查看完整版本 : 《野味小精靈》(粵語文)

我文筆唔太好，而且更新又更得慢。
但多謝大家肯睇同支持。

呢個係由武漢嚟到香港嘅比卡超嘅故事

1. 比卡超嘅誕生

由我有意識嘅嗰一刻，我已經俾人類困住咗。佢哋明明係研究同養大嘅我人，但我一啲啲都唔想同佢哋親近。佢哋教我點樣控制我天生嘅超能力，成日因為我完成唔到佢哋嘅要求而鬧我打我，所以我身上成日滿身傷痕。

人類真係好奇怪，佢哋雖然成日打我，但有時就會用啲奇怪嘅眼神望住我，閃閃發光咁，好得人驚。我好唔鍾意佢哋...

相反，我同研究所嘅動物就相處得好好。而我嘅最好朋友叫蝙蝠仔，我哋雖然被困咗係唔同嘅房，但間中會被人類放埋一齊研究。我成日被人類打到流血或者流眼淚，但我都好期待可以見到蝙蝠仔。

「今天皮卡丘學會了發電了沒有?」研究員大叔走咗入嚟我間房，向佢嘅同事同我嘅情況。

「還沒有...」呢位男研究員都好害怕研究員大叔。

「真笨！這麼簡單也不會嗎！那這麼辛苦研究你出來有什麼用！」我被研究員大叔重重嘅一腳踢到飛起，撞向牆壁。

「比卡...比...」我連痛都唔敢叫得太大聲，我怕研究員大叔會更加嬲更加用力咁打我...

「明明外表和聲音也和皮卡丘一模一樣，為什麼牠做得到的，你什麼都不會！」佢再重重咁踢左我幾腳，然後我被佢倒吊咁捉住條尾巴，好難受....

「我知道你會聽的，我說過，如果你連發電都不會，我就把你的尾巴給吃了。」佢恐嚇咁對我講，然後把我大力扔到地面。

「比卡...」我無力咁訓喺地面。我知錯啦，我會盡力咁學，只希望研究員大叔可以放過我。

「我再給你一次機會。」佢對我講完，就轉身對佢嘅下屬講：「小陳，把蝙蝠給我拿來。」

「把佢給電死，我就留你一條尾巴。」研究員大叔把蝙蝠仔扔到我眼前。

我望咗一眼之後，就合埋咗雙眼。因為我知我做唔到，我唔能夠攻擊我嘅朋友...

「垃圾！」研究員大叔好嬲咁又重踢左我一腳，我已經被踢到暈咗。「真沒用！看來「神奇寶貝計劃」又要推遲。」

研究員大叔捉住我條尾，將我放喺手術枱上面。佢拎起刀，一刀將我條尾斬斷。

「比卡！！！」我痛返醒咗，身體嘅血不停向外流。

「你們好好照顧牠！如果牠的味道好，我會考慮再幫牠大量繁殖，到時候就發財了。」研究員大叔拿起我嘅尾巴離開，佢想像住我嘅肉會有幾好味，吞一吞口裏面不停分泌嘅口水。

「其實我一直也好想嚐一嚐這皮卡丘。」負責照顧我嘅研究員哥哥幫我止完血之後，見大叔走左，都即刻鬆懈左，望住我吞一吞口水。佢嘅眼神令我覺得好驚...

「你傻了嗎？牠現在是唯一一隻皮卡丘，等再多生產幾隻，我們再吃吧。」另一個研究員哥哥笑住咁打斷咗佢嘅想像。「兄弟你是肚子餓了吧。快收拾好，哥帶你去吃蝙蝠刺身。」

「好，我們天天面對那個臭脾氣大叔，壓力多大，要好好的補回來才對。」佢哋急忙咁收拾好資料，放工後一齊去食野味做消夜。

佢哋全部離開曬之後，我只能夠無力咁訓喺地面，等待佢哋對我進行下一次嘅研究。

到第二日，難得可以見到研究員大叔心情咁靚咁返工，佢嘅同事都好好奇咁圍住佢問我嘅尾巴味道如何。

「昨天我拿回去給我老婆做了涼拌吃，他尾巴的口感比豬耳朵還要爽口。但那味道啊~比什麼狗肉啊，果子貍啊，好吃千千萬萬倍。」提起美食，研究員大叔忍唔住回味起琴晚所食嘅「涼拌皮卡丘尾巴」。

「哈哈哈！大量生產皮卡丘，這次一定可以發財。」佢覺得好興奮，以中國人咁鍾意食野味，今次可以話係發現咗一條大財路。

琴晚食完我嘅尾巴，研究員大叔已經可以回味到而家。佢而家不停咁掃視我，好似想生吞埋我其他部位。我只能夠縮喺房間角落，去避開佢嘅視線。

「咳咳」
「咳咳咳咳」

最近喺研究所出現咗好奇怪嘅現象，大部分嘅研究員都接二連三咁發燒。

研究員哥哥照常嚟為我送食物，佢地基本上已經放棄咗幫我上堂，教我使用超能力，佢地只當我係稀有嘅生物養住。

研究員哥哥放低食物之後就準備離開，但佢轉身嘅一剎那，突然「碰」一聲直接訓咗喺地下。

我被佢嚇到，慢慢咁走去佢度，推一推佢個身。見佢微微仲有嘅抽搐，我即刻嚇到抱起我平日玩開嘅玩具波波，縮返埋係毛巾下面。

我等咗好耐，發現研究員哥哥已經訓係地下一啲動靜都冇。我望住前面微微打開嘅門，小心翼翼咁越過佢。用力咁用身體推開沉重嘅門，第一次踏出外面未知嘅世界。

面積大嘅研究所只有幾個人返工，加上大部分純白色嘅背景，顯得格外空洞同冷清。我抱緊手上嘅玩具波同平時訓覺用嘅毛巾，就好似抱住微弱嘅安全感，小心翼翼咁行。對未知嘅世界好奇，但帶住絲絲嘅恐懼。

我路過一間房間，見到我嘅所有動物朋友，我興奮咁跑過去。因為人手不足，所以房間係冇研究員看守住。

我想將被困嘅朋友放出嚟陪我一齊玩，我放低玩具波，跑返去我原來嘅房。我記得研究員哥哥身上嘅鎖匙放係邊，我拎到之後就趕返去我朋友仔嘅房。

我臨走嘅時候仲踢左研究員哥哥幾吓。哼！邊個叫佢平時成日恰我。

「小陳！小陳！你怎麼了?」我離開咗冇耐，保安員都喺閉路電視留意到研究員哥哥嘅情況，開咪想叫醒佢。見佢完全無反應，都即刻趕去睇佢嘅情況。

而我拎到鎖匙後，快速咁打開曬所有困住我朋友嘅鎖。所有嘅動物都因為重獲自由而歡喜，我都抱住玩具波波興奮到跳舞，蝙蝠仔都係我頭頂飛舞。

我哋全部向門口走，原本冷清嘅走廊變得十分熱鬧。

「怎麼回事了！」保安員大叔扶住研究員哥哥，見到咁嘅情況都嚇到腳軟，坐咗喺地下。

我用由細訓到大嘅毛巾包住我嘅玩具波波，一齊拎走。遮住我亮麗嘅毛髮，背起玩具波，同埋蝙蝠仔一齊開始左我地新嘅冒險。

「比卡比~」外面自由嘅空氣真係特別舒服，我伸咗一個大大嘅懶腰。

離開咗研究所之後，我地好多動物都各散東西，大部分都匿埋喺附近嘅小樹林，避開可怕嘅人類。

我跟住蝙蝠仔，由於我嘅外形實在太奇怪，平日朝早唔方便出去。每晚蝙蝠仔會幫我搵食物，我間中都會一齊出去搵，呢段時間係我出世以嚟最開心嘅日子。

直到有一晚，蝙蝠仔出咗去之後，成晚都冇返嚟。我好擔心佢，我喺洞穴入口等咗佢成晚。直到陽光出嚟，照射到我咪起雙眼，都見唔到佢返嚟...

我自從同蝙蝠仔一齊生活之後，都好耐冇再見過咁刺眼嘅光啦。我鼓起勇氣，拎起毛巾包住自己黃到有啲發亮嘅毛髮，自己一個走出洞穴，去搵蝙蝠仔。

我搵曬所有蝙蝠仔平日會去嘅地方，搵佢嘅蹤影，聞下呢啲地方有冇佢身上熟悉嘅味道，都搵唔到。我不知不覺越行越遠，開始聽到遠處有越嚟越多嘅嘈雜聲。

我豎起耳仔仔細咁聽，分辨當中嘅聲音，有我討厭嘅人類，都有各種各樣嘅動物聲，包括蝙蝠。呢啲動物嘅聲音聽起嚟好悲傷，好絕望...

我立即向住聲音嘅源頭跑，躲開有人行過嘅地方，幾經辛苦先到左目的地。

我第一次見到咁多嘅人類，佢地仲可以一刀拍死啲魚仔同其他動物，好得人驚。

我驚到合埋眼，集中精神去搵屬於蝙蝠仔嘅聲。果然聽到屬於蝙蝠仔嘅尖叫聲，我即刻順住佢嘅聲搵，剛好被我見到蝙蝠仔被人係籠度捉出嚟，放喺佢地殺動物冇數嘅死神台上。

我用「電光石火」加速，再用「捨身撞擊」撞開嗰個人類手上充滿血腥味嘅刀。呢個係我出世以嚟，第一次成功使用超能力。我咬住牙對住呢個可惡嘅人類，盡力擺出兇惡嘅表情。

哼，呢個人類果然被嚇到坐咗落地下。

「是...是皮卡丘...」所以人嘅注意力都集中喺我身上，嚇到唔可以完整咁講一句野。

當佢地回過神，即刻各自拎起手機對住我拍攝，我即刻同蝙蝠仔一齊向我哋洞穴嘅方向逃走。

「抓住牠！」佢哋見我逃走，即刻喺後面一直追。

我左閃右避咁避開曬四方八面想捉住我同撲向我嘅人類，佢哋甚至開住電單車嚟追住我，就算我已經走返入小樹林，佢哋都係窮追不舍。

我似住自己身材細粒，喺樹林嗰度同佢地伏匿匿。我匿埋喺樹後面，望住佢哋依然向前跑搵我嘅身影。直到見到佢地全部越過曬都冇發現我，完全見唔到佢地嘅身影，我先鬆咗一口氣。

我心裡面不停向自己打氣：一定要堅持住，仲差少少就可以返到洞穴，我唔可以再被人類困住。

但喺我分神嘅一殺那，一個高大嘅男人已經靜靜雞咁係我身後接近我。當我踏出第一步，想安心返去洞穴嘅時候，佢由我後面一下捉住我兩隻耳仔，就好似捉到一隻嬌小柔弱嘅兔仔咁。

「比卡...比卡...」我不停咁擺動成個身體去掙扎，等佢一鬆手就即刻逃走。但佢捉得我好實，而且好痛，我完全掙唔開。

「這是免子?哎呀~顏色染得真漂亮，真的皮卡丘似的~一定可以賣出個好價錢。」男人完全唔相信呢個世界有比卡超，佢仔細咁由上移下咁觀察我，好似望住一舊閃閃發光嘅大黃金。

我驚恐咁同佢對視，身體忍唔住不停抖震。正當我正絕望嘅時候，蝙蝠仔帶住佢大量嘅蝙蝠同埋雀仔朋友趕過嚟，朝住男人嘅頭正面衝過去。

男人被嚇到一時鬆開手，我順利由佢手度跌落草地，我喺地下打左個關抖起返身。向所有朋友仔講咗聲「比卡」多謝之後，就即刻向洞穴直衝。

男人一邊講粗口，一邊瘋狂用雙手亂打喺佢頭上亂飛嘅蝙蝠同雀仔。佢見我逃走，仲想喺後面追住我，但我嘅朋友仔遮擋住佢大部分嘅視線，佢一時追唔上。

我喺危急關頭衝返洞穴，緊緊咁抱住我嗰個玩具波波。玩具波波突然中間打開咗，發出一道強光將我包圍住。

好溫暖...

我順勢被吸左入玩具波波裡面，強光消失後，玩具波波又回復正常。

當男人追到入嚟洞穴，四圍搵都搵唔到我。佢正想放棄嘅時候，發現頭先我披住嘅毛巾，但而家下面只有一個波，外表好似寵物小精靈裡面嘅精靈球。佢唔想兩手空空咁返去，所以唯有將精靈球拎走。

2. 逃離武漢

男人將精靈球拎返屋企，俾咗佢嘅小朋友玩。但小朋友今年已經十歲啦，對呢個只有外表似精靈球嘅波完全冇興趣。呢個年紀嘅小朋友都係比較鍾意啲電子遊戲居多，所以精靈球被佢隨意咁掉俾佢嘅狗仔玩。

我喺溫暖嘅精靈球裡面訓著咗，完全唔捨得起身。到我醒返嘅時候，坐起身滿足咁伸咗個大大嘅懶腰。一張開雙眼，發現自己身處喺一個全黑而無盡嘅空間。

「比卡?」我好奇咁叫咗聲，發現我嘅尾音會「卡卡卡卡」咁回音，於是乎又大聲叫咗幾聲玩，直到呢個全黑嘅空間突然天旋地轉，我先停止咗。

我喺空間裡面企唔穩，碌左幾個關抖，趴咗喺地面，精靈球先停止轉動。我立即用雙手蓋住自己個嘴，唔敢發出任何聲音，唔敢亂郁，仔細咁聽外面嘅聲音。

「汪汪！」狗仔好奇咁咬一咬精靈球，又用毛毛嘅小手不停玩弄。而喺精靈球裡面嘅我又要迎接新一輪嘅天旋地轉，轉到我成隻暈陀陀咁。

隻狗仔終於都停低，去食嘢，而呢個屋企嘅人類咁啱都出曬街。我已經全日冇食過嘢，好肚餓，好想出去搵嘢食......

當我一有呢個想法，黑暗嘅空間就出現左一束強光照住我，將我吸咗出去。而原本喺精靈球隔離食野嘅狗仔被眼前突然出現嘅不知名生物嚇到，即刻跑到飯枱下面匿埋，驚到發抖咁望住我。

而我完全唔理佢嘅視線，反而係被眼前嘅狗糧吸引住。我左右手拎起狗糧，迅速咁塞到自己嘅嘴巴，露出一個滿足嘅表情。

狗仔一見我居然偷食佢嘅食物，即刻嬲到飛撲過嚟想咬我。我敏捷咁躲開佢嘅攻擊，再喺佢嘅注視下快速咁向嘴巴塞多幾粒狗糧。

「汪汪！」狗仔好嬲咁喺後面追住我，而我就一邊食住狗糧，一邊同佢玩起你追我趕嘅遊戲。我地起碼將成個屋企跑左一圈，周圍嘅物品被我哋搞到好凌亂。

我正玩得興起，突然聽到門口有開門聲，我急速咁跑返精靈球前面緊緊抱住佢，又一道強光將我包圍吸入去。

「啊！！！」一聲尖叫聲由外面傳到精靈球，震到我耳仔都有啲發痛。然後就聽到屋企女主人打罵狗仔嘅聲音，我都對狗仔產生咗些小抱歉嘅心情。

之後嘅日子，我係精靈球裡面聽住外面嘅聲音度過。我聽到電視機嘅聲音，聽到呢位母親做家務煮飯嘅聲音，聽到佢地一家傾計嘅聲音......

而當屋企嘅人類離開曬之後，我就會出黎搵下野食。有時搵下狗仔玩，雖然狗仔佢而家好似已經怕左我咁，見到我就匿埋，都唔敢玩我嘅精靈球。

但呢種平靜嘅日子，並唔係維持好耐......

「老婆，快點回收拾東西，我們要走了。」男人一邊收拾行李放上車，一邊對自己嘅妻子講。

中國政府宣布咗由於武漢疫情太嚴重，由聽日朝早十點就會封城。所以一大批武漢嘅市民就計劃「逃離武漢」，而呢家人都唔例外。

「我們可以走去哪裡...?」妻子喊住口咁講，始終呢個消息黎得太突然啦，佢一時間未消化到。

「我們去香港，就當去旅行就好了。要相信政府，天佑武漢，我們很快就可以回家。」男人抱住妻子安慰佢。

妻子都唔再浪費時間啦，轉身走去將狗仔嘅寵物自動餵食器裝滿狗糧同水。

「對不起，我們不能帶你走，但我們很快會回來。」雖然佢係咁樣對狗仔講，但佢跟本唔知道幾時先可以再返黎。可能返到黎，狗仔已經餓死左。

狗仔感覺到自己要被人遺棄，只能夠擺出一副可憐嘅表情，冇能為力嘅接受。佢睇準呢家人唔為意嘅時候，偷偷地將我嘅精靈球咬到小朋友嘅行李包裡面。

男人以為狗仔想跟著佢地，即刻用力推開狗仔，將行李放到車尾。一家人開住車，逃離呢個可怕嘅城市。

離開武漢嘅幾條行車線已經塞滿曬車啦，幾經辛苦之後，佢地先成功逃離武漢之後，準備出發去香港。

「咳咳」

男人有少少發燒同咳嗽，妻子即刻緊張咁喂佢食退燒藥，又幫佢不停量體溫。最後確定男人已經成功降左溫之後，一家人就好順利咁黎到左香港。

「咳咳咳」
「咳咳咳咳」

又係呢種沉重嘅咳嗽聲，我曾經係研究所都經常聽到。呢啲聲音就會似死神嘅預告咁，我聽到研究員哥哥姐姐嘅咳嗽聲之後點?就冇之後啦，過幾日佢地已經唔見曬啦，唔知佢地去曬邊。

而家又輪到呢個家庭，首先係男人咳，之後到佢嘅小朋友，佢嘅妻子。

「怎麼辦?我們不會得肺炎了吧。」佢地一家係香港暫時住係酒店度，但佢地發現佢地一家三口黎到香港之後，全部都開始發燒。

「乖，沒事的，只是巧合。就算是真的得了肺炎，香港的醫療這麼的好，一定會治的。」男人摸一摸佢小朋友嘅頭安慰佢，但男人心裡面好清楚，世界係冇咁多嘅巧合。

「那我們先出醫院檢查一下吧。」妻子簡單咁收拾一下，就一家人一齊去醫院檢查。

我聽到佢地全部離開左酒店房之後，即刻由精靈球裡面走出黎。實在太肚餓啦，我係房間裡面四圍搵，都搵唔到一啲可以食嘅野。

我望一望房裡面打開咗嘅窗口，行過去觀察一下窗外嘅情況。轉身拎起酒店嘅毛巾，照舊將精靈球背係身後，雙腳一登，跳出窗外。

我順住水管爬落地面，觀察下周圍嘅情況。十分好，暫時附近冇人類，我仔細咁聞邊度有食物嘅香氣。

我避開曬沿途嘅人類，不知不覺咁上咗去一間薄餅店嘅天花。我小心翼翼咁係天花嘅支架度行，行到角落嘅位置，準備睇準時機就偷偷地咁落去偷野食。

而而家係角落食野嘅，係一個戴住圓形眼鏡，臉同樣都圓圓嘅女仔。我小心咁往下走，但一時叉錯腳，跌左落女仔旁邊嘅膠袋，發出「沙沙！」幾聲嘅膠袋聲。

女仔只係當自己坐太近，唔小心整到膠袋，所以都冇去在意。

我係膠袋裡面聞到一大陣甜甜嘅清香，係一個個大樽裡面傳出黎，引起咗我嘅食慾。我用力咁扭開樽蓋，裡面嘅液體淋到我成身濕曬。

我用力甩乾毛髮上嘅水，我用條脷舔一舔嘴角嘅水珠，之後即刻將條脷吐返出黎。呢啲水明明聞落好香，但食起黎反而好苦好難食......

女仔好奇怪佢嘅膠袋點解「沙沙」聲咁大動靜，於是打開膠袋睇一睇。我都剛好將個頭枱起左，同佢對視......

女仔同我對視嘅一刻，世界彷彿安靜咗落黎，我地嘅眼裡彷彿只有對方，任何野都無法插入我同佢嘅空間......

