏感藥，其實係抗組織胺，粒粒好似子彈咁大，食完仲好眼瞓，毋需戒口，專科收費就$1000！當食咗兩星期抗敏感藥之後，只係稍為好咗少少，大概10%左右，再返去覆診，醫生睇完確診為慢性蕁麻疹(Urticaria)，因為由發病開始，已經持續超過六星期，所以醫生就轉一部分藥，叫我繼續食兩星期，如是者又返去覆診，點知醫生縐哂眉，因為完全冇好轉兼嚴重咗，佢建議我抽血同抽尿去做檢驗，咁我又聽佢講照抽當求個明白，醫生又再開唔同嘅抗組織胺組合比我試，仲叫我每日做紀錄，記低每日發病情況。兩個星期又過去，我返診所睇報告兼比我份報告佢，醫生話未試過有病人咁聽話真係做一份出疹紀錄報告比佢睇！跟著佢同我講解番血液同尿液檢驗報告，全部都好靚仔，冇跡象顯示我身體有其他毛病引致蕁麻疹，而醫生亦都解釋唔到點解會發生此病，只係話好多原因會引起，非常無奈！如果下一步嘅話就要試打針，一個月打一次，連續打半年，費用非常驚人，整個療程要過十萬！！不過佢又話未至於嚴重到要行呢一步！醫生唯有再轉唔同嘅組合比我試，佢話診所內所有抗組織胺都開哂比我試，有時候誤打誤撞會有驚喜！當時我係驚嚇！連專科醫生都冇把握，咁仲有咩方法？！之後我冇再睇專科，只係攞佢啲藥去藥房配，DOXEPIN, MONTELUKAST, XYZAL, TELFAST, DHATIFEN, NUELIN, LABIXTEN, APO, 上網搜尋資料其實啲藥本身係用嚟醫哮喘！自己試到最理想為止！
[attach]9380104[/attach]
[attach]9380105[/attach]

4/止痕方法
响失望嘅心情下唯有自己安慰自己繼續搵唔同嘅方法去醫治。响嗰段日子，其實我親身試咗啲方法去止痕，自己感覺比較有效，其他人就唔肯定，而坊間所謂嘅偏方例如金銀花、元茜水、片糖沖涼全部都冇用，首先我係發現無比滴(香港版)，因為真係被蚊針，咁順便搽下其他患處。搽完好涼爽，立即止痕癢幾好不過要小心日版含類固醇；第二種係安美露，搽完會發熱嗰款，因為我肩頸酸痛，所以會間中搽下，咁又唔覺意擠得太多流咗落背脊有紅疹嘅位置，過咗一陣發覺有安美露嘅紅疹好快就平伏唔痕，非常有效，不過缺點係當運動後例如走路或者心情緊張嘅時候，佢會發熱，患處會覺得好似火燒咁，成個人都出汗，但係真係幾有效，所以我隨即買咗十幾支，因為每日搽嘅話，全身搽一次已經用咗十分一支！而最後一種係我覺得更有效嘅藥膏，佢就係寶膚靈！好奇怪，成盅野幾年前去北京旅行時買，一直放响雪櫃看門口冇用過，有次煮野時辣親，咁就去攞嚟搽，望下說明書見到話可以用响蕁麻疹患處，咁就試下，試完後又算真係好神奇，紅疹位好快平伏仲冇副作用，而且止痕效果圍持好耐！咁一大盅好快就比我搽哂，香港周圍都斷貨，之後要托人去北京買！不過後來發現原來可以上網訂！
[attach]9384250[/attach]

