查看完整版本 : [靈異] [愛情] [毒L敦倫外傳]我屋企養左隻女鬼…

霸氣文哥 2022-3-5 14:49

第十七章:自作多情


說罷阿盈一臉疑惑咁望住我。


「點解咁講…?」


「其實當年你唔見左張500蚊,放lunch嗰陣我係見到隔離班有個女仔企係你個位隔離鬼鬼祟祟拉開你書包條拉鏈…」


「但嗰陣我以為冇乜野加上阿誠又拉住我出去食野,所以我冇為意就行走左,到返到黎上堂見你好緊張咁搵緊啲野先知你好似發生左啲野,最後問起先知你唔見左張500蚊俾人偷左錢…」


「我因為呢件事一直好內疚,就好似間接做左幫兇咁,我覺得自己害左你好仆街,見住你俾人偷野但我就眼白白望住你啲野俾人偷…」


「點解你到依家先同我講…?佢係邊個?」


說罷阿盈覺得好愕然咁望住我。


「因為我當時想保護你,我知道偷得你啲錢嘅嗰啲人一定唔係啲咩好人,我驚我同你講左你會即刻問人攞返,然後你可能就會俾佢地bully,我唔想你去得罪佢地嗰個人。」


「你知你以前都試過俾人偷左啲野就即刻搵人算帳,最後就俾佢地針對俾佢地玩,同阿sir講都係嘥氣,最後件事都係不了了之,你亦拎唔返你樣野。」


「所以我呃左你、冇將個事實講出黎,搞到你難過左咁耐,冇諗過嗰500蚊對你咁重要,我覺得我對你唔住我有罪,所以我先自己俾左張500蚊你唔洗還,當彌補我嘅過錯。」


「但原來唔得,我一直瞞住,心入面就一直收埋呢件事,一日唔講出黎我個心都會唔舒服,罪惡感就一直存在。」


「至於嗰個女仔我唔識,我同佢唔熟,平時亦冇聽過佢個名,只係知佢戴眼鏡。」





沉默一陣之後阿盈眼有淚光咁望住我。


「即係直到嗰陣你對我咁好都係連一啲好感都冇…?」


「都…都有好感嘅,但我嘅好感源於一直都當你係同路人、當你係...阿妹咁去對待同幫你咋...我以為你都會當我係朋友、阿哥咁所以先對我打開心窗…我冇諗過原來你一早鐘意左我…對唔住…」


講到呢度我開始有啲疾,冇諗過佢個重點竟然唔係放係有人偷左佢野,而係放係我有冇鐘意佢。


「哈,原來一直都係我一廂情願,我仲以為你一直對我咁好你點都會有啲鐘意我,等我仲每次你對我好都好開心,你借錢俾我嗰刻發覺我真係深深咁愛上左你,我個腦嗰陣一片空白,最後我控制唔到自己攬住左你。」


「唔好咁啦…雖然我當你係阿妹咁照顧,但係你攬我嗰刻我唔知點解都有心跳加速左一下。」


「假架!你唔洗係度𠱁我啦,你根本就冇鐘意過我。」


睇黎阿盈對呢件事真係好失望,佢應該冇預我一直以黎都只係當佢阿妹咁照顧。


「你知唔知我由細到大都只會對我十分信任嘅人先會打開心窗同佢傾訴,我見到每次同你傾你都會耐心咁聽,有咩事你都會鼓勵同安慰我,我同你講得越多野你就對我越好。」


「我以為你係因為睇到我有改善而對我更好,以為你會更加鐘意我,到頭來你原來根本冇鐘意過我,更徨論有愛…」


我自認我份人係唔多識𠱁人,呢一刻嘅阿盈已經喊到滿臉淚水,但我竟然唔知應該講啲咩去𠱁返佢。


「對唔住…我應該一早就同你講清楚我只係當你係阿妹咁照顧。」


「但你之前表白嗰陣唔係話就算我答覆係接受定唔接受都唔重要咩…」


我突然記起佢同我表白嗰陣對我講過嘅野。


「講係咁講,但當知道你一直都冇鐘意過我之後,種感覺原來係咁難受,原來一直以黎都係我一廂情願、一直以黎都係我諗多左,我以為我釋懷左,但到真係經歷先知原來我真係控制唔到呢股情緒湧上黎。」


「對唔住…本來諗住做返多啲野去彌補你,點知我又再傷害左你多一次。」


以前睇住佢俾人偷野乜都冇理已經hurt左佢一次,估唔到依家又再hurt多佢一次…就好似越幫越忙咁。


「你唔洗道歉,你冇錯,係我咩都冇問過估估下就一口咬定你都鐘意我姐、係我一廂情願、係我太早對你投入感情,依家知道左個事實都好啊,唔洗俾我咁遲先受死、先將我由天堂掉返落地面。」


睇得出阿盈係故作堅定咁想令自己平復,可能佢想說服自己唔好再為我呢啲咁嘅人嘥心機,呢刻嘅我地就好似出現左裂痕咁。


「至於以前偷我錢嗰啲人,還掂你唔識佢又咩線索都冇就算啦,就當你嗰陣已經彌補左俾我。」


「不過其實嗰陣你就算冇幫我都應該的,你冇呢個義務幫我,又唔係應份,都係我自己嘅事,以前我都係靠自己捱過,所以你唔洗咁內疚。」


「加上我依家咩都唔想理,我想靜下。」


「唔係架,雖然我冇好似情侶咁鐘意上你,但我幫你真係一直當你阿妹咁幫,我每次幫你都係出於真心,我唔想見到你俾人恰而咩都唔做,每一次見到我可以幫到你之後你會心一笑我都會開心。」


「我自己同你都係邊緣人,我同你係班都係比較特別的,我明白俾人冷落同排斥有咩感受,我覺得我地可以做個朋友,大家有個照應總好過一個人獨自面對。」


「我想我地就算身處係邊緣都能夠係另一個邊緣搵到知心,結果真係搵到個同自己差唔多嘅人,係好難得架,正因為咁所以我先當左你係阿妹咁無條件幫你…」


「你俾我之後都繼續係你身邊幫你好唔好?雖然我都知依家我幫唔到你啲乜…但當我呢個做阿哥嘅可以繼續陪住你、照顧你好唔好?」


呢個時候我都開始眼濕濕,但我呢份人就係咁,淨係識得解釋但一啲𠱁嘅說話都唔識,都唔知以前自己係點溝女。


「我唔知,我依家淨係想靜下…好多謝你以前幫過我咁多、多謝你咁耐心聽我講野,我感受到你對我嘅好,只係我自作多情左飛左個心去你度,係我錯,你唔洗理我,我自己攞黎受嘅苦會好返架啦。」


呢個時候嘅阿盈強忍住淚水,但終究係控制唔住流左出黎,睇黎呢個傷害對佢真係好大。


「對唔住…我一心想幫你反而係我hurt得你最深,係我一早冇講明白先令你依家咁難受,係我俾左假希望你,但你可唔可以再俾個機會我去彌補、去繼續當你阿妹咁陪住你?」


佢冇出聲,但個眼神就避開左我望向側邊一直忍唔住地流眼淚,我好內疚,但另一方面都唔想佢同我絕交離開我,好矛盾。


「阿盈…」


[b]噗![/b]


我伸手試嘗想掂下佢塊臉時,


突然我俾一股力彈開左向後跌左落地,就好似佢身體周圍開左個見唔到嘅保護罩一樣,未掂到佢塊臉就彈開左,我反應都未黎得切。


「你唔好理我,我淨係想靜下!」


佢好惡且帶有少少怒氣咁對住我講,說罷佢好快就消失係我眼前。

霸氣文哥 2022-3-6 14:38

第十八章:追憶


「阿盈!唔好走…」


我企返起身諗住抓住佢,可惜乜都掂唔到,掂到嘅只有一堆冰冷嘅空氣,而呢刻我再繼續叫佢唔好走已經遲,佢已經唔係度,浴室變返一片寧靜、呢間屋又再重新變返得我一個。


「都怪我…做咩要咁衝動講左出黎、仲要咩都認晒,如果我將呢啲收埋一世咪邊個都唔會知,好似依家咁搞到佢咁難受仲要走埋為乜…都唔知仲會唔會可以見得返佢…」


可能呢啲就係一言既出,駟馬難追,講出黎嘅野就好似潑出去嘅水,之後就咩結果都有唔再收得返你講過嘅野,而今次呢個結果就係我冇估到嘅結果,竟然將個重點放左係我度…


「阿盈,你啱先仲話以前嘅你已經死左,唔會再喊,因為你已經解脫冇人再恰你,點知最後都為我呢個衰人而再喊返。」


「以為死後你黎到我身邊唔會再俾人hurt,點知hurt得你最深嘅偏偏係我,要你解脫後重新跌返落深淵,我真係對你唔住…其實我先係最壞嘅一個人。」


依家成個空間都只剩低我一個人係度自言自語懺悔。


過左一陣我慢慢開門步出浴室,我第一眼就望向櫃入面個公仔,佢移動左變成背向咁對佢我,估計阿盈真係想靜下唔想見到我。


「阿盈對唔住,係我搞到你咁難過…但你可唔可以唔好走,我當得你妹我以後都會當你妹咁照顧你,我唔會因為你係鬼而嫌棄你,可唔可以俾多次機會我去彌補返你,究竟我做乜野你先會原諒我…」


說罷周圍一片寂靜,冇任何回應,公仔依然背向住我。


呢刻嘅我就好似情侶之間我做左啲對佢唔住嘅事墾求對方原諒咁,事後鋪鑊,想留住對方唔想佢走。


「由細到大屋企淨係得我一粒仔,唔知我妹控定點,我一直都想有個妹俾我照顧下,佢有困難我幫佢解決、佢受傷害我保護佢、佢難過我安慰佢,可惜呢啲一直都只係可以ff。」


「直至遇到你,遇到同我一樣嘅同路人,而你亦肯慢慢接受我,然後我慢慢當左你係阿妹咁照顧,所以你死後到你出現返俾我地撞返真係好難得,我唔想你走、我唔想見以後都見你唔到。」


我講完呢一大堆野,公仔依然冇任何反應,今次真係鬼都怕左我,莫非呢啲就係神憎鬼厭?
.
.
.
好快過左兩日,呢日瞓醒一如既往嘅平靜,雀仔聲都冇粒,但我冇再夢見阿盈,甚至唔多記得呢兩晚夢見啲咩,可能我連夢都冇發一個都唔定,


而呢兩晚沖涼熄左盞燈對住塊鏡佢都冇出現,燈亦都冇眨,好正常咁咩動靜都冇,直到我上床瞓嗰刻亦然,公仔仲係背向住我郁都冇郁過,


熄晒燈準備入睡時亦都冇再好似初初入住嗰陣咁聽到出面有聲,感覺阿盈真係消失左唔再存在…


「阿盈呀,你仲嬲緊我仲未平復到啊?你係瞓左教定點啊?你唔會之後都唔再出返黎掛…你知唔知呢兩日冇左你係度我好唔習慣,你冇再好似之前咁入我夢、出現同我傾計。」


「你仲記唔記得啊,你中五嗰年先轉班過左黎我嗰班,嗰陣你俾阿sir調位一調就調左去角落頭,可能阿sir都覺得你似邊緣啲人,或者你都會覺得滿意。」


「之後就見你成日唔出聲,鐘意自己做自己野,亦唔同人傾計,嗰陣我就算掉紙仔俾你同向你打眼色你都唔理我。」


「之後啲人見你覺得奇疤就開始想過黎撩下你,見你都係唔多出聲就覺得你好恰,之後就開始整你,變相除左我之外依家有多一個對象俾佢地玩。」


「就係咁變左男仔負責玩我,女仔就負責玩你,所以我先覺得我地係同路人,相信大家都會明白大家,但你嗰陣應該仲未點留意我。」


「之後仲有一次成班係度抄功課因為黎緊嗰堂要交,大家好似影印機咁係咁copy,抄完自己嗰份借俾人抄,有啲直頭一個位有6-7個人圍住抄,當然我都唔例外,我會搵阿誠借俾我抄。」


「唯獨是你默默地一個係位度自己做,我見到你諗好耐先做得一題同見你諗得好辛苦咁就借俾你抄,但你搖頭示意唔要,堅決要靠自己做唔洗人幫。」


「所以我都冇理咁多啦,嗰陣見到你就覺得你好有骨氣,邊似得我地呢班凡夫俗子咁,為左交到貨見人抄就個個都抄。」


「但可惜呢個世界就係咁殘酷,最後你做唔晒交唔齊功課,而我地個個都交齊晒,之後你就要留堂兼抓你去低form班房當住咁多低form生面前做齊晒佢,真係聽見都覺得好柒,咩面都冇晒,士可殺不可辱,但佢就辱到你變地底泥…」


事關嗰陣低form臨近考試學校搞左啲補課班,所以佢地放學都要留多一個鐘自修先俾走。


「再之後有人搞你我就慢慢開始過黎幫你,因為我都睇唔過眼,我亦都正式當左你係同路人、當左你係阿妹咁照顧你,諗返起我真係好想你仲在生,好想再好似以前咁同你一齊放學…」


呢日我講左好多以前中學嘅野,希望佢會聽到記返起我以前點樣識佢、點解同佢慢慢熟,希望佢會覺得思念而出返黎,


但暫時黎講,我就算講完一大堆野,屋企都仲係一片寂靜,冇任何回應,公仔依然冇郁過,就好似得我一個人係度自言自語係度追憶。

霸氣文哥 2022-3-7 13:51

第十九章:不速之客 (上)


之後幾日我都試過好多方法嘗試叫返佢出黎,我試過同佢講搞笑野、講回憶、講感性野、講每日嘅生活、講佢對我黎講嘅重要性、扮返生前咁安慰佢、仲有道歉等等,但都冇用。


呢晚我照樣熄晒燈上床瞓教,瞓之前望一望個公仔,可能你地會問我點解唔拎佢出黎攬住個公仔,因為我唔想打擾佢,佢話想靜可能都唔想有人搞個公仔,可能個公仔同佢有連繫,唔想人去郁佢,


而我唔想佢再難受,我已經傷害過佢兩次,唔敢再行差踏錯,所以我寧願遠觀而不可褻玩焉唔去郁佢。


我望住個公仔,佢依然背向住我,屋企一啲動靜都冇,靜到一粒聲都冇,即係依然仲有股氣場包覆隔絕左出面大部分嘅聲,咁係咪代表阿盈其實仲存在係呢間屋未走嘅象徵?


呢一刻我身體已經傳來倦意,我將大腦放空、雙眼亦漸漸變得沉重,正當我合埋眼之時…


叮咚!


突然一下鐘聲將我從通往睡夢半路中喚醒,係半夜呢個咁靜嘅環境聽到鐘聲係十分之應聲,更何況我屋企隔絕左出面啲聲係更靜,好微細嘅聲音都會聽到。


然後我開左眼但冇起身想再聽清楚,跟住等左10幾秒鐘都冇再響,我心諗邊個㩒鐘?係咪我發夢咋。


我見之後都冇再聽到有人㩒門鐘所以想再瞓返,但正當我想合眼埋瞓,鐘聲又再響起…


叮咚!


今次我真係聽得好清楚,的確有人係出面㩒鐘,因為門鐘係裝係屋入面,所以鐘聲係唔會被隔絕,所以一響係會同平時聽到嘅一樣咁響,


呢個時候我心諗究竟係咪阿盈已經出返黎…始終已經好幾日都冇動靜過。


我落床開燈行出廳慢慢行近門口,慢慢一步…兩步…


叮咚!


直至行到第五步、只係距離道門一個身位嘅時候,門鐘又再次響起,呢次嘅鐘聲令我嚇左一嚇,因為我係正門鐘下面,我地個鐘又特別大聲,所以當膛嚇到彈左彈起身。


「阿盈,究竟係咪你…?」


我細細聲地對住門口講。


然後我再踏前一步望一望個魚眼,發現有個女仔係出面,我未見過佢,唔識佢,我齋咁望佢上身,得出一個結論:原來係個mk妹,等我仲以為阿盈出返黎,我頓時感到有一絲失望。


因為出面仲有道鐵閘遮住,所以我望唔到佢下身淨係望到上身,見到佢雖然有一把黑色嘅頭髮但就釘左兩粒耳窿係隻耳仔、蓄齊陰、著住件黑色T-shirt、


個樣都幾標緻但就閪晒口面咁望住我門口,我真係黑人問號,我諗應該都唔會有啲咩好事發生…


然後我帶住一臉疑惑緩緩打開道門,


「小姐,你搵邊個架?做咩半夜三更係咁㩒我門鐘?」


雖然我都預左唔會咩好事發生,但例牌都要問一問佢先。


「喂阿生就係你啦下話,你間屋做乜撚野啊,成撚晚係度嘈閪住晒係度喊喊喊喊乜撚啊,嘈到我幾晚都瞓唔撚到教,都已經唔係第一晚,已經幾晚都係咁架啦屌你老味,我真係忍夠你,大佬你唔瞓人地都要瞓架撚屌。」


「仲要我係咁拍極門都冇人應,我仲以為又死撚左件係度啊,好彩我㩒門鐘都仲有人應門,我差啲報警架啦。」


哇,mk妹果然語出驚人,佢把聲十分響量,一開口就下下直入中路直接屌鳩人,把聲幾高音有啲似何雁詩,係粗暴版嘅何雁詩,然而把聲就令成個走廊都聽到晒,其實你咁樣咪仲擾人,但我就好柒,


加上一黎就講重點一啲修飾都冇,把嘴仲要毒毒地,佢依家個狀態仲要係極度憤怒咁款。


但我真係聽唔到有人拍門,一定係入面隔絕左啲聲所以先聽唔到出面拍門,同埋我好多黑人問號好無辜,我嘈?我間屋邊忽嘈,我準備瞓教啦喎,仲要靜到一個點咁一啲聲都冇,點會嘈,更何來喊聲?都冇人喊。


「下…我屋企得我一個咋喎,我自己都準備瞓覺,一啲聲都冇發出,同埋我都冇喊,邊度嘈?唔好屈我喎。」


「屌你老味你自己伸個龜頭出黎聽下,屈你?我得鳩閒屈你咩撚屌。」


「冷靜啲先小姐,我依家出黎聽下。」


然後我慢慢打鐵閘,佢嘅全身亦隨即展現係我眼前,佢下半身著住條超短排球褲、踢住對厚底拖鞋,好似驚死唔夠高咁,佢手腕上啲個位仲紋左個圖案,果然係典型嘅mk妹,香港嘅mk妹仲未絕晒種!


「望撚夠未啊,未見過靚女呀?出黎啦。」


我只係向下好快掃左佢一眼未黎得切反應,但就已經俾佢屈我昅佢,挑!我洗昅你?我只係好奇望一眼你咋,出面有幾多女索過你啦。


「得得得!幫緊你。」


我出到去之後,我的確聽到屋入面有人不斷係度啜泣,把聲唔算好大,但就斷斷續續咁傳出,而每次傳出黎把聲都充斥著整個走廊,不斷係個走廊度回盪,我覺得好奇怪,


莫非呢啲喊聲都係阿盈發出嘅?點解出面聽到有聲但係屋企就聽唔到?雖然一堆疑惑未解決我又帶住另一堆疑惑,但屋企除左我就只得阿盈係度,所以我都幾肯定呢啲喊聲就係佢發出。


「聽到未呀撚屌。」

[[i] 本帖最後由 霸氣文哥 於 2022-3-7 01:54 PM 編輯 [/i]]

霸氣文哥 2022-3-8 13:18

第二十章:不速之客 (下)


我又再次俾個mk妹喝我一聲。


「聽到啦,可…可能係我開左個收音機唔記得熄返姐,佢呢排又壞壞地成日會不停係咁loop,我入去搞搞佢啦,嘈到你唔好意思。」


我隨即鳩咁諗左個藉口答佢,雖然個藉口鳩鳩地,但都希望佢信啦。同埋我都要認低威,同佢嘈落去都冇意思,始終啲聲真係我屋企傳出,我唯有認左佢,冇理由話係有隻鬼係度喊。


「真係話你on9驚你嬲,三更半夜開個收音機開到咁撚大聲做乜鳩,係都開細聲啲啦嘈鳩住晒,係壞嘅好心你快啲搞返好佢啦。」


條mk妹屌還屌,仲噴到我成面都係口水,個個都話靚女啲水係聖水係香嘅,


佢雖然個樣都唔差,但我唔見得佢啲口水香得去邊,反而彈到我鼻孔下面仲聞到陣煙味夾雜口水味嘅臭味。


「係嘅係嘅,我會盡快整好佢,唔好意思,咁冇乜事我返返入去先。」


我心入面鬆返口氣,終於可以息事寧人。


「喂仲有啊屌你,你搞到成地香爐灰又點計啊,舐返乾淨佢啦,唔洗你做呀?」


正當我鬆一口氣擰轉頭準備入返去時,突然又俾佢叫停左。


是咁的,我前幾日醒起阿盈之前叫我可以裝下香俾佢,而我亦都聽講人死左係應該有個香爐俾人拜祭,以表達對先人嘅一個尊重同敬意,


所以我出去買左個香爐擺係門口間唔中裝下香,希望佢會見到我份敬意同有照佢意思做而出返黎。


啱啱出黎我都冇留意地下側邊,淨係掛住望條mk妹,我隨即望一望地下,的確吹到成地都係香爐灰,但個香爐就冇反到,上面仲插住3枝燃點緊嘅香,


究竟頭先搞咩黎,點解香爐會反過黎?又點解香爐會插住3枝香?我明明都冇出過去,依家唯一搞呢啲野出黎嘅就係呢條mk妹,


自己嬲得濟搞到成地灰想作多我一鑊屌鳩我但又扮好心裝返3枝香上去,一定係咁除非唔係。


「地下啲灰唔係我整架喎。」


「個香爐係你條撚樣架喎,唔係你整仲有邊個啊,就算真係唔係你整嘅你應該都要舐返乾淨佢啦下話,其實有心整到成地都係你咪認撚左佢囉。」


「啲灰我當然會自己清潔返,但會唔會係有啲人嬲得濟特登將我香爐啲灰整到成地都係想嫁禍俾我咋。」


「屌你啦,我閪得閒嫁禍俾你條撚樣咩,我行過黎嗰陣已經見你門口隔離成地都係灰,只係我想屌你嘈撚住晒呢樣野先咋。」


「咁你又插3枝香落去,你咁樣做仲唔係想彌補你嘅過錯?」


「我彌你老味啦,我唔裝香架on9,我點鳩知你啲香係邊個裝落去,你咁有想像力去做作家啦撚樣。」


如果真係唔係佢裝香,咁啲香仲有邊個過黎裝?