我同佢嘅身體對於突如其來嘅發展，同時嚇到僵硬左。女仔默默咁放低膠袋，移返目光去佢對面嘅朋友身上，想扮咩都睇唔到。

「做咩啊樂樂?個袋有咩問題啊?」坐佢對面嘅男仔覺得好奇怪，直接起身伸長隻手黎打開膠袋睇，樂樂已經唔夠快反應去阻止。

「哎呀！」男仔見到膠袋裡面嘅情況，覺得好抱歉。「我俾你啲消毒洗手液個蓋點解開左嫁，漏曬出黎啦，快啲清理下先啦。」

樂樂嘅身體依然被剛才見到嘅生物嚇到僵硬，但佢再打開膠袋檢查，發現膠袋裡面嘅生物已經唔見左，依然有幾支大樽嘅洗手液，但其中一支打開左蓋，裡面嘅液體漏曬出黎。

而膠袋裡面多左一條大毛巾，同一個好似精靈球嘅波，兩樣都唔知係係邊度黎嘅。樂樂默默咁拎起毛巾印乾漏出黎嘅洗手液，心裡面越諗越覺得唔對路喎。

「部長，你咩都睇唔到?」樂樂抬起頭，用嚴肅嘅表情問對面嘅男仔。

「哈，我要睇到啲咩?」部長聽到呢個古怪嘅問題覺得好無奈，所以反問返樂樂。

「無野啦，哈哈...」樂樂都唔確定頭先係咪真係睇到隻冇尾嘅比卡超係裡面，自己講出黎都覺得荒謬啊。

「唔好意思啊，啲洗手夜我收返少你一支嘅錢啊。定你急用啊?我可以留返多一支俾你喎。」

「唔洗啦，我有預多左，唔該曬啊部長。」

「唔洗唔該，你返工都辛苦啦，記得自己要小心啲啊，得閒就返去休息下啦。」因為樂樂返嘅算係危險工種，所以gp嘅人平時都比較擔心佢。

「我知嫁啦，放心啦。」樂樂已經習慣左身邊嘅人每個都好似老母咁哦佢，所以唯有每次都無奈咁應佢地啦，佢都唔想佢地成日咁擔心。

部長送樂樂去搭車返屋企，臨走時仲送左盒朱古力俾佢。樂樂笑住多謝佢，因為佢俾人嘅印象好為食，所以成日都收到零食。佢自己都覺得好無奈，但呢啲係人地對佢嘅關心，佢都會感恩咁接受。

樂樂上左巴士，坐係角落嘅位置。而家唔係返放工時間，所以巴士上面只有幾個乘客。

佢一坐落去坐位，將沉重嘅隨身物品放係隔離嘅位置，就自動合埋雙眼補眠。我聽到精靈球外面好似已經冇太大動靜，就偷偷地走出黎。

一出黎發現自己仲係膠袋裡面，身邊散發住甜甜嘅清香令我諗起剛才嘴巴裡面嘅味道，因此對呢種香味產生左極大嘅心理陰影。

我嘅肚都仲未填飽，頭先咩野食都偷唔到，所以唯有冒住危險再走出黎搵食物啦。

剛才發現我嘅人類而家訓著左，我靠近佢，聞下佢身上有冇食物嘅味道。我聞到佢另一邊嘅褸袋度有另一種甜甜嘅香味，我小心翼翼咁係佢大脾爬過去另一邊，希望今次係真嘅食物啦。

抬頭望一望佢，依然係合埋雙眼冇反應。就鬆左一口氣，繼續我嘅動作。

成功拎到朱古力之後，我期待咁直接坐落黎準備享用。我拆開包裝，係裡面拎左一粒朱古力波，但因為頭先嘅事，我對未試過嘅食物有左些小嘅陰影。

我用條脷舔一舔朱古力波嘅表面，甜甜嘅，好味道！

我放低左誡心，滿足咁將朱古力波左右手交替咁塞入嘴巴。不知不覺就將成包朱古力波食曬，我舔埋嘴角殘留嘅味道，覺得好唔捨得，我仲想繼續食......

但而家已經冇剛才咁肚餓，我轉過頭望住車外嘅景色，覺得好新奇。因為我自從係研究所出黎之後，都忙住搵野食同避開人類。其他時間都係怕俾人發現，所以匿埋係精靈球，從來冇咁認真咁睇過外面嘅景色。

當我正享受住呢個寧靜嘅時刻，巴士突然急速煞車，我感覺到我要飛出去而家嘅坐位，一雙手係我背後伸上黎，迅速圍住我嘅腰，防止我跌出去。

原本我因為冇跌出去而鬆左一口氣，但突然諗起唔到路。望一望圍住我腰間嘅手，慢鏡頭咁轉過頭，再抬起頭。

剛才合埋嘅雙眼，而家擘開靜靜咁望住我。兩雙圓碌碌嘅眼再次對上視線，同剛才係餐廳相似，唯一唔同嘅地方係，樂樂眼裡面嘅驚恐已經被好奇取代左。

3. 新生活

其實樂樂一直都冇訓過，佢只係合埋眼休息。隻比卡超一踩上佢大脾，雖然輕力，但都會感覺到。佢即刻唔敢亂郁，唔敢擘大對眼，最多都係擘開少少偷望。

隻比卡超偷完佢嘅朱古力之後就背住佢，直接坐左落佢大脾去享用啲朱古力。所以樂樂都光明正大咁擘大對眼，開始仔細咁觀察佢嘅背後。

的確同《神探比卡超》裡面嘅比卡超一模一樣，唔同嘅地方就係，呢隻比卡超冇咗條尾同電影裡面頂啡色偵探帽。

樂樂眼中嘅驚恐漸漸消失，取而代之嘅係好奇嘅觀察。佢望住比卡超拆開朱古力，將朱古力波一粒一粒咁塞入自己嘅嘴巴。食得開心嘅時候，一對長耳仔會跟住佢嘅頭微微左右搖擺。一有野食，就完全一啲戒心都冇。

「比卡~」望到比卡超食完所有朱古力之後，發出失落嘅一聲「比卡」，耳仔都微微咁有啲向後落，明顯未滿足。

樂樂用手蓋住嘴巴，避免自己會忍唔住笑出聲。佢覺得眼前嘅比卡超同動畫，電影嘅一樣可愛，一早已經想摸一摸佢地嘅頭，但樂樂都係忍住左。

原本樂樂想扮自己冇發現佢，等佢食完野會自己離開佢嘅大脾。但比卡超食完朱古力之後，都冇諗住離開佢而家坐嘅位置，而係轉過頭睇風景。

巴士突然急速煞車，樂樂下意識抱緊比卡超，保護佢，以防佢就咁跌咗出去。

「比卡......」

比卡超發現樂樂已經醒左，慢動作咁將頭轉過去，樂樂都忍住笑意同佢對視。比卡超個腦空白左幾秒，之後即刻轉身跳返進入膠袋。

「沙沙沙」當樂樂打開膠袋睇嘅時候，比卡超已經入返精靈球裡面啦。

樂樂拎起精靈球仔細咁觀察，雖然令人唔敢相信啊，但剛才的確唔係佢自己係度發夢，原來呢個世界真係有寵物小精靈。

樂樂將精靈球袋好，帶返屋企。雖然佢自己都唔知自己點解要咁做，但佢覺得如果俾其他人發現左嘅話，呢隻比卡超恐怕會有危險。

樂樂返到屋企，又要先重複一系列麻煩嘅消毒程序。完成左簡單嘅消毒之後，佢急急腳咁拎個精靈球出黎放係書枱研究。

「比卡超?我知你係裡面，出黎好冇?」樂樂等左一陣，精靈球完全無反應。

佢突然靈機一閃，轉身走向廚房。佢打開雪櫃睇一睇裡面剩返嘅食材，將琴晚隔夜嘅白飯同未煮嘅雞胸肉拎出黎。

白飯加少少水，放入微波爐返熱一下。而雞胸肉就簡單白灼，放涼少少再切絲，之後同白飯撈埋一齊。樂樂聞一聞雞肉飯嘅氣味，有啲淡，恐怕未必引到比卡超出黎。

「比卡超~有好味嘅雞肉飯食啊，快啲出黎啦~」樂樂將雞肉飯同水用碗載住，放到精靈球旁邊試一試，睇下可唔可以成功氹到比卡超出黎。

佢等左一陣，但精靈球依然冇反應。佢有啲失望，唯有決定先沖個涼，外面咁多菌，要仔細消毒一下。

「啪」樂樂離開，關左房門嘅嗰一刻，枱面上嘅精靈球打開，發出一道光。

我聞住雞肉飯嘅香味，露出滿意嘅笑容，然後又間轉成嚴肅嘅表情，拎起一條雞肉絲同一粒飯試一試。

「比卡！」好嘅，冇毒！

我滿意咁大口大口咁開餐，已經完全沉醉係美食嘅世界。從來未試過咁滿足咁食飽一餐，我食到最尾，大碗成個拎起鬨埋自己塊臉，將最後嘅幾粒飯粒都用條脷舔得乾乾淨淨。

「比卡~」我放低大碗，滿意咁摸住脹大左嘅肚腩仔。兩隻大眼開始仔細咁觀察自己身處嘅房間。

房間嘅牆係淺綠色嘅，唔細睇都好難會發現。而門口嘅右面有個大衫櫃，衫櫃隔離已經係書枱，最埋邊就有張單人床，上面嘅毛公仔已經佔左床嘅三分之一位置。

我嘅視線停住左係其中一隻公仔身上，因為佢同我生得一模一樣。我由出世到而家，第一次見到同伴，即刻興奮咁跳過去同佢打招呼。

「比卡?」但無論我打幾多次招呼，對方都係無認我。

我大膽咁上前摸佢，外表同我完全一模一樣，但摸上手手上嘅觸感好可怕，而且完全無溫度。我嘅雙耳失落咁向後落下，忍唔住抱住佢無聲咁落淚。

當樂樂沖完涼返黎，已經見到一隻軟淋淋嘅比卡超被另一隻緊緊抱住，已經變曬形。而另一隻比卡超已經訓著左，眼附近嘅毛仲留住幾粒淚珠。

樂樂終於可以光明正大咁觀察同觸摸眼前嘅比卡超，佢小心翼翼咁摸一摸比卡超嘅耳仔，耳仔嘅毛髮毛茸茸咁，摸上手令人感覺好舒服。

熟睡嘅我感覺到有人騷擾我訓覺，沉重嘅眼皮唔捨得擘開，只係兩隻長耳仔微微咁撥動，將煩擾住我嘅手撥走。

樂樂以為我要訓醒，所以收返佢手多嘅手。之後先發現我只係轉個姿勢訓覺，將剛才被騷擾嘅位置隱藏起黎，背部朝上。

樂樂原本以為呢隻奇怪嘅比卡超係冇尾巴嫁，但係當佢仔細觀察返其實我仲留有短短嘅尾部，但尖端位只有生幾條嘅毛，睇黎係受過傷。

因為職業原因，樂樂習慣去觀察。佢對比卡超影左張相，跟住send去佢平日活躍啲Telegram group。

快樂happy伯：比卡超圖片，我今日唔小心捕捉左隻比卡超，點算?

小寶貝：巧可愛啊

薯仔油：樂樂你今日唔係約左部長交收咩?去左夾公仔?

快樂happy伯：係交收左......

沙嗲牛：樂樂你仲唔出門口?今日放假?

快樂happy伯：我都想放假啊，今晚仲要去西九龍啊

沙嗲牛：樂樂高危

薯仔油：今晚真係要小心啲，記得戴口罩啊咁多位，我今晚都準備去，今晚見

快樂happy伯：好啦，大家都小心啲

「唉~」樂樂放底手機，望住比卡超嘆咗一口氣。連自己都冇發相信，唔怪得人地都唔信嘅，今日嘅事真係神奇到好似發夢咁，可能所有野都係假，訓一覺就會唔見左隻比卡超。

身為一個記者，遇到啲新奇有趣嘅野正常應該好興奮，但社會平日嘅事件同抗爭已經令佢大把題材寫，今日都好攰，跑足好多場。

而且樂樂都唔知比卡超嘅來歷，睇黎要先照顧佢一段時間。不過佢並唔抗拒，自從佢嘅狗仔死左之後，佢其實一直都想再養寵物。

樂樂起身開始收拾佢工作嘅用具，一陣仲有大把野做。

「比卡......」我醒咗之後，打左個大大嘅打喊露，因為仲未完全清醒，呆呆咁望住正在忙碌嘅女仔。

「你好......」樂樂聽到我已經醒咗，笑住咁轉個身同我打招呼，我先回過神，迅速咁逃返去精靈球裡面。

「唉~」樂樂無奈咁又嘆咗一口氣，對比卡超怕人類嘅反應有啲失望。因為佢好鍾意動物同可愛嘅野，仲期待比卡超可以同佢親近吓。不過佢相信，只要好好咁照顧比卡超，比卡超終有一日會接受佢。

「等我返黎。」樂樂對住精靈球講完，又要出發去戰場，基本上每一次嘅活動，對樂樂黎講都係冒住生命危險，隨時會返唔到黎。

我聽到外面已經無動靜就再由走出黎，其實我並唔太鍾意留係精靈球，因為係裡面太悶啦，唔係發呆就係訓覺。

剛才我已經訓到飽曬，所以係時候出後冒險。我靜靜雞咁走出樂樂嘅房，係佢嘅屋企仔細咁行左一圈。我對外面嘅所有事物都充滿好奇，最後都係返咗樂樂嘅房玩起毛公仔。

我突然聽到外面傳黎開門嘅聲，我抱住公仔，將耳仔豎起，留心注意住外面嘅聲響。

「唉~」樂樂嘅父母剛好一齊返到屋企，見到屋企又係空冇一人，覺得好失落。

「今晚又係邊度有活動?一早叫咗悅悅佢轉行，而家我真係晚晚都訓唔著，係度等佢返屋企啊。」許媽媽一邊開始準備晚飯，一邊重複住每日嘅抱怨。

「咁呢個係悅悅佢嘅夢想黎，我地唔可以阻止佢嫁。」許爸爸其實都唔想個女做啲咁危險嘅工作，但樂樂而家已經大個女，有自己嘅夢想同想法。

「我每晚發夢都夢見悅悅俾班黑警打，佢地班人冇人性嫁啦已經，我真係好驚。我地已經冇左諾言，我唔可以連悅悅都冇埋......」雖然過咗咁耐，但每當兩老諗起離開左佢地嘅大仔，依然會沉默，淚水一早已經流乾啦。每次一諗起佢，成個家嘅氣氛都會變得沉重。

兩老食完晚飯之後，照常用手機打開連登直播新聞，畫面係今日嘅集會現場，而背景聲音就係佢地個女係度做解說。

每當樂樂影到有防暴出現嘅時候，兩老都會好似身臨其景咁，緊張咁握住手機。如果佢地見警察打示威者，都會大大聲咁鬧班防暴係黑警。

「收到行家消息就話順利邨有突發行動，有火魔出動。咁我而家就熄一熄直播趕去睇下先，多謝大家收睇連登新聞啊。」

原本兩老以為高鐵西九龍站抗議行動冇咩事發生，樂樂今日應該可以早返黎。結果兩老都係失望咁等樂樂開下一次直播，睇黎今晚又要訓唔著......

我剛才聞到出面嘅飯香，已經行到房門口，忍唔住想出去。不過而家出去恐怕會被發現，唯有先忍一忍，留意住外面嘅情況。

4. 比卡超嘅幸福

樂樂返到屋企嘅時候，已經係凌晨嘅四五點。佢怕嘈醒佢嘅父母，所以小心翼翼咁打開屋企嘅門。

「悅悅返黎啦?」許媽媽跟本擔心到無法熟睡，佢地冇關房門，一直留意住客廳有冇人返黎。見到個女返黎，佢即刻著返件褸，從溫暖嘅床走出黎。視線落係樂樂身上來回觀察，擔心見到佢身上有出現傷口。

「媽媽，你做咩又唔訓啊，休息多陣先起身啦。」樂樂放輕聲，擔心嘈醒埋許爸爸。

「我有訓啊，悅悅肚餓未?你快啲去沖涼先，我熱返啲餸俾你。」許媽媽見樂樂身上冇明顯傷口，鬆左一口氣。從雪櫃拎出一碟碟嘅飯餸，準備熟返熱。

「媽媽，我自己黎就好啦，你快啲返去訓多陣先啦，晏啲仲要返工。」樂樂輕力將媽媽推返房間。

「咁你朝早係咪唔洗返工?記得要好好訓覺，唔好掛住玩手機。」許媽媽擔心樂樂唔夠訓，再幾返叮囑先關上房門。

「哎呀，我知道嫁啦。」自從半年前反送中運動開始，樂樂身為記者差唔多冇假放，晚晚都加班四圍跑。而樂樂嘅家人因為擔心佢，都開始晚晚冇覺好訓。

樂樂成功捉返許媽媽去訓，就轉身去沖涼。佢打開花灑，熱水淋濕佢全身，令佢嘅身體間放鬆落黎。佢享受住難得嘅寧靜，個腦咩都唔洗諗。

樂樂沖完涼出黎，肚都已經開始餓到打鼓。呢個時間已經食野應該係早餐黎，所以佢都唔想食飯餸。佢將兩塊白方包拎出黎搽些少牛油，再夾一塊已切成薄片嘅火腿，將佢地放到三文治機烘熱。

係雪櫃拎出兩粒雞蛋打到碗裡面，加啲啲牛奶同油，將佢地打勻。小量油預熱平底鍋，將打好嘅雞蛋倒入去快速炒大約五，六下，已經可以上碟。

金黃色嘅炒滑蛋係餐碟上閃爍住油光，樂樂幫佢再灑上些少鹽，增加佢嘅味道。

而三文治機上嘅燈剛好已經熄滅，代表三文治已經烤好。空氣中彌漫住麵包同牛油香，樂樂打開三文治機，三文治已經被烘烤到金黃色，佢小心翼翼咁用筷子夾上碟，輕鬆咁就完成左佢嘅早餐。

佢將完成品放到餐枱準備享用，無意間睇到一對長耳仔係佢嘅房間伸出，門後圓圓嘅雙眼閃爍咁望住枱面上嘅食物。

剛睇到嘅時候，樂樂真係嚇咗一跳。但定一定神睇清楚之後，先無奈咁笑。

「比卡超，要唔要一齊食?」樂樂拎起兩隻碟走到我面前。我退後幾步，警惕咁望住佢。

「小動物唔可以食太多濃味，你先等我一陣。」樂樂轉身走向廚房，拎起刀切咗五分一嘅三文治，放係另一隻細碟上面，再拎返自己房。

「比卡超，你係邊啊?」樂樂返到房，我匿埋係枱底，偷望佢。但我嗰對長耳仔係我唔知道嘅情況下，已經將我出賣左。

「俾你試下，好好味嫁。」樂樂彎低腰將較細份嘅三文治放係我面前，佢期待咁想睇住我食，但我依然警惕咁望住佢。

「咁好啦，唔望你啦。」樂樂都開始係書枱上享用佢嘅早餐，因為一直望住比卡超，恐怕佢咩都唔會食。

「比卡?」我上前聞一聞眼前金黃色嘅三文治，散發出牛油同麵包嘅香味。我用小巧嘅手掌將佢拎起黎，牛油因為部分滲咗上方包表面，所以有啲燙手。

「比卡！」

我試左一小啖，雙眼即刻瞪大，因為我從來未食過咁好味嘅野。方包嘅外皮滲到少少牛油，所以係帶有少少油光嘅金黃色，雖然有少少淺啡色嘅微焦，但咬落香脆。

而方包內裡嘅牛油已經係烘三文治嘅時候遇熱全部溶化，完全滲到入方包度，所以內裡會有濕濕潤潤嘅感覺，口感就好似流心嘅食物咁。咬落去嘅一殺那，牛油就變左液體咁，味道間散播到口腔每一個角落。

而中間粉紅色嘅火腿，味道唔會太鹹，但增加左三文治嘅口感，令三文治停留係口中嘅時間更長。

我兩三啖已經將手上嘅三文治食曬，然後用脷將流到手上嘅牛油舔乾淨。自己食完之後，就完全唔記得咗自己剛才對待人類嘅警惕，衝到樂樂嘅腳邊，希望佢再俾幾啖佢食。

「唔可以啊，太油太濃味啦對小動物黎講，我只係俾你試吓。你未飽嘅話，我一陣再煮你可以食嘅野俾你。」樂樂望到我可憐嘅眼神，輕力拍拍我嘅頭，依然冇心軟。

「比卡~」我因為食物，間對眼前嘅女仔好感大增，係佢腳邊撒嬌，希望可以換到更多食物。

樂樂食飽之後，就無奈咁起身準備我嘅食物，我興奮咁跟住佢身後。因為時間已經唔早，佢準備我嘅食物之餘，又順便準備埋父母嘅早餐。

「悅悅，你仲唔訓?早餐我地自己準備未得囉。」許媽媽剛訓醒，褸住睡袍行出黎，係廚房門口嘅我跟本趕唔撤匿埋。

我見到許媽媽突然出現，即刻僵硬住身體，唔敢亂郁。因為發生咁咁多事，我大約都明白自己嘅情況係唔可以做人類發現。

「悅悅你又去咗夾公仔啊?做咩就咁放係地下，會污糟嫁。」許媽媽以為我係毛公仔，想將我抱起，我即刻避開，飛快咁跑到樂樂身後。我抱住樂樂其中一隻腳，突出少少頭望住許媽媽。

