霸氣文哥 2022-2-17 19:07
[size=3]我個名叫做方伯洋，個名係咪好難聽，18歲嫁啦，今年先考完個DSE準備升上HD做個IVE仔，我係一個毫不起眼嘅邊緣人。原來呢6年話咁快過去，6年前我12歲，見證住表姐嘅離去，同年亦見證住另一個表姐結婚，6年前發生嗰件事，我老母一直都歷歷在目成日記住，我係邊個? 冇錯，我同我兩個表姐張倩彤、張倩欣係同一個平行時空，我係佢地表弟，年紀都相差接近10年。本來覺得件事過左去生活就會變得平庸，殊不知係機緣巧合之下俾我認識左一個「人」，亦令我間接得悉一切背後嘅真相。。。[/size]
[size=3](故事係《毒L溝女記 遇上補習老師》同《我同條女敦倫的日子》嘅外傳，未睇過嘅可以睇返小弟前兩部，如無意外將會係小弟嘅最終作，會每日更新一次，鍾意的話大家可以俾個LIKE[/size]:)[size=3])[/size]
[size=3](另外仲會同紙言同日更新，希望大家多多支持！)[/size]
[[i] 本帖最後由 霸氣文哥 於 2022-3-23 01:49 AM 編輯 [/i]]
霸氣文哥 2022-2-17 19:09
第一章：搬屋
我個名叫做方伯洋，個名係咪好難聽，18歲嫁啦，今年先考完個DSE準備升上HD做個IVE仔，我係一個毫不起眼嘅邊緣人。原來呢6年話咁快過去，6年前我12歲，見證住表姐嘅離去，亦係上年見證住另一個表姐結婚，6年前發生嗰件事，我媽一直都歷歷在目成日記住，我係邊個? 冇錯，我同我兩個表姐張倩彤、張倩欣係同一個平行時空，我係佢地表弟，年紀都相差接近10年。
至於表姐個前男友唐富豪，我聽聞佢依家做左經理、係惠康經理，收入都算穩定、過住幸福生活。
表姐死嗰年佢好悲傷，聽講佢同表姐經歷左好多野，但詳細我唔知咁多，只知佢之後都好搏命搵錢。
而大表姐張倩彤因為我地由細到大幾乎都冇接觸過咁濟，更加唔好講會有聯絡，淨係係葬禮、婚禮以及好細個嗰陣見過佢，所以其實我同我啲表姐係好陌生…
6年啦，呢6年我同老母都住係同一間屋，但呢間屋我地已經住左十年都有，呢十年租金都交唔少，冇錯我地係租屋，只係住劏房，
地方細細、夏天熱死辣辣冬天就凍到要命，仲要乜配套都冇，點解咁辛苦都仲要屈住係度? 為嘅就係排公屋「上車」，最衰老豆一早離開左我地，唔係我地排個單位會更加大，
依家我地淨係排緊2人單位，所以就算排到上車個單位都會好細，都係預期之內，但勝在設施齊全先，又唔洗好似住劏房咁捱苦，樓下仲有個看更，點都定一定。
就係上個月，我地終於收到房署消息，話有個單位空左出黎可以俾我地入伙，仲要地方比較大，租金亦都打左個8折，我地都唔知點解，房署主任冇講咩原因，我地都去個新單位睇過下，
又真係幾唔錯，環境都幾好，仲要係高層單位，雖然前面有幾座樓遮住，但見到一條條馬路、每個角落每部車都可以飽覽到、睇到佢郁動，都有一種大地在我腳下嘅感覺。
咁我地當然都冇理咁多，排到隊上到車就得啦理閪得佢，仲要咁筍喎開心都黎唔切仲計較咁多做乜，正所謂「有食唔食，罪大惡極」，我地會由港島搬到對面海。
不過話就咁話，始終呢間屋我地都住左差唔多十年，唔多唔少都有啲感情，但諗起我地以後唔洗再住係呢啲爛鬼地方，乜野都唔再理。
而到左今日我地搬屋，call左部貨wan將啲傢私擺晒上車，而係我執緊傢私嗰陣就唔知點解令我諗起一年前一單新聞，
嗰單新聞係關於我嘅一個中同(中學同學)，女仔黎，仲要係同我同班，好似叫阿盈，佢唔知為啲乜有一日燒碳死左係間屋，而佢地老豆老母之後亦搬走左，之後個單位就咁空左出黎做左凶宅，唔知依家有人入左伙未。
我又諗左諗，我記得阿盈佢以前都幾邊緣，好似我咁，好鍾意坐埋一邊唔鐘意同人傾計自己一個自閉，朋友都唔多個，所以我地係班上都幾出名，仲有個稱號叫「自閉俠侶」。
話雖如此，但可惜我地都係自閉，所以都冇乜兩句傾，都係各自各邊緣。正所謂邊緣人防禦力最弱最易俾人恰，所以嗰陣我地都有一個共通點，就係我地都成日俾人恰，
唔係掉我地啲野落地就少少野都恥笑我地，仲會成日搞鳩我地，都真係會俾佢地搞到幾冇自信。我記得有一次我有幫過佢啲野，但唔多記得係咩事，佢之後仲多謝左我一聲，我先知原來佢識講野。
屌，究竟係幫過佢啲咩呢，諗黎諗去都醒唔起，淨係知我幫過佢啲野，明明我只係畢業冇幾耐咁快腦退化?
我淨係記得我以前點樣俾人恰，唔係俾人抓住磨柱就禁落地下玩屎眼又或者俾人用凳壓撚住我郁都郁唔到，唔玩呢啲就偷我書包啲書等我冇得用，仲有好多好多不能盡錄...
屌你老味自己啲柒事就記得咁清楚，人地嗰啲就乜柒都唔撚記得晒，仲要我幫過人幫過乜野都唔記得，算啦唔諗啦，都係一啲唔想記得嘅事。
「執好晒傢私未呀，仲有咁多未執停晒手咁係度發吽哣做乜?」
老母見我停晒手一句野鍘斷左我思緒，令我回歸返到現實世界。
「...知啦，依家咪執緊。」
我敷衍左老母一句之後，繼續郁手執野。
霸氣文哥 2022-2-18 14:08
第二章：新居入伙
過左幾個鍾我地終於執晒啲野上車，然後我同老母亦起程過左新屋嗰邊鳥。
黎到新屋，我倆率先開門踏進門口，入到去，見到一個大嘅空間，空氣都清新啲，瞬間有種煥然一新嘅感覺。
「哇，呢間新屋真係比預期大，完全唔似2人單位，與其話2人單位不如話係3-4人單位，有兩房一廳一廁所一廚房。」
老母第一個覺得讚嘆。
「咪係，我都覺得奇怪，點解會咁荀，故意益我地。」
「咪理咁多啦，有大單位俾我地咪執到，仲想死咩。」
老母性格就係咁，一有著數擺係眼前就乜野都唔理，理閪得就算個天冧落黎都好，所以我都幾無奈。
.
.
.
又過左幾個鐘，啲野終於執晒入屋，啲冇著衫嘅送貨佬辛水辛汗氣來氣喘咁紛紛撤離，大步大步行出門口，
一定心諗「屌你老味，得兩條友就咪撚買咁多傢私啦，拎黎托咩，以為我地唔洗做架，真係鬼唔望你地早啲死。」
諗到呢度做人都唔可以做到咁衰，一分錢都唔俾佢地，亦都費事啱啱搬黎新屋就俾人咒啦，唔老禮嘛，於是我做左樣野，由銀包入面拎左幾張10蚊出黎，
「師傅師傅唔好行住，呢度有幾張10蚊，你地收左佢啦，辛苦晒你地。」
「多謝。」
「多謝，你地啱啱搬黎新屋，出入平安啊。」
「係啊，身體健康，一切順風順水。」
然後佢地各自都紛紛多謝我，即刻冇閪我地面，仲祝福埋我地，原來小小嘅貼士就可以令人化悲憤為祝福。
當送貨佬都走晒，老母就過黎質問我，
「做乜俾錢佢地，你又同佢地唔熟，嘥晒啲錢。」
「咁送貨佬都係人姐，佢地搬得咁辛苦...」
「送貨佬係人我地唔係人，我地都好窮架咋，自己都未顧得掂自己仲俾錢人，加上call佢地貨wan咪已經俾足錢佢地，你仲特登俾多幾廿蚊人賺。」
老母份人就係咁孤寒咁自私淨係識顧自己，我都見慣，小小錢當施捨俾人都會唔捨得。
「好啦好啦我錯，下次我唔會再俾錢人賺。」
費事俾佢煩我乖乖認低威仲好過，佢一哦就會哦夠半粒鐘，長氣到不得了。
「係先好，下次你再咁嘥錢飯都唔俾你食。」
「知啦。」
「不過阿媽，話說我啱啱係舊屋唔知諗起啲野，我記得一年前我有個同學阿盈佢係屋企燒碳自殺死左，但佢以前發生過嘅事同我幫過佢嘅事就硬係唔記得，你話點解，明明只係上年嘅事。」
「邊個阿盈?」
「呢…咪係有次見家長坐係我地隔離排隊等入去嗰個女仔。」
老母諗左諗，佢似乎連呢單新聞都未睇過。
「哦!! 原來係佢，有時有啲野唔記得咪仲好，人地死有咩好記。」
「係好奇姐，始終我同佢都做過同學，以前咁多人蝦過佢，佢一定好大怨氣，做鬼都唔放過佢地。」
「唔好講呢啲啦，呢個世界上邊會有鬼，死左就死左架啦，唔好自己嚇自己。」
「乜你唔信呢啲野咩?」
「唔信! 信呢啲野黎做乜，假架咋嘛，唔好提啦，人地死人地事，總之呢個世界冇鬼。」
老母一聽到呢方面嘅野即刻好斬釘截鐵咁話唔信呢啲野，我呢個老母仲要好硬頸，話左係冇就冇。
「okok，呢個世界冇鬼，死左之後上天堂升仙係咪。」
我都費事同佢拗，實拗唔贏嘅。
就係咁，我地係新屋度住左落黎，係我地新入伙嘅第一日。
[[i] 本帖最後由 霸氣文哥 於 2022-2-21 06:58 PM 編輯 [/i]]
QQ206 2022-2-18 20:27
[quote]原帖由 [i]霸氣文哥[/i] 於 2022-2-17 07:07 PM 發表 [url=https://www.discuss.com.hk/redirect.php?goto=findpost&pid=545646653&ptid=30433205][img]https://www.discuss.com.hk/images/common/back.gif[/img][/url]
我個名叫做方伯洋，個名係咪好難聽，18歲嫁啦，今年先考完個DSE準備升上HD做個IVE仔，我係一個毫不起眼嘅邊緣人。原來呢6年話咁快過去，6年前我12歲，見證住表姐嘅離去，同年亦見證住另一個表姐結婚，6年前發生嗰件事，我老母一直都歷歷在目成日記住，我係邊個? 冇錯，我同我兩個表姐張倩彤、張倩欣係同一個平行時空，我係佢地表弟，年紀都相差接近10年。本來覺得件事過左去生活就會變得平庸，殊不知係機緣巧合 ... [/quote]
個名方伯洋幾特別，你係咪女人？但個名好似男人名。
QQ206 2022-2-18 20:34
[quote]原帖由 [i]霸氣文哥[/i] 於 2022-2-17 07:09 PM 發表 [url=https://www.discuss.com.hk/redirect.php?goto=findpost&pid=545646695&ptid=30433205][img]https://www.discuss.com.hk/images/common/back.gif[/img][/url]
第一章：搬屋
我個名叫做方伯洋，個名係咪好難聽，18歲嫁啦，今年先考完個DSE準備升上HD做個IVE仔，我係一個毫不起眼嘅邊緣人。原來呢6年話咁快過去，6年前我12歲，見證住表姐嘅離去，亦係上年見證住另一個表姐結婚，6年前發生嗰件事，我媽一直都歷歷在目成日記住，我係邊個? 冇錯，我同我兩個表姐張倩彤、張倩欣係同一個平行時空，我係佢地表弟，年紀都相差接近10年。
至於表姐個前男友唐富豪，我 ... [/quote]
嗰間屋係咪凶宅？
QQ206 2022-2-18 20:36
