查看完整版本 : 橫頭磡徒置區 連環不幸事件

[align=left]之前喺囡囡安排下我離開香港到另一個地方生活，期間經過不斷努力嘗試同新環境、新事物互相適應同磨合之後，最近終於總算叫做可以安頓返落嚟。受到呢邊慶祝萬聖節嘅熱烈氣氛所影響，人在異鄉又閒來無事，就心思思咁想喺呢度同大家分享下後生嗰陣喺橫頭磡徒置區遇到嘅靈異經歷。[/align]
[align=left]當年嘅橫頭磡徒置區總共有26座，覆蓋嘅範圍之大，除咗基本依家嘅橫頭磡邨之外，仲包括埋樂富邨、富強苑、德強苑等地方。我唔係橫頭磡嘅原居民，嗰陣我原本住喺深水埗嘅板間房，後來經房署派廉租屋派咗我去橫頭磡第24座。不過因為徒置區需要拆卸重建嘅關係，當年我一路住一路睇住其他嗰幾座一座一座咁拆，數數手指，我喺嗰度其實前前後後住咗真係連十年都冇。[/align]
[align=left]雖然時間咁短，但係唔知係咪受徒置區前身係亂葬崗同墳場所影響，我喺嗰度嘅靈異經歷加加埋埋就已經佔咗我至今遇到嘅經歷八成以上。當中嘅經歷雖然係甜酸苦辣、有喜有悲，但可能因為我自小生活刻苦、性格又比較悲觀，對於一啲唔好嘅經歷，記憶同感受始終都比較深刻。再加上當時啱啱搬完屋又未揾到新工，對於新嘅居住環境又唔係好適應(最簡單每日上上落落都要行七層樓梯同埋嗰個臭X到仆街嘅廁所就已經夠攞命啦!)，所以就用咗「連環不幸事件」作為今次經歷分享嘅題目。[/align]
[align=left]另外，我都知道自己講啲嘢年代太久遠，一啲年輕嘅網友對舊時徒置區嘅生活環境等可能認識不深。所以我喺分享經歷嘅同時都會試下喺網上揾一啲昔日嘅相或者圖片嚟協助我解釋當時嘅情況，希望可以補足我文筆上嘅力有不逮。[/align]
[align=left](一) 八嬸 (#2 - #3)[/align]
[align=left](二) 樓下有人 (#6)[/align]
[align=left](三) 唔該借歪 (#8)[/align]
[align=left](四) 「人」不可以貌相 (#9, #11)[/align]
[align=left](五) 玩具 (#14 - #15, #18, #21, #23, #25)[/align]
[align=left](六) 搬家 (#27)[/align]
[align=left](七) 偶遇 (#30 - #32, #40)[/align]
[align=left](八) 磨較剪鏟刀 (#43, #53 - #54, #60, #66, #68, #79, #85, #88, #96, #103, #107, #112)[/align]
[align=left](九) 公仔紙 (#132, #138, #141, #146, #154, #165, #169, #174, #177, #181, #184)[/align]
[align=left](十) 心債 (#187, #192, #194, #197, #204, #208, #212, #219, #223, #230, #237, #242, #260, #262, #264, #271, #277)[/align]
[align=left]
[img]https://live.staticflickr.com/8280/27936434333_5ee7e1909f_b.jpg[/img]
橫頭磡徒置區第24座[/align]
[align=left]圖片來源：[url=https://www.flickriver.com/photos/132746491@N05/27936434333/#]https://www.flickriver.com/photos/132746491@N05/27936434333/#[/url][/align]

[[i] 本帖最後由 default2046 於 2022-12-14 08:48 編輯 [/i]]

(一) 八嬸

當年我啱啱搬入橫頭磡，第一個識嘅街坊就係住喺我隔離嘅王師奶(佢三十幾歲咁上下，個樣有啲似依家ViuTV個「娟姐」)。記得當時我拎住啲家當䟫足七層樓梯，搞到成頭大汗、上氣不接下氣去到新屋門口時，王師奶個七、八歲嘅仔啱啱跳跳紮紮咁喺隔離屋走出嚟，轉頭見到我就好好奇咁問：「咦? 哥哥你新搬嚟㗎?」之後王師奶都跟住行咗出嚟，大家互相打聲招呼客套一番，傾咗一陣，知道咗佢哋一家四口(兩公婆加埋兩個細路)已經住咗喺呢度好耐，王師奶仲好好人咁比咗杯水我飲同借咗把掃把比我，仲教我可以去對面23座樓下間衣紙舖度買啲嘢拜下四角咁。

我見間屋啲灰塵都算幾多下，好似丟空咗一排好耐冇人住咁，就隨口問：「咦? 呢度之前嗰家人好似搬走咗好耐咁喎?」
「阿全你自己一個人住㗎?」王師奶反問。
「唔係呀，我仲有隻貓㗎，等我執好呢度就帶埋佢過嚟㗎啦!」我答。
「好呀! 我都鐘意貓呀!」王師奶個仔「明仔」插嘴。
「呀! 我都趕住去買餸同埋湊仔放學啦! 遲啲再講啦!」跟住就拖住明仔落咗樓。

言歸正傳，喺王師奶間屋再隔離幾個單位住咗個老婆婆叫「八嬸」。八嬸佢原本同老公同個仔一齊住，之後佢老公年紀大走咗，跟住個仔娶咗老婆，不過個新抱同八嬸又成日鬧交，個仔同新抱就自己搬咗出去，剩低八嬸一個人自己住。當年八嬸都叫做自己行得走得，而且鄰里之間關係又好，大家守望相助，即使獨居，八嬸喺日常生活上都冇乜大問題。

嗰日我出門口去揾我喺深水埗嘅朋友「輝哥」食飯，見到隔離屋明仔老豆喺門口炒緊菜(舊時徒置區大部份人門口都有個櫃仔放煮食用具，平時就喺屋企門外煮食)，就同佢打聲招呼咁話：「王生! 乜今日你做大廚親手下廚呀?」
「唉! 無計啦! 我老婆……佢病咗吖嘛! 」王生一副欲言又止嘅樣。
「王師奶佢冇乜嘢事吖嘛?」王師奶對我一向好照顧，又成日分啲湯水、糖水比我，聽到佢病咗，一時之間我自己都有啲不知所措起嚟。

