查看完整版本 : [靈異] [愛情] [毒L敦倫外傳]我屋企養左隻女鬼…

霸氣文哥 2022-4-3 13:46

第四十六章:忍痛拒見


不過都明白嘅,見到自己親人咁錫自己但又冇得現身相認嗰種感覺真係幾難受,就好似大家鐘意大家但就偏偏唔可以行埋一齊咁,淨係可以遠遠望住對方。


「我都話伯母係錫你架啦,不過都估唔到佢掛你掛到成屋都擺滿你嘅相,你地大家都未放得低大家,同埋都辛苦你啦,你要控制住自己唔現身俾佢見到。」


「嗯,佢的確好錫我,佢將間屋打造左成一個回憶地,但可惜我地唔可以再見到大家,佢以後唔會再見到佢個女陪住佢…」


「你咁樣會好辛苦,你要唔要搵次真係現身同佢見一見?」


我見佢忍得咁辛苦、咁唔開心我都鄧佢難受,明明這麼遠,那麼近,但就見唔到面,真係好惋惜,相信如果佢俾伯母見到一定大家都好開心,就當係最後一面。


「唔得!我咁樣做盞令到佢更加放唔低我,我唔想佢因為我而永遠停留係過去,佢要振作!我寧願我難受一世都唔想佢停滯不前。」


「我相信依家呢啲痛只係暫時架姐,佢日後過得平安我就開心,我自己都唔可以繼續停留過去,我要同佢一齊進步!所以我之後會少啲見佢…」


真係估唔到阿盈都有狠心嘅一面,為左令自己都唔好再停留過去,佢堅持唔現身唔單止,仲寧願唔去同佢見咁多面,佢想用時間沖淡一切…十足情侶們分手後。


「好啦,咁呢段時間你要辛苦下先。」


「嗯…我會捱得過…」


然後阿盈雙眼開始漸露少許淚光。


「你睇下你個喊包又想喊啦,你想喊嘅話就喊出黎啦,會舒服啲。」


「我都知你呢段時間會有啲難受,但無論點都好,阿哥永遠都會係度陪住你、幾時都有個肩膀借俾你挨住~」


「唔得!我唔可以再俾你叫做喊包,我已經同自己講唔可以再咁易喊,我要堅強!但都多謝你一直會陪住我。」


「傻妹黎,喊都只係一種情緒、係每個人都會有嘅情緒黎,唔代表咁樣就係唔堅強,因為再堅強嘅人都有跌低嘅一日,你要抒發出黎先舒服,屈住屈住會好易屈出病。」


「放心我已經係一隻鬼,唔會再有病架啦。」


係喎,一時唔記得阿盈已經唔係人陣點會有病,俾佢陰左我一鑊添。


「衰妹夠膽玩我?」


「既然你唔會病又堅決唔會喊,咁我就…令你開心啦,我要唧死你!」


然後我一講完即刻伸手過去唧佢。


「你又黎呢招!?哈哈唔好…我又冇做錯野做咩要咁樣懲罰我,我講事實咋喎哈哈…唔好再唧好痕哈哈…」


「邊個話唧一定要懲罰先可以咁做,令你開心都可以咁做架嘛,你睇下你依家幾開心,笑到見牙唔見眼。」


怕唧嘅人係唔同啲,可以利用呢點秒令佢開心返。


「你唔可以一言不合就出陰招架哈哈…」


一陣之後我唧完,我唧到佢笑到出眼淚,都唔知係喊定笑嘅眼淚,係哭笑不得。


「點啊,仲有冇見唔開心?」


「冇啦,乜都笑晒出黎,仲點會有唔開心,但唔該你下次想唧我嗰陣同我講聲俾我準備下啦。」


「睬你都傻,俾你準備你仲會俾我唧?緊係要殺你個醋手不及。」


「咁睇黎我之後要難過都好難。」


「係架啦,我一日係度你一日都會係開心果。」


「係呢,伯母今日唔洗返工咩?」


我見阿盈開心返後我再問一啲關於伯母嘅野。


「佢今日應該放假,我見佢張床有套清潔工衫,佢依家應該做緊清潔,估唔到阿媽佢依家要淪落到要做清潔,以前佢好怕污糟。」


我都估唔到伯母依家竟然會轉左做清潔黎維生。


「咁為左生活都要豁出去頂硬上,同埋清潔工都係一份工黎嘅,職業無分貴賤,佢地都為呢個社會貢獻緊,佢地都好辛苦,值得尊重。」


我見到阿盈好似有啲失望咁,即刻講返啲好野安慰返佢,唔通繼續講啲負野等阿盈繼續失望落去咩。


「我知職業無分貴賤,我冇嫌棄佢、冇睇唔起佢,我只係估唔到佢會接受到清潔工呢啲工種,話晒佢以前係一個小女人又冇乜點返工又愛乾淨。」


原來係我柒左添。


「佢可以咁樣咪證明佢肯嘗試、適應力強,佢依家要一個女人仔靠自己過活真係要努力啲先得。」


但我都照繼續講啲好說話。


「阿媽依家真係好慘…孤伶伶生活乜都冇晒,如果我當初堅強啲就好…」


仆街講講下又令阿盈有啲唔開心添。


「過左去嘅野又唔好再諗啦,就算你當初冇尋短見,佢地都一定會繼續打鬧你,到最後都會迫到你爆煲。」


「同埋伯母唔會孤伶伶啦,佢返工會識到好多清潔姐姐架嘛。」


「知唔知上左年紀嘅人係最易結識到朋友,因為佢地通常呢個時候已經無乜機心、大家都想搵返個伴傾下計,加上大家都係做清潔冇乜競爭更易混熟。」


社會就係咁,通常權力越高或者睇落越高等嘅工(例如文員)權鬥同機心就越多,呢啲時候就可以體現到人原來係可怕過鬼,


相反一啲低等啲嘅工就冇咁複雜嘅心思去玩權鬥,亦自知冇咁嘅能力,佢地會想開開心心過一日、唔想有咁多是非,所以佢地往往好願意交心識朋友。


「都係嘅…如果係咁就放心啲。」


聽完後阿盈好似放下心頭大石咁露返出少少微笑。


「伯母算好啦,起碼佢有份工返下有錢賺先,唔似我咁依家銀包已經見底了。」


講真依家過左一個月雖然用嘅錢好少,但齋俾租金都食左我幾千蚊,所以已經用得七七八八。

霸氣文哥 2022-4-4 13:14

第四十七章:見工


「係喎話咁快依家6月幾,你襯依家IVE未開學快啲搵份part time做下先啦,你媽又仲有兩個月先返。」


「睇黎都要,我唔可以再懶惰落去。」


「我諗住近近地去附近惠康做下算,錢唔多但應該都足夠我呢兩個月生活嘅。」


「聽講表姐夫個fd都做緊惠康,佢仲要係惠康經理,好似叫阿豪。」


「惠康大公司緊係多人做,你呢幾日拿拿林去見工啦。」


「我去返工之後就冇得經常陪你去玩架啦,你真係捨得?」


「你返工重要嘛,我同你媽想法一致都係為你好,你大個仔係時候要賺下錢啦。」


「至於我,我自己去玩都得,有時候自己獨處下行下街都可以好開心,最緊要係你每晚會返黎都見到你嘛!」


「既然你諗得咁開通嘅咁我就放心。」


「好啦,我聽日就去見工!希望佢仲請人。」
.
.
.
呢日我著得整整齊齊咁出發去附近間惠康,雖然我只係去做下兼職,而且又唔係啲十分莊嚴嘅公司,但做個樣都盡量著得整齊少少,如果佢請嘅話將會係我第一份工。


我黎到惠康,周圍都好多人買野,仲有啲著黃色同黑色polo恤嘅店員就係度執緊貨,呢間惠康都幾大,


以我咁多年黎惠康買野嘅經驗,著黃色恤衫嗰啲一定就係經理,


然後我搵左一陣,終於搵到個著黃色恤衫肥肥地、樣子都幾後生嘅店員,佢一定就係經理,我上前去問佢。


「唔該我想問你地呢度仲請唔請人?我黎見工。」


執緊貨嘅經理回過頭望住我。


「你黎見工嘅?請啊,你好彩啦,我地正正差幾個人就full晒。」


果然佢就係經理,估唔到佢咁簡單就請左我?唔睇學歷嘅工真係好,同埋真係幾好彩,俾我攝到個尾位。


「你跟我黎我帶你入房再傾啦。」


然後我跟住前面位經理行到經理房。


「我俾份form你填,填好就出黎搵我啦。」


入到房後,呢度空間唔大、周圍雜物都幾多,而經理就係隔離部電腦print左份好多頁紙嘅form出黎,好hea,面試都唔洗面,有位就即請左,我鐘意。


「你係啱啱考完DSE入黎做兼職嘅?」


我都未講野,佢竟然就一眼睇出我係考完dse入黎做兼職?


「係啊。」


「你唔洗覺得愕然,因為呢個時間好多後生仔考完dse都會黎呢度做一做兼職。」


既然係咁,咁惠康應該都幾多新力軍,但頭先出面見到做野啲人暫時都係啲上左年紀嘅人。


「咁我都順帶講一講先啦,我係呢間舖嘅經理,呢度總共有3個經理,我係其中一個,你可以叫我唐生。」


竟然經理都唔洗叫,直接叫個姓。


「唐生你好。」


「唔洗咁拘謹,我地呢度好從容架咋,好易係度混熟。」


係就係咁話姐,我第一次黎見工,仲要第一次見經理,點都會緊張啲。


「係呢,你有冇帶張相同住址證明嗰啲?」


仆街要拎呢啲架咩?我淨係帶左個人黎。


「冇啊,我今日唔記得帶。」


我唯有唔知都扮唔記得,唔會顯得我無知。


「冇唔緊要,你遲幾日帶返返黎就ok。」


呢個經理真係好好,幾驚因為我冇帶就唔請我住。


「冇咩事嘅話我出一出去先,你填完就出黎搵我啦。」


「好,冇問題。」


然後經理就出左去,房間得返我一個,我慢慢咁細閱份form…


一陣之後,我終於填晒份form,原來時薪只係得40幾蚊,正當我想出去搵經理嗰陣,一開門我就見佢都入緊黎,黎得啱啱好。


「填好啦?」


「填好晒。」


「果然夠爽手,你返唔返到夜晚?我地夜晚缺人。」


「夜晚即係返到幾點?」


「我地惠康開到11點,執埋啲手尾你當12點收工啦,即4至12點8個鐘。」


哇有啲夜,估唔到我第一份工就要返到咁夜,好彩近我屋企。


「有冇得早啲?」


「冇啦,得返呢更,你係咪ok?」


唔ok都要ok啦,我依家真係冇錢了,暫時得惠康係咁易請人,唯有屌拿媽頂硬上!加上又唔係長做做住先啦。


「ok嘅。」


「放心啦,呢度做啲野好簡單,時間好快過,唔辛苦。」


佢見我答得有啲猶豫就加多句說服我。


「嗯,我真係ok。」


「咁就好,至於邊日唔返工你同我講就得,呢度啲時間好彈性~」


咁正?兼職果然係兼職,一個禮拜返幾多日都得,夠晒彈性。


「你聽日開始返工得唔得?」


真係夠快手,今日請聽日就有得返。


「可以。」


「好,咁你聽日記得準時返,聽日我再慢慢教你舖頭平時有咩野做。」


「收到。」


「你叫阿洋?方伯洋?」


然後經理就睇左睇我填嘅份form之後突然質問左我個名。


「係啊,我叫阿洋,做咩?」


「你係咪有個表姐...佢叫張倩欣?」


佢突然叫出我我表姐個名,我一陣愕然反應唔黎。


「係…係啊,你點會知?但佢已經唔係度,你係佢邊個?」


「即係你係佢表弟?我竟然會係度撞到你,真係個天俾我地嘅緣份。」


佢表現到好興奮,但我臉一臉懵然。


「我係你表姐嘅前男友,我叫唐富豪。」

霸氣文哥 2022-4-5 17:24

第四十八章:表姐的前男友


佢係唐富豪?係咪即係我大表姐口中提及過表姐夫嘅fd?


「你就係大表姐口中提及嘅表姐夫個fd?」


「冇錯啊,我係你表姐夫阿偉個fd,我同佢中學已經識架啦,呢個世界真細小。」


「我淨係聽到佢提及過你,但唔知表姐以前仲有個男友。」


「佢冇提及都正常嘅,係我以前累左阿欣。」


「點樣累左佢?」


我變得十分好奇,因為關於表姐嘅死我真係知得好少。


「呢件事一匹布咁長,我遲啲再解釋你聽啦。」


「係呢,你阿媽有冇啲咩異樣?」


「緊係冇,佢會有啲咩異樣。」


「冇異樣就好,因為6年前件事真係好恐怖好深刻,你姨媽佢嗰陣發晒狂搵個女尋仇,最後阿欣俾佢殺左,佢自己亦都俾警察開槍射死左。」


竟然出動到槍?我真係乜都唔知,嗰陣新聞淨係話發生左兩單命案,但我冇詳細咁睇,


而我老母亦都只係同我講佢地係因為一啲事所以雙雙自殺,之後老母就每年都會提起佢地自殺件事,亦開始避忌講一啲鬼神野。


「我真係唔知原來當時咁轟動,仲要表姐係由姨媽親手殺死…?」


我覺得難以置信,自己個阿媽殺死自己親生女喎…點會做得出呢啲事?


「你真係一啲都唔知?不過都正常嘅,你嗰陣咁細過個,做阿媽嘅都唔想個仔知咁多呢啲唔吉利嘅野。」


「佢淨係同我講佢地係雙雙自殺。」


「當然唔係自殺,你媽都係為你好唔想俾你知咁多呢啲唔好嘅野。」


佢越係講到咁我就越想知箇中嘅真相。


「咁既然你話表姐係姨媽殺,點解你又話係你累?」


「總之就係我累,唔係我咁衰佢唔會離開我,唔係我佢唔會入左醫院,唔係我留意唔到伯母我就唔洗俾佢上左阿欣病房。」


「都唔係你嘅錯嘅,睇得出你都好保護佢,都咁多年,要放低架啦。」


見佢講到咁沉重,雖然我唔知內情係點,但我都安慰佢幾句。


「我冇野呀,我放低左lu,嗰陣多得阿茹一直係身邊陪住我、鼓勵我,我先慢慢振作,亦即係我依家嘅老婆,只係依家諗返起都仲會有少少內疚。」


我柒左添,原來佢已經有老婆。


「咁冇事咪好。」


「但你點解知我個名?」


「係咁嘅,以前阿欣提過話佢有個表弟,仲拎左張你細細個同佢合照嘅相俾我睇,上面仲寫左你個名——方伯洋。」


「原來係咁,我以前好少同佢地影相。」


「我之前拎手機影低左架,我搵俾你睇下。」


佢聽到我好少同表姐佢地影相即刻係手機度搵返出黎,務求俾我回憶起啲相。


「嗱,就係呢幅。」


佢搵左陣好快搵到,然後遞部機俾我睇。


我望左一眼,的確係我同表姐嘅合照,相入面我頭上面寫左我個名,我諗應該係我以前練字嗰陣寫左上去,亦正正顯示呢個就係我。


「呢幅相係我讀小學同表姐係公園玩嗰時影,佢嗰陣成個男人咁搭住我膊頭撓住我條頸,睇返都真係覺得好懷緬。」


冇錯,以前同表姐玩嗰次真係好開心,嗰陣真係好稚氣,跟住好耐都冇再見過,可能因為少見面嘅關係,所以6年前佢去世嗰陣我都冇乜大嘅感受。


「你真係好記性,仲記得幾時同佢影,以前佢每次睇到呢幅相都話好懷緬,話好耐都冇見過你唔知你依家過成點,又唔知你住邊。」


「其實我以前住港島嗰邊,我都係呢排先搬左過黎,然後我老母上個月話返3個月鄉下,之後我見冇乜錢就近近地黎呢度做份part time賺少少錢,點知就咁啱遇到你。」


「原來你一直住港島嗰邊,因為佢自嗰次見完就冇再見過你地之後,又冇晒聯絡,好似失蹤左咁,佢覺得你地好神秘。」


竟然用神秘黎形容,我都係一個普通人姐,不過的確我老母一直以黎又真係好少同姨媽嗰邊行近,我都唔知點解,可能佢怕生掛。


「話說你好似同你表姐佢地唔多熟咁嘅?見你地好似特登唔想見佢地咁,好似想疏遠佢地,又對佢啲野乜都唔知。」


啱先一諗依家就即刻問我。


「我都唔知,淨係記得影完嗰次相之後,老母成日都叫我唔好同佢地行咁近,話姨媽癲左會傷害到我,又話表姐佢學壞左驚帶壞我,自此就冇再見過。」


「直至去到表姐嘅葬禮我地先去左一去,仲有大表姐嘅婚禮,但有一樣野好奇怪,我到依家都諗唔明。」


「咩事?」


「無論去葬禮定婚禮,老母都叫我隨身袋住把利器,以用黎防身。」


「我問佢又冇危險有咩好防身,佢冇答我,淨係叫我袋住,以用作不時之需,所以我到依家都諗唔明。」


「咁奇怪?照計你姨媽死左都唔會再有威脅,睇黎你阿媽佢戒備心好重。」


「唔知佢啦,佢份人成日神神化化咁成日凝住好似有人想害佢咁,我都好少理佢。」


「唔好講呢啲住,係呢,大表姐佢呢排點?」


見佢托住頭思考得好投入,我唔想佢覺得我老母係傻婆咁,我嘗試轉移話題。


「你講彤姐?佢自從生左仔之後,依家都仲keep得好索啊、波都大左,佢同阿偉依然好幸福,但就變相湊仔多囉,佢個仔今年都5歲lu。」


我一講到大表姐,佢就表現到好興奮咁、臉露笑容,流露出一副鹹濕嘅容貌,乜佢咁鹹濕架咩?


「然而你同你表姐佢地咁耐冇見,我都好耐冇同屌偉見面lu,佢依家都好忙,人大左朋友真係會少啲。」


然後講返表姐夫又變返正經,佢唔會係啲朋友妻、執兩劑嗰啲人黎掛?


「睇黎佢地過得幾好,佢地幸福就好。」

霸氣文哥 2022-4-6 12:58

第四十九章:第一份工作


「咁你呢?你同你老婆又點?」


「我同我老婆當然都好好、佢更加索,自從上年我地結完婚,佢個波不斷變大,我就更加勁更加興奮,就算佢依家大左肚我地仲可以夜夜笙歌,幾鬼爽。」


講到佢老婆佢又再次變得好興奮好鹹濕,連啲咁私隱嘅野都同我講晒,我冇野好講。


「表弟,唔好話我教壞你,你都要學多啲呢啲性知識,你第時唔夠勁個女人會俾綠帽你戴架。」


佢講起呢啲野見我係熟人真係一啲都唔避忌架喎,佢以前一定都係咁鹹濕。


「知架啦,呢啲野我會自己領略,依家我先18歲,仲有大把時間,我一定會搵到個唔會背叛我嘅好女仔。」


「咁你真係要好好領略啦,有時啲女仔唔可以單睇表面架,你覺得佢純,但佢可能係經驗老到同好大食嘅女人黎,到時你就要發揮你嘅‘真功夫’。」


「會架啦,我相信我第時搵到個女仔係唔洗透過性都可以維繫到段關係。」


「望就咁望啦。」


「唔講住,我出返去做野先,份form我拎走先,記得聽日準時返工,同埋帶返啲文件返黎,你依家可以走架啦。」


唐生望左望個錶之後就急忙講埋句野準備出去。


「依家多左個熟人同我一齊返工,好開心,以後我就同表弟你一齊拍住上架啦。」


「同埋我住牛頭角嗰邊,你得閒可以過黎搵下我。」


佢真係當正我係佢親表弟咁好關照我,仲要好熟咁講埋佢住邊叫我得閒可以搵下佢,


不過都開心嘅,有個經理照住點都好過得自己一個唔識人先。


「好,一於咁話,咁以後就靠你照住我。」


「我緊係照住你啦,話晒你係表弟。」


「我出去先,你都可以走啦。」


「好拜拜,聽日見。」


我同唐生一齊步出門口後,我揮手向佢道別。


呢晚我返到去同阿盈分享晒今日嘅事,包括之前講嘅大表姐夫個fd做緊惠康經理咁啱就係呢間做,佢仲要係細表姐嘅前男友、仲有幅相嘅事,聽完阿盈都覺得好巧合。
.
.
.
好快到左第二日,今日開始我就要適應夜歸生活,亦坐係我第一份工作,我換一條黑色長褲準備出門。


「阿盈我出門啦,今晚你要好夜先見到我。」


「你出去啦,我會等你返黎~」


「我驚得你一個係度會悶親咋。」


「悶咩,我睇住電視時間好快過唔會悶。」


「咁就最好啦。」


然後我拿拿聲步出門口,下晝4點左右,我返到惠康,同以往一樣呢個時段好多人買野,好熱鬧,


我交返啲文件俾唐生後,佢俾左件黑色polo恤我換,同俾左條黑色嘅圍裙我纜住,成身全黑成個黑寡婦咁,


接著佢帶我行左一趟成間惠康、解釋日常運作同平時要做啲乜,而我就負責做乾貨,即唔洗收銀淨係執乾貨,凍肉嗰邊都唔洗我搞。


「呢一排叫做水街,專執汽水嗰啲,呢度啲貨算最易執,因為啲牌子你都熟,依家你就係呢度執住上住架先啦,地下啲箱裝住啲貨你可以拆黎上。」


唐生帶我到放汽水嗰排,叫我將地下啲貨補上架,都唔係好難姐,但一條街咁長都要啲時間搞。


「如果你搞掂就去隔離擺紙包飲品條街搞啦,好易架咋。」


「收到。」


「不過做還做,都要時刻留意下周圍啲…靚女,平時除左師奶都幾多靚女買野,𥄫下女人都醒神啲。」


唐生變得真係快,呢頭叫我做野嗰頭就叫我𥄫女。


「呢呢呢…一講靚女靚女就係度,你睇下前面拎住個籃條女幾索,著晒緊身裙皮膚又白白滑滑。」


突然唐生叫我望向前面,的確有個幾索嘅女仔單獨係前面行過,佢頭髮有少少金,周圍搵緊佢想買嘅野,呢位經理果然夠晒鹹濕。


「需要嘅時候你可以過去問佢係咪需要幫手,或者佢過黎問你嗰陣就要把握機會俾好啲嘅服務佢啦,咁樣你就會留到個好印象俾人吸引力都高啲。」


「鬼咩,我又唔係去溝佢,洗咩留咁好印象。」


「有時你留好印象唔一定係要你溝佢嘅,可以係人地鐘意你架姐,所以話你單身唔識野就係咁。」


「你又知我單身?」


「有樣睇啦,睇你望住條女望到眼金金又冇野講咁dry就知,仲要臉都紅晒。」


我摸下自己塊臉,的確有啲熱,果然真係臉紅左,但咁都睇得出單身架咩?


