查看完整版本 : [靈異] [愛情] [毒L敦倫外傳]我屋企養左隻女鬼…

霸氣文哥 2022-5-31 13:04

第一百零四章:新開始(上)


「照計阿洋會知道呢件事都係你講俾佢聽先?」


「嗯,因為我見到阿洋好難過同埋覺得事有蹺蹊,所以我想幫佢查明真相。」


「我嗰陣唔想講呢啲野俾阿洋聽就係唔想佢介入,亦都好決絕咁話唔再見,估唔到佢仲有你呢個阿妹嘅暗中跟住我最後都係發現左,果然有啲野真係唔可以瞞一世,你對佢真係好好。」


「咁你將浩正升起嗰晚啲相係咪都係你幫我del晒?」


「冇錯,阿洋提左我佢手機有啲相要del,我捏住佢條頸打左佢一身後就拎左佢部機出黎用念力解鎖將佢入面啲相全部del晒。」


「之後我仲扮鬆手將佢部機跌左落地下,最後我補左一腳將佢踢飛,我掉返部機俾佢就走左。」


「原來係咁,我終於知道嗰晚發生咩事,多謝你救左我地,如果唔係佢一定會打死阿洋,我亦都會身敗名裂。」


「咪話唔洗多謝,呢啲渣男咁衰係抵打,就算係換著其他人我都睇唔過眼。」


「所以樂兒你依家知道啦,嗰晚唔係完全由我一個保護你,最大功勞都係阿盈、我咩都要靠阿盈執手尾而唔可以靠自己獨力保護到你,我係咪好冇用…?」


佢地兩人談話期間我突然插入打斷左佢地,佢地雙雙望住我。


「你係度講乜啊,你點會冇用,你嗰晚衝出黎嗰下我唔單止驚訝仲覺得感動,明明佢咁大份你唔驚不特止,你仲要為左我俾佢打到半死都繼續堅持還擊打左佢幾下重擊,你勇敢、有義氣、堅持都已經證明你有用。」


「如果唔係你出現阻止我啲裸照已經俾佢放晒上網,況且你地兩兄妹黎架嘛,緊係會互相照應,點會因為邊個幫得多啲就冇用,你地大家都有能力有限嘅時候,邊個有需要就緊係搵對方求助。」


「就好似今次咁,你已經盡左力再無力抵抗、你已經好好,咁就緊係叫人出黎幫手,阿洋你要知道唔係做任何事都係一個人能夠完成到,接力都要搵人接棒啦。」


樂兒過黎慰問我說道。


「樂兒點解你可以咁好,明明到最後我唔能夠獨力保護到你你都唔介意唔嫌棄我…」


說罷我又開始眼濕濕。


「傻仔黎,學你話齋愛一個人點會咁多嫌棄,你都冇嫌棄我‘唔乾淨’啦,況且你對我黎講真係唔係冇用。」


「如果你真係咁想做到獨力保護到我嘅話,你試下操fit下自己囉,到時候揼返人轉頭嗰個就係你。」


「你好似又啱,我之後一撚定要操fit下自己做下Gym,冇人可以蝦到我身邊嘅人!」


「好啊你講架,咁我陪你係屋企做體能唔好再咁易攰啦喎,哈哈。」


說罷阿盈就好似想攞以前啲野出黎暗串我。


「來吧!放馬過黎,方伯洋日後會變成大隻佬,不再係之前嘅方伯洋!」
.
.
.
時光飛逝,話咁快就3個多月過去黎到11月,天氣開始有啲涼、街上面都開始有人著起長袖衫。


嗰排出左院後,我同樂兒都過住幸福嘅生活,佢有時會變返好似以前咁霸道,但當然唔係鬧爆我嗰隻啦,


至於佢之前掙落學校班姊妹嘅錢,我亦都幫佢還晒,所以我返工賺返黎啲錢都唔多得去邊,


不過都值嘅,佢同佢班姊妹道過歉講左個事實出黎後,佢地都原諒樂兒慢慢做返朋友,就係咁佢唔洗再感到寂寞、從此亦唔洗再周圍問人借錢。


而佢亦黎過我屋企參觀再次見到阿盈,初頭佢仲有少少驚,始終佢第一次黎我度覺得特別靜有啲陰深,但再黎多幾次佢地就打成一片直頭當佢係人咁唔再驚,果然一次生兩次熟,


咁咪好囉,佢地大家都可以識多一個朋友,我地就好似一家人,正因為咁佢仲會間唔中過黎同我瞓,咁大個仔第一次同女仔瞓埋一齊嘅我感到十分sweet,好似…好似兩夫妻。


而關於我同阿盈以前發生嘅野,乜野陽氣、偶遇厲鬼嗰啲我都有同佢解釋晒,佢聽完真係唔敢相信我發生左咗多事。


至於我同阿盈,佢就緊係襯得我一個係屋企冇野Do嗰陣就操我體能、拉筋,佢嗰啲體能係好辛苦的,次次都做到我滴晒汗,所以冇裝假狗架,有血有汗!


有時仲會帶我出去跑步,佢話體能還體能都要去練下氣喎,全部都係一啲我唔擅長嘅野、比死更難受,


但好死唔死,佢呢個訓練方式就幾有效喎,唔到一個月我隻手已經粗左啲、胸肌亦多左啲線條。


就連唐生都讚我fit左,講起唐生,上兩個月返工佢冇啦啦話帶我去見個人,原來佢見到我大表姐同佢老公過黎買野,所以帶埋我過黎同大表姐相認下,係張倩彤同何紹偉。


當我第一眼見到我大表姐時,立刻令我瞪大雙眼,我心諗哇咁靚女嘅!?呢個真係我表姐?照計佢應該差唔多30歲但仲保養得咁好。


佢著住一件紅色緊身好似連衣裙嘅衫、波大大、外面一件外套、腰間扣著一條幼皮帶、著住一對過膝長boot、頭髮攣攣地皮膚白皙,


有啲空姐feel,真係女大十八變,叫人睇到都有少少想扯,但我唔可以對佢有幻想,佢係我表姐黎架,加上我已經有樂兒,


明明細細個見嗰陣佢冇咁靚,然而我留意到唐生隻眼都好似不受控制咁周不時𥄫下表姐,你太靚太引人注目啦表姐。

霸氣文哥 2022-6-1 13:09

第一百零五章:新開始(下)


然後表姐見到我都好開心,始終我地已經多年不見,正因為咁,我都對佢有啲陌生,並冇特別大反應,而佢估唔到會係惠康見到我,仲話我大過仔左好多,以前見我只係好細粒。


我地傾左陣計後,先知道以前佢做過表姐夫補習老師,依家直頭做左老師教小學,啲小朋友就幸福啦,日日有得見到個靚靚miss,我以前讀小學嗰陣啲老師全部都係上左年紀,這就是分別。


而表姐夫就做左工程師,佢頭髮all晒back戴住副文青眼鏡、一件薄綿衫加件外套,睇落幾斯文幾靚仔,都真係幾有工程師look,自古有英雄配美女,依家就有靚仔配靚女,襯晒。


「你就勁啦偉哥做左工程師,閒閒地都搵幾皮,果然讀到書,邊好似我呢啲讀唔到書嘅人依家只係做個惠康經理仔。」


「謙虛啦,我呢啲工程狗忙到嘔架,平時有job先幾皮,冇job嗰陣真係食樹皮都有份,反而豪哥你仲好啦,自由啲又唔洗咁忙,收入又穩定。」


佢地講左陣返工嘅野後,期間仲有問下我地近況如何,問到我嘅時候,佢地都第一時間問我老母有冇異樣,我緊係話冇,好地地佢會有啲咩異樣,


我問佢地點解咁問時,佢地都話係因為6年前件事太深刻,始終我老母係伯母個妹、大家都係姊妹,唔知會唔會有影響,


我唯一覺得奇怪嘅係之前同唐生講嘅嗰件事,就係以前出席葬禮同婚禮老母叫我帶定把利器防身,跟住都冇其他奇怪事。


我話冇咩異樣佢地都放心啲,仲祝願我地以後都咁安穩冇咩事發生,繼續過住一啲新生活,我都係唔係好明會發生啲咩事,明明我老母咁多年都係正正常常。


我地再傾左陣之後就開始道別返返自己崗位做野,嗰日之後都好少再見到佢地。


再過多一排,唐生就收到通知要調去第間惠康做,佢話應該係另一間舖唔夠經理,然後好快佢就調走左冇再出現係呢間舖,我自此同佢失去聯絡。


冇左唐生係度嗰段日子悶左好多,冇再有人照住、冇再有人搵我傾計𥄫女,我嗰陣真係好唔捨得佢。


不過都冇有怕,再過多左段日子,我好快都走埋唔Do,因為就黎開學,我嘅暑期工日子可以暫告一段落,同埋我老母都返黎,我唔需要再靠返工過活住。


老母返黎之後,佢買左張床返自己房瞓,而我亦冇同佢講我同樂兒拍拖,就連呢3個月發生左咁多事都冇講,包括阿盈嘅存在,始終我得18歲老母可能仲未接受到我拍拖,


第二就係我老母佢唔信邪講出黎唔通嚇鳩佢咩,所以我索性唔講費事佢煩,外面個香爐同神主牌我亦收埋左。


而阿盈亦少左現身,費事會俾佢唔小心見到,所以多數都係佢瞓左先出黎細細聲同我傾下計。


正因為老母返左黎,樂兒冇得再黎我度瞓,跟住就輪到我多左去佢度瞓,我同老母講呢3個月識多左fd,我同fd出去玩一晚,


有時我真係慶幸自己女朋友就住係隔離,就算見個面都十分方面,唔洗心掛掛,就算係返學拎齊野去佢度第二朝都好似平時係屋企出門,


我地有時仲會一齊出門添,佢有佢返中學,我有我返ive ;佢有佢著校服,我有我著便服,到放學我仲可以去接佢放學一齊返屋企,糖黐豆咁款,呢啲生活真係好幸福,就好似一齊返工放工。


至於老母知我呢3個月去做惠康後佢都有讚我大個仔終於識出去搵工返賺錢,佢呢樣野係估唔到以為好似以往咁只靠佢俾嗰幾千蚊過活交租,


佢仲估唔到冇見我幾個月,身體fit左、大隻左,佢問我點解,我就話自己上網睇片見啲型操肌幾型自己就跟住做,跟住做下做下就做到fit左啲。


但當我一講起呢幾個月我同表姐夫個fd一齊做野,甚至我話撞到表姐同表姐夫後,佢面色都一沉,唔知係咪有啲咩隱情,但佢話冇,只係咁多年冇見俾你見返覺得神奇,


跟住仲問我有冇同我講啲乜,叫我唔好同佢地行咁埋,我話我知道左少少細表姐以前嘅野,我再問佢點解,佢話唔想我糟遇厄運,我好奇再問落去佢就冇答我。


我估佢所講嘅厄運應該係關於著魔嗰啲野掛,但細表姐人都死左啦,仲關咩事?既然佢唔答我我都一於少理,繼續我同樂兒嘅‘地下’幸福生活仲好過啦,我同佢有今日係來之不易。


我地繼續去左好多地方玩,坐摩天輪、睇戲、唱k、睇日落、行山睇芒草、去迪迪尼、行街shopping等等,


有時我地仲同埋阿盈一齊三人行出街,未識嗰陣就好驚,當識落之後佢地一齊girls talk嘅時候兩個傾啲野都會笑到見牙唔見眼,佢地無一不講,果然女人同女人係特別多野講。


同左樂兒之後都為我生活添加左一份色彩,總之開心嘅時候一齊開心、我唔開心嘅時候就過黎安慰我氹我、甚至買野俾我,佢真係好好,冇再好似以前咁淨係得我付出。


就好似近排我CA test肥左,呢個test衰左會影響EA(End of Assignment)嘅分,兩個分加埋唔夠某個分我就會成科肥,我好灰。


「唔洗灰喎,你個CA佔分又唔係最重,最緊要你EA唔好肥就得,呢個先係最緊要架嘛,你未輸架加油!」


「唉,呢科啲野咁難,我EA都未必攞到高分,衰左呢科就要retake架啦。」


「Umm…你係咪仲咁唔開心呀,睇下我買左咩黎俾你食?」

霸氣文哥 2022-6-1 13:11

預告 黎緊會踏入結局篇 會開始有較多暴力血腥位 希望各位繼續支持💪!

霸氣文哥 2022-6-2 12:29

第一百零六章:怪脾氣


然後我聞到一陣香噴噴嘅味道,原來佢係書包裡面拎左塊炸雞扒出黎。 


「登登登登~我買左你最鐘意嘅豪大大俾你食啊,你再係咁灰我幫你食左佢架啦。」


「點解…點解你會識得買定豪大大俾我?」


好感動佢竟然記得我鐘意食咩仲冇啦啦買定左俾我,我頓時覺得好有愛。


「我知你呢排有test辛苦,我咪放學偷偷地去附近買左豪大大慰勞下你。」


是咁的,呢日我遲左放所以冇接到佢,一返黎我就直接去左佢屋企搵佢先。


「樂兒你咁好嘅,竟然記得我鐘意食咩仲買埋俾我,抵錫~」 


然後我哄埋去佢度大大力錫左佢一啖。


「緊係啦,你當我鐘意你係流架?咁你係咪仲灰啊,你仲唔快啲開心返嘅我真係幫你食左佢架啦。」


「唔灰啦唔灰啦,有個咁貼心嘅女朋友乜都開心返晒啦。」


我露出開心嘅表情從佢手中搶過一包炸雞扒就開始大啖地食。


「睇下你有得食就開心到咁,你就好啦有個咁錫你嘅女朋友,想當年淨係你買野食俾我架咋。」 


「嘻嘻咁所以依家咪風水輪流轉到你買返俾我食,不過當然我都唔會待薄我呢位女朋友仔啦,我會錫燶你。」


「口甜舌滑啦你…」


我地平時除左過住啲sweet嘅生活、大家都好愛大家之外,佢仲有背後嘅一面架,就係…就係佢仲好大食!


幾乎每次去佢度瞓,佢就會想我同佢搞返一兩劑先瞓,自此我就慢慢由一位青頭仔變成老司機,而我同我呢位靚靚女朋友搞亦都好爽嘅,次次都會挑逗下我,


我初頭因為佢以前嘅經歷有少少退卻,但佢實牙實齒話其實以前同其他人搞都有戴套我就放心啲,


依家佢俾我打真軍之餘有時我仲會忍唔住好似第一次咁中出左佢,事後佢都冇乜所謂,因為我有呢個特權,只有我可以咁做。


佢話我搞得佢好舒服,下面唔太粗唔太長但亦唔太短,個長度啱啱好,唔似以前啲人搞得佢咁痛,滿足晒佢需要,


真係好,即係依家我地連性呢樣野都match埋,我地有愛又有性,而我並唔似阿盈之前向我所講嘅‘牙纖仔’…


對於我同樂兒同阿盈我地三個相處固然幸福,但幸福還幸福,又黎到老母呢邊,我開始覺得佢怪怪地,唔知點解佢啲脾氣都變得越黎越暴躁,


以前我好少見佢咁躁底,初頭我以為佢心情唔好先躁,但呢啲情況佢慢慢變得頻密,


就好似一個月前,即係返黎一個月後,佢因為唔見左條毛巾係度發脾氣鬧我。


「屌我條毛巾呢,點解會唔見左架?你知唔知係邊?」


「唔知喎,我冇掂過你啲野。」


「衰仔唔係你掂仲有邊個掂啊,我返左鄉下嗰排淨係得你係度咋嘛,幫手搵啦,冇左條毛巾我點撚樣沖涼呀死鏟。」


「我真係冇掂喎,我前幾日仲見到你條毛巾掛住係入面。」


「閪有見到咩,明明係你做仲係度抵賴?死仔包,邊撚個教到你咁樣藐嘴藐舌架下!」


「喂老媽子你冷靜啲先,我真係冇掂你啲野喎,你諗下我掂你啲野做乜,我好似親眼見到你琴晚將佢掉左落垃圾桶,我以為你唔要嗰條毛巾所以掉左佢。」


「你食屎啦死鏟,我點會掉左自己條毛巾?你分明係度得過且過,敢做又唔敢認,點解我會生左個衰仔出黎…你好快同我搵返出黎啦喎死仔,唔係你今晚聽食西北風啦。」


「搵唔到就算啦,我地出街買過條,小事黎。」


「小事?你就小事,家下你整唔撚見左我啲野啊死鏟,條毛巾我買左唔係好耐架咋,買過條唔撚洗錢呀?」


「你咁有錢水費電費你自己一個交晒佢啦,家用冇一分仲係咁叫人買買買,你發撚左達咩,心地又衰過人,整唔見人啲野都唔撚認…」


然後佢就好似個怨婦咁係咁屌我屌唔停,仲一樣野牽連到幾十樣野咁屌我,而我琴晚真係好似見到佢掉左,我自己都好委屈。


女人係呢個世界上最煩嘅動物係真,佢無憑無據都可以屈我一餐,希望樂兒幾十年後唔好好似我老母咁。


最後嗰日都係搵唔到佢條毛巾,佢果然嬲到冇煮到飯我食,我話買過條俾佢佢都唔要,我都唔知得罪左佢啲咩,最後搵左好耐先搵到一條放係櫃嘅角落頭嘅一條毛巾頂住先。


又有一次佢唔見左件衫又攞我黎祭旗…


「屌我黑色嗰件外套呢?唔見左嘅?」


「嗱,你唔好望住我,真係唔關我事。」


「你個死鏟一睇就知又係你整唔撚見左啦,又唔撚認?件外套晾係出面琴晚你做收衫架,你係咪收撚跌左呀?」


「冇囉,你指黑色有啲圖案嗰件外套下話?我琴晚親手收左入黎架,然後你好似拎左入間房。」


「間房閪有咩,我搵撚過啦,我冇印象琴晚拎過入去,你個死鏟又整唔撚見人啲野,食屎啦你去。」


「我真係冇…」


「樣撚樣都整唔見晒,之前就整唔見我條毛巾,依家就連我件衫都整唔見埋,點解你個仆街咁衰架,我生你出黎真係冇撚用、嘥米飯。」


我想講野但佢唔俾我講繼續屌我,我再一次感到委屈同無奈,我係清者自清架囉。

霸氣文哥 2022-6-3 12:35

第一百零七章:再度夜歸


「你再搵下啦,可能會搵到呢。」


「我搵你條命咩死仔,個個位我都搵過晒啦,搵!你今晚都係食自己食西北風啦,理得你自生自滅。」


最後佢嗰晚又再一次冇煮我飯,我又要自己落街買外賣,神奇嘅係,佢件衫第二日竟然係佢間房個衣櫃底搵返到,嗰陣佢先知怪錯左我,但都係呼衍幾句就算,並冇認錯。


真係唔知佢呢排食左咩火藥,係更年期定點,自從佢返黎後就出現變化,明明以前就算佢唔見野都唔會亂屈我亂發脾氣,依家就乜都賴晒落我度。


事情又過左一個月黎到今日,呢一個月佢依然成日唔見野就發脾氣賴落我度,有時搵到有時搵唔到,搵到咪罪名輕啲,搵唔到咪罪名重啲囉。


正因為咁,我開始連佢啲野都睇緊埋一份同幫佢執拾埋,就好似我幫佢收好啲衫會直接擺入佢間房,咁樣佢就算唔見野我都可以幫佢搵返出黎,唔驚佢再賴我。


今日放假我同樂兒又去左迪迪尼玩,我地玩到夜一夜食埋飯先返,已經好耐未試過咁夜返歸,我地沿住之前我放工條路有傾有笑咁行返去,


「阿洋,伸隻手出黎合埋眼。」


行緊返去期間樂兒冇啦啦叫我合埋眼,仿佛好似有啲野想對我做。


「合埋眼我點睇路呀小姐,仆街係咪唔好喊。」


「唔會仆街囉,快啲呀快啲合埋眼,依家唔需要你睇路。」


樂兒輕輕拍下我膊頭表示急燥。


「好啦好啦,就睇下你想搞咩。」


說罷我伸出一隻手合埋眼,我感覺隻手有幾張硬膠質感嘅紙。


「你可以開眼啦。」


開眼後我見到有幾張曬左出黎嘅相。


「登登登登~呢幾張係我每次同你去迪士尼影嘅相,你睇下你以前幾木獨,連掂都唔敢掂我哈哈。」


原來呢幾張係每次去城堡下影嘅相,由呢幾張相睇到我由一隻兵成為大將軍嘅轉變、過程中經歷左好多變幻。


「你個衰妹仲好講,你嗰陣係咁撩我又癡到近一近咁,搞到我唔知想點,我嗰陣好緊張架。」


「哈哈,就咁睇都睇到你個老尷樣。」


樂兒講返我以前個木獨樣搞到呢刻我都有少許尷尬。


「你唔好笑住先,就好似呢幅我攬到你實一實咁影架…仲有呢幅,我直頭攬住同你kiss咁影,幾自然幾sweet,一啲老尷都冇。」


「車~你講嘅呢兩幅已經係我同左你一齊嗰陣影啦,如果呢兩幅你都仲係咁木獨唔癡埋我度就真係值得懷疑你係咪真係鐘意我啦。」


「咁事實證明我係咪好愛你先~?」


我順住個勢口甜舌滑地道出我對佢嘅愛意。


「係啦見到你真係好愛我啦,咁你又鐘唔鐘意我俾你嘅呢個驚喜先?」


「緊係鐘意啦,呢啲係我地嘅開心回憶黎,你仲要將佢曬成一幅相,我就算失憶都記得,多謝你樂兒。」


「咁呢幾幅相就俾你做我地嘅紀念,我自己都有幾張,唔好整唔見呀,好珍貴架,你夠膽整唔見你就知味道!」


「知啦,你講到咁我一定好好保管啦,我唔想要跪玻璃。」


「知就好啦,咁你真係要好好保管。」


說罷我地繼續沿路行返去,行到咁上下我再次見到睇電視個伯伯,估唔到幾個月後佢仲係度,因為自從冇返工之後我都少左夜歸,所以我已經好耐冇見過佢,


而呢一下見到令我記起陰陽眼嘅事,我想問下關於呢方面嘅野。


「喂阿洋你係度望咩,點解你定左係度?」


「前面個伯伯我好耐冇見過,佢依然仲係度睇電視。」


「伯伯?邊度有個伯伯?你…係咪睇到啲野?」


樂兒佢睇唔到伯伯嘅存在。


「係呀,呢個伯伯係自從我返工幾日之後就見到。」


突然樂兒好似驚左一驚咁撓住我隻手。


「咁佢即係鬼黎…?咁佢會唔會傷害我地?」


「唔會,佢唔會傷害我地,佢好慘架,因為中風婆婆為左服侍佢,有一次拎藥嗰陣跌親死左,而佢自己因為內疚都自殺埋,死後佢搵唔到個婆婆就還原返生前嘅情境終日留戀住呢個地方係度睇電視。」