「睇黎依家啲人真係好想快啲去死,明知係凶宅仲住入去,都唔知你條撚樣係咪已經俾鬼纏身,裝晒香咁。」


「可能依家已經有嗰啲野係度呢,可能啱先啲聲都係隻鬼整出黎。」


我唔想同呢啲mk妹嘈,同呢啲mk拗係冇結果、冇意思,所以我想用屋企有鬼呢招試下嚇走佢。


「呵,好好笑,老娘唔信鬼架,想撚鳩我下世啦,自己做左唔認仲想賴隻鬼,你對唔對得住自己啊,鬼唔望你快啲落去報到。」


屌,最後係嚇佢唔到,但佢把嘴真係好撚毒,我已經硬晒...個拳頭。


「咁你又話唔知我係咪已經俾鬼纏身,唔好自打嘴巴啦小姐。」


「我鐘意講啊你吹咩,我見個撚個都咁講我咪都講返出黎囉,唔代表我就係信有鬼架喎柒頭。」


咁都俾佢駁到,明明就信呢啲野。


「你不如快啲搞返掂你個收音機同舐返乾淨地下啲灰先啦,咪撚再咁多嘰趷又賴呢個又賴嗰個啦,係你做就搞撚返掂佢,你仲係咪男人黎架。」


然後我只係點左點頭我就轉身行返入屋,我連口水都費事嘥,咁咪唔會多嘰趷。


「喂你去邊度撚樣?」


佢應該見我入返屋係想逃避責任啪個屎忽走人所以叫停我。


「攞掃把啊!」


我入左廚房大叫出黎。


「屌你搞好你部收音機先啦,嘈鳩住晒,晚晚喊唔洗瞓咩。」


「掃一掃洗好耐咩,費事等陣印到周圍都係又話我冇及時掃啦。」
.
.
.
呢一晚深夜就係咁過左去,係糊裡糊塗嘅情況下俾人屌餐懵,我屋企隔離有呢啲閪鄰居真係慘,


而呢一晚亦產生左好多疑問同怪事,香爐灰吹遍地、裝香、屋企有喊聲出面聽到但屋內聽唔到,如果排除係條mk妹搞嘅,咁究竟呢一切係點解?係邊個做?

霸氣文哥 2022-3-9 13:49

第二十一章:與老朋友的聚舊 (上)


一道光線照躍住我對眼,我慢慢張開雙眼,原來依家已經晏晝,話咁快又瞓左7-8個鐘。


琴晚出現左一段小插曲俾條mk妹屌完掃完出面啲灰之後我就返返去瞓,


奇怪嘅係返返入屋之後我一啲聲都冇再聽到,變返靜蠅蠅嘅屋企,係走廊聽到斷斷續續嘅喊聲都一概冇晒,


直到我再次入睡前都冇再聽到有任何動靜,就好似乜野都冇發生過咁,我就算對住空氣問阿盈係咪佢喊,都係咩回應都冇,公仔依然背住我。


呢日我起身行近公仔,佢依然係咁,郁都冇郁過,佢已經差唔多成個禮拜都維持住咁嘅樣,


我已經冇見阿盈成個禮拜咁濟…連夢境入面都冇再出現過,係咪以後阿盈都唔會再理我再出黎見我…?


「阿盈,我知琴晚啲喊聲係你發出黎…」


「對唔住,我搞到你咁難過、搞到你過左咁多日都未放得低。」


「我真係好想再見到你,我究竟點樣做你先會出返黎,我可以點樣彌補你?」


「你講俾我知啦,只要你肯出返黎,我做啲乜都得架,我真係好掛住你…」


我一諗起咁多日都冇再見過阿盈,我心入面慢慢覺得心up、情緒變得有少許激動。


突然我手機響起,我打開手機,我收到一條msg,原來係阿誠wts我。


「洋腸方,你呢幾日冇晒音訊咁嘅?係咪有咩事?」


阿誠竟然會問候我,少有,可能係我呢段時間都冇上啲社交平台又少左上wts而佢咁啱見到所以問下我。


「冇啊,我呢排hurt左個人令佢走左唔再見我咋嘛,我頹左成個禮拜咁濟。」


咁耐以黎都係,就算我遇到咩困難,人地問到我發生咩事我都會扮堅強咁同人地講冇事,但之後就會講自己好難受,所以我呢份假堅強係好易俾人睇穿。


「仲扮冇野,咁即係失戀啦,唔怪得你咁多日都失左蹤咁。」


「失戀傷心正常嘅,今晚我地去老蘭玩下啤一啤啦,你啲唔開心好快冇晒。」


我正想解釋唔係失戀之時,阿誠已經覆我約我去老蘭,我都係收返埋唔解釋住,我估應該都冇人信我同隻鬼咁close,仲要係中學同學阿盈。


「都好嘅,今晚幾點?」


「7點?我地觀塘食埋個飯去。」


「Ok。」


就係咁我應承左阿誠今晚一齊去老蘭,都好嘅,還掂我都頹左成個禮拜咁濟都想去外面玩下,同埋都好耐冇見佢同佢去玩,咪當聚一聚添。


我梳洗過後食左啲野又同公仔自言自語傾左陣計眨下眼就到傍晚、太陽開始落山,我亦換好衫準備出門。


「阿盈我今晚約左阿誠去老蘭,我出門先,你唔好再喊啦,你都已經喊左好耐下,希望你聽到我講嘅野啦。」


同阿盈講一聲出門之後我就慢慢踏出左門口。
.
.
.
「喂洋腸方,好耐冇見。」


然後好快我落到左觀塘某間餐廳度同佢會合。


「好耐冇見,阿誠。」


「冇見咁耐瘦左喎,係咪成日打飛機虛耗過度呀,我都想瘦但點減都減唔到。」


是咁的,阿誠係個肥仔,所以見人減到肥佢都好葡萄人地減到肥,但佢自己又係咁食,都幾矛盾。


我醒起之前阿盈同我講過佢會吸我陽氣,可能就係因為咁令我身體產生左個微妙嘅變化瘦左少少。


「都係咁啦,但我有一排冇打J,邊似得你以前咁晚晚都要黎返發,只係我近排發生左啲野姐。」


「呢排少左啦,已經打到見有啲悶,黎黎去去都淨係對住條片打好冇癮。」


「係喎,你話近排發生左啲野,唔記得最近你失左戀添,仲邊有心情打J。」


「你誤會…」


「唔講咁多住,叫野食先。」


正當我想解釋嗰陣突然俾佢打斷左,佢份人就係咁,淨係掛住食。


然後佢點左碟乾炒牛河,哇佢咁肥仲食啲咁油膩嘅野,真係呢一世都好難減到,果然係點解咁撚肥點解咁撚肥~食野求撚其食野求撚其~


佢不如好似出面飲食界個「滔哥」咁做個食神咪仲好,而我就普普通通點左個飯食就算。


「咁肥仲食食食,食撚死你。」


佢已經肥仲食咁油我忍唔住疾佢一句。


「未死得住,我仲有大把世界,哈哈。」


然後佢對我疾佢嘅說話聽完都係一笑置之咁答返我。


「入返正題先啦,你因咩事失戀?」


本來仲笑緊嘅佢,突然佢就認真起黎問我,唔記得講埋,就係佢份人都幾八卦,好鐘意咩都一探究竟。


「我…冇失戀啊,你誤會左,我啱先本來已經想解釋係誤會但就俾你打斷左。」


佢聽到係誤會之後顯得有少少愕然,然後就係度傻笑。


「哦…係咩哈哈…原來一切都係誤會,我仲以為你真係失戀添。」


「咁你又話發生左啲野嘅,係咩事搞到你頹左咁耐?」


「係真係有啲事,但我講出黎你可能會唔信。」


以前中學我好鐘意有咩野都同佢講,原因係佢把口夠密唔會唱通街,同埋佢會信我唔係鳩吹,但今次真係有啲荒謬,佢的確可以選擇唔信。


「得啦,咁耐以黎我有邊次你講嘅野我唔信你。」


「你係先好喎,唔好覺得太荒謬。」


「得啦。」


「事情係咁,我上個月咪搬左黎九龍呢邊住嘅…(下刪一千字)」


然後我開始講起我嘅事跡。

霸氣文哥 2022-3-10 14:20

第二十二章:與老朋友的聚舊 (中)


我由第一日搬黎新屋開始講,之後講一啲靈異事件去到同阿盈相認,再去到原來間新屋係阿盈以前嘅屋企,


再之後去到原來佢鐘意我同我點樣害左佢、點樣hurt佢,以至到之後佢傷心過度收埋左自己到依家都冇再見過佢出黎,所以我先咁頹,我一一講晒出黎。


「原來係咁,咁你同佢都真係幾有緣,估唔到你會搬左去周雪盈以前住嘅地方。」


「你信?」


「我信,我不嬲都信人死左會變成鬼係人間遊走,但我唔係好了解鬼嗰啲野。」


「頂你一早講你信鬼嘅我就唔洗咁驚講出黎冇人信啦。」


「車,你都冇話係講鬼。」


好似又幾啱,我冇野好講。


「你就唔應該啦,嗰陣我見每次你去幫佢佢都對你發晒姣咁,又臉紅又係咁搞自己啲頭髮、又傻笑、講野有時仲要疾下疾下咁就知道佢鐘意你啦,你感覺唔到架咩?你要知道佢係識左你先對你咁多互動咋。」


以前我同阿盈啲一舉一動原來佢留意得咁清楚。


「唉,嗰陣我淨係當左佢係阿妹,以為佢都當左我係阿哥咁、而呢啲行為都係出於當我係阿哥所以先會咁,冇諗過自己會咁易受人鐘意…」


「所以你咪好似收左人兵咁囉,男女之間點會有純友誼,人地臉都紅晒咁對住你以為你會留意到、以為你都鐘意佢咪變左百分百對你投入左,點知最後發現你對佢原來乜野意思都冇就緊係崩潰啦,你俾太大期望人地。」


「加上你又冇一早講清楚你只係當佢係妹,變左大家都諗錯隔離,你以為佢當你阿哥,佢就以為你都鐘意佢,咁緊係含撚啦。」


「你有女鐘意你都唔好好珍惜,我呢?我想溝都冇女受啊,冇女鐘意我咁撚肥,我好羨慕你有女鐘意你,仲要你係邊緣人,呢個世界公平咩!」


一講起女佢又開始好葡萄好激動,畢竟佢由中學嗰陣已經好渴望拍拖,佢熟讀愛情理論、不斷同自己講如果溝到女會點對佢好,但可惜你的樣子如何,你的日子也必如何…熟讀咁多理論亦只能紙上談兵。


「唉,所以我依家咪覺得內疚,以為一直以黎我都保護佢,點知hurt得最深嘅就係我,依家我都冇得再見到佢。」


「不過我嗰陣都有錯嘅,掛住lunch急急腳拉你走去試間新野,點知就眼白白望住佢啲錢俾人偷左而你咩都幫唔到。」


「你都知你自己有錯呢,如果唔係嗰陣你咁急拉走我,我實去阻止佢,我寧願阻止完俾人bully嘅係我。」


「咁當大家都打和囉,大家都有份做幫兇。」


「不過你都唔係錯晒嘅,始終你真係對佢好又保護佢,佢又當係恩人咁,只係你冇講清楚大家都諗錯隔離。」


「信我啦,既然佢當得你係恩人,佢應該唔會以後都唔再出返黎嘅,你等佢繼續係入面平靜下先啦。」


「唉,唯有係咁諗啦。」


「野食到啦,食野先啦,食完野去老蘭happy下就唔會再咁頹,咁樣先可以正面面對每一日你見唔到佢嘅日子嘛,過左去嘅野就由佢啦,諗咁多都盞令自己辛苦。」


「好,今晚玩盡佢!」


阿誠講得啱,與其令自己日日都活係唔開心嘅氣氛底下,不如出去happy下將唔開心嘅野都忘記再好好過日子、及時行樂,


然後好快我地食完野埋單出發去老蘭。
.
.
.
一步入老蘭,每一間酒吧內激昂嘅音樂傳入我耳內,再加上係條街上面每一個人都好high,有部分人直頭係條街度載歌載舞,所以我嘅心情都隨著氣氛激昂而變得high,


我第一次黎老蘭,平時聽啲人講收工會黎呢度消遣、黎呢啲happy,原來呢度真係咁high。


「洋,我地搵間吧入去啤一啤啦,聽講有啲酒吧仲會有條女跳舞,諗起都爽。」


阿誠一諗到有女又興奮,我地沿住斜路慢慢行上去,沿途見到條條女都著得好索,有啲仲要醉下醉下咁,唔怪得成日都聽到啲女係度俾人執屍啦。


「咁就行啦,呢度周街都係女,睇下你有冇睇中件你啱嘅執走佢啦。」


「我咁柒,邊條女會對我睇得上眼,都係入吧睇下女J下仲好。」


「咁冇用,唔好怯嘛,怯你就輸一世!」


呢刻嘅我地要嗌出黎咁濟先聽到對方講咩,因為周圍真係好嘈。


然後我地繼續向上行見到有間吧入面係有女跳舞我地就決定入呢間吧,我地慢慢步近呢間吧,


行到門口時,有個黑鬼保安截住左我地要check身分證,睇下我地夠秤未,


好彩我地兩個都畢左業一年仲要過左生日啱啱好夠18歲卜卜脆,所以呢一關審查我地輕鬆就通過左。


入到去,強勁嘅disco音樂立即傳入耳內,漆黑嘅環境當中鐳射燈周圍照射,而周圍亦好多人,坐係度飲酒嘅飲酒、跳舞嘅跳舞,當然最引人注目嘅緊係台上跳鋼管舞條女,


佢人靚不突止,仲要著得勁少布好性感,身體貼住條鋼管婀娜多姿,就好似不斷挑逗緊你咁,但因為燈光昏暗問題,我睇唔到佢係鬼妹定本地人,淨係見佢高高瘦瘦染金髮,但直覺佢都係好撚索,所以我下面都不自然咁直左…

霸氣文哥 2022-3-11 12:51

第二十三章:與老朋友的聚舊(下)


「阿洋,你睇下前面條女真係好撚J咁,過去J下佢先啦。」


「好啊,我都覺得幾唔錯,上啦。」


然後我地行入去人群睇左陣條女跳舞,亦都同班人一齊歡呼同跟住音樂high左一陣。


之後我地搵左個位一齊飲酒,我自認自己酒量唔好平時亦好少飲,我屌佢一黎就叫支Vodka 40幾%酒精,想飲撚死我咩。


「哇我屌你一黎就Vodka,我俾人執屍都似啦。」


「出黎玩就要盡慶嘛,醉左就可以忘記一切煩憂、快樂過神仙,你唔係都想咁咩?」


「OK啊,的士錢係咪你俾先。」


「屌你啦,你咁講嘅話,最多我地溝一半茶囉,酒一半茶一半。」


「算你仲有啲人性。」


雖然溝一半茶,但對我黎講濃度一定都仲好高,但都好過齋飲Vodka架啦,出得黎玩就唔好乜野都唔敢試,要盡慶!


「嗱,依家我地玩酒game猜枚,猜輸嗰個飲半杯。」


然後我地就猜起枚上黎,仆街唔猜都由是可,一猜就舖舖都輸咁濟,


本來開頭都好地地,我好興奮係咁罐鳩佢飲酒,到佢飲到Wing wing地嗰陣佢竟然黎個逆襲罐返我轉頭,然後就舖舖都我飲咁濟,果然風水輪流轉。
.
.
.
過左唔知幾耐,我地總共叫左3枝Vodka溝茶飲晒,我倆雙雙都醉晒,周圍都天旋地轉好wing,我地見大家都飲夠就停左酒,然後我地埋單搖住咁行出門口。


「洋腸方你醉啦,我…我都未走…你就話走,哈哈。」


阿誠疾下疾下咁指住我話我醉,開始胡言亂語。


「你就醉,明明係你話…話走先嘅,我抓住條女黎屌都仲得,我點會醉。」


我地大家都開始胡言亂語,雖然我的確好wing,但都唔會認醉,藉此證明我酒量係好過對方,可能呢個就係點解通常啲人飲醉但又堅決話自己冇醉。


「你抓住佢黎屌,我…我抱起佢黎屌仲得,你唔得架啦,算把啦哈哈…」


[b]趴![/b]


正當佢笑緊嗰陣,突然kick一kick佢就向前仆左落地下。


「哈哈傻仔,仆晒街你仲話冇醉?醉就認撚左佢啦,哈哈。」


果然睇人仆街最開心,呢一刻嘅我睇住佢趴左係地下冇野講成個傻仔咁真係笑到見牙唔見眼,


然後我笑下笑下突然覺得好急尿,一定係頭先飲太多酒。


「喂臭誠,我唔理你住我急尿去搵廁所揸個水先,你…你係度等我。」


然後我就先行一步左搖右擺咁行左去前面,但我都擰轉頭再望多次阿誠,見到佢爬左起身向住個坑渠嘔緊。


「哈哈哈傻仔,啱啱唔係好威咩,依家做咩嘔到七彩,哈哈。」


見到阿誠嘔得咁辛苦,我再次按奈不住笑左出黎,好彩我冇佢咁樣衰。


我擰返轉頭繼續行,行左一陣我都搵唔到廁所,只知道周圍天旋地轉,然後我行下行下入左一個好黑嘅地方、嗰度亦比較靜,我望返後面係好多燈光,我慢慢意識到我行左入後巷。


「屌你老味老蘭唔係好多女瞓低俾人執屍架咩,依家一條女都冇嘅?」


以前聽聞老蘭好多人執屍,就連我表姐夫個fd都係呢度執過,以為周街都會有女瞓係度,但依家連條屍嘅影都唔見所以係度胡言亂語屌左下。


咁我見行左入後巷人少少就唔理三七廿一,行埋牆邊痾左先算,因為實在太急就黎瀨。





「屌你老味,舒服晒,谷撚到膀胱都爆。」


然後過左分幾鐘我終於痾完,我成個人舒服晒,我按奈不住內心嗰種舒暢再屌左一聲出黎,係啊,你冇聽錯,我係痾左分幾鐘嘅尿,可想而知我呢篤尿有幾長、我有幾急。


痾完後我就搖下搖下咁行返出去有燈光嘅地方,


當我行到後巷入口差唔多出到去嘅時候,突然一陣寒風吹過,我打左一下冷震,


我向後望左望,咩都冇,只有黑漆漆嘅後巷,我心諗應該係隔離舖頭啲冷氣風黎姐,然後我就冇理繼續行。


好彩老蘭唔算好大,我wing住咁摸左一陣路之後就去返頭先個位,見到阿誠佢攬住枝燈柱,


再行近啲,原來佢攬住枝燈柱瞓著左,做左個「柱男」,仲要流晒口水,我當膛又笑左出黎。


「哈哈,喂柱男,起身屌閪啦,唔好再發春夢。」


我笑住拍左拍佢膊頭叫佢起身,然後佢慢慢打開對眼,迷迷糊糊咁望住我。


「屌你咩去廁所去咁耐,耐到我眼瞓到攬住條女恰著左都唔知。」


「傻仔,你邊度有女,燈柱黎架,哈哈哈…」


見佢咁on9我不斷恥笑佢。


「我屌燈柱黎嘅!?我啱先仲係咁同佢打茄輪。」


佢望一望佢攬住前面嘅野,見到係燈柱之後立即彈開左。


「哈哈on9仔,唔怪得你瞓到流晒口水,你恨女恨到當左條燈柱係你條女啦。」


「屌,我…我啱先真係見到有條女過黎攬住我架,我仲好興奮諗我終於食到女,心諗機不可失就即刻係咁同佢打茄輪,點…點知原來係條燈柱,屌!」


阿誠將佢頭先嘅經歷過晒出黎,然後都學我屌左一聲出黎。


「你嘅春夢黎姐,連登見啦,頭先一定好多人影左你相啦你咁奇芭,哈哈!」


「屌仆街,諗起都覺得柒,快啲飛的返去啦,我唔…唔想再係呢度獻世啦。」


然後我地就慢慢行返落街度截的士返歸,一上到的士大家講完各自嘅地址後就一齊瞓著左,冇錯,佢亦都再瞓過,佢真係好好瞓,


經過咁激昂同開心嘅呢一晚,我嘅煩憂又好似真係已經忘記得一亁二淨。

霸氣文哥 2022-3-12 13:15

第二十四章:紅衣女鬼 


「司機,前面路口放低我得啦。」


阿誠醒左同司機講前面有落,而我仲瞓緊,只係朦朧中聽到佢講野。


「阿…阿洋腸,呢度70蚊我擺低俾你,你醒之後俾埋啦。」


「Ok。」


我合埋眼醒左醒咁答佢一聲Ok。


「走啦拜拜。」


好快我聽到開門同閂門聲,仲同我講左聲拜拜就知佢走左。


而我亦慢慢打開眼,發覺原來仲暈暈地,但已經好左啲冇頭先咁暈。


「司機,我前面斑馬綫落就可以。」


冇幾耐我都到達樓下,我俾過錢之後慢慢打開車門,一落地嗰下有少少企唔穩失平衡,但好彩冇仆街。


部車走左之後,我仔細望下周圍,呢個時候條街已經好冷清冇乜人,因為依家已經深夜,估唔到一玩就玩到咁夜,不過咁樣仲好,唔洗俾咁多人見到我個醜態、我個柒樣。


我過馬路沿住條著住街燈嘅路慢慢行到屋企樓下,到行到屋企樓下後,突然又有一股寒風吹過,令我不禁打左個冷震。


「癡線,冇啦啦做咩又有陣咁凍嘅風過。」


我周圍望左下,人影都冇個,我估應該係附近啲屋企開住冷氣吹左落黎姐,冇野嘅,然後我冇理繼續行返去。


然後我開門入到大堂,個看更已經瞓著左,show都冇show我一下,而我都懶得理佢去㩒𨋢,心諗個個看更都係咁架啦,人地搵食姐。


好快我搭到上去我嗰層,深夜嘅走廊真係好靜,同我間屋有得Fight,以往日頭係走廊係會聽到唔同單位都有唔同嘈吵聲發出,混合埋一齊就好似一場「屋邨交響樂」。


我慢慢行到屋企門前掏出鎖匙開門,呢個時候我第一時間諗起阿盈,唔知阿盈靜完出返黎未呢…?


