查看完整版本 : 那一天,有女仔嚟咗男校讀書

店小六 2020-5-29 12:15 PM

內容純粹虛構

店小六 2020-5-29 12:16 PM

「起身啦,衰仔,7點9啦!」
「嘩!咁晏先叫我㗎。」
我飛身跳落床再用九秒九跑去廁所然之後攞起支牙刷再一路刷牙一路「放水」然後狗衝返房再攞出件校服然後一隻手換褲一隻手換衫,再攞埋個書包。搞掂!成個過程唔使分半鐘,我已經由一個啱啱起身嘅毒男銳變成一個可以出門口返學嘅毒男啦!
呀!我唔記得咗自我介紹添,我係一個毒男,我叫黃浩銘,個個都叫我「鉻仔」,我唔知自己小六揀中學嘅時候發乜神經,係都要揀入一間男校,嗰時以為男校同男女校冇乜分別啫。唉!而家後悔啦,日日對住班宅男同基佬,真係唔宅都變宅,唔基都變基(本人絕無歧視唔同性傾向人士)。唉!功課又多,壓力又大,又無女溝,睇嚟我個中學生涯都冇乜精彩嘢㗎啦。
「衰仔,記住睇車呀!」
「知啦!」

店小六 2020-5-29 12:18 PM

我出咗門口,望一望隻錶,而家7點56分。根據我精密計算,由屋企跑返學校大約需要3分鐘,計埋等紅綠燈嘅時間(如果我會等嘅話),都要4分鐘。學校大約8點05分打鐘,但係訓導主任好嚴,8點以後入校門都死,睇嚟今次要跑快啲啦!
最後都俾我喺最後一刻入到校門。一入校門,我即刻聽到校長開廣播叫全校同學去操場,仲話有咩特別宣佈,我心諗:妖,咪又係嗰啲低能嘢,有乜好聽呀?
我抓住啱啱喺我面前經過嘅死黨---「中子」,佢係我由小學識到宜家嘅朋友,我同佢可以話無所不談。我問「中子」:「喂!你知唔知今日校長想講乜春?」佢答:「唔清楚喎,不過聽啲師兄講,好似係大單嘢。」「ok,咁去聽啦。」我不情不願咁行過去操場,我同班同學全部喺度討論緊究竟乜事,我照常咁排喺「中子」前面。第咗一陣,校長攞咗支mic,開始講:「各位同學,我知道各位有好多疑問,不過請等我講埋先。今日我咁突然叫各位同學,係因為xx女書院有幾位同學想過嚟我哋學校做交換生...」之後我就聽唔到佢講乜喇,淨係聽到啲師兄弟喺到「嘩嘩」聲,我自己都唔敢相信我自己聽到呢一番說話。

店小六 2020-5-29 12:20 PM

就係咁樣,xx女書院喺今日派咗30個交換生過嚟,之前我哋每班抽一個男仔去xx女書院度,空咗嘅位就俾啲女仔入嚟。唉!可惜啦,我冇俾人抽中,反而我嗰班全班最毒嗰個毒L抽中咗,條友就爽啦(雖然我覺得佢冇可能溝到女),但係可以俾成班女圍住都真係好難得㗎!唔緊要啦,可以喺男校入面有女同學,已經係一種福份啦!
「大家好,我叫葉倩晴,你哋可以叫我小倩。」
淨係呢個自我介紹,已經令班上所有狗公同毒男神魂顛倒,因為小倩根本就係嗰種喺條街到經過,十個男人有九個都會望返轉頭嘅女仔。
「好啦,由於有新同學,我哋而家會重新掉位。」班主任李老師一講完,班狗公同毒男又開始起鬨。唉!佢哋真係太耐冇喺學校見到女啦(除咗老師)。
全班(包括我)立即用「宇宙第一速度」執好所有嘢,之後出去排隊等班主任幫你揀位,今次絕對係我最期待嘅一次掉位。
最後,我冇得坐小倩隔離,反而坐咗喺佢後面,而中子就坐我隔離。一開始我都有啲失望㗎,不過諗深一層,可以坐喺佢後面都幾好㗎,起碼唔係坐到離佢鬼咁遠先啦。

店小六 2020-5-29 12:33 PM

歡迎留言

applebbkk1982 2020-6-7 02:59 AM

E版

das233 2020-6-10 11:07 AM

內容純粹虛構
頁: [1]
查看完整版本: 那一天,有女仔嚟咗男校讀書