我將伯伯嘅經歷講左出黎。


「原來係咁,佢地係一對恩愛嘅夫妻,唔知我地老左之後會唔會咁呢~」


「我閘住你把口,你我都會健健康康唔會有事,就算死我地都會係安樂咁一齊死。」


佢講到我地命運都會好似伯伯咁悲慘,我忽然緊張了起來。


「講笑咋,我地緊係活到老愛到老,希望我地到老都仲愛住大家。」


我地一輪說笑後,好快我地返到樓上,我地黎個goodbye kiss後就返到各自自己屋企。


返入屋企後,眼前景境令我震驚,雜物散落一地,成地唔係書就係啲紙張,總之就七國咁亂,究竟發生咩事?


「屌係邊撚度呀,點解會唔見左!?」


我行入去見到老母佢又唔見左野搵緊野,但今次脾氣明顯比之前更嚴重,佢邊搵邊掟啲野走。


「老媽子你冷靜啲先,你唔見左啲咩?」


「我唔見左條頸鏈啊,呢條鏈我買左好耐架啦,好有價值,點會冇啦啦會唔撚見左架!」


「你係咪講緊金色嗰條鏈?」


「咪就係嗰條?你見到?係咪又係你偷閪左?」


「我冇偷,我係見你成日唔記得啲野又亂擺野幫你放落左個櫃桶咋。」


說罷我打開我所放嘅櫃桶就見到佢搵嘅嗰條頸鏈,佢即刻鬆左一口氣安心晒。


「原來係度,搵死我,下次你幫我擺好左同我講聲嘛。」


「知啦,今次我一時唔記得提你擺左係個櫃,我地一齊執好間屋佢啦。」


「啊老媽子,話說我想問你啲野,係關於陰陽眼。」

霸氣文哥 2022-6-4 13:40

第一百零八章:起源(上)


「乜野陰陽眼,我唔信呢啲野架。」


一講到關於靈異嘅野佢隨即又感到好抗拒。


「但我確實開左,我無時無刻都可以見到嗰啲野,係咪關我地家族事?」


因為我記得阿盈曾經講過有陰陽眼嘅原因,排除左陽氣少同淋狗血嘅因素後,就得返家族遺傳呢個因素,呢樣野我必需問我老母先知。


「你真係開左陰陽眼?幾時嘅事?點解會開左?」


說罷老母突然變得好激動同焦急咁問我野。


「老媽子冷靜啲先,已經係返惠康嗰陣開左,我都唔知點解會開左,係咪關我地家族事?」


「你又知係關家族事?邊個同你講?你唔可以有陰陽眼架,你唔可以步你死鬼表姐嘅後塵!」


關表姐事?我同佢咁少聯繫可以有咩關聯?


「我…我估架咋,究竟發生咩事?係咪有啲咩隱情?唔好再瞞住我啦,不妨同我講清楚。」


「唉,事到如今我都不妨同你講,始終呢啲野都瞞唔到你一世,要知嘅始終都要知,我一直唔同你講係因為我想保護你、為我地兩母子好,唔想你同鬼神接觸。」


老母果然有啲野收埋一直唔俾我知,平時仲扮到唔信邪咁,其實知道得最多內情嘅可能就係佢,睇黎佢今日同我講嘅就係有陰陽眼嘅真正原因。


「其實我地家族係受到詛咒,只要接觸鬼神嘅都會冇好日子過,最後更加不得善終…」


「受…受到詛咒…?究竟成件事係點?」


「事源係我嘅上一代,即係你外婆嗰代,因為一啲事得罪左仇家,令到你外婆佢俾人施法詛咒,咒我地世世代代都冇好日子過、不得善終,呢個咒會世世代代纏住我地。」


「雖然係佢俾人施咒,但一切詛咒都係由我呢一代開始,你外婆佢咩事都冇,所以我地呢代嘅咒係最嚴重,嗰陣生我地出黎之後,我同家姐都係有著各一半詛咒嘅種子。」


「最恐怖嘅係,正因為我地有著各一半嘅咒,我地嘅咒都會有連帶關係,如果我不幸觸發左個咒,佢會知道我家姐個咒發生過咩事繼而進行突變增強自己,就好似病毒突變咁。」


「而你呢代之後嘅咒就唔會再咁嚴重,因為個咒會一代代減弱,雖然冇咁嚴重,但都會有一定嘅反效果,同埋佢並唔會消失。」


「你話反效果?咁其實我地都會有啲咩唔好嘅事發生?」


我好奇地問左一問有咩不詳嘅事發生。


「唉呢個咒我地冇得解,只可以去預防,如果我地呢代接觸鬼神或者附近有鬼神伴住係身邊,因為個咒係一粒種子,佢會慢慢萌芽令記性變差,而脾氣亦會變得暴躁。」


「最後佢會利用你暴躁嘅脾性去傷害身邊嘅人、變得癡線,令身邊嘅人冇好日子過,咁就達到左個咒嘅最終目的。」


「到嗰陣時個咒就會完全成熟唔會再改善到,只有死先可以去除到個咒。」


「而完全成熟嘅咒係會令自己唔再似一個正常人,佢會令你變到有無窮力量同敏捷、甚至可能突變到刀槍不入,到時你唔好話死,連消滅都會變得艱難。」


「除左呢啲仲會有被迫害妄想症,會覺得身邊嘅人都想害佢從而去報復人。」


佢話有鬼神伴住係身邊都有事發生,唔通呢兩個月老母佢記性脾氣變得越黎越差都係因為有阿盈嘅存在先會咁…?唔會架,一定唔會咁…


「我個死鬼家姐,即係你姨媽就係一個例子,我同佢都俾人落左咒,佢本身已經有精神病,躁狂同妄想症嗰啲。」


「加上佢之後接觸鬼神,令佢變得更加精神失常同癡線同力大無窮,因為佢覺得一切都係你個細表姐搞到佢入青山、佢要報復。」


「所以佢唔單止信左邪教落降頭落自己個女等佢呢世都得唔到幸福,最後仲係醫院親手殺左佢。」


「而佢達到目的後自己亦都俾警察擊斃左,因為力大無窮有啲警察都俾佢打到重傷,成件事真係一場悲劇…」


原來唐生講嘅野都係真,表姐真係俾自己老母親手殺死,而老母之前同我講話佢地係自殺都係假,呢一刻我終於知道個真相,細表姐佢好慘…


「雖然你唔會好似我地咁嚴重,但始終你仲有詛咒嘅物質,你會有陰陽眼,有陰陽眼你啲陽氣會隨時間冇得越黎越快、越黎越少,佢會慢慢磨耗你嘅壽命令你唔會長壽。」


「所以我先奇怪點解你會有陰陽眼,正常係唔會冇啦啦有陰陽眼,一定係同鬼神有接觸先會觸發到,你係咪係我返鄉下段時間有偷偷地同嗰啲野接觸過?」


仆街一下俾老母睇穿左,但我點都唔會認,以佢咁抗拒嘅性格好大機會會趕走阿盈,我唔可以俾佢咁做。


「我地係唔可以接觸鬼神架,萬一接觸鬼神我地都會冇好日子過,你得你一粒仔架咋,我唔想你好似你個表姐咁、我唔想你有事。」


「冇啊,可…可能係我放工嗰陣見到啲遊魂野鬼同佢地接觸過所以先咁。」


我即刻諗左個藉口出黎兜。


「咁都冇咩可能會觸發開陰陽眼,因為係要相處一段長嘅時間先會咁樣。」


「我記得嗰陣我見有隻鬼好慘,我過去幫過佢,亦都晚晚收工都同佢傾計,可能就係咁觸發左都唔定。」


「咁樣就有可能,既然你開左眼,你以後唔好再同鬼神有接觸,會害左你!」


「冇…冇事嘅,你話會散失陽氣,我做多啲運動曬多啲太陽增加返啲陽氣咪得,你睇下我依家咪幾fit。」


我遵照阿盈一直教我嘅方法駁返老母。

霸氣文哥 2022-6-5 15:05

 第一百零九章:起源(下)

「你咪傻啦傻閪,你依家當然仲可以keep到啲陽氣,但長遠黎講你啲陽氣會冇得越黎越快,就算你點增強都冇用。」



「而且你開左眼本身陽氣已經冇緊,你仲要繼續接觸鬼神就會變左雙重流失,你流失嘅速度會更加快。」


「就好似一個裝滿水嘅杯,個窿越大流嘅水會越快,就算你點加水落去都唔夠流失速度快,到最後你啲水都係會流走晒。」


「總之你就唔好再接觸鬼神,我唔想你有事,知唔知?」


「知啦知啦,我唔會再接觸佢地。」


估唔到仲有雙重流失,老母講到頭頭是道咁我都駁唔到佢,唯有假應承佢先。


「咁其實嗰陣出席細表姐葬禮同大表姐婚禮你叫我帶定把利器防身係咪都係因為呢件事?」


頭先講起表姐令我諗起當日老母叫我帶刀防身呢件事,係一件我好奇已久嘅事。


「係,雖然你地呢代只係得陰陽眼冇傷害,但因為你表姐個前男友同佢搞過野俾佢個降頭傳染過發過癲,唔知佢會唔會突然又發癲。」


「所以安全起見都係帶定把刀防身好啲,有咩事我地都保護到自己,我唔想佢地搞到我地。」


老母佢真係好清楚佢地嘅過往,直頭係收得最多風嗰個,之前仲扮晒無知。


「我又有野好奇,既然姨媽佢信左邪教,即係接觸過鬼,理應佢應該有邪靈係身,但點解佢同表姐接觸過冇聽過佢有陰陽眼?」


「呢個有好多因素令佢地唔會觸發,第一,佢未入青山前仲未入邪教;第二,佢青山走左出黎入邪教後佢地少接觸;」


「第三,就算佢地真係接觸得多都唔會有事,因為寄生係宿主嘅靈體係唔會影響到對方個咒,只有實實在在一個靈體先會觸發到,陽氣亦唔會影響到對方,淨係影響自身。」


原來係咁,即係就算老母俾邪靈附體都唔會影響到我有陰陽眼,不過我依家唔想有都有左,影唔影響到都已經冇所謂。


「點解你會知你姨媽有邪靈附體?你係邊度知咁多野?」


我又不自覺泄漏左少少阿盈之前同我講嘅野添。


「冇…我前排睇得多鬼故嗰啲,自然都對呢啲多左了解,邪教喎,叫得邪教佢一定會對佢啲信徒植入啲邪惡野啦。」


「衰仔,你以後連呢啲都唔好再接觸咁多,你唔需要知咁多鬼神嘅野,避之則吉。」


好彩咁都俾我過到骨冇俾佢發現呃佢。


「咁我識唸佛經嘅野有冇關連?」


既然咁多奇怪且我唔知嘅事發生都係關家族嘅事,唔知之前我冇啦啦識唸佛經又關唔關事。


「佛經?點解你連佛經啲野都知?」


「冇啊,因為之前我撞左一次鬼仲要俾佢纏住,返到屋企咁啱搵到本佛經我只係睇左幾頁之後就連睇都唔洗睇咁驅走左佢,就好似我本身已經識咁。」


「你撞過一次鬼?點解唔同我講?」


老母聽到我撞過鬼後突然變得驚慌咁問我。


「咁我見已經驅走左佢啦嘛,已經好耐之前嘅事,自己又冇乜事我咪冇講。」


「咁其實呢件事又係點?點解我會冇印象自己學過佛經?」


我追住老母繼續問。


「唉,呢個你緊係唔知,因為係你好細個嗰陣我重金請左個法師將佛經植入你個腦。」


「植入後你會唔記得嗰日嘅事、佛經內容你都唔會記得,到有朝一日你遇到咩事觸發到先會用得著,為嘅就係驚你日後俾鬼纏都可以保護到自己。」


「我擺定本佛經係屋企就係萬一屋企遇到咩事而自己又未觸發到腦入面本佛經嗰陣,都可以去拎本佛經出黎睇加強觸發…唔係加強,係一睇就即刻觸發到。」


原來係咁,唔怪得我之前望左幾頁就可以唔洗睇將佛經倒背如流。


「你話…植入我個腦?咁都得?點解你唔直接教我而要咁格硬黎?」


「我嗰陣一定要咁做,第一,你嗰陣太細個根本未有咁嘅能力去學;」


「第二,我唔可以俾你知佛經啲野,但又想你識佛經可以自保,所以植入佛經係最好嘅做法,我要襯你細細個咁做先會容易刪走段記憶。」


依家知道真相嘅我真係唔相信以前細細個老母會對我做埋啲咁嘅野,我就好似工具咁格硬俾人植入塊晶片。


「我知你呢一刻可能接受唔到個真相,但事實證明的確保護到你啊,如果唔係咁你嗰陣可能已經俾隻鬼整死左。」


咁事實腦內嘅佛經又真係救左我一次嘅,如果唔係佛經嘅幫助,隻紅色女鬼一定已經殺死左我,阿盈亦都會俾佢消滅。


「咁你呢?你有冇學到佛經?」


我問返老母對佛經嘅認識。


「我當然有,我都有呢個責任去保護你,我得你一粒仔唔可以俾你有事!」


「唉,不過就正因為我學佛經後個死佬就覺得我神神化化,之後仲用晒啲錢搵法師幫你植入佛經。」


「佢嗰陣點勸我都唔聽照搵,最後佢就係因為咁睇唔過眼走左,搵左第二個女人。」


原來我老豆係咁樣離開左老母,佢一直唔同我講老豆點解會走,難怪我細細個就冇左老豆,


不過呢一切都係因為保護我先會咁,亦都因為佢當年嘅堅持救左今時今日嘅我一命。

霸氣文哥 2022-6-6 12:00

第一百一十章:遍尋高人


「辛苦你啦老媽子,雖然你以前又真係格硬黎左啲,但都多謝你堅持咁做去保護我,原來你咁錫咁著緊我。」


我聽到佢為左我搞到離婚後,我自己都為此感到一絲感動,一直都唔知老母以前有咁樣著緊過我,突然覺得好有母愛。


「你媽我不嬲都錫你架啦,係你自己唔知姐,都係嗰句,你媽我得你一粒仔架咋,緊係要貼心啲保護你。」


「所以你以後唔好再同鬼神有接觸就係最大嘅欣慰黎架啦,知唔知?」


「嗯嗯知道。」


雖然我呢刻應承左老母,但佢叫我咁做即係唔可以同阿盈繼續相處、即係叫我二揀一,手心手背都係肉、兩邊都係我嘅親人,我真係唔識選擇…


我呢樣野要同阿盈傾下,佢靈力咁勁一定有其他方法解決,我一定唔可以阿盈離開,如果可以,我想兩邊都擁有…Why not both?