[quote]原帖由 [i]霸氣文哥[/i] 於 2022-2-18 02:08 PM 發表 [url=https://www.discuss.com.hk/redirect.php?goto=findpost&pid=545672395&ptid=30433205][img]https://www.discuss.com.hk/images/common/back.gif[/img][/url]
第二章：新居入伙
過左幾個鍾我地終於執晒啲野上車，然後我同老母亦起程過左新屋嗰邊鳥。
黎到新屋，我倆率先開門踏進門口，入到去，見到一個大嘅空間，空氣都清新啲，瞬間有種煥然一新嘅感覺。
「哇，呢間新屋真係比預期大，完全唔似2人單位，與其話2人單位不如話係3-4人單位，有一房一廳一廁所一廚房。」
老母第一個覺得讚嘆。
「咪係，我都覺得奇怪，點解會咁荀，故意益我地。」
「咪理咁多 ... [/quote]
唔好拗啦，既然搬咗入去同你媽咪開開心心住落去啦。
霸氣文哥 2022-2-18 21:11
[quote]原帖由 [i]QQ206[/i] 於 2022-2-18 08:27 PM 發表 [url=https://www.discuss.com.hk/redirect.php?goto=findpost&pid=545686646&ptid=30433205][img]https://www.discuss.com.hk/images/common/back.gif[/img][/url]
個名方伯洋幾特別，你係咪女人？但個名好似男人名。 [/quote]
小弟係男人😂
霸氣文哥 2022-2-18 21:12
[quote]原帖由 [i]QQ206[/i] 於 2022-2-18 08:34 PM 發表 [url=https://www.discuss.com.hk/redirect.php?goto=findpost&pid=545686837&ptid=30433205][img]https://www.discuss.com.hk/images/common/back.gif[/img][/url]
嗰間屋係咪凶宅？ [/quote]
繼續睇落去就知～
QQ206 2022-2-18 21:12
[quote]原帖由 [i]霸氣文哥[/i] 於 2022-2-18 09:11 PM 發表 [url=https://www.discuss.com.hk/redirect.php?goto=findpost&pid=545688177&ptid=30433205][img]https://www.discuss.com.hk/images/common/back.gif[/img][/url]
小弟係男人😂 [/quote]
呢個名男人冇問題呀幾特別:loveliness:
QQ206 2022-2-18 21:12
[quote]原帖由 [i]霸氣文哥[/i] 於 2022-2-18 09:12 PM 發表 [url=https://www.discuss.com.hk/redirect.php?goto=findpost&pid=545688198&ptid=30433205][img]https://www.discuss.com.hk/images/common/back.gif[/img][/url]
繼續睇落去就知～ [/quote]
你依家講啦:chcz_04:
霸氣文哥 2022-2-19 14:57
第三章：解封
話咁快就住落一個禮拜，啲設備基本上都用過晒，上左公屋之後先發現好多野都好左好多，
地方大左衛生好左，廁所都可以自己用唔洗公用，打個丁都唔洗就住就住，終於有返自己嘅私人空間，除左一間房兩份瞓，
是咁的，老母買左張碌架床，話想慳返張床錢，我瞓上佢瞓下，本來我想瞓下，算啦，我當敬老費事俾佢話我冇佢心，就係咁新搬入黎呢個禮拜生活都算安樂，然而間屋唔知點解都硬係有啲陰沉，
明明依家係夏天都會覺得凍凍地，太陽都冇乜點可以曬到入黎，或者係前面座樓遮住左啦，到夜晚就算開燈都好都好似唔夠光咁，周圍仲要好靜，
正常公屋點都會聽到鄰居講野聲架嘛，或者出出入入都會聽到，但我乜都聽唔到，好似成層淨係得我地咁，但有時我出門口，都會撞到鄰居出門口，呢個時候先唔係靜、先知我地唔係孤立，
所以有時隔離左右嘈啲都係一件好事，起碼熱鬧啲唔會覺得淨係得自己，因為硬係會有種「空虛、寂寞、冷」嘅感覺。
不過唔理lu，應該係我地住得冇耐姐，佢地未嘈，又或者我地個單位隔音隔得好，理下其他野仲好啦，
近排先考完DSE，到依家呢個休學期我與其話係休息不如話係無所事事，雖然仲未放榜，但我好有信心升到上HD，連HD都升唔上就真係讀屎片，
所以老母成日都叫我搵份part time返下，我何嘗唔想，但因為我嘅惰性，我成日都一拖再拖，想再hea多排，所謂「拖延症候群」咪就係咁解。
但係係今日我就發現左樣野，係一個熊公仔，
事源係老母話個洗手盤塞塞地叫我打開下面個櫃扭開喉管個蓋睇下，因為我住左咁耐都未開過呢個櫃，都有啲好奇睇下入面係點，雖然都只係得啲喉管，
正當我一打開個櫃，一陣霉臭味撲面而來，地下有啲積水，而係另一邊櫃門就見到有隻熊公仔坐住係度，佢冇坐係積水度，仲幾新淨，
可能係上一手走嗰陣唔記得拎走放左係度，又長時間冇開過呢個櫃，所以冇塵，我見幾新淨同埋我本身又比較鐘意熊公仔，所以我拎出黎抹左抹放左係廳嘅櫃入面擺住。
亦就係拎出黎之後，怪事就開始發生，例如有時瞓教嗰陣會聽到出面有啲聲，即推凳聲/膠袋磨擦聲，
但明明冇其他人係度又何來會發出呢啲聲? 再加上一張凳咁重如果唔係人為又點會推得郁? 我地屋企嘅凳係好大張嘅木凳，就算係老鼠都推唔郁啦，
每次發生呢啲事都會驚驚地，可惜到第朝問返老母佢話瞓得太冧聽唔到，之後就叫我唔好自己嚇自己...都係嗰啲說話，然後佢就換衫拿拿聲去返工，我唯有都同自己講係聽錯，係上面推凳聲黎。
.
.
.
「喂阿仔，我聽日返一返鄉下先，去探下我個死鬼三姨婆，順便有啲事搞，可能要搞兩個幾三個月，呢度有幾千蚊，你拎住當平時拎去買飯啦，順便交埋租金。」
又過左兩個禮拜，老母掉低4000蚊俾我話走就走，即得返我一丁友係屋企過活，以前老母都係咁，無啦啦會返去一兩個月。
「如果你唔夠錢用，自己搵份工返下啦，唔係你就聽餓死架啦，唔好話我冇幫你。」
「又返去? 究竟你要返去做乜做咁耐。」
「你唔好理啦，要照顧我三姨婆嘛，佢好老嫁啦。」
唉，香港生活艱難，得4000蚊點夠用，唯有慳啲啦，或者真係要搵返份工做，唔係我真係食穀種。
呢一晚好靜，老母走左之後，屋企就淨低我一個，有啲唔係好慣，當我坐係度發呆嘅時候，周圍嘅空氣猶如死寂左咁，
任何某一個地方若然發出聲響我都再俾唔出藉口安慰自己，因為...[b]屋企再冇其他嘅人[/b]...
話唔驚係假嘅，呢兩個禮拜發生咁多怪事，先前就話有老母係度照住所以冇咁驚姐，今時唔同往日鳥...
好啦，唔諗咁多鳥，驚都要住架啦，我鬼有錢搬出去住咩，方伯洋你要頂住!! 幻覺黎架姐。
同埋時間唔早，我都有啲眼瞓，瞓完一覺聽日再算啦，冇事嘅~
我帶著一身倦意平躺在床上、關燈、合埋眼，周圍瞬間漆黑一片、十分安靜，好快就入睡左。
漆黑一片中，我見到有一個光點從遠方慢慢飄緊過黎...
[[i] 本帖最後由 霸氣文哥 於 2022-2-21 07:00 PM 編輯 [/i]]
霸氣文哥 2022-2-20 14:00
第四章：污糟野
個光點越黎越近...越黎越大...亦都開始見到輪廓，而我身體卻動彈不得，
佢係一個女仔，留住一副黑長髮，因為遮住左成塊面，我根本見唔到佢樣，仲要著住一條白色連衣裙，
當佢飄到我面前嘅時候，佢停低左，我feel到一股好強嘅寒氣，好凍... 我好想叫、好想掙扎，但我依然都係郁唔到，我就只可以企定定係度任人魚肉。
當我處於驚恐之時，佢右手突然舉起摸住我塊面，好冰冷，十足寒冰掌，然後佢再伸出佢條利舔左下我另一邊面...佢條利好長好恐怖，好似想食左我咁，
佢舔落黎濕濕地嗰種感覺令我不寒而慄，而佢啲口水亦都係好凍，究竟佢想做乜。
「啊!!」
我真係好驚，驚到我用盡全身力氣拼命掙扎，拼命想令自己叫出黎，最後我終於破「聲」而出嗌左出黎。
我成個人彈左起身，成個額頭都係汗，原來係一場夢，仆街唔通我撞野!? 但冇可能呀，我咁少出街又點會惹呢啲野返黎，
人地就話係後巷亂鳩咁痾尿先會帶埋隻野返屋企姐，又或者專登做一啲鬼唔鍾意嘅野去激嬲佢地就話姐，但我一向都好守規矩架喎，何來會引來啲污糟野...?
之後我成晚都冇再瞓過，唔敢再瞓，到第朝起身我搵左我中學嗰個死鬼老友阿誠出黎食飯，佢係我中學嗰陣唯一同我啱傾啲嘅fd黎。
「誠哥好彩你住我附近咋，唔係我都唔知搵邊個黎陪我，我真係好撚驚。」
以前搵佢好難，因為未搬屋之前去搵佢我係要過海，都唔知點解嗰陣佢住咁遠都黎呢邊讀。
「冇見一排姐，鵪鶉左咁多嘅，成個女人咁要人陪，唔似你喎，搞咩呀你?」
「唔係呢，真係唔係小事，我好似...俾鬼壓，我琴晚無啦啦夢見隻女鬼行過黎舐我塊面，我仲要郁都郁唔到，之後我就成晚瞓唔著。」
「屌無事嘅，夢黎架姐，你係夢入面郁唔到有幾出奇，你係夢入面屌騾仔閪都仲可以...」
誠哥份人就係咁，好鍾意派膠好鍾意搵啲野笑鳩人幸災樂禍，冇幾何會認真。
「喂話唔定你呢排dry得濟好想搵返條女同你屌閪所以先夢見條女想幫你口爆呢，哈哈。」
「屌你咩，佢係舔我啊，點會口爆，係真係好撚恐怖架，佢舔落黎嗰下我仲要feel到凍冰冰，係有感覺架，係夢入面都有感覺喎!」
我越講越激動，越講越深刻。
「車，佢舔得你應該都會舔埋落去碌鳩同你口爆架啦，邊有咁易俾鬼壓啊，你街又唔多點出，又冇得罪過人，你咁邊緣，除非...」
「除非乜野!?」
「除非你依家住緊嗰度係凶宅。」
「冇可能!! 我地去搵房署傾嗰陣佢地冇同我地講過係凶宅。」
「咁就唔知啦，都諗唔到其他原因。」
聽完佢咁講之後我都答唔出任何野，我冇野好講，亦都真係諗唔出其他原因。
「不如你今晚黎我度打機啦，當陪下我。」
諗到呢度我真係驚驚地，依家仲要得我一丁友住更加冷清，突然間好想多返一點人氣。
「不鳥，我聽日仲要返工早起，有好多野忙，得閒先啦。」
聽完佢咁講我立即表現到好無助，誠哥亦都安慰我咁講:
「屌你唔驚嘅，你睇下你一場夢黎就將你嚇成咁，日後點成大事，放心啦今晚唔會再夢見架啦以我嘅定律，冇事嘅。」
雖然誠哥咁講完，但你又唔係我，你點會明我處境，我又點會變到唔驚。
.
