查看完整版本 : #7 點解三晉領土如鋸齒一樣交錯??? 分析趙魏韓領土實際情況 (下)

瑯琊王氏 2022-7-31 07:50

[img]https://upload.cc/i1/2022/07/19/Laq6TB.jpg[/img]

之前講過 , 晉國可以係春秋之世慢慢走向強大 ,
就係因為山西高原成為自然屏障 , 只要晉國係山西高原中既 6塊盤地
慢慢開發 , 其他國家其實好難攻入晉國呢個核心區 ...

不過 , 因為山西高原有 6塊盤地 , 同時又頗易形成內部分裂 ,
因為咁出現左早期既 "曲沃代晉" , 又出現晉國六卿 , 乃至三家分晉
... 後來 , 趙魏韓三家單單山西高原核心區來講 ,
領土分佈如下 :

之前講過 , 6塊盤地中有 5塊 , 都由汾河所相連 ,
由北至南分別為大同盤地  沂定盤地  太原盤地  臨汾盤地  運城盤地
魏氏初封係運城盤地既東部 , 韓氏初封則係臨汾盤地北部 ...
但問題係 , 臨汾  運城雖然分為兩個盤地 ,
但實際地理阻隔較細 ... 而係日後發展中 , 魏氏就吞併左臨汾盤地

相反 , 趙氏本來初封係臨汾盤地西部 , 但佢地好早就將發展定係北方
決心經營北面既大同  沂定  太原盤地 3大盤地 ...
之前講過 , 係西周時所分封既山西諸國 , 本身都無超過臨汾盤地 ,
趙氏就等於係 , 整個晉國北部既開拓者 ...

而事實上 , 大同盤地因為同北方草原 , 無等別大既地理阻隔 ,
受北方民族影響 , 當地人一直係以農牧混合方式生活 , 呢個亦係後來
趙武靈王可以推行 "胡服騎射" 既原因之一

韓氏基本上 , 己經中被擠出汾河一線既 5大盤地 ,
唯一保有既只有東面既長治盤地 ... 論面積 , 其實長治盤地幾乎等於
汾河 5大盤地既總和 , 但其實內部地勢不平坦   較難開發 ,
所以韓氏後來真正既核心區 , 根本唔係山西高原 ,
而係係晉國後來擴張出黎既地區 ...
值得一提既係 , 若以行政單位稱呼 , 長治盤地就即係 "上黨郡"

而事實上 , 其實趙國既邯鄲  魏國既大梁 , 都己經唔係山西境內 ...
所以下一次 , 就會講埋三晉係山西以既領土分佈

[url=https://www.youtube.com/watch?v=RXbLzwP991c]https://www.youtube.com/watch?v=RXbLzwP991c[/url]

[[i] 本帖最後由 瑯琊王氏 於 2022-8-2 07:57 編輯 [/i]]

瑯琊王氏 2022-7-31 13:07

小弟之前睇到 , 中山國其實係山西盤地比趙國壓迫 ,
出逃到河北平原既戎人 , 以至最終華夏化既國家 ...

最近我睇到 , 原來有另一批戎人係大同平原華夏化 ,
並建立左代國 ... 當然 , 係趙武靈王後期 ,
又封左比佢一個仔 , 搞到大亂拉

另外 , 北魏前身既代國 , 就係劉琨應許下進入代地

瑯琊王氏 2022-7-31 18:19

另外,小弟最近睇資料見到,戰國中期既齊國,
北己經擴張到濟水,南與楚國接壤,西就到宋國。。。

所以齊國吞宋,係好大程度其實係必然既。。。
濟水以西北有燕 中山 趙三國,如果攻取趙國部份,
一來與趙國敵,二來會比中山 魏國夾擊;
如果攻取中山國,又會比燕 趙夾擊。。。結果攻燕,
都比幾個干預吐返出來

南邊同楚國小打小鬧係可以,但真係對著幹會好大鑊,
始終楚國戰國中期三強之一,體量唔比齊國細。。。
所以攻宋其實係唯一選項!

瑯琊王氏 2022-8-1 08:09

小弟最近 , 因為睇左好多先秦政治地理視頻 ,
就唸住將有關知識 , 套入去其他時代 , 特別係十六國時代 ...

一經代入 , 有兩個地區先秦時代未被發展 ,
一個係諸涼所在既河西地區 , 一個係匈奴鐵弗部所在既河套地區
(咁當然 , 仲有成漢所在既四川地區 ^.^" )

其他如#2所講代國的 "代" , 就係大同盤地 ;
西秦所在既隴右地區 , 其實就係平王東遷前既秦國初封地區 ...
北燕  乃至王浚以及五代既劉燕 , 既範圍同燕國都幾似 ;
南燕就有少少似春秋時既齊國 ...

