查看完整版本 : 【BizStarter】𡃁模付「律師」逾10萬創業 推智能合約程式 大狀:問題多多

ncream 2019-4-19 08:07 AM

【BizStarter】𡃁模付「律師」逾10萬創業 推智能合約程式 大狀:問題多多

[url=https://hk.finance.appledaily.com/finance/realtime/article/20190419/59504974]https://hk.finance.appledaily.com/finance/realtime/article/20190419/59504974[/url]

[attach]9565142[/attach]


後生真係輸得起?這句幾乎成為年輕初創者的指定台詞。24歲的兼職模特兒蔡婕妤(Kristy)正是其中一個抱著這個想法的創業者,去年自掏荷包約10萬元予一神秘律師,以創辦智能合約程式,免費提供訂立遺囑、交通意外和解協議等,未曾修讀亦沒有律師資格的她說,冀程式假以時日可取代律師。

《蘋果》邀請本港執業大律師及事務律師為她的業務提供意見,問題多多,包括缺乏專業責任保險、保障個人私隱資料,現況猶如文具店出售的書面範本,只是紙和網站的分別,其中未有考慮個人資料一旦外洩,以目前過百人使用計,有如掛着數以百個計時炸彈。

今年24歲的蔡婕妤(Kristy)在大學修讀程式編寫,畢業後做自由工作者,從事網站、手機應用程式的製作,亦兼職模特兒,拍過寶礦力廣告等,多年來賺進一點錢。去年她動用約10萬元積蓄獨資創辦網站savvy.ai,透過網上對話形式(ChatBot),免費提供6種合約或協議,包括訂立遺囑、物業租賃、二手車買賣合約、交通意外和解協議、借貸協議、僱問協議等等。未來新增其他範疇,如離婚協議,並會上載App store,部分將會收費,初步計劃每份收費100元。

創業源於一次接Freelance工作時,酬勞1萬元,卻花了3,000元委聘律師製作合約。「點解唔將文件變做機械人,純粹改資料後,適合大家使用。其實外國都有好多呢啲例子,但佢就根據當地法律。所以有呢個念頭,整個適合香港嘅平台!」她主動尋求《蘋果》做訪問,希望儲夠使用者人次,收費部份日後才徵收。

本報記者、本港大律師任穎明及事務律師黃汝沖就Kristy業務提出疑問和意見,Kristy聽後作出回應:

[b]蘋:蘋果記者
任:大律師任穎明
黃:事務律師黃汝仲
K:Savvy.ai創辦人蔡婕妤[/b]

[b]蘋:投資十多萬元花在甚麼地方?[/b]
K:一半畀草擬合約範本嘅律師,另一半喺網站營運。律師係好耐以前機緣巧合識,到萌生呢個idea就傾下,佢覺得幾好喎,就用友情價幫我。佢以前係香港執業,後來唔係香港執業,佢就覺得衝突無咁大,所以幫我囉!

[b]蘋:如果不在香港執業,這位律師草擬的合約範本還具法律效力嗎?[/b]
K:有。大家可能質疑,但法律效力簡單來說,即係我同你嘅對話已經有法律效力,但點解會話由律師寫好啲,只不過係雙方溝通過程,可能好多細節或條款,大家講唔清楚,諗唔夠多,無律師咁專業。

[b]蘋:這是你委聘的律師教你這樣說?[/b]
K:(點頭)當初有問過佢,如果我唔係律師,我寫嘅程式係咪有法律效力。佢解釋,唔係律師寫嘅合約先有法律效力。佢唔出鏡唔出名,咁我知道佢有衝突㗎嘛,所以唔方便出鏡。佢幫我做啲咁嘅嘢,再去開名,佢會變咗眾矢之的,咁樣佢會俾同行圍插。

[b]任:似乎網主(Kristy)將大律師和事務律師的角色混淆。[/b]
K:大律師處理官司多嘅,事務律師係真係坐喺律師樓幫你草擬嘢,係咪啊?我無錯呀嘛!幫我寫嗰個以前係大律師嚟嘅……合約嘅話事務律師會比較專業,佢哋係做呢樣,但我唔可以話大律師就唔識寫合約。兩者都有用,但事務律師會詳細啲、再精啲。如果咁樣講嘅話,可以再搵事務律師核實,幫我睇一次。