王生首先熄咗個火水爐(舊時一種以火水作為燃燒嘅煮食爐具)，拉我埋一邊細細聲同我講：「唉! 我老婆佢撞鬼呀!」

(待續)

[[i] 本帖最後由 default2046 於 2022-10-6 17:45 編輯 [/i]]

(續前文)

據王生所講，王師奶嗰日晏晝湊完個仔返學之後，返到屋企見近排天口㷫，就煲啲五花茶諗住可以清熱去濕。王師奶見啲五花茶夠自己一家飲有餘，就拎咗碗過去八嬸度。佢一路行，離遠透過八嬸間屋個窗見到八嬸企咗喺屋入面，就問八嬸：「八嬸! 我煲咗五花茶呀! 有多比碗你吖!」

八嬸應咗聲「好」，然後就直接穿過個窗飄咗出嚟走廊。

王師奶嗰刻唔識比反應當堂嚇到暈咗，碗五花茶跌咗落地碎晒，啲碎片仲整到王師奶嘅小腿損晒。好彩街坊聽到啲聲過嚟睇下乜事，見王師奶訓咗喺走廊，就即刻夾手夾腳扶佢返屋企同幫佢嘅傷口止血，然後就通知返緊工嘅王生返嚟嘞。

我聽完王生咁講都有啲愕然，就問：「吓? 咁八嬸佢……」
「啲街坊之後見八嬸訓咗喺屋入面張床度，叫佢又唔應就入去拍下佢，點知發覺佢手腳冰冷，至知道原來已經走咗啦……」
「咁依家王師奶點呀？」
「佢頭先醒咗一陣，同我講咗頭先嗰啲嘢之後，話覺得好攰依家訓咗啦。你一陣可唔可以幫我睇住我老婆同啲細路，等我炒埋個菜，就落樓下揾呀根叔上嚟睇下佢呀?」「梗係得啦! 不過你係咪話紙紮舖個根叔呀? 乜原來佢係中醫嚟㗎?」
「唔同你講咁多住啦，等我快快手炒埋個菜先，一陣根叔收咗工就弊傢伙嘞!」

我見咁就唯有幫王生睇住屋企先，之後佢走咗落樓冇幾耐就返上嚟：「阿全唔該晒你呀，根叔話轉頭上嚟幫我睇下，你食咗飯未呀? 唔嫌棄就不如坐低一齊食餐冇餸飯吖?」因為我之前已經約咗輝哥，就婉拒咗王生嘅好意，一支箭咁跑咗落樓。最後見到輝哥嗰陣已經遲咗好多，無奈地比佢丙咗一餐。

之後聽王師奶自己同我講返，其實佢都知道八嬸應該係冇惡意嘅。嗰晚我出咗去揾輝哥之後，根叔都有上嚟，據根叔話八嬸佢應該係前一晚半夜訓訓下覺走嘅，因為一時之間仲未意識到自己已經走咗，今次無心之下失嚇親啲街坊，佢自己都好唔好意思。

當年隔離鄰舍嘅關係就好到好似一家人咁，大家為咗等八嬸可以一路好走，仲一齊夾咗啲錢揾根叔幫八嬸做咗場小小嘅法事。


其實我都係去到呢刻先知道根叔原來並唔係普普通通一個喺紙紮舖打工嘅人咁簡單，聽街坊講，大家平時遇到啲奇難雜症好多時都會去揾根叔幫手。雖然一路以嚟聽聽埋埋好多同根叔有關嘅事，始終我都係要等鶴X水塘露營嗰次經歷，至第一次親身見識到根叔驅邪治病嘅本領。

[img]https://scontent.fhkg10-1.fna.fbcdn.net/v/t1.6435-9/29425163_2354127117946555_40024637022666752_n.jpg?stp=dst-jpg_s720x720&_nc_cat=110&ccb=1-7&_nc_sid=0debeb&_nc_ohc=rsF5-stsGgkAX8NcfKs&_nc_ht=scontent.fhkg10-1.fna&oh=00_AT8_fmDCLhF544QBK28f7noJXQPRCN25YQGvTNNvVFzQ0w&oe=6365E46E[/img]
走廊上的煮食爐
圖片來源：[url=https://www.facebook.com/theoldhongkong/posts/2354127497946517/]https://www.facebook.com/theoldhongkong/posts/2354127497946517/[/url]

[[i] 本帖最後由 default2046 於 2022-10-6 19:33 編輯 [/i]]

[quote]原帖由 [i]default2046[/i] 於 2022-10-6 17:00 發表 [url=https://www.discuss.com.hk/redirect.php?goto=findpost&pid=552668546&ptid=30800283][img]https://www.discuss.com.hk/images/common/back.gif[/img][/url]
之前喺囡囡安排下我離開香港到另一個地方生活，期間經過不斷努力嘗試同新環境、新事物互相適應同磨合之後，最近終於總算叫做可以安頓返落嚟。受到呢邊慶祝萬聖節嘅熱烈氣氛所影響，人在異鄉又閒來無事，就心思思咁想喺呢度同大家分享下後生嗰陣喺橫頭磡徒置區遇到嘅靈異經歷。
當年嘅橫頭磡徒置區總共有26座，覆蓋嘅範圍之大，除咗基本依家嘅橫頭磡邨之外，仲包括埋樂富邨、富強苑、德強苑等地方。我唔係橫頭磡嘅原居民，嗰陣 ... [/quote]


樓主又有新故事，支持一下先:D。移民生活愜意嗎？

[quote]原帖由 [i]Kenny~[/i] 於 2022-10-6 20:54 發表 [url=https://www.discuss.com.hk/redirect.php?goto=findpost&pid=552673662&ptid=30800283][img]https://www.discuss.com.hk/images/common/back.gif[/img][/url]



樓主又有新故事，支持一下先:D。移民生活愜意嗎？ [/quote]
謝謝你的支持! 很多地方都未能習慣，只好盡力而為。

(二) 樓下有人

橫頭磡徒置區嘅生活同我之前喺深水埗東X大廈真係好唔同，之前都有提及過嘅，例如呢度冇電梯出入要行樓梯、要喺屋外面煮飯咁，估唔到就係呢啲生活習慣都會為我帶嚟靈異經歷。