呢晚老母瞓左之後,我未去搵阿盈,阿盈就已經自動自覺出左黎搵我傾,原來今晚老母同我講啲野佢都聽到晒。


「原來你家族出現左啲咁嘅問題,係我衰、原來一切都係我搞出黎嘅問題,唔係我嘅出現你根本唔會有陰陽眼。」


「乖啦唔係你嘅錯,你今日係我阿妹之後都係我阿妹,我地能夠走埋一齊係上天俾我地嘅緣份,可以同你做到兄妹我無悔。」


「但咁樣你陽氣會散得越黎越快,你之後點補都唔夠洗失速度快,我會害左你,仲會害左伯母,到時你地可能會演變成你表姐家庭嘅命運…伯母佢係講得啱。」


「不如…不如我離開啦,我唔想傷害你地,我呢段日子真係相處得好開心、經歷左好多野,好感激可以有你呢個阿哥對我咁好,但我滿足架啦。」


「以後我唔係度你就真係要靠自己保護自己,你之前嘗試獨立其實係做得好好,係我太短視、我冇諗過我會變成一個害人精有朝一日要離開你。」


「但…但我真係滿足架啦,我係一隻鬼,我都係時候要投胎,希望我地下一世仍然能夠結為兄妹。」


知道要二揀一呢件事後,呢一刻阿盈已經流下眼淚,佢覺得就算點都要離開我地。


「唔可以…你唔可以離開我,既然你都唔想離開我咁就唔好離開啦,我得你呢個阿妹,以後仲會有好多人蝦我,我要你保護我,你走左我點算?我會俾人恰架!」


呢個時候我亦都成個懦夫咁喊左出黎。


「所以你先要操fit啲保護自己、保護身邊人,唔好唔記得你仲有樂兒,我走左你兩個一定要好好好保重…」


「總之唔可以!你唔可以走,我唔可以冇左你呢個阿妹,你繼續留係度陪住我,求下你…」


我繼續不捨地挽留住阿盈。


「至…至於陽氣嘅野一定有其他方法解決架,我唔信上天要咁狠心!俾左我嘅野又要收返…」


「你咪靈力好高嘅,有冇辦法整走個咒或者解決件事?」


「對唔住我冇辦法…咒呢樣野根深蒂固左咁多年係冇辦法再解除到,加上咒呢樣野某程度上唔算係靈異野,我冇辦法同佢對抗。」


「我只能夠做到盡量抑制自己減少吸你嘅陽氣同靠你自己不斷增強陽氣,但我唔可以阻止伯母個咒萌芽,呢樣好危險架…」


「咁就得啦,你減少吸我嘅陽氣已經有幫助,總之呢段時間我一定會搵到方法解決呢個問題,到時你就唔洗走啦!」


聽到阿盈有少許幫助時,佢未講完我就急住打斷左佢講嘅野。


「冇用架,冇人會解除到…」


「我唔理!點都要試一試先知,你唔好離開我,你等我好消息!」


我雙手拍落阿盈搏頭堅定不移地講。


「嗯…咁我就等下,但件事唔可以拖太耐。」


說罷阿盈無奈下都應承我唔走住,我知佢都唔捨得走嘅,始終我地好唔容易先可以再走埋一齊。
.
.
.
一個月又過去,呢一個月我除左同樂兒去行街街、返學,仲抽多左時間去搵法師睇下可唔可以破解到個咒,而我已經將家族嘅事講晒俾佢聽,佢聽到後都大感困惑體諒我少左陪佢,


有諗過將公仔移去樂兒屋企,但呢個方法唔work,阿盈話公仔為主體,唔可以隨便離開呢個住左咁耐嘅結界。


至於我搵法師,每次搵我都會帶埋老母一齊去,可惜每個法師睇完我地嘅狀況都話冇得解,


俾出嘅解釋都係話因為呢個咒太過根深蒂固,加上上一代人係用折福嘅代價黎落呢個咒去我地度,通常用到有代價嘅咒係重咒、冇得解,叫我地順應天意。


「阿仔算啦,你咁急想解除個咒做乜,都咁多年冇得解架啦,我地唔同鬼神有接觸就唔會有事。」


好彩呢一個月老母都未意識到自己脾氣暴躁左,可能呢個都係個咒嘅特點,就係唔會令事主意識到個咒萌芽緊。


「唔得架,我依家有左陰陽眼會短命,加上萬一你去左啲有鬼嘅地方你同佢地相處多左就出事,你又冇開眼見唔到呢啲野,好危險架。」


我用自身會發生嘅問題答返老母,實質就唔想佢俾阿盈影響到。


「你有呢個識驚嘅心係好,之但係真係冇人可以解到架啦,算啦,你咁樣搵係嘥鳩氣。」


「你俾我搵多一個法師,搵埋呢個法師唔得再算啦。」


我好急躁,因為我時間冇多,自從老母返黎後已經3個月,再唔搵到人幫老母解咒佢個咒就會發展成熟,到時就好大件事。


但結果往往都係令人失望,最後連呢個法師都話冇辦法幫唔到我地,唔通我真係要阿盈離開先得?


然後老母呢段日子係屋企掟野情況都日趨嚴重,初頭只係掟下啲紙張、書本;依家直頭花樽、影碟機、微波爐都掟爛晒,


次次都因為唔見野而發脾氣,當然都唔少得屌鳩我,知道實情嘅我都沉住氣去安撫佢照顧佢,我都算廿四孝啦下話。

霸氣文哥 2022-6-7 13:59

第一百一十一章:歡度生日


日子一日一日咁過,呢日係樂兒生日,我應承左會同佢慶生,始終係重大且開心嘅日子黎,


可能正正因為今日佢係壽星婆為我帶黎好運,老母今日都悄為平靜仲瞓埋晏覺,我可以安心咁落街買蛋糕上佢屋企慶生。


叮咚~


我買完蛋糕後,捧住一個點著蠟燭嘅蛋糕按響門鐘係佢家門前等候。


「孔樂兒,Happy birthday day~」


好快樂兒打開門見到我,佢睜大望表現出一陣驚訝。


「哇,點…點解咁突然嘅?你唔係話夜啲先黎架咩?」


「咁我搞掂左我媽咪可以快啲見到你同你慶生。」


「唔好講咁多,許願吹蠟燭先。」


說罷樂兒就合埋眼、十指緊扣開始許願,許完願就將蠟燭吹熄。


「好耶,我個樂兒又大一歲~」


「鬼馬啊你,竟然識得買個蛋糕過黎搵我,仲要係我最鐘意嘅黑森林蛋糕。」


「驚唔驚喜呢~我女朋友仔慶生咁重要喎,緊係要買蛋糕同你賀下佢啦,食完包你一年靚過一年。」


「口花花咁,都唔知你係咪同其他女學返黎,係咪阿盈教你咁講架。」


「冇喎,呢啲野洗人教架咩,跟得你多自然識架啦,愛情嘅魔力不嬲都係偉大。」


「算你啦,但你點知我鐘意食黑森林?我好似冇同你講過我鐘意食咩架喎。」


「咪就因為你個男朋友我夠細心,有次行街見你見到間蛋糕舖入面有個黑森林蛋糕你話佢啲朱古力鋪得好靚一定好好食咁就知你一定鐘意黑森林。」


「又真係幾細心下喎,咁細微嘅野都俾你留意到。」


「我係咪好抵錫先,快啲錫我一啖~」


我合埋眼俾塊面珠墩佢等佢錫我一啖。


「好啊。」


過左一陣佢的確錫左落黎,但我feel到有啲凍凍地嘅感覺。


「哈哈哈,你塊臉多左個白色嘅唇印。」


我搵塊鏡照下自己,原來佢搽左啲cream上嘴唇錫落黎玩我。


「你個衰妹夠膽死玩我,你唔好走,等我搽返落你塊臉。」


說罷我用手指將臉上嗰啲cream抹返然後諗住high返去佢度,佢見狀就緊係即刻走。


「哈哈唔好,我唔理你我走先啦哈哈…」


佢走我就追住佢,最終都抓到佢成功將手上嘅cream搽返係佢塊臉度,然後佢又捽返嘗試high返去我度,我地就咁樣high黎high去,最後大家塊臉都沾有cream…


我地玩左一陣後,終於開始食蛋糕,樂兒佢食得十分滋味,好似前世未食過蛋糕咁,佢鐘意食就好。


「阿洋多謝你,我好耐未試過有男朋友同我慶生,我愛你。」 


食完蛋糕後,樂兒突然覺得好感激。


「我都愛你,以前唔好嘅野過左去,呢啲係辛苦過後嘅回報,以後你都會幸福、以後每一個生日我都會陪你過~」


「多謝你咁愛我,同你一齊之後我每一日都覺得好幸福、我先真正感受到俾人愛俾人寵係咩感覺。」


「就算只係過住一啲簡單嘅日子我都已經覺得好幸福,唔需要咁奢華。」


呢刻嘅樂兒好易滿足,就算過住簡單嘅日子佢都唔介意,亦唔再好似以前咁係咁買野曬命,更加冇晒以前啲爛口性格,係一全新且十全十美嘅女朋友。


「我係你男朋友黎架嘛,緊係要好好對你,愛一個人就係要錫佢,唔通好似你之前嗰個渣男咁咩。」


「抵錫,我都錫你~」


說罷樂兒嘴對嘴同我錫左一啖,我都愕然左一下。


「既然你咁寵我去邊都會陪我,咁黎緊聖誕我都要你陪住我架啦喎,相信會係一個浪漫嘅聖誕。」


「好啊,你想去邊度?」


「我想去中環睇樹樹,坐摩天輪影靚相行海濱,然後再去葵廣嗰邊食野睇燈飾,聽講葵廣嗰邊嗰日會整得好靚~」


睇黎佢好期待聖誕到來,一講起聖誕佢就好雀躍好興奮,仲講埋啲bb語疊字,好鬼可愛。


「咩樹樹?」


「聖誕樹啊!」


「好啊,咁嗰日一於就陪你去晒咁多地方,你想去邊度即管出聲。」


「你講架,到時唔好放飛機。」


「知啦,我仲要幫你影靚相架嘛,我影得咁好睇要show下俾你睇,得你一個點影。」


「係咪架,但平時見你幫我影啲影得好矮喎。」


「信我,我上網睇過啲片後技術已經大大改進,保證你俾我影完之後山雞都可以變鳳凰。」


「喂你講邊個係山雞呀!」


聽到我話佢山雞嘅樂兒笑住扭左我一下耳仔。


「哈哈唔係…你一直都係鳳凰至啱…」


呢日慶生我地都過得好開心,仲主動plan好聖誕想做啲咩約我,最後我地係屋企打情罵俏左一輪再係佢度食埋野夜晚同入房‘搞搞震’左一番我就返左去。


返到去後,屋內嘅情景同以往一樣雜亂無章,老母又發晒脾氣咁搵野亂咁掟野,


原來佢今次搵指甲鉗,平時我地用完都係擺入個櫃桶,但佢唔記得左,我速速搵出黎俾佢再安撫返佢就冇再掟,然後再同老母執返好個地下。

霸氣文哥 2022-6-8 12:45

第一百一十二章:殘害生命


事情又返返老母度,眼見佢啲脾氣越趨嚴重,之後兩日我上網突然睇到有個法師好出名且好把炮,我決定呢日放假再帶老母去睇下,唔可以放過任何一絲希望。


「又搵法師?又話搵埋上次最後一次唔再搵嘅?你有冇得閒左啲啊,走黎走去你估唔撚煩架,我家下冇咁多腳骨力唔閪去啦,要搵你自己搵飽佢。」


今次難搞了,老母去左咁多次開始變得抗拒發老脾拒絕我。


「老媽子呀,今次個法師好出名好把炮架,你就去埋今次啦,我地唔可以放過任何一個希望。」


「唔去啊,個個都係咁撚樣講架啦,咪一樣冇用,我地做好自己就乜事都冇,唔好再咁杞人憂天!」


「老媽子啊求下你去埋呢次啦,你咁樣會係一粒隱形炸彈,萬一你遇到鬼會好危險。」


「都話唔去,你咪閪煩啦。」


「當我呃低求你啦,你同我去睇埋今次啦,可能今次個法師有方法呢。」


說罷我呃低搖佢隻手去求佢。


「…唉好啦好啦,怕左你,睇埋今次架咋,今次再唔得就咪撚再搞我。」


最終老媽子都答應睇埋呢次法師,然後我地食完晏後就出發…


我帶住一絲希望且好開心咁去搵法師,但…呢股開心好快就被打斷左,


果然希望還希望,始終都改變唔到件事嘅事實同本質,希望過後依舊都係帶黎失望,


結果都係話呢個咒解唔到,仲話呢個咒係佢見過最難解嘅一個咒,連佢呢個咁出名嘅法師都話冇得解,咁睇黎真係冇辦法消除到我地個家族命運。


見完法師,我地帶住失望嘅心情返去,但老母始乎就唔多失望,因為佢都估到結果會係咁,如果可以咁易解一早就搵人解左,唔洗等到今時今日。


「老媽子,你出面等我一陣先,啱啱搭完車八達通冇晒錢,我入7仔增值下。」


返去途中,黎到樓下附近間7仔我就醒起張八達通負左錢想入去入錢先,叫老母等我一陣後我就入左去排隊入錢…


到我出返黎之時竟然唔見左老母,我望黎望去都唔見佢,我諗佢應該自己返左去先,咁我都唔理返去先。


當我行經附近條後巷時,我聽到一陣辱罵聲,我望入去就見到個駭人情景,見到老母正虐待同踢緊隻瞓係地下嘅貓,隻貓正苟延殘喘咁叫出淒慘嘅叫聲。


「仆你個街,隻閪貓係度阻撚住晒,我最撚憎就係呢啲野貓。」


「喂老媽子唔好再踢,隻貓就俾你踢死架啦,貓咁得意你做咩要係咁踢佢?佢得罪左你啲咩?」


我立刻走上前拉住老母阻止佢唔好再踢,眼見一隻咁可愛嘅貓俾佢踢到得返半條命咁瞓左係地下,且嘴角仲流住鮮血,我自己都覺得心痛。


「得意你條命咩!最撚憎呢啲閪貓成日係度叫春,聽到人都心煩,又扮晒可憐咁問人攞野食,啱先佢就係咁走過黎我隻腳想問我攞野食。」


「我即刻屌你老味踢撚鳩死佢,我一踢佢就飛左去前面瞓低唔識郁,咁鐘意問人攞野食自己上山覓食啦。」


老母佢真係癡撚左線、變得咁冷血,佢唔鐘意貓都唔應該咁樣虐一隻貓囉,以前都未過佢咁樣對啲貓,睇黎係個咒影響佢開始殘害周圍啲生命。


「你唔好阻住我,貓有九條命架嘛,佢依家都未死,我就睇下佢係咪真係有咁撚多條命俾我慢慢玩!」


「你唔可以再踢,貓都係一條生命黎架,你咁樣同殺人有咩分別?」


我繼續拉住老母唔俾佢行前去踢佢。


「你正一死傻閪,係鄉下我已經煮黎食撚左佢啦,依家佢齋俾我踢死咪算好彩。」


「你真係癡左線,總之你唔可以再踢,我地返去啦,你個病我一定會搵人醫返好你,你就唔會咁殘酷脾氣咁差。」


「病?我有病?我有咩病?你係咪有啲咩收埋唔同我講?」


仆街我一時心急講多左,佢一時又變得咁聰明聽得出我話中有話嘅?


「冇…咁你依家成日發脾氣又虐貓,睇怕都有躁狂,要睇下醫生。」


「脾氣…?你唔講我都唔知我呢排脾氣差左好多,你又咁急住幫我解咒,你一定有野瞞住我,你快啲同我講清楚究竟發生咩事!」


仆街我一時都load唔到應該點駁好,反而講多錯多仲俾佢發現我瞞住佢。


「冇啊真係冇,純粹係你脾氣差左想你去睇下醫生咋,冇其他野瞞住你…」


說罷老母就一手捏住我條頸、力度好大,我一時透唔到氣,唔…唔通佢個咒已經成熟到一個點!?


「你好快啲講,我控制唔住自己,你再唔撚講嘅我就會捏死你,再整死埋隻閪貓!」


「老…老媽子…」


第一次見老母露出呢個咁兇神惡殺嘅樣,仲要為左得知真相不惜連我都可以殺死,唔通姨媽嗰陣都係咁冷血對佢個女?


「我…我係你個仔黎架,係…係一場誤會,我真係…冇…冇野瞞你。」


我勉強講得出啲說話,我兩隻手嘗試拉開佢隻手但我根本整唔郁,然而我到呢一刻都唔肯講個真相出黎,相信講左出黎佢一定會返去消滅阿盈,我唔可以講!


「你個衰仔,仲夠膽認係我個仔,兩母子都咁多野瞞住,我養你咁多年真係嘥米飯。」


「好啊,你仲咁口硬下話,你會冇好日子過。」


說罷老母就捏住我條頸向後去到隻貓面前、舉高隻腳對住佢個頭。


「你咁鐘意貓下話,我依家就我數三聲,如果你仲唔講嘅,我就一野踩爆佢個頭!」

霸氣文哥 2022-6-8 12:46

黎緊故事會開始進入悲劇嘅開始:smile_24:

[[i] 本帖最後由 霸氣文哥 於 2022-6-8 12:49 編輯 [/i]]

霸氣文哥 2022-6-9 13:02

第一百一十三章:囚禁


佢真係好殘忍,咁嘅事都做得出,我終於開始體會到當年細表姐係過住點樣嘅日子。


老母依家一口認定我有野瞞住佢、仲係一件唔簡單嘅事,睇黎佢已經估到大概發生咩事,我都唔可以再瞞佢,就只差我承認左件事佢,


而我依家亦冇得揀,佢拎隻貓黎威脅,我唔可以俾佢白白殘害一條無辜嘅生命。


「三…」


「二…」


「一…」


「既然你仲唔肯講我就踩撚死佢,反正都係賤命一條。」


說罷老母將腳舉得更高準備一下大力踩落去。


「我講…我講啦,唔好踩!」


佢聽到我肯講後就停住左動作。


「我就知你個衰仔有野瞞住我,你一早講俾我知咪唔洗搞到咁,你講,有咩瞞住?你敢講大話嘅我即刻就踩爆佢個頭。」


「你之…之所以脾氣會差左咁多,唔…唔係因為你真係有病要睇醫生,而係我…我係你返左鄉下呢段時間,一…一直都養左隻鬼係自己屋企,我有陰陽眼都係因為咁…」


「你講咩話!?養左隻鬼我地屋企?我一直唔同你講鬼嘅野就係唔想你去接觸,你夠膽死同我作對仲偷偷地養住佢係我地屋企?」


聽到真相後,老母變得更激動地捏得我更大力。


「怪唔得我脾氣差左咁多、你又急住同我搵法師解咒,原來搞咁多野背後都有陰謀,一定係個咒已經成熟緊…」


「唔得,我依家就要返去整走佢,真係多得你個死鏟唔少。」


「唔…唔好,你唔好傷害阿盈,我…我當左佢係阿妹架啦,你唔…唔可以咁做。」


「呵呵原來仲有埋名認埋隻鬼做你個妹,即係你地有好濃厚感情,但我屋企唔可以有呢個阿妹存在,你亦都從來冇阿妹,你淨係有我呢個阿媽!」


「佢…佢係我以前個中學同學…周…周雪盈,你都有聽過架…」


「哦,我記得係燒炭死嗰個嘛,但我理得佢係邊撚個,佢係一個外人,仲要係一隻鬼,任何鬼神嘅野都唔可以存在係我屋企、必須鏟除!」


「老…老媽子,唔好咁做…唔好…」


我忍唔住流下眼淚,然而說罷佢就二話不說咁掉左我落地下自己就跑走左,佢一定係要返去搵阿盈出黎消滅,我一定要快啲返去阻止佢!