而當我準備開門咁啱我望向地下個香爐,發覺又插左3支香,究竟係邊個?唔理咁多啦,開門先。


[b]喀啦喀啦~[/b]


我慢慢打開鐵閘,再推開道大門,我又再次踏入呢個「與世隔絕」嘅結界。


入到去,入面一如既往嘅漆黑同寧靜,一啲動靜都冇,睇黎阿盈仲未出返黎,


我隻手係牆邊度遊走搵緊個燈掣,到我搵到燈掣想開燈嘅時候,竟然開唔著…做乜鳩,盞燈壞鳩左?


而我仲暈暈地,入到去淨係閂左鐵閘但道大門就唔記得閂,不過都好,開住道門有光照入黎可以睇到少少入面嘅環境。


因為有少少光照住所以我冇理照行入去,


突然後面傳來疑似有支鐵叉跌落地下嘅聲音,係廚房傳出黎,聲音傳出期間身後連帶著一陣寒風吹過黎,我再次打左個冷震,覺得奇怪之時我好自然地向後望睇下咩事,


正當我向後一望,野都未睇到反應都未黎得切突然我就俾人用兩隻手捏住條頸,隻手好冰冷,而且力度都唔細,我頓時感到呼吸困難。


「救…命…」


因為捏得好大力,我好辛苦先講到兩個字出黎。


當我反應過黎嘅時候,呢個時候我先識得驚,而我終於見到前面嗰個係咩人黎,應該稱唔上係人,


透過門口照入黎嘅光線,我見到佢著住件深紅衣連身裙,身體露肉嘅地方一啲血色都冇,猶如一具屍體企係面前,留著一把長髮,而長髮亦遮蓋左個樣,見唔到樣、見唔到任何表情,亦冇發出半句聲響。


「你…係邊個…救命…」


我隻手自自然地都抓住佢隻手想整甩佢,但一啲用都冇,佢隻手猶如機械手般捏得牢固、一動不動,反而佢力度仲不斷加大,我越掙扎佢就抓得越大力。


我嘗試踢佢,但我踢到嘅只係佢條裙,掂唔到佢身體同對腳,我用眼角向下望左一望,更加令我驚嚇嘅情境出現,我見唔到佢對腳,佢係飄起身,咁即係證明一樣野——佢唔係人……


我記得之前阿盈唔認得我嗰陣都一直捏住我條頸,捏到我就黎死嗰陣叫一聲佢個名就冇事,依家我係咪都叫一聲就會冇事?其實佢係咪阿盈黎?可能只係佢再次唔認得我?但佢唔係著白色衫喎…唔理咁多,還掂嗰陣都經歷過一次死亡,我不妨試下。


「阿…盈…」


我好勉強地叫阿盈個名出黎,但顯然一啲效果都冇,冇好似之前咁聽到名就鬆開。


「周…雪…盈…」


我再次勉強地叫阿盈個名,今次叫埋全名,但依然一啲反應都冇,睇黎今次真係死硬…


經過一輪掙扎後,因為身體郁動同講野反而令身體消耗體力以致更需要氧氣、令我呼吸更加困難,可能缺氧嘅關係,我開始冇力再掙扎,只淨低我兩隻手抓住佢冰凍嘅兩隻手,


而周圍望嘅環境亦開始變得暗淡,由彩色嘅世界慢慢變成黑白,唔通我今晚就要死係呢度…?呢個時候我諗返起好多之前嘅經歷,就好似一個走馬燈。


阿盈,我話過之後會照顧你,睇黎我冇呢個機會啦...我真係好掛住中學嗰陣你有咩事我都去幫你、去照顧你,


每次我當你阿妹咁照顧能夠照顧到你我真係好開心,我鐘意見到你笑,我可以令你由一個黑面神變成一個會笑嘅人我覺得好成功,


但之後我亦都因為當你阿妹而冇一早講清楚而hurt得你好深,呢樣野我一直都覺得好內疚,令你之後都唔想再見到我,真係好對唔住,我係個仆街…


或者呢啲都係我應得嘅報應,連個天都想我呢一刻就要死,我唔配做人、更唔配做你恩人,阿盈,我好快落黎陪你架啦,之後我地兩個都可以得到解脫,等我…

霸氣文哥 2022-3-13 13:32

第二十五章:怨恨 


正當我準備要昏迷過去嘅時候,佢對手突然鬆開左,feel到有野係我隔離高速經過,再聽到前面一陣風聲,見到有一個「人」推左佢一下向後,係阿盈,阿盈終於出返黎…


我跌倒左係地下,手摸住喉嚨不斷深呼吸,然後見到紅衣女鬼向後掃開左啲頭髮同阿盈對話,而我終於見到佢嘅蘆山真面目,佢面色比身體更蒼白、有大大黑眼圈,最恐怖係佢有半塊臉皮膚係潰爛,同平時睇啲鬼片差唔多。


「你都係鬼,你做乜幫住條仆街?」


紅衣女鬼撐大雙眼用猙獰嘅眼神望住阿盈吊高把聲講野,聽落好似好大怨恨。


「佢係我嘅人,你唔可以傷害佢!有咩事我黎幫佢頂,唔洗致佢於死地。」


「呢個係我同佢之間嘅事,唔到你理,係佢呢啲賤男人唔尊重我在先,我要殺晒呢啲賤男人。」


「況且你已經死左,你仲有乜野可以幫佢頂,咪嘥氣。」


「總之唔得,我唔會俾你傷害佢。」


「你唔會鐘意左個賤男人掛,你係鬼黎架啦,你已經同佢地冇可能一齊,同埋啲男人淨係鐘意呃女人同傷害佢地,佢地只會大話連篇,為嘅只係想呃閪屌,你俾佢呃左個心走啦。」


「…」


阿盈一時間冇聲出,睇黎係講中左佢嘅境況,就係我一直好似呃住佢以為我愛佢點知原來只係當佢阿妹。


「黎啦,過黎我呢邊,俾我去收拾佢,我地一齊吸收佢嘅陽氣。」


「...唔得!我唔會俾你傷害佢,係,佢係呃過我,但佢一直對我好好,好照顧我,冇蝦過我、冇對我有非份之想,我同佢相處我好舒服,我地好難得再相遇,我要好好珍惜呢段餘下嘅相處時光,佢永遠係我嘅好哥哥、亦都係我嘅恩人!」


「阿盈…」


冇諗過阿盈終於諗通左當我係阿哥,我頓時覺得好感動、眼有淚光。


「你已經係鬼,你唔會唔知規矩,就算你繼續同佢相處,只要一日你未消失,你都會慢慢吸收佢啲陽氣,到時佢都會死,之後你嘅能量就日益增強形成一個優劣之勢,到時你都淨係可以眼白白望住佢死。」


「呢層唔洗你理,我會慢慢抑制自己減慢吸收,再唔係到一發不可收拾地步嘅時候我大不了犧牲自己,總之呢個男人我會保護佢,唔會俾你傷害。」


「好啊,既然敬酒唔飲你係要飲罰酒,我就要打散你,呢個男人我今晚點都要殺死佢,你要知道你只係白衣,怨恨度冇我咁高,你嘅能量都冇我咁強,我可以好快將你打散,你為左呢個男人而犧牲唔值得。」


「咪住先!究竟有咩事唔可以商量而要咁大仇恨一定要殺死佢,佢同你有咩仇口、有咩得罪左你?都要有個原因掛。」


正當紅衣女鬼想郁手嗰陣,阿盈截住左佢,佢應該都知隻野唔易應付,睇下可唔可以和解,我都係依家先知原來鬼著嘅衫係分級數,同埋鬼之間原來可以互相溝通,怪唔之得個個都話紅衣女鬼都係厲鬼。


「你幫住佢嘅仲好意思問?既然你咁想知我就講晒佢啲衰野你知。」


「我癡埋係蓬牆休息緊嗰陣,佢一聲借過都冇就直接痾尿痾左落我個身度。」


「都不突止,痾完仲要冇禮貌咁對我爆粗,我地啲鬼係咁樣俾人侮辱架咩,生前已經受左好大屈辱、好大怨氣…死後點解仲要受到啲人嘅屈辱?」


「最重要係,呢條賤男原來係想順便黎執屍,我死前最大怨恨就係對住嗰啲執屍嘅人,唔係呢啲賤男我唔會死,我嘅人生會好美好,我可以繼續有鐘意嘅人、可以繼續做model,我真係唔想死…」


「就係有呢啲賤男嘅出現先會摧毀左我美好嘅生活,而咁啱今晚呢條賤男就黎辣㷫左我令我怨恨終於要爆出黎,我唯有殺左佢我嘅怨恨先可以去除到!」


「原來係咁…但人誰無過,佢只係細路仔唔識世界先唔小心得罪左你,加上佢飲醉左冇左理智先會咁,有咩唔啱我代佢同你講聲對唔住。」


「同埋佢平時係好人黎,你知我地鬼界平時要避免殺好人,因為我地都要積陰德咁樣可以投胎一戶好人家,你就原諒佢啦。」


阿盈好努力咁嘗試和解,我好自責我自己做乜咁唔尊重靈界,都怪我飲得太多闖出黎嘅禍,依家又要阿盈幫我執手尾,之前都聽人講後巷痾尿要講唔該借借,但我嗰陣淨係飲到死醉爛醉咁乜都冇理,仲要係度亂講野乜都唔記得晒。


「我唔信!佢一定唔係好人、男人冇一個係好!」


「你叫我原諒佢?咁邊個原諒我?我嗰陣只係落蘭桂芳散心飲左幾杯有少少wing,有個男人見我著得少布行路搖下搖下就抓左我入後巷…姦…嗰陣我仲未瞓低架,佢就當我屍咁執…」


「我當時不斷掙扎,但佢已經除左佢條褲姦緊我,而我當時冇佢咁大力氣推開佢,我情急之下開左手機電筒照左照佢個樣,佢即刻好嬲咁將我部機掉爛,可能佢見佢個樣黃左驚我會向差佬報串,所以佢隨地拎左個強水樽扑落我頭度,我半邊面爛左,然後再用塊玻璃碎片將我插死。」


「我變成鬼魂後,呢單野上左新聞,但啲人都只係話抵我死、去得呢啲地方仲要著到咁性感預左俾人執屍之類嘅說話,有人話過係條賤男唔啱咩?我知我一個女仔著得性感仲要係嗰度飲到Wing wing地係唔好,但我又有俾人原諒到咩?啲人都只係覺得我好似臭雞咁款、係我誘惑人在先,到死左之後我嘅錯都只係一直錯落去,冇辦法被世人原諒,係我一次嘅錯累到有呢場姦殺案出現。」


「我生前都係好人黎架,你叫我原諒佢,點解冇人原諒我?呢個世界全部男人都係仆街,我要殺晒你呢班賤男!」

霸氣文哥 2022-3-14 13:51

第二十六章:鬼打鬼


原來佢生前遭遇過一件咁屈辱嘅事,最後仲要俾個強姦犯殺死,難怪佢會對執屍啲人充滿怨恨,


我係多年前的確有略略聽聞過呢件事,但我嗰陣仲細都冇乜點留意細節,淨係知道蘭桂坊有人俾人謀殺,最後個犯俾人抓到判左終身監禁。


「嗯…我都同情你嘅遭遇,我係多年前有聽過呢單新聞,我知你好地地生活突然俾人姦殺左會好大怨恨,但佢已經俾人判左終身架啦、佢已經有應得嘅懲罰,你真係要尋仇的話你大可以去監獄搵佢,而唔係搵我身後個男人。」


「嗰個賤人我當然有時不時去搵佢,我要慢慢折磨到佢死,但我更想嘅係我要全部得罪過我嘅男人都不得好死,佢地全部都唔係好人!」


「我地大家都係女人,我以前都俾人全世界人欺凌、我原本何嘗唔係生活得好地地,唯獨是我身後個男仔竟然肯幫我、會照顧我,到之後我遇返佢,我好似得到一條精神支柱,我嘅怨恨都稍稍降低,覺得有個本身一直對我好嘅人係身邊,一切都變得美好,只係原來一直都淨係當我阿妹…」


「與其你不斷怨恨,不如你都搵返以前對你好嘅人、試下記起有邊啲人,咁樣唔洗再為憎恨男人而辛苦同時你仲可以得到歸屬而開心,你話你以前都有鐘意嘅人,你即管可以用你嘅靈力去記起佢去搵佢。」


「…你唔明!全世界人都唔明!你唔好再係度講廢話,我唔想聽你講經,總之你身後個男人我今日點都要攞佢命!」


紅衣女鬼沉默一陣之後都係冇被說服,反而仲覺得煩,亦宣告談判破裂,睇黎呢場鬼打鬼嘅戰爭都係難以避免。


說罷紅衣女鬼就突然以好快嘅速度略過阿盈向住我飛過黎,而阿盈都唔蠢,佢即刻用佢嘅身驅擋住左佢前進、然後推開左佢,


奇怪嘅係,大家嘅一輪碰撞,佢地所碰撞之處都會化作一股煙,然後再重整返個實體,就好似睇科幻片啲人識粒子重整咁,所以佢地嘅打鬥我只係聽到風聲吹黎吹去。


阿盈推開佢之後以一記直拳正面打向佢個頭度,紅衣鬼個頭化成煙但亦好快係佢拳頭隔離重生抓住佢隻手、另一隻手將佢個頭壓向前方,阿盈隨之化作一股煙瞓係地下重整,亦即係俾佢推左落地下,


女鬼可以抓住阿盈隻手,我覺得佢地鬼同鬼之間碰撞見到同感受到嘅係實體,只有我地人類見嘅先唔係實體而係一股煙。


呢個時候紅衣仲未停手,佢行到阿盈面前不停大大力踩佢個心口,所踩之處不斷分散又重整,我見到佢啲煙就好似能量咁到處飄揚,仿佛能量一直地在流失,而阿盈個表情亦變得痛苦。


踩到咁上下,阿盈好快地一手抓住佢踩緊落黎嘅腳、將佢抬起諗住一下反低佢,紅衣隨之失去平衡向後跌左落地下,


然後阿盈隨即起身上前騎住佢雙手揮拳左右左右咁打向佢塊臉,今次終於輪到紅衣捱打,所打之處都不斷出煙,但佢所釋出嘅煙都較少,


明顯地比阿盈被打嘅時候少,藉此證明雙方實力嘅差距,果然紅衣級數高啲、能量高啲、傷害都強啲。


但好快個形勢就要逆轉,紅衣一手大力推開左阿盈,然後紅衣抓住阿盈起身背脊向後撞左埋牆、左手手臂壓住佢心口唔俾佢郁,右手就不斷大大力向住佢塊臉打,佢隻腳亦時不時大力用膝頭向上頂踢向佢個肚,


雖然我係見唔到佢對腳嘅實體,但我可以好清楚見到佢條裙向上擺動,就好似佢對腳隱形左咁,藉此更加證明我地同鬼睇到嘅野係唔同。


「死八婆!做嫁娘!仲同我對抗?你唔好唔記得你級數低過我你冇可能打贏我!」


呢個時刻阿盈正式冇晒反抗能力,郁唔到俾佢不停地打…就只有阿盈痛苦嘅表情,而神態亦表現得開始冇乜精神,係冇力反抗嘅樣子,每一拳都好大力,所打之處依然分散再重組、煙不斷大量地散發出黎,再係咁落去阿盈啲能量一定會冇晒…


究竟點算好,我可以做啲乜,阿盈膊左條命就係為左保護我唔好俾佢傷害,如果我依家過去幫手盞嘥氣,因為物理傷害應該對佢冇用,


然後我就會即刻俾佢抓住,阿盈咁努力嘅對抗都只會變成白費,到嗰陣阿盈都冇能力再救到我…但我唔再過去幫手阿盈一定會俾佢打到煙銷魂散,依家究竟點算好,我心真係好亂好慌張…

霸氣文哥 2022-3-15 13:24

第二十七章:驅鬼


正當我焦急之時,腦海入面唔知點解突然湧出幾句咒語嘅經文,係一個我會心覺得好勁嘅咒語,


[b]「摩訶般囉…」[/b]


然後我就醒起間房櫃桶深處好似擺左本佛經,專愛黎驅鬼嘅一本佛經,雖然老母話唔信鬼但唔知點解都擺左本佛經係度,我即刻衝入房搵。


我衝到入房,我將每一格櫃桶啲野倒晒出黎,終於係最後一格搵到本野個名叫「大正藏」嘅經書,揭開後我好快搵到以前學過嘅一個咒,亦都係我啱先腦海湧出黎嘅一個咒—— 穢跡金鋼神咒。


然後我打開住嗰一頁衝返出去門口,見到呢一刻嘅阿盈已經就黎瞓低,佢已經唔識得郁、頭微微垂低,只有半邊眼微微張開,身體亦變到半透明狀…


但仍未見紅衣有停手跡象,仍然繼續一拳一拳向阿盈頭個揮去,睇黎佢真係要將阿盈打散佢先肯停手。


我呢一刻好焦急,但我一定要先將內心平靜、將焦急嘅情緒按捺著,咁樣先有效,然後我專注望實同對住紅衣,


我相信我只要專注望住紅衣、心入面亦都淨係諗住佢,目標就只會係佢而唔會波及埋阿盈,因為目前只有前面呢隻鬼對我有傷害性,


經書嘅強大係取自於自己內心嘅想法,內心越清靜同想法越專注,發揮嘅威力就越強,亦都可以控制到只對個別靈體有殺傷力而唔會牽連其他靈體,然後我望住本經書慢慢讀出第一句…


「唵,咈咶啒魯,摩訶般囉…」


當我讀出第一句,已經有陣風係我後面吹上黎,睇黎真係有啲料到,莫非呢啲就係所謂嘅「行路有風」?而紅衣亦都好快注意到我呢個舉止。


明明我只係第一次接觸呢本經書,有啲字好難讀正常人都未必識讀但我唔知點解會識讀晒,同埋唔知點解會覺得以前係學過,明明我一直以黎都冇掂過呢啲野,呢一刻嘅我就好似被喚醒左咁。


「死仆街,夠膽唸咒語對付我!?」


下一秒佢就放開阿盈飛快咁向我撲過黎。


「很那冔,吻汁吻,醯摩尼…」


但當我再唸下一句佢就被我陣風彈開左,就好似我開左個屏障咁。


「微咭微,摩那棲;唵,斫急那,烏深暮…」


「唔好再唸啊!」


我企定定原位冇理繼續對住佢唸,而紅衣好似開始感到好辛苦,佢雙手黯住耳仔、面形扭曲。


「啒魯,吽吽吽,泮泮泮泮泮娑訶…」


「屌你老味你條賤男唔好再唸啊!」


紅衣痛苦到撕叫出黎,雙手抱頭周圍飄移十分痛苦。


「唵,咈咶啒魯,摩訶般囉…」


我唸完一次重新再由頭唸出黎,直至將前面隻紅衣女鬼消滅。


「死仆街,我身為紅衣靈力咁高絕對唔會俾你呢啲下三流招數消滅,由呢刻開始,我遇神殺神,遇佛殺佛!!」


紅衣充滿殺氣好大聲講完呢句之後突然好似發左癲咁,滿身散發著黑氣高速衝過黎,顯然佢黎到我面前1米左右前面嘅位置就俾我個無形嘅屏障擋住停住左,


但佢仲未放棄,見到佢個樣十分痛苦,皮膚一塊塊地甩、頭髮亦都一條條地甩、反晒白眼望住我,風吹得越黎越大,但佢仍然好努力咁想衝破個屏障過黎殺死我,佢黑氣亦都散發得越黎越多,


佢同我咒語嘅力量掙扎得越黎越激烈,突然佢身體竟然緩緩地向前移動左少少,風更加強勁,唔講仲以為打緊8號波,


我開始有少少驚慌,但我絕對唔可以慌,我要繼續穩住陣腳,平靜心靈,然後我唔理前面嘅情境繼續唸咒語,唸完一次又一次不斷地唸。


再過左一陣,佢再緩緩向前移動左少少,之後佢隻手竟然亦可以緩緩伸起,睇得出佢係用盡全力先可以做到呢啲動作,亦即係佢開始可以穿過我個屏障…


佢向住我條頸伸起左隻手,因為佢伸起左隻手,我同佢嘅距離大大縮短左,呢個時候我同佢隻手嘅距離只係得返10cm左右,


我望住佢隻手,由手指去到手臂,佢啲皮膚已經甩晒咁濟,淨返嘅就只係得返啲骨,好恐怖,而佢塊臉有半邊亦只見到頭骨,亦即係佢爛面嗰邊、頭髮稀疏、甩皮甩骨,就好似頭骨上面插住幾條頭髮未甩晒咁…


然後佢隻手打開繼續向我條頸緩慢地推進,


我知俾著正常人一定已經就嚇走左,因為當人遇到危險嗰陣係會有條件反射提醒佢即將遇到危害叫佢快啲走,係自然反應,就好似掂到熱水會唔洗諗即刻縮手咁,但我呢一刻更加唔可以慌,一慌我必死。


9cm…


6cm…


3cm…


1cm…


佢已經就黎掂到我,我喉嚨個位感到一股冰冷從佢變成骨頭啲手指發出,而佢呢刻啲頭髮已經甩晒、頭亦徹徹底底變成一個頭骨冇晒任何皮膚、頭微微打側,佢真係好頑強,睇得出佢對我嘅執念同怨氣真係好大。


「微咭微,摩那…」


[b]啪![/b]

霸氣文哥 2022-3-16 12:58

第二十八章:絕地反擊


一陣之後我突然俾佢好大力抓住左條頸、一時抖唔到氣,我撐大雙眼發出一聲哮喘嘅聲,唸到一半嘅咒亦俾佢打斷左、經書俾我鬆開手跌左落地下,我頓時變得啞口無言、屋內變回一片寂靜。


點…點解會咁,佢竟然衝破左我嘅屏障!?佢咁都死唔去?我唸嘅經竟然殺唔死佢?我明明已經冇慌張,佢竟然都仲可以衝破到…?