5/ 睇錯醫生

根據我嘅化驗報告，專科醫生已經否定係紅斑狼瘡或類風濕性關節炎引致，咁我就冇放棄，繼續去搵方法去醫治。响聖誕節前上網見到有個皮膚科醫生評語幾好，又有接受訪問又講解醫治濕疹案例…！我就打電話去預約試下，地址响旺角某商業大廈，上到去個診所發覺有啲唔對路，好多美容儀器同埋個裝修好似美容院，個男醫生好年輕，雖然有着醫生袍，但係好明顯佢似美容醫生多過皮膚專科，而醫生見到我情況嘅時候面有難色，又睇下我食緊咩藥，佢立即响我面前上網搵資料，話我呢個病好麻煩，要將起紅疹嘅患處割一塊肉出嚟，然後送去化驗室做化驗…我越聽越恐怖，同佢吹下水之後藥都唔使開就立刻走人！又收咗六舊吹水費！

6/ 病入膏肓
去到十二月廿九號晚我經過一間藥材鋪，見到入面有位註診老中醫，於是又激起咗我嘅冒險精神，抱著乜都要試下，咁就入咗去睇，聽佢講解發病嘅原因都係因為濕，濕，又係濕! 佢之後開咗兩劑比我自己返屋企煲嚟飲。仲叫我切記要戒食海洋生物，凡係海入面生長嘅生物都唔掂得！於是又乖乖返屋企煲嚟飲，飲完嗰晚我咳得好犀利，好難至瞓得着覺，到咗第二朝起身，發覺全身唔多妥，全身發滾，揭起啲衫照鏡望到自己體無完膚，從未試過起得咁得人驚，無論响頭嘅眼耳口鼻到身體每一吋地方包括手腳都係紅疹，而且感覺呼吸困難，所以乜都唔諗即刻飛的去醫院睇急症！因為係私家醫院，所以好快就幫我睇，醫生話我啲風疹好嚴重，除咗體外，連氣管都起咗紅疹，導致氣管
壁收窄令到我呼吸困難，立刻要我打支腎上腺素，姑娘話支針要打响肌肉位唔能夠打手，所以幾十歲都要除褲打Pat Pat，打完後姑娘話個人會飄飄然，唔可以走嚟走去，然後醫生話安全計要幫我抽血驗下，我即時回應話之前响專科診所度驗哂，乜事都冇，仲即刻download份報告比佢睇，醫生睇完就話唔應該驗呢啲，係驗對各種物質嘅敏感反應，咁就立刻辦入院手續兼又比佢抽咗幾支血去化驗！住院期間，醫生話會開類固醇比我食，但係份量唔會好重，否則副作用會好大影響，食完第二朝起身真係完全好番哂，醫生檢查後話同我睇埋報告可以出院，佢話我份報告有重大發現，原來根源係對塵蟎有敏感，個指數係+0.36，而其他項目同igE好正常，我當時都唔知個指數係代表乜！咁唯有返屋企後第一時間將所有舊(用咗兩年)床褥床單全部扔掉全套換新，仲要係指定防塵蟎處理，再買埋部強力兼專門對付過敏源嘅吸塵機，再加埋部紫外光燈，確保安全！點知瞓咗幾晚，啲紅疹又出番哂嚟，今次真係心灰意冷！但係我都冇氣餒，繼續諗辦法去治療好呢個病！
[attach]9395881[/attach]
[attach]9395882[/attach]

好詳盡。現在點樣？

[quote]原帖由 [i]2006Win-Cat[/i] 於 2019-3-4 09:14 PM 發表 [url=https://www.discuss.com.hk/redirect.php?goto=findpost&pid=495734998&ptid=28059628][img]https://www.discuss.com.hk/images/common/back.gif[/img][/url]
好詳盡。現在點樣？ [/quote]
總算已經康復，因為忙碌中，好快會繼續寫落去，到最後會講番自己點樣醫好。

期待樓主...好想知點樣好返

我出了風癩已經五個月, 中醫西醫都看過, 中藥完全無效, 西藥吃完可以止下, 隔天再出過, 洗澡時和暖水都出, 就算不抓癢, 成個背部都像地圖, 其實牛, 羊, 海鮮等等東西都沒吃, 情況都未能改善, 看到樓主說不要灰心, 雖然如此, 但是內心都很不開心.