[b]任:訂立遺囑非想像般簡單,如立遺囑人有特別要求,例如受益人未成年,需年滿21歲、大學畢業,未滿21歲期間需安排託管人等等,目前程式如何滿足使用者?[/b]
K:做唔到,太多條件。我嘅平台支援唔到,我承認。如果咁複雜,相信佢未必會用呢個免費平台而直接搵律師。我嘅目標群係比較普遍少少嘅大眾。

[b]任:甲和乙撞車,唔係大家簽一個和解就可以,法例要求駕駛者必須購買保險,保險公司唔會同意及承認呢份和解協議,保險公司最終可能不會賠償。結果引致雙方蒙受損失。[/b]
K:做交通意外和解嘅原意係想解決比較細嘅撞車意外,例如撞爛車頭燈、側鏡,咁細,無理由嘈好耐,咁細金額,可以有一份好簡單,即刻協議賠償,簽名作證。但如果比較大嘅意外,關乎到保險…(車身撞凹要不要保險公司申報?)呢部份,我承認係諗唔夠嘅。

[b]任:網主覺得程式具法律效力是自我感覺良好。既唔知佢所指嘅大律師係邊位,佢亦無企過出來話係自己草擬,使用者若因使用服務而蒙受損失,難以追究責任。網主睇事比較容易咗,呢個諗法唔新,租約、遺囑範本係市面一直已經有,只不過人哋用紙印出來,佢而家係網上做咁解。[/b]
K:係有人出咗街啦!我最大唔同係有中文版,一個新智能合約平台,即使將來會收費,就最平畀大家用,呢個係比同類型網站嘅優勢。幾年前有個同類型程式獲取基金投資,後來都改頭換面。

[b]蘋:大律師及事務律師均購買專業責任保險,如果因為作出建議而招致當事人損失會獲保障。你目前創立的網站提供合約及協議製作是否需要負上法律責任?[/b]
K:做出嚟嘅合約呢係有免責嘅,但係咁樣講好似好唔負責任……

[b]黃:個人資料會唔會因為呢個平台缺乏適當嘅加密或保障,而導致個人資料外洩,呢個係負上相關嘅法律責任。[/b]
K:正常防火牆做足,如果被駭客真係hack咗、偷咗…我應該真係買返份保險先。(有無諗過而家程式停一停呢?)可能要,上載APP STORE應該要搞掂哂啲保險。有少少驚,如果真係畀人hack咗咁,個人資料外洩呢個責任,但係你睇下連國泰(293)咁大公司都預防唔到嘅嘢。我要買保險囉!

[b]蘋:目前百多人使用你網站,一旦資料外洩,後果嚴重,尤如百多個計時炸彈掛上身,怕嗎?[/b]
K:嗯…覺得要做返多啲嘢去保護返自己。

[b]蘋:整件事有無覺得受騙?[/b]
K:我又未覺得係被人呃。我承認我功夫未做得足。唔係佢叫我去做,而係我想做,搵人幫我完成呢部份,不如話我呃咗佢幫我做嘢。我而家俾佢都唔係正常俾一份合約嘅價錢。我做呢樣,一定好多律師企出來挑戰,因為對佢地有衝突。而呢個朋友幫我,係因為佢上得岸啦,同時唔係香港,無衝突,見我幾有意義,幫吓我做。

[b]蘋:現在你的業務被本港執業律師質疑不可行喎?[/b]
K:如果要咁睇,我覺得所有嘢都係一定有陰謀?因為我做嘅嘢對佢自身係有一定影響,而家係《蘋果》去做我嘅報道,報道後香港好多人都識呢樣嘢,大家用得多、慣咗,就唔會再有咁多機會去搵律師去做呢樣嘢,咁對佢哋咪有一個直接嘅衝突係度囉!咁所以佢哋一定係圍插我,有啲乜嘢咪係咁插插插插囉!咁開始就可以撳低,對佢哋影響細啲!我覺得呢啲唔係打擊,我預咗。

[url=https://hk.finance.appledaily.com/finance/realtime/article/20190419/59504974]https://hk.finance.appledaily.com/finance/realtime/article/20190419/59504974[/url]

[[i] 本帖最後由 ncream 於 2019-4-19 08:26 AM 編輯 [/i]]

我的無比膏 2019-4-19 09:38 AM

而家已經有公司做而啲,不過客戶主要係公司客,月費形式賣template
頁: [1]
查看完整版本: 【BizStarter】𡃁模付「律師」逾10萬創業 推智能合約程式 大狀:問題多多