查看完整版本 : 中佬口水多過浪之 睇波幫你驗埋心臟同血壓

十二月田猛臣 2019-3-14 10:47 PM

中佬口水多過浪之 睇波幫你驗埋心臟同血壓

廢話︰
今季中超深圳15場主埸比賽之中,只係得呢一場安排喺下午,散場之後唔需要趕頭趕命趕過關,所以中佬最後放棄咗呢個週末上廣州睇富力主場開季,留返喺睇呢場!
[attach]9435651[/attach]
門票︰
對比上一場中超開幕式同七年來首場中超比賽,今次深圳佳兆業嘅售票安排就好好多︰
[list][*]首先對比上次開場前兩個鐘先開售票處,今次就提早上午10:00已經開門,中佬今日預留時間行商場,所以13:30就已經到大運場售票處,當時前面只係得2個人,咁我就可以輕輕鬆鬆買咗飛先去行其他地方![*]上次因為係熱門比賽,本身票價已經比較貴,但係臨場去到售票處居然又唔賣最平嘅100蚊飛,咁大間足球會做呢一啲嘢真係令人有啲失望!今次就無咁嘅問題,60蚊飛可以隨便買!:smile_35:[*]之前喺深體比賽,出咗地鐵站就見黃牛出沒,但搬咗嚟大運之後,可能因為距離場館太遠,好難見到牛牛,去到大運門口有兩條友係黃牛,我問幾多錢,佢哋話150/200門票。所以最後都係去售票處買。唔似廣州會有一大埋手揸住一疊疊飛,明目張膽嘅Yellow Cow![/list]

對賽隊伍:
天津天海︰幾個月前呢隊波叫天津權健,上一季殺入亞冠八強,不過最後俾鹿島鹿角「掃地出門」!著名球星係花邊新聞多多,曾經踢過AC米蘭、車路士等大會嘅前巴西國腳柏圖。
呢隊波上中超幾年但花費唔少,老闆甚至豪言買美斯返嚟!;P
不過老細足球有時好悲哀,短短幾個月之間,因為權健集團醜聞,老闆被拉,球隊交市政府託管、改名、教練團走人、柏圖話自己無糧出......:')
最後以恆大為首幾隊中超球隊仗義出手,借出球員俾天海,其中恆大仲借出射手阿蘭,富力借出前鋒連拿甸奴呢一類具實力嘅外援,再加上另外一啲本土球員先成軍參加今季中超。而教練就再無錢請外藉教頭,最後搵名宿沈祥福執教。
第一場天海作客天河,結果「河大過海」,俾恆大執佢三粒!:')

雖然天海表示已經出晒欠柏圖嘅人工,而且目前柏圖仍然喺天海嘅球員名單之內,不過今日出場陣容之中,正副選都唔見佢。
[attach]9435652[/attach]
比賽過程︰
上半場︰上半場一開波,深圳就搶攻,未夠一分鐘已經有第一腳射門,對天海企定陣腳亦都唔客氣,好快又喺三十碼左右搏到個罰球。開罰到禁區頂撞返出嚟,冷不提防連拿甸奴嚟一腳冷箭,深圳龍門視線受阻落地慢咗,左下角死角入網!就係咁唔夠三分鐘天海就已打開紀錄!全場鴉雀無聲......:(
唔失都失咗,唯有攻返上去!同上一場好唔同,今場波深圳就採取主動,中場控球都有優勢,不過天海亦都係有備而來,由於柏圖失咗蹤,多咗一個外援名額,今場就改用南韓國腳權敬原,佢嘅任務就係緊貼曹雷西亞多,呢位南韓國腳亦表現得好好,全場緊迫普雷西亞多,盡量喺佢起腳前破壞,所以上半場嚟普雷西亞多即使有射門,都因對手緊迫而影響射門角度同力度,上半場最有機會一球,亦都俾表現唔錯嘅天海龍門救出!至於上場入兩粒嘅塞爾納斯就更加被呢一種快速迫搶嘅防守攪到無啖好食!

半場休息之時,中佬圍繞個大運場行咗一個圈,唔知係咪今日有雨加埋氣溫降到20度左右,唔見咗青島啤酒個檔口。而其他檔口好似係KFC,Pizza Hut甚至係真功夫都仲有做生意,一個套餐三十幾蚊。
[attach]9435653[/attach]
下半場︰開波之後形勢同上半場尾段差不多,但係深圳真係好有威脅嘅攻勢真係唔多!61分鐘時普雷西亞多喺權敬原力壓之下射門,但天海龍門已經封晒位,最後只係摶到個角球。時間一分一秒咁過去,天海完全係想靠上半場開波呢一球捱到完場攞3分。65分鐘之時索性連連拿甸奴都換埋出嚟!咁早換走啲攻擊球員!?:@

