奴才 2022-9-25 15:49
尋晚同老公傾訴，我話:每次個仔個女犯錯少少嘢你都鬧，我企喺隔離覺得好尷尬，你個仔我無權干涉，對住個女，我又無可能唔理，佢每次畀你鬧都望住我，我每次都企喺你呢邊叫個女道歉。
其實我個心好唔舒服，每次都因為少少事情，佢嘅語氣都會令小朋友個心情從天堂跌落谷底，而我又唔可以損失佢做佬豆嘅尊嚴。
尋晚同老公傾訴到凌晨，我想將心底嘅石頭清出嚟。有兩個問題令到我將傾訴變嗌交1:“我有無當住佢地面唔尊重過你媽媽同你個仔？”佢答:“幾年前我仔話你有唔尊重佢”。我問:“幾年前？係咩事呢？我都幾好奇。”佢話:“我都唔知點講，咁多年了，依家講番出嚟盞嗌交嘅喈”。我話:“你既然講到係幾年前了，我又唔係為咗嗌交，係真係想知道我究竟做咗啲咩會令你仔覺得我無尊重佢。”佢話:“算了，唔講了”。
第二件事:佢話佢都好大壓力，佢一直覺得我嫌佢窮。我話:“你覺得我嫌你窮？我有無真係嫌過你窮？有無同你講過離開你？有無因為買唔起任何嘢而發過脾氣？”佢話:“哪，我講我感受，你又唔認同，你講咁多米就係覺得你自己啱嗮咯”。我真係覺得攪笑死，一個高帽壓落嚟，唔畀我問理由。就因為覺得當時我兩年前住劏房時申訴過碌架牀瞓得好唔舒服，轉身同伸直瞓都做唔到（兩箱衫擺埋上去），令到我腰酸背痛。就呢啲當時嘅感受嘅說話，佢怪責到我依家。話我一直嫌佢窮。呵呵……但係佢知道，我從生完BB無坐月一直自己帶，無任何人幫過我。我腰骨一直都酸痛，八年了……痛足八年!!兩年前我當時瞓得唔舒服向佢申訴下，好正常吧？？兩夫妻嚄!要交心嘅啵!!？或者係我一廂情願喈，人地根本唔想聽到我講唔好嘅嘢。
就連尋晚，我同佢傾心事，我話:“你可唔可以無咁敷衍我？ 嗯～哦～係～......? 佢話:“精神病醫生同精神病人傾偈都係要順住對方講嘅㗎啦”。呵呵.... 我話:“咁你就當我係精神病人吧，我以後都唔會再同你談任何心事”。佢話:“呵呵.. 哪，係咪呢，呵呵.. 根本無得講”。
係吖，根本無得講。