我冇時間抖,俾佢掉落地下後我即刻起身摸住條頸忍住痛咁跟住跑返屋企…


返到屋企後,老母已經將周圍啲野掟到成地都係,果然就算執整齊啲野都係冇用。


「隻公仔呢?你將隻公仔收埋左係邊?」


是咁的,老母係鄉下返黎一日之後我就從個玻璃櫃度拎左出黎收埋係自己間房一個隱蔽嘅地方,所以佢係認得個公仔。


「你講公仔?咩公仔?」


我扮傻嘗試呃佢。


「你唔好係度扮傻,我第一日返黎見到放係玻璃櫃嗰隻公仔,去撚左邊?」


「點解你會知佢係公仔入面?」


「你當你老母我真係流架?幼鬼通常都鐘意匿係啲公仔度架啦,加上我以前係舊屋根本未見過呢隻公仔,你好快啲交出黎,我要燒撚左佢。」


「我…我唔可以俾你咁做!」


「你唔肯交出黎下話,我今日就算反轉間屋我都要搵到出黎,我唔信搵唔撚到。」


「廳呢,我就搵撚晒,你間房道門閂埋,話唔定你就收埋係入面。」


「仆街唔可以架…唔可以咁做…阿盈唔可以俾你消滅,點算好…究竟依家點算好…」


我見到呢個情景正面臨一個崩潰嘅情緒,我細細聲咁自言自語唔知點算好,就係呢個危急關頭下,我隨意地係側邊拎起左條木棍…


「死鏟你鎖埋度門下話,等我踢開道門。」


[b]噗![/b]


正當老母踢開度門後,我從後一棍扑左落老母個頭,佢隨即應聲暈低左,既然我點都阻止唔到佢,就等佢暈一暈等我思考下對策。


「老媽子對唔住啦,要你瞓一瞓先,我唔可以俾你咁做…」


就係咁老媽子瞓低左係我間房前面,而係雜物堆中我咁啱發現左幾條繩,令我萌生出一個想法…


說罷我就將佢抬入佢間房放上張床上,然後將佢手手腳腳都綁住係張床嘅每一邊。


「老媽子,呢幾日要難為下你先啦,兩邊都係我親人,我唔想失去其中一邊,呢幾日我會再諗諗辦法點樣幫你。」


你地話我不孝都係咁,呢個係最好嘅方法,暫時平靜下佢俾我地思考下對策,


雖然辦法其實已經冇乜,但我一諗起阿盈要從此消失我就唔敢再諗落去,我唔知點算好,就唯有暫時扑暈佢…


我將老母綁住後就步出左房間叫阿盈出黎,我講晒成件事俾佢聽,但聽原來頭先已經聽到晒知道咩事。


「我就知呢件事會瞞唔到好耐,紙包唔住火,終有一日都會知我嘅存在,但冇估到佢短短一個月就變到咁殘暴咁冷血。」


「唉,我呢一個月已經好努力陪佢周圍搵法師,就連最出名嘅法師都搵過,但可惜都話幫唔到我地…」


「我都講左冇用,你地呢個咒係冇人可以解到,只有我消失先可以,我一日係度一日都只會繼續危害你地…」


「不如…不如你俾我走啦,我唔想見到你家庭變到咁,同你親生阿媽相比我呢個外人又算得係咩...你地血脈相連先係摯親,我本來就唔應該繼續留係度做你地嘅害人精,犧牲我一個都值得…」


「唔係架…你雖然同我冇血源關係,但我早已經當左你係我親生阿妹咁看待,我唔可以冇左你呢個阿妹,啱先我打暈老母就係唔想佢消滅你,你地兩個任何一個我都唔想失去。」


說罷我地兩個都不自覺地流下眼淚。

霸氣文哥 2022-6-10 12:33

第一百一十四章:折磨


「你個傻仔,你咁樣真係好不孝,我本來就係鬼,要消失都係好應該…」


「我唔理!頭先個危急關頭我已經管唔到咁多,淨係知我唔可俾你有事。」


「阿洋啊,有你陪左我咁耐我好滿足架啦…」


「總之你唔好走!就算你依家走左都無補於事、只會白白犧牲,依家老母個咒睇怕已經成熟得七七八八、唔想觸發都觸發左,情況只有更差唔會變好…」


「既然都黎到呢一步不如我地一齊面對,可能會突然諗到辦法幫佢呢?」


事實係好難再諗到辦法解決,呢啲都係我自我安慰嘅一堆說話,只可以見步行步。


「阿洋你真係好傻…」


「就咁話啦,老母依家俾我綁住左,一時唔會活動到,我地可以襯呢段時間諗下對策。」


我勉強迫住阿盈留住係度。


「但你千祈唔好隨便出黎,我唔想俾佢見到你,佢依家照計陽氣少左可能會見到你。」


「嗯咁…好啦,既然都行到呢步冇得返轉頭,我就聽你講、我唔會隨便出黎,但願日後嘅情況唔會更差…」


到左夜晚老母醒左,醒左之後嘅佢不斷對我破口大鬧。


「你個仆街冚家鏟死反骨仔,我生你出養你大你夠膽咁樣對自己老母?我要你呢個仆街真係冇撚用,快啲放開我!」


「對唔住老媽子,我唔可以俾你傷害阿盈…」


「盈乜撚野盈,佢鬼黎架咋,屋企唔可以有鬼嘅存在,你唔可以同佢地接觸,會害左你、害左你老母我,你快啲放左我出黎鏟除佢!」


「冇錯佢係鬼,但我已經當佢係我親手阿妹,我點都唔會俾你傷害佢。」


「老媽子你呢排忍耐下啦,我會繼續諗辦法幫你,實會諗到個兩全其美嘅方法。」


「你個冚家鏟死都要同我作對下話?好,等我出返黎一定第一個打撚殘你個衰仔,你個仆街!!」


老母最後發出一下聲嘶力竭嘅叫聲,聲音在整間屋裡回盪著,而呢晚就隨著呢下嘶叫聲而落幕…


兩日過去,呢兩日我都同左樂兒解釋呢排嘅事,佢都覺得件事嚴重,


眼見聖誕越黎越近,但為左多啲時間睇住老母我都少左接樂兒放學同陪佢,即管我早放都好,好彩樂兒佢都體諒我冇怪我。


而我要一放學就返去睇住老母,事關我同阿盈傾對策嗰陣,佢俾左個idea我,就係見我本身識驅鬼,就叫我試下用唸佛經可唔可以影響到個咒,


就係咁呢兩日我一返到去就對住老母不停地唸,可惜除左得啲風之外就冇其他作用,反而更燥、面容越黎越兇狠且掙扎嘅力亦都越大。


「冇用架傻閪,你佛經淨係對真係一隻鬼有用,對咒係冇撚用架,快撚啲放開我啊!!你個冚家鏟我出返去一定第一個屠撚左你!啊!!」


老母就係咁不斷掙扎不斷大叫,已經變到同癲婆無異,某程度上都係因為我嘅自私搞到佢咁…


呢一日我如常放學就返屋企,但好奇怪,今日踏入屋嗰下冇再聽到啲掙扎同嘶叫聲、異常地平靜,平時一返到黎佢都會係咁叫,


於是我行去老母間房開門,入到去後竟然見綁住啲繩全都扯斷晒,老母憑空消失左…


仆街佢唔通走甩左?佢究竟會去左邊?屋企咁靜唔通佢已經對付左阿盈…?


[b]噗![/b]


正當我諗緊阿盈會唔會已經遭遇不測感到驚慌之際,突然我俾人用棍從後襲擊扑左落我個頭,我立即感到好眩暈跌左落地下。


「你個反骨仔你都有今日啦,夠薑綁住老母禁錮我,依家到你受返老母嘅苦!」


我意識模糊地見到老母正慢慢咁行過黎。


「點…解…?」


「點解?好彩我冇同你講脾氣發得越頻密,個咒就萌芽得越快,我今日先能夠夠力扯斷左條繩。」


「亦都因為你個死鏟搞到觸發左個咒,依家睇怕已經成熟,呢隻鬼我點都要鏟除左佢、佢係罪魁禍首。」


「至於你個死鏟都唔好得去邊,之後日子有排你受。」


說罷我就正式昏左過去…


到我醒返之時,唔知過左幾耐,只見到我被綁左係張木凳上面坐住、手腳大脾都被綁實、無法動彈,


我嘗試掙扎,但當我一扎掙就吸引左老母嘅注意由我間房行出黎。


「你個死反骨仔起身啦?你隻公仔究竟收左係邊?快啲講!」


佢拎左條皮帶出黎兇我叫我講出公仔嘅位置,仲將條皮帶摺起內外推拉發出啪啪聲以示威嚇,


但佢咁樣問得我即係阿盈仲未有事啦,我都放心啲。


「我唔知,個公仔我掉左啦。」


「咪撚係度扮野,我琴日仲聽到你同佢講野,你好快啲講,唔係你就等死!」


「我真係唔知,你去垃圾桶搵啦。」


「好,既然敬酒唔飲飲罰酒,我就打撚死你個死鏟。」


說罷佢大大力鞭左落黎我身體,我咁大個仔都係第一次俾佢打,估唔到今日就要受到佢對我嘅皮肉之苦。


「啊…呀…」


佢不斷鞭打我,每一下都好大力,我只可以發出痛苦嘅叫聲。


「你個冚家鏟…」


「食屎大架你…」


「同外人夾埋同老母作對?」


「害老母?」


「禁錮老母?」


佢每講一句打一下,著住短袖嘅我打落嘅每一個位置都十分痛,十足古代對待囚犯嘅酷刑,好快地我隻手已經出現左一條二條嘅傷痕,有啲仲要甩左皮…


「啊…老媽子唔好打,我係你個仔黎架,你唔係話保護我架咩…?」

霸氣文哥 2022-6-11 13:17

第一百一十五章:解救 


我嘗試一下憶起佢嘅情感。


「仔?我冇你呢啲咁嘅衰仔,呢咁多年我都白養左你,你咁樣害老母,我要十倍奉還返俾你!」


唔通呢個就係個咒嘅特點令人患上被迫害妄想症去報復人?就算眼前嘅係佢親人都冇阻佢去報復,呢一刻我更能體會到當年細表姐之苦。


「老媽子你認清楚,你眼前嘅係你個仔,你打死左我就會冇左個仔…」


[b]啪![/b]


說罷佢又打左我一下。


「收嗲啦你個冚家鏟,你依家唔再係我個仔、我後悔生左你出黎、淨係識害我,你呢刻嘅身份,只係一個我恨之入骨嘅仇人,一切都係你條仆街搞出黎。」


「我冇害你,我只係唔想你傷害阿盈,我好難得先認到佢做我阿妹架,我係害你嘅我就唔會仆心仆命周圍去你搵法師…」


[b]啪![/b]


「啊!」


佢再次大力鞭左我一下。


「結果呢?有冇得搞啊?我洗閪你同我搵法師,你唔係屋企養鬼根本乜野事都冇,你食屎啦你,越講就越撚火。」


說罷佢繼續鞭打我,我身體已經傷痕累累。


果然我嘗試憶起佢情感都一啲用都冇,反而換來佢對我嘅恨意更加強,


「你係咪仲唔撚講我聽個公仔嘅下落?」


「我真係唔知…求下老媽子你清醒下。」


「到呢刻仲咁口硬,你肯講出黎我咪唔打你,你又洗乜受咁多苦,不過我打厭左你唔打你啦。」


依家老母對我咁有恨意就算我講出黎都唔會好得去邊架啦,簡單黎講即係講又死、唔講又死,不過就算佢唔折磨我我都唔會講!


「哎喲你睇下你,成身傷咁我睇見都心痛,我入廚房攞啲野出黎幫你止止血啦。」


老母忽然由兇狠變得溫柔唔再打我,仲去關心我、形成一個好大嘅反差,佢想點?呢啲係咪都係詛咒洐生出黎嘅癡線症狀?


說罷老母就入廚房拎左樽鹽行出黎,我見到後心頭都打左個冷震,似乎我意識到佢跟住落黎想對我做啲咩…


「唔洗驚下,皮外傷黎架姐,等老母我幫你消一消毒先下,搞到細菌感染就唔好啦。」


老母就打開樽蓋,從裡面𢳂左羹鹽出黎灑落我啲傷口上,我瞬間痛到大叫左出黎,呢啲莫非就係真正嘅‘在傷口上灑鹽’?


「啊…老媽子唔好…」


「你唔好叫啦衰仔,鹽殺菌啊,唔快啲消毒下會出事架。」


呢啲邊度係消毒,簡直係折磨,佢變得溫柔呢下反而更恐怖,我未試過對住自己老母會咁有恐懼感,係前所未有嘅恐懼…


「睇下老母對你幾好,你同我作對我仲咁幫你,你應該要好好多謝我。」


說罷老母繼續係我身體每一處灑鹽,我痛苦嘅叫聲叫不停,仿佛我嘅身體俾幾十把刀插住。


「我咁好幫你‘療傷’,咁請問你依家肯同我講個公仔係邊未呢?」


「我…我真係唔知。」


我仍然嘴硬唔同佢真話。


「好,我唔怪你,人人都話世上只有媽媽好、做阿媽嘅會無條件咁愛自己個仔,我會繼續幫你‘療傷’。」


說罷老母佢突然揭起左我件衫,望住我背脊。


「咦你背脊好大條傷痕喎,哇仲要同好多條傷痕痴埋晒一齊流晒血,呢個位咁傷一定要好好消毒下。」


然後老母就將成樽鹽倒晒落我背脊,呢一下痛係我今晚最痛嘅一下、十指痛歸心,淚水亦不自覺地流下。


「啊!!!」


痛苦嘅叫聲環繞著整間屋,可惜我叫我幾大聲出面都唔會聽到。


「我唔想…唔想再咁痛苦、我唔想再做人,不如你乾脆殺左我啦…」


「殺殺聲咁難聽做乜,老母我又點會害你,你呢啲皮外傷黎姐,要死咁容易咩。」


「加上我仲要你同我講公仔係邊架嘛,緊係要繼續留你係咪慢慢‘享受’下先。」


呢刻佢扮晒慈母咁,其實就係想折磨我,或者佢已經癡線到將折磨我視為一種娛樂,眼前嘅老母好陌生,已經唔係我從前認識嘅老母…


「唔理你啦,你唔講我自己入你間房搵,反轉你間房都要搵到出黎,我要親自燒左佢!」


說罷老母就入左我間房左搵右搵,我可以得到一刻喘息,希望我收埋嗰個位佢唔會搵到…


正當老母入左房之時,綁住我啲繩突然開始鬆綁,原來係阿盈偷偷地出左黎幫我解開緊。


「阿盈?咪叫左你…」


「噓!我偷偷地出黎,唔好俾佢發現,我會救你出去。」


阿盈細細聲咁同我說道。


然後阿盈就係咁靜靜雞幫我拆晒啲繩,我地動作好慢並冇發出任叫聲響,加上老母依家仲係房入面摷緊,就算有聲都唔會大聲得過佢搵野啲嘈雜聲。


襯老母未發現我地,我搭住阿盈膊頭而佢亦都扶住我咁慢慢走到門口,我行走期間因為衫同傷口間嘅磨擦都令我疼痛不已、露出痛苦嘅表情。


阿盈好輕力咁拉開門鎖,務求唔會發出任何聲響,打開木門後佢再慢慢拉開鐵閘,


[b]喀啦…喀啦![/b]


但就算拉得幾慢都好,鐵閘始終係鐵閘,佢點都會發出一啲拉開嘅聲響,就係呢啲聲響,似乎引黎左老母嘅注意,房裡面嘅嘈雜聲停止左…


「屌你個死鏟夠膽走!?同我返黎!」

霸氣文哥 2022-6-12 11:41

第一百一十六章:逃亡

當我地打開鐵閘之後,老母真係留意到我地走左,佢面目猙獰且氣沖沖咁向我地走過黎。


「走!我地快啲走。」


見到呢個情景,阿盈即刻乜都唔理地閂返埋道門同鐵閘、務求為我地增取多一丁點時間,然後阿盈帶我走到後樓梯落左一層。


「我地行樓梯,搭𨋢嘅話有排等佢一定可以追上黎。」


阿盈果然醒,唔洗我提都知要行樓梯,不過呢度25樓有排落。


「阿洋對唔住,我遲左出黎搞到你受左咁多苦,我啱先唔可以直接出黎同佢近戰,因為我要留返條命睇準時機救你出黎。」


「我冇事,我冇怪你,咪叫左你唔好出黎,你咁樣好危險。」


「你係我哥黎架,我點可以唔出黎救你,你頭先仲叫佢不如殺死你,你知唔知我有幾擔心,我真係驚佢會癲起上黎將你殺死架。」


「但你咁樣出黎救我點解佢冇發現你?」


「因為我係公仔出黎嗰陣係可以係某個位置直接彈出黎,所以就算佢開左眼都唔會見到我由個公仔度出黎。」


「唔好講咁多,你依家成身傷晒我要送你去醫院!你有冇電話,我地報埋警。」


「我部電話留左係屋企報唔到警。」


「同埋我地唔可以去醫院,既然佢話過個咒成熟之後會連姨媽生前做過啲野都記得晒,而細表姐佢生前都係好似我依家咁樓梯逃走再入左醫院,如果用返同一個方法老母佢一定知我地會去醫院。」


「加上以前細表姐佢入左院姨媽知佢位置可能都因為個咒,我地血脈相連都有著個咒係身、而個咒就好似GPS,佢可能會感應到我位置。」


我腦海中忽然閃過以前表姐嘅遭遇講返出黎。


「呢樣唔得嗰樣唔得咁依家我地點做好?你依家咁傷冇可能咩都唔做架。」


「我地嘅咒如果好似GPS咁嘅話,佢可以知道我嘅位置,但相反係同一棟大廈垂直走動佢就難啲知道。」


呢個原理就好似平時我地睇Google map都唔會睇到棟樓嘅每一層。


「你嘅意思係…?」


「我地落去,但唔好落到地下,而係落到低層係防火間個位度避陣,因為老母佢知我地冇搭𨋢就一定落樓梯搵我地,我地唔夠佢快,到時冇事嘅就向隔離啲單位幫手報警抓住佢。」


「跟住我地就走、搵地方匿埋先,唔好俾警察見到帶我地去醫院;到時係防火間避緊就算有咩突發事發生我地都可以好快衝落樓搵看更,係進可攻退可守。」


「至於睇醫生我等件事平息啲先再去睇,我呢啲傷應該唔會死住嘅。」


危急中我諗左一條萬全之策出黎,希望係冇步細表姐後塵之下可以逃避老母嘅魔爪、藉此改變命運。


「呢個方法係幾好,但你啲傷拖咁耐…」


「信我啦,冇事架!唐生同細表姐佢地以前咁辛苦都係咁捱過架啦,我依家少少苦痛痛一排又算得啲咩。」


「事不宜遲,我地快啲走啦,佢應該好快就追上黎。」


「好…好啦,你扶實我,我地依家就行落去。」


說罷我扶實阿盈快速地一級一級地步下樓梯…


一陣之後,我地已經落左多層去到10樓,我地決定去到5樓就係嗰層防火間避一避,


但好奇怪,我地異常地順利,上層並冇聽到一絲聲響,仿佛就好似冇係度追殺我地,如果係咁嘅話咪即係同表姐嗰陣嘅經歷有所出入? 


我唔理咁多繼續照我個plan行事,當我地落到8樓之時,有個40幾歲嘅保安突然係防火間裡行出黎,我估佢應該係巡緊樓。


「停低停低,哇𡃁仔你做咩傷到咁,仲要行得咁急去邊?」


個保安見到我咁樣就截停左我,我情急之下都不得不同佢講個事實。


「有人係上面追殺緊我啊,我要走…」


「你冷靜啲先唔好走住?究竟發生咩事?殺人好大件事架喎。」


「你唔好阻住我,佢好快追到落黎,你幫我報警就係最大嘅幫助。」


「得得得我會幫你報警,但你唔好走住,你咁傷仲走去邊,入醫院仲好過啦,同埋警察黎到你要幫手落口供。」


住左係度唔算好耐真係唔知呢度有個咁煩嘅保安,應幫助嗰陣唔幫。


「我唔去得醫院架,佢會知我位置會黎搵我,到時都係死,我依家要落5樓避一避先。」


「你係度講乜,佢俾人抓左仲點去醫院搞你,總之你唔好走住啦,我同你落樓下坐下先,我會叫同事黎睇住你;另一邊我都會叫同事上樓睇下,你唔會有事。」


個保安完全唔知老母依家有幾恐怖、佢亦都聽唔明,只係識得係前面攔住唔俾我走,既然依家都冇得揀唯有見步行步跟佢落樓下。


然後保安跟隨係我地後面望住我地落去確保唔會走左去,期間我同佢講左我地住幾樓幾室、追殺我嗰個係邊個,而佢手中就拎住部手機報警…


落到6樓之時,個保安報警講到一半突然就靜止左冇講野、同時間我亦feel到有啲液體濺到我頸部,


正當我同阿盈擰轉頭望咩事,我頭部係未知發生咩事之時突然受到一下重擊,呢次我依然未反應得切,我即刻感到眩暈向後跌倒,阿盈接住我。


我竟然同一日會受左兩下重擊、同一個錯我竟然會犯兩次,我真係冇用,


我感到頭昏腦脹時隱約見到眼前景象、又係一個令人震驚嘅畫面,


見到保安員俾老母黯住個嘴從後用生果刀𠝹頸,而黯住嘴隻手仲揸住枝棍,相信佢就係用呢枝棍扑落我度…

霸氣文哥 2022-6-13 12:07

第一百一十七章:擒獲


保安員俾佢𠝹頸後流到成地血,好快佢就瞓低左抽搐左幾下,點解老母可變到咁殘忍、死左人啊… 


然後老母佢慢慢向住我行過黎,阿盈露出利爪、面容變得兇狠地對住佢,作出一個準備迎戰嘅姿勢,但佢仍然表現淡定毫無懼色,唔知係咪佢見唔到阿盈。


老母行到距離一米多啲嘅位置時,阿盈就用利爪向住老母攻擊過去,


但利爪未掂到佢就被老母用手好快咁抓住左佢隻手,呢個時候先知原來老母係見到佢,


接著再用另一隻手擺出一個手槍嘅姿勢,食指中指向上、姆指彎低,口中喃喃自語,仿佛正在對佢施咒,


然後再將兩隻手指指向阿盈繼續唸,一陣怪風吹過、阿盈隨即露出痛苦嘅表情,老母抓佢隻手抓得好實,儘管佢點樣掙扎都走唔到,亦無法反抗。


「…佛語天帝釋是七神王,於我滅後護佛弟子,逐諸邪惡不令得住…」


「…怛署他,安陀尼,牟訶尼…」


老母唸左一堆經文出黎,呢堆經文我冇印象,可能佢以前並冇幫我植入晒所有經文。


經過一輪唸經後,阿盈終究頂唔住暈低左,而佢嘅周圍亦多左一層無形嘅罩出黎,阿盈就係咁係罩入面暈左飄浮著…


「阿盈…!」


我叫了一聲後我亦都接住昏了過去,阿盈你要頂住唔好有事,但睇怕今次都好難再有命生存,唔通所有嘅一切都會係今日結束…?