「俾你發現左添。」


「你咁鹹濕,你同表姐一齊嗰陣咪俾你玩謝?」


「…又唔算玩謝嘅,嗰陣佢都好大食,只係我之後著左魔,阿欣想幫我先選擇同我分手。」


講到表姐唐生突然沉左一沉。


「所以之後我都好努力控制我嘅慾望,唔好俾性慾凌駕左自己,但𥄫女呢樣野真係控制唔到,呢個世界太多誘惑。」


「小心俾你老婆見到。」


「冇野啦,佢依家都見慣由得我𥄫,話唔會變心就得,呢樣我係肯定唔會變,因為我真係好愛我老婆。」


「況且佢對自己個樣都好有自信,唔會覺得我𥄫其他女就等於佢唔靚,佢會覺得呢啲係男人之常情,的確佢依家真係好靚。」


「你老婆真係好,好多女人會好唔鐘意男人𥄫女,要珍惜。」


「一定啦,以前已經辜負左一個愛我嘅女人,依家我唔可以再辜負另一個女人。」


雖然唐生佢好鹹濕,但原來佢都有一顆專一嘅心嘅,𥄫女只係表面。


「好啦唔講住,女就𥄫完做野先。」


「收到你。」


然後唐生叫我做野後就行走左,我一個人係度開始執貨上架。

霸氣文哥 2022-4-7 11:28

第五十章:收工


我將地下啲貨拆開將入面啲汽水補上架,我發覺汽水‘災情’都幾嚴重,由其係4枝裝嗰啲,俾人掃到空晒咁濟,我要補返好多上去。


我由街頭上到街尾,將地下啲貨一箱箱補上去,有啲架上本身冇乜點少過嘅就唔洗理,但好多都係空左,汽水銷量實在太好…


我用左大半個鐘時間終於補完水街呢一排,由本身架上面好多空嘅位變成依家每一行都變得好飽滿、啲貨整整齊齊泊出黎,見到都覺得幾治癒。


不過依家只係一個開始,我仲有隔離紙包飲品嗰排要上埋,有排搞,不過有野做下又幾好嘅、冇咁悶,時間的確好快過。
.
.
.
7點幾出去食完個飯又再返返黎上架,好快就去到11點幾,舖頭都已經閂左門,


呢個時候另一個經理黎教我拉架,佢叫張生,態度閪閪地,表現出好嚴肅神情,好似好唔耐煩。


拉架即係將架上面啲貨拉返出黎見到個樣、整整齊齊,務求凝造出個架貨量充足,唔理啲貨後面有冇貨,簡單啲講即係做個樣。


咁咪即係好似我今日將啲貨上晒架咁,令到每個架都變得好飽滿咁,只係今次我淨係就咁拉返整齊就得。


都好簡單姐,但佢要求好高,佢要我拉到每樣貨品都好整齊、唔可以調轉、要貼到架條邊,所以應該都要啲時間。


呢個時候除左我拉,全部惠康員工都係每一排度拉緊架,務求將所有架回復飽滿嘅樣,唔怪得第二日黎到惠康架上面啲野又變得整齊返。


我當然都唔例外,我仍然由水街拉起,將每一pack汽水拉整齊貼邊,唔夠嘅就係架頂多左出黎嘅貨拎落黎補返個窿,


我拉得好認真,感覺就好似我好專心拉花咁,務求拉到最整齊、最完美,如果俾老細見到我咁認真,加得人工啦……


好快已經差唔多12點,我終於拉好水街啲架,但張生就叫我拉埋隔離紙包飲品嗰邊,因為嗰邊未搞掂。


結果我拉埋已經12點半有多,已經ot左,以為12點已經夠夜,原來ot玩得你更夜,好彩ot係有補水。


「唐生我搞掂好晒。」


我搞掂晒之時咁啱唐生就係我隔離,我立即向佢報告。


「阿洋今日辛苦晒啦你走先啦。」


「啊…我有啲野想同你講,我見依家呢度人少少就同你講下…」


正當我想走嘅時候,唐生突然叫停左我。


「咩事?」


「就係嗰個張生你平時唔好得罪佢,同埋佢份人啲脾氣係咁,成日都會好唔耐煩,我自己平時都唔敢得罪佢,有時都要受下氣。」


張生脾氣差,唔怪得我今日見到佢態度都閪閪地。


「受氣?你地唔係大家都係經理咩?」


「因為佢大粒過我,事實上我地3個經理都分3個等級,我係屬於最細嗰個,張生係中間,仲有個叫洪生,佢屬於店長級唔會經常出黎做野。」


原來大家經理著同一樣色衫都唔係平起平坐,而係分晒等級,但個洪生我真係未見過。


「原來係咁,即你今日見到張生對我唔耐煩?」


「嗯,所以如果佢屌過你嘅唔好擺係心,因為呢樣我都幫唔到你,恕我無能為力。」


一講起張生唐生即刻縮晒沙,睇黎佢都要好聽個老屎忽嘅話,平時應該都要擦到對鞋乾乾淨淨。


「佢今日又冇屌我嘅,係閪面教我做野姐。」


「你之後做野冇乜甩漏佢就會屌少啲你架啦,個個新人黎做都係咁,佢目的係要屌到啲人唔會再做錯。」


「我明白架啦,我會做好啲野唔會咁多甩漏,醒少少唔洗俾人屌嘛,我都唔想成日俾人屌。」


「同埋都明白你嘅難處,你幫唔到我都正常,始終你都唔想冇左份工,我會當佢發up瘋。」


「死仔,竟然識學我以前個中學串嘴阿sir咁講醒少少,不過你識咁諗就好,佢屌你你真係要靠你內心嘅忍耐力。」


「收到晒,多謝你提下我。」


「咁冇咩事我走先啦,拜拜。」


「拜拜聽日見。」


我想快啲返去陪下阿盈,所以拿拿聲講句拜拜就走人,始終第一次出面做野做到咁夜真係唔慣。


我行出惠康門口,打左下卡之後隔離個收銀姨姨開閂俾我出,出到去後商場已經變得十分寧靜、周圍店舖已經閂晒門,燈光昏暗,我行電梯落到地面出去,


出到外面後,周圍同樣係變到十分冷清,同日頭熙來攘往嘅街道好大分別、車都冇一部,我沿住昏暗嘅街道行返去,


當我接近一條巷仔時,我聽到有細路仔係度玩嘅聲,到我行到巷仔時望入去,竟然真係見到有兩個細路係度踢波、追黎追去,點解咁夜仲會有細路仔係度玩?


我唔理咁多啦繼續行,可能佢地家長就係貪夜晚夠靜又或者瞓唔著而聽日又放假所以帶啲小朋友落黎玩下。


我再向前行左一陣時,見到前方有個坐輪椅嘅伯伯坐左係度、一動不動、佢頭戴一頂冷帽而且著晒長袖衫、雙眼只係呆滯地望住前面馬路,毫無表情,


咁夜仲有阿伯出黎吹風?仲要坐輪椅咁唔方便特登落一轉黎都好麻煩,


但依家天氣熱死辣辣,點解佢仲可以著長袖衫同戴住頂冷帽,唔驚中暑咩,我著件短袖都出晒汗。


唔理啦,人老左自然抵抗力差啲都容易發冷架啦,人地出黎吹風咪出黎吹風,可能人地覺得屋企太焗姐,咁大驚小怪做咩,然後我繼續行……

霸氣文哥 2022-4-8 11:32

第五十一章:艱苦經歷


「阿盈我返黎啦。」


好快我返到左屋企,見到阿盈燈都冇開係度食住薯片睇電視,周圍只有電視光照住佢。


「射射…yeahs!終於拎返一分,呢球美斯射入左!」


佢好興奮咁,原來佢睇緊波。


「阿洋你返黎啦?」


「哇,你幾時好上左睇波?」


「冇啊,今日無聊睇睇下電視見佢播足球咪睇下,點知又幾好睇喎,之後咪睇到依家,你知唔知美斯真係好man好靚仔。」


然後阿盈心心眼咁望住我分享佢嘅‘男神’。


「冇啦啦係度發花痴,你係睇人定睇波架?」


我笑住我咁質問阿盈。


「我兩樣都睇!不過人係好睇過波嘅~」


講就講話兩樣都睇,但佢始終都按捺不住內心講出左真實嘅說話。


「你仲要開左我包買左好貴嘅薯片食,食死你呀!同埋你食到成張枱咁污糟有排執。」


我指住佈滿薯片袋同薯片碎十分雜亂嘅枱說道。


「唔好咁小氣啦,都係食左幾包姐,食唔死我嘅…同埋我會幫你執返架嘛。」


然後阿盈好似搗蛋鬼咁伸左條脷出黎駁返我,整到咁可愛,真係唔知嬲好定笑好。


「係呢,你今日返工點樣呀?」


突然阿盈突然間問起我返工嘅野。


「幾好啊,啲野唔難做但就要執到啲貨整整齊齊嘥啲時間。」


「咁咪好,以後你做耐左熟手左之後就會越做越快,唔洗嘥咁多時間,繼續加油!」


我覺得好幸福,返到黎夜一夜仲有阿盈嘅鼓勵。


「話說原來唐生佢真係好鹹濕,今日佢見到個靚女著到靚一靚即刻望到眼甘甘仲拉埋我一齊𥄫,仲教我一定要增強男人性能力先唔會俾人戴綠帽。」


「咁佢都真係幾鹹濕下喎,滿腦子都係呢啲猥瑣思想,你啲男仔就係咁架啦,一見到靚女就望唔停,唉,果然天下間所有男人都逃唔過一個色字。」


阿盈攤開雙手表示無奈。


「咪就係。」


「包括我著得靚嗰陣你都會眼甘甘望實我。」


「邊…邊度係。」


突然阿盈轉tone哄埋嚟凝望住我話佢著得靚嗰陣我都望實佢,我立即諗起同佢去旺角試衫嗰日,見到佢係我背後換衫仲要著到靚一靚嘅畫面,頓時我紅都面晒。


「講笑咋,證明我夠靚有魅力。」


「哈哈…好好笑,知你靚啦,你都唔洗不斷重複嘅。」


「講返唐生先,不過佢依家已經有控制到自己冇以前咁大性慾,佢表面鹹濕,但佢其實好專一好愛佢老婆。」


「天下間咁鹹濕嘅男人仲咁愛自己老婆真係好難得,通常啲人都係貪新忘舊慢慢就對自己老婆冇咁大興趣。」


「點解你好似好有經驗咁嘅?」


「緊係啦,你唔好睇阿妹我平時唔聲唔聲咁,以前讀中學嗰陣我都收唔少風架,好多男仔有女之後都因為出軌而散,所以中學嗰啲情侶通常都係拍散拖。」


「再唔係就玩假關係,應承只係拍一陣就散,淨係玩個新鮮感,呢啲都係啲男人鹹濕唔會專一到嘅例子。」


「你真係老司機,睇唔出你平時咁靜竟然知咁多野,欽敬欽敬。」


然後阿盈揚起自信嘅笑容。


「回歸正傳先,佢仲話以前因為性慾強著左魔就係咁同表姐分左手,而表姐係因為想幫佢所以先選擇分手,跟住佢先慢慢清醒返改變自己控制自己嘅性慾。」


「咪住先,著左魔?」


「係啊做咩?」


「佢因為著左魔而性慾越黎越強,佢講嘅魔會唔會係關邪靈事?」


「邪靈?」


「即類似落降頭或者養鬼仔嗰啲,佢魔呢啲野唔會冇啦啦有,通常係透過人為再經由個宿住傳染出去。」


「即係點?」


講起呢啲野我突然變得十分好奇,因為係關唐生同表姐事,但佢又唔肯講。


「即係你表姐有機會係俾人落降頭或者俾人養左隻鬼仔係身體,邪靈就係咁入左佢身體,然後執行施咒者嘅命令,呢個命令應該就係要你表姐冇幸福。」


「邊個同佢發生關係嘅隻魔就會上邊個身,而魔係由邪靈分解出黎嘅子邪靈黎,佢會執行邪靈嘅命令、會透過對方越黎越殘暴嘅搞野直至整死落降頭者。」


「亦令佢呢一世得唔到幸福,因為每同佢一齊嘅人同佢搞野最後都會變到好殘暴咁對待佢。」


「你頭先話唐生佢著左魔, 睇怕佢就係咁唔好彩地俾隻魔上左佢身,之後你表姐先及時抽身為左幫佢而同佢分手,否則唐生一定會變得更加邪惡,你表姐做左件好事。」


「原來發生左咁多事,依家終於知咩事,唔怪得唐生話累左表姐,即如果佢冇同表姐一齊、冇同佢搞野就唔會有事。」


「可以咁講嘅,但另一個同佢搞野嘅人情況都會一樣。」


「我反而好奇佢點樣擺脫隻魔,你有冇問佢?魔係好難先擺脫到架喎。」


「呢層又冇問到佢。」


「佢會控制你思維,仲會識扮死潛伏,你要經歷重重難關先可以完全擺脫佢,期間意志力一定要十分堅定,因為過程真係好辛苦。」


「聽見都覺得辛苦…見平時唐生笑笑口又咁鹹濕對我咁好,原來佢以前經歷左咁多野,佢值得尊敬。」


「唔洗問佢一定係覺得以前對你表姐唔住所以依家對返你好啲啦,始終你同你表姐係有親。」


「呢一切都講得通,唔怪得佢對我咁好,之前我仲唔明佢不斷怪責自己做咩,我應該要同佢講聲多謝、多謝佢曾經為表姐改好自己仲要咁保護佢,佢一啲都唔懦弱。」

霸氣文哥 2022-4-9 14:49

第五十二章:惡夢的開始


呢日我如常準時返到惠康,呢度同平時都係人來人住,


我亦同琴日一樣行入休息室換衫、纜上一條圍裙同掛上名牌就出去做野,但唔知道嘅係,今日將會係我惡夢嘅開始…


我出返去後,見到唐生就係清潔用品嗰邊做緊野,我即刻好開心咁行過去。


「唐生,多謝你。」


「做咩冇啦啦一返到黎就多謝我?」


唐生愕然左一下望住我。


「多謝你以前咁保護表姐,你一啲都唔懦弱。」


唐生聽到後一下子俾唔切反應。


「保護表姐?你知道晒我以前發生啲野?」


「嗯,你以前著左魔嗰陣一定好辛苦,但你都肯為左保護表姐而改善,你要擺脫隻魔一定經歷左好多艱苦,多謝你。」


「你呢啲野點知道?我都冇同你講過。」


佢再次表現好愕然,佢一定覺得我冇可能知呢啲野。


「我…我自己琴日都get到啦,你話著左魔,呢隻魔肯定唔簡單,同埋你話醫院一時留意唔到伯母,即係你嗰陣都有係醫院保護佢,你盡左力架啦。」


我差啲講左出黎話係阿盈同我講,好彩靠我嘅急智兜到。


「表弟你真係聰明,我未同你講已經俾你睇透晒。」


「冇錯,嗰陣我著左魔真係好辛苦先消滅到佢,係一次偶遇之中,原來阿欣同我老婆係fd,之後我地遇到伯母俾佢抓左。」


「我帶住我老婆同阿欣好難先走左出去,跟住我地送左去醫院,之後就係因為我嘅一時疏忽俾伯母上左阿欣病房將佢殺左…」


原來佢地以前發生左咁多野,姨媽竟然連自己個女都落到手,佢地果然唔係自殺咁簡單。


「你以前帶住兩個女人走得出去都已經唔簡單,你盡左力唔洗再怪責自己,相信表姐係天上面都會多謝你當年為左佢做嘅野。」


「希望啦,但我依家怪責自己純粹係想提醒自己以後一定要更加小心保護自己嘅女人同仔女、唔可以再俾佢地受到傷害。」


唐生真係好有膊頭,佢肩負起左保護家庭嘅責任,就好似一道擋箭牌。


「你呢個提醒幾好,可以俾到你一個更加強嘅防禦機制,所以以前發生啲野都唔係完全係壞,呢啲就叫做經一事,蔡一智。」


「你個表弟咁識得講爛gag嘅。」


「好啦唔講住啦,快啲做野先,等陣俾個老屎忽見到又詐型。」


係喎,掛住傾計我都唔記得要做野。


「你今日繼續去水街嗰邊上住架先。」


「收到。」


然後我行返過去汽水嗰邊準備好似琴日咁將地下啲貨補上架……


「喂阿邊個,你過去‘烤嫂’嗰邊上下架先,嗰邊冇人上架。」


我上左一個鐘左右,突然張生過黎叫我去‘烤嫂’嗰邊,但我根本聽唔明咩係‘烤嫂’,食得架?定係公司術語黎?我黑人問號。


「‘烤嫂’即係邊度?」


「household啊!即係家居用品同清潔用品嗰邊啊死蠢,快啲過去啦。」


屌佢原來係household嘅簡讀,我聽都未聽過緊係唔知,但就冇啦啦俾佢疾左一句。


「收到收到。」


然後我急急腳咁行左過去,我第一次做household,但佢冇跟住黎亦冇教我,唯有執生啦,應該全部野都係咁做,


行到過去後,見到兩架鐵籠車,一架裝住一袋袋紙巾;另一架裝住一箱箱啲清潔用品,


我眼見紙巾嗰排架係最前面,清潔用品係後面,心諗就緊係由頭做到尾,所以我一於就由紙巾嗰邊上起。


我係籠入面拎出一袋紙巾拆開將裡面一條條放上架上適當嘅位置補貨,我對住隔離啲紙巾點樣擺黎到擺入去,


入面嘅要平瞓放入去,最出面嘅就一條平瞓放、一條棟住放,務求封實個窿唔俾人見到入面。


「喂你做乜野,我叫你搞household啊,緊係搞清潔用品嗰邊先架啦,做乜撚係度搞紙巾?」


突然張生又行埋黎屌我,原來household係要搞清潔用品先,我真係唔知喎師傅。


「我第一次搞呢邊真係唔知…」


「唔知你咪問囉,你仲要上撚錯晒,呢度係擺特柔架,你做咩擺左維達,你咁樣咪要執手尾囉,叫你做東就做西,聽下人講啦。」


我望下個價錢牌,的確呢個位真係擺特柔但我擺左維達,可能兩隻紙巾都係紫色好似樣所以我撈亂左。


「係喎佢地太似樣我撈亂左,唔好意思我執返好佢。」


「色盲就戴返副眼鏡啦,小小野都做唔好,呢度唔洗你搞啦,俾樣最簡單嘅野你做,去疊米啦,架前面放住啲米啊。」


下,我承認我上錯,但只係太似樣一時睇錯咁就話我色盲?你冇野下話?我真係好無奈,仲要話俾樣最簡單嘅野我做,好似覺得我冇撚用咁。


「收到。」


我死死氣地講收到。


我行到擺米嘅地方,前面有好幾個鐵籠裝住一袋袋米,好似裝紙巾咁裝住,但就重好多,


我依家要做嘅係要補滿架前棟住係地下嘅米,我可以照住隔離啲米疊到好似隔離啲米咁高。


我出力拎出一袋米睇清楚,跟住我拆開袋拎出入面嘅米,開始由底疊高,


但係問題黎,佢每一包米都有空氣個袋係脹起,我點樣疊高佢?我疊左3包佢就sir返落黎,我見隔離疊嗰啲米係真空,我係咪要搵啲真空米黎疊?