「呢隻咩黎?兔仔?兔仔係咁樣嫁咩？咁大隻嘅?」許媽媽原本以為我係死物黎，所以被我嚇咗一跳。

而樂樂都被我突然跑到佢腳邊嚇到差啲企唔穩，對許媽媽一連幾個問題，佢都一時答唔出。

「呃…呢隻係…龍貓?係啊！係龍貓黎！」樂樂為咗掩飾佢嘅慌張，故意加重音讀「龍貓」兩隻字。

「龍貓?咩黎嫁?」好彩許媽媽跟本冇可能識啲少出現嘅動物名，問題實在太多，樂樂唯有傻笑咁敷衍過去。

許媽媽伸出手想再嘗試抱我，但依然被我避開。樂樂輕輕拍一拍我個頭，我抬起頭用圓碌碌嘅眼睛望住佢。見佢伸出手黎想抱我，我對佢有咗信任，好自然咁抬起手，方便佢抱起我。

「比卡超~」我安心咁將挨到樂樂嘅心口。

懷抱裡嘅比卡超有一刻令樂樂分神，彷彿好似見返佢已經去世嘅狗仔。同樣柔軟嘅毛，同樣嘅大小重量，同樣嘅溫暖，令樂樂一時有啲分唔清。

「比卡超?隻野個叫聲咁奇怪嘅。」許媽媽神奇咁望住眼前嘅生物。

「媽媽，早餐我已經煮好啦，你叫埋爸爸起身食啊。我好眼訓，喂埋比卡超就訓啦。」樂樂都配合咁打左個大喊露。

「哎呀，咁你快啲訓啦。」許媽媽成日都心疼個女做記者做得咁辛苦，都唔會阻佢休息。

「好」樂樂同樣煮咁少少雞肉飯俾我，等我食完之後就抱住我入返房。

因為佢實在太眼訓啦，抱住我一齊訓，好快就進入夢鄉，一直訓到中午三點左右先起身。

我順從咁係俾樂樂抱住訓，因為我平日已經由朝訓到晚，所以冇耐就醒咗。我係佢懷裡悄悄咁爬出黎，無聊咁玩咗陣公仔，再爬到樂樂身上觀察佢。

樂樂平日係戴住圓眼鏡，為咗方便活動，佢長期都係紮起一條馬尾。就咁睇落去，大部分人都會覺得佢仲係個學生。眼底因為長期睡眠不足，而有少少黑眼圈。

樂樂被一個迷你嘅小爪壓住個肚，表情有啲痛苦，但又移動唔到身體。

「波波，唔好搞啦…」樂樂未訓醒，仲以為係佢以前隻狗仔嘈住佢訓，佢伸走想推開企係佢肚上邊嘅小動物。

「比卡?」我疑惑咁望住樂樂。

「啊…原來係比卡超。」樂樂努力咁將眼皮張開一條線去睇，然後再次合上。

佢係床上再發一陣白日夢，再望一望手機時間。下奏3點啦，今晚11點仲要去黃大仙和你Suck度做野。

「早晨，比卡超。」樂樂摸一摸我頭上軟綿綿嘅毛，就起身去準備簡單嘅午餐，而我見佢走入廚房，都跟埋過去。

樂樂平時自己一個嘅話，唔會煮啲麻煩嘅料理，都係簡單易煮為主，而且雪櫃有咩就煮咩。佢將洋蔥同雪櫃嘅雞柳解凍一陣，再切粒。

樂樂拎起平底鍋落少量油預熱，先落切好嘅洋蔥同雞粒，「沙」嘅一聲，洋蔥同雞肉粒係熱鍋裡面跳動，洋蔥嘅香味悄悄咁係空氣裡面彌漫。我企係樂樂旁邊，聞住香味，口中嘅口水不自覺咁分泌出黎。

樂樂見洋蔥已經變成金黃色，就落雪櫃剩底嘅冷飯炒。加入少量嘅茄汁，鹽同胡椒調味，最後再落黃色嘅栗米粒炒勻，增加咗炒飯嘅色彩，望落更加吸引。

將炒飯上碟備用，再落油預熱平底鍋，將兩隻雞蛋打勻落鍋，好快就煎出黃色嘅雞蛋皮。關火後再落準備好嘅炒飯，小心翼翼咁用蛋皮將炒飯包起。將碟蓋係蛋包飯上面，再一口氣反轉，我崇拜咁望住樂樂嘅動作。

「比卡！」我希望喚起樂樂對我嘅注意力，再係佢望到我嘅時候做一個期待又可憐嘅表情，希望佢可以留多幾啖俾我。

「仲未得嫁。」樂樂無奈咁點一點我因為聞到香氣而郁下郁下嘅鼻。

「嘻嘻，搞掂！睇下似唔似你?」樂樂執一執蛋包飯嘅形狀，再用茄汁係上面畫一個迷你嘅比卡超。

「比卡?」我好奇咁伸頭去望住蛋包飯上面嘅自己。

5. 可疑嘅記者

「呢份喺你嘅蛋包飯。」樂樂將小份量嘅蛋包飯移到另一個碗仔，放到我面前。

「我唔客氣啦~」

「比卡比~」我模仿住樂樂咁，之後就開始大口大口咁開餐。

「嘻嘻。」樂樂望到我食得咁開心，平日平平無奇嘅野食，呢一刻都變得更加美味。

我哋食飽之後，我就跟著樂樂尾返到房，只見佢係櫃嘅深處搵到一件迷你嘅狗仔衫。喺可愛嘅恐龍造型，衫嘅後面掛住一條長長嘅尾巴。

「好可愛。」樂樂幫我將件衫著上身，我行路嘅時候沉重嘅尾巴就跟住我，喺地面拖住走。

「比卡?」我抱住尾巴，兩隻耳仔下垂，用濕潤可憐嘅眼神望住佢。希望可以除返件衫，件衫好阻住我郁動，唔舒服。

「呢個喺波波以前嘅衫，果然好啱身，但條尾果然係太重。」樂樂摸住件衫嘅尾巴，思考住可以轉用咩物料，會令比卡超著得舒服啲。

樂樂轉身喺書枱度放好材料，開始做起手作，我都好奇咁爬上書枱，觀察佢喺度做咩。

日落嘅陽光照到我同樂樂身上，有種寧靜又溫馨嘅感覺。我有啲無聊咁望住書枱上面嘅一張相，喺樂樂抱住一隻松鼠狗，同另一個男仔嘅合照。男仔同樂樂生得好似樣，相中擺出一模一樣嘅笑容。

「呢個喺波波。」樂樂見我望住張相，就指住相裡面嘅狗仔同我介紹。

「呢個喺我哥哥，佢喺一個英雄嚟。」然後指住相裡面嘅男仔。我轉頭望向樂樂，明明表情喺度微笑，但就俾人一種哀傷嘅感覺。我用條脷舔一舔樂樂嘅手指，令佢回過神。

我擔心咁望住佢，佢都注意到我呢刻嘅感覺，所以笑住咁用手輕力拍一拍我嘅頭安慰我。

寧靜嘅時間永遠都係喺眨吓眼就過，樂樂嘅父母放工返黎之後見到我，原本都表現出好抗拒。但佢哋會喺樂樂睇唔到嘅情況下，走過嚟同我握手，同我玩。

樂樂其實都發現咗，原本仲擔心父母會趕走比卡超，但好彩佢哋嘅接受能力比佢想像中強。

「媽媽，你哋幫我睇住比卡超啊。唔洗再等我門，今晚早啲休息啦。」樂樂又要準備好佢嘅工具去黃大仙做野，所以將我先交俾父母照顧。

「比卡~」我跑過去抱住樂樂嘅腳，想佢俾我跟埋佢一齊去。

「唔可以啊比卡超，乖乖地等我返嚟。」樂樂用手輕輕力推開我，唔俾我跟去。

我皺住眉，扁住嘴咁轉身行返入房，嬲佢唔帶埋我。見樂樂冇嚟氹返我，就偷偷地將精靈球放到佢嘅背囊裡面，再走入去精靈球裡面。

而樂樂完全唔知情咁拎起背囊就出發，去今日嘅戰場。

「喂?爸爸?」樂樂剛出門已經接到許爸爸打嚟嘅電話。

「悅悅，隻比卡超唔見咗嘅?」喺電話嘅許爸爸好緊張。

「應該係匿埋訓咗借，一陣會出返嚟，放心。你哋今晚早啲訓啊。再見。」樂樂冇去在意，以為比卡超只係返咗精靈球訓。

樂樂早咗到黃大仙現場，但都需要去現場四圍行去睇情況。而家都仲未到7點，雖然距離新一年仲有5個鐘有多。但係而家已經有唔少嘅善信喺黃大仙廟外面排隊，而且現場都已經開始有啲POPO喺度守住。

樂樂唔知係咪心理作用，大背囊嘅裝備比平時好似重咗好多咁，所以要先行去班POPO附近嘅石壆坐底，保存體力到今晚。嗰邊已經有一個行家喺度啦，由六月開始一直都差唔多日日見住啲行家，所以大部分都互相認得。

「嗨，又見面啦。」樂樂主動走埋去同佢打招呼。

「嗨，樂樂。」嗰行家都向樂樂打招呼，基本上佢哋只有直播中嘅時候先行埋一齊，而直播往往都係對鏡頭對面嘅觀眾講返當時發生嘅事，所以佢哋其實都未正式介紹過自己。

「你點知嘅?」樂樂笑住咁問，將背囊放喺旁邊。

「我當然知啦，你係連登直播新聞嘅樂樂啊。我得閒會去睇返其他新聞直播。我都未正式介紹過，我係new新聞嘅唐澤。」唐澤一邊整理佢嘅裝備，一邊同樂樂傾計，時間一點一滴咁流逝。

「有冇帶嘢食啊?差唔多時間食少少嘢墊底，食完之後就準備開直播啦。」唐澤係佢嘅背囊拎咗兩個冬甩出嚟準備食。

「有啊，我都準備咗三文治。」樂樂伸手入背囊搵，意外地摸到啲軟淋淋，毛毛嘅物體，仲要帶住微微溫暖嘅體溫，嚇到樂樂即刻縮返隻手。

樂樂打開背囊一望，再次同一對圓碌碌嘅大眼四目交投，佢默默咁合返埋背囊嘅袋口。呢個情景似曾相識，兩次都令佢瞬間嚇到背後發涼。

「做咩事?」唐澤見樂樂突然被嚇到彈起咗一吓，所以疑惑咁望住佢。

「呃...冇事啊...」樂樂露出尷尬嘅笑容嚟回應佢。

「哦...冇事就好啦。」唐澤拆開其中一個朱古力冬甩，大大啖咁咬落去。

「返入去啊！」樂樂見唐澤冇再留意佢，就再打開袋口，拎住袋裡面個精靈球，用誇張但冇聲嘅口型，想我返進入去精靈球。

「樂樂......」聽到唐澤突然叫佢，樂樂下意識即刻轉過頭回望佢。只見唐澤依然咬住食物，但皺起眉咁望住佢。

樂樂抱緊個背囊，緊張咁望住唐澤，默默咁等待佢下一句嘢講咩。我感覺到個背囊收緊，壓到我有啲唔舒服，所以就返入精靈球。

「唉?」樂樂突然感覺背囊嘅重量變返正常，裡面物品嘅體積都瞬間縮細。當佢再打開袋口睇，我已經返咁入精靈球。

但樂樂同時發現，佢帶出嚟嘅三文治已經唔見咗，得返個裝三文治嘅紙袋。佢好嬲扁一扁嘴，左手將紙袋用力咁握成紙團。

「樂樂，你係咪唔記得帶野食?我呢度仲有個冬甩，俾你。」唐澤突然將佢未食嘅士多啤梨冬甩遞到樂樂眼前。

「唔洗啦…你邊夠飽。」樂樂唔好意思收，推返個冬甩俾佢。

「我ok喎，我肚餓嘅話今晚會再去食糖水。少少都要食啲，唔係我怕你一陣跑唔郁。」唐澤冇放開底手，依然保持將冬甩遞俾佢嘅姿勢。

「咁好啦，多謝你。」樂樂有啲感動咁接過冬甩。

冬甩因為俾唐澤放過落背囊，所以被壓到有少少扁，而且買咗一段時間，已經變咗常溫，唔係剛出爐嘅熱辣辣同鬆軟。

粉紅色嘅士多啤梨醬緊貼係冬甩嘅表面，上面佈滿咗彩色嘅朱古力碎條。睇起嚟好可愛，好少女心。樂樂咬咗一啖，周邊嘅士多啤梨醬有大量嘅碎已經跌落膠袋度。

冬甩雖然被壓到有啲實，而且甜咗啲，但其實依然好香好好味。

唐澤一個大男人居然會鍾意食咁少女嘅野，同佢嘅外表完全唔襯，呢點令樂樂有啲意外。

「多謝你啊，個冬甩好好味啊。」樂樂食完之後，再一次所佢講多謝。

「哈哈，唔洗咁客氣喎，你鍾意就好啦。開始多人，準備開直播啦，你自己一個小心啲啦。再見。」唐澤拎起佢嘅裝備，準備開始做嘢。

「再見啦。」

樂樂同佢分開行之後，佢已經冇時間，唔得閒去理背囊裡面隻比卡超啦。佢收拾好心情，打開直播。

「大家好啊，歡迎收睇連登直播新聞，我係樂樂。我而家就喺黃大仙寺嘅門口，其實由七點開始到而家十一點，已經有善信喺度排隊嫁啦。

而隔離就見到有好多黑衫嘅後生仔啦，咁中年人都有嘅，暫時係見唔到有人著住一啲示威嘅裝備。佢地嘅中間呢，就有班警員係度駐守住，好似夾心咁夾咗係善信同班後生仔嘅中間......」

「喺螢幕度係開始倒數緊嘅，而我哋今年呢，係同一班警員一齊倒數到新一年嘅。而現場大部分市民都開始叫光復香港之類嘅口號，可以見到隔離有大量嘅警力駐守住。」雖然暫時未有人被捕，但樂樂依然唔敢放鬆，佢同其他行家各自係啊同嘅位影住。

「黑警死全家！」

「放人啊！」

「我地而家係見到呢，警員係突然截查大量市民，唔知點解啦。佢哋而家係用強光電筒去照住市民同記者嘅，而有大量嘅市民係喺度指罵警員嘅......」樂樂一見到有事發生，就即刻衝過去影住。

「記者行後啲啊！」樂樂前邊嘅popo不停粗糙咁推佢向後同用唔友好嘅語氣兇佢。

我聽到有人兇樂樂，想出黎保護佢，所以精靈球係背囊裡面不安咁郁動。樂樂感覺到之後都好怕比卡超又突然出嚟，佢感覺成身瞬間已經出曬冷汗。佢偷偷地將右手伸到背囊後面拍一拍，將我安撫落嚟。

「好好好，你唔洗再推。」樂樂費時班popo又發癲，所以都盡量合作咁退後幾步。用鏡頭zoom近影返被截查嘅市民大頭，方便手足幫手去做嘢。

「我哋可以睇到呢，對面馬路都係有大量嘅市民被截查嘅，但係我地影唔到去嗰邊啦，唔知有冇行家係嗰邊幫手影嘅。」我想影埋對面馬路有冇人被捕，可惜係完全影唔到嘅。

「哦~new新聞有喺嗰邊影住。」我留意埋觀眾啲留言，見到有行家幫手影都放心少少。

「咁可以睇到呢，前面灰色衫嘅男仔已經被捕啦，暫時唔知咩罪名。而警員呢，係keep住用強光燈照住傳媒。」樂樂被刺眼嘅強光燈照到有啲熱，但佢keep住影住，直至嗰個男仔上咗警車。

「暫時睇到係得一個男仔被捕，而原因係因為藏有士巴拿。冇咩特別嘅話今日嘅直播就到呢度啦，多謝大家收睇連登直擋新聞。」樂樂再喺現場行咗幾個圈，都係影吓啲popo截查市民，好彩今晚呢度都冇咩特別事發生。

樂樂熄咗直播之後，檢查返佢手機未讀嘅留言。佢同其他比較熟嘅行家開咁個gp，叫《記者跑online》。

龜狗賽跑：黃大仙好似冇咩特別事喎，大家完咗一齊食糖水。

中指姐姐：join

冇立場大叔：+1

快樂happy伯：我剛熄直播炸，趕嚟join你哋。

6. 靈異事件

樂樂去到約定嘅糖水舖，佢嘅三個記者朋友已經坐喺度等佢。

「樂樂，等你好耐啦，我地叫咗嫁啦。」喪貓日報嘅龜龜見到樂樂黎，即刻俾餐牌佢睇。

「嗯......食熱嘅豆腐花啊。」餐牌上嘅食物全部嘅相都好吸引，令樂樂覺得有選擇困難，就隨便叫一個。

「好彩今日冇咩特別事，我哋可以早啲放工。」冇立場新聞嘅叔叔伸咗個懶腰。佢雖然只有三十幾歲，但網名鍾意其他人叫佢叔叔。

「樂樂啊，我今日好似見你同new新聞嗰個記者傾計喎。」同樣係冇立場新聞嘅姐姐露出一個八卦嘅表情。

「係啊，你識唐澤?new新聞都係黃嫁。」樂樂嘅熱豆腐花好快就到咗，佢有禮貌咁接過。

「我當然知道係黃啦，我係想問你哋有冇聽過傳聞。」冇立場姐姐聽到樂樂只係講得出啲係人都知嘅資料，所以無奈咁對佢反一反白眼。

「咩咩？」龜龜語氣聽落好興奮咁，準備好聽是非。

「new新聞唐澤?我都聽講過佢，佢好似好勁咁。之前721班鄉黑同黑警搭曬膊頭嗰啲片啊，好似都係佢影返嚟。」叔叔都將佢知道嘅都講出嚟。

「呢啲只係前面嘅事，後面仲有後續嫁。」冇立場姐姐嘅表情扮曬神秘咁。

樂樂前面嘅豆腐花不停冒住蒸氣，佢小心翼翼咁吹涼少少。佢品嚐香滑嘅豆腐花，溫熱嘅食物食到落肚，令佢嘅身體瞬間暖笠笠。而耳仔專注咁聽住冇立場姐姐所講嘅嘢，對佢哋講嘅內容開始起咗好奇心。

「721佢影完嗰啲片之後啊，聽講冇耐佢就俾狗咬咗入去狗屋啦，但居然可以冇事冇幹，好快就放返出嚟。」

「啊車~係咁炸?」只係聽到啲咁普通嘅事，令龜龜有啲失望。

「所以啊，之後未有啲傳聞估佢已經俾班黑警收買咗，轉咗去幫黑警啊。那~我以上講嘅嘢係未fc嫁，大家自己睇路啦~」冇立場姐姐講完之後，就一口氣食曬自己碗裡面嘅糖水。

等佢哋全部人食曬之後，叔叔順便車曬佢哋返屋企。樂樂望住車外嘅景色，腦海裡面唔知點解，一直諗住剛才冇立場姐姐講嘅傳聞。

架車路過狗屋時候，佢無意中見到一個修長，而且似曾相識嘅身影。

「唐澤......」樂樂自言自語，輕聲咁講出佢所見到嘅人嘅名。

樂樂返到屋企，將背囊是但咁掉到旁邊，涼都未沖就達落床。我原本喺精靈球度悶到訓著咗，突然受到劇烈嘅搖晃將我搖醒。我好嬲咁喺精靈球走出嚟，打開背囊拉鍊，走到樂樂背脊上面。