瑯琊王氏 2022-8-1 13:42

其實有一點,小弟覺得好奇怪。。。


就係封係河北平原既燕國,點解咁多年都無點向向擴張,反而擴左去遼東果邊?

瑯琊王氏 2022-8-1 19:09

好奇一問 , 五代十國中的馬楚 , 其實有無統治楚國的核心--江漢平原???
我看到一些地圖 , 它只僅僅長江為界 ... ^.^"

瑯琊王氏 2022-8-2 08:00

[img]https://upload.cc/i1/2022/07/28/YlpmC4.jpg[/img]
[img]https://upload.cc/i1/2022/07/28/L2S9Ak.jpg[/img]
[img]https://upload.cc/i1/2022/07/28/DnMR0E.jpg[/img]

三晉既領土 , 除左原晉國基本核心既山西高原 6塊盤地外 ,
最主要既就係 , 山西高原到黃河邊上既河北平原 ... 不過事先聲明 ,
此 "河北平原" 不同於今時今日既河北平原 ,
因為果時既黃河仲未改道 , 當年佢係經今日既濟水入海 ,
簡潔 D講 , 就係當年既 "河北平原" , 大概等於今日既河北平原 ,
由東北至西南打斜咁分為兩半後 , 西北果一半 ...

其中 , 山西高原東南部同黃河之間 , 形成一條狹長既平原 ,
稱為 "南陽之地" ... 多嘴提一提 , "南陽之地" 同楚國既 "南陽盆地"
完全係兩樣野 , 千萬唔好撈亂 ^.^"

因為臨汾  運城盤地唔太方便經黃河出中原 ,
反而經一條東西向既山道 , 入 "南陽之地" 會更加方便 ,
所以南陽之地好理所當然地 , 好早就比晉國所吞併 , 到三家分晉時 ,
南陽之地既西部就分左比韓國 , 東部就分左比魏國 ...
咁樣 , 韓國由南陽之地西部 , 就可以連通北面既上黨郡(長治盤地) ,
南面又連接後來吞併既鄭國土地(黃河以南) ,
事實上 ... 韓國後來既首都 , 都己經搬到鄭國故都--新鄭之上 ^.^"

或者眼尖既觀眾 , 可以睇到問題所在 ...
魏國既領土好似並不相連 ^.^" 岩架 ... 其實魏國後來既核心 ,
都己經跳出左山西高原 , 係南陽之地東部再往東北既河北平原南部 ,
都係魏國既領土 , 以漳水為界以南為魏國領土 ,
以北就係趙國領土 ...

而係臨近分界線 , 魏國就營建左一個重要城市--鄴城 ...
至此 , 南陽之地東部  河北平原南部 ,
黃河以南  後期都城--大梁地區 , 就形成左魏國既東部領土 ; 問題係
佢地同原核心既臨汾  運城盤地 , 以及伐秦得來既河西之地 ,
所以組成既西部領土 , 係點計都並不相連 ^.^"

因為魏國係上黨郡(長治盤地)仲有兩三座城 , 所以唔少人將魏國領土
畫成 "n" 字形 ... 但UP主認為 ,
果兩三座城視為後補 / 最後交通線還可以 , 但正常既軍事  經濟運輸
都唔可能用一條咁長  咁崎嶇既山路 ...
魏國既東西兩部份領土 , 正常運輸只可能係通過韓國 !!! ^.^"

至於趙國 ... 其實#1同上半部都己經講左大半 ,
佢既領土就係山西高原北部既三大盆地 , 及漳水以北既一段河北平原
事實上 , 其後期首都邯鄲就位於呢一個地區 ...
但呢一個地區 , 整體上都仲算係河北平原南部 , 而河北平原既北部 ,
就係係燕國同中山國手中 ...

燕國之前幾篇文章度講過勒 , 而中山國呢 ,
其實係由夷狄華夏化既結果 ... 但都唔係河北平原原住民既東夷族群
反而係由晉國內部 , 向北部  東部四塊盆地擴張時 ,
所迫出黎既民族 ... 係度補一補充 , 迫出黎既民族唔只成為中山國 ,
可能更大部份己經北上 , 成為左後來匈奴既一部份
而後來 , 趙國就更加吞併埋中山國 , 同燕國直接接壤 ...
而改道前既黃河以東地區(即今日河北平原東南部) , 基本己全屬齊國
頁: [1]
查看完整版本: #7 點解三晉領土如鋸齒一樣交錯??? 分析趙魏韓領土實際情況 (下)