.
.
又到瞓嘅時候，我想開住燈瞓，但我一定瞓唔著，所以都係黑住咁瞓，我唔敢合埋眼... 好驚再見到嗰隻女鬼。
過左一陣，係漆黑之中，可能我乜都望唔到，我慢慢感到疲倦，慢慢疲倦... 然後場景亦慢慢隨之轉換...
「前日我去左EXO演唱會，伯賢好靚仔!! 好high啊!!」
突然我見到自己身處係中學，著住套校服，手上拎住本簿交落去1樓功課架，我急急腳咁行緊落去，似係小息緊，而隔離就有兩條女好興奮咁講緊EXO。
「屌，就打鐘，打鐘之後交唔到我就要留堂架啦。」
我由4樓直奔落去1樓，照計我唔洗兩分鐘就落到，但唔知點解我落左5分鍾都未落到去，
一直都係處於4樓，而且光線仲越黎越陰暗、人流越黎越少、周圍環境亦都越黎越殘舊，以我咁嘅速度衝，應該衝左10層都有...
究竟間學校發生咩事，點解我好似一直輪迴係同一層...
霸氣文哥 2022-2-21 14:29
第五章：校園下的地牢
我開始覺得奇怪，乜學校會有條咁嘅樓梯架咩，落極都落唔完，
當我想上返去嘅時候，發覺後面忽然多左蓬牆擋住左唔俾我上，而前面亦冇任何去路，咁我冇計啦，唯有繼續落，
呢刻嘅我已經唔敢再跑，由本來慌張嘅心情變到有啲恐懼，手上揸緊本簿亦漸漸印有我嘅手汗，
額頭亦不知不覺多左少許汗珠，我唔知係因為啱先跑落黎熱得濟定因為驚，總之心跳開始加速緊，
猶如我一個人進入一個無人之境，自從有蓬牆擋住左我之後，我就再見唔到任何人，
然後我又慢慢咁落左一層，呢層更加陰暗，只有一盞掛係天花板嘅燈係上面搖擺，奇怪，周圍一啲風都冇，點解佢會識自己搖?
周圍亦唔見任何去路，連掛係牆上4樓嗰個牌都好似就黎甩落咁，最奇怪嘅係，
呢一層雖然亦都好殘舊，但牆灰甩落嘅背後竟然包覆住一塊又一塊嘅紅色牆磚，依家已經係現代，仲點會有人用磚頭一塊一塊咁砌住起樓?
我繼續行落去，途中只有我落樓梯發出嘅聲音同自己每一下嘅呼吸聲，周圍都好靜，一粒聲都冇，猶如身處在一個密閉空間、一個死寂嘅地方，
正常就算有蓬牆隔住都應該聽到後面嘅聲音，但有蓬牆隔住之後就乜野吵鬧聲都消失晒，應該話係我跑落黎嘅時候聲音就已經慢慢消失緊...
慢慢我又落左一層，呢一層冇得再落去，睇黎已經到底，周圍磚頭散落、凌亂不坎，牆壁上亦換晒做紅色牆磚，唔少都已經甩落，猶如一個廢墟，
而掛係天花板上嘅燈亦變到眨下眨下，隱約地見到前面有一條走廊，與其話走廊不如話係一個山洞，
入面漆黑一片，只有旁邊一枝枝蠟燭點亮著，周圍亦都係由紅磚築成，好有一種復古嘅感覺，
更加奇怪嘅係，每一枝蠟燭同蠟燭嘅中間竟然係一間間嘅牢房，有啲似地牢。
我再望一望後面，忽然又多左蓬牆隔住左，好似迫我一定要向前行唔可以回頭咁，我冇任何退路亦只可以向前行，
但前面真係好陰深，齋望已經唔敢入，真係諗都冇諗到學校地底竟然有一個地牢...
我鼓起勇氣行入去，慢慢踏入呢個陰深嘅地牢，每一步我都充滿驚恐，而整個空間亦只有我行路發出嘅聲，
慢慢我已經行到第一間牢房，望入去隱約見到一個披住白色長袍嘅女仔垂低頭挨住牆坐左係度，一把長頭髮將佢嘅面容遮住左，郁都唔郁，究竟佢係咪死左...?
點解呢度會有個女仔? 佢係咪人黎? 一堆疑問湧現。
我決定唔理繼續行再睇下點先，之後到達第二間牢房，都係有個著白色長袍嘅女仔垂低頭坐左係度，我嘗試叫下佢，
「喂小姐，醒下先啦，有冇事呀...小姐...小姐...」
...
仍然原封不動郁都唔郁。
「你想走去邊呀細路，我好慘呀...」
當我叫完，突然後方傳來一把女聲將我嚇倒，我擰轉頭一望，見到一個同樣著白色長袍、頭髮披面見唔到面容嘅女仔正「飄」緊黎我嗰度，我身體自然反應當然即刻向前跑。
「點解我條命要咁慘...點解我唔可以做一個普通人...我要你地俾返條命我。」
我邊跑邊聽到個「女仔」不斷係度哀號，佢嘅哀號係拉長黎講，更突顯佢有幾悽慘，令我不寒而慄，
佢一定唔係人，佢有啲熟口面，唔通佢係我之前夢見嗰隻女鬼!?
呢個地牢好深，我不斷跑都不斷見到源源不絕嘅牢房，而最奇怪嘅係，每一個牢房都鎖住同一個女仔係入面，亦都係郁都唔郁，點解會有咁多女仔係度?
當我一直沿蠟燭光跑緊嗰陣，寒氣亦不斷上升，我feel到周圍溫度都下降左，而佢嘅聲線亦都越黎越大，係咪即係越黎越近我... 明明我中學嗰陣都算跑得快，但佢竟然都追得上我。
「俾返條命我呀你班仆街! 係你地害我，你地每一個都想我死!」
從話語中聽得出個「女仔」好大殺氣，睇黎佢怨恨好重，我唔可以俾佢抓到，唔係就實死無生。
但我咁走都唔係辦法，呢度係佢地頭佢實會追得上我，而條路又見唔到盡頭亦冇其他路，
我要點算好，呢刻嘅我好似失去晒希望同方向，只可以盲目地向前跑，別無他選。
如果跑到最尾係一條掘頭路點算...又或者根本條路係永無止境嘅又點算? 我邊有咁多氣跑，到最尾實會俾佢抓到... 一大堆嘅可能性從腦中湧現出黎。
突然我見到前面有間牢房冇上鎖打開左，入面亦冇任何人，只有一張單人床泊係牆邊，隔離仲有個洗手盤，然後我即刻跑左入去閂埋門，
我覺得可以嘗試匿係床下底避一避風頭，總好過毫無目的地死跑爛跑，佢應該見唔到我掛...
因為前面唔知邊一間牢房仲會係打開門乜都冇，至少我跑過見到嘅咁多間都係上鎖有人，呢個係唯一希望。
霸氣文哥 2022-2-22 15:40
第六章：行刑
我入到去後，周圍望緊究竟匿邊度好，望左一陣之後，我視線專注左係張床度，我可以匿係床下底，
雖然唔係十分好嘅藏匿點，又雖然我睇好多戲好多時候匿床下底嘅人最終都會被發現，但至少可以避下風頭先，亦只有呢個藏匿點，其他都再冇任何遮蔽嘅地方、冇其他嘅辦法，
然後我小心翼翼地捐進床下底，個床底好矮，啱啱好夠我一個人捐入去，連抖氣都困難，迫住食晒床底啲灰，你都咪話唔辛苦，呢啲係咪就係所謂嘅「食塵」?
當我匿入去之後無耐，突然我聽到外面道門輕易地打開左，開門嘅聲音清脆地傳到我耳中，我心跳得越黎越快，點解佢會知我入左呢間房，佢係咪已經見到我入黎..?
然後一陣寂靜，冇任何行路聲，周圍就只有我嘅呼吸聲，我連呼吸都唔敢呼吸得太大力，驚死佢會聽到知道我係度，
但我嘅好奇心阻唔到我個頭微微打側用眼角望一望床嘅出面，見到有對飄住嘅腳慢慢向張床飄過黎，
我個心跳快到就到跳出黎，仆街佢係咪已經知道左我係度，咁我咪即係死硬!? 一切負面嘅想法湧上心頭，呢刻嘅我徬徨無助，只有我一個孤軍面對呢場恐懼，我真係好想叫出黎，
突然女鬼個頭倒轉出現左係我眼前望住我，我即刻俾佢嚇到叫左出黎，再也忍唔住，因為環境太黑再加上佢把長髮遮住關係，我根本見唔到佢個樣，
然後張床好快咁升起撞左去天花板，就好似俾野吸左上去咁，我反應都未黎得切，
然後我亦都俾股力量升起吸左出去，再將我一下推出去牢房外，我就咁樣飛左出去走廊撞左去蓬牆度，我見到我有啲位傷左但竟然唔痛，
正當我企返起身想走嘅時候，我竟然就郁唔到，面對面望住漆黑嘅牢房，唔通我又俾隻野定型左..?
「你仲想走? 係你班仆街害死我，你地根本唔知我有幾難受，你地還返條命俾我!!」
呢個時候，女鬼慢慢咁飄出黎，我望住佢不斷咁靠近我，而我乜野都做唔到，連最基本嘅逃跑技能都喪失埋，我對腳只有不停地發抖...
「你究竟係邊個啊，我唔識你架，我求下你放過我啦，我乜都唔知架。」
呢一刻嘅我只能夠苦苦地求饒，我已經驚喪失晒理智唔理任何尊嚴，希望佢會放我走。
「係你地害死我，你地每一個都係仆街...」
「我求下你啦，放左我，我真係乜都唔知，我係無辜，細路仔唔識世界，有咩做錯嘅地方有怪莫怪。」
「我要你個身體，然後將每一個害我嘅人都殺晒...」
佢冇理我繼續佢有佢講。
「即係話，你想奪走我個靈魂上我身然後為所欲為...? 咁我係咪就會死? 我求下你唔好殺我，我仲想生存落去唔想死住，求下你嗚嗚...」
我已經驚到原地企係度喊左出黎。
「我要你地每一個人都感受下我經歷過嘅苦痛。」
然後話口未完佢就將兩隻手舉起準備捏實我條頸。
「求下你...求下你唔好殺我，我會成日上香同燒衣紙俾你架，你想要乜野都得，只要唔好殺我就得。」
...
佢乜都冇理，手慢慢咁伸前已經掂到我條頸，呢刻嘅我猶如即將接受死刑，唔通今日我就要死係呢度...?
「求下你...唔好殺我...」
然後佢隻手已經捏住我條頸，慢慢加重力度，我開始抖唔到氣，但我依然繼續求饒，希望會有一線生機，我唔想死得不明不白。
「求...下...你...」
係我迷糊之間突然一陣怪風將女鬼啲頭髮吹起，而隔離咁啱有盞燈照住，我終於睇到佢嘅盧山真面目，眼大嘴細，
雖然眼大嘅女仔通常都係可愛，但呢一刻佢嘅眼神係充滿恨意，一啲可愛都談唔上，相反用殺人犯黎形容會更加恰當。
面形亦都相對尖，睇得出係冇乜肉地，好熟口面...究竟邊度見過...然後我叫出左一個人名。
「阿盈...?」
當我講出呢個名之後，佢呆左一陣係度，冇再加重力度，然後雙手突然全放鬆，就好似我講中左密碼咁，而我亦都可以抖返氣，係呢一陣風救返我。
點解阿盈會係度? 唔通一直以黎隻女鬼就係阿盈?