當年我基本上正一係寡佬一名，平時又唔會自己煮食，所以自己唔會有乜嘢垃圾。不過，嗰陣因為我有養貓，咁我日日都總有啲ling ling因為大小二便而製造嘅垃圾要丟。始終我嗰陣時係初嚟步到，行勻曬全層都揾唔到垃圾房之後，就唯有死死氣揾咗個街坊問下。

「哦! 你掉落天井啦!」
「吓! 乜可以咁㗎咩?」
「個個都係咁㗎呢度! 或者你等挨晚垃圾佬嚟收嘅時候掉都得嘅!」
「咁挨晚係掉去邊㗎?」
「X你條茂利咪講咗掉落天井囉!」

見個老街坊發老脾當然唔敢再打搞佢，咁嗰日我唯有就留意住幾時有垃圾佬嚟收垃圾。我等到挨晚，真係見到有幾個街坊喺屋企行出嚟掉啲垃圾落去天井。咁我當然係嗱嗱淋有樣學樣，但畢竟係第一次咁做，我就望一望落去天井，睇下係咪真係有人喺下面收垃圾。

我好奇怪咁發現好似有個女人企咗喺天井底右上嗰個角位。我好記得個女人係長頭髮，著住灰白色嘅長袖衫長褲。我嗰刻就諗：「乜垃圾佬係女人嚟㗎?」點知我諗完唔夠一秒，個女人就好似知道我諗乜咁昂高頭，不過佢冇望住我，因為佢係成塊面都包住紗布嘅，根本眼耳口鼻都睇唔到。嗰下我真係X都縮，垃圾都唔丟就即刻縮返入屋。

事後我問隔離王生(唔揾王師奶問因為驚嚇親佢)，佢話平時基本上冇人會望落去天井㗎，因為唔知點解24座呢度有好多人跳X，多到差唔多至少一年一個，甚至試過有兩姊妹，家姐跳完過一排到個妹，仲要係跌返喺同一個位，所以大家已經有共識唔會望落去以免見到污糟嘢。自此之後，我掉垃圾都係直接掉唔會再咁蠢睇下下面有冇人了。

繼續等聽故:loveliness:

(三) 唔該借歪

我當年搬入橫頭磡嗰陣係寡佬一名，平時如果唔洗返工，晏晝嗰餐通常都貪就腳喺24座樓下嘅冰室(類似依家嘅茶餐廳，主要分別係冇飯食)度搞掂。先形容一下嗰間冰室嘅格局：間舖頭長長哋，最入當然就係廚房，廚房出面就係水吧同傳菜位，然後就左右一排排卡位，一直排到出舖頭出面。

我嗰陣因為啱啱搬入去，基本上除咗隔離屋王師奶一家、同喺紙扎舖買拜四角嘅嘢時識嘅根叔之外，同其他街坊都唔係咁熟。所以，我就揀咗舖頭出面右邊嗰排卡位、面向水吧嘅方向就咁坐低咗，諗住快快手食完就走。我坐低冇耐就有個伙計拎住兩杯水，一邊向我行埋嚟、一邊咁話:「喂老友! 繁忙時間，拍爛檔坐埋一邊吖!」我望一望左邊排卡位見又未有人坐，心諗「坐埋一邊」意思即係想我坐去邊一邊? 當時我因為同個伙計未混熟(之後幫襯多咗就知佢叫「祥哥」)又驚得罪佢比佢喺啲嘢食度「加料」，就唯有好有禮貌咁問：「吓? 係咪坐入面啲位呀?」點知佢行到埋嚟放低兩杯水，望一望我前面個位load咗一陣、咳咗聲然後就話：「啱啱眼花，老友想食啲乜嘢?」

咁我之前喺深水埗對呢方面嘅事叫都做有啲經驗，立即已經意會到佢乜嘢料。當時畢竟係日頭日白、隔離左右又有人唔係得我一個，心諗真係冇乜嘢好驚，就若無其事照平時咁嗌咗嘢食後，用一杯水嚟洗下啲刀叉，另一杯水就推咗過去對面個位度。我快快手食完比錢就走，臨行前仲好似聽到聲「多謝」，然後我就䟫七層樓返屋企玩貓去也。

(四) 「人」不可以貌相

之前既然講開王師奶一家，就順便分享多一個同佢哋有關嘅經歷。

年輕一啲嘅網友唔知知唔知，當年橫頭磡徒置區嘅單位一般係冇廁所嘅，我哋呢啲居民平時沖涼或者大小二便都要去喺座樓中間嘅公共廁所同浴室搞掂。我自己喺深水埗住嘅時候，為咗避免同隔離板間房嘅「豪哥」爭廁所發生爭執，已經習慣咗夜啲先沖涼。所以，嗰晚我喺公共浴室沖涼嗰陣已經剩番我一個人。我沖完涼出嚟，拎住條毛巾同個鐵盤沿著走廊行返屋企，喺昏暗嘅燈光下，離遠見到好似有個人企咗喺王師奶屋企門口。

當年徒置區治安好好，加上我嗰陣搬咗過嚟冇幾耐，仲未好識得分街坊同生保人，所以嗰一刻我冇乜特別介心，就照樣咁向嗰個人行過去，行到佢差唔多幾個身位前我先至睇清楚，原來係一個十零歲嘅𡃁仔。佢外貌同衣著都好「街坊」，唯一係左邊額頭有達比較大嘅「喇」(即疤痕)比較特別。

我驚嘈醒其他街坊，就盡量細聲少少咁話:「𡃁仔! 咁夜嘅? 你嚟揾明仔玩呀? 王師奶佢哋好早訓㗎!」
個𡃁仔好似連嘴都冇郁過咁，冇頭冇尾咁就問咗我一句：「你可唔可以幫我同安仔講，我好耐冇見過佢，我好掛住佢呀?」
「安仔?」王師奶有兩個仔，我剩係知道佢大仔叫明仔，所以我理所當然諗「安仔」應該就係佢細仔個名，就答佢話：「我聽日幫你話過佢知啦，你都好快啲返屋企嘞! 因住比老豆老母藤條炆豬肉呀你!」
我好似見個𡃁仔點咗一下頭，眨下眼就喺走廊嘅轉角消失咗。