只見佢拎起手機，打開《記者跑online》嘅group，打咗一行字。

唐澤可能真係鬼嚟，頭先見佢喺狗屋度行出嚟。

樂樂喺group度打完呢句嘢之後，並冇即刻發出去。「唉......」佢嘆咗一口氣，默默咁將佢頭先打句嘢刪除。佢而家又冇證據，講咗都冇用。

「比卡超啊~我應該點算好啊?」樂樂突然一個轉身，將企喺佢背脊嘅我抱入懷裡。毛茸茸又溫暖嘅身體，令佢覺得抱起嚟好舒服。其實佢跟本唔期望比卡超答佢，純粹想抱抱我。

「比卡!」我喺佢懷裡面掙扎，想起返身。

「你啊!你今日偷偷地跟過嚟，又偷食咗我啲三文治，我都未同你計啊!」我見樂樂好似準備鬧我，我即刻將耳仔垂底，底下頭，雙眼可憐咁向上望住樂樂。

「嘻嘻，今次就算啦，不過冇下次啊，跟住我出去好危險嫁。」樂樂諗返起佢曾經被催淚彈打中背囊，又中過胡椒噴霧，都仲覺得心驚膽跳。

「比卡!」我為咗氹返樂樂，就爽快咁應承佢。我用毛茸茸嘅頭輕輕擦樂樂嘅手，向佢撒嬌，樂樂都順從咁摸摸我嘅頭。

「要我原諒你都可以，乖乖地，我幫你沖涼先。」樂樂突然記起，自從我嚟咗之後，都冇幫我沖過涼。佢抱住我行到沖涼房，將我放喺浴缸，用花灑將我嘅毛整濕。

我由喺研究所度開始，已經好怕水同怕沖涼。我將對爪緊緊咁爪住浴缸邊，抬起濕潤嘅雙眼，抖震住身體咁望住樂樂，希望快啲完結。

濕潤嘅毛髮而家變得好貼服，完全冇之前嘅蓬鬆，令我睇起嚟足足瘦咗一圈有多。雙眼顯得更加大，成隻外星人咁，又可憐又搞笑。

「好啦，你沖完之後到我啦。」樂樂幫我吹乾毛之後，我就急急腳跑出浴室。樂樂望住比卡超嘅背影，就諗起佢以前隻狗仔波波，所以無奈咁笑咗出聲。

每當樂樂沖涼嘅時候，熱水沖刷住佢嘅臉，都可以令佢瞬間冷靜落嚟。佢暗自決定，一定要搵到唐澤變咗鬼嘅証據。

「樂樂，我好快到，諗好食咩未啊?」龜龜咁啱約咗樂樂食下午茶，食完就準備做野啦。

「未諗啊，你幫手睇下附近有咩黃店好食，我想食日本嘢。」樂樂一邊拎起手機搵附近嘅黃店，一邊用耳機傾電話。突然見到一個熟悉嘅身影，令樂樂停低腳步。

「龜龜，等一等先，我一陣再打俾你，一陣見。」樂樂尾隨佢去到m記，坐喺遠離佢嘅位置，偷偷觀察佢。

只見唐澤同一個男人坐埋一齊，樂樂認得佢係白衫狗嚟，好想知唐澤同個人有咩好傾。拎起手機，偷偷地影咗佢哋相，但唐澤剛好望過嚟，同樂樂四目交投。

因為偷望俾人發現咗，樂樂紅住臉咁低頭，扮睇手機，連耳仔都紅到有發熱嘅感覺。當佢再抬頭嘅時候，唐澤已經移開視線。樂樂即刻鬆一口氣，緊張過後，身體無力。

「喂，龜龜我而家過嚟啦。」龜龜喺正呢個時候打電話嚟，樂樂唔知自己有冇俾人發現，但都起身急急腳咁走。

「啲相呢?」便衣警用唔太好嘅語氣問唐澤。

「哈!」唐澤見到佢威脅嘅神情，忍唔住笑出聲。佢將記憶卡塞到對面嘅男人手上，跟住就起身離開，留底嗰個男人一個默默咁坐喺原位沉思。「你想要嘅嘢喺曬度，歡迎下次再搵我，再見。」

「做咩啊樂樂，一直心不在焉咁嘅，一陣開波啦，要專心啲啊。」龜龜見樂樂由食飯開始就心不在焉，所以佢都好膽心。

「呃.....我冇事啊，放心啦，我哋快啲開直播啦。」樂樂拍一拍自己塊面，等自己清醒啲。

「大家好，歡迎收睇連登直播，我係樂樂。而家我哋位於嘅地方係旺角砵蘭街，網民發起旺角騷亂四週年紀念行動。

而家可以見到有好多小販已經開檔賣熟食，亦有唔少市民嚟買嘅。而其實已經有大量嘅防暴警員係四圍巡邏戒備，並且係截查市民。」樂樂打開直播，開始認真咁拍攝。

「前面有太量警車嚟，將示威者趕曬嚟砵蘭街，示威者係不停向後跑。」樂樂影住大量示威者喺面前跑過。

「樂樂!小心啊!」樂樂轉過頭，四圍嘅人都已經四散，佢眼前有架閃住強光嘅警車向佢嘅方向高速咁衝過去。樂樂已經嚟唔切 閃避，佢嚇到緊緊合埋雙眼。

「碰！碰！」嘅幾聲，但樂樂完全冇感覺到痛。當佢再擘大眼嘅時候，警車已經停喺佢面前，距離大約只有半米。而後邊嘅警車因為剎唔切車，連環幾架撞埋一齊。

現場氣氛僵化咗幾秒，之後示威者就響起熱烈嘅歡呼聲。樂樂因為剛受完驚嚇，腳軟無力咁坐喺地下，忍唔住不停咁喘氣。

「你冇事啊嗎？」龜龜回過神之後，即刻緊張咁走過去扶起樂樂。

「我冇事......」樂樂應該仲未由驚嚇中點過神，頭有啲暈暈地嘅感覺，只能夠任由龜龜將佢扶起，到旁邊休息。

而幾個FA都幫樂樂做簡單嘅檢查，結果咩傷口都冇，但依然幫佢叫咗白車，將佢送去醫院再做詳細檢查。

樂樂根本唔知頭先發生咗咩事，雖然覺得自己其實仲可以直播，但身邊嘅人都堅持送佢入院，所以佢唯有順從。

「頭先你真係好好彩，做前線記者真係辛苦。暫時睇你都未有咩傷，而家都夜啦，今晚留院觀察先。聽朝再幫你仔細檢查啊，你早啲休息啦。」救護員幫樂樂大約檢查完之後，叫佢搞手續上病房。

當護士離開咗，樂樂偷偷地戴起耳機，用手機開返自己今日嘅直播睇。當睇到架警車向住鏡頭衝嚟嘅畫面，佢都跟住緊張咁閉起呼吸。

當警車就嚟撞到樂樂嘅時候，好似有個無形嘅力量阻擋住警車撞上嚟。只見警車嘅前轆不停空轉，但無法前進，而後邊嘅警車都已經「碰碰」聲咁連環撞上去。

呢個靈異嘅片段已經喺網上瘋傳，自稱有陰陽眼嘅網民話喺其他直播度見到有嘢。當警車就嚟撞到樂樂嘅時候，有一個黑影喺佢嘅背囊裡面伸咗一隻巨型嘅手掌出嚟，將警車擋住。

呢個留言下底有好多網民留言笑佢中二病，但樂樂睇完呢個留言之後，即刻覺得後尾枕涼浸浸。佢乖乖地熄咗手機訓覺，唔敢再諗太多嘢，今晚就當好好休息吓啦。

樂樂訓到凌晨左右，突然扎醒，擘開矇矇矓矓嘅雙眼。見到有一個細小嘅身影企咗喺佢嘅心口，佢再合埋上眼。覺得有啲唔對路，意識瞬間清醒，再次擘大眼睇清楚。

7. 謎擬Q

好彩樂樂平時比較冷靜，遇到驚嚇都好少會即刻尖叫出聲。雖然冇嘈到其他病人，但佢個心都嚇到慢咗一拍。

「比卡超？」樂樂抱住懷疑嘅態度去叫佢。

因為光線太微弱，佢只能夠睇到佢個影。細小嘅身影同比卡超差唔多，同樣有一對長耳仔同埋好似閃電形狀嘅尾巴。冇咩唔妥啊，但又令樂樂覺得好唔對路，好似多咗少少嘢咁。

“呃？等一等，我屋企隻比卡超應該係冇尾嫁喎。”樂樂突然靈光一閃，知道唔係佢熟悉嘅身影先知驚，瞪大雙眼驚恐咁問：「你唔係比卡超！你係咩嚟？」

「謎擬Q?」神秘生物疑惑咁擺一擺頭，酷似比卡超樣嘅頭就接近跌落嚟咁嘅狀態，嚇到樂樂下意識即刻伸手幫佢扶返穩個頭。佢嘅頭按落去嘅手感軟綿綿得太過火，但就令樂樂有一種熟悉嘅感覺。

「謎擬Q?」樂樂重複謎擬Q嘅說話，但跟本唔知佢講咩。

樂樂拎出手機，偷偷哋開電筒去睇清楚眼前嘅生物。

「呃？」佢發現眼前嘅生物同佢屋企嘅比卡超公仔一模一樣，正確啲嚟講，隻神秘生物係披住咗佢隻比卡超公仔嘅皮。

公仔嘅下身被人整爛，裡面嘅棉花都被抽曬出嚟。布料好似個溶溶爛爛嘅裙咁，被呢隻神秘生物匿埋喺裡面。當佢移動嘅時候，佢嘅頭會跟住左右搖晃，有啲恐怖。

樂樂想伸手揭開佢底下嘅布，睇一睇佢嘅真面目，但佢即刻敏捷咁避到好遠。

「對唔住啊，你唔想我睇，咁我唔睇啦。」樂樂同佢道歉，但謎擬Q始終都冇再靠近樂樂。佢安靜咁企喺原地，面向佢，完全係一隻普通嘅公仔咁。

樂樂等咗一陣，見佢依然冇反應。由佢雙目無神嘅公仔眼度，完全唔知佢係咪都同自己對視中。

「早抖啦......」樂樂象徵式咁同謎擬Q講完，倒頭就訓著咗，因為佢實在太攰。

第二朝樂樂訓醒，謎擬Q已經唔見咗啦，琴晚嘅事就好似一場夢咁，好似一啲痕跡都冇留底。但當樂樂摸到床邊有屬於公仔嘅棉花，先發現原來所有嘢都唔係夢。

「同你仔細檢查完身體，你完全咩事都冇，可以直接出院嫁啦。」醫生一朝早已經走嚟幫樂樂檢查。

「唔該你啊醫生。」樂樂感謝咁同佢講。

「唔洗，你男朋友真係好，晨咁早已經嚟咗準備接你。」醫生滿臉羨慕咁講。

「男朋友？我冇男朋友嫁。」樂樂以為醫生講錯人，嗰個人應該係其他病人嘅男朋友。

「佢係門口炸，你睇下係唔係。」醫生指一指病房門口嘅男仔，男仔見到我望過去，都微笑咁對我揮手。

「唐澤！」樂樂驚訝佢點解喺度，而且仲要冒認係佢男朋友。

「唐澤，你點解會喺度嫁？」樂樂見唐澤行到自己病床邊，好明顯唐澤真係嚟搵佢，唔喺認錯人。

「嚟接你出院囉。」唐澤露出爽朗嘅笑容，令人根本唔好意思鬧佢。

「但我哋......唔喺好熟喎......」樂樂尷尬咁提一提佢問題嘅所在，樂樂正正最怕應付啲太天然熟嘅人啦。

為咗掩飾自己嘅不安情緒，樂樂唯有一邊同佢講嘢，一邊再檢查一次自己嘅背囊有冇執漏嘢。佢見到自己嘅背囊多咗個比卡超公仔，應該就係琴晚見到嗰隻嘢。

樂樂突然靈光一閃，佢諗唐澤好大機會係因為睇到琴晚自己嘅靈異事件，所以先晨咁早嚟醫院搵佢。佢默默擋住唐澤嘅視線，拉返背囊嘅拉鍊。

「我幫你拎袋啊。」離開醫院嘅時候，唐澤主動要求幫手拎袋。

「唔洗啦，我自己拎都得。平時都係拎住啲好重嘅拍攝器材跑嚟跑去嫁啦，所以難唔到我。」樂樂堅決咁搖搖頭拒絕，而家佢個背囊有隻唔可以隨便俾人知嘅神秘生物喺度。所以樂樂一聽到唐澤嘅話，即刻抱實個袋，怕俾佢一手搶過去。

「琴晚嘅事真係好驚險，好彩你冇事炸。講開都覺得神奇，你知唔知當時架車點解會停嘅？」果然俾樂樂估中咗，佢的確係因為想知琴晚嘅詳細情況而嚟。

「琴晚俾架車嚇到半死，真係唔知太多嘢。」樂樂擺出一副心有餘悸嘅表情。

「咁你知唔知咩係謎擬Q？」唐澤專注咁望住樂樂，唔想錯過佢任何表情。

「謎擬Q？咩嚟嫁？」樂樂露出一個疑惑嘅表情。

「冇嘢啦。」唐澤見佢嘅表情唔似講大話，好似真係咩都唔知，所以都冇再追問落去。

唐澤琴晚都喺現場，睇到事情嘅發生。其實佢自細就有少少靈感，但佢只可以喺無意即睇到黑影，難分真假。

所以當時佢都睇到樂樂嘅背囊伸出一團黑影，擋喺樂樂前邊，樂樂先可以避過一劫。

唐澤琴晚不斷反覆咁重播當晚樂樂嘅直播，將嘈雜嘅聲音逐一分拆再細聽。佢聽到當黑影擋住警車嘅時候，收音收到一把微弱而且奇怪嘅聲音：「謎擬Q」

樂樂行行吓突然醒起，琴晚嗰隻神秘生物嘅叫聲正正未係「謎擬Q，謎擬Q」咁叫，點解唐澤會知道......樂樂決定返到屋企要查吓「謎擬Q」係何方神聖。

樂樂同唐澤兩個人都好似獵人，但同時都係獵物。雙方都未知道對方隱瞞住啲咩天大嘅秘密，只能夠默默咁關注。等待對方露出馬腳，邊個最先俾人發現秘密，恐怕將會一敗塗地。

唐澤開車送樂樂返到屋企樓下，兩人表面上好好傾，但其實喺度互相試探。喺呢短短嘅路程，令樂樂覺得仲攰過拎住器材跑嚟跑去拍攝。

「悅悅！你冇事啊嗎？有冇邊度整親邊度啊？」樂樂一行入屋企，已經俾許媽媽緊張咁抱緊喺佢嘅懷裡。

許媽媽同許爸爸琴晚都有睇直播，見到架警車衝埋去佢嘅女嗰時，佢真係好驚。佢想飛身到螢幕嘅另一邊，用身體去保護佢個女，但佢做唔到。佢差啲又再一次失去佢嘅仔女，所以琴晚跟本完全訓唔著，而家見到樂樂平安無事返嚟，佢抱住樂樂喊到收唔到聲。

「許忻悅！你哋點解一個二個成日做埋啲令人擔心嘅嘢啊！你阿哥係咁，而家你都係咁！」許爸爸琴晚都嚇到心臟差啲跳出嚟，見到樂樂返嚟即刻恢復中氣咁鬧佢，但都掩飾唔到佢臉上嘅憔悴。

「對唔住......要你哋咁擔心。」樂樂都內疚咁回抱許媽媽，樂樂知道佢嘅命唔單只係屬於佢一個人，係屬於所有愛佢嘅人。

許爸爸嘆咗一口氣，都唔忍心再鬧樂樂。

「比卡超......」我見樂樂返到房，都擔心咁走到佢腳邊。

「比卡超，我好掛住你啊！」琴晚經歷過生死關頭，覺得生命其實真係好脆弱。而家見到所有重要嘅人，樂樂只想將佢哋緊緊抱住。

「哥哥，我返嚟啦......」抱到差唔多，樂樂就行去書枱，拎起同哥哥嘅合照。其實有一刻，樂樂以為嗰個神秘力量係哥哥保護自己，知道係謎擬Q之後，心裡面總有啲失望嘅感覺。

樂樂轉身去沖涼消毒先，順便要令自己個心情平復返。而我都乖乖地喺房度等樂樂返嚟，琴日我發現比卡超公仔唔見咗。自己已經當咗嗰隻公仔做朋友，所以一直情緒都好低落，見到樂樂返嚟先回復返。

「砰」樂樂嘅背囊喺完全冇風吹嘅情況下，由站立突然變成平訓喺地下。

「比卡？」我突然有種不詳嘅預感，即刻由床上爬起身，跳到地面。我全身嘅毛髮都豎起，身體擺出戒備嘅姿勢。

只見樂樂背囊嘅拉鍊緩慢咁被拉開，有一隻紫黑色嘅大手掌由背囊伸向我面前。我戒備咁後退一步，全神貫注咁觀察大手掌之後嘅動作。

大手掌伸到我面前，突然加速，將我大力打到飛起。我「砰」一聲咁被打飛到書枱上面，我忍住痛咁爬返起身。

只見我琴日一直搵嘅比卡超公仔喺樂樂嘅背囊裡面爬出嚟，公仔嘅頭部詭異咁側向一邊，用雙目無神嘅雙眼直直咁望住我。

「比卡......」我內心好嬲呢個冒牌貨，居然傷害同冒充我嘅毛公仔朋友。但我唔夠膽亂郁，因為我知自己一定唔夠佢打，只應夠戒備咁觀察佢嘅動作，去避開佢嘅攻擊。

「謎擬Q~」謎擬Q又想向我一掌拍落嚟，被我閃開之後 ，緊接住強勢嘅連環攻擊。大部分都俾我嬌小嘅身體敏捷咁避開，但我身上都受咗唔少傷。

樂樂間房已經被我哋搞到好凌亂，我企喺樂樂嘅床上面喘住氣，唔敢鬆懈。佢紫黑色嘅大手掌唔耐煩咁想再一次向我攻擊，但唔小心掃到樂樂同佢哥哥張合照。

我知道呢樣嘢對樂樂好重要，喺佢跌落地之前，我即刻衝埋去抱緊，保護住相架。我嘅身體硬生生咁被拍飛，重重跌落地面。

「比卡......」我忍住痛，想再一次企起身，但試咗幾次都失敗，跌返落地面。感覺身體變得好重，已經支撐唔起啦。我絕望咁訓喺地，望住謎擬Q拖住左搖右擺嘅頭部，走到我面前。

只見佢準備用手將自己身上嘅布揭開，我緊張咁緊閉雙眼。

“我唔想死，我唔想放棄。”強大嘅求生欲，令我紅色嘅臉頰開始發出「啪啪」聲嘅微弱電流。

喺呢個緊張嘅時刻，房門突然打開，樂樂見到現場混亂嘅情況之後嚇咗一跳。

「比卡超！發生咩事？」樂樂見到受傷倒地嘅我，馬上跑過嚟。佢一手推開謎擬Q，再抱起我，擔心咁檢查我身上嘅傷。

「謎擬Q......」謎擬Q被推跌之後，搖晃住身體起返身。側起頭望向我哋，雖然睇唔到佢真實嘅表情，但感覺到佢已經唔會再攻擊我，而且隱約有啲失落。

樂樂嘅注意力好快轉返去謎擬Q身上，佢抱緊我退後幾步。然後保護住我，驚恐咁跑出去客廳，留低謎擬Q自己一個喺房。

樂樂唔敢再返自己房，緊緊咁抱住我微暖嘅身體，取得絲絲嘅安全感。佢一邊留意住房門口嘅情況，一邊用手機google有關謎擬Q嘅資料。

樂樂原本以為係有靈體上咗佢隻公仔身，睇完資料先知道，原來謎擬Q都係寵物小精靈嚟。而且係一隻容易寂寞嘅寵物小精靈，單純想同人類和睦相處。樂樂諗起自己剛才對謎擬Q激動嘅反應，恐怕都傷害到佢。

謎擬Q應該唔係想害人，琴晚仲救咗自己。樂樂因為剛才自己嘅行為，覺得有少少後悔同內疚。佢抱住我，小心翼翼咁再次返到混亂嘅睡房。

「謎擬Q？」樂樂再一次叫喚謎擬Q嘅名，但謎擬Q完全冇反應，同其他公仔一齊坐喺樂樂嘅床邊，完全冇違和感。

8. 謎擬Q嘅過去

樂樂望住眼前嘅謎擬Q，突然唔知開口講咩好。佢好似只係一個普通而破爛嘅公仔，就算叫佢都冇任何反應。但樂樂太專注於公仔嘅頭部，冇注意公仔內嘅謎擬Q正透過公仔胸前嘅兩個細窿，死死咁盯住樂樂懷裡嘅比卡超。

我感覺到謎擬Q灼熱嘅視線，令我感到好不安。我將頭埋喺樂樂懷裡，避開佢可怕嘅視線。

'點解？點解同樣係怪物嘅比卡超居然被人類抱起懷裡，而且仲咁幸福？因為可愛嗎？明明只係一隻怪物......'