霸氣文哥 2022-2-23 14:30
第七章：凶宅
「周雪盈，係咪你...?」
我問完佢仲未回答就好快咁飄走左，亦冇講任何野
.
.
.
「啊!!」
我成個人係張床彈起身，冒晒汗，原來係一場惡夢，依家已經係朝早，我成個人都不能平復，當我發完呢個夢就好似經歷左幾日時間，真係好恐怖。
不過我諗諗下覺得唔係... 如果係一場夢又點會連續兩晚都夢見同一隻女鬼，一定冇咁簡單，如果我唔係嗰一陣風，可能我就已經死左係個夢入面...
而且佢仲要係阿盈，係死左嘅阿盈... 點解佢會係我個夢度出現、仲要搞我，同埋我以前亦都冇...
咦，點解我會記唔起以前對佢做過啲乜，淨係記得我地兩個都係邊緣人，其他詳細嘅野竟然唔記得晒，我記性冇咁差掛，記得以前我背書好勁。
我再諗諗，發覺自從拎左個公仔出黎就開始怪事多多，係拎個公仔出黎之前都過得好好，
我之前有略略聽過話啲公仔係可以俾啲亡魂依附，唔通隻公仔就係俾野依附左...? 如果係咁我間屋咪即係凶宅...? 冇可能嘅，如果係凶宅房署一早同我地講左啦，一定唔會係凶宅... 我只可以咁樣諗去安慰自己。
但當我起身開門再走近個櫃望住個公仔嘅時候，個公仔竟然打側斜住咁泊住左係個櫃邊，明明都冇野郁佢加上有塊玻璃櫃門閂住點解佢會識打側左?
因為係玻璃櫃門嘅關係，我可以好清楚咁望到入面，呢刻嘅我再望住個公仔唔知點解會有種恐怖嘅感覺，就好似鬼片入面嗰啲恐怖臘像，硬係覺得佢會識自己郁，好不安。
就係我滿腦子都充滿疑惑嘅時候，我開電腦check左check呢間屋嘅資料，我唔check都由是可，一check就見到好多關於呢間屋呢棟樓嘅自殺新聞，
「觀塘17歲壓力女燒炭亡 母揭發報警」
「觀塘XX邨17歲女燒炭自殺，母回家發現已返魂乏術」
「觀塘XX邨17歲女留遺書客廳燒炭亡 母揭發」
仲有好多自殺嘅新聞，我逐個禁入去詳細咁睇，發現入面仲有講到個女仔姓周，歲數一樣，重點係我呢層我呢個單位，死因係係學校俾人欺凌同侮辱最終壓力太大受唔住燒炭自殺，
依家先知呢間屋係凶宅，個房署職員瞞住我地唔講，咁仆街嘅，莫非呢個單位就係阿盈燒炭自殺嘅單位...?
都冇得話唔係，有咁多新聞報導過，我又係夢入面見到阿盈，都真係幾肯定阿盈就係死左係度，係鐵一般嘅事實...
不過我睇左啲新聞之後，我都記起少少野，記得以前阿盈的確成人俾人蝦，我地兩個都係好好蝦嘅對象，但估唔到阿盈會因為受唔到而自殺，睇黎阿盈嗰陣真係好辛苦，
但諗返轉頭我同阿盈無仇無怨，點解佢會搞我，唔通係我住左入黎之後騷擾到佢? 我都有聽聞過話靈體係唔鐘意有人入住佢地死後嘅單位，所以啲靈體會千方百計咁搞啲人，
定佢係為報仇而去搞人... 因為我係夢入面見到佢怨恨好似好重，下下都好想人死、好想取締人咁，
不過又唔係，如果佢真係好想人死，點解佢頭先唔索性將我殺死、點解我叫一聲佢個名佢會放走我?
加上我住左佢個單位搞到佢理應佢應該好憎我，我真係諗唔明佢想點，又想我死但又放走我，
我係夢入面係確確實實地feel到我抖唔到氣就快死咁、係好辛苦，同真嘅冇分別咁濟。
定我以前對佢做過一啲好事，之後佢認得我所以先冇殺我? 但冇理由，如果真係咁佢應該一開始就認得我，冇理由最尾我叫佢先認得我，話晒都一場同學，都對左幾年，點會唔認得，仲要係班上面咁突出。
重點係點解我一啲都唔記得，乜以前我有幫過佢咩?? 我淨係記得有呢個人存在，其他對佢做過啲乜我竟然乜都唔記得，頂偏偏呢啲時候先唔記得。
.
.
.
直到夜晚，我仍然帶住滿腦子諗唔明嘅疑問，而心情亦都未平復得晒，話唔驚都假，始終都係自己屋企，
同埋唔知點解到左夜晚嘅屋企特別靜，四周圍一粒聲都冇，一直都好似初初搬入黎嗰陣咁，靜得可怕...
但我得出一個結論，就係好肯定呢間係凶宅、阿盈係死過係呢間屋、房署呃鳩我、夢入面見到嗰個都係阿盈，就只係一個好表面嘅結論，六何法入面我淨係知道左何人同何地。
唉，不過諗咁多、驚都冇用，我又冇錢出去租屋，點樣唔去面對呢啲事，
正所謂一波未平一波又起，就係我沖涼嘅時候又發生左一樣怪事...
霸氣文哥 2022-2-24 14:20
第八章：恩人
好啦，呢日我對左成日電腦都攰，去沖個涼先仲好過，
因為驚嘅關係，我將出面啲燈同電視都開晒，令到屋企冇咁空虛冇咁靜，咁我就冇咁驚，俾自己一個錯覺就係屋企好熱鬧。
我一如以往咁拎啲衫入去沖涼房掛住沖涼，本來我會間唔中係沖涼前都打返個靚飛機洩下慾先，但今晚我冇咁嘅心情打，我仲未驚完，如果我有女就好啦，可惜以前...唉。
當我沖完涼嘅時候，拉開浴簾第一眼依然係見到成塊鏡都係霧氣，
但唔知何來一陣寒風吹過，原本溫暖嘅沖涼房溫度即刻急降，我快快趣趣著好衫，而塊鏡嘅霧氣亦去得好快，
就係我著好晒衫嘅時候盞燈突然眨下眨下就熄左，就連出面啲電器都熄晒，就好似全屋停電咁，沖涼房瞬間陷入一片漆黑、屋企亦回復一片寂靜，就只有浴窗外面嘅少少餘光照到入黎...
「哇！做咩事！？」
我嚇到叫左一聲出黎，而我心情亦立即陷入一片恐慌之中，屋企就只有我一個，我點叫都無用，我部手機亦擺左係出面，冇人幫到我，我終於切切實實體會到孤立無援嘅感覺，
最得人驚嘅係之後塊鏡入面竟然出現左一個人，著白色衫、長髮披面嘅女仔，企左係我後面，我唔敢望向後面，因為我知道多數都無好結果... 點解「佢」會係呢個時候出現...？佢唔係淨係可以係夢入面出現咋咩？
空氣靜止左幾秒後，佢將隻手慢慢舉起搭上我膊頭，直至我感受到一股冰冷透過我件衫滲入我皮膚。
「啊！鬼啊！」
我嚇到彈左起身，手係自然反應下好快撥開左佢搭係我膊頭隻手，就好似有條蟲跌左落我個身，冇諗過我會係現實見到鬼，亦係我咁大個仔第一次撞鬼...
「方伯洋...」
然後一把女聲從後叫左一聲我個名，佢把聲嗲嗲地好甜，係阿盈把聲。
「唔好、唔好搞我，我求下你。」
雖然我知係阿盈，但我依然好驚，始終都係鬼... 我想出去，但唔知點解個門鎖反鎖左，我根本開唔到門出唔到去...今次真係仆街，點算好...
「方伯洋，係我，唔洗驚。」
說罷佢就將佢自己啲頭髮撥開，俾我清晰見到佢臉孔。
「我知你係阿盈，但點解你要搞我，我同你無仇無怨，你唔好搞我啦好嘛？我有咩得罪你你當我細路仔唔識世界啦!」
「阿洋，今次我唔係黎害你，你唔洗驚，你靜落黎聽我慢慢解釋俾你聽啦好唔好？」
「對唔住，琴晚係我唔啱，搞到你驚左成日，仲差啲害死你...」
今晚阿盈把聲甜左好多，同琴晚佢嗰把怨恨嘅聲360度唔同左，以前返學我都好少聽到佢講野，所以佢呢把聲真係有一種十年冇聽過嘅感覺。
「點解...？」
「因為你係我恩人，我唔可以害死你。」
「恩人? 點解我會係你恩人...? 我對你做過啲咩?」
「你應該唔記得，不過都正常，你諗諗，中五嗰年有班人小息嗰陣襯我唔係度偷偷地拎左我件PE衫同筆袋收埋，咁啱黎緊就上PE堂要換衫，最尾係你幫我搵返拎出黎俾我。」
乜我有咁樣幫過佢咩，點解我之前會乜野都唔記得... 但依家我好似有返少少印象。
「又記得有一次放學嗰陣，啲人走晒得返我一個係班房喊，你就上前遞張紙巾俾我叫我唔好喊，嗰一刻我覺得好warm。」
聽完佢咁講之後我好似真係有返少少印象，記得嗰陣我都安慰左佢一陣，放學前佢俾幾個女仔恰。
「仲有一次啲人偷左我500蚊，嗰500蚊我要急住拎俾我老豆睇醫生，你嗰陣見我咁慌張野都唔講就俾左張500蚊我，叫我拎住先唔洗急住還，我真係好感動，原來班上面仲有一個對我好嘅人。」
呢件事我都有印象，原來我以前幫過佢咁多，我好似依家先知咁。
「原來我以前咁好人? 點解我會唔記得晒...? 既然我係你恩人點解你仲要害我、點解你一開頭會唔認得我?」
我真係有好多疑惑，點解一開頭佢要害我，依家就對我咁好? 好想襯今晚解開晒一切嘅疑團。
「你唔記得都係正常，其實我都會唔記得，不過我係會唔記得晒啲人嘅樣，到我地相遇勾起返啲往事先會記返起，因為當人同鬼撞到但未勾起往事之前，我地係會有部分關於對方嘅記憶唔記得，算係我地平時講嘅選擇性失憶。」
「所以你一開頭先係咁想殺我?」
「係，因為我嗰陣成個人淨係感受到怨恨，我當正所有人都係仇人，包括你。」
原來件事係咁，唔怪得嗰陣當我叫左聲阿盈之後佢會即刻放走我。
「如果係咁，即你依家留低係度係想去報復返以前蝦你嘅人?」
「係!」
QQ206 2022-2-24 14:51
太長啦你簡短啲
霸氣文哥 2022-2-25 13:27
第九章：真相大白
「但以前蝦你嘅人好多，點解我叫你一聲阿盈你就會認得我?」
「因為以前叫我做阿盈嘅人只係得你，其他人通常都係叫我邊緣盈、閪盈、凝血周、賓周盈之類啲花名…所以你叫我一聲就將我喚醒左，我即刻記起係你，我差啲殺錯好人。」
依家先知道原來我以前叫佢個名都叫得特別正常，作為邊緣人嘅我都好明白佢，因為我個名夠特別，好多人都叫我做西伯利亞洋腸哥，簡單啲就叫我洋腸方或者洋腸哥。
「同埋我住係度唔係應該會阻住你咩? 你應該都好憎我至啱。」
「正常係，因為我唔記得晒人樣嘅關係，所以只要有人入住我都會搞佢，人就會理解為佢地阻住我地，當然只有有怨恨嘅靈體先會咁諗。」
「如果係死於意外嘅靈體，通常好快會投胎，除非佢仲好留戀人間，或者...」
「或者乜野?」
「或者佢本身係有邪念。」
「因為人同鬼好似，我地都會有情感、有性格、有意念同感受，只係我地會做到啲「超能力」咁樣。」
「你講嘅超能力，係咪就係可以穿牆、入人地夢，同埋依附係啲公仔?」
「係，你講得冇錯，我地算係由腦電波產生出黎嘅一個形體黎，亦都係本身軀體殘留落黎嘅一股能量，不受任何物體限制，可以透過人嘅意識進入人地夢境，亦都可以穿牆。」
「至於公仔，我地會依附係一樣生前自己最鍾意嘅野上面作為居所，就好似你嘅屋企咁，冇呢個屋企我好快就會煙消雲散。」
「但我係拎左個公仔出黎先有野，之前係一啲事都冇。」
「因為收埋係個櫃入面嗰陣我就會好似長眠左咁，你只係會覺得個環境有啲陰深，但當你將我拎左我出黎之後，你就會好似叫醒左我咁，將我打開封印，我一直懷恨在心嘅怨恨亦就係咁喚醒左。」
「而且你啱啱搬入黎嗰陣你冇拜四角，我醒左之後第一時間就覺得你係壞人，靈體係對呢啲野好敏感的，就算睇唔到都會感應到你冇拜。」
「咁唔通屋企一直好靜都係關你事？」
「係，因為凶宅通常都會有股陰氣包住，而有股陰氣包住之後就會隔絕左出面嘅聲，就好似一個結界咁，所以你會好難聽到出面嘅聲，除非真係好大聲。」
「原來一切都係由我開始，嗰陣我仲覺得個公仔幾得意諗住擺出黎...點知係好心做壞事。」
「都唔算係壞事呀，因為咁我先會同我恩人相認到。」
依刻嘅阿盈變到好nice，同琴晚凶狠嘅佢真係截然不同，以前好似都未試過平心靜氣咁同佢傾咁耐計，佢原來都可以好溫柔。
「都係嘅...」
但我仲係對以前啲記憶有啲模糊，記唔得起晒所有嘅細節。
「我仲有野想問，靈界同現實世界唔係分開架咩，點解我仲可以見到你，照計你係另一邊世界人係應該唔會見到先啱?」
「咁係因為靈體同人都係生處係同一個空間，我頭先都講過靈體算係由腦電波演變出黎，佢嘅能量好微弱，只有時運低嘅人先會容易見到。」
「但點解你仲可以掂到我而我又可以掂到你，照計你唔係會穿過個人架咩？」
「因為人見到靈體係可以將佢實體化，見唔到就會虛擬化，即見唔到嘅嗰啲人我地啲靈體就可以任意穿透，而物質我地就可以選擇掂到同掂唔到。」
「即係點…？」
「即就好似我可以穿牆，但我亦都可以拎起或者移動個杯嚇人。」
我O左嘴，咁同開外掛穿牆但可以拎幅牆黎避彈有咩分別。
「咁即係我算係時運低嘅人...? 咁我咪好易撞野?」
「應該都算係，你會變得敏感好易發現我地嘅存在，亦都容易俾其他靈體入侵或者跟蹤，你記得唔好亂咁去、唔好去埋啲死過人嘅地方，咁就冇咁易撞野。」
我依家先知原來自己係時運低嘅人，都咪話唔愕然...