第二晚我經過王師奶屋企門，見佢哋一家喺度食緊飯，就同王師奶一家打聲招呼，啱啱醒起琴晚見到嗰個𡃁仔，就對住王師奶個細仔咁話：「安仔! 琴晚你有個朋友仔揾你呀! 話好掛住你想揾你玩呀!」
嗰一刻佢哋全家都dead air咗一陣，搞到我有啲唔好意思，唔知係咪自己講錯咗乜嘢說話，正想講句嘢嚟打圓場，明仔就即刻搶住話：「哈哈! 我細佬叫狗仔唔係叫安仔呀!」

(舊時啲人驚細路哥養唔大，會取狗仔之類嘅名做乳名)

(待續)

支持樓主，謝謝分享🙏🙏

(續前文)

「吓? 鎖你鎖你(sorry sorry )! 我仲以為……」知道自己擺咗烏龍，嗰刻我尷尬到差啲要搵窿捐。
「你琴晚見到嗰個細路叫乜嘢名㗎?」王師奶問。
「我冇問佢叫乜名呀! 個𡃁仔十零歲倒個樣普普通通咁，係額頭有達「喇」囉! 可能佢…」我諗住打個圖場然後順便甩身。
「咁佢額頭達「喇」係咪喺左邊㗎!」王生突然停咗夾緊餸嘅筷子，擰轉頭望住我咁問。
「吓? 好似係掛…」我見王生突然之間咁認真，都搞到有啲不知所措。
「阿全! 你可唔可以講多少少你琴晚點見到個𡃁仔比我聽呀? 同埋佢仲有同你講咗啲乜嘢呀?」王生個樣好似好緊張咁，丟低筷子由屋企行咗出嚟。

我本嚟只不過係經過想同佢哋打聲招呼，但係依家見王生咁大反應，唯有原原本本咁將琴晚成件事嘅經過講比王生知。王生粒聲唔出咁聽我講完，跟住就好認真咁話：「個𡃁仔係我呀哥嚟㗎!」我一下子接受唔到王生嘅說話，情不自禁咁爆咗句粗：「唔X係吓話? X你! 你幾十歲人有個十幾歲嘅呀哥?」

擔王生所講，佢個名叫「王X安」，細細嗰陣佢同老豆老母阿哥一齊喺上面走難落嚟香港。佢同阿哥嘅感情由細到大都非常好，佢阿哥有乜好嘢都唔捨得食寧願留返比佢。唔知係咪因為咁，佢阿哥身體一向比較差，最後仲喺十幾歲嗰陣就不幸病死咗。嗰陣時因為屋企好窮，佢老豆就偷偷哋將佢阿哥葬咗喺屋企附近嘅和合石墳場度，之後佢哋一家每年都會去拜下佢阿哥。後嚟王生佢老豆老母去咗賣咸鴨蛋，王生為咗揾食又搬咗出九龍，就少咗返去和合石拜佢呀哥。

「唉! 自從明仔同狗仔出世之後，我都忙到冇晒時間，而且依家又冇咗去和合石嘅火車，我就算係想去拜下佢…」王生一輪嘴咁喺度為自己辯解。
「既然比我遇到你阿哥，而且我又已經應承咗幫佢，不如揾日我幫你喺屋企睇住你兩個仔，你同王師奶帶啲嘢去拜下你呀哥啦!」
「咁…搞著你…我點好意思呀……」
「就咁話啦! 最多我幫你問下朋友可以點搭車去和合石啦!」

同王生講咗一輪，最後佢終於肯聽我講喺嗰年嘅重陽同王師奶去和合石拜佢阿哥，不過我喺佢哋返嚟接返兩個細路之後，就攰到足足訓咗成日，對照顧細路仔一事仲有咗陰影。雖然如此，自此之後我都冇再見過佢阿哥再次出現，我心諗總算都叫做咗一件好事。

好睇，多謝樓主分享

支持

(五) 玩具

之前也提及過，當年橫頭磡徒置區的街坊都會將煮食用具放喺走廊上喺屋外煮食，而我因為只得一個人住，而且都唔會自己煮食，所以一開始就沒有添置煮食嘅櫃同火水爐嘅打算。有一段時間，我同ling ling甚至係直接飲水喉出嚟嘅水，正所謂「大菌食細菌」，當年我仲係好後生身體壯健，覺得實在冇乜大不了。

有一次我喺水喉飲水嗰陣，撞啱王師奶拎住個水桶嚟裝水，我見佢裝完嗰桶水都幾重下，就幫佢拎桶水返去屋企。

我哋一齊沿著走廊行，王師奶問：「阿全，乜你平時都係喺水喉飲水㗎？」
「係呀! 」
「但係飲生水會生蟲㗎喎!」
「我以前喺深水埗有用火水爐煲水㗎!」
「咁你依家又唔買返個火水爐煲下水嘅?」
「冇啦! 我呢啲單身寡仔…」
「咁樣唔得㗎! 不如你喺我屋企個水壺度裝水飲啦! 或者可以借我個爐…」
「吓! 咁點好意思呀…唔得嘅咁…」
「傻仔! 大家街坊街里! 呢啲冇所謂㗎!」

就係咁，我好多時都會喺王師奶屋企拎啲滾水或者借佢個爐嚟用，除此之外，王師奶有時仲會分啲涼茶、湯水之類比我，依家諗返我仲係好感激王師奶當年對我嘅照顧。我曾經試過唔止一次想比返少錢錢王師奶，當係火水錢又好點都好，不過都係比佢笑住咁拒絕。

有次我同輝哥提起，話王師奶佢咁好人而我又好似冇乜嘢可以報答到佢咁，自己覺得好唔好意思，跟住輝哥就話：

「咁你可以買啲玩具送比佢個細路㗎嘛?」
「X! 你玩我咩! 我細個嗰陣窮到揾個銀仔刮下痧都冇，邊識得去邊買乜嘢玩具呀? 」
「X! 你唔識遮! 可以揾人同你去買㗎嘛!」
「咁你幾時得閒先?」
「我細個同你咪一樣咁X窮! 點X識玩乜嘢玩具唧!」
「X你老X! 你啱啱又話…」比輝哥玩完又玩，搞到我都有少少扯火。
「你聽我講先啦，我有個朋友叫「阿強」，佢屋企有少少錢㗎，玩具呢啲嘢佢好識玩嘅! 你講下你隔離屋個細路係點嘅，等我話過佢知，咁阿強佢就識同你買㗎啦!」