睇黎今次真係玩完,但差少少架咋,差少少佢就頂唔住我就可以殺死佢,如果我再捱多一陣就可以…我真係好唔甘心…


但一切已經太遲,我依家俾佢封住左個嘴唸唔到經已經輸左…對唔住阿盈,最後我都白費左你嘅努力,我果然唔值得你幫,我傷害過你太多次,你呢次為左我更加大傷元氣…阿盈你要等我,我好快就會落黎陪你架啦…


可能因為佢捏得太大力,我好快開始缺氧,雙眼開始呈現半合狀態,世界再次由彩色慢慢變成黑白…


「終於抓到你,你條仆街夠膽用咒語對付我?我唔驚!我今晚點都要整死你,你係鬥唔贏我架,哈哈哈…」


「加上你依家冇得講野,經書都冇埋,今晚你注定死係度!」


佢充滿殺氣而且笑得好陰深兼好有自信咁誓言要殺死我,


然後因為我冇再唸經佢另一隻手好輕易就都伸上前抓住我條頸,有兩隻手嘅加持我更辛苦,感覺條頸就黎斷咁。


未幾佢再發功抓住我條頸將我成個人升起左、力度當然都一度再提高,我感覺到窒息之如,我覺得自己好似一個係佢手上嘅公仔,我嘅自然反應嘗試將佢對手整開,但根本一啲用都冇,反而令我體力耗得更快。


「阿洋!唔好瞓、你唔可以死,唸心經…專注前面嘅野默唸,會有用…」


突然我聽到阿盈用一把虛弱嘅聲線同我講野,阿盈,你都唔可以死!諗諗下如果我就咁死左仲有邊個保護你,你實會俾紅衣打散,到時我落到去仲點陪到你…


你講得啱,好彩你提左我,既然我把口講唔到野,我用心唸,咁樣你條紅衣阻止唔到我唸啦掛,相信咁樣都一定會起到作用。


然後我唔知點解唔洗睇住經書都會記得晒所有咒語,就好似以前背得滾瓜爛熟咁,腦內不斷湧現啲咒語出黎。


「死八婆,你咪撚係度多嗲、唔好係度亂講野,唔會有用架…」


紅衣聽到後有啲慌張,就好似俾我識穿左佢嘅弱點咁,我好努力咁撐返開對眼、望住前面個紅衣,心裡開始默唸,


「唵,咈咶啒魯,摩訶般囉…」


唸完第一句,風再次吹起,果然都起到效果,但佢仍死死咁抓住我唔放手。


「啊…我絕對唔會放過你,我今晚一定要你死,係你得罪我先,我要得罪我嘅人通通都去死!」


紅衣苦叫左一聲,佢仍然充滿殺意,身上再次釋出黑氣開啟佢嘅瘋癲mode。


「很那冔,吻汁吻,醯摩尼…」


「微咭微,摩那棲;唵,斫急那,烏深暮…」


「啒魯,吽吽吽,泮泮泮泮泮娑訶…」


我唸完一遍,風力加強左唔少,同頭先開聲唸差唔多,見到紅衣好痛苦,佢連啲骨都開始甩,骨頭一塊塊好似龜裂咁裂開甩走,對手亦鬆開左少少,我可以抖到一絲嘅氣息。


我繼續重複不停地默唸,務求將紅衣消滅,依家大家就好似鬥長命咁,睇下邊個會冧低先,


但似乎紅衣開始頂唔住,唸左大約5-6遍左右,佢已經放開左對手將我掉左落地,我立即深呼吸一口氣同咳左幾聲,就好似重見光明咁、世界變返彩色,成個身舒服晒,如釋重負,


然而我俾佢掉落地嗰下因為背脊落地所以亦都感到一陣痛楚,不過咁樣仲好,呢個係一個俾我反擊嘅好機會,我終於可以開聲唸,相信威力一定比默唸嘅勁,始終有聲勝冇聲,


然後我就強忍住痛坐起身、雙腳交叉、雙手合十成個和尚咁坐住,然後調整呼吸、平靜內心繼續不停地唸,就睇下今晚係邊個殺死邊個。


「唵,咈咶啒魯,摩訶般囉,很那冔,吻汁吻,醯摩尼,微咭微,摩那棲…」


一開聲威力果然比啱先強勁,風力比默唸嘅強,


之後我再唸多3遍左右,佢啲骨頭繼續好似枯葉咁甩走,差唔多甩晒咁濟,佢身體已經變得唔完整、件衫爛晒、雙手淨返兩隻唔完整嘅手指、手臂亦好似一條就黎斷嘅枯枝咁、頭骨就甩淨半邊臉,而且身體變得十分透明,


只見佢好痛苦抱頭不斷哀嗚,就好似虐待緊佢,正常人可能會唔忍心,但我唔可以有一刻心軟,一定要徹底消滅佢唯止。


「點解…點解我咁命苦!生前已經慘、死後都要咁慘,我恨、我恨呢個世界啲男人個個都係仆街,我恨我自己死後化成厲鬼都唔可以殺死一個男人為我自己報仇!」


「點解我地呢啲女人永遠都要俾男人洽?點解啲男人強姦完人可以唔洗受折磨反而仲要俾其他男人話自己抵死?我都係人,點解我唔可以正正常常咁過生活…?」


「點解啊……!」


紅衣一陣撕叫同一堆疑問嘅苦言之後,佢剩餘嘅半邊臉、唔完整嘅雙手同身體都隨著佢最後嘅一聲咆哮而消失於眼前,骨頭全數甩晒就好似變成一堆枯葉吹走晒。

霸氣文哥 2022-3-17 13:02

第二十九章:油盡燈枯


屋內頓時變回一片寧靜,但經歷過呢場鬥爭之後周圍嘅野十分凌亂、雜物散落一遍,


我慢慢停止冇再唸,紅衣冇再出現,我立即鬆一口氣,呢隻厲鬼終於俾我消滅左,呢場鬥爭正式各一段落,然而我第一時間起身衝去阿盈身邊。


「阿盈,你唔好有事…」


我去到佢身邊坐係度抱住佢,我可以掂到佢,但佢身體已經變得半透明,睇黎阿盈好傷、能量都消耗得七七八八。


「阿洋多謝你,最後你又救多我一次,亦都救左你自己。」


阿盈好虛弱冇乜聲氣咁講野。


「唔係…我多謝你先啱,如果唔係你我一早俾佢捏死左,兩次都係你救左我。」


我見住佢咁虛弱,眼睛慢慢濕起身。


「點都好,最後係靠你消滅左佢,得我一個一定唔可以打贏佢。」


「咁你當係我地同心合力打低左佢啦,我地缺少一個都唔會打得贏。」


「你呀,睇少你一陣就去老蘭蒲,仲要帶左隻咁勁嘅野返黎俾我玩。」


「對唔住…都怪我嗰陣飲得太多醉晒亂咁去後巷痾尿就俾佢跟,唔係咁都唔會搞到你咁傷…」


「唔緊要,我冇怪你,唔係咁我今晚都唔會出返黎見你啦,好開心有你呢個阿哥肯咁照顧我。」


「係啊,我都好開心你終於肯認我做呢個阿哥,咁以後由我黎繼續陪住你、照顧你,我返到屋企亦唔洗驚悶,因為有你呢個阿妹陪我…」


我忍唔住不停流下眼淚。


「恐怕我陪唔到你啦之後,我唔得啦,呢場鬥爭之後,我消耗太多能量,佢好勁將我打得好傷,佢每一下都好大力消耗我好多能量,能量冇晒就會如佢所願可以打散我。」


「唔會架…你唔會有事,你依家咪仲有能量,你冇俾佢打散到,唔好亂講野,你唔會有事架…」


「我的確未俾佢打散到,但能量太少我身體都會慢慢消耗,就好似穿左個窿咁,然後我會慢慢消失。」


「唔會架,一定有方法幫到你。」


我抱住阿盈不斷地流下淚水搖頭,我不能夠接受呢個事實,仿佛一定仲有得救、一定唔會就咁就離開我。


「阿洋,之後落黎嘅路又靠你自己啦,要保重,對唔住…恩人,我黎緊嘅路都唔能夠再陪住你,多謝你曾經以至依家都咁呵護我…」


「你唔好再講啦,一定仲有得救架,既然我係你恩人,我要你一直都留係度陪住我,我要你報答返我!」


講係咁講,但究竟我仲可以做啲乜可以救到佢,人受傷左搵醫生,但鬼受傷左可以搵邊個,係冇人幫到…


平時佢地都只係靠吸收人嘅陽氣維生同變得強大,唔係就會長期沉睡…


咪住先,陽氣!?我突然靈機一觸諗到啲野。


「啊…我醒起啲野可以幫到你!」


阿盈聽到後好似知我想點咁皺左一皺眉頭。


「你之前咪話你平時都會吸收陽氣嘅,然後陽氣可以令你強大,只係平時係吸得好慢,依家你漏緊更加唔會正常吸收到。」


「如果…如果我直接輸大量陽氣俾你,令你唔會唔夠能量,你咪可以唔洗再漏氣同生存到,我相信陽氣都可以等於能量架呵?」


「唔好,你唔可以咁!你咁樣等於同自殺差唔多,你好大機會會唔夠陽氣死架。」


「你唔好為左我呢個已死之人犧牲自己,我唔值得你咁做…」


「唔會架,我唔會死,你話過人嘅陽氣好難去到完全冇晒架嘛,點都會淨係少少以供日常生活。」


「你依家個情況又點同,你依家要一次過輸送大量陽氣俾我而唔係慢慢被吸收,你會好大機會見底完全冇晒,到時陽氣冇晒真係會死,你唔好咁做…」


「就算我要死都好,都值得,因為你係我阿妹,話過我要守護住你,依家呢單野係我搞出黎,之前又hurt得你咁深,我點都要做返啲野補救,我唔會要你離開!」


「如果將來你唔再係度,我都唔知仲可以點過日子,得返我一個係度生存已經冇意義。」


「你係我阿妹,我想你以後都係度陪住我,以前成日俾人恰,依家我要俾返啲開心嘅日子俾你。」


「所以就算要死都好,我都唔會俾你消失,大不了死左我都仲可以變成鬼落黎陪你。」


「阿洋…唔可以…你大好青春唔可以就咁就死、絕對唔可以,我就話已經死左,但你仲有家人、有朋友,唔好為左我咁做…」


阿盈聽到後亦不禁流下眼淚,感性方面想繼續陪住我,但理性方面就唔想我咁做要我繼續生存。


「唔好講咁多啦,我決定左要救你就點都要試下,但我可以點樣輸送陽氣俾你?」


「我唔知…」


阿盈打側個頭同我講唔知,明顯係知道扮唔知。


「求下你講俾我知啦,我一定唔可以令你消失…」


「我唔講,我唔想你咁做,你唔可以為左我犧牲自己!」


說罷阿盈身體出現左變化,全身開始冒起煙、身體變得更透明,係越黎越透明,仿佛好似計緊時準備消失。


「阿洋,我油盡燈枯架啦,你以後一定要好好保重,盡快忘記我好好過生活,我地來世再見啦…」


「唔可以啊,唔好離開我!!」


我急急忙忙咁諗方法,突然又俾我記起武俠古裝劇啲情節,好多都係用個嘴黎輸送能量,然後救返個人,


或者我都可以試下,可能呢招work,雖然我唔知對靈界方面用呢招有冇用,但依家乜都要試下!


然後我諗都唔諗就對阿盈嘴貼嘴咁錫左落去…


「阿洋唔好…」

霸氣文哥 2022-3-18 13:14

第三十章:劫後餘生


就係就黎完全消失嘅時候,當我錫左落去,煙就停止左繼續冒,同埋慢慢變得冇咁透明,而我feel到個嘴有一股暖氣不斷向外冒出,相信呢啲就係我嘅陽氣,


但另一方當我貼住阿盈嘴唇,我亦感到一股冰冷,唔通呢啲就係冰火兩重天?雖然話就話一股冰冷,但其實仲好軟滑、好舒服,係一種已經好耐都冇感受過嘅感覺…


我持續維持住呢個姿勢,過左唔知幾耐之後,我感到一陣眩暈、眼前境像慢慢變得模糊,然後眼皮好快支撐不住合埋暈低了……
.
.
.
呢段時間,我係條漆黑嘅隧道入面不停行,入面有好多聲音誘導我行返入去,話你心愛嘅人就係入面,行返入去就可以見到佢,又話向後行先係出口,前面只係一條掘頭路,


但我冇理,因為有另一把溫柔嘅聲係前面傳黎,同我講一定要向前行,向前行先可以見到佢,我認得呢把聲,冇錯呢把聲係阿盈。


行左唔知幾耐,突然見到前方傳來一片光明,我越行越近,我聽到把聲越黎越近之餘,我仲聽到有雀仔聲,


感覺出面係一個歡樂且舒服嘅世界,我出到去一定會見到阿盈,我加快步伐繼續迎住光源行近,直至完全進入光源…


入到去之後周圍一片空白,亦十分燦眼,我…係咪已經進入天堂?


過左一陣之後,我慢慢打開眼,世界慢慢由模糊狀態進入清晰狀態,我第一眼見到自己係張床上瞓住、陽光照住我額頭、出面雀仔吱吱作叫,


仲有嘅就係見到阿盈挨住我心口瞓著左,唔通我暈低嘅呢段時間都係佢陪住我?定其實呢度已經係天堂?


「咳咳!」


但呢度好凍,明明有太陽照住我都唔覺好暖,好似去左冬天,我忍唔住打左個冷震同咳左兩聲。


「阿洋你醒啦?」


「阿盈…你冇事…我估唔到仲可以見到你…」


說罷我又開始眼有淚光。


「傻嘅,我會有咩事,快啲著多件衫先啦。」


阿盈見到我醒左都開始眼濕濕。


「你係我瞓嘅呢段時間一直陪住我?定其實我已經上左天堂?」


「你諗都唔好諗啊,呢度係真架、我同你都係真,呢個係現實世界,你冇死到啊,我亦都俾你拯救左,因為你嘅陽氣我保住左,我地大家都冇事。」


「你係度瞓左兩日啦,好彩你冇掉低我走左…已經特登唔講俾你知點樣輸送陽氣但都俾你知道左,你以後唔好再亂咁試!」


「哈哈咁就好,我呢啲叫大難不死,我嗰陣都係醒起啲武俠片都係咁樣做我咪照做。」


「你仲好講,你知唔知好危險,如果唔係你錫落黎俾陽氣我嗰陣你及時暈左冇再輸送俾我,你真係會冇命,好彩你身體仲留住一絲嘅陽氣吊命。」


「但點解唔報警送我去醫院嘅?」


「送醫院有咩用,你又唔係受傷,佢地醫唔到你,只會話原因不明。」


「都係。」


「話說我呢段時間發左個好奇怪嘅夢,我聽到你把聲引導我出返去一條隧道度。」


「唔係夢,你嗰度係鬼門關,係你個魂魄一直徘徊係嗰個地方、一個處於地府同人間嘅中間點,生同死就係一線之差。」


「所以你會聽到好多聲音叫你向返後行,目的就係想引你落地府,一入左去你就冇得出返黎,正式變成鬼魂。」


「所以我呢兩日都不斷引導你向前行,以最溫柔嘅聲線引導你希望你一直認住我把聲向前行,因為我知你身後嘅聲音好多好雜亂,有啲把聲仲會扮到好似我。」


「但佢地啲聲會不斷變化唔會維持得耐,所以我相信我keep住同一聲線可以引導到你唔行後面。」


「多謝你,我就係一直認住你把聲向前行,係你將我拉返出黎救左我,我可以再見返你真係好,呢個都算係報左恩。」


「呢個恩一世架啦,你以後都係我恩人,你有咩事我都會幫你,再加上你依家係我阿哥,我更加會向你報恩同幫你。」


「唔淨係得你幫我嘅,你有咩困難我都會幫返你,好似以前中學咁互相幫助,雖然除左呢次幫到你唔知之後仲有啲咩可以幫到你。」


「咪就好似今次咁,以後可能你又惹幾隻厲鬼過黎到時你同我咪可以一齊合力收拾佢~」


「我啋過你把口,見過鬼仲唔怕黑咩,我點都唔會再惹呢啲野返黎玩死自己,今次幾經辛苦先收拾到一隻,仲差啲我地都冇命。」


「哈哈,你知就好啦。」


我地傾下傾下終於有返啲笑容。


「話說你點解咁突然會想我做返你阿哥嘅?你之前唔係好大反應接受唔到仲不斷沉睡咩?」


「係架,初初我真係好大打擊接受唔到你只係當我阿妹,但慢慢我係入面諗通左,一段感情冇得迫架嘛,況且你真係好照顧我,你亦係我恩人,我點可以因為咁就唔理你。」


「我已經做左鬼架啦嘛,唔可以再咁自私迫你要鐘意我,還掂事實擺係眼前,心諗做阿妹都唔錯呀,我可以有個阿哥守護同支撐住自己。」


「我地可以繼續互相照顧、繼續陪住係你身邊感受你溫暖、仲可以繼續每日都見到我恩人,就好似正常過生活咁。」


「你諗通左就好,最緊要你肯原諒我之前hurt得你咁深,你以後都係我阿妹~」


「但你真係真係冇事架啦?」


「係啊,我真係冇事,我已經諗得好清楚,我前面嗰個只係我阿哥~」


「話說係你沉睡緊嗰陣我俾條Mk妹投訴,話我屋企好嘈搞到佢瞓唔到教,但明明屋企好靜邊度有嘈,其實啲聲係咪你發出…?點解會咁?」


我突然醒起之前啲怪事,正好可以藉著呢個機會問清楚,我滿腦子都是疑問。


「點嘈法?喊聲?」


「係啊,係喊聲!你點會知?莫非真係你發出…?」


「嗯,的確係我發出。」


「即你嗰陣一直為左我喊緊…?但點解我自己係屋企會聽唔到?」

霸氣文哥 2022-3-19 13:01

第三十一章:加深了解


「嗯,因為嗰啲都係我內心發出嘅聲音,我好似冇同你講過,係我地靈體入面仲有一個內心世界,當沉睡嗰陣就會進入內心世界。」


「就好似平時啲人發夢咁,係嗰度我可以摺埋自己唔受外界影響,盡情發洩,所以出面對我做咩講咩我都唔會知。」


「但內心世界有一個缺點,就係結界外嘅地方會聽到晒,而且仲會聽得好清楚,即門口以外嘅地方,處於結界內嘅人係唔會聽到,而我嗰陣正正每日都係入面喊,所以先會有人覺得嘈。」


「就好似平時啲荒廢嘅凶宅,因為佢地一直係度沉睡,所以住隔離啲人先會晚晚聽到屋入面有聲。」


「而沉睡間有開心有唔開心,開心嘅就聽到屋內好多人講野好熱鬧,呢啲情況通常係屋企死嘅人多過一個先會咁;唔開心嘅就好似今次咁聽到啲淒厲嘅喊聲,總之唔同情緒會有唔同嘅聲發出。」


「原來係咁,即你總共係有三層世界?一層係現實世界,你可以出黎同我見;一層就表世界,你會寄身係公仔入面看守住我;仲有一層就裡世界,外面做咩你都唔會知、你亦唔受外界影響。」


「嗯,可以咁講。」


「但真係對唔住,搞到你hurt左咁耐,你一定好辛苦…」


「唔緊要啦過左去,喊完發洩完舒服好多,因為咁我先可以係裡面平靜地諗清楚。」


「點都好,我都覺得好內疚、覺得自己好仆街,我hurt得你咁深…」


「內咩疚,我都冇怪你,只係我嘅一廂情願又冇問清楚你先會誤會左咋嘛,我仲咁執著以前啲野做咩。」


「我應承你,以後我唔會再令你傷心,我要你個世界只有開心,唔洗再沉睡、唔洗再進入內心世界。」


「嗯你講架,我聽住先。」


「知唔知點解你唔洗沉睡係好?因為我唔洗再俾條mk妹或者其他人投訴哈哈。」


「車,仲以為你真係唔想我再唔開心而沉睡添。」


「哈哈講笑咋,我緊係想你以後都開開心心,死左架啦,仲咁愁做咩。」


「算你啦,不過都係嗰句,聽住先~」


「咁你就睇住黎啦。」


「不過除左呢樣,都想你嘅怨氣會慢慢降低,唔想你死後都要含住咁大淡怨氣、唔想你好似紅衣咁,眼中淨係得返復仇。」





突然阿盈靜左,仆街我忍唔住口講左啲唔應該講嘅說話出黎,初初識佢嗰陣同佢講想佢唔好咁大仇恨,話咁樣會害死好多人,


佢嗰陣聽到即時好大反應,嬲到話下次再提就上我身取替我去報仇,如果係咁我十年監都唔夠坐。


「你…真係咁想我唔去繼續搵佢地報仇?你唔好唔記得佢地都恰過你。」


然後佢好凝重且表情嚴肅咁望住我講。


「嗯…嗯,但呢啲事都過左去,大家各有各生活,可能佢地都已經有佢地嘅報應,正因為唔會再見面,我已經冇再恨佢地…」


我驚住咁繼續講埋我內心想法同事實出黎。


「其實我自己撞返你、同你經歷左咁多事之後,我感受到溫暖、感受到俾人著緊,就算犧牲自己都要救到我,我真係好溫暖,可能正因為咁,我嘅怨氣竟然都慢慢減退左。」


阿盈竟然冇嬲我,原來係虛驚一場,我即時鬆左口氣。


「咁就好,我竟然可以令你咒恨減退,冇咒恨嘅你靚好多,以後我都會繼續照顧你,俾你一個家的溫暖~」


「嗯,多謝你,阿哥。」


「雖然我依家原諒左你,但你一定要應承我以後有咩事都同我講,唔好好似以前咁收收埋埋唔同我講。」


「知啦,以後我唔會再覺得同你講左會唔好就瞞住你,我地依家大家一家人有咩好瞞。」


「你識咁講我就放心。」


「係呢,我仲有樣野想問你,你之前唔係一直沉睡架咩,你唔會受外界影響、我就算同你講乜你都冇回應,理應你應該咩都唔知,但點解嗰日紅衣捏住我條頸嗰陣你會識得即刻衝出黎幫我?」


