查看完整版本 : airbnb帳號被盜用, 信用卡被碌8萬幾,求各位大大幫忙

cafededave 2019-6-1 10:37 PM

airbnb帳號被盜用, 信用卡被碌8萬幾,求各位大大幫忙

30/5零晨3點幾,不停收到銀行sms,有五筆信用卡交易完成, 我張卡o既limit只得5萬5千, 但交易款項總數超過8萬HKD, 收款人全部都係airbnb.




立即打去card center cut card同查詢, 職員話card可以cut, 但唔可以中止付款, 雖然款項仲未正式過數, 但已授權o既款項card center冇權中止, 一般收款商戶會係款項授權後2-3個工作天內對數, 只要airbnb方面提出對數, 款項就會自動過數, 所以只可由airbnb單方面取消交易. 同時, card center話如果咁唔好彩, 真係過左數俾airbnb, card center就會幫我暫時勾起條數唔使我還款住, 個case會交俾查單部調查, 預計調查時間為6-8星期, 條數要視乎調查結果而決定我使唔使我上身.




然後我打去airbnb, 要求airbnb先中止交易及停止同銀行對數, airbnb o既客戶服務部淨係話會將我個case交俾一個叫"信任和安全團隊"o既部門調查, 調查完成後會有email通知我, 除此之外一概唔知. 點知同airbnb通完話後兩三個鐘, 銀行就打黎話airbnb已經對左數收款, 我再次打去airbnb客戶服務部, 佢地都只係不停重複話已交俾"信任和安全團隊"調查, 除此之外一概唔知.




之後我去警局報案, 警員要求我提供由card center發出o既調查信件作證明, 如冇, 警察只會幫我備案作記錄, 唔會展開調查. 我再打去card center要求證明信件, 職員話由於款項已過數, 所以查單部正式開始查單, 查單部會係7日後郵寄證明信件俾我.




我而家真係感到好無助, 銀行要6-8個星期去查單, airbnb就直情唔答要查幾耐, 而警局又話要有銀行信先會幫我開file調查. 而家我好似除左等, 就乜都做唔到咁, 請問有冇大大可以幫下小弟, 我現時可以做D咩去保障自己呢?

今天懷舊的水樽 2019-6-1 10:50 PM

聽網友講要上身, 你唔還會有收數佬上門服事你:smile_44:講破產後都會搞你 :smile_44:

無路可退 2019-6-1 10:57 PM

我之前試過俾間機構扣多左數,到而家都冇下文,已經半年了

今天懷舊的水樽 2019-6-1 11:02 PM

信用卡其實唔係幾安全, 極容易畀人盜用, 上次有單新聞話有人畀人盜用二百萬, 佢應該要破產先至走得甩:smile_44:

wahcli 2019-6-2 01:28 AM

上次的投訴:
[url]https://www.discuss.com.hk/viewthread.php?tid=28087091[/url]

東方紅 2019-6-2 01:45 AM

就算吾係被盜,都有排搞,試過會員月費,已停,佢居然繼續收錢,結果搞咗兩個月, 原來係卡主不能單方面停的,要商戶停,結果以後都唔玩呢啲嘢,就算玩,都係一次過畀錢算數。

今天懷舊的水樽 2019-6-2 11:07 AM

原來係樓主自願授權畀人轆, 咁無得走啦, 8萬蚊都係好少數目, 食幾個月杯麵就掂曬:smile_34:

股市係我提款機 2019-6-2 11:12 AM

入埋依D唔三唔四會, 遲早的事

愛國人 2019-6-2 11:36 AM

overlimit都得??咩卡公司呀?

hoikittsang 2019-6-2 01:59 PM

[quote]原帖由 [i]cafededave[/i] 於 2019-6-1 10:37 PM 發表 [url=https://www.discuss.com.hk/redirect.php?goto=findpost&pid=500301306&ptid=28255109][img]https://www.discuss.com.hk/images/common/back.gif[/img][/url]
30/5零晨3點幾,不停收到銀行sms,有五筆信用卡交易完成, 我張卡o既limit只得5萬5千, 但交易款項總數超過8萬HKD, 收款人全部都係airbnb.




立即打去card center cut card同查詢, 職員話card可以cut, 但唔可以中止付款, 雖然款項仲未正式過數, 但已授權o既款項card center冇權中止, 一般收款商戶會係款項授權後2-3個工作天 ... [/quote]

邊間野咁賤格,可以limit55000,但可以碌到80000幾?