去到呢度要解釋一下，呢個經歷嘅前一部分係發生喺鶴X水塘嗰件事之前嘅，為免未睇嗰篇嘅網友有被「劇透」嘅感覺，所以有關強哥嘅事呢度就唔講太詳細了。總而言之，我最後就喺強哥嘅幫助之下買咗一個膠造嘅、好似叫「神奇大帝」嘅機械人玩具。據強哥話只要係男仔就一定會鐘意(不過以當年嘅物價嚟講，買呢舊膠真係令我非常之肉赤，好彩強哥話啲錢可以喺我揾到工至比返佢都唔遲)，跟住我就送咗呢個玩具比明仔，佢仲開心到即時咬咗我一啖(個死𡃁仔唔知點解當年開心嗰陣好鐘意咬人，真係痴痴哋線)。

如果件事係咁簡單收科，我當然唔會花咁多時間喺度講啦，事實上呢件事嘅後續係喺鶴X水塘嗰件事之後再過一排發生嘅。

(待續)

(續前文)

我記得嗰陣已經返緊一份鐘錶維修嘅工，喺新蒲崗嗰頭返工。有一晚我放工返到橫頭磡24座，喺樓下就撞到隔離屋王生，佢見到我同我打招呼:

「喂! 阿全! 收工嗱!」
「係呀! 王生!」
「阿全你食咗飯未呀?」
「我啱啱收工咋…」
「呀!咁就啱嘞! 不如我哋一齊去大排檔食個飯吖! 順便啤一啤佢啦!」
「乜你唔洗同王師奶同個仔食飯咩?」
「不如一陣一路食一路講啦…」

我見王生欲言又止咁嘅樣，加上放工返到嚟已經好肚餓，就同佢沿著斜路去咗最近馬路嗰間大排檔坐低食飯。我哋一路食一路閒話家常，王生一直都未有解釋為乜特登喺樓下等我收工，一直去到佢兩杯落肚，至終於好似下定決心咁同我講:

「阿全! 你送比明仔個機械人呢，究竟係喺邊度買㗎?」
「呀? 機械人？ 你講我送比明仔嗰個「神奇大帝」?我揾我個朋友幫我買㗎!」因為件事都過咗幾耐下，我都要load 一陣至知王生講緊乜嘢。
「咁你可唔可以幫我問下你朋友…」
「哦! 我朋友佢去咗好遠嘅國家唔知幾時至返喎…」如果網友有睇我另一篇以《鶴X水塘露營親身經歷》為題嘅帖文就應該知道點解我咁講，跟住我順理成章咁問:「係咪佢哋兩兄弟爭玩具你想買多個比佢哋呀?」
「講笑咩! 依家一個都搞唔掂! 仲…」
「發生乜嘢事咁嚴重呀？」

據王生講，明仔初初收到個機械人嘅時候真係好開心，差唔多做乜嘢都帶住佢，又拎住佢喺腦入面想像好多唔同嘅戰爭場景，日玩夜玩玩到唔願放手，甚至有時發開口夢都掛住個機械人。王生同佢老婆不嬲都咁錫明仔，見到明仔開心佢哋都好開心。不過有時見明仔玩到飯都求其食少少就算，就令王師奶好勞氣，忍唔住要好似明仔細個嗰陣迫佢食甚至餵埋佢食飯。

「明仔都已經咁大個，咁樣好似唔係幾好咁喎…」我心裏面覺得佢哋兩公婆好似太縱個仔，忍唔住咁講。
「唉! 你知我要掛住揾食，我老婆見明仔又咁瘦…」
「不過我都唔係好明點解你想知個機械人喺邊度買喎…」點教仔始終係人哋既家事，我知自己多口，所以唯有即刻叉開個話題。

王生又自隊一杯，跟住解釋話王師奶同佢講呢排明仔成日問佢機械人去咗邊、要佢幫手揾，搞到王師奶次次都要喺屋企揾一輪，最後就喺床下底、櫃頂、櫃桶、衫呀被呀入面等唔同嘅地方幫明仔揾返個機械人出嚟。

「會唔會係明仔特登收埋個機械人想同老母玩呀?」我諗明仔平時古古惑惑，會玩下老母老實講都好正常，不過我始終都出嚟做咗咁耐嘢，識得人情世故呢啲說話梗係唔會照直講。
「你聽埋我講先啦! 我哋懷疑個玩具有污糟嘢呀!」王生好似終於鼓起勇氣咁講。

(待續)

[[i] 本帖最後由 default2046 於 2022-10-10 14:16 編輯 [/i]]

從樓主文章中了解到昔日生活環境和8守望相助精神,支持樓主用心寫文,會繼續追post

係時候要帶大帝去見根叔嘞。

(續前文)

原來王師奶都唔蠢，初時都懷疑明仔玩佢，所以喺明仔同個機械人玩嘅時候，都有暗中留意下佢哋。有一次明仔坐喺地下拎住個機械人同其他玩具一齊玩幻想戰爭遊戲，佢玩玩下急尿就喺床下底拎痰罐仔自己搞掂。王師奶明明見佢放低咗個機械人喺地下，點知轉頭個機械人又再次離奇咁唔見咗。咁嗰陣時屋入面得佢同兩個仔，明仔去疴尿、佢又陪緊個細仔，冇理由個機械人會就咁憑空消失。佢同明仔一齊揾咗一餐，最終又喺個衣櫃入面揾返個機械人出嚟。如是者類似嘅事發生咗好多次，王師奶終於都忍唔住同王生講。

「咁樣你哋有冇試下丟咗個機械人呀?」聽王生講完我都覺得件事邪邪哋，直覺認為應該即刻丟咗個機械人保平安。
「吓? 個機械人依家係明仔嘅命根嚟㗎喎! 我哋點敢丟咗去呀? 我淨係想問下你個機械人喺邊度買，睇下點解會咁…或者買過個偷偷換咗依家嗰個咁囉……」王生一副無可奈何咁嘅樣。