其實謎擬Q一直都注視住比卡超，由佢喺武漢研究所開始。但冇人見到同感覺到謎擬Q，因為佢並唔係一個完成品。研究佢出嚟嘅人喺研究到一半嘅時候，已經死咗啦，算係俾佢殺死，但又唔算。

呢啲人類只係死喺自己嘅貪婪上，比任何怪物都可怕。

由謎擬Q唔知自己係幾時開始有意識，因為開始嘅時候，佢最多只可以算上係有毒氣體。

怪物嗎？連怪物都算唔上。

「將氣體變成有意識嘅生物，沒有可能吧！」

「辛先生果然是瘋狂的人。但皮卡丘計劃這麼成功，這次研究成功也不是完全沒有可能的。」

「如果成功了，國家也會有更強大了。」

辛先生係武漢實驗所嘅高級研究員，成功研究唔少嘅新型病毒，好得上級重用。前一段時間成功研究出比卡超，更加令佢升職，成為首席。

將氣體變成有意識嘅生物......辛先生決定以寵物小精靈中嘅謎擬Q做藍本去設計出新型有意識嘅病毒。研究咗兩年，終於進入試驗階段，只要成功咗，謎擬Q恐怕會係世界上最可怕嘅生化武器。

辛先生交代佢嘅下屬喺謎擬Q所在嘅房間，加入最後一種氣體，令謎擬Q開始慢慢現形。佢自己喺自己辦公室，關曬燈，雙眼專注咁盯住電腦，影住實驗房間嘅情況。

加入另一種氣體之後，原本房間透明嘅空氣變成深紫色，而喺房間中央嘅空氣開始凝聚，深紫色續漸開始深到發黑。

房間外嘅研究員一直觀察變化，佢哋見到開始成形嘅謎擬Q，開始露出恐懼嘅神情。佢哋想尖叫，想逃走，但都強忍住。

直到謎擬Q張開雙眼，對佢哋擺出鬼魅嘅笑容，露出一排尖銳獠牙。

「啊！怪物啊！」房間外嘅研究員見到謎擬Q嘅真身後，居然全部都嚇到暈低。

喺電腦前嘅辛先生都被呢個情況嚇到，一時間腦海片空白。

「哈哈哈哈......」辛先生回過神之後，開始發出詭異嘅笑聲，佢對呢個研究成果好滿意。

「糟糕......謎擬Q所產生嘅病毒，比我想像中強大太多，而且已經開始失控......」辛先生對自己嘅研究成果又驚又喜，但佢實在低估咗謎擬Q嘅能力。

當日見過謎擬Q真身嘅研究員都暈低，事後全員都莫名咁發高燒。辛先生安排佢哋留起研究所，方便觀察佢哋嘅情況。但佢點都估唔到，佢哋嘅病係有高度傳染性。

當佢發現嘅時候，已經太遲，病毒一發不可收拾。大部分嘅研究員都染病，甚至將病毒帶出研究所外。為保自己同家人嘅安全，佢唯有掉低手頭上嘅研究，即刻買機票離開武漢，透過電腦遠距離觀察事態發展。

研究所嘅員工大部分已經染病，有少部分嚇到唔敢返工。只係短短半個月嘅時間，令原本多人嘅研究所，變成好似一個空置嘅地方。全部嘅研究都被迫中止，所有員工唔敢返工，只係剩返大量嘅實驗品同實驗嘅生物。

「比卡？」

謎擬Q盯住玻璃外嘅金黃色怪物，但佢完全感覺唔到自己嘅存在。自從上次實驗成功現形之後，謎擬Q已經變返透明嘅氣體，正常嘅肉眼根本唔可能睇到佢。

眼前金黃色嘅怪物，因為身上仲有大大小小嘅傷口未完全癒合，所以毛茸茸嘅毛髮顯得參差不齊。有啲醜，但莫名咁俾到謎擬Q一種親切嘅感覺，可能係因為謎擬Q覺得大家都係怪物。

比卡超將研究所被困嘅動物放曬出嚟，現場大量嘅動物喺小小嘅房間四處飛翔同奔跑，好多實驗用具都被跌爛，現場一片混亂。而謎擬Q都由窄小嘅空間被放出嚟，完全冇被留意到，佢默默咁跟喺比卡超身後。跟住佢由武漢黎到香港......

謎擬Q曾經以為比卡超同自己係一樣，一樣被人類忽略，一樣係可憐又可惡嘅怪物。雖然比卡超並唔知道自己嘅存在，但對謎擬Q黎講，佢係自己唯一嘅同伴。

但自從比卡超遇到樂樂，短短觀察咗佢哋幾日嘅相處，已經令謎擬Q有一種被背叛嘅感覺。

謎擬Q死死盯住匿喺樂樂懷裡嘅我，雙眼所流露嘅憎恨越發濃烈。嚇到我全身抖震，完全唔敢回頭直視佢。

「呃......你嘅身上嘅布有啲爛啦，不知我幫你整返好，當係報答你救咗我啊。」樂樂對謎擬Q露出真誠嘅笑容。

謎擬Q聽到之後，詭異咁抬頭盯住樂樂。公仔頭部因為動作過大而向後仰，令樂樂覺得有啲搞笑。

其實見到剛才謎擬Q攻擊我，如果話完全唔驚嘅話，一定係呃人。但樂樂喺度賭。佢相信既然謎擬Q救過自己，佢就唔係真心想傷害我哋。

樂樂保持住友善嘅笑容，等待謎擬Q嘅回應，想令對方放低戒心。但謎擬Q只係直直咁望住佢，完全冇其他嘅反應。時間長咗，令樂樂嘴角嘅笑容開始僵硬，氣氛依然緊張。

雙方僵持咗接近半分鐘，謎擬Q首先轉過身。樂樂以為佢要拒絕自己，心裡面有啲失望，嘴角嘅笑容都漸漸彎落嚟，顯得有啲唔自然。

謎擬Q搖擺住頭部，慢慢走到被鋪前。突然掉低自己破爛嘅公仔外皮，黑影快速匿喺被鋪下低。樂樂見到之後呆咗幾秒，然後露出一個發自真心，快樂嘅笑容。剛才睇完謎擬Q嘅資料，知道佢唔可以隨便露真身，所以佢嘅行為令樂樂知道謎擬Q已經接受咗自己。

「放心，我一定將你整得更加可愛。」樂樂得到鼓舞之後，即刻信心十足。佢溫柔咁拍一拍匿喺被鋪裡面，微微突起嘅位置。謎擬Q比佢想像中可愛，應該同比卡超一樣係乖巧可愛嘅小精靈。

樂樂都事不宜遲，放低我喺床上。無視房間裡面混亂嘅環境，拎起布料同針線就開始開工。難得謎擬Q肯接受佢，所以佢都想快啲完成謎擬Q嘅外皮。

「比卡？」我轉過身行到被鋪前，擺一擺頭，好奇咁一齊匿入去。

我喺被鋪裡爬到謎擬Q前面，見到佢真身嘅我嚇到僵硬喺原地。仲未反應過嚟，已經俾謎擬Q一掌用力打過嚟，我受咗咁多掌都已經忍唔住憤怒。

「比卡！」我全身嘅毛髮都豎起，飛撲埋去咬住佢，兩邊紅色嘅臉頰開始「啪啦啪啦」咁產生出微弱嘅電流。雙邊喺被鋪下打起上嚟，動靜太大都引起樂樂嘅注意。

「你哋兩個停手啊！」樂樂想揭開被鋪阻止我哋，但又記起自己唔可以睇到謎擬Q嘅真身，所以企喺被鋪前一時間有啲手足無措。

樂樂決定先出去拎個紙袋俾謎擬Q著住先，然後先阻止我哋。

「比卡超！！！」我發現自己唔夠打，所以一時情急激發出自己嘅電擊超能力。

等樂樂趕到返嚟，已經發現自己張床被我燒著咗。佢都唔理得咁多，衝過去揭開被鋪，眼尾都唔洗望就用紙袋準確咁套喺謎擬Q身上。

然後樂樂將我哋兩個掉到地面，佢自己即刻去救火。謎擬Q因為一時俾紙袋擋住視線，所以盲目咁喺原地轉圈。

好彩火勢並唔大，樂樂好快就將火救熄。驚險過後，佢已經腳軟咁跪喺地下喘住大氣。現場一片狼藉，樂樂覺得自己今次實死冇生，俾許媽見到呢個情況嘅話。

佢頭先仲覺得呢兩隻小精靈乖巧可愛，而家佢決定收返呢個評價。佢都要重新思考一下自己係咪真係有呢個能力，去養呢兩隻小精靈。

「比卡......」我知道自己闖禍，所以企喺原地，內疚咁低下頭，兩隻耳仔都向下垂，等待樂樂嘅責罰。

樂樂見我用濕潤嘅大眼偷偷望佢，眼神流露出無辜同可憐。佢深深咁嘆咗一口大氣，所有責備嘅說話喺望到比卡超嘅雙眼，已經唔忍心講啦。

樂樂用手支撐起疲憊嘅身體，路過我旁邊安慰咁拍一拍我嘅頭。然後抱起仍然喺原地轉圈嘅謎擬Q，拎起書枱上嘅較剪，小心翼翼咁幫謎擬Q喺紙袋大約眼嘅位置剪兩個小窿，方便佢睇嘢。

樂樂之後咩都冇講，開始默默咁收拾返自己間房。床單同被鋪已經燒到有一個個大大小小嘅啡色破窿，已經唔可以再訓人，樂樂唯有掉咗佢。

我同謎擬Q有默契咁對視一眼，然後同一時間移開目光，雙方都決定先停戰。

樂樂幾經辛苦先喺父母返嚟之前整理返好自己間房，佢換過曬啲新床單同被鋪，疲累訓喺床上，四肢已經冇力。

樂樂轉過頭，望見我同謎擬Q兩個各自企喺房間左右兩個角落，好似做錯事嘅小朋友一齊罰企。樂樂無奈咁忍住嘴角嘅偷笑，決定由得我哋兩個靜靜地反省吓。

佢重新拎起書枱上未完成嘅手作，打開手機google一吓謎擬Q嘅圖，然後按照圖片嘅外形去做。

「謎擬Q？」謎擬Q悄悄咁走到樂樂旁邊，將頭伸過去，好奇咁望住自己未來嘅外形。

喺角落嘅我見到謎擬Q居然咁快同樂樂咁親密，而且樂樂仲幫佢做衫。我委屈咁鼓起兩邊臉頰，另轉面，決定唔望佢哋。

樂樂做起手工上嚟好純熟，所以好快就做好佢嘅製成品。然後將公仔衫放喺謎擬Q隔離，另轉身等佢換。

「滿意嗎？要唔要再改吓？」樂樂見謎擬Q喺原地轉圈，頭部依然係左搖右擺咁，裙腳都剛剛好，唔會影響謎擬Q郁動。樂樂對自己嘅手工一向都係好有自信，但成日見到謎擬Q個公仔頭搖晃住，好似好唔方便咁，所以都有啲擔心。

樂樂想摸一摸謎擬Q嘅公仔頭，但被謎擬Q避開。樂樂都冇嬲，佢估謎擬Q滿意件衫，唔想再改。只見謎擬Q拖住左搖右擺嘅公仔頭行到我面前，圍住我兜圈圈，向我炫耀。

我好嬲咁啤住謎擬Q，兩邊紅色嘅臉頰又開始「啪啦啪啦」產生出電流，想恐嚇佢收斂一啲。但因為樂樂仲喺隔離望住，我都唔敢太過火。

樂樂望住眼前兩隻幼稚嘅小精靈，忍唔住一而再，再而三咗嘆氣。估唔到佢哋兩個去到現實都同資料睇嘅一樣，唔可以和平共處。一諗到以後要同呢兩隻小精靈放埋一齊生活，樂樂就有啲頭痛。

9. 第一次合作

雖然我同謎擬Q互相都睇對方唔順眼，但喺樂樂面前，我哋依然都勉強保持和平共處。為咗唔輸俾對方，我哋成日偷偷地走入樂樂嘅背囊，跟埋樂樂一齊去做嘢，爭取更多嘅相處機會。樂樂開頭都會話吓我哋，但見我哋乖乖地留喺精靈球，唔會出嚟搗亂，都由得我哋。

「大家好啊，歡迎收睇連登新聞，而家可以見到，現場已經有過百名嘅市民出席悼念活動，同反對喺區內設新型冠狀病毒診所嘅遊行......」樂樂重複住每次直播嘅開場白，認真咁解說而家嘅情況。

「啊！」突然樂樂嘅身後傳嚟市民驚恐嘅尖叫聲，正式打破今晚短暫嘅和平。

一架白色嘅私家車向人群衝去，樂樂即刻追上去拍攝，我喺精靈球裡面，都感受到外面緊張嘅氣氛。我好想出去外面，保護樂樂同其他人。

便衣警察由私家車衝落車追捕示威者，同時間，防暴同速龍小隊都到場放催淚彈，令現場一片混亂。

樂樂跟住龜龜等一班行家身邊一齊行動，大家有個照應。我同謎擬Q喺背囊裡面都好擔心，不安咁微微郁動。樂樂感受之後，伸手拍一拍身後嘅背囊安撫我哋。

防暴一直追到屋院，催淚彈剛才已經射傷咗一位議員。佢哋今次又針對性咁對準樂樂等一班記者嘅方向，平射一發催淚彈。

「啊！」剛好催淚彈喺樂樂身邊飛過，射中佢後方嘅龜龜。當樂樂轉過身，已經見龜龜痛苦咁倒地呻吟。

「有冇搞錯啊！係記者嚟嫁！」平時冷靜嘅樂樂終於忍唔住指住班黑警鬧。叔叔拍一拍樂樂嘅手臂，叫佢冷靜啲。

白車好快就到咗，FA同記者合力將滿臉痛苦嘅龜龜抬上車，叔叔跟佢車一齊去醫院。樂樂雖然好擔心龜龜嘅情況，但活動仲未完，佢身為記者，有責任幫手記錄到最後。

“要加油啊樂樂！連埋龜龜嘅份......”樂樂默默咁為自己打氣。

佢強忍住喺眼眶盪漾嘅淚水，重新拎起手機同器材。雖然已經經歷過咁多次嘅抗爭活動，但每次見有市民同同伴受傷，都令樂樂覺得好難受。

當樂樂檢查自己係咪帶齊嘢嘅時候，佢發現自己嘅背囊開口居然大大咁打開。原本喺裡面嘅謎擬Q居然唔見咗，而比卡超所在嘅精靈球依然喺度。但單單發現謎擬Q唔見咗，已經令樂樂一下子好似淋咗凍水咁，俾眼前嘅情況嚇到出曬冷汗。

「謎擬Q......去咗邊......」樂樂呆滯咁企喺原地，自言自語。

「樂樂！仲喺度做咩！快啲跟上嚟啊！」幫手送龜龜上白車之後，冇立場新聞嘅中指姐姐已經重新拎起佢嘅鏡頭，準備追返上前線。

「對......對唔住！唔好意思啊，各位。我而家重新跟返啲防暴。」樂樂都收拾好，拎返起鏡頭重新投入工作，跑返上前線做嘢。

「專心啲......」中指姐姐皺一皺眉頭，以為樂樂因為剛才龜龜中彈嘅事而不在狀態。所以都忍唔住出聲提醒一吓佢，之後重新投入自己嘅直播解說。

「對唔住。」樂樂用力搖一搖自己個頭，令自己注意力集中，專心返工作先，雖然都係忍唔住擔心謎擬Q嘅情況。

但喺呢個咁危險嘅時候分心係大忌嚟，隨時都會好似龜龜咁，俾防暴針對性射催淚彈同噴胡椒。又或者好似上次咁，突然有車向住自己衝埋嚟。

直播間嘅觀眾其實都好關心記者嘅情況，不停咁留言安慰樂樂。

「比卡......」樂樂唔知道，其實我都偷偷地跟住謎擬Q，喺精靈球走出嚟，匿喺草叢幫手搵謎擬Q嘅蹤影。

“可惡，隻謎擬Q跑得咁快，到底到咗邊......”居然掉低我同樂樂，我仲以為佢要一齊保護樂樂先跟埋我哋出嚟。

我抬起頭，終於見到企喺街燈柱頂嘅小黑影，因為背光，所以根本睇得唔太清楚。如冇意外，應該就係謎擬Q。

謎擬Q深深咁望咗樂樂一眼，就率先往防暴嘅方向，踩住一個一個街燈，快速跳過去。

「比卡！」我一直抬頭死盯住眼前嘅目標，喺草叢堆中追住佢嘅身影。但佢速度實在太快啦，已經越跳越遠。奔跑期間，我被草叢堆嘅樹枝勾到滿身傷痕，但我忍耐住身上嘅痛楚，不斷加速追上去。

追到屋院內嘅小公園，我環視四周，發現已經搵唔到謎擬Q嘅身影。我雙耳微微抖動，聽到後方一陣嘈雜，令我根本冇法依靠靈敏嘅聽覺搵謎擬Q。我迷你嘅身軀匿喺燈柱後面，觀察前方嘅情況。

只見前方有唔少黑衫嘅年輕人，用盡體內最後嘅體力不停向前跑。而佢哋身後都有速龍小隊追住佢哋，有幾個後生仔已經被強硬咗壓喺地面。佢哋嘅表情因為痛楚而扭曲，眼神流露出絕望。

謎擬Q突然喺我後方閃出嚟，快速咁移動到正在逃跑嘅年輕人同速龍小隊之間。未睇清楚嘅速龍小隊嚇到瞬間退後一步，避開小黑影。

「咩嚟！遙控公仔？真係嘔心，阻住曬！」其中一個速龍小隊成員，起腳準備踢落謎擬Q身上。謎擬Q冇諗住避開，微微抬起頭同佢哋對視。

謎擬Q嘅雙眼好似深不見底嘅漩渦，令每個望到佢雙眼嘅人都有個錯覺。無論自己去到邊都好，呢雙眼都會追住自己，死死咁盯住自己。呢種感覺令人好唔舒服，而且恐懼。

「呃？」正當速龍小隊成員嘅腳就快踢到謎擬Q身上嘅時候，佢唔覺意透過兩個小窿，同布公仔裡面嘅謎擬Q對視。望到深不見底嘅雙眼，令速龍一殺那失神，隻腳下意識偏離目標，重心不穩咗坐落地下。

「......」

其他速龍小隊成員都走嚟想踢走佢，但都被謎擬Q快速咁避開，頭部左搖右擺。雖然睇唔到謎擬Q喺布公仔裡面嘅表情，但卻令人感覺到佢喺度笑，同佢布公仔頭部嘅笑容一樣詭異。

“謎擬Q喺度做咩？再係咁我哋兩個都會被人發現，捉返研究所，到時就要離開樂樂。”我匿喺燈柱後面，默默為謎擬Q緊張。

只見謎擬Q雖然喺度閃避速龍小隊嘅攻擊，但雙眼望向我嘅方向。我哋交換眼神，突然知道對方嘅想法。雖然我冇咩信心做到，但而家危急情況唯有試一試。

「比卡...卡...」我抱緊眼前嘅一支燈柱，使用我之前用過嘅電擊超能力。電流開始由我兩邊臉頰產生，傳到我抱緊嘅燈柱。我抱住嘅燈柱開始承受唔到，一閃一閃咁，但仲未夠，要更加大嘅電擊先可以。

「比卡.....」要快啲，唔係謎擬Q同班後生仔會好危險......快啲......要變得更加強大，要守護住我珍惜嘅嘢......

我腦海閃過我曾經嘅朋友蝙蝠仔同其他動物，仲有喺武漢嘅狗仔，可惜我保護唔到佢哋。我而家朋友謎擬Q同樂樂......其實我一直都好幸福，同佢哋一齊我好開心，我並唔可憐。我要變得更強大，今次要守護住幸福，我唔可以再失去啊！

「比卡超！！！」我用盡力氣，第一次成功使出十萬伏特。

「啪啦！」「啪啦！」「啪啦！」由我抱緊嘅燈柱開始，周圍燈柱上嘅燈泡順序爆破，現場突然陷入一片黑暗，令所有人嘅肉眼一時間難以適應。

「謎擬Q！」四周進入咗黑暗，就喺最適合謎擬Q嘅地方。謎擬Q身上好似裙一樣嘅布料一下子變大，包圍住佢周圍十幾個速龍小隊成員。

我成功使用強大超能力之後，身體嘅力量已經消耗得七七八八。我用力拍一拍自己臉頰，希望由暈眩嘅意識中清醒過嚟。因為仲未完結，我仲救人！

我打起精神，往被壓制嘅幾個後生仔方向跑去。用電火石火加速，再連續用捨身撞擊撞開因為突然進入黑暗，而呆滯嘅速龍。

突然被鬆開嘅後生仔，依舊訓喺地上，對而家嘅突發情況反應唔嚟。我輕輕力推一推佢哋，先令佢哋回過神，即刻爬起身往外跑。

一啲比較怕死嘅速龍都爬起身準備逃走，我見佢哋有一兩個想往剛才後生仔嘅方向跑。我努力拖住自己已經筋皮力盡嘅身體，堅持到最後。

我用身體擋住佢哋嘅去路，發出電擊趕佢哋往另一個方向。其實我而家嘅電擊已經好微弱，根本冇可能傷害到佢哋。但佢哋因為處於極度驚恐嘅狀態，少少嘅刺激都嚇到轉另一個方向跑。而其餘嘅成員見自己同伴走咗一大半，都跟埋一齊逃走。

「比卡......」我繃緊嘅神經終於放鬆些小，瞬間冇力支撐起沉重嘅身體，完全癱瘓喺地面。我眼皮都好沉重，好想訓覺，但仲未可以......