咁啱我見到張生係前方不遠處寫緊野,我就沉住氣過去問下佢,費事佢又話我唔識又唔問。


「張生,想問真空啲米放係邊?呢啲米脹起我疊唔到。」


「咁撚蠢架你,你用𠝹刀吉個窿咪得囉,你唔好問埋啲咁低智嘅問題啦,動動腦啦柒姑碌。」


最後都係屌鳩我,果然問又屌,唔問又屌,我又點知你啲米係可以隨便吉個窿,等陣我吉左但原來唔俾吉嘅咪又係瀨野。


「咁𠝹刀係邊拎?」


「唔洗諗都知係休息室搵啦,呢啲咁簡單嘅野自動波自己搵啦,洗人教?」


老細我第二日返工咋,點會知你啲野擺係邊。


「好,咁我入去搵下。」


「仲有啊,你唔好吉到啲米漏晒落地下。」


當我準備行去休息室搵之時,張生再補多一句,我冇理佢。

霸氣文哥 2022-4-10 13:44

第五十三章:忍一時風平浪靜


入到房後,我係張擺滿雜物嘅枱上見到一個透明膠盒,我見到入面擺住幾把𠝹刀,我就打開盒拎左一把出去,


可能𠝹刀係惠康返工每日必備嘅法寶之一黎,我應該日日都係呢度‘偷’一把𠝹刀袋住係圍裙個袋拎出去,咁個老屎忽就少一樣野屌我。


出到去後,我拿拿聲去返擺米個位,然後將脹起嘅米都吉個細窿仔放一放氣。


放氣後嘅米果然易疊左好多,冇再sir落黎、亦好彩啲窿我吉得細冇漏過出黎,我一包包小心翼翼咁疊起身,


疊到8層高左右我見已經同隔離一樣高就冇再疊,然後我再補埋其他疊得唔夠高嘅米,期間我汗都出左唔少……


搞下呢樣搞下嗰樣食過晚飯後好快又就黎12點,呢個時候同琴晚一樣已經閂左門,


而今晚拉架張生叫我拉罐頭嗰邊,難度高左好多,因為佢罐頭啲邊好細又冼,疊高好易sir落黎,


但無奈拉架我要填補返個窿都要拎出黎疊高,我仲要伸手入去架入面拎多幾罐出黎砌,伸入去期間掂一掂到隔離疊好左嗰啲就冧返晒落黎,


加上拉罐點呢邊我唔淨要拉罐頭,仲要拉埋嗰啲乜鬼雞精、湯包、濃湯寶嗰啲,因為佢地係連埋一齊,所以拉罐頭我需時要更耐……


拉左一個鐘終於拉完,我睇下手機,原來已經12:45,咁啱唐生係我前面行過,我即刻上前搵佢。


「唐生我搞掂晒係咪可以走得?」


「可以走啦,不過真係辛苦你,第二日就要派你拉罐頭咁高難度。」


「高難度唔緊要,唔洗俾佢屌就得啦。」


「你講到咁,似係你今日俾佢屌完。」


「算係咁啦。」


「唔緊要啦表弟,遲下你做熟左佢搵唔到位入你就屌唔到你架啦,我初初都成日俾佢屌。」


「我希望我容忍度夠高,都係做兩個月姐,我得嘅。」


我自我鼓勵住自己。


「年輕人,忍一忍風平浪靜,出到黎社會難免要受一受氣架啦,以前我個中學阿SIR臨終...唔係,係畢業嗰陣都咁樣提醒過我。」


「哎呀又搞到你咁夜先走添,唔講住,快啲返去休息下啦。」


「咁我走先,拜拜。」


說罷我就入休息室拎袋換衫,然後行出門口收銀處打卡走人。


行出商場,路上依然人煙稀少,沿途亦好似琴晚咁,巷仔有幾個細路係度玩,心諗佢地咁好精力嘅,晚晚咁夜呢個時候先落黎玩。


再向前行,我再次見到個坐輛椅嘅伯伯呆滯咁坐住係度望住條馬路,


明明呢兩日返工嗰陣都唔見個伯伯坐係度,但佢就係鐘意揀係咁夜嘅時候先出黎坐,可能就係貪呢個時候靜啲清涼啲。


我少出夜晚,可能夜晚就係會有啲人鐘意出街放鬆下自己,我都唔理咁多繼續行返屋企……


「我返黎啦。」


好快我返到屋企,行到返黎都已經1點,


但我一開門見都嘅就係阿盈坐住將隻腳踏上張凳係度剪腳甲,成個男人款咁,第一次見佢咁粗魯。


「返黎啦?今晚收咁夜嘅?」


阿盈並冇望住我咁講,一路只對住剪腳甲。


「哇,做咩夜媽媽係度修甲?」


我並冇即時解答佢嘅問題,而係先解決我嘅疑惑。


「我唔係修甲,係剪腳甲。」


「乜你依家仲有腳甲架咩?」


「緊係有啦,我呢啲腳甲已經係生前留下,依家我咁得閒緊係整理下自己。」


「睇唔出你做左鬼都仲會咁識整理自己。」


「整理是必要的,我依家咁多靚衫留長腳甲會好肉酸。」


「整理係可以,但我第一次見你咁粗魯。」


「咁係自己屋企緊係粗魯啲都無所謂啦,你阿妹我平時要男人嗰陣都可以好男人,你日後大把時間會見到我男人嘅一面。」


「咁我屋企之後咪多左個男人?女啊…我要女。」


我扮悽涼咁講左句笑。


「嗱!都話你好想拍拖架啦,明明饑渴仲扮晒野。」


然後阿盈放低指甲鉗指住同我講,咁都俾佢兜到落去我想拍拖?


「講咩啊,我同你講笑咋,我邊度饑渴,咪話呢啲野隨緣。」


「聽住先啦。」


「你仲未答我點解你今晚咁夜返嘅?」


「咪有個老屎忽,佢叫我拉罐頭,我第一次拉呢個位,仲要比較難拉,所以咪搞左好耐12:45先走。」


講起就一肚火,我即刻呻左頭先啲野出黎。


「聽你講到咁撈氣,好似唔止咁少喎,佢係咪仲有其他位對你唔好?」


阿盈果然犀利,由我語氣中就聽得出我仲有野係激氣。


「的確係,今日佢教都冇教叫我去搞…….」


「…最後我咪聽佢講入休息室拎左把𠝹刀出黎去返擺米度吉窿。」


我將今日一切佢屌我嘅野都同阿盈講晒。


「咁佢又真係閪左啲嘅,你先第二日返工點會乜都熟晒,佢身為經理點都有責任教下你野掛而唔係一黎就屌你。」


「咪臭係,之後仲要繼續對住個老屎忽,真係心血少啲都唔得,但冇計,為左賺錢我都要忍下。」


「咁呢段日子真係辛苦你,但我覺得佢要受下教訓,佢唔應該咁冇理係又屌唔係又屌。」


「算啦,人地係經理,仲大粒過唐生,唐生都幫唔到我,我呢啲員工仔理唔到咁多架啦,忍下算啦,中學我都係咁磨練返黎。」


「學唐生話齋忍一時風平浪靜,相信我熟手左佢就搵唔到野針住我黎屌。」


「嗯咁好啦,阿洋你辛苦了。」


說罷阿盈就托頭陷入一陣沉思。

霸氣文哥 2022-4-11 11:42

第五十四章:痛罵


又一日,呢日我同樣時間返到公司換衫、纜圍裙、掛名牌,再係個膠盒度拎埋把𠝹刀袋住,費事又俾個老屎忽有位入我。


「唐生你好。」


我出去後見到唐生向佢打左聲招呼。


「表弟你好,你今日照樣都去汽水嗰邊做住先啦。」


「但做之前,你望下你嘅12點方向條女幾J,著晒緊身褲個形露晒出黎。」


我如佢所示望向12點方向,的確見到個幾靚嘅靚女,頭髮金金地、一字膊衫、粉紅色緊身瑜珈褲,佢係個貨架前睇緊啲貨品。


「你依家𥄫啲女高質左喎。」


我陰陰嘴笑對住唐生講。


「車,我不嬲𥄫啲女都高質架啦,講到我啲審美眼光好差咁。」


「咁的確依家你叫我𥄫啲女暫時都係靚嘅。」


「放心,以後你大把機會𥄫女、大把時間證明我叫你𥄫啲女都係靚。」


我地呢啲男人果然係唔靚唔食。


「好啊,睇你會唔會有一日叫我𥄫到條女其實係阿姨黎。」


我笑住咁串左唐生一下。


「你要相信我,有樣有真相,我唔會俾啲背影殺手呃到。」


「好啦好啦唔講住,快啲去做野先,傾太耐老屎忽會發現。」


「收到,咁我去做野先。」


然後我照舊去返汽水嗰邊上架,同以往一樣,今日啲汽水都清得好快,我將地下啲貨逐pack逐pack咁拆黎上……


「喂阿邊個,呢度你唔好搞住,你去‘烤嫂’嗰邊上下架。」


執左一陣,突然張生又出現係我隔離叫我去‘烤嫂’嗰邊搞下先,睇黎又係地獄嘅開始,但我今次聰明左了,終於知‘烤嫂’係咩。


「收到。」


「你咁鐘意紙巾,今次你真係搞紙巾嗰邊先,唔好再執錯。」


今次竟然反常地叫我搞紙巾先?可能嗰邊啲貨俾人掃得好快,但今次我一定唔會再執錯。


「收到,我依家過去。」


因為佢份人閪,所以我都唔想同佢講咁多野。


我行到"烤嫂"嗰邊,經過清潔用品嗰排架後,同琴日一樣見到有一部裝滿一袋袋紙巾嘅鐵籠車,


然後我拆開一袋紙巾由頭開始上,今次我要對撚清楚啲牌係咩紙巾同睇清楚pack紙巾啱唔啱先好擺入去,唔好再俾佢有位入我……


上左差唔多一半後,我發覺部車啲紙巾已經上晒,我望黎望去已經冇第二架鐵籠車係裝紙巾,我係邊度仲可以搵到啲紙巾?我停係度諗左陣。


「做咩停晒手係度,係度偷懶?」


突然傳黎張生把聲,屌佢點解成日都出現係我身邊架,佢係咪有心針住我? 有佢嘅出現就等於有屌我嘅出現。


「唔係啊,架車啲紙巾上晒,又冇人推啲車過黎替換,我唔知啲紙巾係邊度攞。」


「屌你我咪同你講左幾多十萬次叫你唔明咪問囉,我係附近你都唔撚黎問我。」


「家下你係大少咩,唔洗做呀? 邊個會特登幫你推啲車過黎俾你上。」


「對眼生係你度,你擘大你對屎眼睇下你上面啦,係咪見到有好多箱啊?啲紙巾就放左係入面,你自己爬上去拎啦。」


我望上上面,上面的確放左好多大嘅箱,而且印晒紙巾嘅牌子,點解我頭先都唔識望下上面,但上面咁高我點上,目測起碼有兩米半以上。


「但上面咁高我點拎?」


「死蠢攞梯啦,你唔洗真係諗住就咁爬上去下話? 醒少少啦。」


「收到我依家去攞,但梯擺係邊?」


「你腦係咪裝屎架,梯就緊係擺雜物房啦,洗唔洗我帶埋你去啊,拎橙色嗰把大梯啊。」


講真我真係唔知把梯就擺係雜物房,同埋把梯點嘅樣我都未見過,就連你間雜物房都未入過去,我淨係大概知邊個位。


「我依家去拎。」


同張生講聲後我即刻行去雜物房拎,


入到雜物房後,入面有掃把地拖,仲有啲損壞左嘅貨品,同埋放住幾把細嘅鐵梯,


而橙色嗰把大梯就擺係最後面幅牆挨住個櫃打斜擺住、長到上天花板,真係好大把,拎出去都應該幾吃力。


我嘗試瞓低佢抓住個梯頭拖出去,把梯都幾重下,要一個人凌空拎出去真係冇可能,


拖出間房後,我想搵人幫手抬一抬的,但見附近做野嘅都係啲阿姨阿婆,佢拎袋麵都冇乜力啦,何況叫佢抬梯,所以都係我一個黎算。


「屌你咁樣拖法地下俾你刮花晒啦,你唔識攞起佢抬過黎架?」


然後慢慢拖我終於拖到過去,但換黎嘅都係屌鳩我,張生竟然仲係原位等緊我,佢明顯針住我咁樣。


「唔好意思,把梯好重我一個抬唔起。」


「重你唔識得搵人幫你一齊抬?」


「我有想搵,但見身邊啲同事都係上左年紀就冇難為佢地。」


「仲扮乜撚野難為啊,你懶就懶啦,你叫佢地幫你逗一逗有幾難,佢地係度做左咁耐分分鐘仲有力過你條廢柴多多聲。」


「又唔知你自己有幾廢連少少力都冇,其實把梯有幾重啊,冇人幫嘅話照計都一個人抬得起啦。」


唉我都冇野好講,我解釋一句佢就屌我十句。


「好好好知道,我下次會注意下。」


「你係真係知道先好,你唔好知完又唔做。」


「咁你依家就自己爬梯上去攞啲紙巾落黎,我行開下先。」


Wtf 我自己攞?唔係應該兩個人會好啲咩?我上去攞你做接住,睇黎連呢啲都要靠自己一個人做,


然後佢就慢慢行走左,而我亦無可奈何地都要爬上去拎先,我好小心地將拎到箱紙巾向下伸到最低掉落地下。


[b]噗![/b]


「哎呀。」


正當我掉左一箱落地下後,隨之而來我就聽到一聲跌低左落地下嘅叫聲。

霸氣文哥 2022-4-12 13:37

第五十五章:教訓


「邊個?邊個整跌我?」


我居高臨下向清潔用品架嘅盡頭一望,見到張生朝天瞓左落地,令我愕然嘅係,阿盈竟然都係度!


跌倒在地後,佢鬆開抓住張生隻腳嘅手,然後望住我係度偷笑,而張生就一險疑惑咁周圍望。


唔洗問張生仆街一定係佢做,佢呢個貪玩鬼係度做咩?然後阿盈就行埋黎我度,我亦慢慢爬返落黎。


「傻妹你黎呢啲做咩?唔留係屋企度hea嘅?」


「冇啊,聽你琴晚講個經理咁閪,我咪諗左條橋跟住今日黎睇下,點知佢真係對你好衰。」


「邊有啲經理咁衰見人能力唔夠就係度屌人侮辱人,仲要少少事都屌你,佢明顯針對你,我實在睇唔過眼所以咪黎幫你出下氣。」


「你條橋就係好似頭先咁整跌佢?」


「冇錯,要俾啲教訓佢,我頭先係佢行緊嗰陣將佢隻腳抬起,跟住佢就成個人向後瞓低左哈哈。」


佢一講起頭先點整跌張生就笑得好開心。


「咁又真係幾爽嘅,你可以為我出一啖氣,等佢平時屌我屌得咁開心,佢終於有教訓嘅一日。」


「你開心就好。」


「但冇用架,佢都唔知呢下跌低係咩事,佢之後都可以繼續有理無理屌我。」


「放心,如果佢之後夠膽再咁樣屌你,你同我講,我會同佢講清楚,之後佢就唔會再咁樣屌你。」


「唔得架!你唔可以俾人知道你存在,否則佢地會消滅你。」


「放心啦,我會有分寸,況且呢度係公司姐又唔係佢屋企,佢唔會花心機做咁多野嘅。」


「咁...好啦,如果佢再咁樣屌我我同你講,但事先先明先,你就算搞佢都唔好搞出人命!」


「放心啦,你見我今次有冇搞出人命。」


「見到啦,你要繼續keep住唔好咁重手先好。」


「好啦唔講住,我要繼續做野先,既然你任務完成左你返去先啦。」


「唔要,難得我黎惠康探你班,我要係度視察住你做野!」


「哇,咁呢度咪即係多左個女經理監住我做野?」


「係架啦,所以你要認真啲做野唔好偷懶~」
.
.
.
又到左夜晚拉架嘅時候,今日阿盈陪左我一陣之後就走左,話返屋企hea陣,都明白嘅,佢係惠康咁悶齋睇住我做野點會鐘意,所以留左一個鐘左右就返左去。


今晚我早左拉架,到11:45左右我就拉完,心諗今晚有得早收工啦掛,點知唐生拎左疊黃色嘅牌仔過黎叫我換埋罐頭嗰邊牌仔先,


因為逢禮拜四有大部分啲特價貨品嘅價錢都會有變化,所以個個禮拜都要更換,


而換牌仔都好嘥時間,因為我唔熟呢邊啲貨品位置,我要睇個牌名然後就要搵嗰樣貨品嘅位置出黎,


然而呢度有成疊牌咁厚,目測都有40-50張,即我要逐一搵到個位置去換,真係有排搞,唐生竟然仲笑住話呢度好少架咋,但我搞呢度都一定搞到懷疑人生。


長城牌午餐肉我知,綠色罐;但地們粟米粒邊度黎?梅林扣肉同午餐肉又係邊?仲有雄雞牌沙甸魚呢?


我周圍搵黎搵去,啲位置我完全唔熟,太多牌子,搞到我一頭霧水……


「喂阿𡃁仔你搞掂未啊?」


我搞左大概一個鐘左右,但手上仲有10多張左右,突然又傳黎張生把聲,佢行緊過黎。


「未啊,仲差少少。」


「屌你快啲啦大少,全場人等你一個啊,已經叫唐生俾疊少嘅牌你都搞唔掂,你係咪路啊。」


「我唔熟呢邊啲位嘛。」


「你度度都唔撚熟架啦,好心你做野就上心啲啦、返到黎記熟啲位,拉左幾日架都唔熟啲位,公司請你返黎托杉咩。」


我返左3日工咋喎老細,會唔會咁快全部位熟晒,你估我超人咩,同埋我自問已經好上心做野,我連機都冇篤、上架又將啲貨上得齊齊整整。


「明白明白,我會多啲記下啲位。」


眼見不斷俾人屌,我都要吞聲忍氣,我同自己講呢啲日子一定會有完嘅一日。


「屌你都係算啦,你俾一半我搞,俾你慢慢搞真係搞到下世。」


張生見我搞得咁慢睇唔過眼即刻由我手上拎左一半走,我手上得返幾張,佢真係好勁,望一望張牌就知係邊然後就快快手換左。


不久後佢已經將佢手上嘅牌仔換晒,而我仲有兩張。


「喂你仲未搞掂?我拎你一半都搞掂啦喎,手腳點解可以咁慢架。」


「呢兩隻貨個位係邊?」


最後兩張個位我真係唔知,然後我死死地氣咁問張生,張生過目後同樣即刻知邊個位,亦都好唔耐煩咁帶我去嗰個位,有張生嘅幫助之後我呢兩張好快搞掂埋。


「呢兩隻貨個位咁易搵都搵唔到,你真係好撚蠢,你最好真係快啲記熟晒啲位佢。」


幫完我之後當然都唔少得屌我幾句。


「收到。」


「依家搞掂晒,你走啦,我唔想見到你。」


張生閪住塊臉咁趕我走後自己都行走左,最後我依然都仲要俾佢屌。


不過依家我都開心嘅,Yeahs!終於收工,我望下部手機,已經1點鐘咁夜,又再一次刷新收工時間紀錄。


然後我好開心咁拿拿林入休息室換衫執野走,步出商場,今晚竟然冇前兩晚咁冷清,多左啲人係度行街散步,少有咁夜仲咁多人出黎行街。


行到條巷仔時,後巷除左有幾個細路係度玩,仲多左啲人係度食煙同聚埋一齊係度傾計。

霸氣文哥 2022-4-13 13:22

第五十五章:繼續責備


咁奇怪嘅,咁夜仲有咁多人係度聚,同埋傾計點解一定要係後巷度傾而唔出黎傾?


我照樣唔理咁多繼續行,今次如常見到個個伯伯呆滯地坐住係度,


但唔同嘅係,今次伯伯前面數米麵前竟然多左部有野支撐住嘅電視機,行人路上點解會冇啦啦有部電視咁奇疤?


佢呆滯咁望住部電視機,入面播緊啲類似同另一半回憶嘅野,有相有影片、顏色有黑白有彩色,好似走馬燈咁。


唔理啦,佢應該咁啱擺出黎架姐,你知依家香港人幾大壓力架啦,做下啲奇怪事有幾出奇,然後我係伯伯面前略過繼續行返屋企……


「我返黎啦。」


「你返黎啦?你今晚又夜左喎。」


「係啊,今晚拉完架仲要換埋牌仔咪搞耐左,逢星期四都要換一換。」


「點啊,今日我俾左個教訓佢之後對你有冇好左?」


阿盈見我返黎第一時間好興奮咁問我今日之後嘅野,就好似想知道佢搞出黎嘅傑作之後結果點。


「唉咪講啦,好條毛,咪又係咁,換牌仔見我唔熟慢減少少已經屌柒我,不過佢有幫我已經好好。」


「嗯,睇黎佢真係仲未得到教訓,我真係要面見下佢至得。」


然後阿盈托住個頭又進入思考模式。


「你今次又想搞咩花臣?」


我對佢話面見張生有少少好奇,佢想點面見?


「秘物!你聽日咪知囉,總之佢之後唔會再係唔係都屌你。」


「奇奇怪怪咁,係先算啦,依家啲老屎忽上左年紀好難改架啦。」


「相信我!」


說罷阿盈自信地向我拍拍膊頭,我都只能拭目以待。
.
.
.
呢日我如常準時返到惠康換衫返工,但我想搵唐生聽日請個假先,返左幾日工捱左幾日俾人屌嘅日子我都想抖下,話我懶都係咁,真係慶幸我係返part time。


「唐生早晨!」


我特登玩下佢。


「仲早晨?依家晏晝架喎。」


「差唔多啦,係呢唐生,黎緊兩日我想請下假,可唔可以?」


「緊係冇問題啦,點啊?頂唔住個老屎忽嘅壓力啦?」


「唉,咁超人都要抖下氣嘅,日日俾佢係咁屌,但我仲捱得住嘅。」


「有時佢屌你嘅野唔洗咁上心嘅,當佢飲完酒發up瘋就得,畢竟佢份人就係咁閪。」


「洗唔洗我醒兩套“私人珍藏”俾你睇下抒發下,你會冇咁大壓力,見你係表弟我先益你咋。」


一聽就知唐生所講嘅“私人珍藏”就係AV。


「唔洗啦,我呢啲正人君子好少睇呢啲野。」


「扮咩,正“淫”君子咋下話,拎去睇下啦。」


「真係唔洗啦,呢排冇咩性慾。」


我故意搵啲野推佢。


「死囉表弟,冇性慾?男人唔可以咁冇用架,所謂好腰好腎好男人就一定要練多啲先得,洗唔洗我俾樽黑瑪卡你食下?」


Wtf!?黑瑪卡係乜東東黎?聽都未聽過。


「咩係黑瑪卡?」


「保健品啊,可以壯陽,包你日日都好精神,你睇我依家日日朝早都食返兩粒幾鬼精神,老虎都打死十隻。」


「得架啦,我唔需要,我依家好健康。」


見佢講壯陽藥講得咁開心我真係冇野好講。


「好啦我唔逼你啦,最緊要你之後relax到自己就得。」


佢終於肯收口。


「話說你琴晚一定都好夜走,辛苦晒晚晚都搞到你咁夜走,我琴晚咁啱去左個廁所見唔到你走。」


「OK嘅,人大左都要開始適應下啲夜生活,但當然我都想早啲放工。」


「你識咁諗真係大個仔,你日後嘅生活有機會都做到咁夜,真係要適應下架啦。」


「嗯,我會學你,你以前咁辛苦都捱得過,我依家捱少少夜又算得係啲咩。」


「咁又唔好攞我以前啲事黎對比,以前我嗰啲簡直唔係人嘅生活。」


「好啦唔講住做野先,老屎忽差唔多又黎。」


然後我照舊去返水街上架,我今日要留意住周圍,睇下阿盈會幾時出現同埋想搞咩花臣。


亦都可能知道阿盈今日會為我出下氣,所以我今日都放鬆左自己覺得張生真係唔會再亂屌我。


「阿𡃁仔,你去“烤嫂”嗰邊上下架先,今次記得清潔用品嗰邊上起。」


好似又真係好態度左,唔通阿盈已經暗地裡做左野?定係我嘅錯覺?