其實玩具、洋娃娃、毛公仔之類比前主人嘅靈體附身呢啲嘢，我以前都聽人講過好多，通常就算丟咗佢都好多時會自己返番嚟，都幾恐怖下。不過王生佢哋連試都唔試下丟咗佢，咁樣縱明仔法就好似縱得有啲過份，不過我都知自己未做過人老豆老母，要勸佢都唔係幾啱身份，就唯有同王生講：「雖然個機械人係我朋友幫我買嘅，不過我信得佢唔係會去買二手嘢比我嘅人，而且個機械人咁新淨都唔似係舊嘢啦……不如等我過兩日去揾根叔問下，睇下可以點做好唔好?」
「咁就麻煩晒你嘞…你知啦…(下刪一百字)…呢餐就等我請啦!」

就係咁我喺嗰個禮拜日一朝早就去紙紮舖揾根叔，不過睇舖個嬸嬸話根叔早兩日已經出咗去做嘢，佢臨走嗰陣話自己至少要成個禮拜至返，至於根叔去做乜嘢就連嬸嬸都唔清楚。原本諗住揾根叔幫手就十拿九穩，依家我真係企咗响度，而且又冇把握等一個禮拜佢就會返，如果我咁樣去同王生王師奶講都交唔到差，一下子真係有啲六神無主唔知點算好。

(待續)

啱啱先試下喺YouTube 揾下居然比我揾到當年明仔日唱夜唱嗰隻卡通片嘅歌，當年嘅回憶同感受一下子湧晒上嚟。不過呢首歌識唱都千奇唔好跟住唱，因為真係好易入腦，依家我個腦仲係度播緊唔知播到幾時…


[url]https://youtu.be/HOtpBVUZj1M[/url]

期待有更多分享:smile_o12:

(續前文)

忽然之間，我靈光一閃醒起上次鶴X水塘單嘢根叔送咗道驅邪治鬼護身符比我，或者今次可以用嚟應下急都好。

我喺屋企揾咗一輪，最後終於喺一本相簿入面揾到嗰道護身符。王生做廚房份工連禮拜日都要返工，正所謂事不宜遲，所以我唔等王生放工返嚟，趁住日頭日白自己個膽都比較大啲即刻過去揾王師奶，見到佢同兩個仔都喺屋企。我先同佢哋打個招呼，然後再同王師奶打個眼色跟住話：「今日禮拜日終於可以休息一下，明仔狗仔，你哋要唔要過嚟同ling ling玩呀?」明仔一向鐘意貓當然連聲叫好，王師奶都幫手助攻咁話：「明仔，你擺低個機械人先過去吖，因住比ling ling爪花佢呀!」於是佢哋兩兄弟就興高采烈咁過咗我屋企同ling ling玩。

我先喺褲袋度拎咗道符出嚟，見個機械人冇乜反應，就大住膽咁將道符㩒咗喺個機械人塊面度。初時我同王師奶都有啲戰戰兢兢，驚一陣會好似啲恐怖片咁個機械人會掙扎，然後有隻嘢喺個機械人度走出嚟之類。不過，事實上個機械人一啲反應都冇，咁嘅結果當堂令我哋兩個百思不得其解。

「根叔係咪話咁做就得㗎啦?」王師奶一面疑惑咁問。
「其實我頭先揾唔到根叔呀! 佢咁啱出咗去做嘢至少一個禮拜至返呀……」喺呢個時候我唯有老實表白。
「咁點算好呀…」王師奶個樣愁到好似想喊咁款。
「你放心啦! 呢道驅鬼符係根叔之前比我㗎，不如我留呢道符比你哋先，根叔呢道符連厲鬼都怕怕㗎! 之後嘅嘢等根叔返嚟再算啦!」始終成件事都係因我送玩具比明仔而起，我覺得自己有責任要保障返佢哋一家嘅安全，所以就將道符掛咗喺牆上面原本用嚟掛月曆嘅鈎度。幸好幾日後王師奶同我講，自從掛咗呢度符喺屋企之後，就真係冇再有怪事發生，令我嘅心都安樂返啲。

「阿全你個死仔! 你究竟拎咗我比你道符去做啲乜嘢呀?」一朝早我隻窗又比門外面怒氣沖沖嘅根叔拍到爛咁滯。

(待續)

又到根叔嚟揾大帝嘞。

(續前文)

記得嗰日我係唔洗返工原本諗住可以訓晏少少，一聽到根叔把聲即刻嚇到我彈咗起身：
「呀! 根叔乜你咁快做完嘢返嚟嗱?」
「梗係未啦! 你咁搞法我又有乜嘢法子唔即刻返嚟吖!」根叔撐足七層樓梯上到嚟個樣有啲上氣唔接下氣咁。

我即刻連聲同根叔耍晒冧先，一邊請佢入屋坐低，一邊裝杯水比佢順返條氣。點知根叔第一句就話：
「王生嘅祖先嚟揾我告狀你知唔知呀?」
「你講隔離屋王生? 祖先? 告狀? 告乜嘢狀呀?」我真係聽到一頭霧水。
「你老實話我知你係咪用我比你嗰道驅鬼符趕走咗人哋呀?」根叔用雙眼瞪住我咁話。
「冇呀! 我…」我一面呼寃一面將成件事由頭到尾向根叔交代一次。

根叔粒聲唔出咁聽我由頭講到尾，最後再一口氣飲咗半杯水，然後就話：「唔怪之得啦，我不嬲都覺得你嘅本性不懷，知道當中一定係有啲乜嘢誤會。等我話過你知，我原本上大陸呢，係諗住揾我嘅師兄弟借件法器嚟做嘢，點知啲法器都仲未借到，前晚就已經遇到王生嘅祖先嚟向我告狀，話你用我道符趕咗佢出佢屋企。我哋呢，始終係道家正統終身扶正祛邪，咁樣惹嚟自身報應都仲係事小，玷污本門同祖師爺嘅名聲至係事大。所以我就算啲嘢未做完都好，都要嗱嗱淋趕返落嚟替你處理呢個爛攤子先得!」

「不過我原本一心係用道符嚟對付附喺個機械人嗰度嘅污糟嘢，點解又會變咗影響到王生嘅祖先嘅?」上次根叔喺鶴X水塘單嘢可以話係救咗我一命，所以今次我唔係為咗駁嘴，而係真心咁向根叔請教。