我試下買寶膚靈用, 謝謝樓主.

7/轉睇中醫
跟著我又攞咗份報告比之前個專科醫生睇，又問下佢啲意見，亦順便攞啲藥傍下身，不過佢睇完報告話雖然驗到我對塵蟎有敏感，但係個指數只係+0.36實在太低，不足以令我全身起紅疹！最終佢都係冇辦法，問我覺得之前邊隻藥有效，佢照開番比我頂住…！日子一日一日咁過，每朝瞓醒依然周身起紅疹，真係痕癢慘過大病，到咗臨過年前有一晚收工好凍，經過一間中醫診所，見到門口有宣傳版上面其中一句寫著專醫”蕁麻疹”…，咁我又唔理沖入去登記掛號試下睇，見有四五個病人等緊，响等嘅時候即刻上網查下間診所背景同醫師評語，原來間診所有幾間分店，班醫師輪流去唔同診所註診，都有小小信心，起碼唔再係美容院。當我見到醫師時發覺今次係個年輕女醫師，着醫師袍帶著口罩，估計不到四十歲，了解完我情況又同我把脈，睇脷苔，問大便情況，再要求除褲比佢望下我大腿情況！最終佢結論都係濕重，因為脷苔厚、大便溏稀，仲有講解發病原因，濕是先天抵抗力不足，飲食失宜，脾臟功能下降，或本為脾虛之體，脾濕內生，或蘊濕生熱，鬱於肌膚而發，且濕性粘滯，導致病情反復難癒。佢話好有信心可以醫好，只要按照佢吩咐就得，最重要戒口，佢話我嘅情況比濕疹容易好多，跟著就開藥方去搵出我嘅根源醫治，同埋有支藥油搽，連續睇咗幾星期發覺佢開始控制到啲紅疹，不過仍然有發作，只是情況比之前好，主要之前全身數埋有過百大小患處，而家就大概五十個左右，集中响雙手，大腿同Pat Pat，如是者，一睇就連續睇咗幾個月，係無間斷每星期一次，每次診金連藥$610。圍持咗半年咁睇呢個醫師，情況一路有好轉，但係又不能完全康復，點都有十處八處起紅疹。
其實我發覺戒唔戒口都冇乜影響，我試過成個星期乜都唔食，只食飯同菜，飲水同藥，結果都係起，反而唔戒口乜都食又冇話特別起得多！醫師診所有嘅藥都開過哂，每次因應不同狀況好努力咁去調整粉量，有時候又試下啲新處方，好似做咗白老鼠咁，試完又循環再試之前嘅處方，正所謂久病成醫、我而家都識哂啲方子，有甚麼消風散、導赤散、平胃散、藿香正氣散、五味消毒飲，龍膽瀉肝湯、地膚子、土茯苓、廣藿香、薏苡仁、枇杷葉、馬齒莧、糯稻根、桑葉、玄參、防風、連翹、荊芥、白朮、蒼朮等…我見又有啲成效，所以一路都唔敢放棄，醫師每次都話應該好快會醫好，耐心啲，一定要戒口！唯有聽醫師講等呢一日嘅來臨！但係我仍然繼續去搜尋其他方法去醫治呢個病！

[quote]原帖由 [i]荃灣田田[/i] 於 2019-3-5 01:56 PM 發表 [url=https://www.discuss.com.hk/redirect.php?goto=findpost&pid=495766594&ptid=28059628][img]https://www.discuss.com.hk/images/common/back.gif[/img][/url]
我出了風癩已經五個月, 中醫西醫都看過, 中藥完全無效, 西藥吃完可以止下, 隔天再出過, 洗澡時和暖水都出, 就算不抓癢, 成個背部都像地圖, 其實牛, 羊, 海鮮等等東西都沒吃, 情況都未能改善, 看到樓主說不要灰心, 雖然如此, 但是內心都很不開心. ... [/quote]
見到你呢個post，我要立即寫埋終極治療方法！請耐心等一等！