「收到。」


然後我去到“烤嫂”清潔用品嗰邊開始將鐵籠車啲箱拆開將貨上架……


「哇,你做乜撚野開晒啲箱就咁擺係地下?」


當我搞左一陣之後,張生又行埋黎一陣愕然。


「嗰啲係上唔晒多左出黎。」


「屌你好心你啲貨差幾枝嗰啲就唔好再開箱補貨啦,你去架頂拎啲散裝補返咪得囉。」


「但架頂冇晒啲散裝。」


「屌你架頂冇晒散裝你拉返平佢咪得囉,點解你可以咁蠢?醒少少啦,你返左幾日工做左啲乜野黎,咁基本嘅野都唔識。」


「好,咁既然你開左箱有好多貨用唔晒咁應該點啊?」


「擺返上架鐵籠車?」


我思考左一陣答出黎。


「擺你老味鐵籠車咩,你咪撚撈亂我倉入面啲貨添啊,你又用你對屎眼望下你上面啦,係咪見到架最頂層擺晒箱啊,你擺上去咪得囉。」


我望一望最頂層,的確擺晒一箱箱係度,好似擺紙巾嗰個架咁。


「好心你啦方少,我叫你方少啦,你搞好少少個地方啦,唔好呢度又開一箱嗰度又開一箱係度阻撚住晒,家下呢度街市咩,要俾人行架。」


「知道,我會執。」


「仲有啊,嗰邊有隻貨冇晒做咩唔插張缺貨牌落去?」

霸氣文哥 2022-4-14 13:07

第五十七章:怪事


然後張生指住架尾嘅一隻洗衣粉,佢隔離嘅嗰一隻牌子的確空空如也,但我未上到嗰邊,同埋我唔知原來要插缺貨牌。


「我…我未上到嗰邊,同埋我冇缺貨牌係身。」


我兜一兜話我冇缺貨牌就算,相信如果話我連知都唔知一定屌得我仲甘。


「邊有人出黎做野唔拎埋缺貨牌出黎袋住架,拿拿聲入休息室拎啦豬閪。」


「都唔知邊撚個教你做野做到咁多甩漏,教你嗰個都唔方好得去邊。」


邊個教,教得我最撚多嗰個咪係你囉。


然後我入休息室拎左疊缺貨牌出黎袋住,原來佢收埋係另一個膠兜入面,以後我返工要袋埋佢先出黎。


到我出返黎之時,張生已經行走左唔係度,我繼續我嘅工作,將啲開左嘅箱爬梯掉上架最頂層,然後啲冇貨嘅就插返張缺貨牌……


好快又到左夜晚拉架,我繼續都係拉罐頭,我發覺有啲罐頭嘅位已經認得、拉罐頭亦都變得冇咁生疏,已經掌握到兩成功力。


去到差唔多12:30,我終於拉完,我比之前拉快左少少。


「𡃁仔,有啲進步咁喎,拉得快左爽手左。」


突然張生又行過黎,最令我愕然嘅係,佢竟然會讚我而唔係屌我?我係咪發緊夢??


「多…多謝晒。」


雖然我唔知咩事,但我都講聲多謝。


「罐頭雖然係難拉啲,但只要你用心咁拉拉熟左之後你就覺得冇難度,啲位置都係,慢慢練啦。」


「收到,我…我拉完架啦。」


「有啲料到喎,拉完添啦?繼續加油,咁你走先啦。」


「好,咁我走先拜拜。」


然後我入休息室執野換衫、一臉疑惑地急急腳走人,唔理咁多啦,有得走緊係走。


步出商場,同琴晚一樣多左啲人係度行街,個境況似9點幾嘅一條街,


呢兩晚做咩事啲人鐘意夜一夜先出黎行街?係咪咩節日?但又唔係,呢日只係普通嘅一日。


我同平時一樣沿路行返屋企,行到條巷仔時,今次竟然唔見左兩個細路係度玩,淨係見到幾條友係度食煙。


隨之我聽到側邊傳黎細路嘅嬉戲聲,正當我回過頭時,我反應都未黎得切突然就俾啲野撞左埋黎,我自然反應下退後左一步。


「嗚嗚…」


然後聽到兩把喊聲,原來係平時巷仔踢波嗰兩個細路踢住波撞左埋黎我度,佢地亦俾我反彈跌左落地下。


「朗仔浩仔有冇事,你條仆街做乜整跌我兩個仔!?」


佢媽見到兩個仔跌倒後即刻從後趕黎將佢地扶起身,但扶起身清楚見到佢地個樣後,面前境像將我嚇親,隨之就有陣寒風吹過令我打左一下冷震。


之前經過後巷太黑睇唔到佢地個樣,今次係我第一次見到佢地個樣。


佢地兩個臉部全薰黑,而且塊臉大部分位置都係腐爛,頭髮亦都冇晒,十足俾火燒過咁,而佢媽個樣亦一樣,甚至就連隻手都腐爛晒咁,可以攞喪屍形容佢。


「唔…唔關我事架,我冇整跌佢地,係佢地自己撞埋黎跌低架。」


我無故地俾佢屌,我立即為自己解釋。


「佢地係無辜架,你做乜要傷害佢、點解要搞我地?」


然後個阿媽變到情緒好激動。


「你冷靜啲,我真係冇整跌佢地。」


「你夠膽傷害我兩個仔,我要打死你條仆街。」


說罷佢就即刻舉起佢隻手準備用佢嘅利爪爪落黎,我都嚇親,我都係係佢舉起手嗰下我先發現佢啲爪竟然可以利到咁,猶如九陰白骨爪。


佢以迅雷嘅速度爪落黎,我反應都未黎得切,


但突然佢停左手,左手遮住自己雙眼、表情有少許痛苦,好似俾啲好光嘅野照耀住咁開唔到眼,然後帶住兩個細路入左後巷消失於眼前。


我鬆左一口氣,如果頭先咁樣俾佢爪落黎我唔死都一定毀容或者盲,究竟發生咩事?佢地又做咩個樣咁恐怖?


我俾頭先個情景嚇左嚇心情仲未平復到地急急腳行走左,我快步行返屋企,


然後行左一陣又見到個伯伯,佢同樣係睇緊部電視,今次電視入面係播緊佢自己同一個婆婆嘅一啲相,唔通呢個係佢老婆?就算係但點解要特登搬出黎睇回憶?


唔理咁多啦,快啲返屋企算,等陣佢地從後追上就大鑊,點知佢地係咪去左吹雞,


都唔知今晚做乜咁多怪人,我差啲就俾人襲擊,然後我急步係伯伯面前掠過…


「我返黎啦。」


「今晚早左喎,係咪經理冇再屌你呢~」


「…」


我冇理佢,表現得六神無主似的。


「做咩你個樣好驚青咁又冇反應嘅?」


然後阿盈望過黎見我冇講野就覺得好奇怪咁問我。


「…」


我繼續毫無反應地行入個廳。


「阿洋!」


阿盈大聲叫我一下,然後我先回過神來。


「係,咩事?」


「搞咩啊你,我同你講野冇反應嘅?」


「哦…可能係我頭先返黎俾人嚇親到依家都未能平復。」


「你返黎有咩事發生?」


阿盈十分好奇地行到黎我面前。


「我遇到啲怪事,頭先有兩個細路撞到我跌低左…」


「個…個阿媽見狀以為係我整跌佢地,跟住就想用佢隻手爪落黎,佢啲爪好利架,但唔知點解佢又冇爪到落黎,佢好似見到啲好光嘅野跟住跑返入後巷。」


「最恐怖嘅係,佢地3個人個樣都好恐怖,成塊臉都爛晒,成隻喪屍咁,我諗返起如果佢真係爪落黎我已經盲左…」


「你冇事就好,你係今晚先見到佢地?」


「其實我呢幾日收工都見到佢地,但嗰陣佢地係後巷度玩,我冇理佢地,亦因為太黑我睇唔清佢地樣。」


聽完後阿盈突然收起笑容嚴肅起黎。


「你收埋咁多日依家先同我講。」


「咁佢地平時都係正正常常咁係附近玩咋嘛,都冇乜野事咪冇講…」


「你唔應該見到佢地,因為佢地根本唔係人…而係鬼。」

霸氣文哥 2022-4-15 12:21

第五十八章:陰陽眼


「下,你…你話係鬼?即我呢幾日見到嘅都係鬼?但佢地真係好真實架喎,有手有腳同人冇分別,點樣我會咁?」


我感到好愕然,亦諗起我呢幾日見到佢地咁開心原來都係鬼黎,我心裡不自覺感到有股寒意。


「因為你開左陰陽眼。」


「陰陽眼?」


「開左陰陽眼嘅人,會睇得越黎越多另一個世界嘅野,亦即係隨住時間會睇得越黎越完整。」


「你由第一日收工去到頭先有冇啲咩唔同?」


我諗返呢幾日收工嘅情境。


「有,明明我頭兩日見條街冇乜人,但之後兩日唔知點解多左啲人係度行。」


「睇黎你對陰陽眼進化得好快,亦已經睇得好完整。」


「何謂完整?」


「你可以睇到每一個靈體係條街徘徊,仲要可以見到佢地嘅手手腳腳已經好完整,通常睇得唔完整嘅人只會見到佢飄係度。」


「既然我睇到佢地,點解佢地唔過黎搞我。」


「因為佢地唔知你睇到佢地,正常你唔理佢地佢地都唔會理你。」


「但頭先個阿媽明明唔係我整跌佢兩個仔,佢都一口咬定係我整跌仲想打我,乜佢地咁蠻不講理架咩?」


「唔算蠻不講理嘅,因為個細路唔知你可以見到佢地然後實體化左先撞左埋黎,亦因為咁你已經干涉左佢地,所以先會搞你。」


「仲有一個因素,就係正如我以前話齋,一啲有怨恨嘅人死後變成靈體都會充滿仇恨,對於有人想搞佢地嘅摯親,佢地會變到極度敏感,然後就會對付搞佢地嘅人。」


「即係嗰陣就算唔係我整跌佢地,佢地都會失晒理性咁一口咬定係我做對我報復,唔怪得嗰陣個阿媽一句都聽唔入耳。」


「但我唔明點解佢最後冇打到落黎反而走左。」


「咁就真係要多謝我平時同你做嘅野。」


「你平時同我做嘅野?」


「做運動、行街曬太陽嗰啲啊,令到你強身健體陽氣都多左,佢地亦因為咁唔敢埋你身。」


我突然覺得我之前咁辛苦做運動拉筋終於有起作用嘅一日。


「原來係咁,但如果佢地唔敢埋我身,唔係就應該唔會接近我想打我架啦咩?」


「其實你啲陽氣平時係隱藏於體內,當感覺到有陰氣想傷害你嗰陣,陽氣就先會散發出黎保護你。」


「呢個時候靈體就會見到你頭上有一道好似聖光嘅光芒,令到佢地唔敢接近你,佢地係好驚見到呢道光,而你自己係唔會睇到有呢道光。」


「當然光芒嘅光度係因人而異,陽氣越多光芒越明亮、陽氣越少光芒越暗淡,原理就好似一粒電池嘅電量。」


「所以陽氣多嘅人通常啲鬼都唔敢搞佢,就算想搞都搞唔到,自己亦好難見到鬼同撞鬼,就即係出面啲人所講嘅時運高。」


「除非佢特登現身俾你睇,又或者係一啲靈力高嘅厲鬼,例如我地之前遇到嗰隻紅衣女鬼。」


我又長知識,原來我係因為我身上所發出嘅光芒救左我,我忽然覺得自己好勁好有成功感。


「但你都唔好咁得戚啊,因為你開左陰陽眼關係,會令你見到好多靈體,陰氣會由唔可見變為可見咁影響住你,過多嘅陰氣係你周圍會令你陽氣散失嘅速度加快,呢個就係我擔心嘅地方…」


「咪住先,你頭先唔係話陽氣多嘅人好難撞鬼同見到鬼架咩,點解我仲會開左陰陽眼見到?照計我陽氣多唔係應該會好難開陰陽眼添咩?」


我呢刻覺得好矛盾好奇怪,明明話陽氣多唔會咁易見到鬼,但偏偏我就唔知點解開左陰陽眼見到到處都係鬼。


「唉,其實開陰陽眼唔係陽氣多就唔會開,仲有其他因素都會觸發到你開陰陽眼。」


「陽氣多只可以係你冇開眼嘅狀態下令你唔易見到鬼同保護你,然後咁樣亦都唔會令你陽氣過少容易見鬼,因為陽氣過少都係開眼嘅其中一個因素。」


「即係話我就算陽氣有幾多都會有機會有陰陽眼,但陽氣少我就好大機會有陰影眼?」


「可以咁講。」


「咁其實會唔會係因為嗰陣我地對付完紅衣之後輸左大量陽氣俾你令我陽氣少到一個點又或者係以前我陽氣太少而觸發左陰陽眼?」


「冇咩可能,因為你以前、甚至嗰次件事發生後你都冇遇見啲咩怪事。」


我諗返以前每次出街,的確冇怪事發生過,由其出夜街都冇,除左紅衣嗰次外,因為佢係一隻靈力高嘅厲鬼,加上我嗰陣未算好Fit陽氣唔算好多。


「加上你話係呢幾日夜晚先開始見到架嘛,而且仲越見越多靈體,咁即係有其他因素影響。」


「其實仲有咩因素係會形成陰陽眼,點解我會冇啦啦有陰陽眼?可唔可以講晒出黎?」


我真係好想知自己點解會冇啦啦有陰陽眼,講真我真係唔想自己成日見到嗰啲野,依家嘅我對陰陽眼嘅出現充滿好奇。


「加埋頭先我講嗰個因素total有4個因素會觸發你開眼。」


4個咁多!?我聽到後表現得愕然。


「第一個就如我頭先所講因為陽氣過少而觸發啦,呢個可以排除。」


「第二個就係你想開眼所以特登去做儀式或者淋狗血而觸發,呢個你應該都冇啦係咪?可以排除。」


「冇,我由細到大都冇搞呢啲野,我唔會想自己有對咁嘅眼。」


「好啦第三個就係家族遺傳,當中包括埋第四個因素;首先就係天生嘅、由出世開始你就已經擁有陰陽眼,呢個你都唔係啦,可以排除。」


「最後呢?」


「最後就係都係家族遺傳,但你唔係一出世就擁有,而係你有陰陽眼嘅基因或者物質,隨住時間成長會因為某啲事嘅發生而觸發你陰陽眼嘅出現,當觸發後佢就會慢慢萌芽出現。」

霸氣文哥 2022-4-16 11:52

第五十九章:死前的故事


「竟然會咁,咁會係有咩事觸發開左眼?」


「至於因為咩事觸發開眼呢個真係唔知,因為呢個係自己嘅基因或者物質、係因人而異,得自己先會知。」


「成件事都幾複雜,睇怕我都會係呢個因素…?」


「嗯,好大機會都係因為咁所以先觸發開左眼…」


「我有冇得閂返陰影眼…?我真係唔想有咁嘅眼。」


呢刻嘅我表現得有啲慌張,想尋求方法閂返對眼。


「前面兩個因素或者都可以勉強閂返,但你呢個情況係涉及遺傳同有嗰個基因或者物質,一觸發左就一世架啦,好難再閂得返…」


阿盈講完後都表現到有少許失望。


「咁即係我以後都會見到嗰啲野…?唔通我要習慣同佢地相處?咁樣我啲陽氣咪會散得好快?」


「所以我之後要更加密咁督促你鍛練身體,要keep住你啲陽氣係高企!」


「雖然係咁,但其實佢地都唔會吸你太多陽氣,唔會令你出幾次街就散晒啲陽氣,同埋你遠離佢地你嘅陽氣都會少啲影響。」


「但我真係接受唔到之後我要同啲鬼怪相處,佢地個樣真係好恐怖,同埋如果唔係因為我陽氣夠多我已經死左係佢地嘅襲擊之下。」


「咁我呢?我都係鬼黎架喎,你又唔介意、又接受到嘅?」


阿盈見到我咁抗拒嘗試安慰我。


「咁點同,你係我妹黎嘛,我同你咁熟又點會傷害我。」


「其實每個人死後都會變成鬼,只係用另一種形式出現係人眼前,同埋一時間只係俾仇恨沖昏了眼。」


「佢地有啲個樣可能係恐怖啲,因為呢個係佢地生前嘅死相,可能係經歷左啲好悲慘嘅事個樣先會變到咁恐怖,而每個人嘅死都有段故事。」


好似又有啲道理,其實鬼都係人嘅另一種形式,又唔係啲咩怪物,


另外阿盈個樣冇咩變化,應該都係因為以前阿盈係燒碳窒息死皮膚冇損毀情況,所以先仲可以keep到咁靚。


「既然你依家唔開都開左眼冇得閂返,你就接受佢啦,相信日子耐左你會慢慢習慣,同埋你仲有我架嘛,最多以後有咩鬼怪襲擊你,我第一個幫你出頭!」


「唯有係咁啦…但你話幫我出頭,你得唔得架,我驚你唔夠打。」


聽到阿盈安慰我,我個心已經定左啲,然後我串左一下佢。


「你唔好睇少你阿妹我先得架,你阿妹我依家靈力比之前高左好多架啦,出面嗰啲連意識都冇淨係得仇恨嘅鬼靈力其實好低、係我地俗稱嘅遊魂野鬼,我絕對有能力阻止佢傷害你!」


「咁以後就勞煩你做我嘅貼身保鏢架啦。」


「嗯,以後你出街遇到佢地襲擊你嘅話,大叫我個名我就會出現。」


原來咁都得,呢啲唔通就係所謂嘅隨傳隨到?連隨意門都慳返。


「係呢,你話每個人嘅死都有段故事,咁你知唔知我頭先遇見嗰隻鬼個樣咁恐怖有咩故事?佢係點死?」


「唉,你見到佢地個樣咁恐怖,因為佢地係俾火燒死。」


說罷阿盈擺出一副覺得悽慘嘅樣子。


「俾火燒死?」


「我都係好多年睇新聞知道,其實後巷隔離棟樓係佢地以前住嘅地方,佢地一家四口原本相處好幸福,係一個小康之家。」


「但後來佢老公因為爭落一身債俾人係咁追債,有一日佢間屋突然俾人縱火、門口道鐵閘俾人反鎖,個老婆同兩個仔就咁監生燒死。」


「俾人發現嘅時候見到佢地死況係攬住兩個仔趴係地下護住佢地,而個老公嗰陣就咁啱出左去所以冇事。」


「原來佢係咁慘,呢位阿媽真係好偉大、好有母愛,佢咁愛護兩個仔,唔怪得佢會咁敏感覺得我想傷害佢地,一切都係出於保護。」


「嗯,佢地的確好慘,嗰排新聞都好hit好多人都討論呢件事。」


「係呢,咁你除左見到呢對母子仲有冇見到其他奇怪嘅野?」


阿盈講完,我立即諗左陣,的確有,就係嗰個伯伯,但唔知佢係咪鬼黎…


「我呢幾日沿路返黎嗰陣,仲見到有個伯伯坐住係路邊,最奇怪嘅係熱死辣辣佢仲戴晒冷帽著晒長袖衫褲。」


「你見到個伯伯係咪坐住輪椅睇住部電視?」


「係啊!你講中晒,點解你會知嘅?」


我覺得好勁,我未講晒佢就已經知晒。


「緊係啦,因為佢都唔係人,同埋都有新聞講過,只係冇咁hit。」


阿盈果然係地頭蟲,附近發生嘅事都知得一清二楚。


「佢竟然都係鬼…?我呢幾日見到仲以為佢只係出黎吹下風。」


「咁佢以前係點死?今次又有段點樣嘅故事?」


「伯伯佢係自殺死。」


「原本佢同個老婆婆好恩愛,突然有一日伯伯中風,塊臉同下身都癱左,得返上身可以活動,所以就坐左輪椅,自此佢冇左表情。」


「佢地嘅生活就係自呢日起變得艱難,雖然婆婆不辭勞苦咁照顧佢起居飲食、平時亦都推住輪椅推出推入,但其實伯伯終日都好自負覺得自己好冇用乜都要人幫、就連去個廁所都要人幫。」


「有一日,伯伯係個廳度睇電視,突然聽到一下跌落地下嘅聲,原來婆婆企高係張凳幫伯伯攞藥嗰陣失平衡跌左落黎,送院後證實不治。」


「就係咁伯伯變得好內疚,覺得係自己害左佢、如果唔係自己咁冇用就唔洗累到身邊個人死左,因為婆婆走左佢已經冇左生存嘅意慾,佢想落去見佢。」


「就係婆婆走左冇幾耐,佢就吞左幾粒臭丸自盡,最後發現佢嗰陣係嘔住白泡對住部電視,當時已經冇左意識,就係咁佢地一齊死左。」

霸氣文哥 2022-4-17 11:45

第六十章:終極的教訓


果然伯伯都有一段感人嘅故事,係愛啊哈利,不過中風呢樣野真係好睇意志力。


「係一段感人嘅故事,睇得出伯伯同佢老婆係幾恩愛、係真愛。」


「但你唔係話佢落去搵佢老婆咩?點解佢仲會咁孤零零咁坐係路邊?」


「因為佢落到去後搵唔到老婆婆係邊,可能佢已經投左胎,所以伯伯就還原返生前嘅狀況留戀住係呢個地方。」


「但點解佢唔係返自己屋企睇電視而要走出街睇?」


「咁係因為件事已經過左好多年,伯伯以前住緊個單位依家已經住緊人,佢好人唔想累到依家呢手人,所以佢有足夠靈力後就出街坐,唔想再累到其他人,否則佢會死不瞑目。」


「咁呢位伯伯真係好好人,死後都唔想累到人,係好鬼。」


「係架,鬼都有分好同壞,好嘅鬼通常唔會有怨恨、唔會有憎嘅人,就算憎都係憎自己。」


「如果可以我真係好想好似做義工咁探下伯伯。」


「千祈唔好!人鬼殊途,雖然佢係好鬼,但你如果去幫佢地嘅話,佢地有機會會一直跟住你,覺得你係大好人,想你幫佢。」


「跟住其他鬼見到你咁好人咁肯幫忙,其他鬼都會癡埋黎,然後就會越癡越多,你嘅陽氣就會越黎越少,會好大影響架!」


「加上佢地對你冇起到殺意,而係懷住善意癡埋黎,你陽氣都唔會起到一個保護作用,所以就算你見啲鬼幾慘都好都唔好幫佢地,會害左自己,除左我。」


阿盈好斬釘截鐵咁講左一大堆野出黎,睇得出佢有幾著緊我,講到最尾強調淨係可以幫佢,講到好似呷醋咁。


「知啦,我同佢地兩個世界嘛,我唔會干涉佢地嘅野架啦,淨係干涉我個靚靚阿妹。」


我最後賣口乖咁間接讚左佢一下靚。


「咁你係先好啊,唔好逆我呢個靚靚阿妹嘅意。」


然後阿盈佢都好得戚咁認自己好靚,不過又真係事實黎嘅。


「仲有一件事我覺得奇怪,就係張生對我嘅態度,明明佢今日仲屌得我好甘,但到左夜晚佢態度竟然對我180度轉變,你係咪對佢做左啲乜野?」


「嘻嘻,呢樣野你應該要多謝我,我本來想係你返黎嗰陣即刻同你講架啦。」


「其實今日件事係咁…」


然後阿盈開始講返今日件事出黎。


「事源係佢屌完你之後入左個倉點貨,咁我就跟埋入去將道門鎖住左,好戲就係呢個時候開始。」


「我營造一個效果,將天花板上啲燈整到眨下眨下,然後表現到有殺意咁吹出黎一陣寒風,令佢打左下冷震。」


「同埋將架上面嘅一啲貨品整跌落地下,以示宣戰,佢呢個時候就開始覺得奇怪咁周圍望。」


[b][i]「嗚嗚…我死得好慘啊,點解你班賤人要害死我,你俾返條命我啊!」[/i][/b]