又過左唔知幾耐,我慢慢從黑暗中甦醒過來,我再次被綁住左係張凳,原來我仲未死,但我個頭好痛。


今次我被綁係一張有得挨嘅凳、雙手交叉地綁在凳後、雙腳亦連埋張凳一齊綁住,綁得好實令我動彈不得,


而阿盈就係我隔離,佢依然係個罩入面囚禁著,但佢已經流露出虛弱嘅神態,應該頭先嗰下唸經令佢受到打擊,


我放心了一下,因為佢仲係度冇被老母消滅,但往往死罪可免,活罪難逃,唔知老母今次抓我地返黎又想對我地做咩恐怖野…


「你個死鏟終於識醒啦,邊撚個俾你走啊,你都未受夠苦!」


老母見我醒左之後就從我間房行出黎即刻打左我一巴,睇黎我重返地獄要繼續俾佢折磨。


「明明我已經變到對你咁好咁關心,點解你都要走?你係都要我惡啲對你條仆街!」


「你唔好再打阿洋!成件事係我搞出黎、係我嘅出現先搞到你地觸發左個咒,你放左阿洋我願意犧牲我自己。」


「阿盈你講乜,你唔可以有事,你有事嘅話我就算死左都唔會再見到你…老媽子我求下你唔好傷害阿盈。」


「睇你兩條仆街係度一唱一和就乞我憎,你兩個唔洗講,你兩個我都唔會放過!」


「你要收拾嘅話做咩頭先唔收拾要抓我地返黎?」


「我點會俾你死得咁易,我仲要慢慢懲罰你,你搞到我個咒成熟左喎,我要俾你個衰仔知道唔聽人講嘅下場係點。」


「至於你嗰個所謂阿妹,我頭先用封印咒經將佢封印住左,我帶佢返黎就係要佢親眼睇住你點樣因為唔聽話而受苦、我要佢內疚,我最鐘意就係睇到一個人為對方悲痛欲絕!」


呢刻嘅老母真係變態,睇黎個咒已經影響得佢好深。


「唔可以!你唔好咁對佢…明明頭先落去嗰陣後面一直冇人,點解你會冇啦啦係我後面出現?冇可能…」


「點會冇可能,以前我家姐蠢姐,就係因為佢一尾淨係識係樓梯度追所以先俾佢個女走到。」


果然老母佢記起左姨媽個咒所發生嘅野。


「所以今次我唔學佢一尾追,我直接搭𨋢落樓下再鏟樓梯上去伏你,咁樣就唔洗擔心追你唔到,亦都唔洗擔心你係某一層出左去。」


「咁啱我上到6樓就聽到你地啲聲越黎越近,我就知道你地會經過呢層,所以我就係呢層嘅防火門後面伏你。」


「最後你地咪就咁俾我捕到、而個保安係度阻撚住晒我就直接搞掂佢。」


估唔到老母佢道高一尺魔高一丈、佢好精明,即係就算跟我個plan做未落到5樓都已經俾佢抓住,最好我就唔係咁低嘅層數避…


不過就算係咁,佢都會靠聽聲或者望樓梯中間個窿知道我係某一層匿埋左,結果都會係一樣…


「老媽子你清醒下啦,你變左,以前嘅你唔係咁架…」


「唔係咁咁係點?唔係你搞左隻鬼返黎我洗搞到人唔似人鬼唔似鬼?依家我要佢難受又有咩問題?」


「等我懲罰得你七七八八我就會連佢都鏟除埋,到時你睇住佢點樣係你面前灰飛煙滅啦哈哈。」


「咁你係幾時開始可以見到阿盈,你唔係冇陰陽眼架咩?」


「你係真傻定假傻,呢樣野咁基本都要問?隻鬼係屋企對住我咁耐,我啲陽氣自然俾佢拉低晒,低到一個點我自然就可以見到佢架啦。」


「個咒令我變得好大力,就憑佢頭先嘅力水就想襲擊我?仲差得遠。」


「都係因為我,如果唔係我傷左阿盈要顧及我,佢同你正面交鋒一定贏到你、唔會俾你抓住,如果我死左就唔會咁…」


「邪不能勝正,點講都好我唔會俾你個死鏟死得咁易,你死左嘅點算啊,你仲有個心愛嘅女朋友架嘛,你死左嘅咪見唔到佢囉。」


老母突然奸笑且陰聲地講出我有女朋友,佢係幾時知!?

霸氣文哥 2022-6-14 13:52

第一百一十八章:嚴懲


「女朋友?你係度講乜?」


說罷老母從褲袋裡拎出幾張我同樂兒去迪迪尼影嘅相。


「仲扮野?邊撚個俾你拍拖啊?你書都未讀完毛都未生齊學人拍拖?你幾多歲啊方伯洋。」


然後老母再次變樣打左我一把。


「你俾返啲相,你唔好去傷害佢!」


「睇你幾緊張,你中晒毒啦,你咁早拍拖啲女仔冇個好,只會係紅顏禍水。」


佢冇話見過個女仔,睇黎佢未見過樂兒、唔知佢就住隔離,即係只要佢唔出現老母就唔會傷害到佢。


「我識咩女仔唔關你事,你俾返啲相我,啲相好有紀念價值。」


「好有紀念價值下話?我依家就撕爛晒佢,你吹得我漲咩?」


「唔好啊!」


說罷老母就二話不說將呢啲相全部撕碎左灑向我塊臉,我激動到喊左出黎。


「點解你要咁做,呢啲相係我同樂兒嘅回憶黎架嗚嗚…」


「喔原來佢叫樂兒,等我睇下遲啲可唔可以感應到呢個人嘅位置。」


真定假?我只係講左個名出黎佢就可以感應?咁我咪即係講錯野害左樂兒…


「唔好…你唔好傷害樂兒,佢同呢件事冇關架。」


「睇下你緊張到,你真係已經壞晒冇得救,又害我又要癡埋啲鬼度又唔聽我講咁細個去拍拖,你真係全撚部都要同我作對!我一定要嚴懲下你至得。」


「佢會冇關?佢同得你拍拖就係有關,即係連佢都要同我作對、你一定係想夾埋佢一齊睇下點害我,夠膽同我作對嘅人都唔會有好下場。」


「你放心,我之後會幫你搞掂埋佢,你身邊就唔會有啲紅顏禍水嘅女人纏住,不過可能到時你都已經冇眼睇到我點殺死佢嘻嘻嘻。」


呢刻嘅老母喜怒無常,一時兇恨一時奸笑,睇怕真係癲晒,唔再係我以前認識嘅老母。


「唔好…我同佢經歷左好多野先能夠一齊,我地係真心相愛。」


「我真你老味,總之你咁細個拍拖就係唔得。」


然後老母又車左我一把,嘴角開始流下鮮血。


「既然你講到咁愛佢,即係你已經同個女仔做過破左處啦、即係你包皮已經冇用啦,咁可以剪得。」


「你…你想做乜?」


我聽到佢咁講,內心頓時感到不寒而慄,而阿盈都俾佢呢句說話搞到大感吃驚,仿佛接下來嘅事都會好恐怖。


「本來你細細個嗰陣我唔剪你包皮就係想你唔好咁快走去拍拖扑野,既然依家都照樣去左拍拖我咪幫你剪左佢、都冇用架啦,係你迫我架!」


佢話幫我剪包皮?仲要由佢親手操刀…?唔通呢個就係老母口中所講嘅對我‘嚴懲’?


說罷老母係隔離個櫃拎左把十分鋒利嘅裁縫剪出黎、佢入廁所沖洗左一下就行過黎。


「呢把較剪我買得冇錯,終於用得上場,依家就可以當你塊包皮係塊布咁剪走佢。」


「老媽子唔好…唔好!你冷靜啲…」


我內心所發出嘅恐懼不斷想制止老母唔好咁做、身體不停掙扎,而我呢刻同瞓係張手術床上等俾人開刀冇異。


「伯母你停手啊,你癡撚左線,你點可以咁做,佢係你個仔黎架,你點可以咁殘忍咁傷害佢,你對唔對得住佢?」


「你個外人收嗲啦,我點樣教仔唔洗你教,總之佢處處同我作對我就要嚴懲下佢,你唔洗急下一個就會輪到你。」


說罷老母就將我條褲連底褲除低,露出我條驚到縮埋左嘅波波腸。


「縮埋左仲好啊,你啲皮露晒出黎我可以更加易剪。」


「老媽子唔好我求下你…我之後會聽你話架啦。」


恐懼令我控制唔到不斷地向佢求饒,畢竟剪包皮係十分痛嘅事、仲要係冇麻醉情況下剪,以前我俾褲鏈夾親已經痛到想死。


「你依家先識乖太遲啦,子女身體髮膚受之父母,依家就等老母我將你塊包皮切除,忍下痛下。」


「唔好唔好啊媽子,我仲純潔、我冇扑野…」


老母冇理到我,慢慢舉起較剪貼近我條波波腸,直至掂到包皮、我感到較剪貼住嘅冰冷,我身體不停掙扎…


「嗱你唔好郁啊,等陣我唔小心剪到你龜頭就唔好。」


佢用手拉高我塊皮然後就用較剪打橫剪、Chok一聲、就一下,佢就將嗰一塊包皮剪下、乾脆利落。


「啊!!!」


剪下來嗰一瞬間,我立即大叫左出黎、叫到喉嚨就黎啞、震耳欲聾,聲音圍繞屋內每一個角落,鮮血亦即時流下滴落地下。


「哇死仔包剪個包皮姐,洗唔洗叫到死老母咁。」


「你頭先仲想呃我,你以為你老母我傻架?睇你包皮咁鬆就知你同條女扑野扑到鬆晒啦,抵剪。」


「阿洋!!你呢個老母禽獸不如啊,放我出去!」


阿盈見我叫我咁痛苦佢都唔忍心,開始用利爪攻擊個罩,可惜未見得有成效。


「算把啦你,我呢個罩好堅固,你唔會打得爛。」


阿盈冇理繼續不停地攻擊。


「啊!!」


而我亦繼續不停地叫,割肉嘅痛楚一直揮之不去,鮮血已經染紅成張凳。


「抵你死啦,乜都同我作對,呢個就係你嘅下場,你依家叫到死都冇人幫到你。」


「哎喲!不過作為老母你流到成張凳都係血我真係有啲痛心,我特登擺定樽鹽係隔離,黎,等我幫你消消毒。」

霸氣文哥 2022-6-15 13:21

第一百一十九章:死裡相救


仆街佢又想再次對我傷口上灑鹽,明明上次先成樽倒晒落我度,佢幾時又整多一樽出黎?


說罷老母就係入面𢳂左一羹鹽灑落我龜頭,再一次痛楚湧上我心頭,我又再大叫左出黎…


「啊!!」


「老…老媽子,唔好,我好痛…」


「乜野唔好,消毒啊!」


然後老母表情突然變得惡毒地再灑多一羹鹽落我龜頭。


「啊!!」


呢一晚我就係咁不斷俾老母折磨,且仲將行動升級令我更痛苦,我就只有不停地大叫乜野都做唔到,我第一次覺得生存真係好痛苦,不如俾我痛痛快快咁死左佢…


正當老母繼續折磨緊我之時,突然我聽到門外有鐵閘聲拉響、木門亦打開左。


「死八婆!你咪撚再傷害阿洋。」


下一刻,有個女仔拎住放係門口枝棍入黎指住老母,原來係樂兒入左黎,老母亦將視線聚焦係佢身上。


「喔,你就係死仔個女朋友下話,你個死妹釘竟然識得主動走黎送死。」


「樂兒你做咩入黎!?你快啲走啊,老媽子佢依家癡晒線,佢會殺左你架。」


說罷老母隨即打左我一巴。


「食屎啦你,我發癲都係你個死鏟搞出黎架咋。」


「死仆街我叫你咪撚打我條仔聽唔聽到啊,你唔配做佢老母,你打佢即係打我,我要同你死過。」


「黎啊,黎打我,就睇你個妹釘有幾多斤兩,本來諗住整死左個死鏟再收拾你,依家咁樣仲好,我連搵你出黎嘅力都慳返,我依家就可以搞掂左你先。」


「樂兒你唔夠佢打架快啲走!我唔想連你都連累埋。」


樂兒並冇理會我勸阻,而係舉起棍嬲爆爆咁向住老母走去,老母亦向住佢行近。


當佢地雙方走到相距一米位置時,樂兒用棍一棍一棍咁揮落佢身上,但老母仿佛毫無感覺咁企定定俾佢打。


「你個死妹釘就係得呢啲力水咋,r痕嘅力都冇喎,原來佢女朋友都係不外如此咁廢。」


樂兒根本唔會打得痛老母,呢刻嘅老母受到詛咒影響係刀槍不入,物理性攻擊根本冇用。


「我廢?你食屎啦你!你一定係未見過老娘發嬲係點嘅樣!」


樂兒聽到老母嘅挑釁後,雙手握緊木棍、一怒之下舉高支棍用盡全力扑落佢個頭頂,木棍應聲斷開、可想個力度有幾大。


打左落去後,老母呆左係度、額頭流下少許鮮血,我地三個都望到目定口呆,老母係咪因為佢呢一下重擊已經打死左…?


正當我地感到有一絲希望時,突然老母好快咁抓住樂兒條頸壓低、大脾舉起向上頂鎚左落佢個肚,呢一下重擊令佢身體微彎地露出左痛苦嘅表情。


「樂兒!!」


我同阿盈見狀都大叫佢一聲,阿盈嬲怒地繼續攻擊個罩。


「傻閪,我扮野架咋,你估我真係咁易俾你冧低?你頭先嗰下係就係有啲力水,不過一切都玩完啦,夠鐘收拾你。」


然後老母繼續抓住佢條頸一拳一拳咁向佢塊臉打去,樂兒呢刻俾佢捏住有啲踹唔過氣來、毫無還擊之力,最後老母一腳伸前將佢踢飛左去前面地下瞓低。


呢個時候樂兒嘴角已經流下鮮血、臉部一片瘀青、雙手按住個肚,佢受左咁多重擊一定好難受,試問一個柔弱嘅身軀又點會承受得住咁多攻擊。


「老媽子求下你停手…你再咁打落去佢真係會死,佢一個柔弱嘅女仔捱唔到你咁多重擊架,你咁樣同恃強凌弱有咩分別!」


老母冇理我一步步走近樂兒面前,再次一手捏住佢條頸、另一隻手將手舉高呈現90度角將手肘對住樂兒個頭頂。


「玩完啦妹釘,你夠鐘上路,唔洗再纏住個衰仔。」


「阿…阿洋,我終於…堅強返一次啦…唔再懦弱,對…對唔住…我最後都救唔到你出黎,永…永別啦,我…愛…你…」


「樂兒!!唔可以…你唔可以死架,老媽子求下你快啲停手!」


見到呢個情況我係咁掙扎喝止老母唔好咁做。


「呀!!停手啊!」


[b]劃![/b]


突然間阿盈猛地叫左一聲就將個罩打爛左,立即上前向老母背脊抓左一下,佢件衫隨即被撕爛左同發出一下痛苦叫聲、動作亦被打亂左,樂兒跌返落黎。


阿盈並冇就咁收手,接著佢操控遠處一罐菠蘿罐頭遠遠地加速撞去老母個頭,佢隨即被罐頭嘅衝力撞左落地下。


而阿盈就襯住呢個空檔時間用爪將綁住我啲繩都𠝹斷。


「阿洋你快啲帶樂兒走,呢度等我對付。」


「咁你點樣?我唔可以掉低你架,你會俾佢消滅…」


「你唔好理我,依家只可以你帶樂兒走先,唔係嘅話我地全部都會死係度,呢度等我黎頂住,你快啲帶佢走。」


「咁…」


「快啲呀,伯母佢就快醒返架啦!」


「咁好啦,阿盈你要小心、唔好有事…」


「嗯,知架啦,快啲走。」


說罷我就走到樂兒身邊準備孭起佢走,但呢個時候老母就暈下暈下咁起返身想過黎阻止。


「你地咪洗旨意走,你地個撚個今日都要死係度。」


「我唔會俾你再抓到佢,想要過去過左我嗰關先。」


就咁樣阿盈擋住係我地前面同廳裡面嘅老母對恃著,形成一個楚河漢界嘅對立面。


「你幾撚好野,連我個封印你都打破左,但你地都唔會走得甩,今日我唔將你地殺晒我唔姓何!」


說罷我就孭住樂兒準備向門外走,阿盈靈力咁強應該頂得住老母嘅。


「你地咪撚走!」

霸氣文哥 2022-6-16 11:56

第一百二十章:逃出生天


老母一下喝止後就開始向前行,阿盈見有動靜隨即展開攻勢、操控周圍嘅野掉向老母,


但老母似乎已經睇穿佢套路,一下又一下咁將飛黎嘅野輕易打走,仿佛兵來將擋,好快就走到樂兒面前同佢近戰…


呢個時候我已經孭住樂兒走出門口,我下體仍然滴著血,加上我背脊受左重傷我係忍住痛孭住佢,但為左樂兒我幾辛苦都要頂住。


「阿洋,你自己都傷左,你咁孭住我唔係辦法,不如去我屋企避一避先啦,我同伯母未見過佢應該唔知我住隔離、應該可以避到陣。」


樂兒用虛弱嘅聲線同我講,可能佢見我背脊流晒血又好痛苦咁,所以為左唔想我孭咁遠就叫我去佢度暫避下先。


「都好,咁就去你度避下先啦。」


說罷我地好快入到樂兒家中,入到去一如既往嘅寧靜、擺設整齊,仿佛去左新地方,


呢個地方令我感到好有安全感,同係我屋企嘅情景形成強烈嘅對比,就好似逃過左一刧。


「樂兒你真係蠢,做咩冇啦啦過黎搵我,你唔出現就唔洗受苦。」


「你就蠢,我唔容易先搵到個真心愛我嘅人,你有咩事點算、以後嘅日子叫我點過?你就忍心就咁掉低我?呢個世界上得一個方伯洋架咋。」


「就係因為你係我愛嘅人,我唔想連累你…俾佢知道你嘅存在佢一定會連你都殺埋。」


「你唔好再講,總之要死一齊死,我想像唔到以後冇左你嘅日子我仲可以點過、係一個我愛嘅人從此係呢個世界上消失喎。」


「傻瓜,呢個世界大把好過我嘅男仔俾你識啦,何必要為左我而死。」


「唔得、總之唔得,我淨係要你一個,你應承我唔好死唔好掉低我,就算係死都俾我同你一齊死。」


「得啦我唔會死。」


「同我勾手指應承我!」


「好啦好啦,怕左你。」


說罷我就同樂兒勾手指尾,十分稚氣。


「但我想同你講聲對唔住…你曬出黎俾我嘅相我冇好好保管…俾老母搵到撕爛晒…」


「唔緊要啦,相我地可以再影,你一日陪住我,我地一日都仲可以影相曬相,況且啲相爛晒你都唔想架嘛。」


「嗯,多謝你冇怪我。」


「話說咁你點知我俾老母抓住左?」


「係咁嘅,今晚我返屋企見你度門冇閂實,跟住聽到你好似俾人折磨緊咁叫得好痛苦,我就知你出左事,所以我咪入去睇下咩事,點知就見到發生咁大件事。」


「你入到去見到佢咁凶殘唔驚架咩?」


「驚架、我驚到心都震晒,但我同自己講要堅強、要大膽啲,為左你我就算俾佢打死都值。」


「傻妹黎,以前我做兵嗰陣就一尾我付出,依家竟然就調轉左身份。」


「就係你呢隻兵咁死心塌地咁愛我,慢慢就做左大將軍,之後嘅日子就係兩個人嘅事、互相扶持,而唔係你一個人嘅事。」


「多謝你肯鐘意我呢隻兵,就算死你都願意黎救我。」


「你係我男朋友你就算點我都會黎救你。」


「究竟你今日發生咩事搞到咁傷?」


說罷我一五一十咁同佢講晒今日所發生嘅痛苦經歷…


「哇原來伯母依家變得咁恐怖咁冷血、佢打到你皮開肉綻仲要剪埋你包皮…佢已經唔係你老母黎。」


「你依家周身傷你唔好亂郁住,我幫你消消毒捽下藥油。」


「唔洗啦,我呢啲傷唔會死住嘅,你都傷晒架,唔好亂郁。」


「我又點會夠你傷,總之我幫你搞搞。」


冇幾耐佢拎左啲醫療用品出黎幫我搞,但正當佢想幫我搞之時突然佢嘔左啲血落我度。


「樂兒!樂兒!你做咩事…?」


我突然俾眼前嘅境況嚇到我手足無措。


「我…我個心口唔知咩事忽然好痛,啊…」


本來仲健在嘅樂兒突然就瞓左係地上奄奄一息,呢一切黎得太突然,我唔敢相信眼前嘅景象…


「樂兒!你唔好嚇我,點解你冇啦啦會暈左?你話幫我療傷嘅?快啲醒呀,唔好瞓,我都未死,你同我咁快死做咩…嗚嗚…」


說罷我就流下了眼淚,我覺得好冇助,報警…冇錯,報多次警call白車!