8/ 終極治癒
捱咗咁多個月又苦又難飲嘅中藥都未完全康復，而且每次飲完都想嘔，講真真係有啲想放棄!大概去到六月左右，我無意中上網睇到有文章轉載嚴浩嘅專欄，我見到佢介紹食益生箘可以醫治濕疹，當時半信半疑，跟著我又上網搵資料，發現有另一篇報導話人年紀越大，體內腸道益箘會慢慢減少，導致免疫系統出問題，並且會引起皮膚病等；又再睇到另一篇話而家啲醫生經常亂開抗生素比啲患感冒嘅病人，因為抗生素會殺哂人體內所有細菌包括益箘，所以會令人喪失免疫功能…咁我又回想起當初我係因為有感冒去隨便睇醫生，而且每次食咗好多抗生素，即時聯想到自己免疫系統可能已經被破壞，所以引起紅疹呢個問題！我就根據嚴浩所講搵隻C字頭嘅益生箘試下，咁我响商場見到有間鋪頭係C字頭牌子就入去買樽嚟試下，售貨員問我要幾多億？我話乜都唔識，總之比隻最勁我就得，初時食頭幾日冇乜特別，當食咗兩星期左右，啲紅疹好明顯少咗好多，去中醫師到睇話進展好好，應該好快會好返哂，我當時並冇同佢講食緊益生箘，佢繼續開藥比我服，到咗八月頭，全身紅疹終於消失哂，我自己又試下停止唔服中藥，但係繼續睇多一次中醫攞定啲藥看門口，同埋都保持戒口。再經過兩個月後，我開始慢慢食返之前戒咗嘅食物，好似魚、蝦、燒鵝咁，發覺通通都冇再翻發，確定自己真係完全好番哂，直到現在，我仍然食緊益生箘。不過我睇番嚴浩篇文章，原來佢講C字頭係指益生箘裏面其中一隻箘配方名-Clinca，並非我所買嘅C字頭牌子名！而佢推介嗰款牌子市面得一間鋪頭賣，我亦都試過，可能我已經康復，所以感覺唔到有咩分別。心諗我又錯有錯着，之前隻箘好夾我！我亦都試過另一隻好流行嘅G字頭牌子，食完幾日後痾到我腳軟，即時停止冇繼續食。
之後我有朋友同樣起蕁麻疹，我就同佢講返我嘅經歷，佢又即刻試下食益生箘，不過就第二隻不知名牌子，不到一星期又好返哂，唔肯定佢係唔係因為急性，根本唔理佢都會好返嗰隻！
但係想再講番，我所用嘅方法，未必人人合適，因為呢個病起因太多問號? 唔肯定以上方法對每個人都有效，當係多一種方法，多一啲希望，唔使太灰心！病向” 錢” 中醫！祝各位身體健康！多謝觀賞！
**THE END**

##如果想更多關於益生菌資料，可以直接跳到第32頁， 第472篇介紹。

[[i] 本帖最後由 17072006 於 2020-7-11 11:31 PM 編輯 [/i]]

樓主, 謝謝你將經歷分享給大家, 這是一篇很詳盡的文章, 實在是很好的意見. 是的, 生風癩確實是一件糟糕的事情, 不過正如你說到, 自己安慰自己和不要放棄, 我也相信會有康復的一天, 如果我有進展, 會繼續在這裡告訴大家. 