可能都feel到我唔係玩嘢，根叔嘅眼神好似和善返好多，飲咗啖水再話：「你聽我講，其實你哋真係搞錯晒嘞! 由頭到尾根本個玩具就冇污糟嘢喺度!」

邪靈作崇會附身玩具公仔係我從小喺唔同渠道吸收返嚟嘅知識同經驗，根叔咁講就好似愛因斯坦同我講地球其實係正方形嘅一樣，唔通阿強幫我買嘅係遙控玩具識自己郁? 仲識得自己匿埋? 不過我見根叔個樣又唔似係同我講笑，唯有忍住唔出聲聽佢解釋。

(待續)

期待更新

(續前文)

據根叔所講，原來王生既祖先由王生細細個開始就已經一路跟住王生，之後王生成家立室搬咗入橫頭磡呢間屋，佢都順理成章咁住埋喺呢度(即係俗稱嘅「家鬼」)。而且佢一路都好照顧王生一家，尤其係王生兩個仔，每次佢哋百厭跌倒，其實都係佢喺背後拉佢哋一把等佢哋唔會傷得太嚴重。聽到呢度我終於明白點解王生嘅哥哥上次嚟揾王生要企喺門口入唔到屋，好可能就係因為王生嘅祖先驚佢會嚇親兩個細路哥，所以唔比佢入屋嘞。

本來一切都好美好，問題卻正正由我送「神奇大帝」比明仔開始。因為明仔好鐘意個機械人，成日自己一個同個機械人玩，性格漸漸變得自閉，身體亦都因為成日匿埋喺屋企少咗運動而變差。可惜王生兩公婆唔單止冇阻止明仔沈迷玩機械人，反而仲更加縱容明仔，令王生祖先睇唔過眼，認為咁樣落去會阻礙明仔日後不能成材，所以就故意收埋個機械人唔比明仔玩。

點之王生兩公婆不單止唔明白祖先嘅苦心，仲揾我呢個「外人」嚟趕自己祖先走，跟住就係發生王生祖先去揾根叔同根叔今朝上嚟揾我呢件事。

「但係點解我拎道符出嚟嗰陣又好似冇嘢發生咁嘅?」我問。
「傻仔! 如果比你知道有人嚟揾你尋仇，你仲會唔會等仇家去到你門口你先識得走呀? 「他心通」呢啲嘢對王生祖先嚟講真係小兒科啦!」
「咁點解佢又唔直接揾我算帳呢?」我接住問。
「唉! 等我仲以為你好醒目! 乜你蠢得咁交關㗎! 唉! 一嚟你屋企有…咳咳……吖就嚟比你激死…咳…二嚟以王生祖先幾百年道行又邊會同你呢啲乳臭未乾嘅死仔計較吖，不過始終道符係我比你嘅，正所謂解鈴還需繫鈴人，佢揾我係正常不過! 都係費事同你講咁多嘞! 依家你快啲同我一齊過隔離拎返道符先，然後跟我落舖頭做埋啲嘢啦!」根叔終於又唔耐煩嘞。

之後根叔就同我一齊過咗隔離屋去拎返道符同埋向王師奶解釋成件事嘅原委，根叔仲特別告誡王師奶：「有時教仔呢係要狠心一啲，應罵則罵，需打則打，否則到明仔大個咗變成紈絝子弟你就後悔莫及了!」王師奶對根叔嘅說話一向都唯唯諾諾，而事後我都真係見王師奶屋企幅牆掛咗條藤條同埋聽多咗隔離嘅打仔聲。

跟住我就同根叔就落咗去紙紮舖入面個壇度，我先喺壇前誠心向王生嘅祖先同根叔嘅祖師爺認錯，仲保證唔會再犯，希望佢哋大人有大量原諒我，另外，我也懇求王生祖先返嚟繼續保佑王生一家。根叔喺壇前唸唸有詞，經過一輪我唔理解嘅儀式後，最後拎道符喺個香爐上面來回咁打咗幾個圈。根叔跟住比返道符我：「道符比你用嚟護身我唔會收返㗎啦，以後如果過一排覺得道符冇咗效，可以拎返嚟呢度過一過香爐…」
「咁我點知佢幾時…」我秒問。
「唉! 你咁大個人! 呢個你自己感受啦!」根叔又開始變得有啲唔耐煩咁。
「咁唔知王生嘅祖先最後又肯唔肯返嚟呢?」我又忍唔住問。
「能夠成為一個家嘅守護神，背後一定係有血緣關係、前世今生等因緣存在，否則又點會為咗守護對方而耽誤咗自己嘅輪迴之路呢? 你放心王生嘅祖先一定會返嚟。」根叔一面慢慢轉身望向神壇一面咁講。
「咁點解…」我又秒問。
「我講嘅嘢你自己參透一下啦，我仲要趕返上去做埋喲嘢嘞……」奇怪根叔今次居然冇發我老脾，回頭對我投下一個令人不解嘅眼神後，就自顧自咁行開咗。

成件事始終係由我送「神奇大帝」比明仔而起，之後我仲用嗰道符搞咗個大頭佛出嚟，最後根叔唔單止唔同我計仲幫我收拾呢個爛攤子，我已經感激到唔知點好了，當然識做唔會再追問刺激根叔啦。

根叔心地好好,期待樓主其他故事

(六) 搬家

可能因為性格關係，同自己啱傾嘅朋友一向唔多，所以當年我一得閒就會去揾喺深水埗嗰陣識嘅輝哥聚舊。嗰晚輝哥其實要返便利店嘅夜班唔得閒理我，但係因為我啱啱揾到新工，心情比較興奮有好多嘢想同輝哥傾，於是就直接去咗便利店揾佢。一般情況下，經理當然係唔會想見到員工喺返緊工嘅時候同朋友吹水啦，但係一嚟我以前都係喺呢間便利店返夜班、同經理好熟，二嚟我去到又會幫輝哥手搬下貨同埋執下啲過期食物咁，喺唔影響輝哥工作嘅前題下，經理都會隻眼開隻眼閉。

嗰晚我同輝傾下傾下傾到唔記得咗時間，本嚟如果跑去深水埗站嘅話，應該都仲趕得到最後一班車，但為咗慳得一蚊得一蚊，我揀咗去石硤尾站搭車，咁就錯過咗最後一班車嘞。嗰刻我仲覺得冇乜嘢大不了，反正我都識得點樣由石硤尾行路返橫頭磡，而且第二日又唔洗返工，咪當行下路做下運動囉。