「我扮到好悽涼咁喊且好憎恨咁講野,目的要營造一個恐怖氣氛。」


[b][i]「邊…邊撚個係度玩野,好出黎啦下,唔係俾我搵到你嘅話我對你唔客氣…」[/i][/b]


「呢個時候佢已經開始慌,放低手頭上嘅工作周圍觀望,而我亦都換左一套白色連衣裙同將頭髮全部整晒去前面遮住成塊臉準備以一個恐怖造型登場。 」


「我將前面盞燈眨左幾眨後我就接住現身,我係佢前面幾米位置現左身,我突如其來嘅出現將佢嚇到彈起,然後成間房嘅燈光變到好昏暗。」


[i][b]「哇鬼啊、救命啊有鬼啊。」[/b][/i]


「之後佢嚇到一見到我就走、不斷大叫同想開門逃走,可惜我已經反鎖左道門同埋用我嘅靈力整左個結界出黎,出面唔會聽到裡面嘅聲音。」


[i][b]「點解你地班賤人要害死我?點解依家仲要繼續糟質啲新人!」[/b][/i]


[i][b]「我幾時有害死你呀!」[/b][/i]


[i][b]「我以前係度做,就係俾你班仆街經理遭質搞到我頂唔順去尋短見,本來我諗住算數,點知你地仲繼續糟質其他人,我實在睇唔過眼,你還返條命俾我!」[/b][/i]


[i][b]「你講新黎嗰個?佢…佢真係蠢嘛,同埋做野又多甩漏,我屌佢都係正常姐…你放過我啦。」[/b][/i]


「說罷我慢慢飄向佢嗰度、亦將佢定形唔俾佢郁,然後每一句問句我都將架上面嘅罐頭控制飛去撞落佢個肚度。」


[i][b]「多甩漏就郁下屌人?多甩漏就唔可以慢慢教?知唔知佢一個新人入到黎就係又俾你屌唔係又俾你屌真係好難受?點解你班仆街經理要咁樣糟質新人?」[/b][/i]


[i][b]「啊…求求你唔好再掉我、唔好搞我…」[/b][/i]


「佢表情得好痛苦,但我繼續將架上面嘅罐頭飛去撞佢、罐頭散落一地,而我亦繼續飄向佢度,期間我伸長對手準備抓住佢條頸。」


[i][b]「啊好痛…求下你放過我、求下你,最多我應承你唔會再亂屌啲新人、唔會再糟質佢地,我唔敢啦…求你放過我。」[/b][/i]


[i][b]「你講真?」[/b][/i]


「見佢終於親口講唔再糟質新人,我就停低左。」


[i][b]「真係架!我…我發誓從今日起我會對啲新人好好,唔會再郁啲就屌佢地或者糟質佢地。」[/b][/i]


[i][b]「既然你咁講,我就俾多一次機會你、放你一馬俾你去改,你今日講嘅野我會記住,如果你食言嘅話下次一定唔會再放過你!」[/b][/i]


「我嚴厲咁對佢作最後一次死亡警告。」


[i][b]「知架啦知架啦…我一定唔會再咁樣,如果我再咁樣你先至再搵我覆桌啦…」[/b][/i]


「佢講完後我就消失左係佢眼前,佢可以郁返同開返道門,我亦都將結界解除同回復返燈光,就係咁佢冇再屌你。」

fba01db62fe79d 2022-4-18 04:07

係咪墨說啲frd?

霸氣文哥 2022-4-18 07:12

[quote]原帖由 [i]fba01db62fe79d[/i] 於 2022-4-18 04:07 發表 [url=https://www.discuss.com.hk/redirect.php?goto=findpost&pid=547675284&ptid=30433205][img]https://www.discuss.com.hk/images/common/back.gif[/img][/url]
係咪墨說啲frd? [/quote]
唔係 我無佢出得咁多😂我只係一個小作者

霸氣文哥 2022-4-18 11:48

第六十一章:識女仔


「哇,精湛嘅演技同佈置,你唔去拍戲真係嘥晒,今屆奧斯卡冇你份真係可惜。」


「講呢啲,我自己都諗左好耐呢個plan架,最緊要係佢依家唔會再對你咁衰嘛。」


「緊係唔會啦,你為我搞左咁大場大龍鳳去嚇佢,佢驚到鳩縮都黎唔切,仲點敢屌我,唔怪得佢今晚對我態度都變晒,估唔到你真係會諗到招咁work嘅“鬼計”。」


「唔好咁讚我啦,人地怕羞架~」


「咁真係嘛,你呢招唔唔單止冇搞出人命,仲可以有個阻嚇性令佢唔敢會係唔係都屌我,真係多謝你。」


「嘻嘻我都知我勁,你開心就好,話左你有咩事我都會幫你架嘛,依家我靈力高左咁多做呢啲野嚇佢容乜易~」


「得戚啦你,依家開始我返工就唔洗再係咁受佢氣,我身邊你呢個好幫手真係好幸福。」


「知就好啦,得你有呢個機會咋,以後要對我好啲。」


「好啊,我以後再影多啲靚衫俾你著!」


「好啊多謝!」


說罷阿盈表現到好興奮。


「好啦,快啲沖涼瞓教啦,你聽日仲要返工。」


「你錯啦,我聽日放假lu,連埋星期日連放兩日。」


「咁鬼爽,咁我聽日咪可以全日陪住你。」


「係架啦,你冇得再一個人係度hea…」


呢一晚雖然我得知見到咁多怪事係因為開左陰陽眼,但經過阿盈嘅一番安慰我都勉強接受左,然後仲知道左我見到嘅每一隻鬼佢地唔同嘅故事,


當然最開心緊係阿盈幫我教訓左張生,我以後可以開開心心咁返工。
.
.
.
又一日,今日我放假終於可以係屋企hea一日,唔洗再返去對住個閪張生,我坐住係度篤機碌ig、阿盈就係隔離睇電視,呢個畫面真係樂也融融不過。


「哇,以前中學嗰個鼻屎華竟然都已經有女,好閃。」


我碌下碌下突然發現左啲有趣野打破左呢個平靜嘅氣氛。


「鼻屎華?你講以前個人成日好邋遢嗰個?」


「冇錯就係佢,以前佢出左名有招必殺技就係彈鼻屎,佢好鐘意撩啲鼻屎出黎彈鳩人,仲要去完廁所又唔洗手啲頭髮又散亂。」


「我記得啦,隔離班架嘛,佢以前又真係幾邋遢。」


「但畢左業之後佢依家靚仔左好多,連女都溝埋,仲要條女幾唔錯,以前啲人成日望佢唔會出到pool架嘛,但竟然都俾佢溝到。」


「俾我睇睇。」


然後阿盈八卦咁行左過黎睇。


「又真係幾靚仔喎佢依家,剪左個韓仔頭又著晒文青衫,同以前嘅佢完全唔同晒。」


「你淨係留意靚仔,我講緊條女喎。」


我鄙視左一下阿盈。


「個女仔都唔錯,佢執到寶。」


「點姐,你淨係話人地靚女靚女,你葡萄啊?」


阿盈呢下一講立即收左我皮令我冇野講。


「冇…人地溝到個靚女係人地嘅事,我只係覺得奇怪姐,我咪祝佢地幸福。」


「仲扮野,明明就好葡萄,覺得人地以前咁邋遢都溝到女但自己就乜都冇,你咁大反應就知啦。」


「邊…邊度有,我唔好唔記得我以前拍過拖架啦,呢啲閃我以前都做過啦,洗葡萄佢?」


「你以前係拍過,但已經好多年前嘅事啦,咁多年你唔饑渴?」


阿盈奸笑咁望住我,頂佢講到我好似AV入面啲男主角咁,忍慾多年就要搵條女扑野,我唔係啲咁嘅人囉。


「都係嗰句隨緣啦呢啲野,要黎嘅野始終都會黎嘅。」


「你係男仔加上魅力又唔算大,呢啲野要靠自己爭取架,不如你down個交友app識下啲女仔啦。」


「我堂堂一個正人君子洗咁cheap用埋呢啲app黎到識女仔?」


事關我覺得用得呢啲app都係約炮多,唔會搵到真愛,但所謂口裡說不心裡卻很誠實,其實我對呢啲app係有啲興趣。


「黎啦,唔cheap架,好多人都係透過交友app識人搵到另一半,我都想見到阿哥你有幸福嘅一日,我生前得唔到你嘅愛,死後我想你搵到個女仔代替我去愛你。」


「唔用,信我啦,我就算唔用都可以溝到女。」


「你唔用嘅話我以後都唔理你,哼!」


然後阿盈谷住道氣咁撓住手擰轉面背對我,佢依家即係迫我用姐。


「阿盈…阿盈啊!」


我搭住佢膊頭搖佢想佢理返我,但都無補於事。


「…好啦好啦怕左你,我試下down黎睇下,你唔好再唔理我。」


一番爭論後,最後我都係屈服左係佢嘅脅迫之下,怕左佢啦,佢即刻變得好興奮。


「真架?咁咪好囉,快啲down黎玩下~」


我係app story度搵,一search交友app就立即彈左個txxder出黎,佢位於榜首,聽好多人講都用呢個app識女,我就down黎睇下。


Down完後,我註冊左帳戶求其擺左幅以前有人幫我影嘅背影相做icon就入到主介面,我睇過佢啲說明之後大致知點用。


「個女仔幾靚喎。」


一入到主介面,見到有個叫Candy嘅女仔企直拉長條腿挨住幅牆影相,又真係幾靚嘅,身材又好。


而阿盈就食花生咁係後面雙手座落我膊頭托住腮睇我識人,我就好休閑咁坐係度。


「都唔知真相定假相。」


「唔好理啦,你試下like 10個先。」


「好,我就試下like 10個,不過like幾多都係咁姐,都唔會有人回覆架。」


「你又知唔會?你試下左先啦。」


然後我就開始挑選10個我認為啱心水嘅黎like,個情況就好似皇上選妃…


我慢慢揀慢慢like終於like到第9個,like埋最後呢個我就唔like啦,


而最後一個女仔嘅呢幅相好有氣質咁、有女神feel,佢同我一樣都係背影相,佢著住件啡色毛衣、下身配以一條黑色短裙同一對黑色短boot、頭頂戴住一個頭飾,對住棵聖誕樹做出好似雙手合十嘅動作。


我like嘅10個女仔裡面佢係第一個用背影黎影,好有一種神秘感,我二話不說就like左。


「like夠10個啦,可以收工,就睇下有冇料到。」


「你耐心啲等下啦,冇料到咪再試,入面咁多女仔一定有個你會識到。」


「你就慢慢等下,我出去行下街先。」


「又話全日係度陪我依家又掉低我一個係度。」


我用不屑嘅眼神望住佢。


「我出去行一陣好快返架啦。」


然後阿盈就穿透道門出左去。


但當阿盈出去冇耐,我手機就響起一下訊息聲,我拎起身睇一睇,


[b]你有一個新的配對。[/b]

霸氣文哥 2022-4-19 11:23

第六十二章:冤家路窄


咁快就match到?我立即㩒入去睇,睇下邊個同我match左,通常我like佢如果佢都like返我咁就match到,


我㩒到入去睇,原來就係我頭先like嘅最後嗰個女仔,我依家細心睇返先睇到佢個名叫Chole、18歲,係一個港女名,不過年齡同我一樣,


以前中學都有幾女仔叫Chole,佢地都係一啲正宗港女,希望佢唔係,


而我未玩過交友app我唔知應該要用咩開場白好,算啦,我求其send個hi俾佢就算,佢理唔理我由佢決定。


「Hi」


我send左出去,你覺得我hea嘅就唔好覆我啦。


「Hi」


但好快佢就覆左我,可以算係秒回,真係估唔到。


「好高興認識你(微笑表情) 請問我可以點叫你?」


我咁禮貌講完都覺得有啲假,同埋我都知咁樣講有啲老土,但我真係諗唔到我仲可以點同佢講。


「好高興認識你(揮手表情) 我叫Chole 你可以叫我樂兒」


佢竟然肯講埋自己個中文名我聽,唔知係真名定假名,但樂兒呢個名又的確幾好聽喎,雖然有啲公廁。


「你呢?」


係喎,頭先我掛住問佢都唔記得介紹返自己先添。


「我叫阿洋。」


「話說好似好多人個名都叫Chole 我以前中學已經有幾個人叫呢個名(笑喊表情)」


我為左開話題,唯有將頭先諗到嘅野講出黎。


「係咩 你個名都好common啊 我身邊都有幾個fd叫阿洋(笑喊表情)」


「同埋呢 你icon影得好靚 你睇落好有氣質好靚女(馬騮捂嘴表情)」


聽講女仔鐘意人讚下,所以我讚下佢,但頂,我講到好似狗公上身咁


「哈哈多謝~呢幅相係我聖誕係中環棵聖誕樹影(馬騮捂眼表情)」


「係呢 你依家係讀緊書定返緊工?」


「返緊工」


「返咩工?」


哇冇啦啦審犯咁問埋啲咁敏感嘅野,我講出黎驚佢覺得我兜踎咋,不過我又唔想咁假,如實講出黎啦。


「返緊份惠康工 你呢?」


哈,終於到我問返你,但通常如果對方係拜金女聽到呢度已經唔會再傾落去,用呢一招可以試到佢係咪拜金。


「惠康唔錯啊 可以執下貨又一日」


「我仲讀緊書 下年dse(捂嘴表情)」


佢竟然冇嫌棄我仲即刻覆我,但佢下年先dse?咁咪即係扮18歲?


「咁你依家即係17歲?」


「冇錯 因為個app最低淨係可以調到18歲(馬騮捂嘴表情)」


我都未問佢app嘅歲數佢就知我想問乜解釋返俾我聽,我依家先知原來交友app有最低歲數限制。


不過我又冇話嫌棄未中學畢業嘅女仔嘅,始終四海皆為朋友,但當然都唔想佢太細個嘅,我唔係蘿莉控。


「咁我大你一年~我就黎緊會讀ive 你dse要加油!」
.
.
.
我地傾左大概一個鐘左右,我地傾左好多野,簡直係無所不談,進展嘅速度估唔到會咁快,我地大家都加深認識左。


當中仲講到家庭問題,原來我地大家都係單親家庭,不過佢慘啲,佢老母仲因為藏毒判左去坐監,所以屋企得佢一個住、一直都係靠自己一手一腳咁生活、撐起頭家。


「係呢話說你住邊度?我見你同我嘅距離好近」


同佢傾耐左之後,我終於夠膽問佢住邊,由一開始我見到佢同我距離只係得1公里內我就覺得好奇,但傾得未熟絡冇理由就問埋啲咁私隱嘅問題架嘛。


「我住觀塘」


我夠知你住觀塘,距離咁少唔係住觀塘會係邊度,觀塘都好大架,不過當然個app都可以淨係顯示佢目前位置嘅,而唔係真係住嗰度。


「咁啱嘅 我都係住觀塘 你住觀塘邊度?」


當然我都扮下傻,可能佢眼大冇睇到個距離姐,唔通真係直接同佢講觀塘咁大你住晒咩。


然後佢講左佢住邊條邨同邊棟樓,竟然大家都係同一樣,我地住埋同一棟樓咁有緣…?唔通呢啲就係緣份要黎嘅時候自然會黎?


「咁啱嘅 我地住得好近咋喎 出入見到都可以say個hi」


「咁你住邊層樓?」


最後我問埋佢邊層樓,佢連樓層都同我一樣掛,呢一刻嘅我好似成個癡漢咁,人地成個地址我都知道晒咁濟,明明只係第一日識佢。


「25樓」


頂…真係一樣左,竟然會識到有人同我住同一層樓,唔通鄰居黎?


「真係好啱 我都係25樓 呢個世界真係好細小 我地係鄰居喎」


我諗左諗,佢唔會係我隔離屋個mk妹掛,仆街我咁樣諗左諗之後突然打左個冷震,唔好,千祈唔好係佢。


「你係…隔離屋之前好嘈嗰條友?」


我話口未完佢就問左出黎先,仆街真係佢!我地真係冤家路窄,我仲同佢講左咁多自己嘅野俾佢聽,


仲覺得佢好有氣質成個女神咁,依家真係唔慌有氣質,我對我今日嘅禮貌同所講嘅野感到作嘔。


「你係…隔離個mk妹?」


我冇正面回答地默認左佢,而我亦反問返佢。


「乜撚野mk呀,有名你叫架好冇」


哇,一講mk妹大家都知道大家係邊個後,佢態度即刻180度轉變殺你一個措手不及,同頭先嘅佢完全格格不入。


「Ok Chole姐下話 我地真係冤家路窄 我地可唔可以當冇識過?」


呢個時候我想搵路走,我估唔到我會識左個我唔想識嘅人。


「唔可以喎 你唔好諗住𡁻完鬆 識左本小姐嘅人都咪洗指意走」


乜撚野𡁻完鬆,我都冇𡁻過你,就算俾我𡁻都唔𡁻你個爛口妹啦。


「咁你想點?放過我啦」


「我想同你做朋友」

霸氣文哥 2022-4-20 14:05

第六十三章:成為朋友 


Wtf!?同我做朋友?佢係咪未食藥?佢前排先屌到我飛起喎,定係佢選擇性失憶?


加上佢想同我做朋友我都唔制啦,我唔想同一個爛口妹做朋友囉,態度又差又冇禮貌,今日我都差啲俾佢個假象呃到。


「同我做朋友?唔係幾好喎…」


我簡單而直接咁拒絕左佢。


「家下你係咪覺得我配唔撚起你啊 你唔好咁唔俾面喎」


「你依家當正自己係邊個?唔好我賞個面同你做朋友你就咁睇得起自己啦 你shit黎㗎咋。」


「只係我見你斯斯文文咁 大家背景又差唔多先同你條柒頭做下fd咋。」


我拒絕左佢換黎嘅就係俾佢屌,可能我上一世實在太欠屌,今世個個見到我都鐘意屌鳩我,


然而佢家下即係迫我同佢做fd姐,估唔到佢平時唔單止爛口,佔有慾原來都好強,不過我就算真係唔同佢做朋友都奈我唔何姐。


「我覺得我地真係唔配做朋友 不如我地真係當冇識過啦」


我再一次拒絕佢。


「你依家即係唔閪俾面我啦?」


說罷我就下線冇再覆佢,佢亦都冇再講野,好似好衰咁,但其實對付一啲我唔想識嘅人真係要咁樣先得,唔通俾佢一直纏繞住自己咩,好彩佢冇我電話咋…


「叮咚!」


過左一陣門鐘突然響起,冇啦啦有邊個黎我門口,我諗左諗…仆街,我差啲唔記得個mk妹就住係隔離,會唔會就係佢黎㩒我門鐘搵我尋仇?好撚驚添,阿盈又唔係度。


算啦,佢都係一個女流之輩姐,佢應該對我做唔到啲咩嘅,堂堂一個大男人會驚一個女仔?睇左魚眼先算啦。


我靜靜雞行到門前睇一睇魚眼,發現如我所料真係mk妹黎㩒我門鐘,佢就好唔耐煩咁企係出面。


「做咩事?」


我決定慢慢打開道門同佢見面,唔好咁猶豫不決成個女人咁,有道鐵閘擋住唔會有事嘅,你估佢會縱火燒鳩你咩。


「睇唔出你份人原來咁斯文、咁好相處架喎。」


開門後, 我見到佢同上次一樣著住件黑色T-shirt同條超短排球褲過黎,然而一開門佢即刻由唔耐煩變到微笑住咁對我講野。


「小姐你係度講乜?你係咪認錯人,你黎搵邊個架?」


我扮傻同佢作對想佢覺得認錯人,不過又點會有用,我呢個舉動簡直係一再踩佢底線、同想死冇分別,佢一定會屌死我都似。


「對唔住囉,我頭先語氣重左去屌你,你唔好放係心,我真心想同你做朋友。」


「同埋依家你屋企已經冇再好似以前咁撚嘈,我終於有覺好瞓,呢件事我都已經冇再放係心,依家當打和囉。」


「下?」


聽到佢唔係屌死我而係同我道歉同打和,我一時無言以對,同預期有出入,佢唔係好惡架咩。


不過打和?你當你係獎門人?你爛口妹黎架咋,第時你郁啲咪又係屌柒我。


「我已經好低聲下氣向你道歉,你係咪仲唔覺得係打和唔撚受啊。」


佢由咁惡死忽然變到咁好聲氣肯定有陰謀。


「點解你咁想同我做朋友?」


既然佢都知道晒一切,語氣又好返,我都無謂再扮傻。


「點解有個女仔係度嘅?你地講緊乜?」


突然阿盈出現係mk妹身後,睇黎佢行完街,然後咁啱返到黎撞到我地,而睇得出佢見到後係表現出一陣開心,唔通呢一切都俾佢目擊到晒?


「我頭先咪講左,因為你好相處、斯斯文文、背景又差唔多。」


我冇理阿盈,mk妹繼續講。


「啱啊,佢真係好好架又好相處又斯文,仲要肯幫人添,你真係冇識錯人。」


阿盈突然插把嘴埋黎,我啤左佢一下叫佢唔好亂講野。


「如果你咁講出面大把人都係咁啦,點解一定要搵我做朋友?照計你身為一個mk妹應該有好多朋友同好易識朋友先係架。」


「總之你唔撚好理啦,我就係想同你做朋友唔得咩?」


「同埋我再講多次,我唔係乜撚野mk妹,我有名你叫,我叫Chole,你可以叫我樂兒!」


一聽到我話佢mk妹佢又變得激動咁屌返我,佢再次重覆係app對我講嘅野,咁你真係mk嘛,唔通扮mk咩。


同埋依家諗返起其實叫得做樂兒嘅都係一啲mk名,果然人如其名。


「Wow!果然夠真性情,佢斯文又得粗俗又得,佢份人唔假同埋睇得出佢本質係好,你就受佢啦。」


我再啤左啤阿盈叫佢唔好亂講,


阿盈啊你唔好再亂講啦,我同佢唔係你諗嘅咁架,佢係爛口妹黎,件事冇咁簡單,


不過有一點我又的確估佢唔到嘅,佢竟然都有斯文低聲下氣嘅一面,呢點有少少改觀。


「Okok Chole姐,咁其實你都有斯文嘅一面嘅,但就算做左朋友又點呢?你有咩目的?」


「朋友咪朋友,可以點?你開個交友app係為乜我咪為乜囉。」


我開個交友app為乜?為識朋友?為溝女?莫非佢想溝我?