樓主，可pm藥名俾我嗎？近個多月來，我亦是每日出紅疹，THX

樓主,我2月時又係感冒睇醫生食藥食左三日無端端出風癱,停左冇食感冒藥都係咁出,我睇左專科,宜家早晚各食一粒抗敏,食左一星期係有好轉,但今朝又覆發,成腳成手都係,我睇返昨天食左咩令我發得咁犀利,我昨晚食左豆腐花,唔知係咪都係發物,所以今朝出得好誇張。
我睇返過去幾年,都係一食西藥就出風癱,但冇試過出咁耐,好驚變慢性,就難攪好多,咁你係咪食益生菌好返呀?我一直都有食益生菌,因為腸胃好差,就係2月感冒開始停左食,唔知食返會唔會好返?
你呢個POST令人好鼓舞,希望風癱遠離你,我仲等緊:')

你好吖！我發病差不多一年了，正在試中醫治療，成效不大，比較慢，看到你的分享，好有同感，你寫得好中肯，有很多共鳴，心裡感到安慰！得到這個病的人，都被成為了勇於嘗試的鬥士，我又有希望了，謝謝你！...今次一於試這個🤣

Dear樓主，有一點分別是...你花費很大，我不捨得！吃西藥一兩個月，通常會好，好完兩天後又開始出，痕到頂不住，慢延超快，又開始尋找新方法，又沒進展，再去看專科拿藥止痕...如是者，重復重復...今次寄望在益生菌上😍，多謝你的分享🙏🏻希望有效！

可否pm那款益生菌？thanks

*** 作者被禁止或刪除 內容自動屏蔽 ***

可否pm那款益生菌？thanks

樓主,可否PM那一款益生菌?

樓主,可否PM那一款益生菌?

謝謝樓主！🤗
原來要一級才可發短訊，唯有在這裡回你，我買了你提供的第二隻(嚴浩那款)，但我停了中藥，病情嚴重了，現在只吃益生菌，幾天，正在惆悵怎搞，工作忙沒時間看醫生，唯有先拿之前的類固醇頂住先🙈，謝謝你🤗

另外，去那間XX主意，自己感覺不太良好，不過已經買了，即管試試

最近唔得𨳊睇上discuss,今晚一打開發現好多PM,原來真係有好多人有呢個病，而且係慢性兼睇咗好耐醫生都未好，我提出嘅所有方法都係想比多啲希望大家參考，已經盡量續一回覆pm,祝各位早日康復！

[quote]原帖由 [i]白芷[/i] 於 2019-3-27 11:40 PM 發表 [url=https://www.discuss.com.hk/redirect.php?goto=findpost&pid=496895798&ptid=28059628][img]https://www.discuss.com.hk/images/common/back.gif[/img][/url]
謝謝樓主！🤗
原來要一級才可發短訊，唯有在這裡回你，我買了你提供的第二隻(嚴浩那款)，但我停了中藥，病情嚴重了，現在只吃益生菌，幾天，正在惆悵怎搞，工作忙沒時間看醫生，唯有先拿之前的類固醇頂住先🙈，謝謝你🤗 ... [/quote]
小心，用類固醇會有副作用，初畤係會有效，但係過幾日後會反彈，起得更厲害！如果食得太耐，份量太重的話，塊臉會腫起嚟。

當時我係服用呢隻類固醇，我出trip時帶著傍身，非必要時都係晤好食!
[attach]9483868[/attach]

[quote]原帖由 [i]17072006[/i] 於 2019-3-28 12:32 AM 發表 [url=https://www.discuss.com.hk/redirect.php?goto=findpost&pid=496897921&ptid=28059628][img]https://www.discuss.com.hk/images/common/back.gif[/img][/url]

小心，用類固醇會有副作用，初畤係會有效，但係過幾日後會反彈，起得更厲害！如果食得太耐，份量太重的話，塊臉會腫起嚟。 [/quote]
Dear樓主，
我係忍唔住先至查類固醇，冇時間睇醫生，呢兩日多咗好多，R到顛咗😖
你的分享非常有用，我一口氣看完，心裡安慰😊，而且樓主好幽默，看完笑了很久🤣，充滿希望，超感謝！🙏🏻🤗