今天懷舊的水樽 2019-6-2 04:49 PM

交電話費就唔好用信用卡自動扣啦:smile_34:

cafededave 2019-6-3 03:20 AM

[quote]原帖由 [i]hoikittsang[/i] 於 2019-6-2 01:59 PM 發表 [url=https://www.discuss.com.hk/redirect.php?goto=findpost&pid=500330532&ptid=28255109][img]https://www.discuss.com.hk/images/common/back.gif[/img][/url]


邊間野咁賤格,可以limit55000,但可以碌到80000幾? [/quote]

我當時都有向card center問呢個問題, 個hotline職員話, 因為我一直冇要求過禁止"超額", 所以唔關佢地事, 係客戶o既責任, 仲叫我自行睇番申請信用卡果陣時D條款.

sam1028a 2019-6-5 02:53 PM

樓主,我都同你一樣,前晚比人hack 左入 airbnb ,跟住look 左9k hkd,  有冇興趣pm 傾下? 我新手pm 唔到你

今天懷舊的水樽 2019-6-5 03:48 PM

用支付寶咪無咁嘅問題囉.



其實9K都好少錢, 畀咗佢唔好煩, 費事銀行又搵啲收數佬上門禁鐘仔

cafededave 2019-6-5 11:13 PM

[quote]原帖由 [i]sam1028a[/i] 於 2019-6-5 02:53 PM 發表 [url=https://www.discuss.com.hk/redirect.php?goto=findpost&pid=500493485&ptid=28255109][img]https://www.discuss.com.hk/images/common/back.gif[/img][/url]
樓主,我都同你一樣,前晚比人hack 左入 airbnb ,跟住look 左9k hkd,  有冇興趣pm 傾下? 我新手pm 唔到你 [/quote]

我諗你應該已聯絡左card center停card同等緊銀行幫你check單, 但我可以好負責任咁同你講, 千祈唔好完全信晒D card center hotline職員所講o既野, 因D hotline職員只分大兩類, 第一類係人精, 只會好客氣同好有技巧咁將銀行o既責任推得一乾二淨; 第二類就係廢柴, 根本就係唔識扮識不停遊花園浪費你時間直至你無奈自行收線. 記住要靠自己保障自己權益, 遇到d唔清楚或唔合理o既回答, 自己一定唔可以怕麻煩怕尷尬一定要追問個職員直至攪清楚每一點為止, 因為佢地就係想你唔好再問落去, 千祈唔好俾佢地胡混過去, 記住承受損失o既只會係你, 唔會係個職員. 仲有, 我係網上自行搵資料先發現原來"銀行營運守則"係有條例保障持卡人o既權益, 我先後同card center查證過好多次, 最後先從一個職員口中證實到銀行營運守則確有呢個條款, 在持卡人無作出任何欺詐或嚴重疏忽行為, 持卡人就只需承擔不超過五百元的金額, 雖然個職員最後補番句一切以銀行調查結果為準, 但證實左原來有呢條條例之後, 我成個人即時安心左好多.

仲有, 記住一定要自己打去通知airbnb信用卡被盜用, 唔好淨係等銀行幫你處理, 而airbnb o既香港hotline只可以用英文交談, 如要用中文交談,可以先打通香港hotline用英文要求職員轉接去識講中文o既同事到, 或用IDD直接打去大陸hotline, 再提一下, airbnb並無提供粵語查詢服務. 而airbnb o既所謂"客戶服務部"實際上只係一個"訂單部門", 只能處理一般"訂單問題", 而對於所有"訂單"以外o既問題, 包括信用卡被盜用, 佢地都只會回答會交由相關團隊處理以及一概不知, 客戶只可以等相關團隊o既email. 同樣記住, 千祈唔好完全信晒D hotline職員所講o既野, 要靠自己保障自己權益, 就算個職員不停答唔知道或答你唔到, 但你可以要求佢地清楚記錄低你所問o既問題並轉交相關部門, 一定唔可以俾hotline班職員隨便hea走你, 因為一有具體詳細記錄o既查詢交到airbnb果d"相關部門", 佢地就要回覆你, 既然要回覆你就一定會順便跟進埋你個case, 咁樣你個case就好可能會獲得優先處理.

雖然報警對事件o既實際作用唔大, 但報警備案我覺得係必須, 如日後有爭議, 警方o既記錄可以作為一種證明, 用作保障自己權益. 仲有, 提一提你, 去報案前先同銀行聯絡拎一封證明信件, 否則警局只會幫你備案, 不會轉交CID開file調查.

我個case o既結果及總結:
1) 我日前已收到airbnb o既email通知, 同證實aribnb已將之前被盜用o既信用卡交易取消, 並已全數退款. 以下係airbnb o既email回覆內容.