「因為我感應到間屋有一股好強大嘅能量入左黎,而且係有威脅性,仲要感應到你俾佢傷害緊,所以我即刻衝出黎制止。」


「我覺得我唔可以繼續沉睡落去,如果我再遲一步出黎你已經俾佢捏死左,好彩你最後都冇事平安渡過左。」


「多謝你,我以為你會由得我死係度就算,如果唔係你,我真係已經死左係度。」


「點會,我咪講過你係我恩人,你有危難我又點會唔幫你,總之一日我未魂飛魄散我一日都會出黎幫你。」


「嗯,總之都係多謝你啦,我屋企依家多左個守護神。」


呢一刻我聽到阿盈咁保護我咁有義氣,我就好似變左條女咁心都暖晒。


「我邊度係神,我係守護靈咋,但你都唔好闖咁多禍俾我執手尾啊,我唔係無限體力架。」


「我真係唔會啦,生命冇take 2我都已經take 2左。」


「你知就好啦,下次唔擔保仲可以救到你。」


「其實我仲有樣野想問你。」


「咩野?」


「嗰陣你報夢俾我你唔係都會見到個夢係點架咩?照計你會見到有人偷左你張500蚊同埋知我冇同你講事實,但點解事後你好似咩都唔知咁嘅?」


「因為呢個係你嘅記憶。」


「記憶?」


「報夢可以分兩種,一種係報一段你以前發生過嘅記憶俾你;一種就係我直接入你夢即時同你傾計見面,而今次就係前者。」


「報記憶嘅話我係見唔到你個夢講咩,我淨係可以知道有呢個夢將佢安置入你個夢度,然後淨係俾你自己睇。」


「相反如果我直接入你夢同你傾計,我就可以見到同記得夢入面嘅情況,而我仲可以創造一個場景。」


「所以好多時先人報夢俾生者都可以即時進行同佢講野交帶返啲野,生者會覺得個場景好新穎、係真係見到先人同佢講野,而唔係一段以前嘅記憶。」


「原來係咁,所以你先唔知我當時瞞住左啲野,因為你係見唔到。」

霸氣文哥 2022-3-20 12:58

第三十二章:休養(上)


聽完之後覺得好神奇,原來報夢都可以分兩種,就連夢境都可以控制埋,鬼嘅能力真係好大。


「嗯,但嗰陣見你講野疾下疾下咁都覺得有啲唔對路,只係嗰陣我太著急都冇諗太多。」


「原來你嗰陣已經有少少疑心,係我自己神態出賣左自己。」


「你唔好以為我真係咁易呃先得,我都識睇人面色架,我唔係三歲細路女。」


「知你勁啦,但你仍然都係一個喊包哈哈…」


「咳咳咳…」


笑下笑下突然我又咳左幾下勁嘅,然後我又再打左下冷震,明明我已經著左件衫點解仲咁凍。


「哎呀凍親啦你,快啲再著多件衫!」


然後阿盈急忙幫我鋪多件衫。


「其實依家係冬天定夏天,點解會咁凍?」


「依家係夏天,但因為你過左好多陽氣俾我,你體內得返好少陽氣,所以你先會咁虛弱,同埋因為體溫一直下降所以就算依家夏天你都會覺得好凍亦好易凍,你要休息幾日先可以慢慢恢復。」


「原來呢啲就係太少陽氣嘅後果,夏天都凍到咁,如果依家係冬天仲得了,咳咳…」


我一直係咁震、手腳冰冷,估唔到啲後果黎得咁快。


「你唔好講咁多住,我去沖杯薑茶俾你熱下個肚先,你係度等我一陣。」


說罷阿盈好快就走左出去,


呢一刻我感歎自己條命都仲未去到最差,以前就成日以為鬼會害人,依家先知鬼都有照顧人幫人嘅一面,而我依家就係俾鬼照顧嘅嗰一個,我唔再感到孤獨。


阿盈出左去之後,房間得返我一個,我好奇望左望隔離黐住衣櫃門塊鏡,我當場嚇左一嚇…


我見到自己已經不似人形,塊臉好瘦瘦到見骨、雙眼無神且大大個黑眼圈、仲多左好多皺紋,十足一個又老又瘦又潺嘅阿伯咁,一啲都唔似我依家個年紀,


我拎隻手摸一摸塊臉,發覺隻手都多左皺紋同變得巢皮,像極了一個就黎枯萎嘅人,睇黎真係冇左好多陽氣,唔怪得我依家咁知寒。


「薑茶黎啦,快啲襯熱飲啦。」


好快阿盈已經沖好杯薑茶過黎俾我飲。


「阿盈,我依家係咪好樣衰…」


阿盈望一望我隔離塊鏡,佢知我睇到塊鏡有啲大反應,然後佢個人移過隔離用身體擋住唔俾我望塊鏡。


「冇事架,休息一個禮拜吸收返多啲陽氣就會慢慢恢復,你唔會有事!」


「同埋就算你變成點嘅樣我都會一直陪住你,唔會嫌棄你,你就算變成點嘅樣都係我恩人、都係我嗰個好呵護我嘅阿哥,你唔會孤獨。」


「多謝你…多謝你就算我變得咁樣衰成個阿伯咁你都陪住我。」


「傻嘅,我地講過互相幫助架嘛,我地大家都係寧願犧牲自己幫大家架,又點會因為少少野嫌棄你。」


「況且你依家呢個樣貌只係暫時性咋嘛,遲下你又會變返後生嘅樣貌,同埋唔會再咁潺。」


「好啦唔好講咁多住,快啲飲左杯薑茶先!凍死你架啦。」


然後阿盈拎住個杯伸近我嘴邊餵我飲,一淡、一淡咁倒入我個口,好快就將成杯飲晒,個胃暖左唔少,但個口就傳出陣陣薑味,就好似人地食左大蒜咁…
.
.
.
好快過左一個禮拜,呢個禮拜阿盈都好照顧我,煮野食煲湯沖薑茶我飲、朝早帶我出廳曬太陽、又教我係屋企做運動、夜晚瞓教幫我蓋被等等…


而呢段時間我地已經打成一片好似朋友咁樣相處,亦妹亦朋友。


經過佢嘅悉心調理後,我身子都好左好多,面色開始紅潤返、黑眼圈同啲肉地都開始消退同生返多啲出黎、皺紋都係,皮膚就好似飲飽左水咁開始變得平滑,


唔講仲以為好似嗰啲三級片咁食胎盤令到啲皮膚返老還童變得白滑咁,總之依家就係開始變返未輸陽氣前嘅我咁啦,起碼恢復左7-8成。


今日我地照舊係個廳度做運動,阿盈係隔離睇住我跳繩。


「停!」


「我跳左幾多下?」


「156下。」


「哇,我一分鐘跳繩竟然跳左150幾下,我中學嗰陣最多都係跳得嗰140幾下,我真係有力左好多。」


「叻仔喎,體能好左咁多。」


「緊係啦,依家我十隻老虎都打得贏。」


「唔好咁得戚住啊,你身子未恢復晒架,唔好做膊到咁盡。」


「有分寸啦,你想唔想同我挑機?」


我見我咁勁咁有力即刻變到好得意洋洋咁向阿盈發起挑戰。


「好啊,你想點玩?但我跳得唔勁架喎,以前好少跳。」


可能阿盈知我勁左咁多會鬥唔贏我即刻戴返個頭盔先。


「唔緊要啦,我地鬥跳得耐,睇下邊個會冇力先,咁樣你跳得屎都冇所謂,keep住跳就得,kick繩都照繼續。」


「嘻嘻好啊!」


然後佢突然充滿自信咁答應我,仲奸笑左下,有陰謀。


「咁你等我休息十分鐘開始啦。」


「我依家條氣勁左咁多實會贏你。」


「好啊睇下點。」


10分鐘後我倆並排作出準備跳繩嘅姿勢。


「數3聲我地開始。」


「3、2、1,開始!」


一開始並冇一黎就勁快咁跳,食腦架嘛,依家又唔係鬥快,所以我保持住一個好慢速度咁跳,咁樣可以留力慢慢跳。


而阿盈就跳得比我快少少,大概一秒2-3下嘅速度,而我就1-2下。


「你跳咁快小心好快冇力喎,你冇力就輸俾我架啦喎。」


我好心提一提佢留力,因為佢跳咁快係好快冇力一定輸俾我。


「你理得我,繼續跳啦。」


「不聽老人言,吃虧在眼前,就睇下你keep到幾耐。」


「跳啦老人,唔好講咁多野。」


跳左5分鐘之後,我feel到有少少攰,腳開始冇乜力跳起身,但反觀阿盈竟然仲維持住嗰個速度不變,


唔得!我要繼續堅持住,佢應該都係死頂架姐,佢應該都差唔多冇力。


又再過左5分鐘,我腳已經冇力再跳起身咁濟,喘晒氣出晒汗,跳得越黎越慢同埋成日kick繩,但阿盈竟然仲繼續維持嗰個速度,佢係咪癲!?仲要一啲攰嘅跡像都冇,繩都冇kick過咁濟。


「唔得啦,我冇力啦。」


最後我終於頂唔住停左落黎,真係冇晒力,10分鐘已經係極限,我竟然輸左俾佢。

霸氣文哥 2022-3-21 13:38

第三十三章:休養(下)


「點啊最後邊個贏啊?」


然後阿盈亦都停低冇再跳笑住咁問我邊個贏左。


「得啦,你贏,你勁,小弟欽敬。」


我喘晒氣咁講。


「叫你唔好咁得戚架啦,你點會贏到我哈哈。」


「點解你可以keep住咁快跳咁耐一啲都唔攰?」


「你唔好唔記得我係鬼黎,我唔會有體力限制架,所以我就算跳幾快跳幾耐都唔會攰。」


「頂你我一時都唔記得你唔係鬼呢點添,你陰鳩我唔一早講俾我聽,唔怪得你頭先奸笑啦,我都覺得有陰謀架啦,攰死我啦。」


「哈哈邊個叫你咁得戚喎,見你咁得戚緊係俾你知道咩先叫勁。」


「如果你一開頭話一分鐘鬥跳得多你咪贏到我,因為我跳得冇你咁快,好彩你話鬥跳得耐,咁所以我咪即刻自信哈哈。」


「我蠢左添,下次就抓你同我限時內鬥跳得多睇你仲會唔會贏得咁開心!」


「下次先算啦。」


「不過不得不承認你體能又真係好左好多,陽氣亦都多返好多。」


「緊係啦,你估我副body係流架。」


聽到阿盈讚我我又再次得戚。


「你要繼續keep住每日運動下曬下太陽,仲未完全恢復晒架。」


「知啦,我咪日日都有聽你講,我唔要再做潺仔!」


「你識咁諗就好~」


「唔講住啦,我今日煲左啲湯水,你襯熱飲啊。」


然後阿盈入廚所斟左碗湯出黎俾我飲,好清甜、好好飲,我飲完又再斟、飲完又再斟,飲左起碼4碗,阿盈煲啲湯果然好飲。


「你就犀利啦,又識煲湯又識做運動,啲湯仲要煲得鬼死咁好飲,仲要日日都肯煲俾我飲。」


「當然啦,以前我成日都係呢個廚房煲湯俾屋企人飲架,依家你都係我屋企人,而我又搵返當年嘅回憶,我緊係都會煲多啲湯你飲,就好似以前對屋企人咁,雖然佢地唔多領情。」


「原來係咁,唔怪得你咁識煲湯,不過唔緊要,佢地唔領情姐,我領,你啲湯係全世界最好飲!」


「所以依家咪好好,終於搵到一個識欣賞我又會領情嘅人,唔會再覺得煲湯俾佢地飲係應份、跟住一唔開心就成碗湯倒左佢。」


「好啦,唔好再諗以前啲唔開心野,依家間屋係我嘅你想幾時煲都得。」


就係咁經過咁多日我體力回復左好多,希望之後可以繼續俾多啲開心阿盈,始終佢以前實在太多唔開心,唔可以俾佢再好似以前咁,依家啲日子可謂來之不易。
.
.
.
「食飽飯拉下筋啦。」


又到夜晚,依家每逢到夜晚食完飯阿盈都會督促我拉下筋。


「又拉?你放過我啦,好痛苦。」


「算好啦,唔洗你食飽飯做劇烈運動。」


「雖然你依家體力恢復得七七八八,但筋點都要拉下架,要舒展下你啲筋骨先會好,你依家啲筋硬過舊石頭。」


自從經歷完之前件事之後,佢依家都好注重我健康,搞到好似養生咁,明明我20歲都未到。


「唉好啦好啦,要受死啦。」


「唔好講到咁辛苦啦,我會陪你一齊做架嘛。」


「你講就易,你係鬼你拉筋唔會痛架嘛,我就真係攞命。」


「嘻嘻,咁呢樣的確係我嘅好處黎嘅,咁我咪可以做個榜樣同標準動作你睇囉,唔係點帶住你拉筋,雖然我以前啲拉都唔算好鬆嘻嘻…」


我即刻用一個鄙視嘅眼神望住佢。


「咁咪係囉,你以前啲筋都唔係好鬆架咋,仲話我硬過舊石頭。」


「好啦唔好講咁多住,總之我依家軟過你咪得~」


咁佢依家點都軟過我嘅,睇黎我都係逃避唔到呢個痛苦嘅命運,唯有認命。


「咁你想點拉先呀。」


「你跟住我做啦,做啲基本嘅先。」


然後阿盈坐係我隔離做出雙腳撐直、雙手掂腳尖呢個姿勢,佢成塊臉可以掂到埋大髀癡撚線,係我覺得好痛苦嘅一個動作咁叫基本?


「啊好痛。」


但我點都要迫住做架啦,都認左命,我雙手只可以掂到小腿就已經落唔到去,筋好痛。


「要落低啲架,hold住一陣。」


「唔得啦,真係落唔到啦,好痛。」


「咁屎架你,都話你啲筋硬過舊石頭,等我過黎俾啲助力你啦。」


「助力?你想點?」


然後阿盈起身行過黎用手㩒住我背脊壓落去,要我掂到腳尖唯止,我即時感到啲筋超痛,好似就黎裂咁。


「哇好痛好痛…冷靜啲…斷啦…」


我不斷叫苦連天,但阿盈係無動於衷咁繼續壓住我。


「得啦睇下你,做一個動作都叫晒救命,之前你肯定冇認真做啦。」


Hold住大約10秒之後,阿盈就鬆手俾我起返身,我即刻鬆左口氣。


「我有認真做架,但鬼叫我啲筋咁硬咩,邊會咁易拉得軟,葉師傅,唔係咁易架。」


「咁所以咪要keep住日日拉,鐵柱磨成針。」


「我唔要磨成針啊,我好大架。」


「你唔好同我開黃腔,明明你就係細支野,繼續做下一個動作啦。」


「你又知我大定細?你見過?」


突然阿盈塊臉紅晒靜左一陣。


「er……有一次你沖涼唔覺意見到咁囉…就係咁。」


「頂你裝阿哥沖涼?」


「都話係唔覺意,快啲跟我做下一個動作啦。」


「我細係因為我未進入作戰狀態咋,唔好誤會。」


「知啦,我地唔好再討論呢樣野,繼續拉筋。」


阿盈怕晒醜咁好想結束呢個話題。


「呢次拉大腿內側,雙腳合十貼近個身、雙手㩒住腳趾、將個人盡量壓低。」


然後阿盈坐係地下做呢一組動作出黎,我亦都跟住佢做,佢落去嗰下個頭係掂到自己隻腳。


「又係呢啲癡線動作,大腿內側好痛啊。」


我個身落到一半已經落唔到,雙腳亦開始遠離個身,只知道大腿大側拉得好痛。


「咁屎架,睇黎又要我出手俾啲助力你,你對手㩒實對腳先。」


說罷阿盈再次起身行到我後面,雙手好似頭先咁將我身體壓落去。


「哇好痛,依家啲人好暴力。」


因為我㩒實左對腳等佢唔好彈起,所以當個身壓落去嗰陣大腿內側啲筋拉到應一應痛到飛起。


「唔暴力啲你點會拉到啲筋,我要將你打造成魔鬼筋肉人哈哈。」


「你睇戲睇上腦咩,人地筋肉人都係得個名姐。」


「你仲有力講野即係未拉盡啦,咁我再壓大力啲你落去!」


然後阿盈真係加重左力度壓我落去。


「啊!好痛,唔好…斷啦斷啦…」

霸氣文哥 2022-3-22 13:42

第三十四章:裝香的神秘人


拉左差唔多一個鐘之後終於拉完,係時候倒垃圾。


「癡線架你,真係折磨,終於拉完。」


「唔辛苦邊有用,有冇鬆左啲先?」


「有嘅,係就係啲筋鬆左,但真係好痛。」


今日跳完繩對腳已經開始酸痛,依家真係筋又痛肌肉又酸痛。


「少少苦楚等於激勵啊!」


「唔理你啦,我去倒垃圾先。」


我懶理咁望左佢一眼就拎晒成屋啲垃圾準備出門口掉。


然後我拎住袋垃圾踢住對拖鞋開門步出門口,一步一步行到𨋢口位置,打開個垃圾桶掉落去,然後折返。


當我行到門口嗰陣,我望到個香爐又多左3枝正在燃點嘅香插住係度,我覺得奇怪,呢個禮拜晚晚倒垃圾都會見到有香插左係度,


明明我呢排已經冇乜點裝香,究竟邊個咁好心晚晚過黎裝香?


唔會係個mk妹掛?點會,佢咁爛口又唔gur我嘅,屌我都黎唔切啦,點會仲咁好心過黎裝香。


「阿洋,做咩呆左咁企係出面入返黎?」


阿盈叫一叫我醒左一醒,我即刻入返屋拉埋鐵閘閂門。


「冇啊,我見出面香爐又插左香,仲要呢個禮拜晚晚都係咁,唔知係邊個咁好心。」


「插香?」


「啊過左咁耐我都唔記得同你講返,我係你未出返黎嗰陣我裝左個香爐,然後我晚晚都會裝香,聽講咁樣會顯得我誠心,所以諗住咁樣做睇你會唔會原諒我出返黎。」


「原來係我沉睡嗰陣你做過咁多野,你真係好有我心,但你有冇整神主牌或者寫啲字咁樣?」


「我嗰陣唔識買淨係寫左幾隻字係香爐後面幅牆,我直接寫左[周雪盈之靈位]。」


話就話我好簡單咁寫左幾隻字上去,但每一隻字我都好用心咁寫寫得好靚,由其周雪盈3個字,個名本身已經好聽,手字當然都要寫得更加靚。


「哈哈傻仔好馬虎啊你,咁樣都叫誠心咩,真係唔知點解我咁都會出返黎,正常要買神主牌架。」


阿盈聽到我設置靈位咁馬虎,即刻係度取笑我。


「咁我未整過靈位嘛,第一次整算係咁啦,我知你唔會咁小氣嘅,所以咪都會出返黎嘻嘻~」


「咁你依家仲有冇為我上香啊?」


「我見你已經出返黎,所以呢排都冇再上啦。」


「車~依家啲人咁架咩,打完齋唔要和尚,見我出返黎你就唔再裝,咁都叫誠心咩。」


阿盈笑住咁串下我。


「咁我見你唔係度嗰陣已經出於我嘅誠心將你喚醒返啦嘛、我嘅目的已經達到左,咪冇再上香,最緊要我依家會誠心對待你咪得~」


「係度賣口乖。」


「咁其實我之前裝香你會唔會見到我嘅誠心?見唔見到我嘅心意?我一直都好疑惑。」


「唔可以見到,但可以感受到溫暖,唔怪得嗰陣我成日都感受到股溫暖,而嗰股溫暖嘅來源係有種親切嘅感覺,但我就唔會知係邊個給予。」


聽到之後覺得同預期有少少出入,因為見好多人拜祭先人都會裝香,以為先人會因為咁望住你。


「原來你係會見唔到我對你幾誠心,我仲以為嗰陣你會見到我嘅誠心添。」


「都唔係架,你上香我可以感受到溫暖同舒服,都係對我一種好,而你當刻越誠心,我所感受到嘅嗰股親切會越強烈。」


「咁即係我都為你做到啲野?我冇白費到心機就好,最緊要嗰刻可以令你舒服同嗰股親切感覺係來由於我。」


「係啊,就好似我傷心緊嗰陣可以得到少許安慰,感覺仲有人關心我而得到溫暖,依家知道左咪覺得你更加好~」


「同埋你好彩啦,求其寫幾隻字係幅牆我都接收到你俾我嘅溫暖。」


「咁呢個緊係要寫啦,我都識野架,我見啲人去拜山個靈位都會有個名寫住。」


「都算你有我心啦,肯咁有耐心經常為我上香。」


真係好彩我都錯唔晒,證明我對呢方面嘅野都有返咁上下認識,我又可以自豪一陣。


「係喎回歸正傳先,我頭先咪話我已經冇再裝香,照計應該冇其他人黎裝香先啱,但就唔知點解會有人咁好心晚晚黎裝香。」


「你咁講起又的確係,唔怪得我依家晚晚仲會感到溫暖。」


「咁你有冇透過種感覺知道係邊個?」


「種感覺都係親切,同你之前上香俾我嗰陣嘅感覺差唔多,就連個感受都同你當刻嘅差唔多,都係表現得悲傷難過。」


原來仲可以感應到埋人地感受,真係好勁!


「仲要係悲傷嘅?究竟仲有邊個會黎向你裝香?」


「照計應該唔會係我ex啦,我同佢中一二已經散左,係puppy love黎,仲要佢已經移民左。」


原來阿盈以前有拍過拖,真係睇唔出,我實在記太多佢啲唔好野啦。


「會唔會係佢返返黎咋?」


「唔會,我同佢以前唔係成日見面,佢亦唔知我地址,冇可能識上黎。」


既然佢唔知佢地址,咁就真係好大機會唔係佢嘅,加上佢都移民左啦,幾何會返黎香港一次。


「咁唔通真係隔離鄰居記起你以前係度死左覺得惋惜又咁啱我整左個靈位係度所以黎拜祭?」


「應該都唔會,因為我感受到佢嘅情感係好真摯,同情種悲傷係痛在心中,其他人黎拜祭係唔會有咁濃烈嘅情感,一定係同自己相關或有關係嘅人先會係咁。」


「同埋你都識講啦,佢成個禮拜每晚keep住黎上香喎,一般鄰居都唔會咁有心啦,最多咪淨係搵一晚過黎上一上就算。」


「咁呢個又唔係嗰個又唔係,咁究竟仲有邊個咁得閒又咁有心過黎裝香?」


我一時毫無頭緒,真係諗唔到邊個咁有心,佢仲要係每晚都係嗰個時候係裝,頓時覺得呢個人充滿神秘。


「呢層我真係唔知,不過由佢啦,應該都唔係啲咩唔好嘅事,有人黎上香拜祭我咪仲舒服~」


「唔係啲咩壞事,只係我對呢個人充滿好奇,究竟係邊個…」

霸氣文哥 2022-3-23 11:55

第三十五章:真面目 


又過左一日,呢晚我食完晚飯,我諗到個idea同阿盈商討對策。


「阿盈我諗到個方法可以知道邊個黎裝香,不過需要你配合。」


以前讀書唔見我咁勁,反而諗對策方面我又咁掂。


「咩方法?」


「你咪話有人黎裝香你會感受到嘅,如果你會感受到嘅話同我講我地開門出去睇咪清楚晒。」


「咁嘅方法都俾你諗到,但…」


「咩?」


「但我呢個感受係有延遲,通常係支香係個香爐燃點左一陣大約3-5分鐘先有感受,並唔係即時性,我唔記得同你講返。」


「原來係咁,呢段時間佢可能已經搞掂走左,同埋佢應該都唔想突然有人出黎見到佢,佢會盡快搞掂就走人。」


「所以你靠我呢招都唔係百份百可行。」


講到呢度,即我今晚都唔可以百份百「捕捉」到呢個神秘人、滿足唔到我呢個獵奇之心,我顯得有少少失望。


「唔緊要啦,都照試下博一博,可能佢會遲左走呢。」


正所謂博一博單車變摩托,老閪都要試下先唔好咁快俾輸數自己,要做個正能量撚。


「既然你堅決要試嘅,咁我配合你啦,但我事先聲明過架啦,見唔到人都唔好怪我啊。」


「緊唔會怪你啦,又唔係你嘅錯,你肯配合我就好。」


然後我地食完飯睇左陣電視拉左陣筋慢慢等阿盈有嗰股感覺出現。
.
.
.