「咁你呢，你係咪會長期留係度唔會走?」
「係，直至達成我想做嘅事，或者令我怨恨降低先得。」
「但係會有一個壞處...」
「乜野壞處?」
「就係同你一齊住我會慢慢咁吸走你啲陽氣，令我做到越黎越多嘅野，活動限制放寬。」
「下...咁我咪好快死...? 我聽講人冇晒陽氣會成個人虛晒，最後就會死，你就唔可以唔去吸我啲陽氣?」
「唔可以，因為靈體係會自動吸收，我控制唔到，但你放心，佢本身吸嘅速度好慢，我會再抑制自己減慢吸收嘅速度，你係我恩人我唔會害你，亦唔想睇到你咁快死。」
「咁萬一我啲陽氣真係俾你吸晒我係咪會死...? 同埋我點先可以令自己陽氣多啲唔俾你吸晒?」
「人嘅陽氣好難會去到完全冇晒，點都會淨返少少以供日常生活，只係你會面青口唇白、[color=#4d5156]眼圈發黑、眼無光澤，終日無精打釆，但我一定唔會俾你變到咁!」
「只要你平時間唔中裝下香，再加上你曬多啲太陽同做運動，你陽氣就會多返啲架啦。」
「死啦，我十年都唔做一次運動，咁我啲陽氣咪好快冇晒?」
可能亦都係咁令到我時運低。
「如果你嘅陽氣越黎越少，而我就越黎越多，咁樣我有機會可以上你身同吸收你嘅意識，所以你一定唔可以唔夠陽氣。」
「照咁講即係我點都要做下運動曬多啲太陽。」
「係。」[/color]
估唔到靈體嘅世界會係咁，我唔單止要曬下太陽仲要間唔中裝注香，都真係幾麻煩要我做啲我平時冇做開嘅野，
不過冇計啦，話晒以前都一場同學，我以前又係佢恩人，都唔想同佢作對，我信佢。但裝香方面，我一定唔可以俾老母知道，因為佢唔信邪，俾佢知道一定問長問短，仲會搞搞好多野。
「係呢，咁你點解以前要死？」
呢個問題我一直都好好奇，以前淨係睇新聞知佢係因頂唔順壓力而死，唔知佢詳細原因，依家終於有機會了解。
TL1596 2022-2-25 15:33
Hello樓主，你篇文應該係講緊主角同隻女鬼拍拖，寫得唔錯，加油:loveliness:
霸氣文哥 2022-2-25 15:49
[quote]原帖由 [i]TL1596[/i] 於 2022-2-25 03:33 PM 發表 [url=https://www.discuss.com.hk/redirect.php?goto=findpost&pid=545923304&ptid=30433205][img]https://www.discuss.com.hk/images/common/back.gif[/img][/url]
Hello樓主，你篇文應該係講緊主角同隻女鬼拍拖，寫得唔錯，加油:loveliness: [/quote]
世事都冇咁簡單😁 繼續支持💪
霸氣文哥 2022-2-26 13:53
第十章：死因真相
「呢...呢件事，係因為...嗚嗚...」
突然阿盈喊左出黎，我第一次親眼見到女鬼識喊，我靜靜地細聽住阿盈嘅苦處。
「因為學校本身已經有好多人恰我，返到屋企仲要受屋企人嘅氣，佢地一唔開心就會搵我黎出氣，打我、鬧我 、亦唔俾我同fd出去玩。」
「呢啲我都受、我忍，因為我孝心重唔想激佢地，覺得我唔激佢地應該會慢慢變好、佢地做嘅野應該都係為我好。」
「但佢地無變好到不特只，反而仲變本加厲，由初初只係因為成績唔好鬧我打我，去到之後乜都屈我、蠻不講理，明明唔係我做都會屈係我做。」
哇，佢成績仲會唔好！？佢已經拍得住學霸啦喎，佢考試冇80都有70分，估唔到佢屋企人咁高要求。
「乜都屈你?」
「係，係最令我唔開心嘅一件事，就係連同我多年感情嘅好姊妹竟然都背叛我... 佢有一日小息行埋黎屈我打佢，我根本唔知佢塊面點解腫晒。」
「之後我就俾人抓去記左小過、見埋家長，返到屋企佢地乜都唔理打左我先，我就算點解釋自己係俾人屈佢地都唔理...點解我條命會咁賤...」
「即管你話我脆弱小小事都要尋死都好啦，到最後我真係頂唔順，親情、友情乜野都冇晒，學校、家庭、朋友一個個都想我死，個q個都唔鐘意我。」
「我生存係呢個世界仲有咩意義，只係會乞人憎，我嗰一刻淨低嘅只係得返怨恨，我知道我死左之後就解脫，到時我一定要佢地冇好日子過！」
「之後有一日襯屋企冇人，我就閂晒所有門窗燒碳自殺，好快我就好舒服咁瞓著左，嗰一刻我終於可以得到解脫...」
真係估唔到原來阿盈嘅命運咁悲哀，唔怪得佢會因為受唔住壓力而自殺。
「你講嘅好姊妹，係咪隔離班嗰個Jenny?」
「係!」
「我之前係走廊經過見到佢同另外兩個女仔講你壞話，嗰陣我都唔多為意，點知原來最後竟然背叛左你...」
「嗚嗚...以前我地好fd嫁，點解佢會變到咁，點解要背叛我...」
阿盈一聽到佢好姊妹背後講佢壞話之後繼續哭泣，睇黎佢唔知佢好姊妹一直講佢壞話。
「唉節哀順變啦，佢只係個綠茶婊、機心女黎咋，嗰陣我仲見佢收左兩個女仔錢，我估應該係有人買通左佢去搞你，如果你未死，可能第時到你有男朋友，佢都會搶走埋你個男朋友。」
唉，有時女仔嘅姊妹感情都可以好脆弱，其中一方都會擁有一對機心眼，表面睇落好好感情，但實際就勾心鬥角，
或者漸漸變成你身邊嘅一個臥底，當佢摸清你嘅底細，到時機成熟嘅時候就會係你背後捅你一刀、做鳩你、反轉豬肚就係屎，十足宮庭戲，呢個就係女人嘅世界，女人心，海底針啊。
「嗚嗚，冇可能架... 以前我地成日痴埋一齊，佢係我唯一一個朋友，仲話過我有咩事佢會第一個黎幫我，佢點會因為一啲利益而去陷害我...」
「放低佢啦，我嗰日記得我親耳聽到佢講你壞話，話乜野平時見你又潺又瘦咁樣，一睇就知你貧血，啲血凝埋一舊，成隻乾屍咁，之後到佢收左錢之後又話平時都睇你唔順眼，想做你好耐。」
我聽講靈體係鐘意聽到個真相先會死得瞑目，所以我都一五一十咁講晒俾佢聽，唔想到佢死左都仲唔知佢好姊妹其實係佢背後做過啲壞事，佢根本就唔鐘意阿盈。
「點解...點解我要咁傻，去信一個一直都咁憎我嘅好姊妹...」
「係囉，你依家都知道左真相，咁就可以死得瞑目，同埋算啦，你依家都死左仲可以做到啲乜，不如快啲投胎啦，下一世子一定會做一條好漢!」
「唔可以!! 我要報仇，既然佢曾經對我咁衰，我要佢不得好死!!」
「但咁樣你會害死好多人...」
「你!! 方伯洋，唔好再幫佢地班仆街講好說話，唔係嘅話我嬲嬲地就會即刻上你身去報仇，我唔會再理乜野恩人。」
突然阿盈用一個凌厲嘅眼神兇鳩我、面目憎獰，亦都好大聲咁去訓示我，我仲feel到有股憤怒同殺氣嘅氣場，睇黎我嘅勸導失敗左，反而令到佢怨氣更加重...