「做咩呆撚左係度,咪為識朋友囉,識朋友就緊係傾計架啦,你唔係諗住我想溝你下話,食懵你啦。」


頂佢我未開口佢就知道我諗乜,佢識讀心架?


「癡線,咪…咪就係為朋友囉,你溝我都唔受啦,你估你好靚咩。」


好彩我咁都兜到,但其實佢個樣又的確幾唔錯嘅,只係mk左啲。


「嗱,你都識講識朋友,即係你都當我係朋友啦,咁我呢刻開始就當你朋友。」

霸氣文哥 2022-4-21 11:37

第六十四章:教功課(上)


屌咁都俾佢陰到,真係防不勝防,這陷阱、這陷阱偏我遇上。


「咪住先,我都冇應承同你做fd,我仲考慮緊喎。」


「求撚其啦考咩慮,咪撚咁婆媽得唔得啊成個女人咁,我當左你係我朋友架啦。」


我完完全全係俾佢夾左黎做佢朋友,仲要最後我都要俾人話似女人。


「聽日可唔可以我屋企坐下?我有啲野想你幫。」


我地先第一日識就冇啦啦叫我去佢屋企?一定唔方好野,睇佢呢啲mk妹平時著到咁少布一定係淫底,話唔定佢叫我聽日去佢度就係想幫佢解決性需要…?


「幫啲咩?」


「總之就有野想你幫啦,你聽日咪知,唔好咁撚多聲氣。」


佢就好似女王命令式咁叫我幫佢。


「你要講清楚先…」


「咁我預你聽日黎架啦,唔好飛機啊朋友,飛機正仆街 。」


我未講完佢已經幫我決定左,又再一次俾佢夾住左,今次俾佢夾住黎佢屋企,好一個自把自為,然後chole姐就行走左返左去,阿盈亦都穿過道門入左黎。


「你咪去下佢度睇下佢想搞乜,有咩事仲有我係度架嘛,佢唔會傷害到你。」


「加上你聽日放假都唔會有咩做,去睇下佢想點都好啊,係機遇黎。」


阿盈一見有女仔約我就失晒理性咁叫我去,仲一尾係度陰陰嘴笑。


「閘住!呢啲鬼係機遇,係黑仔,我根本唔想同佢呢啲mk妹扯上任何關係。」


「mk妹?但我覺得呢個只係佢表面,佢內裡其實係好。」


「唉,實不相瞞佢就係我之前同你講你沉睡期間佢過黎屌鳩我嗰個mk妹,佢叫得我過去肯定冇好野。」


「原來就係佢,但嗰陣係誤會黎姐,我嗰陣沉睡又的確真係嘈到人嘅,我都有唔啱,搞到人地晚晚瞓唔到教又真係會幾燥。」


諗諗下又好似幾有道理嘅,俾著我夜媽媽俾人嘈住晒瞓唔到我都會火,同埋佢都已經為頭先件事道左歉,仲要將以前屌我嘅事放低打和埋。


「好啦好啦怕左你,我聽日就去睇下佢啦。」


「嗯嗯,除左我覺得佢係好,我仲感受到佢內心係有一絲寂寞。」


「寂寞?佢呢啲mk妹大把fd啦,點會寂寞?」


「話唔定架,家家有本難念的經。」


我睇唔出佢本經有幾難念,唔通會係因為得佢一個人住而寂寞咩。


「話說你地係點識?」


「咪就係交友app識,like第10個嗰陣同佢匹配左,都係問佢住邊先知原來係隔離個mk妹。」


「咁都俾你識到佢,證明你地真係有緣份,都話左玩app係有用。」


「緣鬼咩,我同佢呢啲叫孽緣,真係冤家路窄。」


「佢仲話自己同我一樣係單親家庭,佢老母仲要因藏毒入埋冊,都唔知真定假。」


「你聽日去到咪知,可能佢就係因為咁而寂寞。」


「好啦,就睇下佢聽日想玩乜野。」
.
.
.
好快到左聽日,我準備步出門口去佢度。


「阿盈你跟唔跟埋入黎?」


「我唔入去啦,唔阻你地二人世界。」


說罷阿盈陰陰嘴笑,佢幾時變到咁識做,但我同chole姐係冇可能架囉,隨即我做出一個作嘔嘅表情。


「二咩人世界,聽見都作嘔,我唔會鐘意上呢啲mk妹架,我只係好奇過去睇下佢想點。」


「知啦知啦你快啲去啦,有咩事你先大叫我個名過黎啦。」


然後我就慢慢行到佢門口㩒門鐘,佢屋企同我屋企只有10多米距離之隔。


[b]叮咚![/b]


門鐘響起冇幾耐,佢就開左門迎接我入去佢度,入到去瞬間迎來一陣木板味,發現佢屋企好靚好整齊好有少女feel,


佢地方唔算大,細我間屋少少一房一廳,但地下舖晒地板打晒蠟,深啡色加上識反光嘅地板顯得好乾淨、周圍啲野好整齊、雜物唔多,亦因為咁顯得佢屋企空間感幾大,


牆壁全貼上粉紅色嘅牆紙、而玻璃櫃內就擺滿好多隻大大小小嘅公仔,充滿少女心嘅一個設計,天花板就由一盞吊燈配襯,顯得有點兒高貴,完全同我屋企兩個世界。


「算你都肯黎啦,仲以為你真係會飛機唔黎,呢啲先係朋友架嘛。」


而chole姐就同琴日一樣著實件黑色T-shirt同條超短排球褲過黎,


究竟佢係咪冇衫到一個點要日日都著實同一套衫?定抑或佢呢個look先可以代表到佢身為一個mk妹嘅形象?


「閘住!我同你只係鄰居,我仲考慮緊架,我未當你係朋友,係你話有野想我幫我先好心過黎睇下你有咩事。」


「你唔好咁婆媽啦,成個女人咁你知唔知醜?」


我又冇啦啦俾佢話我似女人,一啲尊嚴都冇晒。


「其實我今日叫你過黎真係有啲野想你幫嘅,你坐陣先。」


說罷佢就入左房拎野,我坐係張枱面前,然後佢拎左個書包出黎,佢就從書包中拎左疊功課出黎放係張枱。


「教我做功課。」


「你話有野想我幫就係教你做功課?」


「係啊,見你都已經畢左業就黎做Ive仔,你應該都有返咁上下成績教我啦。」


「下?你係咪搞錯左?我唔係讀大學喎,我只係個ive仔,我讀得ive成績都係啱啱好合格晒咋喎,你搵我教不如搵個把炮啲人教啦。」


「得啦你係咪咁撚樣都要推啊,我叫你黎教就教啦咁多嗲,你啱先先畢業唔多唔少都記得啲野啦。」


「但我幫人補習要收錢架喎,你俾幾錢我先。」


「你咪撚貪心啦,一場朋友我叫你黎求其教下咋,唔算補習,咁都要收鳩我錢?同埋你都識講你只係ive仔啦,你有幾多斤兩值得收鳩我錢啊?」


我總算知道點解佢想同我做朋友啦,原來係想r著數想我免費幫佢補習。


「有錢有動力啊小姐,就算係出面都係收錢做野架啦,我要諗返以前學過啲野都好吃力架。」


我係要同你作對啊,吹咩。


「我俾你屌囉,咁夠唔夠啊柒頭。」

霸氣文哥 2022-4-22 16:05

第六十五章:教功課(中)


我俾佢呢一句令我感到好愕然即時冇野好講收左我皮,冇諗過佢寧願賣身都想我教。


「癡…癡線,你俾我我都唔搞你啦。」


「怕左你啦,我暫且就唔收你錢,但我真係好廢架咋,你唔好指意我好勁。」


我幫我自己戴定個頭盔。


「得啦,即係你肯教我啦。」


然後chole姐就拎左部手機出黎係疊功課隔離望住開晒濾鏡自拍準備po上ig story,上面寫住「巧開心 終於搵到個人幫我免費補習 考試巧辛苦架 但今次考試一定可以輕鬆carry~要努力啲!」


Mk妹真係Mk妹,一知道我會教佢就即刻po上ig曬命扮勤力,慌死冇人知道佢努力嘅一面,然而我亦都見到佢follow左好多男仔fd,佢應該成日同啲男仔玩。


「洗唔洗咁做作啊,冇人會讚你架喎,衰左唔好賴我。」


「乜撚野做作,我用功讀書架,教你就教啦咁多嗲。」


要我教你做野都咁冇禮貌,果然有其母必有其女。


然後我望向佢啲功課,見到一張工作紙上面寫左佢個名、班別學號,仲有學校名,原來佢真係叫樂兒,佢全名叫孔樂兒,5C班,13號,學校係我附近嘅一間band 3頭中學。


「咁你修咩科啊?」


「中史、生物。」


平時佢咁惡死竟然修中史呢啲咁沉悶嘅文科?


「你真係好彩,我以前都係修中史,呢個勉強教到你少少。」


「雖然我修中史,亦熟讀中史,但我模擬試只係攞2,因為好多關鍵字都冇寫到出黎,所以我淨係齋講會好了得。」


「乜你咁廢架,你淨係識齋講都攞到2?」


佢見我冇料扮四條咁即刻串下我。


「你唔好搵我教囉。」


「咁你盡教囉,只係我中史係最差咁解。」


佢聽到我拎呢樣野做把柄佢都冇野好講死死地氣叫我教。


「但你教我英文先。」


英文?啲雞腸反而係我最差喎,我點教你?


然後佢拎左張英文作文紙出黎做,呢個時候我先發現佢原來有幾手指係搽左層肉色嘅指甲油,加上佢手好白滑 ,更突顯佢對纖纖玉手嘅靚,估唔到mk妹都咁識得扮靚。


但佢唔會俾學校抓儀容咩?定佢搽肉色指甲油就係因為見可以過到骨?


「喂,peanut點串?」


正當我陶醉緊佢啲指甲之時,突然佢問起我一個英文點串。


「penis?咪p-e-n-i-s,乜你作文要寫陰莖呢個字架咩?」


但peanut同penis嘅讀音有啲似,所以我聽錯左。


「笑死屌你唔好淨係掛住你碌鳩啦,peanut啊,即係花生。」


頂呢一刻我即刻尷到紅都面晒,我仲要好有自信咁串penis出黎,搞到佢笑到我面黃。


「得得得幫緊你,我幫你Google translate下。」


「乜你英文咁廢架,ive喎,連隻英文單字都唔撚識,都唔明你點pass到。」


然後我又俾佢串,其實我以前英文嘅模擬試只係啱啱好合格。


「我咪講左我黎緊只係個ive仔,成績唔係好好,仲要英文我最差。」


「咁你查到未呀咁多嗲。」


「查到啦,p-e-a-n-u-t。」


然後chole姐繼續做佢嘅作文,佢竟然全程都唔洗我點幫佢,係好彩嘅,可能佢都知我英文唔係點幫到佢。


「bridge呢?點串。」


過左一陣佢又問我某個英文點串,今次我好清楚聽到佢講咩啦。


「bitch?咪b-i-t-c-h,你係咪講緊你自己哈哈。」


我終於有機會串返佢,但佢作文可以寫粗口架咩?


「屌你你就bitch。」


然後chole姐一巴掌車左落我個頭,我感到一陣痛楚。


「哇好痛…」


「抵死啦話鳩我,on9仔我話你英文白癡真係唔係扮架喎,bridge啊,橋啊,翻譯下啦智障。」


頂我又柒多次俾佢串鳩我,今次仲要打鳩我,佢兩個讀音實在太似,我自己都聽錯左,點解英文啲音要咁似粗口。


「查到啦,b-r-i-d-g-e。」


說罷佢繼續寫佢篇文…


做左大約一個鐘多啲,佢就做晒,然後拎俾我過目。


「你拎去睇下我寫成點。」


我一睇之下令我嚇親,佢無論文筆、文法,就連結構組織等等都寫得好好,佢呢個程度起碼攞到3以上。


「其實你英文咁好點解仲要我過黎教你?仲好過我喎。」


「我就係想你過黎教我啊,吹咩?你黎做我嘅人肉翻譯機都好。」


咁咪即係當正佢成個娘娘咁,連翻譯都叫人幫佢,可惜我係唔會做爛口妹隻兵架。


「況且我又唔係淨係叫你黎教我英文,其他科唔洗教嘅?」


「咁你仲有咩要做啊小姐。」


「中史囉,咁啱有張工作紙要做。」


Chole姐從佢疊功課攞出幾張工作紙出黎,第一part係問答黎。


「我唔想睇書,你直接講答案我知啦。」


「乜你咁懶,揭書都覺得麻煩,明明書中自有黃金屋。」


[b]啪![/b]


我又俾佢從後打左我一下。


「我黃你老味,叫你講就講啦咁多嗲,叫得你黎幫我睇書黎托呀,明明你仲要吹到中史好撚勁咁。」


條mk妹真係好撚暴力,一言不合就打人,真係唔知點解我仲會有心教佢。


「好好你冷靜啲,等我睇地睇下啲題目。」


第一題係問李隆基係邊個皇帝。


「你係咪連第一題咁簡單都唔識?」


「識就唔洗問你啦,你係咪又多嗲?」


「咪係唐玄宗囉,寫啦。」


我快快趣講個答案出黎,費事佢就一巴車落黎。


「原來佢就係唐玄宗,我幾鐘意呢條友。」


又話自己唔識歷史嘅,冇啦啦又會識佢乜水?


「你鐘意佢都冇用啦,人地鐘意肥婆架,你瘦到成鵬骨咁返到去都一定俾人地流放去大西北。」


我心入面忍唔住暗爽以我嘅歷史知識串返佢。


[b]啪![/b]


突然我又俾佢大大力打左一下。


「屌你我鐘意邊個關你撚事,洗唔洗你管?」


的確係嘅,我又唔係你邊個,點管到你咁多,你識邊個都唔關我事…on9我諗呢啲做乜,做咩冇啦啦咁著緊佢,佢識邊個真係唔關我事。


「冷靜冷靜唔關我事,我地繼續。」


然後好快我講晒問答題啲答案佢聽,問答呢一part好快就搞掂左,跟住就去到長問題。


「跟住嗰啲點搞啊?」


「你寫左第一題先,佢問你秦滅左邊六個國,就係齊楚燕韓趙魏。」


對我呢啲鐘意歷史嘅人黎講,呢啲國名我唔洗記都識,簡單啦~


「有啲料到喎中史撚。」


「當然,繼續作戰!」


呢刻嘅我遇到中史充滿自信,題題輕鬆KO、如入無人之境。


「跟住呢題承上題,佢問你六國滅亡嘅過程同成因,8分長答題黎,睇下呢題點樣收你皮。」

霸氣文哥 2022-4-23 13:08

第六十六章:教功課(下)


Chole姐陰陰嘴笑咁望住我,就好似覺得呢刻嘅我如臨大敵咁,覺得呢次我一定會唔識,而之前嗰啲都只係卒仔。


「睇下點,我講俾你聽你做寫啦。」


「首先秦會由韓趙魏呢啲細國入手,跟住就輪到楚燕齊,當中楚齊都係大國,佢地六國最主要成因係勾心鬥角唔信大家所以合作唔到。」


其實我覺得歷史同現實係有啲似,例如辦公室政治,大家勾心鬥角大家唔信大家唔會合作,其他人有啲咩事都只係食花生,覺得唔關自己事,


但到公司蝕錢嗰陣咪又係大家一齊攬炒齊齊減人工,嚴重嘅話有啲甚至要去到被「滅國」,即係炒魷魚。


「跟住我就會講下佢地點樣滅亡,簡單黎講佢地分左3個派別,韓魏齊係防守派;趙楚係作戰派;燕就係刺客派,而最尾防守派嘅齊係成為左最後生還者。」


「首先秦始皇有一日唔知食錯咩藥覺得好興奮就派重兵隊冧左韓;跟住去到趙呢個作戰派,本來入面有條友叫李牧好好抽但就俾秦收買左趙入面某條彈散做二五仔,佢話李牧想作反,就咁收左佢皮,趙國亡。」


「去到魏呢個防守派,佢心諗我起晒高城牆你仲點搞到我,今舖仲吹撚得我漲?點知秦用水攻一招收左佢皮,魏國亡。」


「輪到楚呢個作戰派,呢個係大國,有條友叫項燕雖然佢肯作戰,第一輪亦收左秦皮、但去到第二輪條友主動引戰但人地想休息下。」


「到條友覺得引到冇晒癮好攰諗住走嗰陣人地先出黎打鳩佢,最後又收左皮,楚國亡。」


「燕係刺客派,佢派左條友叫荊軻嘅傻仔諗住叫佢去秦做臥底偷偷地做秦始皇一鑊,點知失敗左,秦見佢竟然咁夠薑就即刻派重兵收左燕皮,燕國亡。」


「黎到齊呢個食花生國,佢有條彈散叫后勝又係二五仔,長年收人錢唔搞事,齊大佬又信條彈散話好平安,所以佢咪可以安逸到最後一個被滅嘅國,然後到大佬醒覺嗰陣已經俾秦收佢皮,最後齊都亡埋。」


我將成個過程講晒出黎,Chole姐就默默咁轉返做書面語改少少字眼咁寫返晒落去,果然孺子可教。


「點啊,夠唔夠詳盡?呢8分拎撚晒啦。」


「你老味睇唔出你又真係幾熟讀歷史,但你啱做講故佬多過考dse,乜撚野關鍵字都冇。」


冇錯,如果考試都有得咁樣用講嘅方式寫返晒出黎嘅話我一定好高分,可惜考試並唔允許我呢個講故佬嘅存在,所以到放榜嗰陣我都唔知可唔可以拎到2以上。


「我不嬲都話我熟讀歷史,只係考試唔接受我。」


「點啊,你寫好未?」


「寫好晒啦,你見我寫到成版紙都係字就知咩料啦,不過你又的確講得幾有趣嘅,我鐘意。」


受到賞識後我不自然地揚起左得戚嘅笑容,顯得我呢個講故佬好有成功感,原來我呢個講故佬都唔係完全冇用。


「唔好笑得咁撚開心住,未做完架,仲要作戰。」


當我得戚地笑緊之時Chole姐就制止住左我笑。


「黎黎黎繼續作戰!」


不過我依家士氣仲係滿滿的,繼續過五關斬六將我都冇問題。


「黎緊呢題長答問你焚書坑儒嘅成因係咩,值5分。」


焚書坑儒?咪即係好似文化大革命嗰啲咁,獨裁嘛,仲有唔講得佢壞話。


「焚書坑儒嘅主要成因咪因為條友獨裁同玻璃心,條友獨裁係因為覺得自己國家啲文化最勁,其他都係垃圾,所以其他宗教或者文化嘅書都要燒晒佢,淨係留自己國家嘅史書。」


「至於玻璃心就係啲幫佢煉丹條彈散失敗左係出面周圍唱佢講佢壞話,跟住咪抓撚晒佢地坑殺,當中嘅儒就係班術士。」


說罷Chole繼續以轉換字眼嘅方式寫落去。


「冇啦?人地5分題喎。」


過左一陣佢就寫完,佢手速都幾快。


「冇啦,你自己諗辦法寫多啲延伸啦。」


「聽完你咁講我覺得秦始皇真係好撚殘暴,人地講佢少少壞話就殺晒啲人。」


「殘咩暴,其實你咪就係秦始皇,焚書坑儒件事好似你,一樣係唔抵得我講你少少壞話就郁手郁腳打鳩我,玻璃心啊!」


我一聽到佢講秦始皇殘暴我突然又諗到個位可以入佢串返佢。


[b]啪![/b]


說罷當然又俾佢打左一下,依家嘅我手臂周頸已經佈滿掌印。


「屌你我依家打你唔撚起啊,我係鐘意打鳩你呀,吹咩?我冇好似佢咁隊冧你咪已經偷笑。」


「好啦喎,再打我信唔信繳你械!」


「繳乜撚野械?」


「收起你枝筆唔俾你做野啊。」


「好啊,你過黎我講個秘物你知。」


我唔知點好聽話咁哄個頭埋去佢身邊,究竟佢想講咩要咁神秘?


然後佢貼住我耳邊,嘴輕聲地講左啲野,一陣暖氣同輕聲嘅聲音係我耳孔中回盪,可能氣流觸動耳內嘅微毛,瞬間令我好敏感地打左個冷震,


但其實係舒服,眼前嘅女仔竟然咁親近我做出咁親密嘅舉動,令我心跳不自覺地加速。


「收皮啦你柒頭。」


最後佢係我耳邊講左呢6個字。


「屌你玩鳩我,我依家就繳晒你全副武裝,你筆袋呢?」


知道佢玩鳩我後,我即刻周圍搵佢筆袋係邊。


「柒頭,筆袋我一早收起左啦,仲等你慢慢偷咩哈哈。」


佢笑到gap gap聲,我頓時覺得自己好柒,又再一次俾佢冼一鑊,點解我要咁聽佢話係咁俾佢玩?


「屌你個mk妹今次算你好野。」


我冇晒佢符唯有死死氣地認輸。


[b]啪![/b]


一聽到mk妹佢突然神緒180度轉變又一巴掌車左落黎。


「又m乜撚k妹啊,講過幾多次我有名你叫。」


[b]啪![/b]


「啊好痛,唔好打…」


「聽唔撚聽到啊!」


「嗱,雖然我唔打女人,但我都唔好恰架!」


[b]啪![/b]


「咪撚講其他野啦,我問你聽唔聽到!?」


然後佢今次好似真係發火咁打左我好幾下。


「聽到聽到,冷靜啲唔好再打,痛。」


我身為一個男人係女人面前竟然俾一個女人打到投降,莫非出面啲老婆奴就係咁?