我喘住氣，瞪開沉重嘅眼皮，望住謎擬Q嘅方向。我對佢嘅能力好有信心，而家只係等佢搞掂。然後我，謎擬Q仲有樂樂，就可以一齊返屋企。

而被謎擬Q包圍住嘅十幾個速龍眼前完全一片黑暗，根本唔知自己身處邊度。佢哋每行一步都會同同伴相撞，令佢哋因迷惘而手足無措。而更多嘅，係對未知嘅恐懼。

其中一個速龍打開佢手上嘅強光電筒，想睇清楚面前嘅情況，但佢嘅行為澈底激嬲謎擬Q。謎擬Q被強光電筒照到，難受咁瞇起雙眼，表情都變得更加猙獰。

喺布內嘅謎擬Q已經唔再係得20cm高，與其話係謎擬Q用布包住佢哋，不如話係謎擬Q自己包住佢哋更加準確。

謎擬Q本身就係氣態，佢身上嘅布之所以變大都可以支撐到，係因為佢由本身濃縮而聚集嘅氣態，平均分散喺布料內部，再增加面積，所以謎擬Q係用自己包圍住十幾個速龍。

「謎擬Q......」雖然其他人聽唔明謎擬Q嘅說話，但由佢嘅語氣都聽得出，帶有恐嚇嘅意味喺裡頭。

謎擬Q向佢哋展示自己一排尖銳嘅獠牙，五官唔知係因為被強光照到覺得難受，定因為憤怒而變得扭曲。

「啊！」裡頭見到謎擬Q真面目嘅速龍小隊都全部嚇到暈過去。

「碰！」謎擬Q瞬間變細，比原本嘅身形更迷你一啲，而且動作唔再有原本咁敏捷，而係直線跌落地面。剛才被強光燈照到後，令佢變得衰弱，而家想企起身都難。

謎擬Q同我用盡自己最後嘅力氣，往對方嘅方向爬去。好攰，身體好重。雖然就快觸碰到對方，但我哋兩個都爬唔郁。我喘住氣，閉起雙眼休息一吓。

「咔嚓」「咔嚓」「咔嚓」

突然感覺有幾吓強光閃過，緊接住幾吓「咔嚓」聲。有人輕輕將我哋兩個抱起，我嘅眼皮用力撐開微微一條線。我見到抱住我嘅係一個短髮男仔，戴住頭盔，豬嘴同眼罩。

係邊個......好結實嘅懷抱......

我皺起眉，靈敏嘅鼻尖微微抖動。佢身上嘅味道好複雜，有催淚彈味，有胡椒味，有汗水味。但我已經好攰，唔想再思考，我放任自己暈睡過去。

10. 被發現

剛中椒嘅唐澤，因為中得有啲多，所以要暫時熄直播，處理一吓先。今晚班警察好似發咗癲咁，唔止不停放催淚彈放題，而且仲好多次針對記者噴胡椒。原本記者已經唔夠用，而家好多記者都受傷或者中椒，被迫退場。

比卡超使出嘅十萬伏特之後，因為威力爆發得太強，令成個屋院嘅電力供應，都出現短路嘅情況。屋院範圍內一下子陷入黑暗當中，好多人都未反應得嚟。

屋院嘅電力供應都中斷......曾幾何時，都經歷過類似情況。街燈熄曬之後，就開始大圍捕。唐澤根本冇時間休息，只能夠大約沖一沖走面上嘅胡椒，忍住生理嘅不適，盡快戴上豬咀同眼罩，繼續佢嘅工作。

唐澤即刻喺手機開夜視，錄影現場嘅情況。用夜視功能睇比卡超同謎擬Q兩個，因為睇唔太清楚。就好似兩隻小怪獸一樣，速度快，攻擊力強。透過鏡頭睇認真會嚇一嚇，唐澤目不轉睛咁望住鏡頭所拍到嘅珍貴畫面。

“係大新聞......”唐澤嘅嘴角忍唔住露出詭異嘅笑容。

唐澤見呢兩隻小怪獸已經癱瘓喺地面，完全冇反應，佢先小心翼翼咁避開訓喺地嘅速龍小隊上前。用閃光燈，喺現場影咗幾張相，佢呢個時候先睇清楚佢哋嘅真面目。

「係比卡超同......謎擬Q？」唐澤輕輕抱起比卡超同謎擬Q，佢哋兩個而家都好衰弱，開始連呼吸嘅力氣都冇，令呼吸變得好微弱。

一見到謎擬Q就諗起樂樂，唐澤開始估呢兩隻小精靈係咪屬於樂樂。但遠處迎面而嚟嘅燈光，打斷咗佢嘅思緒。

為咗保護呢兩隻“小證物”唔好咁快俾人發現，唐澤小心咁抱住佢哋隱藏起嚟。佢見到其他行家都趕到過嚟，視線停留喺樂樂身上一眼，就移開。

唐澤決定先避開人群，低調咁帶兩隻小精靈提早返自己屋企先。因為見佢哋身上都有傷口，而且呼吸都好微弱。唐澤只好保持住動作輕柔，避免再傳佢哋傷勢更加嚴重。

唐澤返到屋企之後，幫比卡超處理好傷口。然後疲憊咁坐喺沙發，望住佢哋，苦惱咁揉亂自己嘅髮型，開始進入沉思。

其實當時仲有其他行家影到比卡超同謎擬Q，恐怕全世界都會知......

如果背後真係有咩勢力同秘密，恐怕自己都會有危險。但為咗真相，佢一向最願意去冒險。

「哈哈哈哈......」唐澤心情好咁，自己一個忍唔住笑出聲。

「暫時見到都已經冇咩特別事發生，咁今日嘅直播都去到呢度，多謝大家支持連登直播新聞。」喺另一邊，樂樂努力咁保持住自己平時輕快嘅聲音，去掩飾自己情緒嘅低落。

「唉......」仲未搵到謎擬Q......樂樂心事重重咁打開Telegram.

《記者跑online》

快樂happy伯 : @叔叔，龜龜佢點啊？

冇立場大叔 : 腹部中彈燒傷，好彩唔算傷得太重。佢已經訓咗，暫時冇咩大問題。

快樂happy伯 : 佢冇事就好啦......

中指姐姐 : 樂樂唔好咁擔心，肚唔肚餓，姐姐陪你去食啲嘢先？一喺開車送你返去，早啲休息？

快樂happy伯 : 唔洗啦，中指姐姐你返去先。

中指姐姐 : 咁你小心啲......

中指姐姐以為樂樂一直為龜龜中彈嘅事而悶悶不樂，直播期間見樂樂幾次不在狀態。佢雖然都好擔心，想安慰一吓佢，但俾樂樂一個人冷靜吓都好。

呢個時期，記者同市民受傷要退場，好似已經變得唔再出奇。大家都唔想，但都要迫住自己學識去面對。唔可以咁容易就消沉，否則就會對唔住受傷嘅行家同手足。

其實樂樂擔心嘅點止咁少，佢拎出喺書包裡面嘅精靈球。

「比卡超！比卡超！」樂樂拎住精靈球，想叫比卡超一齊出嚟搵謎擬Q。叫咗佢個名幾次，精靈球依然冇絲毫反應。

「比卡超......快啲出嚟啦......唔好玩啦......一啲都唔好玩！」樂樂開始感覺到唔對路，但依然堅持咁叫住比卡超個名。越叫，聲量同心裡面嘅希望一樣，越微弱......

「點解......」佢無助咁望住精靈球，露出不解嘅神情。

“點解要離開我......連你哋都......”樂樂孤零零咁緊緊抱住精靈球，踎低喺路中心。

而家四周嘅人都怕危險，已經返咗屋企，唔會再見到有路人喺街度流連，只有樂樂。終於抑壓唔住一直以嚟嘅情緒，喺大街大巷大大聲咁大喊一場。

「哈，喊得真係悲壯。」正當樂樂以為四圍都冇人，喊得最投入嘅時候，身後傳嚟嘅聲音，嚇咗佢一跳。

樂樂滿臉眼淚鼻涕咁轉過頭，見到唐澤已經踎低喺佢隔離，望住自己嘅醜態。

唐澤因為住得近，工作又未完成，所以放低比卡超同謎擬Q喺屋企之後，就即刻趕返出嚟做嘢。順便碰吓運氣，睇吓撞唔撞到嗰兩隻小精靈嘅原主人。

睇怕眼前喊得咁蠢嘅樂樂，真係佢哋嘅主人。可惜，見到佢喊得咁慘，更加唔想話佢知嗰兩隻小精靈就喺自己度。唐澤一啲都唔想多個豬隊友，冇人可以阻止佢追查真相。

樂樂怕羞咁另轉臉，下意識想用自己嘅衫䄂，擦乾淨自己塊臉。

「唉！你傻嫁！好核突啊！」唐澤一手捉住樂樂隻手，阻止佢下一步嘅動作，然後另一隻手搵紙巾俾佢。

唐澤無奈咁托住頭，等樂樂整理好。平時睇直播都未必覺，但真正識落先發現樂樂有幾傻。先唔論佢居然可以帶住比卡超同謎擬Q出嚟做嘢。

第一，而家啱啱完活動，其實現場仲好危險，佢居然仲留喺路中心喊。

第二，班黑警啱啱先射完催淚彈，噴完胡椒。一定成件衫都係殘留物，唐澤恨不得返屋企換衫沖涼，樂樂居然仲想用件衫嚟抹臉，死咗都知咩事。

第三，樂樂喊完，要換口罩啦......

等樂樂整理好之後，唐澤認命咁將後備口罩遞俾佢。突然有啲後悔出嚟撞兩隻小精靈嘅原主人，不如留喺屋企等小精靈醒仲好。

「咩事喊啊？」唐澤強忍住佢對樂樂嘅嫌棄，露出專業嘅服務業微笑。

「嗯......唔見咗嘢借。唔該曬你，唔洗理我，我自己再搵吓。」樂樂拍拍自己嘅臉，打起精神。咁脆弱咁易喊嘅，根本唔似平時嘅樂樂。所以佢默默幫自己打氣，再去搵比卡超佢哋。

唐澤覺得好攰，轉身準備離開，由得樂樂搵冇可能搵到嘅嘢。當見到遠處嘅警車之後，唐澤煩躁咁揉亂自己啲頭髮，然後返轉頭拖住樂樂走。

「走！我哋去食糖水！」再唔走恐怕啲黑警就會落車，問佢哋發生咩事。

「唉？但我仲未搵到......」樂樂隻手被佢捉住，所以用力想掙脫。

「再唔走就唔係同我食......」唐澤用眼神示意樂樂，遠處警車已經有黑警落咗車，離遠觀察佢哋發生咩事。

「......」

樂樂唯有低下頭，有啲緊張咁由得唐澤拖住佢一齊離開。遠離咗個黑警視線範圍之後，唐澤就鬆返開隻手，同樂樂保持返距離。

「一齊食糖水？我有啲嘢想問吓你。」佢哋咁啱路過糖水舖，所以唐澤就轉身問樂樂。

雖然覺得樂樂算係豬隊友，但唔阻礙唐澤想從佢口中了解小精靈嘅來歷。小精靈嘅事已經有直播影到，而家網上嘅人已經討論得好熱烈。身為主人嘅樂樂，應該就係知道得最清楚嘅人。

如果其他人知道咗，恐怕都會好快上門搵樂樂。但而家只有唐澤知道，佢唔介意先預告俾樂樂聽，同佢講返之後要點做先好，對大家都有好處。

兩人落完單之後，唐澤就打開手機開始碌討論區，由得樂樂一臉尷尬等對方開口。

「唐澤你好似好鍾意食甜嘢，上次先見你食冬甩。」樂樂首先開口，試圖打破雙方尷尬嘅氣氛。

「係啊，因為食甜嘢可以回復體力。」唐澤心不在焉咁答佢，令樂樂有啲嬲。

“明明係佢話有嘢同我講，而家將我放埋一邊唔理係咩玩法啊！”樂樂不滿咁「切！」一聲，之後就唔想理唐澤。佢拎起手機都開始上討論區睇，大部分post嘅標題之後，即刻嚇到出冷汗。

“現實版寵物小精靈”

“謎擬Q殺警”

「終於睇到啦？」唐澤笑住欣賞樂樂震驚嘅表情。

當樂樂想打開段片睇，發現已經被人刪咗，然後抬起頭用眼神詢問唐澤。

唐澤伸過頭，睇一睇樂樂手機嘅畫面。對段片被上面嘅人刪咗，一啲都唔覺得奇怪，反應好淡定：「已經刪咗啦？比想像中快。」

「到底發生咩事啊？」樂樂緊張咁開唐澤，對而家嘅情況一頭霧水。既然謎擬Q俾人發現咗，咁佢而家喺邊，仲有比卡超呢？

呢個時候，佢哋糖水都到咗。唐澤向店員禮貌咁講聲「唔該」，就開始品嚐佢冰凍嘅芒果西米露。

「唐澤！」見唐澤無視自己，樂樂嬲到臉都紅曬。

「咁惡做咩？唔通你識隻小精靈？」唐澤終於直視樂樂，佢嘅隻眼好似輕易可以睇穿其他人嘅想法，令樂樂一瞬間有啲恐懼。

「呃......對唔住......係我緊張咗。」樂樂心虛咁低吓頭，向佢道歉。

「哈哈哈，唔緊要。身為記者見到又有新聞做，緊張係正常。」唐澤心情愉悅咁用說話玩樂樂，見佢嘅表情好似過山車咁又起又落，已經變換咗好幾次。

而樂樂都終於意識到自己俾人玩足咁耐，呢刻嘅表情都十分尷尬。

「你想睇嘅片，我自己都有拍到，睇唔睇？」唐澤對住樂樂晃一晃自己部手機，樂樂連忙點頭，怕佢反悔。

影片中原本係班速龍追捕示威者，謎擬Q突然喺角落閃到速龍腳邊，然後快速閃避佢哋嘅攻擊。樂樂已經將全部嘅注意力集中喺手機畫面，握緊拳頭，為謎擬Q而緊張到手心出汗，差啲忘記去呼吸。

唐澤都默默觀察樂樂嘅表情變化，發現呢個女仔完全係將心理變化放曬喺表情嘅類型。

突然一連串「啪」「啪」「啪」嘅聲音之後，手機畫面內嘅世界瞬速變成黑暗。當中都夾雜尖叫同嘈雜聲，唐澤喺樂樂手上搶返手機。

「咁......佢哋......啲小精靈去咗邊？」呢個先係樂樂最關心嘅問題，但都要扮無意中問到，真係辛苦。

「佢哋？啲小精靈？」明明畫面只係影到謎擬Q，冇人影到比卡超，而且樂樂第一時間唔係覺得只係普通公仔嚟。唐澤笑住望住樂樂，樂樂所有嘅秘密喺佢面前好似都無所遁形。

11. 唔見得光嘅小精靈

噗咚！噗咚！

兩人互相對望咗好耐，唐澤仲喺度等待樂樂嘅答案。樂樂好怕，佢怕自己嘅心跳聲太大，會俾對方發現自己嘅心虛。

「對唔住！我有啲急事，要走先！」直覺話俾樂樂聽，佢唔可以再留喺度，否則自己所講嘅每一謊言都會俾對方睇穿。

樂樂有啲怕望到嗰對眼，可以清晰咁倒影出自己荒亂嘅表情。所以佢逃跑啦......

頭都唔敢回，唔敢望對方嘅反應。佢嘅腦一片空白，已經諗唔到可以有其他嘅辦法。而家嘅佢，選擇逃跑實在太狼狽啦。

「逃跑啦......」唐澤望住對面只喺食剩一半嘅糖水，自言自語。佢並冇嬲，反而有啲無奈咁笑。其實自己並唔係咁想喺樂樂口中得到真相，佢反而享受自己慢慢調查嘅過程。

「好啦......我都要快啲返去啦！」唐澤食飽之後，伸一伸懶腰。雖然自己嘅身心都已經好攰，但最好都係要趕返去睇住比卡超佢哋。萬一佢哋中途醒咗，自己又冇睇住佢哋，都冇法想像自己間屋會變成點。

「比卡......」我喺沉睡中蘇醒，意識仲未完全清醒，只知道自己嘅身體好攰好沉重。

“呢度喺邊度嚟？呢度唔係樂樂間房？”我迷惘咁環視自己身處嘅陌生房間，擺設有啲簡潔，床邊嘅公仔全部唔見曬。

我爬起身，用身體推一推訓喺我旁邊嘅謎擬Q。但佢訓得好沉，完全有醒嘅意思。

突然房間嘅門打開，我嚇到即刻擋喺謎擬Q身前，下意識保護佢。忘記身體嘅疲累，努力擺出準備戰鬥嘅姿勢。只見走入嚟嘅只係一個手無寸鐵嘅男仔，令我一殺那好似無咗攻擊目標，呆呆咁望住男仔。

「醒啦？」男仔擺出一個純良無害嘅笑容，伸手想摸我，我警惕咁退後避開。

佢見到我嘅反應之後，只係笑一笑。出去拎一早準備好嘅食物，放喺我面前。我似咁好收買嫁咩？

我保持住戒備咁望住佢每個動作，食物嘅香氣直迫我嘅鼻腔，令我嘅肚唔受控咗發出「咕嚕咕嚕」嘅聲音。一瞬間霸氣盡失嘅我有啲尷尬，好彩身體毛髮擋住我嘅皮膚，所以唔會睇到因尷尬而發紅嘅皮膚。

唐澤友善嘅笑容，彷彿就好似喺度取笑我。我自我放棄咁轉過頭，厚住面皮，雙手拎起食物大口大口咁開餐。唐澤拎起相機「咔嚓咔嚓」咁對住我影相，我眼裡而家只有食物，所以都唔得閒理佢。

原本沉睡嘅謎擬Q聞到食物嘅香味，迷糊咁微微搖晃住頭部，爬起身。佢見到四圍陌生嘅環境，望一望唐澤，又望一望正喺度暴飲暴食嘅我，有啲迷惘。

「咔嚓咔嚓」唐澤見謎擬Q都醒咗，下意識轉身對佢影幾張相。

閃光燈嘅強光閃到謎擬Q有啲暈眩，暈眩過後就充滿殺氣咁瞪住唐澤。唐澤感覺到之後，即刻停止自己魯莽嘅行為。佢退後幾步，注意力集中喺謎擬Q嘅動作。

「比卡......」我剛才太沉醉於食物當中，唔小心牽動到自己身上嘅傷口。我痛楚嘅叫聲，打破咗現場嘅沉默。

唐澤一個分神，謎擬Q已經愉偷走到佢身後伸出大掌，準備作出攻擊。唐澤雖然冇另轉邊睇，但佢自然見到自己嘅頭頂被一個大掌嘅影子遮擋住大部分光線。

見到大掌慢慢接近自己，佢唔敢回頭睇，一滴冷汗從佢額頭劃過臉頰，滴落地面。突然唐澤嘅手機響起，令謎擬Q嘅動作停住。

「喂？黃sir？」唐澤扮到若冇其事咁，其實手心一早已經緊張到出曬手汗。

「你應該有睇剛才段靈異片？上頭已經叫落無論如何都要搵到嗰隻嘢，而家發散曬人落返剛才嗰度搵。你洗唔洗落返嚟睇？」黃sir一收到消息，就即刻通知唐澤。

「係嗎？唔該曬你，知唔知嗰隻咩嚟？」唐澤起身準備再落區做嘢，趁機逃走，佢決定先避開正喺度憤怒嘅謎擬Q。

「我都唔知啊，上頭要我哋搵又講到唔清唔楚咁。」上頭嘅命令咁含糊，黃sir對而家嘅情況都係一知半解。

「啊！有樣嘢一定要提提你！剛才俾嗰隻嘢襲擊完嘅速龍，全部送曬入醫院，仲要係俾送入隔離病房，好似幾嚴重吓。你都要小心啲啊！」聽落好靈異恐怖，黃sir講起都打個冷震。

「隔離病房？！」

'唔會係武漢肺炎吓話！'唐澤有啲驚恐咁用眼角望一望謎擬Q，開始有啲後悔執咗佢返嚟。謎擬Q擺一擺頭，毛公仔頭嘅表情睇落好無辜。

收線之後，唐澤唔想害到自己屋企同其他人，即刻用酒精消毒曬自己接觸過嘅地方，再執齊自己嘅衣物，住14日酒店隔離吓先。

「你哋要跟埋我走！」唐澤準備帶埋比卡超同謎擬Q一齊隔離先，因為佢哋懷疑係危險嘅源頭，未確定之前都唔可以放佢哋返去。但我同謎擬Q依然未放低戒心，警惕咁望住唐澤，而家只想返樂樂身邊。

「我知你哋唔信任我，但呢個時候俾你哋返到樂樂身邊，樂樂一定會有危險。你哋想見到佢受傷咩？」唐澤煩惱咁抓亂自己嘅頭髮。雖然唔知佢哋聽唔聽得明，但佢講嘅唔止係為咗氹佢哋，而係事實。

我忐忑咁用眼神詢問謎擬Q，等待佢嘅決定。只見謎擬Q搖晃住頭，再一次走到唐澤面前，唐澤都忍住心裡嘅不安，同佢對視。

「比卡！」

我見到謎擬Q準備再一次從自已身上嘅破布下，向唐澤伸出大掌，連忙想衝上前阻止佢，但都係遲咗一步。謎擬Q黑色嘅大掌突然加速，捉實唐澤嘅右腳向自己拉。

唐澤因為失去重心，重重咁跌坐喺地下。佢仲未回過神，謎擬Q已經往佢嘅臉正面跳過去，踩上去，俾佢重重嘅一擊，令佢成個人瞓喺地面。

「啊！好痛......」

唐澤摸一摸直接落地嘅後腦，後腦傳嚟嘅痛感，令佢有啲失去理性。佢平時性格係比較溫和理性，但唔代表可以任由人哋接二連三咁攻擊自己，就算呢隻喺唔知咩生物都好。當佢滿眼怒火咁抬頭，謎擬Q已經跳入佢嘅背囊匿埋。

「比卡......」我走到唐澤身邊，擔心咁抬頭。

兩隻長耳仔無辜咁下垂，想向佢道歉。謎擬Q嘅性格一向咁討厭，但始終都算係我嘅朋友。佢無理咁攻擊唐澤，我自然替佢感到內疚。而謎擬Q肯乖乖咁入去行李度，應該已經接受咗，肯暫時跟住唐澤。

「放心，我冇咁小氣。」唐澤好無奈，見到比卡超嘅表情之後，怒氣都消咗一大半。自己無謂咁幼稚，同隻小精靈計較太多。佢檢查吓自己嘅大背囊，因為要住十四日以上，背囊已經爆滿。

於是，唐澤另外手拎屋企唯一一個大紙袋俾謎擬Q匿埋，另一隻手就單手抱起我。佢再三叮囑我出到外邊要扮普通公仔，我乖乖咁點頭答應。我第一次可以光明正大咁喺外邊，所以心裡面有少少興奮。

謎擬Q見得我一個可以被抱住，自己就要匿喺紙袋裡面，心裡邊都有啲唔甘心同委屈。於是踢開我，自己跳到唐澤懷裡。

「比卡！」我直接跌倒喺地下。

「你又想點啊？！」唐澤對住陰晴不定嘅謎擬Q，語氣已經開始唔耐煩啦。

我憤怒咁鼓起臉頰，每當我發嬲，臉頰又開始「啪啦啪啦」咁產生微弱嘅黃色電流。唐澤雖然都睇過寵物小精靈，但現實見到佢哋用超能力之後，佢嘅眼神依然閃過一絲驚艷。

而謎擬Q成功見到發嬲嘅比卡超，所以得意咁繼續留喺唐澤嘅懷裡。果然，我同謎擬Q係註定做唔到朋友，佢成日搵到機會就激嬲我。

「好好好，我抱住你哋兩個一齊去，咁好未啊？但你哋一定要乖乖地，千其唔好俾麻煩我。」最後都係唐澤作出讓步，佢怕由得兩隻小精靈搞落去，呢世都唔洗旨意出到門口。

我同謎擬Q對視咗一眼，各自移開目光，任由唐澤我哋抱起，一齊出門。

升降機門打開咗，唐澤並冇行入去，而係抱住兩隻小精靈企喺原地沉思。直到升降機門再次閂埋，唐澤轉身返到屋企，我同謎擬Q都覺得佢好奇怪。

「對唔住，因為而家四圍都係CCTV，影到我抱住你哋嘅話，大家都會有麻煩。」琴晚太突然，所以唐澤都冇注意到CCTV嘅問題。而家中共已經發曬人手嚟搵呢兩隻小精靈，都怪自己一時大意啦。

今次麻煩啦......