「癡線,啱先拉嗰個動作痛撚死我,我條筋就斷。」


「算好架啦,你瞓低舉起隻腳我推埋去冇將佢推到貼住你個嘴,冇計啦你日頭做完運動夜晚咪拉筋鬆返下佢。」


「同埋經過咁多日拉筋你啲筋已經鬆左啲有進步。」


「係姐,但都唔洗咁折磨我拉到咁盡嘅。」


我流露出痛苦嘅表情。


「邊個叫你啲筋咁硬喎,係要加多幾錢肉緊架啦,唔係點有成果,到你啲筋軟嗰陣就唔覺得咁辛苦。」


我依家身邊真係多左個地獄級教練督促我做運動,呢個就係需要身體好嘅代價。


「唔理你啦,我去倒垃圾先。」


說罷我再次好似琴晚咁拎晒全屋啲垃圾裝為一袋準備拎出去掉。


「阿洋,我...我feel到我個身有股溫暖啦!」


正當我出門口之際,屋內突然傳來阿盈大聲講出黎嘅「好消息」,依家11點40分,果然都係接近凌晨呢個時段黎。


我望過時間後我秒速開門,拉開鐵閘,只見香爐的確又多左3枝香,香枝正在燃點,


我望向走廊遠處,見到有一個著全黑衫褲嘅身影急急腳咁行左去前面嘅轉角處轉左彎出𨋢口,佢應該知道有人出左黎。


我好快咁追出去,嘗試追上嗰個神秘人,唔講仲以為我抓賊,當然我冇嗌出聲。


好快我追到出𨋢口,見到啱先全黑嘅神秘人就企係度等𨋢,見到佢個樣有少許皺紋,蓄長髮,係一位上左年紀嘅阿姨黎。


「喂小姐,你係邊個?啱先鬼鬼祟祟係我門口做咩?」


我上前拍一拍佢膊頭,雖然我知佢係黎裝香,但為左清楚件事例牌都要問一句,而呢一刻已經滿足左我獵奇嘅慾望,終於俾我「捕捉」到呢位神秘人。


知道有人拍佢膊頭之後,神秘人嚇到震左一震。


「乜野黎你門口…我幾時有黎你門口做啲咩…你認錯人啦。」


神秘人慌慌張張擰轉頭咁向我辯解,把聲低沉兼冇乜磁性,係我地平時係出面聽到阿姨講野嗰啲聲黎。


「我明明見住有個著全黑嘅人走左出黎,仲要係急急腳咁走出黎,仲唔係你?」


「我…我住你隔離架,我趕住落街咋嘛,我緊係急急腳咁走出黎,我鬼得閒黎你門口做啲咩咩。」


佢仲狡辯,從佢慌張嘅神情同阿盈所感受到嘅野,我好肯定佢就係黎裝香嘅神秘人,佢應該係啱先裝完香冇耐行走我就出黎,跟住就咁啱見到佢行到轉角處。


事到如今,我唯有出絕招令佢認左佢。


「你住我隔離,但我同隔離屋人好熟架喎,未見過你。」


佢頓時冇野講。


「同埋我頭先係魚眼度已經見到晒,望住你係我門口裝香架喎,唔好再扮野。」


我唔講大話唔得,鬼叫佢一直都唔講真話咩,我咁樣套佢應該肯講真話啦掛,


同埋我即刻有種一切都俾我睇穿、真相只係得一個嘅感覺,睇柯南睇太多啦屌。


然後神秘人冇野好講靜左一陣子,睇黎係俾我講中左。


「唉,既然你都知道我黎裝香,咁我都唔再瞞啦,我唔係黎做壞事。」


「我呢個禮拜晚晚都係屋入面聽到出面有聲跟住都望到你向黎我度裝香,你係邊個?晚晚都黎裝香咁好心做咩?」


雖然屋入面係聽唔到出面啲咁細微嘅聲,但做戲做全套,都要繼續講大話落去。


「明明我已經冇乜點發出聲咁都仲俾你發現左,可能係個天都想俾你知,係命運。」


「不過應該係我問你先啱,你係阿盈邊個?點解你會識阿盈?」


我問神秘人,神秘人竟然問返我轉頭,咩玩法。


「我係阿盈以前嘅中學同學,仲要係同班,所以咪識。」


我照直同佢講,然後佢點頭好似消化緊咁。


「咁你又係邊個?肯講未。」


「其實…其實我係周雪盈嘅阿媽。」


神秘人深呼吸一口氣後,慢慢開口講出左佢真實身份。

霸氣文哥 2022-3-24 13:54

第三十六章:掛念之情 


我感到好驚訝,前面嘅神秘人竟然係伯母!?唔怪得阿盈會感到有種親切嘅感覺。


「你係伯母?我地入屋再慢慢傾啦,有個人會好開心,啱先多有冒犯唔好意思。」


我聽到原來佢係阿盈老母之後我即刻由啱先粗聲粗氣變到好禮貌、好客氣。


「唔緊要,但你話有個人會好開心,你指邊個?」


仆街快快口講錯野添。


「哦…我講我好開心,聽講阿盈以前同你地關係唔好,但你依家仲黎拜祭真係估唔到,依家仲黎返你地以前舊居,所以咪開心。」


「仲有阿盈在天之靈見到你黎拜祭佢佢都會開心。」


哇真係好考急智但我咁樣都兜到都真係勁。


「唉,呢件事一匹布咁長。」


「所以入黎屋企先慢慢講啦。」


「唔洗啦,咁夜會唔會阻住你瞓教?」


「唔阻唔阻,我平時都夜瞓開,我都想聽下阿盈以前啲野。」


然後我就帶伯母行去我屋企,


相信阿盈見到佢媽之後應該會好開心,話就話生前佢屋企人對佢好差,但佢都係孝順女黎嘅,況且伯母依家仲要咁好心晚晚黎裝香,應該都值得原諒啦。


好快我帶伯母入到我屋企,真係唔知阿盈會有咩反應。


「你返黎啦,個節目好搞笑,點解條友可能咁蠢,哈哈…」


原本睇緊電視睇得好開心嘅阿盈見我返黎望左過黎,然後就慢慢收起左笑容。


「你間屋都打掃得幾企理,同我以前嘅佈局差唔多,好有以前我地一家人住係呢間屋嘅回憶。」


緊係啦,因為係阿盈執架嘛,緊係會跟返以前佈局咁。


伯母入到黎周圍視察,好似覺得好新奇咁,然而好明顯佢係見唔到阿盈,因為阿盈就係前面。


「阿媽…」


我見到阿盈係前面叫左一聲阿媽,眼有流光咁行到佢面前。


「係呀,因為我成日打理架嘛。」


我繼續我嘅大話理論。


「你自己一個住?」


「依家暫時係,我老母返左鄉下未返黎。」


「係呢伯母,點解你晚晚都黎我度裝香嘅?仲要晚晚都差唔多凌晨呢個時段。」


我直入中路問重點我同阿盈都全神聽住。


「哦係咁嘅,我每晚都好夜放工,有次放工心血來潮就諗住黎返舊居懷緬下以前,咁啱黎到你屋門口就見到有個寫住阿盈個名嘅靈位。」


「香爐上面仲插住香,咁一定係有好心人設置係度拜祭啦,咁就啱晒我,自嗰日起我就決定每晚放工都黎呢度裝香拜一拜我個女。」


「我真係好唔捨得我個女,我覺得我以前好錯好對佢唔住。」


然後伯母開始變得憂傷。


原來係咁,原來係因為掛念,唔怪得我晚晚倒垃圾都會見到有人黎裝左香。


「睇得出伯母你係好錫個女。」


「其實依…」


然後我望住阿盈講,諗住講依家你個女係度,佢同我相處得好開心,因為見伯母真係好有佢心,但正想繼續講落去之際,阿盈搖左搖頭向我示意。


「唔好講俾佢知我係度,我唔想佢放唔低我,佢個女已經係過去式、唔好再停留係過去式,否則他朝有一日我真係煙銷魂散左佢會再痛心多次。」


阿盈搖頭示意之餘仲解釋埋俾我聽點解唔可以俾佢知,我唯有配合佢,好彩伯母係聽唔到佢講野,


但呢個時候阿盈已經流下眼淚,佢應該都好想同佢阿媽團聚、想佢阿媽見到傾下計,因為佢都掛住,但奈何為左將來都迫住自己唔可以咁做。


「依…(慢慢變音)以前我有聽阿盈同我講過佢屋企人對佢好差,會鬧佢打佢咗樣,其實點解以前要咁對佢?」


咁都又俾我兜到,我覺得自己真係好有急智,希望佢唔會懷疑我。


「頭先做咩望住個窗咁耐,係咪阿盈係度?」


仆街呢頭希望唔好懷疑我,嗰頭就即刻懷疑我。


「冇,啱先有隻蝙蝠係我個窗度徘徊,咪望左一望,依家飛走左啦。」


「唉,仲以為阿盈真係會係度添。」


「睇黎佢以前同你真係好fd,個衰女肯同你講咁多野,佢以前好少出聲又冇乜朋友架,佢會識到你呢個朋友真係好。」


點止朋友,仲做埋我阿妹添。


「咁以前我都真係同佢有幾句傾下嘅,因為我自己都係冇乜朋友,咪同阿盈做下朋友。」


「唔好難過啦伯母,阿盈在天之靈會睇住你。」


我係阿盈面前安慰著伯母。


「點會唔難過,佢死嗰日到依家都冇報過一個夢過黎。」


竟然一個夢都冇向伯母報過?我聽過先人去世第一時間就會報夢俾親人交託身後事,然而阿盈聽到後繼續不斷落淚。


「不過佢好彩都有你呢個咁好嘅朋友,你好好人,佢死後你都肯係返度設個靈位俾阿盈。」


「咁作為朋友我都想佢死後會受人尊敬嘅。」


「但點解你會咁啱住左黎呢度?同埋你當初點知道阿盈住呢度嘅?凶宅黎喎你唔驚咩?」


伯母突然好奇心大發一輪嘴問左我好多問題。


「係咁嘅,之前我地排到左公屋,就係呢度,房署條友帶我地黎呢度睇樓但冇講呢度係凶宅,咁我地見呢度環境幾好屋又大咪決定揀左呢度。」


「到事後睇返啲舊新聞先知呢度係以前阿盈自殺嘅地方,但咁耐以黎都冇乜事發生我都一於少理繼續住係度,費時再搬嘛,再搬就瞓街頭架啦。」


「跟住我見同阿盈以前一場朋友咪都設左個靈間唔中拜祭下,就係咁。」


伯母聽完好似恍然大悟咁不斷點頭,我覺得除左有急智之外講大話都好叻。


「咁你派屋咁都可以派到黎呢度真係好難得,難怪你會黎左呢度住,但睇黎阿盈都已經唔係度好快去左投胎,佢真係乖女黎架。」


其實佢仲未投胎,但我唔可以同你講佢仲係度所以都要扮佢去左投胎。


「嗯…睇黎都係,佢會係天上面守護住你架啦。」


「你依家咁錫我點解以前又對我咁衰,點解連你地屋企人都唔鐘意我?」


阿盈突然情緒激動喊住咁質問伯母。


「係呢伯母,你依家咁錫個女點解以前又要對佢咁差?我聽佢以前同我講話你地對佢成績要求好高、又會成日對佢打打鬧鬧,仲會咩事都屈佢。」


然後我抓緊重點代阿盈問左個問題,照計以前對佢咁差應該係好唔鐘意個女先啱,但依家點解又會變到好唔捨得咁,仲要都過左一段時間,個差異太大啦掛。

霸氣文哥 2022-3-25 11:24

第三十七章:悔恨當初(上)
「唉,講起呢樣野真係一言難盡,我唔配做佢阿媽,我好後悔以前對佢咁差。」
呢啲係咪就係所謂失去左先識得珍惜,但已經太遲。
「嗯,你慢慢講唔洗急。」
「其實阿盈真係好好,佢好乖女好孝順,我地成日對佢發脾氣但都冇反駁過我地,反而仲會自己拎錢同佢老豆睇醫生。」
「我之所以成日拎阿盈出氣…都係因為個死佬係出面搞三搞四,我自認自己係一個小女人,就算佢係出面搞三搞四我都由佢,我好愛佢。」
真係睇唔出伯母上左年紀原來都仲係個痴情嘅女人。
「但因為咁我成日同佢嘈、我成日好嬲好燥,雖然係咁但我仍然乜都聽佢枝笛,佢鬧阿盈打阿盈屈阿盈我都會配合佢一齊鬧佢。」
「加上我嗰陣的確好燥冇地方宣洩所以亦都係一個好好嘅渠道間接宣洩落佢度,我以為咁樣個死佬會因為我同佢同聲同氣會覺得佢同夾而重新愛返我唔再係出面搞三搞四。」
「直到阿盈死左,佢同我搬左去第二度住,話呢度係凶宅唔想見到污糟野,佢一啲感情都冇,個女死左佢可以當一啲事都冇發生。」
「可能佢都知自己對個女有幾衰、做左幾多虧心事,所以即刻搬走,驚個女變成鬼搵佢尋仇。」
「但我都冇理咁多,我覺得個死佬肯同我一齊走一定會重新愛返我,然後我就割愛地離開左呢個住左咁多年嘅地方。」
「走之後佢變本加厲覺得我冇威嚇地更加密出去搞三搞四,仲經常發脾氣,佢冇左個女出氣就成日搵我出氣,打我鬧我屈我,同當年佢對個女嘅情況一樣,我嗰陣終於明阿盈以前係有幾難受。」
「然後有一次佢竟然仲偷偷地帶左個女人上屋企搞野,我咁啱返到屋企當場斷正,之後就同佢嘈左場大交,佢同我離婚跟住就趕走埋我,跟住我再係出面租左個細單位住。」
「我嗰陣真係好心痛,自己個乖女俾自己害死左、老公又走埋,我好後悔以前對個女咁衰,所以先會搞到有今時今日呢個局面出現。」
「我依家真係乜野都冇晒,我真係好掛住我個乖女,好想佢依家仲會係度陪住我。」
「但可能呢啲都係我嘅報應,上天賜我一個乖女俾我一手摧毀左,作為阿媽我真係唔應該咁樣對個女,係個天注定我下半世要孤獨終老,對唔住阿盈…嗚嗚。」
未幾伯母講下講下就流下眼淚,係悔疚嘅眼淚。
果然家家有本難念的經,原來伯母對阿盈咁差都係迫於佢對佢老公嘅愛,就只係為守住兩人之間嘅愛、係變質的愛,但就好自私地放棄左阿盈,最後一個錯嘅選擇令自己一無所有。
「嗚嗚…但你知唔知我係學校俾人恰係有幾辛苦,每次返到黎屋企同你地講我俾人恰好辛苦你地就只會話我冇做好自己本分所以先俾人整蠱,話人地邊會冇啦啦恰我,屈我話一定係我做得壞事多先咁樣俾人玩。」
阿盈聽完後不斷流下眼淚然後就發表佢以前俾人恰嘅感受,睇到佢嘅眼神好絕望咁,感覺就算知道佢依家好慘但好似依然仲好憎伯母,但我知道其實阿盈內心其實都好掛住佢阿媽。
「仲有一次係學校我俾成班女仔圍住推撞我,我情急下想離開現場所以大力推開左個女仔走左,佢跌左落地下隻手瘀左。」
「然後佢地就同miss講跟住就去左搵你地,個miss話我打傷人,成班女仔可以做證,我不斷解釋話件事唔係咁,但你地只係叫我收聲一口咬定就係我錯,你地信晒佢地啲大話。」
「返到去仲打左我一身、仲爆晒粗咁鬧我做乜打人搞到要見家長、話我做左壞事就要受到懲罰。」
「我真係好難受、好無辜,我係受害者,但全世界就只係覺得我錯,仲要受到懲罰,你嗰陣做過啲乜野黎,就只係識得配合老豆一齊打我屈我,今時今日嘅後果係你自己攞黎。」
阿盈發表左一堆以前係中學難堪嘅事跡,同埋充斥住一股恨意,而嗰陣我應該咁啱未落堂所以唔知佢發生左呢件事。
「原來係因為咁所以你先對阿盈咁差,依家大致清楚左件事嘅背後。」
「係呢,我聽佢以前講話佢成日係學校俾人恰但返到屋企你地仲屈佢打佢,係咪有啲咁嘅事?」
然後我隨即代阿盈問伯母,想俾佢親耳聽到伯母嘅解釋。
「係…係有啲咁嘅事,其實嗰陣我都知佢真係係學校俾人恰,試問本身咁乖又唔多出聲嘅女仔又點會主動去搞人做壞事。」
「不過都係我衰、係我仆街,我為左想得到佢老豆嘅愛就算知道件事唔係咁我都照配合佢打鬧阿盈,同埋將一切都發洩晒落佢度,我真係好後悔…」
「嗚嗚…」
阿盈聽完後冇講野將視線移向側邊繼續落淚。
「佢又真係幾乖架,平時好靜咁坐係個位度睇書做功課,小息都好少離開個位,絕少同人有交流,同我一樣都係邊緣人。」
「所以佢絕對係唔會係學校做壞事去搞人,反而係其他人覺得佢怪異好恰就過黎玩下佢恰下佢,久而久之就越玩越過份,所以你以前真係誤會左佢,班女仔做證係夾埋一齊屈佢。」
「嗚嗚…乖女…我真係對你唔住,係我搞到你咁辛苦咁難受,我真係唔配做你阿媽,我寧願死嗰個係我而唔係你,你咁乖咁叻女真係唔應該咁早就離開左呢個世界。」
伯母知道以前件事嘅實情後,不斷自言自語怪責自己。

霸氣文哥 2022-3-26 12:38

「咁成績呢?你都識話阿盈乖女叻女,佢以前又的確好勤力好努力讀書,佢成績好高分、成日都有80幾分,經常係全班最高分,但你點解你都仲會話佢唔夠好、踩佢話點解唔再考好高啲?」

「呢樣都係我衰,係我對佢太高要求,佢真係已經做得好好,但我仲覺得唔夠好,係我迫得佢太緊,同埋我唔知佢已經係全班最高分,佢冇同我講過…佢真係好叻女。」

睇黎伯母以前真係唔多了解自己個女,好似好多事都係依家先知。

「我咁樣做都係因為唔想佢好似我咁,要死死地依靠一個男人,就算佢對你幾差都好都要配合佢。」

「我想阿盈讀好啲書成績再好啲將來考到大學搵到份好工搵多啲錢就唔洗下下要聽男人支笛,因為邊個有錢,邊個就最惡,唔會俾啲男人睇唔起。」

「但估唔到我竟然弄巧反拙反而迫得佢太緊害左佢,依家真係乜都冇晒,呢要切都係我一手造成,我係千古罪人…」

原來伯母係想嚴師出高徒,但佢用錯方法,佢唔知佢本身已經好大壓力,佢做得好嗰陣仲一尾得個踩真係會有反效果。

「嗚嗚…你嗰陣一啲都睇唔出我有幾辛苦、你一啲都唔著緊我,依家先黎後悔仲有咩用,已經太遲…」

「一直以黎我努力、勤力用功讀書就係知你想我入大學,我做得好拎得高分嗰陣想有個屋企人認可我實力,但得黎嘅都只係得踩我、鬧我,我真係好難受,好似自己點做都做唔好咁。」