到咗74分鐘之時,深圳繼續主攻,角球開出,深圳隊頭球攻門,天海龍門擋出,波就落喺助攻嘅姆本格前面,佢亦唔客氣一腳篤入......不過唔夠兩秒,球証就示意入球無效,後來再睇慢鏡,姆本格的確係越位!:')
越咗位都無計,惟有再攻!到咗80分鐘左右又嚟料,深圳斬個入禁區,由於我坐龍門後,好明顯見到有深圳隊球員被推跌......仲唔俾12碼?球証真係無俾12碼,仲叫開波添!不過舊年開始有樣嘢叫VAR,果然球証好快就收到VAR房通知佢有嘢需要佢睇多次!正常環境下VAR房見到有問題先至會通知球証,所以球証會改判機會好大!但唔知點解呢個球証睇VAR睇咗好耐都仲未俾判決,睇咗一次又一次,而最後裁決居然係無事發生,繼續開波!中佬同現場其他球迷一樣都O晒咀,好少可用到VAR又唔改判決!:')
跟住深圳繼續狂攻,斬入禁區個波省中深圳球員彈返轉頭,咁啱落到普雷西亞多腳下,佢揚一揚就順右腳就抽埋去,只可惜射得太正,又俾天海龍門救出!
角球開出無咩威脅,冷不提防天海打個反擊,阿蘭左邊單騎推進,入到禁區自己唔貪功,橫傳中間空晒嘅9號,做最easy嘅事射空門,點知佢唔係細力熨射,而係狂抽,最難得嘅係佢又無打飛機,反而係做出難度極高嘅中楣彈出!;P
黃金機會唔入,天海又要抖一抖氣,換人......換走阿蘭!?如果要換前鋒加強防守,做乜唔換9號?呢個時間換走阿蘭,咪即係叫卡羅推埋姆本格上去打中鋒!?
跟坐深圳真係唔同你客氣,有理無理轟埋去天海禁區,天海個龍手搥打出,點知個波落正禁區頂,深圳26號球不著地凌空窩利,睇住波要由楣底飛入之際,突然間天海個25號以絕靚姿勢將個波托出龍門後……全場球迷O晒咀,呢個25號唔係龍門喎!
深圳球員自然舉晒手投訴,而個球証就慢條斯理叫深圳球員稍安無燥,之後就搵天海件25號,請佢「食全餐」!:smile_15:
天海球員圍住個球証理論,食咗全餐嘅25號又唔肯出場,普雷西亞多揸住個波,天海個龍門又喺佢隔籬阿支阿佐,最後擾攘一大輪之後,25號當然慢慢要行出場。跟住就係普雷西亞多十二碼「單挑」天海個龍門,只見佢氣定神閒,果然一腳就追平!
去到呢度,現場好多球迷都鬆咗一口氣,明明實力比天海高,又主場,如果1分都無就太唔好彩!打和唔算好理想但深圳隊球員從來無放棄,作為球迷都收貨喇!最少打出拚勁同血性......不過草面上面有11個人唔係咁諗......仲有兩三分鐘,天海已經謝晒,又打少一個,仲無埋主力前鋒.....依家放你返天津,對唔住今日入場呢萬幾人!:@
果然當一攞到個控球權之後,深圳又再進攻,普雷西亞多喺禁區左邊推入去,底線傳中, 小禁區突然間有個紅色衫衝到撞咗個波入網......跟全唔駛講,全場又再陷入瘋狂狀態!:smile_34:
中圈開波,依家就到天海做咗苦主,眼白白睇住自己由3分變1分再連呢1分都無埋,條氣當然唔順,點都要攞返個彩,但兩個主力前鋒已經換咗出去,於是有件26號索性三十幾碼外就轟埋去,個波好勁同有角度,一定中龍,只係途程太遠深圳龍門有準備,但都只係撲出底線!角球解圍之後,天海想再攻,不過球證已經吹雞完場!

最尾呢十分鐘,比坐過山車仲刺激,如果有心臟病或者血壓高,分分鐘死人無命賠!好彩嘅係完場之後我留多十分鐘左右,唔見有醫護人員衝上看台,現場應該無人出事,不過睇電視直播有無人出事就唔知!:smile_27:
[attach]9435654[/attach]
全場最佳球員︰入一粒兼一個助攻嘅普雷西亞多!

入場人數︰下半場中段場館宣佈,入場人數為15XXX人,連上場一半都無!可能係因為戲碼問題,其實呢場波個開波時間幾好,完場食晚餐啱啱好!

