春日跳動的草裙 2022-4-18 15:36
話說之前Txx Onx個官網搞活動，三折買咗佢三樓一間A開頭水晶舖嘅現金券。攞咗券之後就上去諗住睇下同買嘢啦。上到去佢個職員就係個倉度攞咗啲唔同size嘅手繩俾我試。佢就話現貨手繩得返幾個尺寸，同埋係standard，可以訂啱自己嘅size，於是就滿心歡喜咁訂啦。
訂緊嗰陣就同個職員講埋我地係用現金券嘅。因為費事到時攞貨嗰陣俾佢有藉口話訂嗰陣冇講唔俾用。嗰職員馬上就已經轉咗態度，打電話俾類似老闆或者經理嘅人，問點處理同埋需唔需要俾訂金之類。收線之後是但係隔離攞本簿，寫低我地要咩款，尺寸同聯絡資料咁。問佢大約幾時有得攞，就話一至兩個星期會WhatsApp我地攞貨。
之後過咗兩個星期，一啲消息都冇，Facebook或者電話問都係話未有，話急需可以上門市揀現貨。
再過多幾日行街經過順便上去問下啦，佢就話未有，可以考慮門市貨品。跟住問佢以前訂貨嗰陣有攞過啲全新嘅現貨俾過我試，佢就話冇曬，只可以揀show出黎嗰啲 (即陳列品)。咁我當然唔要啦，諗住再等多陣，可以攞訂咗嗰啲貨。
最後過多一個禮拜，終於收到佢WhatsApp通知，話預訂嘅嘢已經售罄，叫我上返門市揀現貨。問清楚啲，又話水晶同手繩係季節性缺貨(心諗手繩都有季節性？)，我話可以等，佢就話真係冇辦法，要我上返門市揀。
之後聯絡返商場，因為啲券係經商場出。商場都話間舖唔啱，但係佢地都做唔到啲乜。
最後都係上返佢度揀返啲擺係嗰度好耐嘅陳列品。咁啱見到有人訂貨去取貨，人地係有張收據去取貨嘅。即係其實間鋪頭一開始知道我係用券就冇諗過幫我訂貨，hea夠咁耐就通知你冇貨，再逼你買陳列品。
雖然我係好平咁買啲券返黎，但係唔代表我要幫你清你啲陳列品，仲要係尺寸唔啱！如果做唔起優惠可以唔做，賣返原價，冇人會怪你！而唔係咁去取巧！真係好嬲！