阿盈繼續邊喊邊答覆伯母嘅苦衷,睇得出仲未能化解到阿盈對伯母嘅恨意。

「唉,其實阿盈就係想等你嘅一句讚好,但一直都等唔到,有時要求高除左鞭策仲需要鼓勵架,呢啲叫賞罰分明,咁樣佢先會有自信繼續做好。」

「你一尾淨係得罰同踩佢佢真係會頂唔順,佢會覺得難受,覺得點做都做唔好,然後慢慢會越黎越憎自己,就算拎幾高分但只要未得到你嘅認可都覺得自己好廢。」

我將阿盈嘅不滿代佢講返出黎。

「所以我真係唔配做佢阿媽,我真係唔知原來佢想要我嘅讚好,就算眼見佢高分都好,我都淨係識踩佢諗住咁樣佢之後會做得更好。」

「算啦你唔好再怪責自己,人誰無過,件事都過左去,最緊要你依家識反省嘛,作為阿媽有邊個唔錫個女,阿盈在天之靈會見到呢刻反省過後嘅你架啦。」

「啊伯母,我醒起樣野!」

我記得啱先阿盈話過唔想伯母一直放唔低佢,萬一佢繼續日日黎裝香一定會更加放唔低,

始終佢黎呢度就好似同阿盈有個聯繫咁,就好似一對情侶失戀都要各分開下唔好再聯絡先放得低啦,我一於如阿盈所願做啲野先。

「做咩?」

伯母問道。

「我…琴晚夢見阿盈。」

就係又要開始我嘅講大話。

「阿洋你諗住做咩?」

阿盈對我呢個舉止表現得疑惑,我並冇理會。

「你夢見佢?佢同你講咩?」

伯母一聽到有阿盈消息即刻變到好雀躍。

「我夢見佢同我講想伯母你唔好一直放唔低佢,佢知道你晚晚都有黎呢度為佢上香,呢份誠意佢收到。」

「但佢之後唔想你再黎,佢唔想你仲停留係過去日日思念,佢想你move on振作向前走、唔好再成日諗住過去咁內疚咁難受,佢唔想見到你咁樣,佢已經原諒左你。」

冇錯,我再次將阿盈想講嘅野講出黎,但就用一個夢境形式覆述出黎。

「喂呀,邊個話要同佢和好,邊個話我原諒左佢!」

我仲要自把自為幫阿盈講左個大話話原諒左伯母,我真係想見到佢地兩母子可以和好返,唔好再因為生前嘅野而記仇,我相信阿盈其實都好掛住伯母嘅,

同埋睇得出伯母依家真係好真心好悔疚、佢內心其實係好錫個女,同埋佢依家已經得到佢嘅報應,就係乜都冇晒,已經好慘,就當打和啦。

「真係架?多謝你呀阿盈,你仲肯原諒我呢個咁衰嘅阿媽,仲要依家都仲咁為我諗,我呢個阿媽真係唔配擁有你呢個咁好嘅乖女,我真係抵死架。」

阿盈聽完好真摯咁係佢面前望住伯母落淚,睇黎佢開始動搖。

「啊,仲有啊,阿盈仲話以後你一定要好好過日子,要身體健康唔好做傻事,佢會一直係天上守護住你。」

因為我聽到伯母語氣好灰好絕望好痛心咁,所以我加多句希望俾到動力佢活下去唔好做傻事。

「知架啦,有阿盈你睇住我唔會做傻事,你都要係天上過得開開心心,忘記以前種種嘅唔開心,下世一定要投胎搵到個好阿媽…阿媽永遠愛你啊…」

然後伯母好似淚腺決堤咁不斷流出眼淚啜泣,呢個係祝福他人嘅眼淚。

「阿媽…我第一次聽到你講愛我…」

阿盈終於被感動到,係一直被遺忘嘅母愛,睇黎恨意都開始釋懷了,都話佢其實內心係好掛住伯母架啦。

我馬上為伯母遞上一張紙巾俾佢抹,呢啲應該真係佢嘅報應,係佢以前自私得黎嘅果,依家嘅佢比好多人都慘,佢冇得再見到自己個女、老公又冇埋,我就至少仲可以見到阿盈同佢相處,所以我已經唔算慘。

[[i] 本帖最後由 霸氣文哥 於 2022-3-26 12:39 編輯 [/i]]

霸氣文哥 2022-3-27 13:31

第三十九章:釋懷後的情感


「呢度有道平安符,係我係佢生前用我嘅血求嘅一道平安符,聽講用血求除左可以庇護到你一般嘅劫難仲可以防止血光之災。」


伯母平復一陣後突然向我遞上一道平安符。


「嗰陣我唔敢親手遞俾阿盈,我以為自己袋住係可以默默守護到佢,畢竟係同一個家,但原來唔係,最後阿盈都係出左事。」


「既然阿盈都唔想我放唔低佢、想我唔好再黎為佢上香,加上我以後亦見唔到佢,我將呢個平安符送俾你啦,話晒你都係佢生前一個好好嘅朋友,你值得擁有,佢可以守護到你平安。」


「阿媽,點解你要對我咁好…?我以為你好唔鐘意我淨係會踩我,原來你偷偷地用自己血向我求左道平安符,點解你唔早啲話俾我知…嗚嗚。」


「一直以為你唔係好媽媽,呢刻先知原來你真係好錫我,係我份人鈍感受唔到,阿媽...我都愛你…」


好囉,睇黎佢地終於和好返,阿盈終於流露出佢牽掛嘅一面,可惜伯母見唔到聽唔到,不過我確信幫阿盈率先同伯母講已經原諒左係啱嘅


「咁樣唔好意思嘅,伯母你袋返啦。」


雖然阿盈好想要,但門面嗰啲客氣說話都要講嘅。


「你袋啦,你以前同阿盈咁好朋友一定係學校都有好好照顧佢,我呢個唔識做人阿媽嘅唔應該帶住啲咁嘅野,反而你識照顧佢呢樣野應該配俾你帶住,你就當係你嘅功勞依家獎勵俾你啦。」


「加上呢樣野本身就係諗住守護呢個家嘅某個人,依家就當將呢個符放返係呢間屋,所以俾呢間屋嘅主人就啱晒。」


「好啦,咁我收左佢,多謝你。」


伯母講到咁我都唔好意思唔收。


「阿媽,多謝你。」


阿盈隨即亦向伯母道謝。


「阿洋可唔可以幫我問下佢住邊?我遲下睇下有冇可能去探下我媽。」


突然阿盈想我問伯母住邊,我又要講下大話了。


「係呢伯母,你依家住邊度咁?」


「我住黃大仙嗰邊呀,做咩?」


「冇啊,見你依家乜都冇晒得返一個人好似好孤獨咁,我諗住有時間可以上黎探下你咋嘛。」


好彩呢度冇外人,俾人地見到實會以為我想"姨姨我不想努力了"。


「順便仲可以聽多啲關於阿盈以前嘅往事,始終我都係得阿盈呢個咁好嘅朋友,所以可唔可以寫個地址俾我?」


「原來係咁,冇問題啊,我寫俾你啦,不過依家我都慣左一個住,返工嗰度都識到幾個朋友嘅。」


「咁咪好,最緊要快啲振作返!」


然後我拎左張紙俾伯母寫低佢個地址,好快寫完遞左俾我。


「你以後有咩事或者想上黎探我就黎呢個地址啦。」


好彩伯母信得過我,正常人係唔會咁易俾自己個地址人,俾地址呢樣野都係講個信字,從而睇得出一個人對你嘅印象點。


「好啊,原來我地都唔算太遠,黎你度都方便。」


「嗯,不過都多謝你今晚講左咁多阿盈以前嘅野同感受我知,我依家先真係了解到自己個女以前原來咁辛苦。」


最大功勞應該歸功落阿盈度,透過佢講俾我知我先識講咁多,簡單黎講係代答。


「大家咁話,我都係今晚先知多左佢以前嘅家庭狀況。」


「好啦時間唔早,我走先啦,唔阻你休息。」


「喔好啦,你都早啲返去休息,拜拜。」


「拜拜。」


就係咁,今晚我成功將佢地兩母子和好左,我亦了解多左佢以前嘅家庭狀況,原來唔係想像中咁簡單,殘酷嘅背後總有溫柔,只係呢份溫柔黎得太遲。


我開門送伯母出門口走後,屋內變回一片平靜,只見阿盈坐住係張凳趴住係張枱上。


「伯母走左啦,你冇野呀嘛。」


我走過去慰問一下阿盈。


「嗚嗚…我真係唔知原來阿媽佢會咁愛我,你知唔知我聽到佢講愛我嗰下,我個心瞬間warm晒,就好似多年唔見左嗰份母愛返返黎。」


阿盈起身望住我,原來個傻妹喊到成個豬頭咁,都話佢係個喊包黎,又唔認。


「睇下你,只係一句愛你就令你喊到咁,你等左咁耐終於等到佢嘅愛,仲因為咁樣將你嘅恨意釋懷埋,就只係簡單一句說話,睇得出你多年黎真係好缺愛。」


「仲有你咪話一直都好想得到佢嘅讚賞同認可嘅,佢今晚終於睇到同讚左你,你開心晒啦。」


「仲有個平安符,佢竟然會為左我用自己血向我求道平安符,係用自己血喎!佢平時對我咁衰邊度似會為左我用血求符俾我嘅人,佢一定好痛…」


「傻妹,有時有啲野唔可以淨係睇個表面嘅,佢表面對你好衰,但內裡其實係好痛錫你為你好嘅,內心咁易俾你讀到就唔叫心事啦,只係佢嘅一時自私同用錯嘅方法黎為你好,先搞到件事衰左。」


「試問天下間有邊個老母係唔錫自己啲仔女,由佢十月懷胎去到生你出黎佢自己都要受好大痛苦,佢咁辛苦生你出黎點會話厭棄就厭棄你,最多都只係經過時間嘅沖洗佢先慢慢將嗰種痛苦淡忘左架姐。」


「佢拮手指除左係為求道符,可能仲係想透過呢種痛楚黎喚醒當年佢生你出黎嗰種痛苦嘅記憶。」


「相比之下佢呢啲痛其實只係好小事,所以佢點痛都唔夠生你出黎嗰陣咁痛,但都足以喚醒佢當年嘅記憶,只有咁樣佢先可以提醒到自己要做一個好媽媽要督促你、係背後默默地為你付出。」


「但佢點都估唔到佢迫得你太緊竟然迫死左你,佢心痛、佢後悔,但佢點後悔都已經冇用。」

霸氣文哥 2022-3-28 13:29

第四十章:更衣室試衫


果然旁觀者清,我作為一個旁觀者竟然可以講到一大堆感受出黎,依家我呢個中間人變到好明白佢地雙方嘅感受。


「嗚嗚…唔知點解我呢刻真係好掛住佢,佢真係好好,如果下世我再做佢個女,我一定會私下同佢傾、多謝佢對我嘅好,仲有就係帶佢離開老豆!」


與其阿盈想下一世都做佢個女,不如話佢係想時光倒流返生前。


「掛住都正常,畢竟你依家先真相大白知道件事嘅背後,依家有伯母地址,我地隨時都可以上去探佢。」


「嗯,但依家我嘅靈力未足夠可以踏出呢個家…」


係喎,唔記得佢出外係要有足夠靈力先得。


「唔緊要,等遲下你吸收足夠陽氣同靈力我地先一齊去,或者到時你一個人都可以去。」


「阿洋多謝你…多謝你今晚為我同阿媽嘅關係和好左,唔係你我都唔知原來阿媽佢係愛我對我好。」


「多咩謝,你嘅事即係我嘅事嘛。」


「睇下你你個喊包,喊到對眼腫晒啦,真係未見過一隻鬼可以喊到咁。」


「咩喎,咁人地真係控制唔到嘛。」


「…你呢,你頭先掛住追我阿媽門口啲垃圾仲未掉啊。」


阿盈見自己就駁唔到就分散我注意力了,但我啱先的確情急下掉低左袋垃圾落地掛住追伯母未掉出去。


「係喎我仲未掉垃圾,我依家去掉先。」


然後我就急急腳地走到門口拎出去掉,今晚亦隨著一件和好嘅事而落幕。
.
.
.
「呢條裙幾靚喎,你可以試下,睇起身應該會幾清純。」


我指住條肉肉地色嘅純色短裙示意阿盈可以一試。


過左4日後,呢日我地去旺角行街扮靚靚著靚衫,我地黎到間H&M。冇錯,阿盈終於可以出到黎,我都係前日先知,


嗰日我出街買啲野但唔記得拎手機,佢竟然追出黎拎俾我,嗰陣我就知道佢得左,連個傻妹都估唔到可以出到黎,因為佢都係後知後覺。


可能係前排我俾左大量陽氣佢,然後經過左成個禮拜,加埋佢慢慢吸收嘅陽氣,以致依家有足夠靈力出到黎。


然後呢幾日我地都過返正常生活,可以出街之後我地周圍去玩,阿盈佢亦都重拾笑容開心返。


「佢隔離嗰件衫都好靚,我覺得應該會幾襯。」


然後阿盈再望向隔望個架啲衫,見到件白色好薄類此公主服嘅一字膊衫,與其話一字膊衫不如話係恤衫,佢真係薄到透咁濟,不過著落應該會幾靚。


「哇,咁少布你得唔得架。」


「緊係得啦,以前我每一次同fd出都係著到咁樣靚一靚先出,因為以前出一次去都好矜貴。」


一時唔記得阿盈以前係好少有得出去同fd玩,不過真係睇唔出阿盈原來都咁貪靚。


「依家我唔會俾人睇到我更加要盡情去試衫啦,咁耐冇著我唔洗覺得老尷。」


人地見到我對住空氣自言自語一定以為我癡線。


「都係時候啦,你成日一身白色咁真係唔好睇。」


「所以你今日咪會見到全新嘅我。」


「咁你想去邊度試呀,直接係呢度試?」


「陪我去更衣室!」


「wtf…?我地一齊入更衣室?」


「係啊,我地一齊入,話就話人地見我唔到,但呢度大庭廣眾,我唔習慣自己除衫有咁多人係身邊,同埋一齊入你可以同我講件衫係咪真係好睇嘛。」


「但始終我地一男一女…」


「黎啦,你唔望咪得,你係我哥黎嘛。」


話口未完,阿盈就拎左套衫俾我拉我行去更衣室,果然佢完全當晒我係親人,一啲顧忌都冇;果然人地唔尷尬,尷尬嘅就會係自己。


準備入更衣室時,個職員好奇地望住我,一定係見到我唔知點解隻手要on99咁伸起咁行路,仲要拎住套女裝入更衣室。


入到更衣室,我立即閂門將鎖鎖上,因為真係好老尷,而入面亦唔算大,成間更衣室只係啱啱好夠我地兩個企係度,我地貼到好埋,牆邊有一塊鏡,我可以係塊鏡清晰見到阿盈。


阿盈係我手中拎走套衫掛住係牆上之後,佢急不及待背住我對住塊鏡準備除去佢件連衣裙,露出左一邊膊頭,好白滑…


「你個鹹濕仔望夠未,擰轉後面!」


我望得眼甘甘之際,突然佢停住左動作,佢從鏡中倒影望左我一眼見我望住佢就一聲呼喝叫我擰轉頭,


然後我就清醒過黎擰轉後面,我係度做乜,做乜冇啦啦咁陶醉望住自己個妹換衫,


可能青春期發育令我對異性個身體產生好奇,仲要係靚女,以前我有女嗰陣都未見過佢除衫,所以依家阿盈係我前面換衫我先會有個慾望想望住佢,會有一種莫名嘅興奮感,我只可以咁樣安慰自己。


「唔好望啊!」


佢再提醒我一句。


雖然睇唔到,但聽住佢除衫嗰陣磨擦啲聲令我有好多色色嘅幻想,我控制唔到去諗,究竟佢入面有冇著底褲同戴bra?有著底褲有戴bra咁係咩顏色?個波大唔大?佢下面係點嘅樣、多唔多毛…


阿妹呀阿妹你做咩要拖埋我入黎同你一齊試衫,我唔想對你諗埋呢啲野啊,我唔可以對你有遐想,而呢一刻我下面已經好唔聽話地硬左…


「得啦換完,你可以擰返過黎。」

霸氣文哥 2022-3-29 13:07

第四十一章:陰間也進步 


一陣之後,阿盈終於換好,我唔洗再聽聲對住佢咁多遐想,點知唔擰都還好,一擰就不得了,見到佢純得黎但好性感,一條白滑嘅膊頭同一條白滑嘅長腿盡顯眼前,好靚…感覺佢成熟左。


我望到佢嘅反應係撐大對眼同個嘴,感到好驚訝,換左套衫竟然180度大轉變,第一次見阿盈咁靚。


「你做咩見到之後呆左?」


阿盈見我呆左咁笑住問我。


「你…你靚左好多。」


我疾住咁講出內心嘅真實說話。


「係咩?我好耐冇試過咁著啦。」


「真係冇諗過你著左會咁大轉變。」


「冇你係度讚我我真係唔知自己原來可以咁吸睛。」


緊係吸睛啦,你著到咁J,以前街邊唔少人偷偷𥄫左你都唔知啦。


「哈哈你睇下你,好似有啲人見到仲要直埋。」


突然阿盈望一望我下面見到我勃起左係度笑我,我紅都面晒咁打側個人用手遮住下面。


「邊度係,我急尿咋。」


我隨隨便便講左個藉口出黎,但明顯睇得出好假,我嘅急才都應付唔到呢個情景。


「扮啦你,急尿會直左架咩,證明我自己原來都咁有魅力。」


「知你有魅力啦,你仲帶我入黎陪你換衫。」


「咩喎,我都冇估到你會咁易直左架嘛,不過我冇介意啊,呢啲係男人正常生理反應黎嘛,所以你唔洗覺得咁老尷喎。」


癡線你係我妹黎架,依家我對你有遐想仲要直埋點可以唔老尷,我罪惡感都出晒黎,仲要平時我同你相處係未俾你見過呢個鹹濕形象架嘛。


「你太dry啦,快啲去識返個女朋友啦,正正常常拍返場拖潤下啦,跟住屋企都熱鬧啲。」


咁都俾佢聯想到我識女朋友嘅,雖然我內心係真係想搵個相處得開心嘅女仔嘅,我都單身左好耐,不過呢啲野都係隨緣。


「我直左咋喎,關我想搵女朋友咩事?」


「通常單身好耐想拍拖嘅人先會同個著得咁靚嘅女仔企埋一齊咁易有反應。」


阿盈又借啲意兜個圈讚自己靚,女人就係一有人讚左佢就囂。


「知你靚女啦,咁都俾你講得通,都唔知乜野理論黎嘅,聽都未聽過,不過都係嗰句,呢啲野隨緣啦。」


「不如得閒down個交友app玩下啦,我可以教你點識女仔喎。」


睇黎我呢一下勃起真係俾左好多自信佢,佢囂到竟然想教返我轉頭點溝女,點解我「細佬」要咁唔聽話。


「唔講啦,都話呢啲野隨緣。」


我故意避而不答,但其實我內心對交友app都有啲興趣,覺得入面個世界就好似一個大海咁、充滿神秘感,你可以結識到某一個角落嘅人,呢啲係咪就係口裡說不,心裡卻很誠實?


「車,睇你眼神閃縮咁明明就好想。」


「你幾時學左讀心,讀心啲野唔準架。」


「你唔知女人第六感好強架咩?」


「你睇下你,你只係著靚左姐,連第六感呢啲野都彈埋出黎,但你嚇我唔到嘅,我唔會俾你咁易感應到我諗乜!」


「唉…」


佢聽完後突然面色一沉,係咪我講錯乜野…?


「做咩無啦啦嘆氣?」


「我依家幾靚都冇用,依家都只係可以試一試咋。」


係喎,唔記得佢依家唔係人冇得好似正常人咁買衫shopping。


「原來係咁,咁我買件衫燒俾你?我見出面啲人都係咁樣燒啲紙服俾先人。」


「其實咁樣冇用架…啲人一直都誤解左以為燒紙服去到下面會變真衫,但其實燒乜都只會係乜,即燒紙服落到黎都只會俾左件紙服我。」


我都係依家先知紙服燒完俾先人原來都係紙黎。


「咁所以我直接買件衫燒俾你啦,你鐘意邊件衫同我講。」


「咁樣唔值架,如果我好多衫都鐘意,你咪要嘥好多錢去買衫俾我?仲要我係一個死人,真係唔值…」


「我可以架,只要你著得靚著得開心你要買幾多衫都值,你係我妹黎架嘛。」


「…哈哈,唔好意思我忍唔住笑左出黎。」


突然阿盈由沉重嘅表情笑左出黎。


「做咩笑?」


我不解地望住阿盈。


「我玩你咋,其實陰間都會好似人間咁科技會進步,依家唔洗靠燒野架啦,好似我呢啲情況咁你見到我,其實你用部手機影件衫俾我睇,我專心咁望實就會著左係身,仲要係真材實料嘅衫黎!」


哇乜原來陰間都會進步,人用手機,鬼都用手機,真係未聽過可以唔洗燒野都寄到樣野俾先人。


「咁都得,做左鬼原來咁正,咁你地咪好enjoy,可以唔洗錢拎左佢啲新衫周圍走。」


「都係架,不過要人幫先得,好似我地咁,但好多鬼死後唔係大冤氣就唔記得晒啲野,所以都冇咁做過。」


「既然你都知道可以咁做,咁即係你頭先嗰下嘆氣係假架啦。」


我感到不爽地啤住阿盈。


「都唔係架,我都怕你唔會咁有耐性影啲衫俾我嘛…」


呢一下佢突然又變到好陰聲細氣咁講野,十足想對我撒嬌可憐佢咁。


「咁呢樣野你就唔洗擔心啦,又唔洗錢又快手又簡單影幅相咋嘛,你鐘意嘅話,我成間店啲衫都可以幫你影晒佢! 」


「真係架,咁好!?咁就咁話架啦,我鐘意邊件衫你一定要幫我影。」


「可以,但…」


「做咩,你想反口?你得我呢粒阿妹架咋,唔係咁都要刻薄我下嘛?」


阿盈聽到我欲言又止咁以為我想反口即刻好大反應咁雙手㩒住塊臉扮到好可憐咁,爭在對眼未變到水汪汪。


「但買之前我要唧死你先,夠膽玩我!」


然後我雙手好快就向佢格勒底進發去唧佢,夠膽玩我我要俾返啲懲罰你。


「唔好哈哈…唔好唧…哈哈哈…」


「睇你下次仲夠唔夠膽玩我。」


一陣後我唧完佢,佢竟然笑到出左幾滴眼淚。


「唔敢啦唔敢啦,真係好鬼痕。」


「咁依家俾你唧完,可以出去影相俾我未?」


「可以啦,我地出去啦。」

霸氣文哥 2022-3-29 17:40

大家如果對篇故有咩疑問可以係度問我:ph_05:

霸氣文哥 2022-3-30 12:35

第四十二章:偶遇MK仔


出更室後我俾返件衫俾職員,佢又再次愕然咁望住我,然後我好快行走左,佢一定係心諗男人老狗拎件女裝黎試?一定以為我變態。


我出到去後,每一件阿盈話覺得靚鐘意嘅衫我都執到件衫整整齊齊再影相,影完前影背後,


過左一段時間我終於影完,佢話影住咁多先,經過今日我手機多左好多相,我將呢啲相全部收藏晒佢,以俾佢日後可以方便「換衫」,


而呢一刻佢已經著住左頭先試嗰套衫,正式變成一位靚女~


然後我地步出H&M,我未試過行H&M行超過一個鐘,以前同ex都未試過,不過依家陪阿盈係值得嘅,見到佢咁開心我都好滿足。


行出H&M後,我地黎到人來人往嘅街頭,我繼續同阿盈有講有笑咁行街,啲人睇到得我一個係度自言自語都用一個奇怪嘅目光望住我,一定覺得我發神經成個on9仔咁,


雖然係柒左啲,但我都一於少理,而阿盈就可以輕而易舉咁穿過啲人群、如入無人之境,所以熙來攘往嘅街頭根本對佢冇影響。


正當我地傾得開心之際,我突然俾迎面而來嘅人大力咁撞左一下,我當下即刻撞至退後左一步。


「屌你撞乜撚野啊!」


前面嘅人個子瘦瘦染金毛、戴耳環、手同腳都有紋身、表情有啲猙獰,原來係個MK仔,佢同一個fd同行,都係MK仔,而撞我嘅MK仔第一時間屌我。


「唔好意思,啱先好似係你撞過黎先架喎。」


「我邊撚度得閒撞你啊柒頭,你撞到我就認撚左佢啦。」


我心知前面嘅人唔係善男信女,但我覺得好委屈都忍唔住同佢地解釋返。


「咪臭系,依家我個fd傷左喎、好撚痛喎,點撚樣算先。」


另一個MK仔亦睇唔過眼出聲屌我。


「但事實係你地撞到我先喎,我都好撚痛,點算先。」


我自問真係好硬頸,知道自己好委屈就算前面嘅人幾惡我都唔肯道歉,但其實我心入面係驚緊。


「屌你老味你痛乜撚野啊!我明明啱先見住你大大力撞鳩我,明顯想撩交打啦下話。」


然後撞我嗰條MK仔推左我一下。


「喂你地唔好郁手郁腳喎,我講左真係唔係我撞你地,我都費時採你地。」


呢個時候其實周邊啲人已經留意到我地,開始有啲人圍住食花生、有啲人仲要拎住部手機拍片,我感到有少少柒,我想三十六計走為上策。


「咪係囉你咪走啊,你條死毒撚撞到人老閪都唔認,唔係仲諗住當冇事咁走左去下話。」


另一個MK仔再次出聲,亦抓住我截停左我。


「你老母養到你咁大咁撚樣教你架咩,食屎大架?道歉啦仆街。」


撞我個MK仔連我老母都講埋出黎,仲講野越黎越難聽,我開始火火地。


「阿洋你道歉先啦,呢啲人唔好惹,盞自己蝕底,你同佢地打你打唔贏架,你會受傷,你好返冇幾耐架咋。」


阿盈都叫我道歉?唔通要俾班MK仔橫行無理?依家我受害者喎,點解反而要我屈服?我深深不憤繼續堅決唔道歉。


「我知你諗乜,你依家一定好嬲,但你都道左歉先啦,你道左歉先我保證你等陣有花生食。」


係咪架,有花生食?唔通阿盈諗到啲乜野方法?既然係咁,咁我就試下暫時吞左淡氣佢啦。


「點啊撚樣,肯道歉未啊,係咪想我揼柒你?」


「…係我唔啱,我啱先撞到你,對唔住…」


要對住班MK道歉,我真係好難先開到口,仲要受害嗰個係我,要我屈服於呢班仆街我真係寧願去死,士可殺不可辱。


「good boy,一早肯咁咪幾好,以後唔好再俾我見到你啦,我驚我地睇你唔撚順眼忍唔住揼柒你先。」


「係囉,醒少少唔洗俾人屌,哈哈。」


另一個MK仔加把嘴之後就笑鳩我,然後佢地就行走左,人群亦開始散去,我滿滿嘅屈辱充斥著整個人,我道歉更加顯得我懦弱,之後就當我成個小丑咁。


「你唔洗咁嬲,等陣你就有花生食,睇我點樣玩鳩佢地!」


阿盈見我咁不爽就安慰我,仲慢慢露出一個奸笑,好似有晒計劃咁,究竟佢想點?