我怯一怯之後唔敢再講野，講到佢可以立即奪走我嘅意識，恩人都冇情俾。
「對唔住，我語氣重左嚇親你，但我希望你唔好再幫住班衰人講好說話。」
「唔...唔緊要，我唔會再講。」
「阿洋，其實我有啲野想同你講，生前冇機會同你講，依家終於有機會同你講。」
「咩...咩事??」
「其實自從你之前幫完我，我發覺我鍾意左你...」
霸氣文哥 2022-2-27 14:15
第十一章：充滿愛慕的恩情
「下...??」
「我未俾人幫過，亦未鐘意過人，但嗰一刻你幫完我，我有一種好溫暖嘅感覺，覺得你份人好好，我唔相信呢個世上仲有好似你一樣咁好嘅人。」
「係你，係我跌到低谷嘅時候你經常都會助我一臂、你會俾安慰我，而你嘅命運亦同我差唔多，我嗰一刻好想之後都有你嘅幫助，好想痴住係你身邊、好想你保護，唔想你走。」
「但無奈我我先走一步，所有嘅愛慕都唔可能再實現，唯有死後希望有得撞得返你，以恩人嘅方式去代替同你相處、代替對你嘅愛慕，最後我地咁好彩竟然真係可以遇返，我仲要差啲殺死你。」
「而同恩人你相處嘅同時，我亦可以養精蓄銳去為自己去報仇。」
估唔到阿盈會因為我嘅少少幫忙而鍾意左我，我都估唔到，究竟點解嗰陣我會冇啦啦走去幫佢?
「原來係咁，我其實...」
「你唔洗俾答覆我，我唔需要答覆，我好明白依家嘅我死左同你係冇可能一齊，無論你答覆係接受定唔接受都好都唔重要了，我純粹表達返我生前唔敢表達出黎嘅說話出黎而已。」
當我想繼續講落去嘅時候，阿盈微笑著伸手掩住我個口，佢隻手從塊鏡伸左出黎。
我其實係想講我其實都只係幫左個小忙，應該係見大家同路人先幫一幫，點知就估唔到你會鍾意左我…
「總之一句講晒，呢刻你係我恩人，呢一世你都係我恩人，我會一路守護住你，我愛你...」
說罷阿盈就慢慢消失係我眼前，掩住我嘴嘅手亦慢慢消失，冰冷隨之散去。
「阿盈...」
當阿盈完全消失晒嘅時候，電力亦隨之恢復返晒，廁所燈、出面嘅燈、電視亦開返晒，成個廁所瞬間光猛返晒，而熱鬧亦都回復正常，就好似乜野事都冇發生過一樣。
「其實我只係一個廢人，我咁冇用邊配做你恩人、邊值得你去鐘意，我都真係幾愕然我呢個廢人都仲會有人鐘意、仲要係你呢個學霸，雖然我真係唔多記得清楚以前有咁幫過你。」
阿盈雖然消失左，但我仍然對住塊鏡喃喃自語。
我會咁諗係因為我自己的確好廢，以前係中學成人俾人恰都唔敢出聲，又俾人排斥，啲人會話我成身衰氣叫人唔好癡埋我度，
當然我唔知佢地係鳩屈定真係識睇相咁睇得出我成身衰氣啦，總之就個個都唔鐘意我，就連我EX都因為我廢又冇用又冇錢先離開我...
以為有女就大晒啦咩，佢地都識走架，佢地隨時都可以飛你，
自嗰排之後我就覺得自己更加廢，頹左一排，同阿盈一樣，覺得全世界嘅人都唔鐘意我，但我冇選擇睇唔開，因為嗰一刻我仲有一個朋友---阿誠。
係我低谷嗰陣佢拉返我上黎，一味係咁灌輸佢啲所謂「道理」我聽，同我講呢個世界大把女，我想要的話佢介紹返條俾我仲得，
而且得佢係唔介意我身上嘅「衰氣」，佢中一已經同我同班好玩得，但到中三佢就去左第二班，從此我係班上就成為邊緣人，之後就同阿盈嘅命運差唔多。
出到去之後，我走近個櫃望左一望，櫃入面個公仔依然係度，一對啡黑色嘅眼睛望住我，仿佛真係看守住我、覺得我係一個大好人。
「乜我真係值得你守護咩，我都只係一個邊緣人，以前你同我一齊上堂、一齊做邊緣人、一齊俾人恰，諗返起都好似係上一刻發生嘅事，估唔到呢一刻就變成你以呢個方式同我相處，大家雖然都係同一個空間，但已經人鬼殊途，諗返起都咪話唔感嘆。」
「以前我地都唔算話太熟，野亦都唔多講，更加咪講接觸，但就因為我幫過你嘅少少忙，你死左之後都對我恩重如山，仲為左我嗰少少嘅恩情去守護我，就咁樣就去守護我、鐘意我你真係值得咩? 我真係有咁偉大? 可唔可以話俾我聽有咩令你咁重視我?」
我對住個公仔自言自語講左一大堆感嘆嘅說話，但公仔依然冇任何反應，成間屋就只有電視發出嘅聲響。
.
.
.
過左冇幾耐我就眼瞓，又到上床瞓教嘅時間，諗唔明嘅野可能瞓一教就明。
[b]啪![/b]
我好快熄左床隔離盞燈，又變返做一片漆黑，但我冇再怕，因為呢一片漆黑都由「佢」黎守護住，我瞬間好似多左一份安全感。
然後我好快瞓著左... ...
突然我又去左一個熟悉嘅場景，
冇錯，係學校...
霸氣文哥 2022-2-28 13:55
第十二章：夢1/ 第一件恩情
呢一日轉堂後嘅小息依舊都係嬉來讓往，變得好熱鬧，因為我呢堂係選修科，所以全部人都要分晒去唔同嘅班房上堂，跟返佢嗰科去唔同班房上，
而落堂都有早有遲，有啲人可能要再上耐少少，都可以話係OT，有時因為個miss講唔切書會連成個小息都用埋，之後繼續上堂，都咪話唔chur，
就好似今日都已經放遲左少少，我要落去班房放低啲野先，之後仲要換衫，因為等陣要上PE堂，所以呢20分鐘小息都好快過。
正當我落到我嗰層，係走廊行緊去班房嗰陣，我見到有幾條友拎住件PE衫同筆袋從班房度衝左出黎，
「喂，快、快、快啲走，襯閪盈唔係度快啲將佢件PE衫同筆袋收埋唔好俾佢換。」
佢地好興奮咁衝左出黎，望都冇望到我，原來啲野係阿盈嘅，我望住佢地衝到走廊最後嗰排locker放左啲野入去然後閂埋門，但冇上鎖，應該嗰個locker本身冇人用，然後佢地就直接入左廁所換衫，
啱啱聽佢地講阿盈唔係度，我估佢應該仲未落堂，襯呢段時間我可以去locker拎返出黎俾佢，大家都係同路人冇理由唔幫佢，
同埋我睇唔過眼，俾著我都唔會鐘意咁俾人玩，加上我依家親眼見到，都冇理由就咁掂行掂過，呢次係我第一次幫佢。
然後我襯佢地未出黎就快快趣行去個locker拎返啲野出黎，我打開個locker，入面果然係空、係冇人用，唔怪得冇上鎖，
我拎返啲野閂返埋locker，之後我急步行返班房，費事俾佢地見到我拎返啲野出黎，之後我就會變左代罪羔羊即刻到我俾佢地玩，
到我返到班房之後，咁啱其他人都去晒換衫，得返阿盈係度好慌張咁周圍搵佢件衫同筆袋，原來佢已經返左黎，睇黎佢為呢件事好苦惱。
「喂阿盈，你件PE衫同筆袋啊，係呢度。」
見到阿盈後，我即刻示意佢件衫係我度，佢亦即刻望過黎我度。
「點解會係你度!?」
阿盈眼裡帶著恨意咁望住我，佢應該覺得係我偷左佢件衫。
「嗱，唔係我偷嫁，唔好凝住係我偷，我只係咁啱見傻強同蛇仔明拎左你件衫同筆袋放入locker，我先好心咁拎返俾你咋。」
「點解你要幫我?」
阿盈帶住懷疑嘅眼神望住我。
「冇啊，我見大家都係邊緣人咪幫下你，唔通眼白白咁睇住你冇衫換俾人罰咩，我自己作為邊緣人嘅都唔好受啦，好彩咁啱佢地去換衫咋，我先可以拎返件衫出黎俾你，唔係的話俾佢地見到實仆街。」
「我都算係冒住生命危險咁拎，唔會仲係度懷疑我掛，如果我同佢地同夥大可以唔同你講，由你冇衫換仲好啦，點解我仲要俾返你姐。」
我講完之後，佢嗰個懷疑嘅眼神就冇左，好似清楚左啲野咁。
「多...多謝你，原來係咁，我差啲怪錯你。」
「原來你都識得講多謝嘅，平時見你好靜都冇乜點聽你開過聲，以為你唔識講野淨係識得擺副厭世樣，其實你把聲都幾甜呀。」
「嗯...」
我講完阿盈塊臉紅晒，應該第一次聽到有人讚佢，同埋佢都算內斂，邊會估到我咁多野講，唔知有冇嚇親佢。
「唔講住啦，我去換衫先，你都快啲去換衫啦，就黎打鐘，以後你啲野放好啲唔好俾佢地見到你啲野放出黎，佢地實會再玩你。」
說罷我就拎住自己套PE衫急急腳行左出門口再行去廁所，然後佢都跟埋出黎。
「喂阿洋等埋，我都去換!!」
然後我地兩個都急急腳咁行去廁所換衫，我行到廁所佢就轉另一邊走廊行去女廁換，我入到廁所，佢地兩個已經唔係度，睇黎佢地已經換完走左，我撞唔到佢地都鬆一口氣。
回顧返啱先嘅情況，雖然阿盈成日都厭世樣冇乜表情，不過原來佢另一面都幾好啊，幾有禮貌~ 亦係我第一次見到佢嘅呢一面。
霸氣文哥 2022-3-1 14:18
第十三章：夢2/ 第二件恩情
[b]叮噹叮噹~[/b]
鐘聲響起歸家的訊號，又到放學嘅時候，個個都急不及待咁執好晒啲野走人，但肥傑就行左埋黎我度，
「喂洋腸方，借多兩舊水俾我，我遲啲還俾你。」
屌佢之前先借左我兩舊水都未還，依家又問我借多兩舊? 你當我on9架? 肥傑份人好鐘意問人借錢，見我易恰就成日問我借，都唔知佢係食粉仔定叫雞，成日都好等錢洗。
「下又借? 你之前嗰兩舊都未還俾我。」
「屌你之前嗰條數咪賒住先囉，家下我冇錢還俾你咩? 之後我先一併還俾你。」
頂佢的確係冇還過錢俾我，之前借一係就拖成年先還，一係就好似依家咁不了了之永無期限。
「你還左你嗰兩百俾我先啦，我今日冇帶錢出黎。」
「我屌你啦，你借唔借俾我呀，你唔借俾我我揼柒你，我今日先見你食lunch有錢俾，你咪撚呃鳩我啦。」
講完佢推左我一下，佢一問唔到我借錢就會郁手，同阿sir講佢會打得我更加甘，因為佢都幾肥又高大又惡咁所以我都怯左怯，同佢抽我實抽輸，所以平時我都唔多敢逆佢意，
你地聽完一定會話我好廢，係! 我的確好廢，我驚俾人打，我唔敢還手，我係冇膽鬼，
屌但真係估唔到今日lunch出去食會俾佢見到我俾錢，明明都已經坐得好遠...
