查看完整版本 : 來論|由2.6噸重炸彈材料同侮辱告示說起

bilibala1999 2020-3-12 08:35 AM

來論|由2.6噸重炸彈材料同侮辱告示說起

[img=600,360]https://res.dotdotnews.com/wp-content/uploads/2020/03/1296614544-600x360.jpg[/img]
文/LC金牛提納奧
近日,社交網絡上炒得沸沸揚揚兩件事,一係警方破獲炸彈工廠,由「炸藥庫」檢獲出2.6噸重炸彈原材料、3個土製炸彈半製成品;另一個係深水埗區議員李文浩及劉家衡於辦事處外張貼「藍絲與狗不得內進」侮辱性告示。兩單事看似冇咩絕對嘅關係,但從互聯網角度分析,喺社交平台上有不少網民對暴力和侮辱表示默認或者支持。
回憶下,舊年因林鄭搞出個「反送中大龍鳳」,引發全港社會大混亂,警察打人、暴徒更喪玩燃燒彈,導致香港好似完全喪失講道理嘅空間,一夜之間,我哋由一個文明都市變成咗武鬥場,搞到果段時間夜晚都好似「Silent Hill」咁。
當自己用正常思維去審視社交媒體,觀察網民對每一次政治事件反應,由開始嘅「7·21唔見人」「8·31打死人」「以眼還眼大接力」再到之後威脅性三罷阻街,我開始反思,究竟手足一次次嘅發洩有咩意義?流嘅血同汗水有咩價值呢?
更奇怪嘅嘢係,喺「警察檢獲2.6噸重炸彈原材料」同「李文浩張貼侮辱性告示」事件中,大部分網民留言都趨於極端化,甚至出現恐嚇威脅字眼。所謂「習慣成自然」,似乎好多網民對於暴力逐漸升級已不知不覺間開始習以為常,而出Po同留言只係散播仇恨嘲諷,唔通網絡本身就應該係咁?但化為平常生活中的普通人, 當面同人講嘢就會有所克制或者保留,點解? 因為「你」始終由理智控制,但係為何在網絡上,就徹底喪失基本左底線呢?究竟係道德失格定係IQ唔達標呢?其實講到尾個答案係「人性」,從歷史經驗話畀大家知,人性係最受唔住考驗的。我相信如果將一個按鈕擺喺暴徒面前,話呢個係炸彈遙控嚟,㩒一下可以引爆警察家屬宿舍,相信有人諗都唔諗就㩒,儘管佢可能一次「手足」都未做過,實際上同警察並無牙齒印,佢都有可能變成「兇手」,反之,藍絲咁做都唔難想象。
我想問下大家,如果呢D炸藥恰好係炸傷你屋企人,又或者炸死你嘅叧一半你會點諗?果陣時你仲會繼續支持暴力?泛民議員若繼續出嚟撐呢種恐怖襲擊你心入面好過嗎?再問,如果李文浩之流因為政見唔同,就侮辱你老豆老母,你會同佢企埋一齊辱罵你父母咩?突然憤怒會降低一個人嘅智商,但長時間嘅憤怒就會扭曲內心,徹底將一個人嘅人性降低至0。
「波士頓猶太人大屠殺紀念碑」銘文仲記得嘛?我希望所有理性嘅香港人都醒下先,無論你係黃係藍或者懶理政治嘅港豬,大家都應該恢復理智,唔好被洗腦做扯線公仔。最後一句: 「侮辱唔係最無恥,習以為常先係;炸藥唔係最可怕嘅,麻木先係」。
頁: [1]
查看完整版本: 來論|由2.6噸重炸彈材料同侮辱告示說起