「玩鳩佢地?你想點?」


「等陣你咪知,你企埋一邊食花生啦,等我呢個阿妹幫你出手以解你心中嘅屈辱!」


我倆偷偷地從後跟住兩個MK仔,佢地行到不遠處嘅垃圾桶停低左,佢地雙雙從褲袋中掏出一包煙從煙盒中拎一枝煙出黎食、係度圍「桶」取暖,原來佢地係一班煙鏟。


「係時候啦,你行遠少少食花生啦,嘻嘻!」


我聽阿盈講行遠少少同佢地保持距離,我好好奇佢會點用佢嘅隱形之身玩鳩班MK仔,果然做鬼都有佢嘅好。


隨即阿盈就行到佢地面前望住佢地,可惜佢地見唔到,如果佢地可以見到嘅話執到啦,有個靚女走到佢地面前喎。


阿盈當然唔會蠢淨係望佢地,應該只係想望下佢地嘅串樣,然後佢視線同隻手慢慢移到撞我嗰條MK條褲上,靜靜地幫佢扯開左條褲頭帶,


好彩佢地見唔到,如果俾佢地見到呢個情景佢地一定已經扯晒旗,因為呢個情景同某啲網站上面嘅動作片有似曾相識嘅畫面。


然後阿盈望住我做左個倒數嘅口形,對手hold住係個褲頭上面,


「3…」


「2…」


「1…」

霸氣文哥 2022-3-31 11:20

第四十三章:以牙還牙的報復


然後條MK仔條長褲連底褲就咁被大大力扯左落黎,下身瞬間係人來人往嘅街邊赤裸裸咁表露無遺,原來係細支野,佢地都反應唔黎立即俾當前嘅情景嚇親,但我就好仆街咁笑左出黎。


「啊…變態佬!」


而咁啱有個女仔同佢迎面咁行過就直接目擊到呢個情景,即刻被嚇到尖叫左出黎。


亦因為呢一下尖叫加上呢一個震撼嘅情景,即時吸引左好多人望過黎,佢見到咁樣紅都面晒急急腳休返條褲上黎。


「靚…靚女,唔係咁架,我條褲係冇啦啦俾人扯撚左落黎。」


條MK仔見到有女仔俾佢嚇親即時好慌張咁為佢解釋返。


「喂兄台,你做乜冇啦啦係度露鳥?」


另一個MK fd亦質問佢。


「屌你估我有心架?係頭先唔知邊撚個除左我條褲咋。」


「喂點講都好,你嚇親個女仔喎,同人道返歉啦。」


街邊啲人有個阿叔見到咁都忍唔住口出聲,覺得條女係受害者要佢地道歉,呢個時候其實已經有唔少人圍觀,有啲仲拎住部手機出黎影相,


而我當然都唔執輸,我早已經係阿盈倒數嗰陣已經拎定部手機出黎準備影相。


「屌你乜撚野呀,唔好屈鳩我喎,講左好多次條褲唔係我除架,係有人幫我除。」


「你仲係度賴?我啱先先見你望住個女仔,之後你就露械出黎,你條露體狂露完俾我地斷正仲要連歉都唔道係唔係路先?」


「就算你唔係有心都好,你嚇親人係咪都要say返個sorry啊?」


「屌你條道德撚,關唔關你班仆街事啊,我話左唔係我做就係我做,我道你老味歉,你係咪嫌命長想隻抽,想隻抽咪出聲囉。」


「你咪郁手郁腳啊,呢度個個都影撚住你,同埋我已經報左警。」


「屌你係咪要搞大件事啊阿叔,我唔會驚你架,差館我未入過咩,你班仆街都咪撚影啦。」


條MK仔話就話唔驚,但其實內心已經慌緊,叫人唔好影佢,我就當然繼續係遠處笑到仆街,見到佢俾人笑俾人屌到面都黃晒,


佢都有今日,果然風水輪流轉,頭先屈我屌我屌得咁開心今次就到你地俾人屈,滋味如何?我心情瞬間爽晒,出返淡氣。


「仲未完架,好戲在後頭。」


阿盈見我笑得咁開心再示意我未完。


然後阿盈慢慢接近另一個MK仔,直至融合左入去佢身體,佢個人即時震左震…


「屌你細支野就唔好學人show出黎啦,睇下我嗰條啦,大你幾撚多倍,你睇清楚啦!」


突然另一個MK仔除左佢自己條褲show佢下體出黎指住佢條野鳩fing fing曬命,原來阿盈上左佢身,呢啲係咪就叫一波未平一波又起?不過又真係幾大抽下,完全係另一個層次。


呢一個舉動引黎更多人嘅哄動,好多人都尖叫歡呼左出黎係咁影相,睇黎呢度有好多花生友,個個都好似睇show咁,果然睇人仆街最開心,畢竟今次係佢自己主動除,


我當然都不外如是係咁影相,仲笑到肚痛,po上連登一定好hit。


「喂你係度做乜野?你係咪又係傻架露體狂,呢度公眾地方黎架,著返條褲佢啦。」


阿叔見佢突然除左條褲都覺得好愕然。


「咪係,你做乜鳩啊,知你大支啦,著返條褲佢啦,好柒啊你。」


撞我嗰條MK仔都睇唔順眼叫佢著返條褲。


「做乜野姐,我見你咁細支都夠膽show出黎,我依家咪俾你見識下乜野先係大,以後唔好咁有自信啦。」


「屌你係咪on9架,依家好多人望住你影撚住你啊,你除撚左條褲做乜鳩,走啦。」


「So? 我除左俾你見識,我仲想俾所以男人知道露械之前都要清楚自己條野係咪夠大先好露出黎,要有自知之明,唔好好似你咁,細細條牙籤仔都拎出黎獻醜。」


呢一下撞我個MK仔面都紅晒,畢竟大庭廣眾話佢牙籤仔都真係幾瘀。


「屌你你唔走我走,唔撚理你。」


「喂你唔好走住啊,你仲未同個女仔say sorry,仲有警察黎緊架啦,你兩個露體狂都咪使指意走。」


正當撞我個MK仔想走之際,阿叔抓住佢衣領唔俾佢走。


「屌死開啦仆街,我唔得閒陪你玩。」


然後佢一手推開左佢正準備逃走。


突然差佬就黎到,佢地由人群中穿左入黎,咁啱就同個MK仔撞到正一正。


「呢度發生咩事?係咪有人報警有露體狂?」


「阿sir就係佢地啦,佢地兩個露械,一個仲露緊,呢個就想走啊,快啲抓左佢啦。」


好快佢地就俾人塔住左俾人帶上車。


「喂做咩事,做乜野我會俾人塔左,阿sir我無辜架,我唔知點解自己會除左條褲,嗰陣我冇左意識…」


當塔住另一個MK仔之後佢就清醒返,阿盈亦出返黎,佢連自己做過乜都唔知,只係不斷話無辜。


「你唔好講咁多廢話啦,有咩野返差館先講啦。」


帶住佢上車個差佬都唔信佢,好快佢地就被帶左上警車,人群慢慢散去,睇黎呢件事呢排應該都會幾hit。


「阿洋你滿唔滿意呢?」


事後阿盈開心咁行到我身邊問我。

霸氣文哥 2022-4-1 14:26

第四十四章:愉快的日子


「超滿意啦,笑到我碌地哈哈,乜野仇都報晒啦,冇諗過你會諗到呢條橋。」


「你呢條橋唔單止俾返俾人屈同俾人屌嘅感受佢,仲要佢地當眾出醜,已經慘過我咁濟,最重要係你仲暗地裡勸預啲人唔好做露體狂,擊沉啲露體狂嘅自信,我睇得出你用意。」


「聰明喎,竟然睇得出,我都係女仔,我都唔想有其他女仔會受到露體狂嘅騷擾,不過佢地呢啲叫惡有惡報,佢地咁慘都應得。」


「但睇唔出你會咁粗魯,竟然學佢地咁爆晒粗,扮得好似。」


「咁上得佢身緊係要扮得神似啲,你唔好見我以前唔出聲咁,其實我都接收好多平時男仔傾計啲內容架,聽下聽下咪自然學晒。」


「真係估你唔到,你啲學習能力好到呢,連壞嗰方面都學到十足。」


「但都不得不多謝你幫我出左呢淡氣,好彩我有聽你講吞左淡氣同佢地道歉冇爆出黎。」


「多咩謝,小事黎姐,我都係突然諗到呢條橋出黎,話過你有咩事我都會幫你架嘛。」


「總之今次都係多得你係我唔洗蝕底情況下幫我搞佢地一鑊,依家先知原來你啲諗頭都幾多。」


「你俾人蝦我就緊係諗頭多啦,正如你為我好嗰陣都變到好有急智。」


「話說點解你上到個MK仔身?係咪佢陽氣唔多?」


「冇錯,因為我依家陽氣多,相反我見到佢身上嘅陽氣唔係好多,所以我可以上佢身吸收佢意識。」


「佢應該係平時食太多煙又唔做運動同曬太陽,仲要經常熬夜,然後搞到身體唔多健康先會導致咁少陽氣,所以其實一個人嘅健康程度都可以反映出佢嘅陽氣多唔多。」


「但照計佢咁少陽氣你仲上佢身佢應該會更加傷,可能會死咁濟,因為你吸收左佢意識,但點解佢之後都冇乜事?」


「因為我只係上左佢身好短時間,通常係長時間上一個人身或者好頻密咁上佢身先會令一個人嘅身體急速衰竭,否則佢唔會有大礙,就只係令佢出下醜哈哈!」


「頂你又提起啱先啲野哈哈,諗起你扮佢講啲野就搞笑。」


突然阿盈又講返頭先件事搞到我又忍唔住笑左出黎,不過我今日確又再長多左知識,以前以為阿盈一上人身嗰個人就會死,就好似搶佔左人地個身體咁,但事實並非如此。


「你滿意就好,以後再有人蝦你我都一定會俾你蝦返佢。」


「你幫我係好,但蝦還蝦,唔好搞出人命啊,因為一個人幾衰都好都未至於要死。」


我講得出呢啲說話證明我都仲有測忍之心,其實我係覺得人間同陰間係應該河水不犯井水,依家阿盈已經干涉左少少,我唔想佢係人間仲要整啲大單野出黎,例如殺人,咁樣的話一定會引起啲法師注意令佢地做野。


「知啦,我會有分寸,我話過我遇到你經歷過咁多事之後我怨氣降低左架啦嘛,我唔會再下下諗住要害死一個人,最多只係俾啲教訓佢。」


「你識咁諗就最好啦。」


「好啦,今日都行得七七八八,我地返去煮飯仔啦。」


「嗯嗯,但你都要買餸俾我先煮到好味嘅餸架。」


「好好,依家順便去買埋…」


就係咁,一日MK仔偶遇之日就咁結束,我地又經歷左多樣野、而阿盈又幫左我一次,我仲要「買」左好多衫俾佢,以後日日都會變得靚女,希望以後日子都會咁幸福。
.
.
.
自從阿盈可以步出家門之後,呢幾日我都同佢周圍去,頓時多左好多活動,一齊行街shopping、唱K、跑步、行山、坐摩天輪等等,


亦都係咁我生活頓時增添左一點樂趣,我唔再係孤獨,因為幾時都好我仲有個妹陪住,每日都咁開心。


唱K:


「你就好啦,唔洗錢入黎唱K。」


「都係有你帶先得咋,得我一個睇下唱唔唱到。」


「人地睇到我一條友黎唱K一定心諗有條毒撚黎唱毒撚K。」


「唔洗理人點諗啦,不過都係架,人地又見唔到我淨係見到你一個,仲要我唱歌淨係你聽到。」


「得戚啦你,即就算你唱到幾大聲出面都冇人聽到?」


「係啊,就好似人地見唔到我咁,人地係會連聲都聽唔到,淨係會見到我個咪凌空飛左起身。」


「咁都得,你唔好嚇親人添呀。」


「唔會啦,啲人幾何會入黎,就算係CCTV都唔會留意得咁仔細啦,你驚嘅幫我拎住枝咪囉。」


「好啦好啦,你講到咁就算啦,但你真係唔好俾人留意到先好呀,盡量放低啲枝咪。」


「知啦,快啲點歌先啦。」


「你想唱咩歌?」


阿盈諗左一陣。


「不如黎首洗腦歌越難越愛先!」


「一黎就要洗我腦。」


「呢首歌我以前好鐘意聽架。」


呢首又真係幾洗腦,佢竟然會聽上左腦,然後我拎起手機開始點歌,好快電視播出第一首歌,阿盈好快投入狀態拎起咪凝望住電視…


[i]「…無懼世事變改,還是越難越愛,為你所以在期待…」[/i]


唱到高潮位,又唱得幾好聽喎、幾有神髓、高音位跟到晒,估唔到阿盈唱功都幾了得。


[i]「懷抱的手,我不想再放開。」[/i]


過左幾分鐘佢終於唱完,佢表現得好興奮咁望住我,睇黎佢係意猶未盡。


「我唱成點?我好耐冇唱歌啦。」

霸氣文哥 2022-4-2 12:39

 第四十五章:登門拜訪


「好聽啊,估唔到你以前唔聲唔聲原來唱歌咁好聽,依家我終於欣賞到。」

「我都估唔到我唱得咁好,以前我唔係點唱歌。」


「既然你依家知你唱得好聽,平時係屋企都唱多啲啦,我自己聽完都會舒服啲,同埋得我會聽到唔驚尷尬。」


「好啊就咁話!」


「唔講住,到我唱lu,我點左首浮誇。」


上一首播完,電視好快跳到下一首我點嘅歌。


「哇你咁癲點浮誇,你得唔得架?」


講真呢首歌認真唱真係會叫到聲沙,不過難得同阿盈黎唱一次K就癲一次啦。


「唔好睇小我,話晒我都係歌王。」





[i]「你當我是浮誇吧,誇張只因我很怕…」[/i]





結果啲高音位我上唔到去格硬上唱到走晒音,然後就唱到成個胖虎咁,阿盈就笑到碌地。


「笑死我哈哈,你的確係歌王,不過係胖虎啊隻嘅歌王。」


果然黎親唱K嘅男人都係天賴之音,就好似我咁。


「我呢啲叫真男人,係呢度我可以展現我嘅歌喉,冇其他人會聽到我呢啲咁真摯嘅歌聲。」


「唔好唔記得我仲係度喎。」


阿盈重點提醒一下我。


「你聽到我無所謂啊,因為日後我係屋企都會時不時展現我嘅歌喉,你成日都有得欣賞。」


說罷我奸笑左一下。


「哇唔好啊,我頂唔順嗰陣就會拎封箱膠紙封住你把嘴!」


阿盈笑住咁駁返我轉頭。




跑步:


「好攰啊,你跑咁快又無限氣我點夠你跑。」


呢日阿盈抓我同佢出街跑步,佢著到成身運動look咁同我跑,


而跑步係我最弱嘅一個項目,大佬我十年唔跑一次步,點會有氣同你跑,呢刻嘅我就算慢跑跑得幾步都踹晒氣。


「你跑唔過我你咪當我係你領跑員囉,我又唔會一枝箭衝走。」


「間唔中做下啲有氧運動好啊,跑步就最好,又方便又可以曬到太陽又做到運動,簡直一舉三得。」


估唔到佢唱歌掂,連運動方面都有啲認識。


「係姐,但我已經想死啦。」


「加油你得架,跑多啲慢慢條氣就會順。」


「你講就易姐…我唔係你…」


依家已經喘到我連講句野都辛苦。


「你就好啦,依家跑步都無限氣,如果俾你現實咁樣應該可以跑贏晒啲世界冠軍。」


「唔一定架,雖然我依家無限氣,但依家我跑步嘅速度係會keep返係我生前嘅速度。」


「即我就算無限氣都淨係可以用以前全速跑嘅速度黎跑,人地世界冠軍輕輕鬆鬆都快過我全速跑啦。」


「除非…」


「除非乜野?」


「除非我收起對腳飄過去代替用腳跑,咁就完全脫離我以前生理嘅限制,可以幾快都得。」


「咁都得,原來仲可以咁樣開外掛,唔怪之得我先前聽人講鬼跑嘅速度可以快過保特…唔係跑,係飄至啱。」


「咁你依家又唔用飄黎同我跑?」


「我想用腳陪你一齊跑嘛,費事你會話唔公平啦,同埋我用飄嘅話你更加追唔上啦。」


「咁大膽你竟然敢串我,知唔知男人嘅「樽鹽」係好重要,等我追到你就知味道。」


然後我唔理攰唔攰加速嘗試追上阿盈。


「哈哈好啊,你追到我先算啦…」
.
.
.
「我返黎啦~」


今日我同阿誠出去食左個晏晝飯吹左陣水就返黎,佢竟然好羨慕我多左個妹照顧自己,


畢竟佢想搵條女照顧下都冇,然後就繼續講經教我好好珍惜眼前人唔好再好似之前咁。


「阿盈,你係邊?」


但返到黎並唔見阿盈係度,屋企空無一人。


「我係度呀。」


然後身穿淺藍色T-shirt、黑色短褲嘅阿盈就從我間房慢慢行出黎,佢手上拎住一張相好專心咁睇住。


「做咩啱先唔應我嘅?」


「冇啊,我睇緊相咋嘛,一時專心得濟冇留意你。」


然後我好奇之下過去望下張相,相片有一啲污漬,相裡面有阿盈同佢阿爸同阿媽,原來係一張全家幅。


「點解冇啦啦搵到張全家幅嘅?」


「我今日去完我阿媽屋企。」


「呢張相係我偷偷地拎返黎,估唔到佢將有我嘅相都貼晒上幅牆。」


「你今日去完伯母屋企?佢近況如何?」


我突然聽到阿盈今日去完伯母屋企都有少少愕然,果然拎到個地址真係有用,但睇黎咁樣又會令佢觸感傷情。


「佢屋企唔算大,周圍好多雜物有啲雜亂,但就將我啲相擺得好整齊。」


「我去到嗰陣見到佢上香拜緊我,原來佢屋企都整左個我嘅神主位,仲有幅我嘅車頭相,上完香就對住幅我同佢影嘅相望住。」


「佢話好掛住我,如果我仲係度就好,我嗰陣真係好想現身同佢相認,我都好掛住佢。」


「但我唔可以,見住佢依家仲咁放唔低我,我現身只會令佢更加放唔低、甚至呢一世都唔會放得低我,佢一定要忘記我!」


「所以我只可以好近咁望住佢,咁多年日見夜見都冇認真望過佢,今日見到佢都老啦,臉上多左幾條皺紋同白髮、樣子亦開始變得滄桑。」


「然後我望到隔離有幅我同阿媽影嘅童年照,見到當時佢仲好後生好靚,同依家好大對比,果然歲月不饒人。」


「之後我記起我細個好幸福,真係好掛住細細個俾佢寵愛、帶我周圍去玩,我亦好錫阿媽,我嗰陣好多回憶返晒黎。」


「望住每幅相每幅相都代表我地唔同嘅回憶,我忍唔住喊左出黎…」


呢一刻嘅阿盈睇落有啲難受,好似有啲想喊出黎咁,以前嘅開心回憶一一係佢腦中湧現,睇得出佢仲未放低伯母。
頁: 1 [2] 3 4 5 6
查看完整版本: [靈異] [愛情] [毒L敦倫外傳]我屋企養左隻女鬼…