「唉，俾你識穿左...咁你快啲還俾我啦...」
之後我就乖乖地係銀包拎左兩舊水出黎俾佢。
「咁樣先啱架嘛，係都要人迫先肯借，好聲好氣問你唔得嘅。」
「不過多謝晒，我會快啲還俾你架啦，拜拜。」
說罷佢就開心咁行左出門口走左，聽住先啦，我覺得佢下次會繼續問我借唔還，同埋我覺得我似佢嘅提款機多過似佢同學，唉鬼叫我咁冇用咩，做邊緣人預左俾人恰。
肥傑走左之後，我都準備執野走，但當我擰轉頭嘅時候，我見到對面角落頭嗰張台仲坐住一個人，佢趴住左係張台---係阿盈。
點解佢仲未走嘅? 唔通佢瞓著左? 我執好野之後就嘗試行過去睇下咩事，
當我接近阿盈嘅時候，我聽到有細細聲嘅啜泣聲，我終於知道咩事，然後我係書包度拎左張紙巾出黎。
「阿盈，做咩事，你喊緊?」
我拍一拍落佢肩膀，詢問佢咩事。
然後阿盈只係趴住搖左搖頭冇回答過我，而啜泣聲更加大聲。
「唔好喊啦，究竟發生咩事? 呢度得返我地兩個咋，冇其他人會聽到、會見到。」
之後阿盈就開始擰轉個頭望下我，佢對眼喊到腫晒，好紅。
「嗱，快啲抹乾啲眼淚先啦。」
見到咁樣我遞左張紙巾俾佢，佢亦都好願意咁接過我手上張紙巾。
「究竟發生咩事?」
「其實我條命係咪真係咁賤，要不停俾人恰，點解我要出世係呢個世界?」
「唔係架，每個人出世都有佢嘅價值，只係啲人睇我地唔順眼、鐘意玩針對姐，但其實我地有我地嘅優點。」
「由細到大我都俾人恰、俾人鬧，小學開始就已經開始排斥我，啲人會好鐘意係我背後講我壞話，又故意疏遠我，總覺得我係唔受歡迎。」
「到返到屋企，我屋企人係唔會理學校啲人點樣對我，淨係睇我啲成績，見到啲成績不如理想就會鬧我、打我，我真係好想宣洩啲不滿出黎，但點解永遠冇人明我...」
「我真係好憎自己，點解自己條命會咁賤，我都好想有朋友、好想正常咁同人有傾有笑、好想有人明白我，但冇...一個都冇，其實我呢條命係咪預左呢一世都會俾人恰、俾人排斥，亦都唔會有任何明白我嘅人?」
「我明架，我都知你好辛苦，我同你一樣都係邊緣人俾人恰，有時啲人鐘意講乜咪由佢講，我地又冇權控制佢把嘴，當耳邊風慣左就冇事架啦。」
「就好似肥傑啱先又迫完我借錢，其實我都冇乜野，只係覺得有少少唔gur，相信到聽日佢都唔會再對我做啲壞事，因為錢佢已經借左，如果佢再借，咪再借俾佢，最緊要和平相處到。」
「因為捱埋呢兩年就可以同佢地各行各路，我地讀得呢啲band3學校真係冇計，就當俾佢收下陀地。」
「凡事諗得正面啲就得架啦，唔洗理佢地，因為你同佢地作對佢地只會恰得你更犀利，所以都只能夠服從... 我地呢啲邊緣人係難生存啲...」
其實我講完呢一大堆野都唔知算係道理定歪理，完全係我個人嘅感受，要服從就會冇晒尊嚴，不過我本身個人都冇乜尊嚴，所以我都冇乜所謂。
「...但」
阿盈沉默左一陣之後再開口講野。
「佢地連我新買嘅書包都畫花晒，我好鐘意呢款架，用左600蚊買，呢600蚊我辛苦儲返黎，嗚嗚...」
說罷佢又喊起身，瞬間好似個小朋友咁將唔開心嘅野講出黎。
「哦，原來書包污糟左姐，仲以為佢地對你做左啲好嚴重嘅事，我幫你去抹下啦。」
望住佢個書包的確有唔同嘅筆跡，原子筆跡、粉筆跡、顏色筆跡都有，啲人都幾仆街，用咁多款筆黎畫。
「唔...唔洗啦，又要勞煩你，係我嘅事黎，不過你份人諗野都真係幾正面。」
「交俾我啦，你嘅事即係我嘅事，等我黎幫你啦，大家都係同路人嘛，我唔正面啲唔通日日放負咩，與其都俾人玩，倒不如自己都開心啲。」
說罷我就拎張紙巾去廁所唧啲洗手液再加少少水落去拎返去抹，筆跡好快慢慢散開。
「唔該晒你呀洋，你又幫左我一次。」
「洗乜多謝，以後有咩需要我幫忙都搵我啦，唔好自己一個諗埋一邊。」
「嗯。」
「好啦，依家唔早，快啲抹乾啲眼淚執野返歸啦，我有啲事要走先，拜拜。」
「拜拜。」
然後阿盈就終於露出一絲微笑點頭示意，亦對我講左聲拜拜。
呢一日就咁完結，我再一次幫左阿盈一個忙，感覺幫到同路人幾開心，而且仲了解左一啲阿盈嘅往事。
霸氣文哥 2022-3-2 13:14
第十四章：夢3/ 第三件恩情 (上)
Yeah！話咁快又到左考試嘅日，聽日就考試，一連九日都有得放半日， 每逢臨近考試前夕我都好開心，
但就係因為聽日開始考試，學校要我地今日要清晒locker啲野返去，否則就掉晒落校處署，到時就有排搵。
唉咁冇計啦，又要一袋二袋拎晒啲書返屋企，都唔知咁樣有乜好，拎晒返去都唔會溫架啦，之後又要全部拎返晒返學校，真係麻撚煩。
所以今日課室都有好多一袋二袋嘅書擺係地下，好多人都清晒出黎先，有啲就成疊書飛晒落地下，紙又有書又有真係七國咁亂，
不過有啲人就識玩，識得將啲書收係個圖書櫃入面先，其他書就收係其他位，咁就唔洗拎黎拎去，所以個書櫃好快就塞滿晒佢地清locker嘅書，但咁樣通常啲老師開櫃見到都會照叫人清走，搏唔過。
就係lunch嗰陣，我已經見到成個班房都係書，我就不鳥，我就等到放學先清，費事同人迫又搞到自己啲書同人調亂晒。
「喂洋腸方，出面街口出左間新野好似幾好味，我地快啲去試下啦！」
突然阿誠係我隔離搭住我搏頭，好興奮咁叫我去食飯。
「新野？點解我唔知嘅，咁拿拿聲去食啦。」
每當放lunch嗰陣都會好肚餓，所以食到咩都會覺得好味，今次仲要聽到話有新野食，緊係更加聽到都留口水啦。
但當我望住阿誠講野之時，我見到隔離班有個女仔入左黎企左係阿盈個位隔離拉開緊佢個書包唔知做乜，嗰陣阿盈唔係度，可能出左去清緊locker，
然而因為嗰陣阿誠拉住我而我又真係好肚餓，所以我都冇理咁多了，直接行走左，應該都唔會乜野大不了嘅事。
.
.
.
話咁快就食完返返學校，
「哇頂，呢餐真係好正，間野啲味道好到位，好撚飽，只係啲野就貴左少少，唔可以成日食，會食窮。」
我食完覺得今餐好回味係度讚嘆緊，呢個價錢食到啲咁正嘅野其實都抵嘅。
「你都覺呢，證明我冇介紹錯，呢間野其餘兩間分店攞米之連架，緊係貴啦高質野黎，你估人地唔識做生意咩。」
阿誠都認同地說道。
「知你識食啦，淨係識食睇下幾時食撚死你。」
「屌你啦你就死，我活到老食到老。」
「哈哈…」
串完阿誠返到班房之後，發覺又多左幾十袋書，班房更加散亂，啲人真係癡線架，其實有冇多書多到咁，都唔知係咪有啲人收埋啲鹹書搞到有咁多書拎走。
叮噹叮噹～
又到上堂嘅時候，我向住角落頭阿盈個位望左一眼，見到佢好慌張咁搵緊啲野，但唔知搵緊咩，
我諗左陣…大獲，唔通今日lunch嗰個女仔行近佢個位係偷佢野！？
過咗陣之後佢都係未搵到就急到喊咗出黎趴咗係張枱，miss講書咩都聽唔入耳，都係嘅，呢堂中文堂邊個唔悶到瞓教，聽唔聽都冇所謂嘅。
但見到咁我突然覺得自己好內疚，明明我見到個偷野過程發生但我就冇阻止到，搞到阿盈依家心情咁無助，我覺得自己真係要落地獄，好似做左人地嘅幫兇咁。
.
.
.
時間過得好快，就咁樣佢趴到放學，亦好彩啲老師係唔多理冇俾佢地抓到，
鐘聲一響起，miss講完一聲goodbye class而我地亦應返佢goodbye and thank you Miss Lee之後，個個就好快沖晒出門口閃人，淨低阿盈趴係度喊。
我執齊野慢慢行過去扮唔知咁問佢發生咩事，但其實我內心係帶住一股好深嘅內疚，每行一步都好沉重，好似唔敢面對佢咁…
「阿盈，你冇事嘛..？」
我慢慢行到阿盈隔離用手輕輕掂一下佢膊頭。
「我…我冇事呀…」
然後下一刻阿盈就突然彈左起身慌張咁搵紙巾出黎抹眼淚。
「仲話冇事，喊到隻眼腫晒，講俾我聽啦，發生咩事？」
「都話冇事，我突然覺得好感動咋嘛。」
點睇都知佢講緊大話啦，點會冇啦啦乜都冇做會感動到喊。
「係咪唔見左野..？」
仆街，我突然口快快講左啲唔應該講嘅野出口添！
「你點會知？」
然後阿盈用一個好奇嘅眼神凝視住我。
[[i] 本帖最後由 霸氣文哥 於 2022-3-2 01:16 PM 編輯 [/i]]
ddonna
*** 作者被禁止或刪除 內容自動屏蔽 ***
霸氣文哥 2022-3-3 14:02
第十五章：夢3/ 第三件恩情 (下)
「冇…我上堂嗰陣見你係咁搵野但搵極都搵唔到咪諗緊你係咪唔見左野所以係咁喊…係囉就係咁。」
我好緊張咁隱瞞住我所見嘅野唔敢講個事實俾佢聽，我知我好仆街，但始終我真係唔敢同佢講，唔敢承認自己害左佢，好似間接地做左人地嘅幫兇，唔想佢當左我同佢地係同一類人。
因為我擔心阿盈知道左個事實，佢會死都搵嗰條女出黎拎返嗰樣野、一樣屬於佢嘅野，我知道佢係一個遇著自己有損失嘅野佢點都要攞返個公道返黎嘅人，
因為以前有人偷佢野佢都試過死纏爛打叫人俾返佢，最後對方叫左成班人過黎玩鳩佢，而同老師講，啲老師就只係同佢講佢地係咁架啦，佢地同你玩下姐唔洗放係心，
嗰陣我係隔離聽到就已經知道啲老師係冇㨢用，啲老師應該係想小事化無唔想自己惹禍上身俾人搞所以下下護住佢地，所以同佢地篤灰乜用都冇，反而俾班仆街知道左仲惹黎一身禍。
而佢無憑無據條女一定唔會認，就算真係俾佢搵到證據又點，佢都一定唔會還，自己又做唔到啲乜，條女十足凱婷咁款，應該仲壞過凱婷，等陣佢吹雞叫晒成班兄弟姊妹過黎bully佢點算，個下場會更加慘，唔想佢去得罪嗰班人，
就好似水滸傳武大郎抓潘金蓮姦嗰幕咁，自己個老婆同左西門慶通姦、一樣屬於自己嘅野俾人搶左，亦戴左頂綠帽，都冇可能話送過另一條靚女俾佢就當冇事啦，
如果當初佢冇去抓姦就唔會俾西門慶打死啦，而佢唔知佢老婆去左通姦就唔會死都走去抓姦，最多佢老婆要走咪俾佢走，所以依家都係唔講個事實俾佢先為好。
「原來係咁，我的確唔見左野…」
「唔見左啲咩？」
「我張500蚊唔見左…」
原來我諗左咁多野佢只係唔見左張500蚊姐
「仲以為你有咩唔見左，原來係唔見左張500蚊姐，錢可以再賺返黎架嘛～」