因為當時已經收咗熱頭，喺夜晚行路返橫頭磡其實一啲都唔辛苦。我一路沿著大街走，最後企咗喺聯合道同竹園道交界嘅十字路口。照正路就梗係右轉經賽馬會診所隔離條小路落去24座最快，不過因為之前我喺嗰頭撞到嘢(這個經歷比較長少少，可以下次再分享)，所以我寧願兜路行去橫頭磡巴士總站嗰邊，先由富美街行落去23座，然後再穿過23座返去24座。

因為喺石硤尾開始行過嚟嗰時已經係好夜，我去到巴士總站嗰陣基本上都係得一架架泊咗喺巴士線度嘅巴士，衰啲講真係鬼影都冇隻。不過，我留意到唯獨其中一條線係出奇地人頭湧湧，有好多唔同年紀嘅人拎住一袋二袋嘅行李，默默咁排隊上緊一架泊咗喺出面條線度嘅雙層巴士。我嗰陣沿著路邊行，雖然都好好奇點解夜媽媽都有巴士開車、仲有咁多人搭，但係因為我本身個人唔係咁八卦，而且又趕住返屋企，就冇特登行出去睇下乜事，純粹經過咗個巴士站就繼續沿路行去23座。回頭望到㗎巴士原來係冇打號碼牌嘅，心裏面仲諗話唔定係特別車之類。

因為呢單嘢都唔算係乜嘢恐怖嘅事，之後冇發生任何事就好順利咁返咗屋企，所以我丟低咗都唔知有幾耐。一直到好耐之後有一日同根叔提起我曾經喺橫頭磡巴士總站見過一㗎咁奇怪嘅巴士，點知根叔佢砍頭第一句就話：「好彩你冇八卦咋! 如果唔係你依家已經唔知去咗邊度嘞!」

據根叔嘅推斷，當年我見到嘅事應該係喺政府清拆馬仔坑啲木屋同起居屋嗰陣發生。因為木屋區啲人搬走晒再冇人供養施食，而且啲木屋又比人拆晒，令一班原本住喺嗰度嘅無主孤魂頓失容身之所。如果佢哋未係時候再入輪迴，或者喺附近揾唔到地方收留寄居，就只能夠搬去其他地方，亦即係我當晚見到排緊隊上巴士嘅「人」。

「但係乜原來呢度真係有咁多呢啲「人」嘅咩?」
「徒置區呢度原本係墳場嚟㗎嘛! 同埋唔通你唔知道日本仔以前喺呢度殺咗幾多人吓嘛?」根叔有少少唔耐煩咁講。
「咁如果我嗰陣八卦行埋去…」
「閒事莫理，眾埞莫企! 我不嬲都係咁教你㗎啦!」根叔一路講一路「亨」咗我額頭一嘢。

當時我心諗我又冇冒犯到佢哋，照計佢哋都唔會咁得閒害我掛? 不過我當然知機唔敢再駁嘴罷了。

[img]https://static.wikia.nocookie.net/hongkongbus/images/7/73/Wang_Tau_Hom_BT-05.jpg/revision/latest?cb=20100311072758&path-prefix=zh[/img]
橫頭磡總站
圖片來源：[url]https://hkbus.fandom.com/wiki/%E6%A9%AB%E9%A0%AD%E7%A3%A1%E7%B8%BD%E7%AB%99[/url]

[[i] 本帖最後由 default2046 於 2022-10-16 11:56 編輯 [/i]]

好睇，支持

支持原創

(七) 偶遇

之前提及我喺橫頭磡賽馬會診所遇過靈異經歷，正所謂打鐵趁熱，不如就立即分享埋佢，順便也分享一下舊陣時好鐘意嘅呢隻歌：

[url=https://youtu.be/GdmWrl0G7r0]https://youtu.be/GdmWrl0G7r0[/url]

當年我住喺深水埗板間房嘅時候一直喺屋企都係冇電話嘅，要用電話先至落樓下士多借嚟用。自從搬咗嚟橫頭磡之後，因為終於可以自己霸晒成間屋，而且為咗方便揾工，我終於都申請咗屋企電話。咁有屋企電話喎，咁大件事，我當然第一時間通知我喺深水埗嘅街坊朋友咁啦。不過，最令我意想不到嘅係：第一個打我屋企電話嘅人居然唔係同我最熟嘅輝哥，而係當年住喺我間深水埗板間房隔離嘅「豪哥」。雖然我當年同豪哥佢哋兩兄弟同屋共住咗都有一段時間，但開始嘅時候關係並唔係咁好，成日仲為咗爭廁所、廚房用而發生爭執，好彩最後都冇發生血案。後嚟經過咗同阿霞分開嘅一段經歷同埋收養咗我隻貓ling ling後(詳情請睇另一篇以《那些年我在深水埗東X大廈的經歷》為題嘅帖文)，我同豪哥兩兄弟嘅關係至大為改善，不過就始終未去到非常啱傾嗰隻朋友咁囉。

豪哥喺電話度話同我好耐冇見，想約我同佢細佬一齊喺旺角食餐晚飯聚下舊。我嗰陣因為未揾到新工終日無所事事，咁出街少不免要洗下錢，所以初時本來想推卻豪哥嘅邀請。後嚟豪哥不斷遊說我，又話呢餐係作為賀我新居入伙一定要比佢兩兄弟請，最後我見盛情著難卻就應承咗佢。嗰晚大家都食得好開心，豪哥講起話佢哋兩兄弟啱啱先自己出嚟開咗間小小嘅傢俬舖，問我新居入伙洗唔洗買啲傢俬咁，仲可以計平啲比我咁話。嗰陣我唔知係咪飲咗兩杯，定力比平時差咗啲，未考慮清楚自己入不敷支嘅問題，就口輕輕咁話啱啱想買張碌架床。豪哥拍晒心口話包喺佢身上，錢仲可以遲啲再同我計添。

嗰晚食完飯都唔係好夜，但係我飲飽食醉個人有啲攰，就近近哋揾個巴士站搭12B返橫頭磡，坐咗一陣巴士就去到橫頭磡總站落車。

(待續)