琴晚嘅CCTV應該已經影到佢哋，隔離嘅同時順便都避一避風頭先比較好。為咗唔連累家人，恐怕暫時要無限期離開屋企。

唐澤拎咗一件侄女留喺佢屋企嘅連帽外套，幫我著住。好彩我因為冇尾，著起嚟唔會頂住尾巴。偏大件嘅外套著喺我身上，好似連身長裙一樣。

而謎擬Q要變裝就更加簡單，喺是但一塊布或者紙袋度前兩個窿俾佢睇嘢，就完成。問題喺佢太鍾意樂樂整俾佢嘅毛公仔外形，完全唔肯換。直到發現咗佢身上嘅布料穿咗個破窿，而唐澤都應承幫手補，先成功氹掂佢。

唐澤被我哋煩到不停揉自己嘅頭，髮型一早已經被自己整亂到好似雜草一樣。佢覺得自己根本完全唔善長應付小朋友同動物，對一陣都覺得攰。

「唔好意思，要委屈一吓你哋啦，忍耐吓。」唐澤俾個紙袋謎擬Q換之後，再幫我將兩隻長耳仔塞喺連帽衫裡，但形狀依然奇怪。

於是，唐澤幫我喺裡面再戴一頂cap帽，將對耳仔保持屈住嘅狀態，令我有少少唔舒服。我大力搖搖頭，想將禁錮住我耳仔嘅帽甩開，但被唐澤㩒住。

「比卡......」我委屈咁望住佢。

「乖......」唐澤溫柔咁拍一拍我哋個頭，努力咁去嘗試氹我哋。因為唔太習慣氹人，佢嘅動作有啲僵硬。效果一定唔及樂樂，但見佢對我哋冇惡意，唯有勉強接受啦。

喺路人嘅眼裡面，只係見到一個二十幾歲嘅男仔，臉冇表情咁頂住一頭雜草頭。後邊背住大背囊，前邊抱住一個著連身長裙嘅細路女。而細路女就緊緊抱住一個大紙袋，好似乖乖咁瞓著喺哥哥嘅懷裡。

男仔嘅表情雖然有些少唔耐煩，但抱住細路女嘅動作好輕柔同小心，反而營造到一個溫馨嘅畫面。引起唔少路人側目，但唔忍心打擾到佢哋。

我抱緊謎擬Q唔敢亂郁，每次出到外邊都好大壓力，但困喺屋企又太悶。原本以為今次可以光明正大咁曬到太陽，結果都係要空歡喜一場。當諗到自己同謎擬Q恐怕呢世都要過住呢種唔見得光嘅日子，我忍唔住有啲傷感......

12. 小精靈嘅決擇

搞完咁多嘢，不知不覺已經天光，其他人都要起身返工啦。唐澤因為唔夠瞓，個頭已經開始有啲赤赤痛。安置完我同謎擬Q之後，佢先打個電話通知唐媽同公司嗰邊自己嘅情況，然後再自己去醫院做檢驗。

既然呢兩隻小精靈好大機會係肺炎源頭，咁樂樂都會係高危人士嚟。經過深思熟慮之後，唐澤決定向樂樂坦白，兩隻小精靈都喺佢度。但佢依然冇諗住將小精靈交還俾樂樂，因為收到黃sir俾嘅資訊，中共已經派咗人嚟搵佢哋。如果由得樂樂一個帶住小精靈，佢完全放心唔落。

喺另一邊，樂樂琴晚冇返到屋企，喺街度搵咗成晚都搵唔到比卡超佢哋。身心俱疲嘅佢眼神空洞，漫無目的咁喺大街行，完全唔知跟住落嚟嘅方向。突然樂樂嘅電話響起，佢先回過神。

「喂......」因為太攰，樂樂嘅聲音好明顯已經有氣冇力咁，喺電話另一邊嘅唐澤，聽到之後都有少少愕然。

「你好，我係new 新聞嘅唐澤。突然打俾你可能有啲唐突，但你而家方唔方便啊？」

「唐澤？你點會有我電話？」樂樂有啲驚訝。

「我問龜龜拎嫁，如果方便嘅話，即刻嚟一嚟將軍澳醫院醫院啊......」

「將軍澳醫院？係咪龜龜出咗咩事啊？我即刻過嚟！」唐澤未講完，已經俾樂樂打斷。收咗線之後，即刻趕過去。

被cut線嘅唐澤無奈咁嘆咗一口氣，都懶得打返去解釋太多，等樂樂嚟到先算。

「唐澤！龜龜佢點啊？」樂樂好快就趕到去醫院，見到喺大堂得佢嘅唐澤，即刻衝上去捉住佢嘅手臂，詢問龜龜嘅情況。

「龜龜佢冇事啊，已經醒咗，暫時好精神，應該好快可以出院。」臉冇表情嘅唐澤同緊張嘅樂樂形成強烈嘅對比。

「咁......你叫我嚟做咩？」樂樂意識到自己仲捉住對方，即刻鬆開手，警惕咁退後一步，拉遠兩人嘅距離。

「呢度唔太方便解釋，我哋去少人啲嘅地方講啊。」唐澤用雙眼搵比較少人嘅位置。

「你......你想點啊？有咩就喺度講！」因為唐澤嘅說話，令樂樂對佢嘅疑心更加大，完全唔知對方有咩企圖。

唐澤見樂樂完全當咗自己係衰人咁戒備，有啲無奈同煩躁。佢唯有低下頭喺樂樂身邊細聲講：「你唔係想知比卡超同謎擬Q喺邊？佢哋而家喺我度。」

樂樂聽到之後震驚咁瞪大雙眼，佢內心閃過無數嘅問題。但呢刻嘅大腦太混亂，所有嘅問題都卡喺喉嚨，佢只能夠用呆滯嘅目光望住唐澤。

見到呆呆嘅樂樂，令唐澤突然升起想大力敲佢個頭，敲醒佢嘅衝動。唐澤轉過臉，隱藏起自己嘅表情：「跟我嚟。」

樂樂乖乖地跟住唐澤，去到醫院旁邊，比較少人嘅小公園。

「你冇嘢想問我咩？」唐澤唔太想主動解釋，所以俾樂樂思考一吓自己想問咩。

樂樂沉思咗幾秒，心裡有啲忐忑不安咁問：「可唔可以將佢哋還俾我？」

「唔可以。」唐澤果斷咁拒絕。

「點解！你到底想點？」樂樂見唐澤拒絕，佢覺得自己嘅情緒都開始失控啦。佢足足搵咗比卡超同謎擬Q成晚，佢好擔心，好驚佢哋有事。

琴晚實在發生咗太多事啦，無論係龜龜嘅事，定係比卡超嘅事，都令樂樂覺得好驚，怕會失去佢哋。佢成晚都喺度忍耐，忍住自己隨時爆發嘅情緒，堅持到搵到比卡超佢哋為止。

「對唔住......」

直到聽唐澤低聲嘅道歉，樂樂先發現自己嘅淚水唔知幾時開始，喺眼眶滿溢出嚟。

「對唔住，但你暫時冷靜啲聽我講先。」唐澤喺背囊拎出紙巾，遞俾樂樂。佢都開始反思自己嘅問題，佢好似完全冇考慮到樂樂身為主人，唔見咗寵物嘅感受。

「我會將佢哋還俾你，但唔係而家。」唐澤怕再一次刺激到樂樂，所以盡量輕聲細語，溫柔咁去解釋。佢見樂樂開始慢慢平復，先接落去講：「琴晚被謎擬Q佢哋攻擊嘅十幾個速龍，而家全部都入曬隔離病房。」

「隔離病房？！」樂樂驚愕咁抬起頭，嚇到連眼淚都瞬間止住，佢嘅反應同唐澤剛才收到消息嘅時候一模一樣。

「我懷疑謎擬Q佢哋就係源頭，所以我暫時唔可以將佢哋還俾你。今次叫你嚟，係想你同我做檢驗，然後一齊隔離十四日。」唐澤只係講咗一半，有關中共已經開始派人搵謎擬Q嘅事，佢並唔打算話俾樂樂知。

如果唐澤將所有嘢話曬俾樂樂知，恐怕樂樂會因為怕連累佢，更加堅持要返謎擬Q佢哋。

「咁樣好咩？你幫手照顧住佢哋，你自己都好大機會中肺炎喎。」樂樂而家已經怕會連累到唐澤，佢寧願自己中肺炎都唔想間接害到其他人。

「好，還掂我都已經接觸過佢哋。如果我十四日之後都冇中肺炎，就証明啲小精靈佢哋喺安全。其他嘢......之後再決定啦。」唐澤轉身返入醫院，懷住沉重嘅心情，準備進行檢驗。

唐澤檢驗完肺炎，坐喺大堂等埋樂樂。見到樂樂低住頭，臉色沉重咁行出嚟。唐澤行過去，輕輕拍一拍佢膊頭安慰佢：「你唔洗咁擔心喎，只係懷疑借，未必會有事。」

「我可唔可以見吓比卡超佢哋？既然我哋兩個都係高危，其實可以我照顧返。」樂樂忐忑不安咁問。

「我已經安置好佢哋，你而家返屋企執好嘢，通知你屋企人同公司，準備隔離仲好啦。」唐澤暫時冇諗住將小精靈還俾佢。

「你準備去邊度隔離啊？酒店？」樂樂想跟埋去，起碼有個識嘅人，都叫有個照應，又可以睇住比卡超佢哋。而且佢仲有好多問題未問唐澤。

「你想跟埋嚟？我係冇咩所謂。」唐澤只係想暫時拖得就拖，既然有成十四日咁得閒，佢想查清楚兩隻小精靈嘅事。

「好，一陣電話聯絡，我返去拎嘢先。」樂樂舉高手機，向唐澤擺一擺示意。未等到唐澤回應，已經急步離開。

「呵，好似龍捲風......」嚟得快都走得快。唐澤望住樂樂嘅背影苦笑，佢最難應付呢類型嘅人......單純善良，又熱血。但衰在太衝動，好易令唐澤脫離計劃，而且預計唔到佢哋嘅行動。

唐澤返到酒店，坐唔夠一陣樂樂已經打電話嚟。問酒店地址，同埋租咗唐澤對面間房。

「叮噹！」門鐘一響，唐澤已經估到門後係邊個啦，起身去開門。

「比卡？」我好奇咁伸出小小頭偷睇邊個嚟咗。

樂樂眼尾見到遠處兩隻明顯暴露咗自己隱藏位置嘅長耳仔，失而復得嘅佢興奮咁叫我嘅名：「比卡超！」

「比卡！」我見門外嘅人原來係樂樂，驚喜咁衝過去，跳入樂樂嘅懷裡，聞住屬於樂樂嘅氣味。而樂樂都緊緊咁抱住我，好似怕再次失去我，連臉都埋入我嘅毛髮。

「好啦，要聚舊嘅入去裡邊先慢慢聚啦。」唐澤打破現場感人嘅氣氛，趕佢哋入去，然後關上門。

「謎擬Q？」謎擬Q都拖住左搖右擺嘅頭部，嚟到樂樂面前，俾佢抱起。

「對唔住，係我疏忽唔見咗你哋，你哋冇事就好啦。」雖然今次係我同謎擬Q善自行動，但樂樂就將錯誤怪喺自己身上，一直都好內疚。

「多謝你啊，唐澤......」雖然樂樂一直都覺得唐澤呢個人好有問題，但今次的確係佢救咗比卡超同謎擬Q。雖然唔知佢點解會知道自己就係佢哋嘅主人，都唔知點解琴晚唔講俾自己聽佢哋嘅下落。

「好啦，我哋返去啦！」樂樂抹乾淨臉上嘅眼淚，對懷裡嘅我同謎擬Q露出如大陽一樣溫暖嘅笑容。

我聽到之後，身體瞬間僵硬，俾唔到反應。雖然我好想好想跟住樂樂，但係......

仲未等我思考完，我隔離嘅謎擬Q已經從樂樂懷裡面跳出嚟。搖晃住頭部，走到唐澤腳邊，佢嘅選擇已經顯然易見。

既然謎擬Q已經作出咗決擇，咁我應該點選擇好啊？我嘅腦海裡邊不停回響住唐澤剛才對我哋所講嘅說話。

「我唔知你哋聽唔聽得明啦，但你哋之後將會遇到好多嘅危險，如果跟住樂樂，好大機會會連累到佢。」唐澤一臉認真咁對我哋講，我哋聽到之後呆喺原哋。

「你哋個表情真係蠢，係咪真係聽得明嫁？」唐澤心血來潮，伸出手指想篤一篤謎擬Q好似隨時跌落地嘅公仔頭。謎擬Q嘅公仔頭部先一步向後傾，避開佢嘅手指。然後用胸前真正嘅眼睛，狠狠瞪住佢，佢嘅雙眼好似星星一樣閃爍，充滿威脅性。

唐澤見謎擬Q嘅眼神好似想食咗佢嘅手指，所以先將伸出去嘅手指收返。然後咬牙切齒咁對謎擬Q講：「你......真係一啲都唔可愛。」

「唔理你哋聽唔聽得明都好，總之我對你哋冇惡意。我只係想查清楚，你哋出現係呢個世界嘅原因。」一係穿越時空，好似動漫一樣。但至少唐澤冇咁天真，佢直覺覺得佢哋嘅出現一定係人為。

至於目的？好明顯。兩隻小精靈都擁有強大嘅超能力，跟本算得上係逆天而行。如果落喺心術不正嘅人手上，恐怕世界末日都做到。

雖然呢刻佢唔應該覺得興奮，但見到比卡超佢哋之後，佢個心簡直興奮到不停跳。佢之所以做記者，就係等呢刻。用相機同筆，揭開所有黑暗，不為人知嘅真相。或者未必係好似消防同醫護咁真接救人，但每個人所做到嘅嘢都唔同，而呢個係屬於佢嘅正義。

「我希望你哋幫我。」唐澤對佢哋伸出手，雖然感覺有啲中二病。起碼佢覺得自己有呢個能力，佢想用自己嘅方式，揭開黑暗。

「點解啊？」樂樂見到謎擬Q嘅選擇，抱住我嘅懷抱都下意識收緊，都將我嘅思緒拉返現實。

「比卡......」對唔住啊，樂樂。我想掙脫樂樂嘅懷抱，我已經決定咗，想幫唐澤。因為我知道所有嘢，有好多嘅動物仲喺研究所度受苦。唐澤嘅說話俾咗佢一個希望，我暫時相信佢。如果真係做得到，真係可以救返所有受苦嘅動物。

「唔好......唔好走......」明明知道佢哋嘅選擇，但樂樂依然鍾意佢哋。話佢任性都好，佢唔想被拋棄，唔想得返自己一個。

「比卡......」我咬住牙，用盡全力掙扎。我發現自己被樂樂緊緊咁禁錮喺懷裡，居然完全掙唔開。我哋兩個都用盡全力，有啲狼狽。

「啪啦啪啦」

「等等......」唐澤緊張咁開聲阻止，但都係遲咗一步。

「比卡超！」

「嗚......」當我發現禁錮我嘅手鬆開，慢慢滑落，我回過頭，樂樂已經瞓喺地下，睇唔到佢嘅表情。

我居然......我居然......

13. 猜測

我瞳孔放大，望住倒地嘅樂樂，有啲唔相信。我居然......傷害咗自己嘅朋友。

「樂樂！樂樂！」唐澤拍咗樂樂幾下，發現佢已經暈咗，但呼吸仲算正常。

「你哋乖乖哋留喺度！」唐澤轉過頭對我同謎擬Q講，然後背起樂樂衝出房間，向醫院跑去。

我呆滯咁企喺地，望住唐澤緊張咁去救樂樂。直到佢哋離開，謎擬Q行埋嚟，伸出大掌將我大力向牆壁打去。

「碰！」我撞到牆之後，順住牆滑落，瞓喺地面。

「比卡......」感受到痛楚嘅我終於回過神，抬起頭迷惘咁望住謎擬Q，但我雙眼已經被眼淚模糊咗視線。

我明明從來都冇諗住傷害朋友嫁！我明明一直都好鍾意樂樂嫁！我......應該點做好？

唐澤一邊背住樂樂跑去醫院，不時留意佢嘅情況。去到醫院之後，因為佢緊張咁衝入嚟醫院，吸引咗好多人嘅目光。

「快啲......咳咳......」唐澤背住樂樂用盡全力跑，而家已經氣喘到唔可以順利咁講嘢。

「請問個女仔發生咩事啊？你係佢嘅？」其他醫護即刻送樂樂去檢查，然後有一個護士向唐澤問詳細資料。

「佢頭先唔小心觸電，我係佢嘅朋友。」唐澤吞一吞口水，佢順返自己條氣，先可以順利講到句子。

「好，先生，麻煩等一等啊。」

「麻煩你哋啦。」緊張過後，加上唔夠瞓，唐澤已經頭痛到有啲暈。佢坐底休息，碌咗陣手機，又發現心不在焉。

唐澤眼角無意中見到有一個感覺好斯文護士望向佢嘅方向，佢禮貌咁向護士點一點頭，個護士即刻移開目光，去其他地方做嘢。

過咗冇耐，頭先嗰個護士走埋嚟，向唐澤搭訕：「你好，頭先同你一齊嚟嘅女仔已經醒咗，冇咩大問題，可以出院。」

「係啊？唔該你哋。」唐澤鬆咗一口氣，終於可以返去好好休息吓。

「唔好意思，方便問一吓，你同嗰個女仔係咩關係？佢係因咩事觸電？」護士鼓起勇氣問唐澤。

「我同佢係朋友，而因咩事......都唔算咩特別事。」唐澤根本冇可能講得出，係因為比卡超，所以唯有用模糊嘅答案答案。

護士都感覺到唐澤答得好敷衍，佢強忍住自己唔露出害怕嘅表情，咬牙切齒咁對唐澤講：「如果你傷害樂......許忻悅嘅話，我係絕對唔會放過你！」

「哈哈，你要點樣唔放過我啊？」對面嘅人自以為將對自己嘅恐懼隱藏，仲走嚟威脅佢，唐澤見到忍唔住笑出聲。

「我......我...」護士個腦一下子轉唔切，有啲手足無措。

「樂樂！返去啦。」唐澤見遠處嘅樂樂已經檢查完出嚟，佢發現樂樂精神唔係幾好，於是行埋去幫手扶一扶佢。

「好......多謝你救我。」一諗到比卡超同謎擬Q居然選擇唐澤，而唔選擇自己，樂樂呢句多謝就有啲咬牙切齒，缺乏真心。

唐澤同樂樂越過呆企喺原地發呆嘅護士，一齊返去。

「喂，許忻悅。」唐澤喺樂樂身邊輕聲叫佢。

「唉？你點知我個名？」因為工作關係，樂樂已經習慣咗大家叫佢樂樂多過叫佢本名。

「後邊嗰個護士係你朋友？」唐澤用眼神示意樂樂轉頭睇一睇。

「邊個？」樂樂另轉頭，發現有個護士直直咁望住佢，眼神透露住懷緬，好似透過自己望住其他人，好奇怪嘅眼神。樂樂努力咁搜索腦海裡嘅回憶，完全冇呢個護士嘅身影，於是轉過頭答唐澤：「我唔識佢啊。」