「唔係你諗得咁簡單架，呢500蚊好重要！」
突然阿盈表現出一陣激動。
「呢500蚊係我儲返黎嘅零用黎，呢幾日我老豆個心臟有少少痛唔知咩事，而我應承左佢今日放學會同佢去睇醫生，但依家連嗰500蚊都唔見埋，我又冇銀行戶口，佢又話今日唔會帶錢出街，咁我仲點同佢睇…」
原來阿盈係個孝順女黎，平時見佢都好慳，日日lunch都寧願留係學校食廿多蚊嘅狗飯，未見過佢出過一次去食，今次竟然捨得一次過拎500蚊出黎同佢老豆睇醫生，真係好孝順，呢一次銀包大出血應該會搞到佢乾涸咁濟，同埋連銀行戶口都冇，應該仲窮過我。
「500蚊姐，咁啱我銀包有張500，我借住俾你先啦，以後你慢慢還，還唔到都唔緊要架，你睇醫生緊要～」
我係褲袋掏出個銀包打開睇下入面有幾多錢再拎左張500蚊出黎遞俾佢。
「…我點好意思收你呢500蚊...？」
說罷阿盈感到一陣愕然咁望住我。
「拎住啦，我地都係同是天涯淪落人，有咩事緊係互相幫助架啦，況且你經濟有困難還唔到咪算當幫下你～」
「好啦…多謝你…阿洋…」
然後佢終於緩慢咁拎左嗰500蚊，塊臉亦瞬間紅晒唔敢望住我。
「但話就咁話姐，我點可以唔還俾你，有借有還天經地義架嘛，我一定會還俾你…」
佢繼續唔敢望住我怕醜地說道。
「傻妹，你真係可以唔洗還俾我架，我雖然都冇乜錢，但我可以去搵野做賺返返黎架嘛，500蚊一日賺返返黎啦，同埋呢500蚊未至於係我全部嘅積蓄。」
我繼續口爽爽地講，其實呢500蚊已經用左我差唔多4分1積蓄，但為左彌補返我好似間接地害左佢呢條罪，我用呢500蚊黎幫佢救急，其實都值，鬼叫我一開頭望住佢啲野俾人偷乜都唔理咩。
「我唔理，總之我之後一定會還返呢500蚊俾你，你等我！」
阿盈好堅決咁話一定會還返俾我，睇得出佢係一個十分之有借有還嘅人。
「好啦好啦，咁你還得到就還啦。」
「不過我真係要多謝你，唔係你我今日都同唔到我老豆睇醫生，你真係好好，我都唔知點答謝你…」
「傻嘅，洗乜答謝，話唔定遲下我都有野要搵你幫手呢，如果你要答謝，咪當咁樣就係答謝～」
「好啊，咁你要幫手就即刻同我講啦，唔好一個人頂晒，話晒我唔係你身邊嘅女人，我唔會時刻知你會有咩困難…」
說罷阿盈塊臉又再次變到好紅，講到最後聲線亦明顯收細。
「我身邊得男人咋，邊度有女人，有咩困難通常都淨係搵阿誠傾，不過由今日起我應承你啦，下次遇到困難搵左你先，咁你咪有機會答謝我。」
唔知點解阿盈聽完我咁講之後就變到好怕醜咁微笑。
不過話就咁話，我邊敢奢求咩答謝，我自己都係一個帶罪之身，依家只係彌補緊佢，更何況我困難都唔算多。
「嗯，咁好啦…咁我聽住先架啦～以後你有咩困難我都會盡力幫你。」
「好啦好啦，時間唔早啦，你要快啲陪你老豆去睇醫生。」
說罷阿盈突然企起攬左過黎，我深深地感受到佢嘅體溫、細嫩嘅肌膚貼住我塊臉，而我心跳亦跳得有少少快。
「多謝你，多謝你無條件地幫左我咁多次。」
阿盈係我耳邊輕聲地再次道謝我。
「傻妹黎，咪話過只係互相幫助囉，都係舉手之勞。」
「你陪我落埋去診所附近好冇？」
「好…好啊。」
最後阿盈竟然提出呢個請求，想我陪埋佢落去診所附近，我見我返到去都冇野做，可以陪佢行一陣嘅。
之後我地好快就行左出課室陪佢行去診所附近，沿途我地都有講有笑，亦對阿盈了解深左，原來阿盈佢都有活潑嘅一面～
霸氣文哥 2022-3-4 15:51
第十六章：重現
一股刺眼嘅光線刺入我對眼，我緩緩打開眼，原來依家已經差唔多晏晝，出面好猛太陽，我睇下架鐘，已經11點半，明明琴晚都算早瞓但都瞓左成十個鐘，
但好靜，屋企依然好靜係得我一個係度，
我慢慢諗返起，可能係因為我發左嗰3個夢，而呢3個夢都關阿盈事，所以瞓左咁耐，
但我終於記返起晒以前同阿盈嘅經歷，原來我以前真係幫過佢咁多、原來以前我地係咁樣熟絡，果然真係瞓一教乜野都明晒。
我落床慢慢行到放公仔個櫃面前，望住阿盈依附嗰隻公仔，佢依然坐住係度用一對黑黑嘅眼向前望住我，但我仿佛對呢隻公仔入面嘅”佢”有左多一份了解，唔再係琴日陌生嘅佢。
「阿盈，琴晚係咪你報夢俾我？你係咪好想我記起我以前幫你嗰陣係點？」
我對住面前個公仔自然自語，但依家冇任何動靜、依然寂靜一片。
「我記起晒啦，原來我每次係你有危難嗰陣都會扶你一把，因為我地係同路人。」
「但可惜，你已經先行一步，我再都幫唔到你、我再都唔可以好似以前咁過黎安慰你同你傾下計。」
我慢慢控制唔住望住個公仔喊左出黎，點解我一開始就唔可以快啲記起佢，唔知道依家我係咪以後都冇得再見到佢，淨係可以感受到佢嘅存在。
喊左一陣稍為平復嘅時候我就去左廁所梳洗，係我洗面望住塊鏡嘅時候，燈突然眨左一下，
當我眨左下眼之後，鏡入面突然多左個著白衫披長髮嘅女仔，係自然反應下我都嚇左一嚇，係阿盈。
今次佢出現頭髮冇再遮住塊臉，頭髮整齊左，俾我清楚見到佢五觀，所以我一眼就能夠認出，但唯獨有一樣不變就係佢面色依然咁蒼白，成個素顏樣咁，燈亦冇熄滅。
「睇下你，喊到成個喊包咁。」
「係…係阿盈你？」
我當刻見到即刻睜大雙眼，一時俾唔到反應，然後我慢慢擰轉後面，隨之而黎嘅就係控制唔到嘅淚水又再流出黎。
「我真係見到你…而唔再淨係係塊鏡入面見到，我係咪發緊夢…？」
「你唔係發夢啊，你係真係見到我。」
然後我二話不說就攬去佢度，而我又真係可以攬到，但身體有啲冰冷。
「阿盈你知唔知我好掛住你，我以為以後都再見唔到你…」
平時啲人見到鬼都會好驚，但我見到嘅呢隻鬼，反而令我感到安心同開心。
「傻嘅，我依家係鬼魂黎啦嘛，而且你時運又麻麻，你隨時都會見到我架。」
係喎，我都唔記得左我時運麻麻好易見到嗰啲野。
「咁點解我啱先對住公仔講野又唔見你？」
「因為我特登唔現身住想睇下你講乜～」
「頂你原來你玩我，等我仲驚以後都見唔到你係度喊。」
一陣激動之後我隨即放下心頭大石，因為我隨時都可以見到阿盈。
「乜你真係好掛住我咩，之前唔係好驚我架咩？」
「係啊，我真係好掛住你，我終於記返起以前對你做過啲乜，我唔想以後都見你唔到…」
講下講下然後我又喊左出黎。
「哈哈，都話你喊包架啦。」
然後我俾佢打斷左，雖然佢串我，不過我好耐冇見佢笑得咁開心。
「邊…邊度係，你就真係喊包啦，你唔記得中學嗰陣啦咩，成日放學喊都係由我黎安慰返你。」
「乜依家啲人咁記仇架咩，中學嘅野你都仲記得，不過以前嘅我死左啦，依家嘅我唔會再成日喊，因為我已經解脫左～」
唔知點解聽到佢咁講我個心都會有少少隱隱作痛，但聽到佢唔會再喊即佢依家係第二個世界都過得好開心，唔會再好似以前咁俾人恰，我都會為佢感到開心。
「緊係記得啦，你冇耐之前先報完夢俾我…」
「係喎講起夢，你琴晚係咪報夢俾我？」
我要問返啱先佢打斷我繼續想問嘅野。
「嗯…冇錯啊，我的確報左夢俾你，我唔報夢俾你你又點會記得你以前對我做過啲乜，我叫得你做恩人就緊係想你都知道以前做過啲乜，唔想你覺得淨係得個名，你算係我嘅支柱黎架。」
「同埋聽到你琴晚話你自己唔配我鐘意你，我更加要俾你睇到你係配，因為你真係好好。」
「我睇到啊，但我嗰陣只係小小嘅舉動…」
「你唔洗講咁多啦，就係你呢個小小嘅舉動都能夠令我撐住同得到安慰，令我知道原來身邊仲有個愛護住自己嘅人。」
我未講完阿盈已經打斷左我。
「但可惜…可惜嗰500蚊我冇辦法再還到俾你，我話過一定會還俾你架嘛，我最後都做唔到。」
突然阿盈表現到好失落，但講起嗰500蚊，我股愧疚感隨之湧上黎，冇估到佢會突然之間提起，而我一時間亦唔知可以講啲乜…
「正因為我冇辦法再還，依家唯有透過報恩黎還俾你，你以後都係我恩人。」
…
「你唔洗對我咁好架…其實...其實我係一個壞人、我傷害過你、我呃過你、我對你唔住，我唔配做你恩人…」
沉默一陣之後我終於將我感到罪疚嘅野講左出黎，呢段日子一直收埋呢件事我心都好唔舒服，
就算前排冇左呢段記憶都好，我個心都會莫名奇妙地唔舒服，好似有心事咁，但又諗唔起係乜，呢一刻我終於忍唔住將呢堆唔舒服嘅野吐出黎，呢件事始終唔可以收埋一世。
moon1999 2022-3-4 23:39
[quote]原帖由 [i]霸氣文哥[/i] 於 2022-3-4 03:51 PM 發表 [url=https://www.discuss.com.hk/redirect.php?goto=findpost&pid=546171420&ptid=30433205][img]https://www.discuss.com.hk/images/common/back.gif[/img][/url]
第十六章：重現
一股刺眼嘅光線刺入我對眼，我緩緩打開眼，原來依家已經差唔多晏晝，出面好猛太陽，我睇下架鐘，已經11點半，明明琴晚都算早瞓但都瞓左成十個鐘，
但好靜，屋企依然好靜係得我一個係度，
我慢慢諗返起，可能係因為我發左嗰3個夢，而呢3個夢都關阿盈事，所以瞓左咁耐，
但我終於記返起晒以前同阿盈嘅經歷，原來我以前真係幫過佢咁多、原來以前我地係咁樣熟絡，果然真係瞓一教乜野都明晒。 ... [/quote]
仲有冇呢🙈🙈
霸氣文哥 2022-3-4 23:59
[quote]原帖由 [i]moon1999[/i] 於 2022-3-4 11:39 PM 發表 [url=https://www.discuss.com.hk/redirect.php?goto=findpost&pid=546185154&ptid=30433205][img]https://www.discuss.com.hk/images/common/back.gif[/img][/url]
仲有冇呢🙈🙈 [/quote]
有啊 有排都未完 放心🤣