「咁我叫乜野名啊!?」


「孔樂兒嘛,Chole姐。」


「...你點知我全名?」

霸氣文哥 2022-4-24 12:31

第六十七章:鬥嘴


「咪就係你啲功課度見到。」


「大膽呀你,偷睇我個全名。」


說罷Chole姐陰陰嘴對住我笑,知道個全名姐有咩咁好笑?


「你…你唔係以為我會鐘意你下話,咁啱𥄫到咋,我點會鐘意你呢type女仔,你唔啱我口味。」


我見到呢個情景即刻慌忙地解釋,紅都面晒。


「你做咩咁緊張姐,我都冇話你鐘意我。」


頂佢佢講完呢句我更加緊張,好似更加俾佢感覺我唔對路咁…冇錯,係尷尬!


「我…我都冇緊張,你諗多左。」


「唔講啦,繼續作戰啦,唔好嘥時間。」


然後我地慢慢平靜落黎,我繼續教埋佢淨低落黎嘅中史題目…


過左唔知幾耐,佢終於清晒啲功課,我今日任務亦都完成,準備返去之時,佢想我黎緊佢放學都過黎教下佢,但我話佢放學嗰陣我要返工,要放假先得,


之後再講下講下佢竟然估到我係屋企附近間惠康返工,不過諗深一層其實都唔難估嘅,係人都想搵返就近返工…


「返黎啦?佢叫你去佢度做咩?」


返到屋企後,阿盈第一時間好奇問我去佢度做咩。


「咪就係叫我去教佢功課,但佢真係好暴力,串佢幾句就係咁打我。」


「原來係功課上有求於你姐,冇你諗得咁壞呀,但你地進展得幾快啊,第一次見就打情罵俏晒。」


「乜你咁雙重標準嘅,我俾其他人蝦就好著緊即刻幫我,但俾佢蝦你就咁開心。」


阿盈冇啦啦又話我同佢有野,我以鄙視嘅眼神望住佢。


「咁係嘛,一次生兩次熟,但你地未去到第二次已經咁熟啦喎,佢打你咪即係覺得同你好相處。」


「癡線我先唔想同呢啲mk妹熟,佢每一下都大大力打落黎架,我自己都受緊苦。」


「佢仲話遲啲都想我過去教佢,遲下可能需要搵到你出動,你知你以前學霸黎架嘛。」


我都唔知點解明明今次受左咁多苦但我都仲肯應承之後得閒再黎教佢,而且內心仲有少少愉悅有啲期待下一次,


仲要佢每一次打我其實我都有少少興奮,好似覺得自己被受重視咁…仆街唔通我內裡係被虐狂黎?


「講呢啲,我唔係好勁架咋。」


「扮謙虛啦係度,係呢你以前修咩科?Chole姐佢修中史生物,我淨係識教佢中史。」


「佢修生物?咁咪開正我嗰範?我以前都修生物喎。」


咁啱?我依家先知原來阿盈佢以前係修生物。


「咁就掂!遲下佢生物有野唔識可以請你槍黎支援。」


「你唔係好唔鐘意佢咩?點解冇啦啦又咁願意幫佢?」


說罷阿盈陰陰嘴對我笑,我即刻感到無言以對。


「我…我見佢咁慘咩都唔識先好心出手幫佢咋,我當然係唔鐘意佢呢啲mk妹。」


「講笑咋得啦,有需要嗰陣先叫我過黎幫下手啦。」


癡線阿盈問埋呢啲野搞到我又紅都面晒,我自己都唔知點解咁肯幫佢。
.
.
.
又黎到星期一返工嘅日子,我又要返黎面對張生,但今次係「全新」嘅張生。


今日同平時一樣係水街度上住貨先,張生行過都冇乜點理我,就算有甩漏佢都冇再屌我,而係有耐性咁教返我點做,睇黎佢係俾阿盈嚇到冇晒膽。


當唐生遇到全新嘅張生對我嘅態度180改變,佢都問我點樣馴服左佢呢個老屎忽,我當然扮唔知,但佢硬係覺得我應該用左啲咩方法,好佩服我……


「唔該,我想問呢個優惠去到邊時?」


正當我踎低上緊貨嗰陣,隔離突然傳來一把熟識嘅女仔聲問我野,佢行到好近我嘅位置,我向隔離地下一望,見到一雙雪白嘅腳背踢住對厚底拖鞋,腳甲搽晒黑色趾甲油。


「邊個優惠…?」


正當我向上望時,前面嘅人原來係Chole姐,佢上身著住一套雪白嘅校服過黎、腰間扣住一條綠色皮帶。


「我玩鳩你咋,都冇咩優惠哈哈。」


「你點解會係度?你過黎做咩?」


我第一時間問佢黎呢啲做咩。


「我過黎咪過黎,你吹咩?呢度又唔撚係你開嘅,我過黎買野又得,過黎睇你做野又得。」


呢點又俾佢講得通,佢黎我都奈佢唔何,鬼叫我一開頭同佢講我係惠康度做,仲要估到我就係呢間度做。


「係買野就買野啦,唔好阻住我做野。」


「我係要慢慢買呀,你吹咩?執你嘅貨啦柒頭。」


「Chole姐好心你放學就返屋企溫書啦,你就黎考試架啦,咪撚阻住我做野。」


「你小心啲講野啊,客人至上,因住我port你port到你連份工都冇得做。」


佢咁講完我即刻冇野好講,呢啲就係客人同店員嘅分別,店員除左要受老屎忽氣仲要永遠受客人嘅氣。


「唉我唔理你啦,咁你慢慢買飽佢啦。」


然後我呢條街執得七七八八就去隔離條街上貨。


當我係隔離條街上左一陣貨後,佢冇啦啦又拎住兩包野行過黎。


「喂,你覺得呢兩包m巾邊一包靚啲?」


Wtf!?佢過黎叫我揀m巾?我男人老狗一條又點會識揀女人野,就正如男人都唔會叫女人買condom,呢啲野唔係不嬲你自己用開自己先知架咩?


「…」


我扮聽唔到野咁唔理佢繼續我有我上貨。


「我問緊你野啊,出聲啦。」


「喂咩,我家下冇名你叫咩,我叫方伯洋,你可以叫我阿洋。」


我特登學佢屌我咁串返佢以便轉移話題,但我變相就直接爆左自己個全名俾佢都唔知。


然後佢又大大力打左我一下。


「屌你呀學我講野?你以為自己係邊撚個咁巴閉啊?」


「你唔好郁手郁腳啊,有CCTV影住你。」


說罷佢就好似收左皮咁冇野講,我終於有一次係可以收到佢皮。


「咁我叫你聲洋兄囉,邊款m巾靚啲啊?」


佢俾我收皮後就將聲線變得溫柔咁問我野,眼前有兩包m巾;一包紫色、一包粉紅色,同樣係38cm但唔同牌子。


「關我蛋治咩!」

霸氣文哥 2022-4-25 11:21

第六十八章:道歉


最後我以一個扮惡嘅語氣拒絕回答試圖叫佢走,因為我真係唔識揀女人野,亦唔想幫佢揀。


「嗯…明白,咁我走啦,唔阻你…」


我宏量嘅聲音此起彼落,說罷佢就表現到好失落咁垂低頭掉頭走左,我以為佢會屌返我嘅畫面竟然冇出現,


然而依家呢個畫面令我愕然,我都係第一次見,我係咪語氣重左hurt親人?我係咪唔應該咁惡咁鬧佢?始終佢已經變得好聲好氣咁問我,但我仲好強硬咁鬧返佢真係有啲衰…


呢刻嘅我仿佛感到罪孽深重不斷覺得自己好仆街咁趕走左人…


其實你問我m巾嘅野我內心係有少少暗爽架,心諗我竟然可以知道啲女神咁私密嘅野,我覺得自己好榮幸,


我估一個女仔一定係好重視好信任一個人先會將自己咁私密嘅野同佢講,但偏偏我就要同你作對,以為你會同我鬧嘴落去,點知結果係…我趕走左你。


係,我已經不自覺當左你係女神,我覺得你好珍貴…雖然你係mk妹,但其實你真係好靚,你仲會識美甲扮靚、屋企亦都打理我十分整潔而且仲好少女feel,你每一刻都有種高貴嘅氣息散發出黎,


再諗返第一日係交友app識你嗰陣,由睇到你幅相開始,去到你咁有禮貌同我傾計,你真係好有氣質,可能呢啲就係你對我嘅魅力,亦都係吸引住我嘅原因…


只係我不斷安慰自己一定係太少同太耐冇同女仔相處先係咁,我拒絕面對我內心最真實一面。


依家我咁惡咁hurt左佢,佢係咪唔會再同我做fd…?我地係咪自此變回陌路人?如果係咁嘅話佢咪唔會再打我?佢唔打我嘅日子會好唔慣…種種唔好嘅問題不停係腦海中旋轉。
.
.
.
放工後,我隨即好快咁行返屋企,佢係個app冇再理過我,唔知佢咪真係好hurt,雖然依家好夜,但我都想去佢屋企當面同佢講返聲對唔住…


沿路返去之時,經過條巷仔,嗰對鬼母子見到我冇再襲擊我,反而係好有禮貌地向我點點頭,我感到有啲反常,


而伯伯就繼續佢嘅睇電視,但我冇心機理咁多繼續快步行返去…


「阿洋你返黎啦?做咩氣來氣喘咁?」


我返到屋企後,我立刻擺低啲野準備去隔離搵Chole姐,阿盈見狀頓感疑惑。


「咪…咪個mk妹,佢今日黎惠康我好似hurt親佢趕走左佢,佢全日冇搵過我,我想去隔離搵佢道歉返…」


「死啦你,原來你hurt親人,咁你真係要好好氹返人啦。」


「不過依家咁夜人地會唔會已經瞓左?」


「我唔理啦,今日做左件錯事,我已經等唔切搵佢道歉返,我好內疚。」


說罷我好快就出左門口去到Chole姐門口,而阿盈見我咁焦急亦跟埋出黎睇下有咩可以幫到我。


[b]叮咚![/b]


我深呼吸一下後按響佢個門鐘。





鐘聲係屋內響起後並冇一絲動靜,唔通佢真係已經瞓著左?


[b]叮咚![/b]


我再次按響佢個門鐘,然而屋內依然一絲動靜都冇。


「可能人地真係瞓左,你唔好嘈醒人啦,我地可以聽日再黎。」


阿盈見我㩒兩次門鐘都冇人應索性叫我聽日再黎搵佢,但我當然唔服氣,因為我仲諗到個方法。


「阿盈,不如你試下入去佢度睇下佢係咪真係瞓左。」


呢個方法就係叫阿盈穿入人地屋企,雖然咁樣好似好冇私隱,但為左一探究竟呢個係最快捷嘅方法。


「咁樣真係好咩?咁樣係擅闖人地屋企喎。」


「你地大家都係女仔唔驚啦,得你可以幫到我架咋,唔該呀…」


我雙手合十咁祈求阿盈幫我。


「唉,真係冇你符,淨係呢次架咋。」


「知道啦。」


說罷阿盈就準備穿入佢間屋。


[b]共共共~[/b]


正當阿盈要入去之時,突然走廊盡頭傳來𨋢門打開嘅聲音,亦伴隨著腳步聲有人行緊過黎,我倆停住左動作。


慢慢地遠處浮現出一個身影,佢身穿一件黑色T-shirt、下身一條超短熱褲配以一對白波鞋、腰間孭住一個鐵鏈斜孭袋,冇錯,係Chole姐。


我同阿盈都估唔到佢竟然仲未瞓,而係依家先返,其實我應該一早就要估到佢唔係屋企,畢竟佢係個mk妹,出夜街應該都好正常。


見到佢嘅出現猶如見到曙光一樣、好滾動,我再次可以見到Chole姐。


「喂柒頭,你係我屋企門口搞乜撚野?」


你盡情鬧我啦,你嘅每一句粗口橫飛我已經習慣伴隨係我身邊,而今次的確係我錯先。


「我…我過黎睇下你死左未咋,我今日咁惡鬧你…」


「喂阿洋,你做乜仲講埋呢啲野?」


阿盈聽到我講得咁難聽篤左我一下,但其實我都唔知,每次見到Chole姐我都會忍唔住串下佢,可能我係受左佢氣場影響啦。


「你唔好諗到自己咁撚偉大啦,你邊個啊?我會為你死?你照下你個閪樣先啦,同埋我唔會俾你把死人聲嚇窒囉。」


「但你今日好似好hurt咁行走左,你垂頭喪氣咁…」


「hurt你老味咩,我見你唔想答問黎都嘥氣我咪自己買完走先,我垂低頭係因為揀緊手上邊包好啲咋懵撚。」


原來係咁,一切都係我諗多左,佢並冇俾我嘅聲線嚇倒,但我仍然為我今日鬧佢感到些少內疚。


「同埋我今日咪未答你嘅,我依家可以答你,紫色好睇啲。」


「我買撚左啦等你咩,你唔好再遲啲講。」


「買左咩色?」


呢一刻我由我親口問佢買左咩色嘅m巾竟然冇晒今日嘅嗰種尷尬。


「你最鐘意嘅紫色囉,你唔撚係話關你蛋治架咩?」


「今日係我唔啱嘅,一野就落左你閘,對唔住。」

霸氣文哥 2022-4-26 12:59

第六十九章:送上下午茶


「男人老狗唔好咁肉麻啦,我聽完都起雞皮,有啲野在心中改左佢咪算撚數囉,不過估唔到你份人係識得認錯。」


可能我突然變得咁認真佢感到有啲愕然,但竟然係有人唔鐘意聽到人道歉?


「既然你話你冇俾我hurt到,即係你之後都會繼續同我做fd唔會絕交?」


「冇啦啦絕乜撚野交,你見我份人有咁易同人絕交咩,我仲有大把功課要你教架。」


「你終於認你同我係fd啦咩?之前唔係想你同我做fd仲難過叫你食屎咩?」


「做咩姐,因…因為今日好似嚇親你我內疚先勉強當你係普通朋友咋。」


「得啦知架啦。」


佢知?知啲咩?我真係內疚先當佢普通朋友架咋。


「咁你聽日過唔過得黎教我做野?」


「可以!」


我一聽到佢想我教佢做野唔知點解我會二話不說答應左佢,然後我會有股興奮感,可能係覺得佢冇當我陌生人咁覺得開心掛,


我估我返工方面可以同唐生傾傾嘅,我呢個兼職仔應該夜啲返無所謂。


「咁聽日我放學返到黎你過黎,最好順便幫我去附近餐廳買個下午茶俾我。」


「一日食咁多餐,食撚死你。」


我忍唔住又講笑串左佢一句。


「你死我都未死啦咁多嗲,我真係肚餓,到時你幫我買就得。」


然後Chole姐又打左我一下,我扮痛咁撫摸左下被打個位,但我內心亦因為佢打我一下而暗地裡開心。


「得啦得啦,聽日我買完送到上你府上。」


「咁咪聽話,夜啦,返歸瞓教啦你,我都攰,聽日見。」


說罷阿盈就粒聲唔出開門入左去,而我同阿盈亦都返返屋企,今晚件事終於告一段落,雖然佢對我咁惡咁爛口又冇禮貌,但阿盈依然覺得佢內心係好。
.
.
.
「唐生 我今日有事要7點先返到黎」


終於到左聽日,呢日我wts唐生要遲返。


「冇問題表弟 遲下你如果都要遲返嘅同我講聲就得 你係表弟我一定通容俾你」


呢一刻我覺得身為表弟嘅我好似有特權咁,果然識人真係好過識字…


「我依家放學,記得幫我買tea咪撚遲。」


過左一個鐘左右,我收到交友app有個通知,原來係Chole姐嘅一個提醒,


我望下個鐘,差唔多4點,佢的確放學,我都真係應該要依家出去買定,然後我好快落街間茶記買tea…


[b]叮咚~[/b]


一陣之後,我已經買好去到Chole姐門前,鐘聲響起,伴隨著輕微嘅腳步聲迫近門口。


「你條友仔又幾準時喎,我返到黎冇耐你就黎到。」


開門後,Chole姐以一身白色校服look迎接我,有一種清純嘅感覺,但佢並唔係…


「緊係啦你當我流架。」


然後我再次步入佢呢個充滿少女feel嘅屋,周圍粉紅色嘅牆身映入眼簾。


「識野喎,係厚多士,你條撚樣又知我鐘意食嘅?你查過我呀?」


入到去我放低袋下午茶,佢即刻過黎睇買左咩,原來佢鐘意食厚多士,


呢樣野啱晒你食啦,你成日叫我咪多嗲,咪就好似你對我咁‘你厚多士(好多事)、你冇丁丁’。


「我洗鬼查你咩,平時見你成日踢住對厚低拖就知你鐘意食厚多士,通常呢啲都係啲潛意識野黎架啦。」


我求其講左個原因黎串佢著厚底拖,順便可以曬下自己係識啲野。


「潛你老味咩,冇料扮四條,我由細到大都鐘意食架,又唔見你打飛機鐘意飲牛奶。」


佢又講得啱喎,我的確唔鐘意飲牛奶。


「唔撚睬你啦,老娘我食野先,餓到肚都扁撚晒。」


不消片刻佢就食完,佢冇俾返錢我,我亦冇問佢拎返,可能我大方我覺得請佢食少少野冇所謂啦,最緊要係見到佢食得滋味而我又滿足到佢嘅就乜都抵返晒,


佢真係一隻為食貓,霸道得黎都有為食一面,一有野俾佢食就乜野惡都冇晒,其實都幾可愛。


「點啊飽未?肯做野未?」


「飽啦飽啦,但你等我抖下先。」


然後佢拎左部手機出黎影相selfie碌ig。


「懶人多屎尿,明明你就想偷懶扮咩。」


「你理撚得我,你咁勁幫我做晒佢囉。」


說罷我冇聲出。


「屌你睇你個死樣都唔會識做晒啦,點會俾你搞,拎我書包過黎啦。」


佢見我俾佢講到冇聲出即刻用佢對死人眼望左我一眼叫我拎佢書包過黎,睇黎佢終於肯做野,果然冇聲勝有聲,呢招work。


我去前面張梳化拎佢個書包過黎,佢個書包竟然都係粉紅色,佢有冇咁鐘意粉紅色?


咁啱佢書包冇拉埋,見到入面嘅書擺得好整齊,書包中散發出一種屬於佢屋企嘅香味,亦都係屬於佢自己,


可能你地會覺得我變態,但屬於女神嘅味道嘅所有野都真係好香…


「嗱,拎左黎啦,係咪開始做野?」


我拎住個書包係佢隔離放低督促佢做野。


「怕左你,篤多陣機都唔撚得,做咪做囉。」


說罷佢並冇放低手機,而係開左個自拍鏡頭係度照鏡,佢係度整佢前面嗰pat陰,原來佢唔單止mk仲好自戀。


「點啊小姐,又話做野依家又繼續拎住部機拖時間。」


我無奈咁望住佢。


「屌你照埋個鏡先得唔得啊,你唔覺得我今日靚左咩?」


靚咩呀,你個look咪同平時一樣都係咁mk,簡單啲講就係千篇一律,但仍然存在嗰種靚同高貴嘅氣質,應該係得我咁傻先咁覺得。


「你日日都差唔多樣架啦,都係嗰句,你返返唐代嘅話冇人會要你。」


[b]啪![/b]


「哎呀!」


說罷Chole姐又打左我一下。


「屌你個死古代人,家下係現代我不知幾撚多仔溝,我都知我靚,你唔洗妒忌我嘅。」


佢真係自戀到走火入魔,明明我冇讚佢佢都可以當人地係讚緊佢。


「得啦知你多仔溝啦,可以做野未?」

霸氣文哥 2022-4-27 12:30

第七十章:請槍


然後Chole姐終於肯放低部機死死氣地拎啲功課出黎,係要我認同佢佢先肯乖乖拎野出黎做。


「不過講起歷史,你中史又真係有啲料到,上次你教我份野竟然拎到唔錯嘅分,估唔撚到你個講故佬俾你吹中左咁多point。」


聽到我教佢嘅野拎到唔錯嘅分數後,我立刻感到沾沾自喜,原來我吹得黎都啱咁多。


「洗乜講,我話晒都係個熟讀中史嘅大師,呢啲野濕碎啦。」


「可惜你自己考嗰陣咪又成pat屎咁。」


呢個又的確係嘅,可能以前我乜鳩都寫落去但就偏偏寫唔中point,但今次靠Chole姐佢修改下啲字眼就即刻攞好高分,


再一次證明我考得差唔係我唔識歷史,而係我寫唔中佢要求嘅字眼,屌如果佢俾我講出黎嘅話我分分鐘攞5星星都似,可惜呢個遊戲就淨係考你文法…


「過左去啦,我依家教得你高分咪得。」


冇錯!靠住我地嘅雙劍合璧,呢個缺憾就可以修補,我用我嘅吹水知識教佢,佢就用佢嘅文筆修改字眼同句子,可以拎到高分都唔出奇。


「你中史係有料到,不過我做英文先,英文嘅野你唔識架啦,你可以收收皮先。」


頂佢個肺,啱先仲對我教佢嘅野讚不絕口,依家就做英文叫我收皮。


俾佢睇穿左個我點弱點後,佢竟然就拎我個弱點黎串返我。


「乜你呢個女人轉肽轉得咁快嘅,冇啦啦拎我弱點出黎撻鳩我。」


「都係嗰句,既然你都識做嘅,你叫我黎教你做乜?你自己都搞得掂啦。」


「都係嗰句啦,你理撚得我,我鐘意叫你黎教我呀。」


佢講得呢句咁霸道,其實我大可以走人唔教佢,但我又冇走嘅呢個意慾,唔知點解我鐘意留係佢屋企。


「咁你慢慢做啦,我可以邊篤機邊監督你個爛口妹做野,仲好。」


說罷Chole姐就開始動手做佢份英文。 


話就話我篤緊機,但其實我經常不自覺地偷偷觀察佢尊心做功課嘅樣,呢招其實都係高招,篤住機用眼球嘅微小郁動望住佢,咁樣佢就唔會覺得我望緊佢。


估唔到佢平時咁爛口都有認真嘅一面,而佢呢個面無表情嘅認真一面真係好吸引,又多一個我第一次見嘅樣貌。


我除左觀察佢面容之如,期間仲不斷傳來佢嘅陣陣髮香,真係好香、聞得好舒服,我靠呢兩感深深俾佢吸引住、十分陶醉…


「屌,呢度點撚樣做。」


過左唔知幾耐,我回過神,見佢已經做完份英文搞緊份生物工作紙,但可以見到佢個表情變得好苦惱,我鄧佢覺得辛苦,可惜我唔係修生物幫唔到佢、愛莫能助…


啊!突然我諗到個方法可以幫到佢。


「周雪盈!」


我大叫一聲阿盈嘗試呼喚佢出黎。


「你做乜撚野叫邊個?」


然而Chole姐俾我突如其來嘅一叫嚇到彈起。


「冇…我啱先眼瞓恰著左發左個惡夢咋嘛,你唔洗理我繼續做啦。」


我求其諗左個藉口兜,好彩我啱先一直垂低頭篤機睇落真係似瞓著左。


「神神化化咁,呢度我唔撚識做啊,問你都唔撚識架啦,睇你死樣都唔係啲讀生物嘅人。」


冇錯,我的確唔識,因為我以前另一科係修經濟,所以我需要借助阿盈黎幫我carry你。


「阿洋?你叫我黎做咩?」


冇耐阿盈就應我呼喚出現係我身邊,


我用眼角斜望住佢做緊份功課,阿盈亦都明我想點地行過黎望住佢份野。


「邊個話我唔識生物,我以前生物不知幾撚勁,你邊度唔識做?等我呢個大神carry你。」


我即刻表現到十分自信,有阿盈呢個學霸係度後我仲洗憂生物幫唔到你?