賽後交通安排︰
上一場比賽結束之時已經近22:00,怕佳兆業提供嘅接駁巴士遇到塞車令我趕唔切過關,所以自己搭返地鐵去羅湖。由於今次時間比較早,於是我就試吓搭接駁巴士返出市區。我去到上車點之時人唔係太多,只係等咗幾分鐘就安排上車,19:55開車,大部時間行高速公路。
佳兆業接駁巴士有三個落車點,大劇院、上海賓館(華強路)同世界之窗,由於我打算經福田/落馬州返香港,所以就揀上海賓館落車,當時係20:36,即係40分鐘多少少,之後搭4個站去福田口岸,最尾返到屋企比預定時間早咗半個鐘!只可惜今季只有一場下午波!

總結︰
[list][*]佳兆業 vs 鐵桶陣︰我唔知卡羅教練點睇呢一場波,中佬就覺得呢一場深圳暴露出嚟嘅問題比上一場多,上一場大部份時間都係膠著狀態,而呢一場一開波已經落後,本來係有大把時間,但明顯地深圳打反擊有把握,但對於對方全軍退守加上死纏難打,深圳真係無乜計。[*]天海的天作孽+自作孽︰雖然呢一場波我都係著紅色衫捧深圳隊,不過當我睇到七十幾分鐘之時,都以為深圳係會輸波。雖然實力唔夠深圳,但少少符碌入咗一球之後,天海的確係守得唔錯,全場緊追普雷西亞多,令佢起腳機會唔多之餘,好多時仲係勉強起腳,再加天海龍門都有水準演出,當佢救出普雷西亞多84分鐘嘅勁射時之時,我都覺得深圳隊呢三分凍過水。[/list]
[indent]不過世事總有意外![/indent][indent]天作孽︰85分鐘,阿蘭傳俾空晒嘅9號,龍門已經失晒位,係咁熨射已經攪掂,入咗深圳一定洩氣,但9號選擇狂抽,結果係萬幾人見到有個傻仔射空門唔入,而且選擇難度最高嘅中楣!當場令到除咗天海職球員同少數Fans之外,萬X幾人發覺無論去到什麼絕境,人生總係仲有希望!咁X難都可以射中條橫楣,深圳反Cup贏埋何嘗唔係Why not?[/indent][indent]自作孽︰更抵死嘅係呢球唔入,沈祥福居然換走埋阿蘭!其實65分鐘之時換走連拿甸奴已經好奇怪,唔知係咪富力講明我借個球員俾你,天海唔可以用盡,最多只係踢70分鐘?雖然連拿甸奴唔似普雷西亞多咁有爆炸力,但技術好,可以hold住個波,打反擊把握力又強,如果85分鐘嗰球係落係佢腳,深圳輸咗十世![/indent][indent]再換走埋阿蘭,即係發出一個好明確嘅信號︰阿叔(沈祥福)擺X明唔再搏第二球,留返件廢柴9號喺前面,你(卡羅)有本事,夠Guts 11個衝X晒上嚟同我死過呀!笨![/indent][indent]中佬做咁X耐人,睇咁X多波,由電視直播世界杯、歐國杯、歐聯......以至大坑東、蒲崗村甚至澳門甲組聯賽,中佬嘅民間智慧都可以話俾沈教練聽,歷來將主力進攻球員換走,換入後衛全軍退守,無幾多次係有好結果!今次亦唔例外![/indent][list][*]食全餐︰睇咁多年足球,唔係第一次見食全餐,最經典當然係10年世界杯蘇亞雷斯一鑊,不過諗諗吓,現場見就好似真係第一次!其實之前已經就唔少波友講過,唔食全餐可能只係輸一粒,仲有時間去追,但係食咗全餐,如果對手係有一個十二碼有把握嘅球場操刀,基本都有七、八成機會俾對手入波,但係再打少一個,就會產生更多未知素!好似今次呢球波,天海個25號的確撲得好型,但對手操刀嘅普雷西亞多本身射十二碼都好有把握,基本上一定俾人追和,但打少個對事後嘅發展就有好大影響。[/list]
[indent]如果天海唔係打少個,深圳未必敢補時階段衝上去摶一鋪,而且睇返深圳入球嘅11號正正就係踢右後衛,而天海被趕出場嘅25號就係左後衛,即係左後防呢一個位,絕殺嗰一刻就正正係走甩咗深圳位置上多出嚟嘅一個![/indent]     


由於今年深圳隊有唔少主場比賽會係平日舉行,如果唔請假就趕唔切入場,但請假去睇波始終都係一個唔太好嘅行為。而且由中佬屋企出門去到大運場,一程足足要三個鐘,即使星期六日跑一轉都幾攞命!所以睇完呢場之後,應該要到5月先會再入場!:smile_42:

最後,多謝收看!:loveliness:

[[i] 本帖最後由 十二月田猛臣 於 2019-3-14 11:00 PM 編輯 [/i]]
頁: [1]
查看完整版本: 中佬口水多過浪之 睇波幫你驗埋心臟同血壓