正當我拎起樂兒手機想報警時,另一邊阿盈突然係隔離幅牆跌左出黎、渾身無力表現十分虛弱、面部同身體皮膚有部分甩落情況。


「阿盈…?你做咩事?點解你好似受左重傷咁?」


「對…對唔住阿洋,我唔係伯母嘅對手…」


「究竟你地頭先發生咩事?以你靈力同佢正面交鋒應該有勝算架?」


「佢反應太快…我點樣向佢出手都可以擋到…」


「第二就如你所講…物理傷害根本…根本對佢冇影響,我拎張摺凳諗住打暈佢,我打落佢個頭,但佢…佢一啲影響都冇。」


「佢個咒應該真係突變左…比以前你姨媽個詛咒…更強…」


「最後佢襯我空檔嗰陣唸你之前驅鬼嘅咒…穢跡金鋼神咒,諗住將我消滅,當佢一唸我就開始渾身無力、亦都好痛苦,感覺啲靈力一直散失。」


「加…加上佢唸咒開左個屏障,我根本唔可能再同佢與之比鬥落去…所以我直接穿牆過樂兒屋企離開現場…」


我真係低估左老母,竟然連阿盈都唔係佢對手,雖然人傷害唔到鬼,但佢用防守以退為進最後襯阿盈有空檔就用咒對付,突變之後嘅咒唔淨止得蠻力、仲識得用腦。


「阿盈你依家受左重傷,等我過啲陽氣俾你!」


「唔好…我依家咁傷捱唔到好耐,加上我受傷期間身體係會有物質回流返公仔度,佢跟住啲物質就可以搵到個公仔,佢依家應該已經搵緊…」

霸氣文哥 2022-6-17 12:13

第一百二十一章:犧牲


「咁點算?唔可以俾佢咁做,我要過去制止佢。」


「唔好咁衝動…你根本唔係佢對手,同埋你走左樂兒點算?」


正當我想起身行動時阿盈將目光注視住樂兒阻止左我。


「咁…咁呢樣唔得嗰樣唔得咁點做好?我唔可以眼白白望住佢消滅你架…!」


「你睇下樂兒,佢一定係…受左內傷所以先昏迷左、呢刻…呢一刻佢傷勢最重佢先係最急需照顧嗰一個、佢捱唔到好耐、佢仲有大把世界唔應該咁早死…」


原來樂兒係受左內傷,難怪佢會痛苦咁暈左。


「你咁講係咩意思?」


「我會將我成個靈魂嘅陽氣俾晒樂兒,咁樣做佢啲傷就會慢慢自癒、佢會同你繼續幸福生活落去…」


我聽到之後睜大雙眼呆左係度,即係要我二揀一…?


「你咁做你咪會永遠消失…?唔得…我唔俾你咁做,你地兩個我都唔想失去?係咪一定淨係得呢個方法?冇其他方法?」


我變得激動,兩個都係我親人,一個係我阿妹、一個係我女朋友,要我揀我真係揀唔落手,點解個天要咁殘忍…


「嗯,就只得呢個方法…」


「哥,就算你唔想我咁做我都一定要咁做…我係一個就黎被消滅嘅鬼魂,還掂都會消失,犧牲自己救返樂兒都值,否則你會兩邊都冇晒…」


「再者,我…我只係一隻鬼,我其實一早就要走去投胎,我已經比好多鬼好,我估唔到我死左仲可以有個阿哥陪住我錫我。」


「有你陪住嘅呢半年多我已經好滿足架啦…多謝你俾左咁多開心同溫暖我,但要走嘅始終要走,可能呢日就係同你最後一次見面嘅一日…」


「嗚嗚阿盈…」


「對唔住…之前我仲亂咁應承你話永遠陪住你,但原來現實係好難做到,以後嘅日子真係要靠你自己、唔可以再依靠我…」


「但我…我真係唔捨得你,我唔想我以後見唔到我個妹,我就算死左都冇得再見到你嗚嗚…」


「死乜野死…哥你睇開啲,我唔係度姐…以後你同樂兒仲有好多路要行、仲有好多美好回憶創造,就當我嘅離別係成全你地兩個嘅幸福…」


「阿妹嗚嗚…」


說罷我喊成一個淚人咁過去攬住阿盈,我唔知仲可以講啲咩,接受唔到嘅事都一定要接受,呢個算唔算goodbye hugs?


「阿哥,呢次係我最後一次叫你阿哥…襯伯母佢仲搵緊個公仔,我靈魂俾左樂兒之後,你一定…一定要快啲帶佢走,佢好快就會搵到黎呢度…」


「嗯嗯知道…你俾左個靈魂佢後,我就當你地兩個共處一身,我一定會盡力保護佢,唔可以再俾佢受傷害嗚嗚…」


說罷阿盈就去到樂兒面前將嘴貼近佢嘴上,然後就見到一啲類似透明狀火焰嘅氣流輸入佢個嘴,


最後見到一粒光茫都一併入埋阿盈嘴裡就結束左呢個過程,相信呢粒光茫就係佢靈魂嘅核心。


「啊!」


但呢個時候阿盈突然抽搐幾下、面容露出痛苦表情、無力地瞓左係地下。


「個公仔…俾人燒緊…不過好彩我已經完全任務,佢…佢太遲啦哈哈…」


個公仔最尾都俾老母搵到左,但佢真係好冇人性,阿盈臨走前都唔俾佢安樂咁走…


「公仔…?對唔住,到呢刻都仲要你痛苦嗚嗚…」


「唔緊要,一切…一切都唔會再有影響,永…永別啦阿洋…」


「阿盈嗚嗚…咁…咁你安心走啦,我呢一世都唔會忘記你!嗚嗚…」


說罷阿盈面露著微笑地係我面前化成無數粒小光茫飄走、慢慢消失緊、變得透明,


一陣之後阿盈就完全消失掉,唔再係我身邊…


我要快啲振作帶樂兒離開呢度,但正當我準備扶起佢時,佢就醒左。


「樂兒你醒啦?」


「阿洋?點…點解我頭先會瞓低左?又點解你會喊成咁?同埋我覺得我依家成個人都好暖。」


樂兒佢雖然醒返,但佢狀態睇落仲有啲虛弱,睇黎佢要時間恢復。


「你受左內傷頭先昏迷左,個傷勢仲要唔輕捱唔到好耐,阿盈佢係嗰邊唔夠打過左黎。」


「然後佢犧牲自己將佢靈魂同所有陽氣俾晒你救返你一命、你嘅傷會慢慢好,而個公仔…個公仔已經俾老母佢燒左,我地…我地以後都唔會再見到阿盈嗚嗚…」


「你講咩話,阿盈佢…阿盈佢犧牲左自己?點解會咁…咁我咪少左個好朋友…?仲要我條命係佢救返,我真係唔知點報答佢…」


聽到阿盈唔再係世上後樂兒頓時感到好愕然。


「冇得報答架啦,佢用左自己嘅犧牲黎成全左我地日後嘅幸福…佢靈魂俾得你,我以後一定要好好保護你。」


「阿盈佢真係好好,我應承你,我以後都會好好保護自己同你一齊行落去,唔可以辜負左阿盈幫我執返嘅呢一命。」


「嗯,阿盈走左,依家我得返你一個親人,我唔可以連你都失去埋。」


「唔講咁多住,我地快啲離開呢度先,老母應該差唔多會黎搵我地,唔可以再俾佢抓到我地。」


「嗯,咁我地速速動身。」


說罷我就扶住樂兒準備動身離開,我地走到門前打開門、打開鐵閘。


喀啦喀啦…


當我地踏出門口嗰一刻,突然一個身影出現將我倆都推倒失平衡跌返入屋內。


「想走?你兩個撚樣想走去邊啊?」


冇錯,佢就係老母,老母再次出現係我地眼前,睇黎我地走慢左一步,依家佢已經將個門口封住左走唔到,恐怕我地今次都凶多吉少…

霸氣文哥 2022-6-18 12:02

第一百二十二章:不屈的援護


「你以為我真係咁蠢俾你地走到?我就係知你地會走我一早已經係門口隔離伏住你地。」


「原來呢度就係你個所謂女朋友屋企,都幾靚啊,可惜佢好快就冇命享。」


老母佢開始慢慢行近我地。


「你點知我地係呢度?」


我驚訝地質問老母。


「你地真係好撚蠢,隻鬼頭先穿牆過左黎隔離就已經出賣左佢行蹤,加上出面有條血跡係黎到呢度,唔洗估你地就係度。」


我真係蠢,逃走嗰陣竟然冇諗到我下體滴血會為老母提供左線索。


「阿盈已經俾你消滅左你仲想點!?」


「喔,原來你一早已經知佢死左,點啊?望住隻閪鬼係你面前消失個種感覺如何?佢根本一早就要死,佢依家先死已經俾遲左佢啦!」


「你知唔知我頭先搵到個公仔燒佢嗰陣見住佢慢慢變成灰嗰下有幾興奮、啲火仲要越燒越大…」


老母不停地講返頭先對阿盈嘅所作所為同心情,而我拳頭亦不經不覺地越握越實…


「你咪撚再講呀!阿盈係我阿妹,佢已經俾你消滅左、我以後都唔會再唔到佢,點解你要咁做啊!嗚嗚…」


說罷我激動地起身向老母揮左一拳,但俾佢接住左,我用另一隻手打,亦都接住左,我兩手都俾佢抓實,


接著佢直接用頭撞向我額頭,佢個頭如同石頭一樣咁硬、撞落黎嘅力度令我再次跌倒在地上。


「你得嗰丁點力水就想同我對抗?老母都夠膽打?」


「阿洋…」


樂兒見狀即刻過黎扶住我。


「你頭先咪問我仲想點嘅?我想你地去死、你地全部都係同我作對嘅人全部都要死!嘻嘻嘻…」


「你呢個衰老母死八婆,走啊、咪撚過黎、同我快啲去死啊!」


眼見老母充滿殺意咁再次慢慢行過黎,樂兒拎起隔離啲野掉佢。


「你個死妹釘,夠膽掉鳩我?頭先我打左你咁多下大力咁都唔死得,我依家就第一個殺死你先。」


說罷老母目光聚焦住樂兒向佢走過黎,我見狀唔理咁多整開樂兒隻手再次起身一野撲去老母度推開佢。


老母稍稍退後左少少,但接下來就迎來一記重拳打左落我個肚,我俾呢拳嘅衝力令我微微彎下了身退後左幾步。


「你咪撚阻住晒,我等陣再慢慢同你玩。」


老母感到冇耐性地說道,佢槍頭已經直指樂兒,但我唔可以俾佢咁做,樂兒條命係阿盈救返,我就算死都唔可以再俾佢受到傷害、我唔可以白費阿盈嘅犧牲!


然後我再撲向老母、全身攬住抓實佢唔俾佢郁,以阻礙老母嘅行動。


「我已經失去左阿盈,我唔可以連樂兒都失去埋,我唔會俾你傷害佢!」


說罷無數個膝頭向上頂去我個肚,佢用膝頭頂力度都唔細、就連黃膽水都嘔埋出黎,但我繼續抓到佢實一實唔放手。


「我叫你走啊仆街,點解你個死鏟乜撚野都要同我作對!?」


老母見用腳頂整唔走我,佢就用力掙開左一隻手,用嗰隻手嘅手肘不停地鎚落我背脊。


「啊…呀…」


老母好毒,佢見我背脊最傷就向著我最脆弱嘅地方攻擊,佢每一下鎚落黎都令我痛不欲生、令我發出陣陣痛苦嘅叫聲。


「阿洋…!快啲行開唔好再俾佢打,再咁落去你會俾佢打死架…」


「唔可以…我一行開佢就會過黎將你殺死,我唔可以俾佢咁做…」


「好啊,你咁想死我就將你殺死先,咁撚鐘意阻住我?」


說罷老母開始感到氣憤地加重力度繼續鎚落我背脊,呢次嘅力度之大唔單止令我感到痛苦,仲令我身軀不斷向下沉、最後雙腳企唔穩就跌左係地下,然而佢只係鎚左5下…


我跌倒在佢腳邊後,我仲未放棄地抓住佢隻腳,接住佢就舉起另一隻腳向我個頭大大力踩落黎,我感到一陣劇烈嘅眩暈同頭痛,


再踩多兩下後我隻手已經不自覺地鬆開左,最後佢就當我波咁將我踢走sir到樂兒身旁。


呢一刻我已經係半死狀態地瞓左係度郁唔到、口中不斷嘔出鮮血、新傷加舊傷令我成身每一個角落都好痛。


「阿洋點解你要咁傻任由俾佢打唔走嗚嗚…」


樂兒見狀即刻將我抱起挨在佢心口,血跡好快將佢件上衣染紅。


「樂…樂兒,睇黎我要先上路啦,我…我捱唔到好耐,對…對唔住,我到最後都…都保護唔到你…」


「我唔俾你死啊,邊個批准你死!就算要死,我地都要一齊死,我唔要你掉低我一個…」


面臨絕境嘅我地就好似生處絕地裡嘅一對苦命鴛鴦、正等候著死亡嘅降臨,而樂兒嘅眼淚早已一滴一滴地滴在我臉孔。


「好壯烈好有愛咁喎你地,睇見就眼冤,死到臨頭仲要扮撚晒野,就等我成全你地將你地一齊殺死。」


說罷老母一步步行到我地面前、伸出雙手準備將我地捏死。


「喂入面嘅人咪郁,你想做乜野?」


突然門口有兩個人手持盾牌咁行左入黎、身穿藍色制服,義正詞嚴地喝停老母…冇錯,佢地係警察,睇黎我地又有返啲希望。


「點解到最後都一定要有人阻鳩住我?」


老母見狀止住左動作。


「我地係警察,我地啱先接報話呢度有人俾人追殺,嗱你唔好亂郁,慢慢擰個身過黎。」


應該就係保安嘅報警呼喚左啲警察過黎。


兩位阿sir揸住盾牌小心翼翼地接近老母,然而我有著一個不祥嘅預感,好似將會有唔好嘅事發生...

霸氣文哥 2022-6-19 20:12

第一百二十三章:血戰


「我擰你老母!」


的確,當佢地行到一米距離時,老母突然一個轉身揮出一拳將一位阿sir個盾牌打穿直接打到佢心口,再一腳將佢踢飛撞到牆上。


另一位阿sir見狀立刻向老母揮出警棍,但老母身心敏捷抓住佢隻手一扭警棍就甩開左,


隨即繼續抓住佢隻手將佢隻手向下拉,膝頭大力向上一頂頂到佢下巴、力度之大令佢向後飛左落地瞓低左。


然後老母再走到啱先被打穿盾牌嗰位警員,佢未反應過黎就俾老母扯住佢頭髮大力咁撞左佢埋牆死左…牆上隨即流有一灘血…


兩個阿sir就咁俾老母好快地解決左、十分快手同殘暴,令我地睇到都感到髮指。


「係最關鍵嘅時候先走班差佬入黎阻鳩住我,真係佛都有火,邊個阻撚住我都要死!呢刻開始我遇神殺神、遇佛殺佛!」


殺完人嘅老母咆哮左一聲講出天不怕地不怕嘅說話,竟然連警察都唔係佢對手,希望瞬間消失。


然而呢個時候走廊傳來密集嘅腳步聲同對講機聲,老母聽到後匿係門後,


不消片刻,有至少6個警察入左黎,佢地係門口見到屋內我受左重傷、隔離瞓低左兩個同袍、地下血跡斑斑,佢地擔心有伏就揸住盾牌小心翼翼咁入黎。


「呢度頭先發生咩事?做咩你地都咁傷?」


警察邊入黎邊質問。


「你地唔好入黎啊,小心…」


當樂兒想提醒佢地之時,有一個警察已經行到道門打開嘅盡頭,


樂兒未講完老母已經上前伸出雙手㩒住佢個頭大力一擰、喀一聲、就咁樣熄左佢機,呢位警員隨即應聲倒地。


其他警察見狀即刻上前推開老母暫時拉開一段距離,有幾個警察負責拉回呢位同袍觀察傷勢、幾個就企係前面拎出槍對住老母,


可能佢地都覺得前面嗰個係極度危險人物,所以唔敢貿貿然行前。


「你做乜野,襲警?你咪撚亂郁,你試下再行前我地就開槍。」


「你班仆街壞我好事,同我作對嘅人唔會有好下場,依家你地唔走就唔會有機會,不過…」


「…就算你地想走都好,我都唔會俾你地有命出到呢個門口,我要將你地全部…殺晒!」


老母邊講邊向警察嗰邊行近,並冇理會警察嘅勸告,幾個警察見狀即刻開槍射向佢啲手手腳腳。


[b]呯…呯呯…[/b]


經過一番射擊,老母除左流少少血就咩事都冇、完全冇露出痛苦嘅神色,佢已經行到距離佢地一米嘅位置。


「冇用架,依家個咒令我刀槍不入,你地就算拎機槍掃射我都唔會有事。」


警察們呢個時候大感詫異、覺得冇可能中左子彈仲行得走得。


正當佢地仲詫異緊之時,老母突然好快咁衝前抓住前面個警員隻手扭曲再用膝頭向上頂,隻手喀一聲發出骨折嘅聲音,佢發出痛苦嘅哀嚎、冇力反抗,


其他警員想上前阻止時,老母接著已經係後褲袋度拎出一把利剪狂插去佢條頸、血液噴到周圍都係。


其後幾個警員用盾牌將佢壓低且不停用警棍將佢痛毆,老母不斷地掙扎抵抗,佢地嘅一輪激戰就此展開,我地亦得到短暫嘅安全…


「阿洋你唔好有事,警察會救我地出去,佢地一定會打贏伯母、我地仲有希望,你要堅持住嗚嗚…」


「樂兒,我…我唔得架啦,呢一刻,你…你唔受傷…就係我最大嘅心願,你一定要有命出…出到呢個門口、活下去…」


「唔係我,係我地!我地一定有命一齊出到呢個門口架,我要你繼續陪住我、教我做功課,黎緊我仲要考DSE,我要你係度支持我呀!」


呢刻嘅我感到好疲倦、好眼瞓,雙眼已經半合狀態,周遭嘅事我都冇能力再去理。


「仲有啊方伯洋,你應承過我聖誕陪我一齊過架,你唔可以食言啊嗚嗚…我要你陪我坐摩天輪、陪我睇燈飾、你仲話會幫我影靚相,過一個浪漫嘅聖誕…」


「仲有…仲有你話年年都同我慶生、以後都會俾幸福我架,求下你唔好死呀嗚嗚…你唔係度嘅日子我真係唔知點過,我愛你、我真係好愛你嗚嗚…」


「對…對唔住,以後日子…我…我陪唔到你啦…」


「衰人,你好自私!以前應承我咁多野、咁落力去追我返黎,偏偏…偏偏呢個時候你話走就走掉低我一個嗚嗚…我唔俾你死啊!你要清醒唔好瞓!」


說罷樂兒搖左我幾下好讓我唔好瞓著。


係,我真係好自私,知道老母個咒觸發左嗰一刻我就唔應該抱有咁大期望可以活得長久、我唔應該向樂兒許下咁多承諾令佢希望越大失望越大,


或者如果以前知道會有呢一日發生根本唔應該同樂兒一齊,以前佢已經受盡折磨,依家仲要因為我嘅即將離去而咁心痛,


講到尾其實我都係一個傷害樂兒嘅人,我呢生人已經傷害過兩個愛過我嘅女仔、我係一個衰人,我唔值得俾人愛,呢一刻嘅離去就當將我嘅罪孽抵消吧…


「黎跟我黎,你地兩個受左傷,我護住你地出去先。」


過左陣之後外面又黎多幾個警察過黎支援,其中一個過左黎救我地出去,之後樂兒同佢左右扶住我走出門口。


而老母就依然同幾個警察搏鬥緊,有幾個已經係隔離受左重傷瞓低左。


「阿洋有人黎救左我地出去啦,唔好再瞓、你一定要撐住!」
 

霸氣文哥 2022-6-20 11:53

第一百二十四章:火攻


樂兒一旁向我鼓勵著,但我並冇任何反應俾到佢。


「你班死鏟咪撚走啊,我一定要殺晒你地,啊!」


老母見我地走出去後十分大反應,更加憤怒地嘶叫左一聲同警察搏鬥,睇黎佢真的憤怒了、佢會用盡全力對付班警察…


好快我地已經出左走廊經過埋我屋企,突然後面傳來一聲巨響。


[b]呯![/b]


我地向後一望,見到有一個警察飛左出門口撞到對面單位鐵閘,身上以及嘴角流著大量鮮血,而爭執聲亦都消失晒、環境變得寧靜,


我地見到呢個情景都大感驚訝,唔通老母佢突破左重圍…?


