ohmycrystal2010 2020-9-6 12:33
[attach]11580990[/attach]
我以為呢個世界仲有人性嘅光輝 ，其實更多嘅只係騙案，係啲騙徒刻意營造嘅假象。真正虐貓嘅人，逍遙法外，出錢出力嘅，被剝削被誣蔑。人唔去到灰爆嘅絕境，就唔會諗起拎起嗰鍵盤，同大家分享呢個經歷。
我好大機會因為咁又失業，但我更驚我真係拎起剪刀，幫真嘅虐貓者投胎。「你真係一個賤人！賤到入骨仲喺我面前扮好人！」
銀行戶口得個位數，我試過好多次，生活再迫人，我可以忍；遇過嘅人，多數當我係傻仔，我可以忍；你擺明車馬打貓嘅荷包，我都可以忍；但我無法忍受，我自討銀包買嘢俾貓食，你冷嘲熱諷，然後同我講，唔好餵貓咁飽。
公司撥款每月三百蚊，俾流浪貓買貓糧。一包貓糧160蚊，十幾隻貓，起碼要一包多啲先夠。有人就落格啲貓糧錢，只買一包。2018年，我入職金城營造，我原本以為阿頭咁好人，自己買糧俾浪浪食。
所以我對於 每隻貓每餐食幾粒糧 不敢有任何異議。我冇權去話人點解唔派多啲，因為我以為佢自己俾錢，偶爾亦買啲cheap魚餵。但我一日嘅糧得600蚊，一個月都未必返得足20日（佢哋唔俾返）12000蚊，家用6000蚊，交寬頻 電話費又1000 找卡數2000 食飯1000左右。基本上我都冇乜剩。
於是我成日喺屋企拎啲冇鹽份嘅嘢食俾貓食，再咬緊牙關買啲嘢俾貓食。
一切一切，從我得知阿頭打貓嘅荷包開始，我對佢已經非常憎恨，貓糧六粒餐？我餵多啲，就俾佢話點解餵咁多。我明曬，餵少啲，一包糧食耐啲，佢就可以舒舒服服落格。其實我真係唔介意人哋落格，問題在於我自己俾錢買嘢俾貓食，你條友都要諸多聲氣。
有個阿叔同事成日會入嚟，餵鹵水雞翼或者豬扒。我知道呢啲嘢鹹，所以收返嚟，拆骨、浸水，希望整淡啲。我冇呢啲實力，將呢啲嘢送去垃圾桶。啲貓一就食雀仔 老鼠 一就食雞翼 豬扒 。我嘅壓力有幾大，對浪浪唔上心嘅人，點會感受到？
貓媽咪生咗啲BB，阿頭話幾得意，拎俾佢朋友。我話，呢啲流浪貓，冇咁純，領養人真係要妥善照顧。阿頭以權謀私，迫我去捉BB，我唔知佢拎嚟做人情定點。好不容易，捉到一個BB。我真係冇諗過，間接送佢去彩虹橋。
我千叮萬囑要先睇醫生呀，要聽醫生講點照顧貓B。阿頭話知道，點知等咗2日都未睇醫生，隻貓B死咗。阿頭嘅fd仲影住貓B斷氣前嘅畫面。阿頭冇任何傷心，仲笑笑口send俾我睇。
因為呢單嘢，我喊咗好多次。因為窮，我先嚟打呢啲黑工。我可以點？同呢啲人理論，咪執包袱走。冇辦法之下，我開始上載浪浪們嘅嘢上網，我好希望，有人真係可以幫到呢啲貓，我又唔可以直言呢度有人虐貓，唯有含蓄po啲圖上網，希望有人可以領養呢班得意嘅貓咪。
我唔係冇試過，但啲人多數只關心有冇貓B，對其餘十幾隻貓不聞不問。而我因為po浸雞翼嘅圖，俾高登仔話我虐貓。
因為窮，我唯有忍。我需要呢份工。最後忍到2019年5月份，對於阿頭嘅所作所為（包括工事上），實在對多一秒都覺得絕望。有個人真係可以如此催眠自我，做埋啲衰嘢仲美化自己點好點好。
經歷咗一年寫文章嘅日子，風光過，賺到錢，然而好嘅作者，通常好景不長，打回原型。我又冇乜收入，呢個時候，阿頭又鬧走替工，諗諗下，搵我返去唔錯wor，又可以叫我買嘢唔俾錢，又可以糟質下啲創作人，幾好wor。
因為窮，我又返到嗰鬼地方做黑工。啲貓我之前捉曬去絕育，所以冇乜新力軍，死咗一啲貓，失蹤咗一啲貓，最後得返五六隻。
我仲喺度諗，阿頭會唔會有改變呢？我試下同佢講下道理，點知佢繼續執迷不悟。我明白到，有啲人，俾時間佢俾機會佢都冇用。
我差唔多要離開啦，我好希望有人領養呢幾隻貓，尤其我攬住嘅呢三隻，好乖好純，三隻都兩歲左右，已絕育。同時亦希望有人推介啲工作黎做下thanks
浪浪嘅點點滴滴：
IG：homelesscatsandkitties