「係啊？」唐澤心不在焉咁答，剛才嘅護士好奇怪，照咁睇佢應該係識樂樂。不過樂樂根本唔識佢，咁就証明冇可能係熟人，咁佢點解要為咗樂樂嚟威脅佢。而且佢望樂樂嘅眼神雖然睇唔到有惡意，但實在太奇怪。

不知不覺間，佢哋又忙咗大半日。返到酒店之後，樂樂嘅精神依然唔好，心情好低落。

「肚餓未？我幫你叫埋外賣。」唐澤見樂樂咁嘅狀態，都有少少擔心。

「唔該你，我一陣嚟拎返自己房食......」樂樂暫時唔想見到比卡超佢哋。

「做咩？你唔想見吓比卡超同謎擬Q佢地咩？」唐澤都睇穿咗樂樂嘅諗法，因為樂樂嘅心思實在係太易估。

「我想，我想見佢哋，但係......佢哋已經選擇咗你。」樂樂暗地裡握緊拳頭，忍住內心嘅情緒。

「點解......你哋個個都好似小朋友一樣。」唔止比卡超同謎擬Q，就算係樂樂都係一樣。唐澤最唔善長對住小朋友，佢覺得自己唔係知心哥哥，無責任去開解佢哋。

唐澤轉身返房，閂房門前，回頭同樂樂講：「你唔好後悔。」

唐澤覺得樂樂唔想見兩隻小精靈仲好，起碼自己行動會方便啲。樂樂年紀仲細，好易將喜怒哀樂表露出嚟，帶住小精靈嘅話有一定危險性。既然樂樂自己主動開到聲，以後就唔好怪佢唔還返小精靈俾佢。

「比卡！」

我聽到有人返嚟，兩隻耳仔微微抖動幾吓，即刻匿埋喺被鋪下邊。我隔離嘅謎擬Q聽到之後，轉過身望住門口入嚟嘅唐澤。公仔頭因為謎擬Q過大嘅移動動作，以誇張嘅幅度擺向一邊，好似就快跌落嚟。

唐澤走埋去，伸手幫謎擬Q擺返正個頭，發現點擺都會偏向一邊，唯有放棄。轉去輕輕拍一拍被鋪微微凸起嘅位置，輕聲叫我個名：「比卡超？」

我聽到唐澤叫我個名之後，身體微微一震，唔敢從被鋪下面出嚟面對佢。隔咗一陣，我聽唔到外邊有動靜，我先偷偷揭開一個小角，露出鼻同眼睛觀察外邊嘅情況。

我發現唐澤同謎擬Q原來仲係床邊，靜靜咁等待我出嚟，而環視咗成間房都見唔到樂樂嘅身影。我雖然鬆咗一口氣，但內心充滿咗失落。我乖乖哋喺佢哋嘅目光下，從被鋪爬出嚟。

唐澤並唔係想教訓比卡超，但佢見到我個樣都覺得我可憐。我嘅臉頰依然係紅扑扑嘅紅色毛髮，但仔細睇就發現有啲腫起嚟，係因為剛才俾謎擬Q大力打咗幾吓，冇還手。

耳仔向後垂，因為緊張，一直微微抖動。而雙眼被淚水浸濕，水汪汪咁，閃爍住好似星星一樣嘅光芒。眼底下嘅毛髮已經被整濕，仲掛住一，兩滴淚珠。

「樂樂佢冇事。佢已經同意咗，以後你哋兩個就由我嚟照顧。」唐澤安慰咁拍一拍我嘅頭，之後就唔得閒再理我，轉身去做公事，佢其實都算係一個工作狂。

我依然有啲唔可以相信，希望所有事都係一場夢。以後由唐澤照顧我哋......樂樂係咪已經討厭我，唔想要我啊？呢個問題一直喺我嘅腦海度徘徊。

謎擬Q默默注視住我同唐澤，決定眼不見為淨，倒頭就喺床度瞓著。而唐澤明明唔夠瞓，都堅持做埋啲文稿嘢。暫時呢半個月佢唔可以出外邊做嘢，但都仲可以做公司嘢嘅。公司嗰邊其實都有叫佢好好休息吓，但而家唔洗出去趕新聞，工作量已經算減輕咗好多。

唐澤唔想浪費時間，佢想快啲查出小精靈佢哋嘅事。目前佢大約有個猜測，已經喺佢嘅腦海成形，但要搵證據就有啲難度。

唐澤而家將調查目標鎖定喺武漢研究所，多得嗰班被謎擬Q攻擊完嘅速龍有人中咗武漢肺炎，先令唐澤咁快搵到明確嘅目標。

政府暫時仲未將嗰日速龍中肺炎嘅事公開，而網上流傳謎擬Q嘅影片都已經被刪曬。警方嗰邊，唐澤暫時有兩個線人暗中提供資料俾佢。一個係黃sir，一個喺俾佢威脅先幫佢嘅警察。唐澤仲未可以完全信任佢哋，可能有一日，會輪到佢自己俾人出賣。

隔離嘅日子，暫時都算係平靜。但唐澤唔敢放鬆，keep住留意住每晚嘅新聞同直播。每日量體溫，打電話俾唐媽報平安，同問屋企情況。

唐澤已經確定武漢肺炎喺由武漢研究所流出，而流出嘅方式不明。佢同樂樂都有同兩隻小精靈接觸過，暫時兩個人都冇中肺炎嘅跡象。所以之前有猜測過，因為接觸小精靈而中肺炎，而家可以排除呢個可能性。

至於估係因為被攻擊而中肺炎嘅話，樂樂被比卡超攻擊之後，只係普通嘅觸電，而家都冇其他大問題出現。而謎擬Q嘅攻擊......暫時未可以做測試證實，但呢個可能性極大。

仲有一個可能性，就係傳聞一開始所講，食野味係武漢肺炎嘅源頭。唐澤有留意到比卡超近臀部嘅位置，嗰度啲毛髮有個位置比較稀疏，而且有個類似小尾巴嘅凸位。證明咗比卡超之前應該係有尾巴，以傷痕嚟睇，似係俾人直接將尾巴一刀斬落嚟。以上嘅可能性，都要佢出去之後做吓測試先可以證實。

樂樂同唐澤間中見到面都會傾兩句，但一提到比卡超，樂樂都會沉默。其實樂樂係好想見吓兩隻小精靈，但又唔知點開口比較好。唐澤雖然睇穿佢嘅諗法，但冇點破。

平靜嘅日子不知不覺過去，隔離嘅日子就快完結。但唐媽嘅一個電話，將表面嘅平靜一下子打破。

「細佬啊......你係咪喺出面得罪咗咩人啊？」唐媽喺電話對面，有啲欲言又止。

其實唐媽好清楚自己啲仔嘅性格，細仔唐澤，做事好認真，都好有野心。但好大可能喺影新聞嗰時得罪咗人，好似佢之前721影到班鄉黑同黑警一齊嘅片，之後都有威脅信寄嚟屋企同唐澤公司。

「點解咁問啊？發生咗事？」唐澤心情即刻緊張起嚟，佢自己都估少少，但怕連累屋企人。

「你暫時唔好返嚟住，喺出面住多排先。琴晚有幾個便衣警察上門話搵你，但搵唔到你就走咗。」諗返起琴晚嘅事，唐媽依然有啲不安同驚恐。好彩大仔知道之後，怕佢有危險，呢幾日叫咗佢過去住。

「媽，對唔住。」唐澤都估到佢哋會搵上門，但估唔到咁快鎖定自己。

「媽咪唔係怪你，但如果你做危險新聞時要講聲先。起碼有咩人嚟到屋企搵你，我都有個心裡準備，可以幫你拖住先。」唐媽見到呢啲一場面，當然會驚，但佢希望盡能力幫個仔。

「好，我知道啦。你自己都要小心啲。」唐澤叮囑完唐媽，收線之後，表面平靜，但心就忐忑不安。

終於要嚟啦......

14. 唐澤被捕

隔離嘅最後一日，樂樂企喺唐澤嘅房門口，猶疑咗好耐，終於鼓起勇氣敲敲房門。

「樂樂？隔離終於完咗，恭喜你。」唐澤打開門之後，見係樂樂，並唔覺得奇怪。

「你都係，恭喜你。」樂樂講完之後，表情慾言又止咁，唐澤都難得有耐性咁等待樂樂開口。樂樂深呼吸一下，眼神堅定咁開口：「我今次嚟係想要返小精靈佢哋！」

「係啊？入嚟先講啊。」小精靈嘅事唔適合喺有曬CCTV，又隨時有人路過嘅地方講。

閂咗房門之後，唐澤假扮出一副好苦惱嘅表情對樂樂講：「對唔住，你都見上次佢哋兩個都想跟住我多啲，我都好鍾意佢哋......」

「咁......冇法啦......」樂樂低住頭隱藏起自己低落嘅表情。樂樂喺自己嘅背囊拎出精靈球，交到唐澤手上：「呢個係精靈球，同寵物小精靈嗰個一樣，用佢嘅話，帶住比卡超出入會比較方便。而謎擬Q就唔知可唔可以入去，我未俾佢試過。仲有，佢哋兩個一齊會成日打架......」

雖然樂樂同兩隻小精靈相處嘅日子唔算長，但已經對佢哋有感情。當日見佢哋選擇唐澤，其實自己真係覺得好唔理解同唔甘心。但經過自己呢十四日嘅冷靜思考，佢決定尊重返比卡超同謎擬Q嘅決定。

唐澤有問樂樂見唔見埋比卡超同謎擬Q先走，但樂樂拒絕咗。因為佢怕見到之後，只會更加唔捨得。叮囑完所有嘢之後，樂樂退後一步，微微向唐澤彎腰，慎重咁拜託佢：「請你好好照顧佢哋。」

唐澤目送樂樂離開，直到樂樂嘅背影喺佢視線消失。唐澤轉過身，只見佢嘴角殘留住未散嘅微笑，用欣賞嘅目光對喺遠處偷望嘅我同謎擬Q講：「你哋有個好好嘅主人。」

我同謎擬Q迷惘咁對視，因為剛才聽唔到唐澤同樂樂嘅對話，所以我哋都對唐澤呢句說話唔太理解。

既然自己已經被人鎖定咗，唐澤要諗將比卡超佢哋收喺邊先唔會俾人發現。其實佢有一刻係想將佢哋還俾樂樂，但又怕樂樂之前唔知有冇咩嘢同小精靈一齊嘅豬屍馬跡。既然連自己都發現到兩隻小精靈嘅原主人係樂樂，其他人如果有心去查，一樣唔難發現樂樂嘅存在。

樂樂主動俾個精靈球唐澤，簡直係幫咗佢一個大忙。經過深思熟慮之後，唐澤決定返屋企。既然遲早都會俾人搵到自己，不如早啲暴露自己嘅位置仲好。而且佢要將比卡超同謎擬Q，放喺最危險嘅地方。

因為最危險嘅地方，係最安全。

對手嘅勢力實在太大，唯有智取。而家開始，唐澤都要好似捉棋咁，每一步都計算好。一子錯，滿盤皆落索。

唐澤變裝之後，帶住比卡超同謎擬Q一齊返屋企，恐怕佢屋企樓下已經有便衣喺度等佢。只要佢一出現，就以莫需有嘅罪名拉佢。

唐澤安置好兩隻小精靈之後，走返落樓。變返佢平時嘅造型，喺屋企附近嘅地方行。果然佢一出現，已經有幾個便衣衝過嚟，將佢壓喺地下，好似對待重犯咁。

「唐澤先生，我哋而家以懷疑藏有爆炸品拘捕你。」幾個大隻便衣警合力壓住唐澤，令佢無法逃走。

「咳咳......」唐澤被佢哋壓到呼吸有啲困難，乾咳咗幾聲，根本完全講唔到反駁嘅說話。好痛，好辛苦......

雖然唐澤明知道班黑警會以莫需有嘅罪名拉自己，但以藏有爆炸品定罪嘅話未免太勉強。如果比卡超同謎擬Q都算爆炸品嘅話，都講得通嘅。根本就係借機搜唐澤屋企，搵謎擬Q佢哋。

「你叫咩名啊！」四圍見到嘅街坊開始幫唐澤錄影住，詢問佢嘅名。

「咳......」而唐澤嘅呼吸都隨住時間嘅過去，越嚟越困難。所以佢努力保留自己嘅氧氣，唔浪費力氣答佢哋。其實唐澤一早喺行呢步之前，幫自己準備曬之後嘅後路。已經聯絡咗相熟嘅律師同家人幫手，都清曬手機紀錄。

感覺被壓咗好耐，唐澤身上嘅幾個黑警先鬆開佢，幫佢鎖上手銬。唐澤因為剛才嘅缺氧，臉色已經明顯好蒼白，有啲頭暈暈，佢順從咁跟住黑警上警車。

去到警局之後，唐澤除曬衫俾人搜身。搜完之後就喺倉度呆等一陣，冷氣凍到令唐澤嘅思考都有啲遲鈍咗。冇耐之後，一個自稱CID嘅人嚟幫唐澤落口供。但佢一開聲，唐澤已經覺得唔對路。

呢位CID雖然扮得好似香港人，但都聽得出唔太正宗，係帶住內地口音，唐澤聽到之後挑一挑起眉毛。公安？唐澤暗自記低公安嘅名同警員編號。

而個公安落口供時都唔係集中問關於案件嘅問題，而係扮FD，講好多提外話，暗中想唐澤講出有關小精靈嘅資訊。一早預計到嘅唐澤，一直扮傻。呢位公安見問唔到啲咩，唯有放棄。

班黑警嘅工作速度史無前例嘅快，即日已經申請搜查令搜唐澤屋企。有四個便衣警跟去搜屋，唐澤都坐上去佢哋架私家車，後座兩個便衣一左一右咁夾住佢。好迫，想轉一轉身都難。

上到唐澤屋企，四個便衣警居然換保護衣，開始喺屋裡面仔細搜索每一個角落。其中一個突然拎出一個奇怪嘅儀器，佢將儀器上嘅天線拉長。好似搵信號咁四圍探索，令唐澤有種不詳嘅預感。

唐澤將謎擬Q所匿埋嘅紙袋放喺門口位置嘅地下，而比卡超就入咗精靈球，精靈球被當做普通嘅裝飾放喺玻璃櫃嘅當眼位置。

唐澤俾兩個便衣左右夾住，根本完全做唔到咩小動作。而另外兩個將佢屋裡面所有嘅箱啊，袋啊，櫃啊，裡面嘅嘢都全部翻出嚟。用儀器四圍探測，連角落位置都唔放過。

唐澤趁住佢哋唔為認意，伸出腳輕輕踢一吓謎擬Q匿埋嘅紙袋。

「碰！」紙袋倒地嘅聲音雖然唔大，但喺呢個環境，都吸引咗現場所有人嘅目光。

「嗯......」左右兩個便衣即刻將唐澤鉗制得更緊，唐澤雖然好痛，但呢刻最怕係俾佢哋發現兩隻小精靈。

「警告你！唔好整蠱做怪啊！」其中一個將地下嘅紙袋當垃圾咁向門外踢埋一邊，然後大聲警告唐澤。

離開咗佢哋視線範圍嘅謎擬Q撐起紙袋，迅速咁跑到後樓梯。唐澤見佢哋冇發現謎擬Q，都鬆咗一口氣。但當便衣警嘅儀器轉到精靈球所在嘅玻璃櫃，佢嘅心跳又重新緊張起嚟。

奇怪嘅係，儀器嘅天線指向精靈球之後，居然一啲反應都冇。唐澤原本以為儀器係用嚟探測謎擬Q同比卡超嘅存在，但冇反應總好過有反應嘅。

四個便衣警見毫冇發現，唯有帶住唐澤返上警車，準備返警署。

其中一個便衣警上車後，用普通話打電話返去向上頭報告：「辛先生，我們並沒有找到目標。」

「......」

「好的。」

唐澤喺後座原本想默默咁聽佢哋嘅講話內容，盡量一字不漏咁記喺腦海。無奈呢通電話嘅內容實在太簡短，幾句就已經結束咗。佢只能夠記低「辛先生」呢個名，等自己出返去之後再作調查。

警方見留唐澤喺度都唔會有咩大發現，所以冇耐已經俾佢保釋返出去。唐澤順利離開警署之後，即刻趕返屋企，想搵返比卡超同謎擬Q，怕只有佢哋兩個會再有危險。

而我同謎擬Q喺佢地搜屋離開之後，一直乖乖地留喺唐澤屋企。當見到唐澤返嚟，即刻驚喜咁衝上去。

「你哋兩個做得好好。」唐澤蹲下身，讚賞咁拍一拍我哋個頭。我哋都係第一次見唐澤發自真心咁笑，佢呢個笑容比起平時嘅佢少咗份計算，多咗一份天真無邪嘅感覺。

另一邊，其實之前嗰個儀器係辛先生臨時趕工嘅成品，算係「謎擬Q探測器」，但並唔太完美。主要用嚟搵返謎擬Q，只要謎擬Q喺探測器一米範圍內出現，探測器都會有反應。

辛先生而家已經可以確定謎擬Q喺香港，既然謎擬Q對上一次係出現喺抗爭現場，咁之前嘅抗爭現場好大機會都會出現過。於是，辛先生派人翻查對上反送中現場嘅所有CCTV同直播，搵吓有冇蛛絲馬跡。

「叮噹！」

樂樂已經搭巴士返屋企，手機就有突發訊息。樂樂身為記者，好快就收到消息。

「突發！將軍澳有一男子被上門拘捕」

「吓？又係將軍澳？」樂樂自言自語，如果自己近嘅話就可以即刻趕過去。佢打開被捕人士Telegram 認人，見到一個熟悉嘅臉，被便衣壓住，緊貼住地下。

「唐澤......」樂樂震驚相中被壓到臉色有啲蒼白嘅男仔，正正係剛同佢分開冇耐嘅唐澤。

'點解？佢半個鐘頭前仲同我一齊。佢被捕嘅話，比卡超同謎擬Q點算好啊？'樂樂迷惘咁望住手機，佢想去幫手，但又唔知自己幫到啲咩。

而家得自己同唐澤知道小精靈嘅事，如果唐澤俾人拉咗，咁自己一定要幫手照顧小精靈。但樂樂發現自己對唐澤嘅事一無所知，基本上連佢嘅電話號碼都冇。有咩可能知道佢屋企地址，可以接返小精靈。

'係啊！仲有龜龜知道，佢同唐澤係舊同學。'樂樂突然靈光一閃即刻打電話去俾龜龜。

「喂，龜龜！唐澤被狗咬咗，你知唔知啊？」電話接通咗，樂樂即刻急速咁講。時間緊迫，佢已經俾唐澤發現咗小精靈，唔可以再俾其他人發現。

「我知道啊，收到消息講係懷疑藏有爆炸品，我已經趕緊過去。」龜龜已經出發中，應該好快就會到現場。

「等等啊！我都要去啊！」樂樂即刻㩒掣落車，向住回頭嘅方向趕去。

「樂樂已經隔離完？唔洗休息吓？」聽到樂樂話趕嚟，龜龜都有啲驚訝。

「都休息咗成十四日，骨頭都硬曬。」樂樂要喺佢哋搜屋前趕過去。

樂樂知道唐澤屋企地址之後，即刻趕過去搵比卡超同謎擬Q。因為消息話有爆炸品，現場已經聚集咗好多記者。

記者想上樓，但被保安阻止。現場太多人，樂樂雖然想搵返小精靈，都唔知點入手好。佢搵到龜龜之後，都同佢一齊拎起手機，直播現場情況。

大約幾個鐘之後，升降機門打開，一班著住保護衣嘅人已經喺唐澤屋企搜索完畢，準備返警局。

「請問點解要拘捕嗰位記者？」

「請問警方有冇搜到爆炸品啊？」

一眾記者即刻圍上去，想拎第一手資料。而班著住保護衣嘅警察都不停命令記者後退，佢哋圍成一圈，好似想保護某人。

圍喺中間被保護嘅人，喺路過樂樂嘅瞬間，突然停住腳步，轉過頭，好似喺度同樂樂對視。佢雖然著住保護衣，但審視嘅視線，令樂樂覺得好唔舒服。

「辛先生，快上車回去了。」旁邊嘅警員見辛先生停咗腳步，即刻提一提佢。