We're working to reverse any transactions made without your authorization. This can take 7-10 business days to process and reflect on yourstatement.
You may notice an accepted reservation on your account that you didn’trequest. While we're unable to fully remove the reservation from your account,we can hide reviews and issue a full refund if your saved payment method wasused. No action is needed on your part regarding the reservation, but pleasesecure your account following the steps below. We'll gladly offer assistance ifthe host contacts us with questions or concerns.
Thanks for being vigilant about your account security.

2) card center同 d 職員都係廢o既, 出事後只會不斷推卸責任同遊花園, 就算airbnb已將款項退回, 銀行所謂o既查單部或card center根本就唔知道, 要我自行致電查詢, 佢地先後知後覺. 而最利害o既係d職員知道airbnb退款之後o既態度轉變, 明明前一刻仲係一副你死你賤愛理不理一問三不知o既官僚態度, 一知道airbnb退左款, d口風即時變得熱情慷慨, 一時話佢地其實有幾盡責, 一時就話佢地會主動幫助客戶, 又話銀行會點保障客戶, 又話銀行點樣積極處理...最後個職員居然厚面皮到話airbnb咁快退款可能係同銀行查單所致...我聽完之後差D想爆粗問侯個職員o既老母, 我已對呢間銀行完全失望, 會一步步將我D存款股票保險MPF等等全部轉走.

3) 經過呢次事件之後, 我先知萬xx信用卡o既所謂網上保安措施只係得啖笑o既門面野, 果d咩電話sms授權碼, 信用卡網上交易密碼, 卡背驗證碼...原來所有保安措施都只係受款商戶o既option, 並無硬性規定, 甚至可能連信用卡網上交易o既授權紀錄銀行都未必有, 就算有銀行都未必查得到, 而銀行職員o既解釋係"我地都唔清楚". 原來受款商戶只要有信用卡卡號同信用卡有效日期, 銀行亦會視之為已獲得持卡人授權o既交易, 就算持卡人即時發現有可疑交易, 即時通知銀行沒有授權並要求取消交易, 銀行亦唔會取消交易或停止過數, 持卡人只可以係銀行過數後要求銀行查單, 而查單需時最少6-8星期, 客戶只可以等銀行通知查單結果.

4) 而所謂o既card limit亦只係形同虛設, 除非持卡人事前主動申請禁止"超額", 否則真實o既交易上限就只係銀行說了算, 究竟上限係幾多連銀行職員都話唔知道, 但"超額"所帶黎損失同風險就一定係由持卡人全數承擔.

5) 原來《銀行營運守則》係有保障持卡人o既條款, 內容大概為在持卡人無作出任何欺詐或嚴重疏忽行為, 並在發現遺失或被盜去信用卡後, 在可能情況下盡快通知發卡機構, 持卡人就只需承擔不超過五百元的金額。

但"疏忽"並無明確定義, 所以與銀行職員對話時要非常小心. 首先,果d人精職員係打死都唔會主動同你講有呢條條款, 就算你問佢地都唔會明確話俾你知有呢條款. 佢地更會不斷試圖透過問不同問題將責任推係客戶身上, 例如會係談話過程中, 不停重複插入以不同說法但內容近似o既問題, 直至客戶回答出佢地想要o既答覆, 表面上看似關心客戶, 其實佢地係透過客戶的回答去證實客戶有"嚴重疏忽行為", 例如: 你有冇同任何人講過你o既密碼? 你屋企人或朋友知唔知你o既密碼? 會唔會你曾經用紙筆寫低個密碼? 會唔會唔小心俾人睇到或聽到你o既密碼?....又或者,  你有冇試過唔見左張卡? 你有冇試過唔見左個銀包? 你張卡係咪一直身邊? 有冇試過外出時擺張卡係屋企? 有冇試過擺張卡係公司? 你有冇試過俾屋企人用你張信用卡? 你有冇試過俾人睇到你張信用卡正面o既資料? 你有冇試過碌卡埋單時張卡曾經離開你o既視線範圍?...

6) 總之就係自己權益自己保, 千祈唔好唔好意思問或信晒d hotline職員, hotline職員靠得住, 豬乸都上樹. 如果你仲有咩想知, 可以係度留言大家一齊傾.

[[i] 本帖最後由 cafededave 於 2019-6-6 07:22 PM 編輯 [/i]]

H5N2 2019-6-6 08:51 AM

Airbnb都幾恐怖喎

炎夏默默的世界 2019-7-3 11:09 PM

原來airbnb咁唔安全架!
頁: [1]
查看完整版本: airbnb帳號被盜用, 信用卡被碌8萬幾,求各位大大幫忙