然後一個身影拎住把滴住血嘅利剪行左出黎,清楚啲睇,佢係全身都佈滿血跡、係警察啲血,呢刻嘅老母仿如一個殺戮機器…


「我講過,你地每一個今日都要死係度,冇人可以有命走得甩!」


說罷老母用利剪指住我地且凶狠地行緊過黎,誓要將我地殺晒,而佢最終目標一定就係我同樂兒。


「你地走先,呢度由我黎頂住,救護應該差唔多到。」


說罷個警察就甩開左我冒住生命危險咁走到後面嘗試擋住老母,但我地都知道佢呢下孤軍作戰將會凶多吉少。


而樂兒就繼續扶住我向前走,但可能係上天安排我今日注定要死係度,我突然企唔穩跌左落地下,樂兒都同我一齊跌低左。


「我…我唔得架啦,你快啲…快啲走先,我唔想…累埋你。」


「你撐住呀!我地已經出左黎,就差少少架咋,你唔可以死!」


我口中只有不斷流出鮮血,並冇再理會到樂兒嘅說話同起身。


「你係唔起身啦嘛?好,要死我都要同你一齊死,總之我唔會掉低你一個。」


「樂兒…唔可以…」


「警告你唔好再行前、放低你手上嘅武器,否則我開槍!」


另一邊廂個警察正係後方拎出槍同老母對恃著,可能佢啱啱到場並唔知道老母唔驚子彈。


「你咪開囉傻閪,啱先班差佬向我開左幾十槍我乜事都冇,你覺得依家靠你一把炮仔會有用咩?」


老母當然冇理到佢警告繼續行前,警察隨即開左一槍。


[b]呯![/b]


但老母並乜事都冇地繼續靠近,中槍時只有膊頭略微向後一郁,警察感到驚奇。


「我覺得你識做嘅應該同我合作抓佢地俾我,你依家咁樣同送死冇分別,雖然到最後你都係要死,但你可以享有最遲死嘅權利。」


「你收聲!」


[b]呯呯呯呯呯…[/b]


然後警察向住老母連開5槍,手、腳、心口全都中槍,但佢依然乜事都冇。


「點解會冇事?佢係咪怪物黎…?」


說罷老母就向著警察衝過去展開攻勢,警察見狀亦都衝過去抵擋住佢同佢展開搏鬥…


搏鬥期間有個火機從警察件衫跌左個火機過黎我地度,我見到火機突然靈機一觸好似諗到啲野…


「樂兒,執起…前面個火機…」


說罷樂兒伸手上前執起左個火機。


「火機?你呢個時候要火機黎做乜野?」


「火…攻。」


「火攻?」


「我記起…以前有人同…同我講過用火燒可…可以徹底消滅任何邪靈野,唔…唔知對個咒有冇用。」


「原來係咁,唔理咁多啦,依家咩方法都要試!」


「咁啱我袋入面有支酒精,我可以含一啖酒精撻著火機再向伯母噴過去,兩樣野混合埋一齊就會形成一個火球燒去佢度。」


估唔到樂兒會諗到呢個方法,我不得不佩服佢,但我心情忽然又忐忑起來。


「但…但佢話晒係老母,我…我唔想咁…殘忍對佢,細細個佢…佢為我做左好多野…好錫我…」


我諗起老母要死,我腦海裡突然諗起好多以前同佢相處嘅回憶、好唔捨得佢。


「洋呀,知你有孝心,但依家唔係你死就我亡,淨低呢個方法可以試。」


「同埋你地以前嘅日子已經過去左架啦,呢一刻係你面前嘅已經唔係你老母而係一個惡魔。」


「但…」


「食屎啦你,不自量力!」


我未講完之際,後面傳來老母嘅大叫,見到老母壓左警察埋牆、警察兩手抓住老母隻手,但似乎唔夠力,


利剪就咁樣插左落佢喉嚨,佢兩眼撐大失了神地望住老母,鮮血一滴一滴滴在地上,警察好快就冇力再掙扎俾佢搞掂左。


「到你地班死鏟啦,終於俾我清理晒班閒雜人等,依家冇人可以阻住我殺死你地。」


老母掹出利剪後,焦點再次落在我倆身上,一步步向我地接近。


「放心啦,總之伯母嘅野我會代你搞掂,唔洗你親自動身、唔會沾污你隻手,就算不孝都係算落我呢個…呢個MK妹身上。」


「樂兒…」


說罷樂兒為防老母見到佢有所動作就趴係我身上背住佢,口中偷偷含左一啖酒精、手上就將火機較到最大火量撻著…


「你地咁鐘意大家攬埋晒一齊下話,我今晚就將你地送晒落黃泉。」


「係時候!」


樂兒聽聲知道十分接近時,佢就好快地擰轉身企起用火機對住老母將酒精精準地噴向佢度,我流下眼淚…


正當老母舉起利剪諗住插落黎之時,一團火球就迎住佢塊臉衝去,佢嘅頭髮、衣服瞬間燒著。


「啊…你個死妹釘做乜野…」


遇到火後嘅老母感到痛苦退後幾步不停用手嘗試打走頭上啲火。


「既然你刀槍不入,我就燒死你個八婆!」
 

霸氣文哥 2022-6-21 13:02

第一百二十五章:走馬燈(上)


然後樂兒並冇就此罷休,佢繼續含酒精對住火機噴去佢身上每一處,直至將支酒精都用晒,呢個時候佢已經燒成一個火人。


「啊…呀…」


燃燒期間,老母發出不同音頻嘅聲音,一時男人聲、一時女人聲、一時高音、一時低音,就好似有百鬼同時係佢身體發出痛苦嘅哀嚎。


「阿仔救我,你仲記唔記得以前細過我幾錫你,帶你去遊樂場玩、帶你去圖書館睇書、仲為左你同你老豆離婚,我對你咁好,你就捨得老母我咁樣燒死咩?」


突然老母變回原聲好溫柔地同我講返以前一齊相處嘅點滴、令我憶述返過往美好嘅回憶同親情。


「老媽子…」


我再次流下眼淚,我的確好惦念我地以前嘅日子。


「你收皮啦死八婆,咁狡猾嘅你,啱先虐待我地咁開心,依家就想利用人地感情想人地救你?你慳啲啦。」


樂兒見狀好似知道佢想打咩主意咁即刻講野截停佢嘅說話。


「加上阿洋俾你打到咁傷,佢想救你都救唔到啦,呢啲都係你自己攞黎架on9,依家輪到我同你講返聲,抵撚死!」


果然風水輪流轉,上一刻佢仲處於優勢想將我地一舉殲滅,下一刻佢就處於劣勢想我救佢。


「阿…阿仔救我,我係你老母,個咒冇左啦。」


「信你先奇,係度扮撚晒從良咁,我睇電視都睇唔少啦。」


「我咪話你個仔俾你打到傷晒幫唔到你囉,你同我講冇用架喎,我同你又冇血緣關係,唔會有人幫到你,慳返啖氣落到去再講啦。」


「啊…你班死鏟好野,你地會有報應架!」


老母見扮野冇用就痛苦嘶叫一聲變回真面目。


「你就有報應,你隻惡魔,祝你永不超生。」


「嘻嘻嘻嘻…不過睇黎報應已經黎左,我要殺嘅人都殺到左,個短命種俾我打到咁傷,佢好快就會死,你都係要親眼睇住佢係你面前慢慢死去…」


老母佢有佢講冇理樂兒講乜,然後樂兒聽到後一個發火有理冇理地向老母著住火嘅身軀伸左一腳,佢隨即瞓左係地下唔識起返身,應該都燒得七七八八。


「只可惜…只可惜我冇得親眼睇住你見到佢死…嘅反應…」


說罷老母就靜止左冇再講野、但火種仍然在燃燒著,睇黎老母已經死左、詛咒亦都徹底被消滅,我嘅火攻的確有效。


而我亦都係時候離開呢個世界,呢下我終於可以安心上路,我真係好眼瞓、我頂唔順了,樂兒…早抖啦…


「阿洋!阿洋,你唔好瞓呀,救護黎到啦,你要撐住…」


說罷我就合埋左對眼,就只有依稀地聽到樂兒最後焦急地同我講嘅說話,然後就冇左意識…
.
.
.
…過左唔知幾耐,我黎到一個全部白茫茫嘅地方、唔係鬼門關,可能我傷勢太重直接死亡已經唔需要彌留係生同死之間,咁我係咪已經上左天堂?


突然周圍空間都變成一段影像、係我過往嘅回憶,我就仿如一個第三者望住過往我往所做過嘅野。


[i][b]「我要你地每一個人都感受下我經歷過嘅苦痛。」[/b][/i]


[i][b]「求下你...求下你唔好殺我,我會成日上香同燒衣紙俾你架,你想要乜野都得,只要唔好殺我就得。[/b][/i]」


[i][b]「阿盈...?」[/b][/i]


呢度係我同阿盈係地牢第一次再相遇嘅地方,嗰陣佢差啲捏死我,好彩我及時認得出佢,自此佢當左我係恩人。


[i][b]「假架!你唔洗係度𠱁我啦,你根本就冇鐘意過我。」[/b][/i]


[i][b]「阿盈…」[/b][/i]


[i][b]「你唔好理我,我淨係想靜下!」[/b][/i]


場景轉換,黎到我第一次hurt阿盈嘅時候,係我一直俾假希望佢冇同佢講清楚搞到佢鐘意左我、然後佢就消失左一段時間,我對唔住佢,


如果俾我經歷多次我一定會早啲同佢講清楚…


[i][b]「佢係我嘅人,你唔可以傷害佢!有咩事我黎幫佢頂,而唔洗致佢於死地。」[/b][/i]


[i][b]「呢個係我同佢之間嘅事,唔到你理,係佢呢啲賤男人唔尊重我在先,我要殺晒呢啲賤男人。」[/b][/i]


[i][b]「況且你已經死左,你仲有乜野可以幫佢頂,咪嘥氣。」[/b][/i]


[i][b]「總之唔得,我唔會俾你傷害佢。」[/b][/i]


然後過左一排佢終於出返黎,不過係因為我惹左禍要佢出黎幫我,我好感動我係瀕死之際佢仲會出黎幫我,但我前排先hurt完佢佢一出黎就要面對大場面,我都有啲過意唔去。


[i][b]「阿洋,我油盡燈枯架啦,以後一定要好好保重,盡快忘記我好好過生活,我地來世再見啦…」[/b][/i]


[i][b]「唔可以啊,唔好離開我!!」[/b][/i]


[i][b]「阿洋唔好…」[/b][/i]


然而佢為左救我差啲搞到連自己都灰飛煙滅,最後我同佢kiss救返佢、嗰陣係我第一次掂阿盈嘴仔,錫完嗰刻我都有少尷尬、覺得唔可以咁做,但都因為呢件事我地終於正式成為兄妹。


[i][b]「呢條裙幾靚喎,你可以試下,睇起身應該會幾清純。」[/b][/i]


[i][b]「佢隔離嗰件衫都好靚,我覺得應該會幾襯。」[/b][/i]


呢個係我第一次同佢出街試衫,佢換左套衫之後原來都可以好靚女,見佢著到靚一靚咁開心我都好開心,


我仲為佢影晒成間舖啲衫俾佢日日都有新衫換,如果我仲可以同佢一齊去試衫就好…


[i][b]「屌你細支野就唔好學人show出黎啦,睇下我嗰條啦,大你幾撚多倍,你睇清楚啦!」[/b][/i]





[i][b]「我嚴厲咁對佢作最後一次死亡警告。」[/b][/i]





[i][b]「阿洋頂住呀,你出左呢個門口佢地就唔會追黎!」[/b][/i]





[i][b]「仆你個街打到佢咁傷、踢得佢咁開心?好過癮?你知唔知佢對我黎講有幾重要?」[/b][/i]


之後我同佢都經歷左好多野,佢會貼心地保護住我同幫我報復、我覺得好warm,


包括捉弄屌我嘅mk仔、教訓無理取鬧嘅經理、同我深入軍營救樂兒、幫我教訓將我打到瀕死且當樂兒係生財工具嘅垃圾前男友。


睇返以前啲回憶,阿盈佢真係幫左我好多,多謝佢、多謝佢不厭其煩咁一直幫我,反而我就好冇用,乜野都要靠佢幫我…

霸氣文哥 2022-6-22 13:12

第一百二十六章:走馬燈(下)


[i][b]「阿哥,呢次係我最後一次叫你阿哥…襯伯母佢仲搵緊個公仔,我靈魂俾左樂兒之後,你一定…一定要快啲帶佢走,佢好快就會搵到黎呢度…」[/b][/i]


黎到阿盈為我犧牲前嘅一刻,我要睇多次阿盈係我面前消失…我唔想睇…呢次係我同佢見嘅最後一面,我以後都唔會再見到佢…


[i][b]「死乜野死…哥你睇開啲,我唔係度姐…以後你同樂兒仲有好多路要行、仲有好多美好回憶創造,就當我嘅離別係成全你地兩個嘅幸福…」[/b][/i]


阿盈我對你唔住,我冇好好珍惜你為我地嘅犧牲,最後我都冇聽你講,我唔能夠如你所講同樂兒創造美好回憶、同佢幸福咁行落去,我要先走一步…


但我總算做到左我向你答應嘅野,好好保護樂兒、唔再俾佢受到傷害、我做到左,佢冇再受傷過,亦都成功拖延時間有人黎救我地、最後用火攻將個咒消滅左,


我一直以黎都要靠你幫我,今次我終於可以靠自己黎保護左一個我身邊重要嘅人、我總算有啲用,都算係不枉此生。


[i][b]「喂阿生就係你啦下話,你間屋做乜撚野啊,成撚晚係度嘈閪住晒係度喊喊喊喊乜撚啊,嘈到我幾晚都瞓唔撚到教…」[/b][/i]





[i][b]「好高興認識你(揮手表情) 我叫Chole 你可以叫我樂兒」[/b][/i]


播完阿盈嘅回憶,就開始回帶返我同樂兒嘅回憶,我地最初只係陌生人,因為過黎屌我而認識大家,佢係我見過最巴渣嘅mk妹。


可能係因為緣份安排,之後我竟然係交友app再次遇到佢,從此我地慢慢從冤家路窄嘅陌生人成為朋友。





[i][b]「笑死屌你唔好淨係掛住你碌鳩啦,peanut啊,即係花生。」[/b][/i]





[i][b]「我黃你老味,叫你講就講啦咁多嗲,叫得你黎幫我睇書黎托呀,明明你仲要吹到中史好撚勁咁。」[/b][/i]





[i][b]「又m乜撚k妹啊,講過幾多次我有名你叫。」[/b][/i]


之後佢叫我去佢屋企教佢做功課,佢郁啲就會打我,唔知係咪打者愛也,我竟然鐘意左佢打我,仲想多啲同佢見面,


其實嗰陣我已經對呢個傻妹有意思、俾佢吸引住,可惜我就一直唔認自己係對佢有野,因為我自己都估唔到會鐘意mk妹。





[b][i]「識野喎,係厚多士,你條撚樣又知我鐘意食嘅?你查過我呀?」[/i][/b]





[i][b]「你吹到自己咁專業咁就得晒,我生物野可以放心交託晒俾你。」[/b][/i]


然後我默默為佢付出,佢叫我做咩我都肯幫佢做,就算花費幾多錢、幾攰都會幫佢完成,只要佢開心佢滿足就得,簡單啲講樂兒就係我動力。





[i][b]「笑下啦,唔好好似死老母咁。」[/b][/i]


我地仲一齊去迪迪尼,呢幕係我地係城堡前嘅合照,佢嗰陣冇啦啦撓住我隻手嗰下我個心仔真係跳得好快、仲同我挨得好埋,我未試過同佢咁親蜜,


到之後坐過山車佢都會撓住我隻手、全程我心仔都跳得好快,我慢慢就感受到幸福嘅味道、我好享受,經過嗰日我就確信自己係鐘意左樂兒。





[i][b]「Chole姐,襯佢地跌低晒我地快啲跑返屋企。」[/b][/i]





[i][b]「我地終於出左黎,皇軍唔會再追黎架啦,你落返黎我慢慢扶你返去啦。」[/b][/i]


[i][b]「今晚真係多謝晒你,好彩有你呢個朋友係度,我好驚…我真係好驚…」[/b][/i]


我地除左去玩仲一齊經歷過患難,有一次知佢出左事,我同阿盈都即刻仆去軍營救佢、我地俾無數個皇軍追殺、最後我孭住樂兒好唔容易先走到出去,諗返起個畫面就好似英雄救美,


呢一次之後我就知道自己有幾著緊佢,佢有咩事就算幾夜都無阻我去救佢;呢一次之後我仲見到佢膽小嘅一面,知道佢原來係俾fd拋棄、得佢一個佢好無助、好驚。





[i][b]「點解要對我咁特別?你變態架?」[/b][/i]


[i][b]「我唔係變態,係因為…因為我鍾意你!」[/b][/i]


然後正當佢軟弱之時問我點解對佢咁特別,我終於忍唔住向佢表白左,嗰陣我好似如釋重負咁將內心嘅說話都講晒俾佢聽。


但佢並冇接受我,而係將我趕走,原來佢一直當我係兵,知道事實之後我個心痛到好似俾人切開左,冇諗過平時成日點我做野都只係利用我,


但佢主要目的都係想趕我走覺得自己配唔起我,亦都自嗰日之後我地變得陌生,佢冇左以前嘅巴渣。





[i][b]「浩正停手呀!唔好再打,會死人架…嗚嗚。」[/b][/i]