「係咪架你唔好吹水喎,咁呢份野靠晒你。」


「冇問題啦,你呢啲野好濕碎,等我再一次令你拎高分。」


「不過你真係好懶囉,有書唔揭咁都要問我,你就黎考試架啦唔可以乜都靠晒我。」


「你老味我咪同你講過,睇書嘅話叫你過黎托柒咩,你嘅作用就係教我做野架啦,更何況啲書我都放撚晒係locker啦,邊撚個會攞返黎。」


一個唔小心我又俾佢有位入鳩我添,有唔識先叫我教,我就好似變左做有事鐘無豔,冇事夏迎春。


我唔夠佢拗,然後我乖乖地拎左佢張工作紙過黎睇,呢度係講呼吸作用嘅填充,我開始透過阿盈同我講嘅答案向Chole姐傳話…


「首先糖酵解就會係‘細胞質’度進行,佢係會用ATP嘅能量,‘葡萄糖’就分解成兩個‘丙糖磷酸’」


「跟住丙糖磷酸就會氧化成‘丙酮酸鹽’,過程入面就會產生‘NADH’同‘ATP’,呢個就係佢個糖酵解嘅過程。」


其實講完呢一大堆名我都唔知係乜春黎,一頭霧水,阿盈真係好鬼勁,呢一大堆奇奇怪怪嘅字眼佢竟然記得一清二楚。


「至於克雷伯氏循環就會係‘線粒體基質’度進行,佢過程係首先‘乙酰輔酶A’會同‘4C化合物’結合,跟住就合體變成一個好勁嘅‘6C化合物’。」


「然後‘6C化合物’會逐步‘氧化’再生‘4C化合物’,呢個過程就會分解出4種物質,分別係係‘NADH’、‘FADH’、‘CO2’同‘ATP’,呢個就係成個過程…」


好快我教晒佢做第一part嘅填充,跟住到第二part,都有啲填充。


「果然有啲料到喎,全撚部關鍵字寫撚到晒出黎。」


「洗乜講,我教得你嘅我就是上帝。」


「得啦繼續繼續…」


呢刻嘅Chole姐表現得好雀躍,猶如獲得節節勝利後嘅嗰種心情。


「跟住黎緊呢個講生長同發育都好簡單,首先生長就即係係‘體積’上作永遠同不可逆嘅增長,就好似你咁,高到咁上下就唔會再高。」


「屌你教你就教咪撚咁多嗲啦,我幾高關你撚事。」


然後Chole姐打左我一下。


「得得得我地繼續…」

霸氣文哥 2022-4-28 11:47

第七十一章:抄牌


「嗱呢度就話係多細胞生物體內,啲細胞都係由合子經‘輸卵管’產生嘅,跟住細胞就會‘發育’成各種組織同器官,令生物體嘅形狀同複雜程度都改變,呢個過程叫‘植入’。」


「就好似你老母生你出黎之前都係咁整你出黎,扑野、受精、然後慢慢出現變化、最後就生左你個爛口妹出黎。」


「咪撚講廢話啦,邊個唔知你阿媽係女人,唔通你石頭爆出黎咩,繼續教你嘅野…」


大半個鐘後,佢張工作紙終於做完,張野除左填充,啲問題同圖片題先玩你最耐,不過與其我教佢不如話係我直接講答案佢聽。


「終於搞撚掂晒,你真係唔撚係扮喎,全部都記撚得晒,今次拎硬高分。」


「緊係,我個朵唔係浪得虛名。」


然後佢打左個喊露。


「不過呢,今次你講得冇咁funny、好撚悶,想瞓教。」


小姐我都係請槍傳話架咋,你仲想我點funny法。


「咁…咁生物野要專業分析架嘛,點可以好似中史咁鳩up當秘笈。」


「你吹到自己咁專業咁就得晒,我生物野可以放心交託晒俾你。」


「交託俾我?」


「其實我仲積左好撚多生物功課,你可唔可以幫我清撚晒佢?」


然後Chole姐拎左好多張工作紙出黎擺係我面前。


Wtf!?究竟佢有幾懶先淨低咁多野未做,冇我出現佢咪欠晒功課?


「同學你唔可以咁懶架喎,你依家係公然請槍,小心我同你老師報串。」


其實係我請槍先啱。


「拜託你啦大佬你咁撚勁唔係唔幫我下話,朋友喎,我呢啲功課聽日就要交架啦,我趕唔切,你見我咁慘咪當可憐幫下我。」


佢雙手合晒十咁叫我幫手、表情變到好可憐咁望住我,見佢咁可憐我都唔忍心唔幫佢,有少少心軟,但我仍然猶豫。


「喂我第一次低聲下氣求人架咋,你唔係咁唔撚俾面我下話?」


佢見我軟嗰套唔受就即刻改變語氣黎硬嗰套。


「得得得,見你咁慘我就俾面幫下你啦。」


當我應承佢後意味住今晚收工要開夜車幫佢做功課,唔洗瞓都似。


「咁咪好囉,多謝你先。」


我第一次聽佢講多謝。


「你電話幾多?我聽日morning call你收功課。」


一直以黎我都唔知點問出口攞電話,今日Chole姐佢竟然主動抄我牌?係咪代表我地更加fd了?


「你㩒門鐘咪得囉,要出動到morning call咁辛苦你。」


然而我仲係改變唔到同佢作對。


「屌你係咪咁多嗲,你又唔係唔知你屋企個門鐘幾撚閪,之前㩒你門鐘你幾鳩耐先出黎開門啊?我朝早分分鐘幾百萬上落架唔撚得閒慢慢等你。」


說罷佢又好似平時咁打左我一下,不過估唔到佢咁好記性仲記得佢第一次過黎屌我嗰次。


「冷靜啲,俾囉。」


然後我就講左我電話佢聽,佢拎手機出黎輸入號碼後入到聯絡人資料嘅頁面。


「你全名呢?對左你咁耐都未知你全名。」 


佢竟然會想知我全名?審犯咩,不過既然我都知佢全名,我都俾返我全名佢知都唔過份。


「方伯洋。」


「方伯方伯、方伯條洋腸,你個名好搞笑哈哈。」


當佢mark完我名後,即刻係咁恥笑我個名,我感到無奈,但都慣架啦,中學都唔少人改過我花名。


「我呢啲叫獨特,唔會有人同我撞名。」


「緊唔會啦,邊撚個會改個同你一樣咁撚柒嘅名哈哈。」


因為一個名令佢瞬間好開心笑唔停,佢笑點有冇咁低?但我可以令佢咁開心其實都值,笑起上黎佢真係好傻氣。


「咁得啦聽日我morning call你哈哈…笑鳩死我。」


佢開始強忍住自己唔好再笑,


當佢慢慢收起笑容後,佢突然凝望住我,然後慢慢靠近我,佢做乜野?我心跳隨著佢嘅每一下接近慢慢加速,一定係我太耐冇同其他女仔相處。


「做乜野…?」


直到佢將個頭貼到埋黎同我只有10cm嘅距離我先輕聲問佢做咩,但佢並冇回答我,而佢亦都係呢個時候停低左望住我,係深情對望…


呢刻嘅我仿佛周圍空氣都俾佢壓迫住,係咁近嘅情況下,我可以聽到佢微弱嘅呼吸聲、可以清晰見到佢嘅每一個毛孔、皮膚白皙、瞳孔裡有著我嘅影像;


我臉頰紅到一個點、心如鹿撞,下一刻佢用手指慢慢掂向我額頭,直至觸摸到後,我感到一絲痛楚。


「你睇下你生左好撚大粒瘡係額頭度,我幫你唧左佢啦。」


佢挨到咁近就係為左幫我唧暗瘡?但我不嬲都係由佢自己退唔理佢,更何況依家由一個女仔幫我做埋啲咁核突嘅野?


「有…有心啦,唧暗瘡呢啲野都係交俾我自己做啦,唔洗勞煩你。」


說罷我撥開佢隻手向後退左一步。


「屌你粒瘡就爆架啦,我睇唔過眼。」 


「既然我咁好心你唔領情嘅咁算鳩數囉,見你咁撚大粒你又唔理我先幫下你。」


「得啦呢啲野我識搞架啦。」


最後我都係冇俾到佢幫我唧同佢作對下,我無法感受到俾佢對纖纖玉手幫我唧暗瘡。 


「唔撚理你,老娘我等陣要出去你走先啦,我要換衫。」


「都入夜仲去邊?」


我望下架鐘都6點幾鐘,我出於關心地問左佢一句。


「我去邊關你撚事咩,你走啦。」


一個女人點解可以變得咁快,上一刻仲好開心咁笑,下一刻就變到好惡咁趕我走,果然女人心海底針,不過我的確冇權理你咁多,究竟佢要去邊?睇落似有啲野收埋。


「好啦咁今日就教到呢度先,我今晚會盡力幫你做好啲功課,聽日等你morning call我。」

霸氣文哥 2022-4-29 13:18

第七十二章:開夜車


我同Chole姐道別後我就開門慢慢步出門口,佢冇送我出去,只見佢忙住篤機打字。 


然後我拎住佢俾我多嘅張工作紙同阿盈返返自己屋企。


「你咁快就答應幫佢做晒啲功課,你真係可以?你等陣仲要返工,你要凌晨先可以幫佢做,會好攰。」


照計阿盈頭先應該全程睇住我同Chole姐嘅相處,所以一返到黎即刻問我應唔應付得黎。


「我得嘅!啲功課佢聽日就要交、係好急嘅野,佢交託得俾我嘅野一定會幫佢完成到。」


「但你會好辛苦,不如你返工嗰陣我幫你搞掂佢?你仲有我,你都知我生物好勁架嘛。」


「唔洗啦妹,你抖抖啦,我唔想假手於人到呢個地步,我想親手落筆幫佢做。」


「更何況你啲字咁靚佢一睇就知唔係我做一定會質疑。」


「都係嘅,男人字同女人字係大不同,咁你今晚盡快搞掂返黎啦,我地即刻動工!」


「好!」 


然後我地都好似「如臨大敵」咁為今晚堆功課作好心理準備,我食左少少野後亦換衫準備返工。
.
.
.
時間過得好快,我望下架鐘:12點半,今晚已經算放得早,我步出商場後急步行返屋企,為嘅就係要幫Chole姐做功課。


我沿路行返去,鬼母子依然見到我,但佢地冇襲擊我而係同琴晚一樣對我點點頭以示友好,伯伯依舊睇電視嘅回憶,我覺得奇怪,佢地唔係對我有敵意架咩?


搭𨋢上到我嗰層後,我望向Chole姐門口,心諗咁夜佢會唔會好似琴晚咁出左去未返?定佢已經係入面瞓緊教?對住佢門口我會有一種講唔出黎且微妙嘅親密感。


然後我開門返到屋企後我立即同阿盈講左頭先嗰件奇怪嘅事佢聽。


「你終於留意到啦?我琴晚見你咁急躁都唔記得同你講返。」


「莫非呢啲事都係你做嘅?點解佢地嘅態度會對我180度改變?」


「冇錯,就係你用交友app嗰日,你估我真係淨係行街咁簡單咩。」


「嗰日我係搵左佢地傾,同佢地講你係我嘅人、係無害,所以自此你唔傷害佢地,佢地都唔會傷害你,反而對你友好。」


「原來係咁,但佢地點解一定要聽你講?」


「因為我靈力高過佢地,佢地唔聽我講就等於同我反抗。」


「咁都得,咁你咪即係大蝦細?」


「冇計啦,你俾佢地襲擊過我就一定要做啲野令佢地服從,話過我會保護你。」


聽到呢句後,我內心再一次地感到好warm。


「阿妹多謝你。」


「唔講咁多啦,快啲動工做功課!夜啦,時間無多。」


「係喎差啲唔記得,拿拿聲啦咁要。」


「辛苦你要你陪我一齊熬夜做野,仲要你用咁多腦力。」


說罷我係櫃桶將啲生物工作紙拎上枱。


「唔辛苦,你唔記得我唔係人啦咩,我邊會耗腦力耗精力。」


「同埋係你返工嗰陣我已經睇過下啲題目講乜,唔算好難,而我心中已有答案,等陣只要你寫得快就得!」


「咁犀利?原來你一早準備好,咁等陣就要發揮我對摩打手嘅功力。」


然後我地就開始動工做起一張張嘅生物功課,阿盈負責讀我做寫、十分暢順,


當中包含各類題目,問答題、填充題、圖片題、短答題等等,就算遇到長答題要寫一大堆字亦如此,阿盈每一句都可以好快讀到出黎,有佢係度坐陣清呢一大堆功課如入無人之境…


時間過得好快,當我地做完嗰陣已經凌晨3點半,而我亦已感到倦意。


「終於搞掂晒佢咁多張紙啦,我聽日可以準時交到佢手上,佢唔會欠功課!」


當我清晒佢啲功課後,我即刻開心到彈左起身,猶如完成任務放下心頭大石,我露出十分滿足嘅笑容。


「你早啲休息啦,聽日等佢morning call你,我就返返入公仔休息下先。」


「嗯嗯,今晚真係有勞你,好彩我有個生物咁勁嘅阿妹咋!如果唔係都幫唔到佢做呢一大堆功課。」


「睇你依家開心到,仲話冇鐘意人?」 


阿盈對住我奸笑。


但佢呢一講立即令我不知所措,雖然我都唔知點解會咁仆心仆命幫佢做野,但我估一定係我之前好似hurt親佢咁而我又感到內疚先想做返啲野補償返佢,


我份人就係咁,覺得自己對人唔住之後點都會想做返啲野補償返人,就算事後人地原來係冇野都好,始終都係自己內疚過嘅事,一定係咁!


更何況佢仲要求晒我叫我幫佢咁我都冇得唔應承佢啦,我點會鐘意佢呢啲mk妹。


「鐘…鐘意佢?你唔好玩啦,我覺得之前嘅事我對佢唔住我內疚先咁仆心仆命幫佢做功課補償返咋。」


「明架啦,唔洗係咁解釋,你講到紅都面晒啦。」


「你冇啦啦屈我鐘意佢我緊張先會紅晒咋。」


「鐘意人就鐘意人啦,仲扮野,講一講佢就咁緊張,我都係女人,會睇唔出你鐘意人咩?」


仆街乜緊張真係會咁易出賣自己架咩,如果係咁咪好易俾佢誤會我鐘意佢?定一早已經俾佢誤會左我鐘意佢?


但毋庸置疑我都唔知癡左邊條線乜都諗住佢,明明返緊工我都會想快啲幫佢搞掂啲功課,又會諗佢今晚會唔會都出左去,


仲會諗佢今日究竟去邊唔講得,真係唔知幾時開始個腦不斷圍住佢轉,但我一定唔會係鐘意佢,呢一啲都係幻覺黎架姐,嚇我唔到嘅。


「總之我唔會鐘意佢,我唔會鐘意佢呢啲mk妹。」

霸氣文哥 2022-4-30 12:01

第七十三章:單獨約會


呢一晚我繼續矢口否認,但我腦內一直停留係佢今日哄到埋黎好近嘅畫面,每次一諗都會有種回味嘅感覺…


[b]巴巴巴巴巴~[/b]


一陣響量嘅警報聲鈴聲將我從睡夢中喚醒,原來Chole姐打俾我,依家先7點幾咋喎。


「喂。」


我以一個疲倦嘅聲線接聽電話。


「醒未啊方伯,啲功課搞掂未?開門拎功課出黎俾我。」


「搞掂啦你等我一陣。」


說罷就收左線落床出去拎疊功課俾返佢,


我緩緩打開門,Chole姐就出現係我眼前,同琴日一樣著上一套雪白嘅校服、孭上佢個粉紅色書包,扎辮後嘅佢感覺清純百倍,但仍然蓄齊陰遮眉。


「功課呢?」


「嗱,功課。」


然後我將手上咁多張嘅紙俾晒佢。


「有料到喎方伯,你真係全撚部做晒,啲長答仲要答得好詳盡,我果然冇睇錯你。」


遞俾佢後,佢第一時間拎起身逐頁揭黎睇。


「當然,我生物小王子個朵唔係浪得虛名。」


俾佢讚後我立即變得好得戚地吹噓自己。


「但你個黑眼圈好鳩大喎,你琴晚熬夜幫我做晒?」


「邊…邊度係,你呢啲功課咁簡單我三兩下手腳搞掂啦,我睇波睇到咁夜咋。」


為左令到我個生物光環更加光,我繼續扮野,我要俾佢知道我生物有幾勁、有幾幫得佢手,費事俾佢睇小啦。


就好似諸葛亮咁,將自己打扮到好似神人、令到個光環十分明亮,就可以受人敬拜同看重。


「咪撚吹水喎你,呢度起碼要一日先做得晒,你同我講唔洗熬夜?」


我的確要熬夜先幫你做得晒,但唔可以俾你識穿,不過我都覺得我犀利,佢話要一日先做得晒嘅份量,我三個鐘都唔洗就將其收皮,最大功勞莫過於阿盈。


「冇錯就係咁簡單,根本好快就可以做晒,係你蠢咋嘛。」


「收皮啦柒頭,你英文又點呀,咪仲垃圾過我。」


說罷佢又用英文串返我,我冇聲出。


「屌,不過一早知你生物咁撚勁嘅話,如果早啲識你嘅我就可以掉晒俾你做唔洗煩。」


哇咁都得,如果係咁我咪做左你嘅御用請槍手,你就可以不勞而獲。


「咪係囉,你嗰陣好啲聲氣唔好一黎就屌我你咪可以一早就同我做左fd,可惜沒如果。」


然後佢又打左我一下。


「屌你係咪又翻舊帳?你嗰陣唔係屋企半夜嘈撚住晒我洗過黎屌你?」


「冷靜冷靜,依家知道我有幾撚勁咪得。」


佢變到好惡死咁對我,我嘗試緩和返佢嘅情緒。


「星期六陪唔陪我去迪士尼?」


Wtf?咁突然話去迪士尼?佢講完我一時黎唔切反應,事關我咁大個仔都未同朋友同女仔去過呢啲主題樂園,依家女神竟然主動邀請我去?咁樣算唔算‘處男下海’?


「去…去迪士尼?同你?」


「係啊同你啊,唔通同你老豆咩。」


「點解突然想同我去?」


「我想咪想囉問咁多,見你幫左我而我又冇fd陪我去我咪叫你陪我去囉。」


「咁你得唔撚得?你唔得我自己一個去。」


原來係想報答我,佢忽然對我咁好?既然佢都講到咁出面我就緊係𦧲飯應,唔通真係要佢一個女仔去咁孤單咩,我都想去玩下嘅。


「好…好啊。」


「就咁話啦,放心嗰日我會抓你條撚樣起身陪我去架啦,你唔會放到飛機。」


雖然佢爆晒粗屌我,但我唔知點解覺得佢係著緊我,有佢抓我起身,我倍感安心。


「唔講住啦,我就遲到,走先。」


就係咁,我望住Chole姐慢慢離開我視線範圍,呢一刻發現,原來佢已經當左我係真正嘅朋友,原來佢都有第一時間諗起我。


而我依家已經完成佢俾我嘅任務,倦意再次來襲,我二話不說就入返屋繼續上床瞓…


然後黎緊呢三日,Chole姐放學後都有叫我黎佢度教功課,我就繼續俾佢「虐待」、當生物功課太多做唔晒我就繼續夜晚幫佢趕工,


而呢三日佢都好鬼死為食,每次黎佢度之前都叫我買定個tea俾佢食,


仲有呢幾日唔知佢係咪財困,三日唔埋就問我借幾舊水,佢問得我且見少少地我就緊係會借,朋友黎嘛,同埋佢有困難唔通唔幫咩,


呢方面我覺得自己真係好大方,但佢就係唔肯講點解借錢。都係嘅,我又唔係同佢太熟又唔係佢邊個,我冇權知咁多,應該都係一啲私人理由…


話咁快呢三日就過左去黎到星期六,呢日我將會係同佢嘅第一次單獨出街,而呢日佢同前幾日一樣黎個奪命call叫我起身,時間大約10點左右。


佢今日著得好靚好吸晴,我亦都係第一次見佢著得咁靚,上身一件白色一字膊衫、下身一條藍色超短熱褲配一對白色平底運動鞋,佢條腿J到呢…腰間就孭住一個鐵鏈斜孭手袋,


反觀我就只係好求其著一件T-shirt同一條短褲,顯得同佢有些少少格格不入。


然後佢同我落樓下食過早餐後就搭車出發到迪士尼,我懷著一個開心嘅心情前往,以前去過幾次都係同屋企人去,且都已經好多年前…


到達迪士尼後,周圍好多人排隊入閘,多數都係大陸人多,其次就係好多‘閃光彈’,個個都一啤啤咁入去,想曬死我呢啲單身狗咩,


其中仲有不乏一啲同Chole姐一樣著得咁靚嘅靚女,果然迪士尼係好一個‘索女聖地’,入到黎就算唔玩都可以飽覽美女、享受一整日嘅眼福…
頁: 1 2 [3] 4 5 6
查看完整版本: [靈異] [愛情] [毒L敦倫外傳]我屋企養左隻女鬼…