後來我終於知道佢一直向我收埋嘅秘物,一切唔好嘅野都係個垃圾男朋友造成,佢竟然迫樂兒同其他男人搞野俾錢自己賺、又係咁打佢,


我睇唔過眼就出手打鳩佢,可惜我反而俾佢㩒返住黎打打到半死,而個傻妹就擔心左好耐,最後都係要搵阿盈出馬先執返一命,經過呢件事佢先知原來真正鐘意嗰個係我,正因為咁好快我地就正式一齊左。





[i][b]「多謝你咁愛我,同你一齊之後我每一日都覺得好幸福、我先真正感受到俾人愛俾人寵係咩感覺。」[/b][/i]


自從一齊之後,我地都去左好多地方拍拖、過住幸福嘅日子,連佢生日我都可以陪住佢過,有呢啲幸福日子我地係經歷左好多野得黎、係來之不易。

凡間巨額隊長 2022-6-23 08:29

亦令我間接得悉一切背後嘅真相。。。

樓上老師姐 2022-6-23 10:55

「我唔係變態,係因為…因為我鍾意你!」

霸氣文哥 2022-6-23 12:31

第一百二十七章:拜祭





[i][b]「阿洋…!快啲行開唔好再俾佢打,再咁落去你會俾佢打死架…[/b][/i]」





[i][b]「阿洋!阿洋,你唔好瞓呀,救護黎到啦,你要撐住…」[/b][/i]


可惜好景不常,點都冇諗過嗰次慶生將會係最後一日幸福嘅日子,自老母個咒被觸發後,我地就注定要遭遇厄運,可能呢啲都係我嘅命運…


多謝你肯愛上我;多謝你對我嘅著緊,就算生死關頭你都仲對我不離不棄,就算老母幾得人驚你都敢黎救我,你勇敢左好多、一啲都唔懦弱。


但我都唔輸蝕,就算我俾老母打死都唔會俾佢傷害你,我同你一樣為嘅都係保護對方,當然我嘅代價就係死,我做到左、我用我嘅死拯救左你…


對唔住樂兒,最後我都掉低左你一個人,我唔可以再同你過幸福嘅日子、長廂廝守,我唔可以再寵你、唔可以再同你過聖誕、慶生,總之應承過同你一齊做嘅野都唔可以再實現。


如果我地可以早啲認識就好,至少我地可以陪耐啲大家、唔洗咁快分離,好想再多啲時間去愛你,我真係…真係好掛住你…


但我咁樣會好自私,因為到頭來我都會死,相處越耐到分離嗰刻反而痛得越耐,我快啲消失你可能就會易啲沖淡。


點講都好,我能夠保到你條命我已經好滿足,阿盈走左至少你仲係度,


希望你以後日子好好活下去,唔好真係同我一齊死、唔好諗唔開做傻事,你仲有大把青春,唔應該為左我犧牲自己,否則我一定會死不瞑目。





接下來背景一轉轉到我死後嘅狀況,我見到我被送到殮房,我就知道我的確已經死左,


一旁嘅樂兒不停地喊、聲嘶力竭,我見到樂兒為我喊得咁悽涼我都好心痛,但我咩都做唔到,如果可以我真係好想上前深深咁攬住佢。


「嗚嗚你個衰人點解要掉低我,方伯洋你同我醒呀,你應承過會俾幸福我架,你依家咁算點嗚嗚…」


樂兒邊喊邊搖晃我嗰具已經變得僵硬嘅身軀,然而就算佢搖得幾大力都唔再有任何反應、就只有一副毫無氣息嘅屍體係度一睡不起。


場景再次一轉,轉到一個類似教堂嘅地方,周圍坐著好多我認識嘅人,


樂兒、表姐、表姐夫、唐生同佢老婆、仲有阿誠同一班以前同我有過少少交情嘅中學同學同老師都係度,佢地每一個都面無喜色、露出憂傷嘅神情,


而前面就擺放著一副棺材係輸送帶上、以緩慢速度正運往前面嘅一個窿、窿入面燃燒著熊熊烈火,


冇估錯呢度就係火葬場,佢地都係度出席我嘅葬禮,我呢刻先知原來我呢一生人都同唔少人有過交情、到死左之後佢地仲記得我,我係佢地心目中都算有個地位。


過左一陣棺材就完全進入個窿裡,隔離道門亦隨之關上,仿如為我嘅人生正式劃上一個句號。





葬禮完畢後場景又再次轉換,今次我黎到樂兒屋企、佢拎住3枝香正係度向住神枱拜祭,神枱上放有我幅黑白車頭相,同擺上我生前鐘意食嘅野、當中包括炸雞髀。


而我呢個所謂嘅場景其實係現實黎,我可以觸摸到物品、亦可以穿透物品,即係話呢刻開始我就正式成為一隻鬼、成為阿盈呢個角色,一切唔再係一個場景。


「阿洋,你話走就走,你知唔知你要做爸爸啦,你繼續留係度咪幾好,點解要佢一出世就冇左爸爸…」


爸爸?咩爸爸?


「冇左你係度嘅日子我真係好灰,我每日都沉浸係我地嘅回憶當中,我好唔慣你唔係我身邊,我淨係識日日係度喊…」


「本來我前幾日想尋死架啦,但又見呢排好遲都冇黎M,我覺得唔對路買左枝驗孕棒驗左驗,點知我就發現我有左,即係我唔可以陪你一齊死、我會害埋肚入面嗰個。」


「我估應該係我生日嗰日你搞大左個肚,好彩伯母踢我嗰日個胎仲未成形、可能連床都未著,所以我成功保住左我地嘅骨肉,但就保唔住你…」


估唔到嗰晚搞一搞會搞出左‘人命’?對唔住,我以為我一個走左會無牽無掛、你會盡快忘記我,點知我就俾左個單親家庭你、要個仔一出世就冇爸爸…


你上一代已經單親,到你依家呢代都要單親,我真係好對唔住你…希望你會搵到一個真心愛你且唔介意你有左嘅男人取代我。


不過依家咁都好嘅,我間接地救左你,因為有左所以令你冇去尋死,之後你都會以個胎為大局唔敢再諗住死,你會係一個好媽媽。


「曾經你答應過聖誕會陪住我,今日就係聖誕啦,估唔到真係到左呢日唔係你個人陪住我,而係得幅相陪住我。」


「方伯洋,我真係好掛住你呀…我呢一刻真係好想你係身邊陪住我,點解你要拋低我一個孤伶伶咁係度、我唔捨得你,我想你呢日親耳聽到我呢個好消息…」


突然樂兒變得激動流下眼淚。


「我真係好掛住你…你唔係話人死後可以變靈魂架咩,你可唔可以好似阿盈咁出黎陪住我,我真係好想見到你,點解你唔可以咁做…」

霸氣文哥 2022-6-24 11:32

第一百二十八章:夢中相見


樂兒我都好掛住你…但我唔可以俾你見到,咁樣你會更加唔捨得我,萬一有日我好似阿盈咁有咩事,到時你就會心痛多一次,


你日後你有你生活,我唔想你未來日子都受我影響、你要盡快淡忘我,我相信只要我一路唔現身,時間係可以幫你沖淡。


再者你唔知死後要現身嘅原則,我要現身必須要有足夠嘅陽氣、我要同你相處一段日子先得,


而我同你相處你陽氣都會慢慢俾我吸走,你依家有身己在身可能會有影響,我更加唔可以陪住你一段長嘅時間,


而我冇好似阿盈以前咁唔記得你,可能都因為你一直叫住我個名,令我瞬間就喚醒左段記憶。


雖然話就話我唔想影響你,但我…我都好唔捨得你,依家仲可以見返你我真係唔捨得咁快離開,依家我唔可以現身已經好難受、已經感到忍痛割愛,就好似默默地係你身邊守護住,這麼近、那麼遠…


日子好快過左一日,佢琴日到今日仍然一絲笑容都冇,就算係睇電視佢都苦口苦面,亦冇出過街,


佢大部分時間都係喊住對住我幅相‘傾計’,好想我現身見佢,佢話佢知我係度,一直凝住阿盈可以咁做我都一定可以咁做,


我見到樂兒日日夜夜都思念住我,我內心都好難受,好想好似以前咁攬住佢、錫佢、見住佢同我相處開心嘅樣子。


我依家嘅身份雖然同阿盈一樣都係鬼,不過我同佢唔同,佢以前為報復留低,而我就係為牽掛留低,


我地大家同樣都係留係屋內,可惜我唔可以好似佢以前陪住我咁幸福,我唔可以留低太耐、點唔捨得我都要盡快走,


因為我會影響佢個胎,且會令佢繼續記掛住我,我唔可以咁自私,對唔住樂兒,求你原諒我嘅狠心,你要有你嘅新生活…
.
.
.
「阿洋我好掛住你,點解你唔可以出黎見我、一面都好,唔通你唔愛我啦咩?」


又過左一日,呢晚樂兒一如既往黎到幅相面前同我哭訴。


「冇左你之後嘅每一日我都好辛苦,日日都喊住過日子,點解你見我咁難受你都唔可以出黎見下我,你就忍心見到我咁咩?我好想見到你鳴鳴…」


「如果當初有得揀,我寧願揀我去死都唔想你死,如果阿盈當初將個靈魂俾你唔係俾我應該就傷不足致死,咁我就唔洗掛得咁辛苦,依家得返我一個係度你叫我點樣行落去…」


阿盈當初佢救得啱架,好彩佢選擇左你,如果當初唔係救左你,就唔會有你嘅火攻,到最後我都會死、只會賠了夫人又折兵,


所以你生存落去係值得,你仲有大把青春,你嘅新生活一定會比依家更好。


「既然你唔肯出黎見我,我就搵人試下開陰陽眼,咁樣我就可以見到你,我就唔洗再咁牽掛…」


「…係,冇錯,只要我開左陰陽眼就乜野問題都解決晒,點解我之前就諗唔到呢個方法。」


樂兒諗到開眼後可以見到我漸漸面露少許笑容,仿佛充滿了希望。


但你唔可以咁做,你開左眼嘅話陽氣會散失得好快、一定會好影響個胎同自身,你唔可以為左我整冧自己個身體。


唔得,我一定要做啲野阻止佢唔俾佢開眼,睇黎我要盡快投胎…


呢一晚我等樂兒瞓著後,我嘗試進入佢個夢,冇錯我要以一個報夢方式勸阻佢唔好開眼,


入到夢後我黎到一個白茫茫嘅空間,我試下好似阿盈以前咁創建一個空間,原來我只要合埋眼想像想要嘅環境就會變出黎…


佈景好快俾我搭建左出黎,我係白茫茫嘅空間整左一張梳發同一部電視,之後我就坐係梳發上等待樂兒出現。


我覺得白茫茫嘅環境適合我地依家呢個狀態見面,而我亦都覺得兩個人能夠坐係張梳發上靜靜地睇電視係一個十分溫馨嘅畫面,就等我用我地最後嘅溫馨作為告別。


「阿洋?係咪你?」


好快我聽到樂兒從後叫我,睇黎佢終於入左黎。


「樂兒?黎黎黎我地過黎睇電視。」


我扮到好開心唔記得過往嘅野咁叫樂兒過黎睇電視,而我呢次亦係我死後第一次同樂兒對話,有一種久違嘅感覺。


「阿洋…真係你,我好掛住你…」


說罷樂兒即刻喊左出黎衝過黎坐住攬住我。


「啊你攬得咁大力我會窒息架。」


「我好唔容易先見到你,我要攬實你唔俾你走、我以後都要癡實你!」


「我就知道你可以好似阿盈咁出黎,但點解你個衰人之前一直都唔出黎見我,你知唔知我掛你掛得好辛苦。」


呢刻樂兒變到好似個小朋友,抓實左嗰樣野就唔會放手,而我亦都攬住佢邊摸頭邊講。


「傻豬黎,人終須一死,我唔出黎係因為我想你快啲忘記我開始新生活,你依家有左,我唔可以好似阿盈咁陪住你,我已經係一隻鬼、我會影響你個胎,我呢個已死之人唔值得你仲對我念念不忘。」


「更何況我依家靈力未強到足以現身,我更加唔能夠出黎。」


「哦…衰人原來你真係一直都係度聽到晒我同你講嘅野。」


「唔制呀!我唔會忘記你,我寧願個B冇左都唔想見唔到你,我愛你,我要你一直都陪住我。」


「你傻左呀緊係唔得啦,佢係我地嘅愛情結晶品黎,佢係你肚入面係活生生嘅生命黎架,點可以為左見我犧牲一條生命。」


我堅決地反對樂兒呢個想法。


「但我真係唔可以冇左你…呢段時間冇左你係度我真係好唔慣,我成日都會回憶起我地以前嘅日子,我好掛住你…」


但顯然樂兒對我嘅不捨始終都係大於個B。


「我都好掛住你、唔捨得你,我肯不得出黎攬住你,但為左你同個B嘅未來,我唔可以咁自私。」


「我呢幾日見到你咁傷心我都好難受,如果當初我一早知道自己係一個短命種就唔應該咁衝動同你一齊搞到你咁心痛。」


「唔係…唔係架,有你我先有咁幸福嘅日子,我地一齊呢5個月我真係好開心、好有安全感,我從來都冇諗過我會遇到個咁錫我嘅人,我冇後悔過識左你。」


「如果當初知道會有今日,我一定會珍惜同你一齊嘅日子、我一定唔會再當你係兵又對你咁衰…」


「我愛你…就算你死左我都係咁愛你。」

霸氣文哥 2022-6-25 12:51

最終章:下一世我們再相見吧!


我聽到後亦慢慢忍唔住流下眼淚。


「樂兒,我都好愛你…但你唔好再講啦,再講我真係會唔捨得走…」


「走咩?你想走去邊?咁你咪唔好走,邊個批准你走…」


「唔得架…我繼續留係度只會影響得你更深,我今晚就會去投胎、我唔再係一隻鬼。」


「投胎?投左胎你會去邊度…」


「投左胎我就會去到下一世嘅我,重新以一個新嘅靈魂開始我嘅人生,呢啲就係輪迴轉世。」


「唔得呀,我唔可以俾你走,我唔想再得返自己一個…」


「點會得你自己一個,你仲有朋友、仲有個b,佢大過一定會好似我咁對你咁好咁錫你。」


「總之呢,我走左之後你一定要好好保重生存落去,你唔好再諗住做傻事,你要笑多啲快啲淡忘我開始你嘅新生活。」


「仲有啊,你唔好再諗住開陰陽眼,你陽氣會散失得好快好影響個胎,加上我走左你就算開眼都唔會再見到我。」


「嗚嗚…」


樂兒聽到我呢番道別都唔知仲可以講啲咩,只有不停地滴下眼淚。


「好啦我夠鐘要走啦,乖乖下,我個樂兒豬係個開心果黎嘛唔好做喊包,你依家喊到眼腫面腫咁冇人要架啦。」


我邊講邊望住佢搣住佢塊臉兩邊啲肉,佢喊到眼都腫晒,


而隔離就已經多左道門出黎,只要我一入去我就正式投胎。


「你唔好走,我要攬實唔俾你走!我邊個都唔要,我淨係要你一個。」


說罷樂兒就向住我錫左埋黎,就當呢個係goodbye kiss吧!


樂兒嘴唇貼住我時好是柔軟、我地彼此喘息著溫暖嘅氣息,我已經好耐冇咁樣同樂兒錫過、係一種久違嘅感覺,


而佢隨之不停流下眼淚,我臉頰亦不知不覺地被佢沾濕,仿佛想用kiss留低我…


打左陣茄輪後,佢的確仍然抓住唔俾我走,然後我就將自己身體變成虛擬化,樂兒即刻變成攬空氣,


而我亦都企左起身正慢慢走向道門,我靠近道門後佢自動打開左門正等待我入行入去,裡面同樣係白色一片。


「阿洋你唔好走呀,我要走我要跟埋你一齊走!」


說罷樂兒亦都起身想跟埋我入去。


「你係人你入唔到黎架,裡面只係接受鬼魂。」


佢追左上黎想抓住我,但佢根本乜野都掂唔到、掂到嘅只有一堆空氣。


慢慢地我就進入左門裡面嘅空間,當樂兒都想跟埋入黎時,佢即時被彈走、就好似門口都多左一層保護罩。


「唔好走呀嗚嗚…方伯洋,我呢一世都唔會忘記你,我愛你…」


跌倒在地上嘅樂兒好無助地繼續邊喊邊叫我唔好走,然而隨著佢嘅哭泣聲門亦開始關上。


「唔好喊啦樂兒,你要快啲振作過新生活、我都唔會忘記你,我愛你…!」


說罷門就正式關上,我再都聽唔到樂兒把聲、見唔到樂兒嘅身影,我呢一生所經歷嘅一切就隨著呢道門關上而結束了…


當門關上後,呢度嘅環境開始由白茫茫一片變得陰暗、直至變到漆黑一片我咩都見唔到,然後我不自覺地合埋眼意識就慢慢地失去了…
.
.
.
.
好靜…


好靜…


[b]嘟…嘟…嘟…[/b]


唔知過左幾耐後,我由寧靜中聽到類似醫院心跳機嘅聲有頻率地不停響著、而周圍亦開始有光線映入我眼簾,我慢慢打開雙眼,


發現前面有一張病床、上面瞓著一個老婆婆,佢白髮蒼蒼、臉上好多皺紋同唔少嘅老人斑,老婆婆被好多不同嘅喉管插入皮膚,隔離亦擺著好多儀器仿佛正幫佢吊命,


而我只係一個小朋友,身邊有幾個大人陪伴住我,但佢地神情顯然係顯得憂傷、有啲甚至係喊緊…


「賢仔,過黎俾太嫲望下你…」


我聽到太嫲叫我後行到佢身邊、佢把聲我聽得出係好虛弱,而其他大人仍然係一旁憂傷緊。


「太嫲。」


「賢仔乖,太嫲黎緊就要去一個好遠嘅地方去陪太爺,你一定要聽爸爸媽媽話、唔好咁百厭。」


「大過之後一定要勇敢啲保護你身邊嘅人、好好珍惜好好愛佢地,唔好好似太嫲後生咁利用人感情,會有報應。」


「嗯,知道啦太嫲。」


「但你話去搵太爺,我一直都未見過佢,佢係點嘅樣架?可唔可以帶埋我去搵佢?」


「嗰度唔俾小朋友去架,淨係俾太嫲我去。」


「咁你幾時會返返黎?我要太嫲你繼續陪我去公園玩~」


「太嫲唔會返黎架啦,我會以後都係嗰度陪住太爺,所以先叫你一定要聽爸爸媽媽話。」


「唔制呀太嫲,你一定要返黎,你帶埋太爺返黎啦…」


說罷我開始忍唔住喊左出黎。


「賢仔乖乖,你唔係話想睇下太爺咩樣嘅?見你咁好奇我就俾你睇下。」


說罷太嫲就從衫袋中掏出了一張殘舊嘅相,係一張係遊樂場影嘅相、後面有一坐城堡,有一男一女,女嘅正撓著男嘅嗰隻手。


「嗱,呢幅就係太嫲同太爺以前係迪士尼影嘅相,左邊嘅係我、右邊嗰個就係太爺,太嫲我以前真係好鐘意你太爺架,可惜我好耐先正式同佢一齊。」


哇原來太嫲以前後生咁靚,而太爺個樣亦都唔差、係一個大哥哥嘅樣,只係佢個樣好似好怕醜咁。


「咁太爺佢叫咩名?」


我好奇之下想知埋太爺個名,由細到大太嫲都好少向我提及太爺嘅野。


「佢個名叫做方伯洋。」


當太嫲提及呢個名後,我身體突然震抖左一下以及fing 左下個頭,我記返起晒以前嘅回憶…


 
頁: 1 2 3 4 [5] 6
查看完整版本: [靈異] [愛情] [毒L敦倫外傳]我屋企養左隻女鬼…