查看完整版本 : 我的糖尿病日誌。

小弟早年剛入伍，亦都知道人到中年難免都會有 D 病痛，但殊不知會係糖尿病。(陰公)

小弟 8 年前體重達至最高峰，有 196 磅 (身高 166cm) 都非常有聖誕老人 feel！其後體重一直下降，3 年前太約 175 磅左右，同事都開始感覺我瘦左，但我問過醫生，佢話我都重係肥，可以再瘦一 D。所以我當時無再理會體重問題。仍然餐餐食兩碗飯！同時亦係 “大餸子民”。 假如晚上 10:00 感覺肚餓就會煮個餐蛋雞翼公仔麵，或者一個生菜炒蛋夾大麥飽。就算唔感覺太肚餓，都會食兩隻蛋撻。一日由早上 7:30 分開始不斷要個胃工作一直到晚上 11:00 才有休息機會。計下數自己個胃每日工作差不多 16 小時 (講真，真係好很辛苦)。

一個多月前 (10月28日) 零晨大約 4 點突然扎醒，感覺個心跳得好快，個頭太陽穴血管跳動明顯！身體皮膚多處輕微刺痛，但係一諗到明早要返工，就盡量要自己訓番(當然訓唔番啦！)到左中午食晏前忍唔住去量下血壓，屌！唔係下嘛，188/106 ？係真唔係呀！坐左 10 分鐘再量多一次，結果都係差不多。同老細單聲下午就去左睇醫生。結果醫生叫我馬上驗血、驗尿，又開左降血壓藥 (Amlodipine 5mg) 俾我。我照醫生指示每日準時食藥，食左 3 日，同時一直有度住自己血壓。但係血壓仍然都係幾高下 146/96。當時我唔知點解有個念頭！既然食住降血壓藥都重係咁高血壓，不如就試下 168 (斷食法) 啦！就係咁，我由第 4 日開始停左無再食 Amlodipine 並開始 168 斷食。開始左 168 頭 3 日，我每日都有度住血壓 (其實由 10月25日開始，我都有每日度住自己血壓) ，血壓降左 D D 138/96。但係另一神奇事情發生左響自己身上，令我就算有腦霧、手軟腳軟、精神彷彿、飢餓感爆昇都要堅持住、頂住 168 斷食。就係一直困擾住自己多年嘅膝痛響第 4 日 168 斷食後不藥而愈。而 168 斷食左差不多一個星期後，我去見醫生睇驗血、驗尿報告，證實左糖尿病。當時報告中 HbA1c 成 13.8% (爆 X 晒錶)，醫生當時立刻同我篤手指 (驗血糖指數)，唔篤由自可，一篤嚇 L 死醫生，餐後血糖 21.3mmol/L  (我反而唔係好驚，因為預左自己糖尿，加上第一次篤手指唔知道個讀數代表乜。) 醫生重問我會唔會即時打支胰島素針，我話唔洗！:smile_39: 當時醫生開左 2 隻控制血糖 (Metformin，Gliclazide) 同埋 1 隻降膽固醇藥俾我 。因為我第 4 日無帶 Gliclazide 所以無得食，但反而身體無咁唔舒服。所以自己減左無再食 Gliclazide，只係食 Metformin 直到 2 個禮拜之後見內分泌專科醫生..................待續！

[[i] 本帖最後由 魔鬼班長 於 2022-12-27 18:05 編輯 [/i]]

見到內分泌專科醫生第一件事，就係話俾醫生知食左 3 日Gliclazide就無再食，因為.....下刪一萬字。醫生一邊聽我講，一邊睇緊我份驗血/驗尿報告。之後問我自己有無篤手指 check 住 D 血糖，我話有嘅！佢就再問我呢兩日餐後兩小時血糖幾多。我就話俾醫生知大約 7.6mmol/L，醫生聽左就再問我之前幾點食晏，我話 12:30 左右，佢就囉左部機出黎同我馬上篤手指 (當時未夠 3:00)。篤完部機顯示 7.8mmol/L。醫生就問我除左食藥之外，我重有做左 D 乜野。我就老實話俾醫生知我 168，另外戒晒所有粉、麵、飯、麵包、餅乾、粥、麥皮.....等等澱粉質食物。甜食、汽水通通都戒，戒，戒。(後話：內分泌專科醫生最後即時停左無再俾我食Gliclazide呢隻藥)

可能有人會問，你痴線架！一下指戒食所有同醣有關食物，你食得屎啦！其實同我最初 168 一樣，頭個一個禮拜，真係感到好肚餓好肚餓好肚餓好肚餓好肚餓好肚餓好肚餓，超級肚餓！甚至比我開始 168 時更加感到腦霧、手、腳無力，精神不能集中。就算我果餐食幾多肉，同幾多菜都好，餐後兩小時後就感到肚餓，非常肚餓！(根本就好難挨到 168)，我心諗，就算我挨到一日，都唔會挨到一世，點挨呀大佬？所以，我就諗左個方法頂肚餓。

但係未講我點樣解決肚餓難頂嘅問題之前，我要講講我 168 嘅時間表先。因為為左唔想太過影響到我太太正常生活，我選擇左每日進食時間為中午 12:00 至到晚上 8:00 ，晚上 8:00 過後直到第二日中午前，我就只會飲水、茶、齋啡。我份工作好正，工作時無可能俾我食野，所以無機會俾我響中午食晏前食到任何食物。所以我要解決肚餓問題就係集中響晚上 8:00 到第二日中午 12:00 呢段斷食內時間............................待續！

[[i] 本帖最後由 魔鬼班長 於 2022-12-27 18:07 編輯 [/i]]

講真，小弟食左咁多十年粉、麵、飯、麵包….. 等等高澱粉質精製食品，點可能一下子唔食先至得架，話得果個都係呃你啦！正如吸左幾十年毒嘅道友，去戒毒都要一段時間適應，最初都會口水鼻涕出晒黎，毒引起時真係要生要死！版友們，可能你會覺得我吹水，其實大家可以試下，一個禮拜唔食澱粉質精製食品(包括：粉、麵、飯、麵包、餅乾) 及所有甜食，你睇下感覺會係點？就算你唔係好似我咁168 (只食兩餐) ，一日食足三餐都會好難頂！餐後兩個小時後就會有肚餓嘅感覺，好想好想好想好想好想好想食野！一個人假如唔感到肚餓/飢餓，果個人可以選擇食，或者選擇唔食。但一個人假如感到肚餓/飢餓，可唔可以長期唔食？那當然唔可能。一個人假如感到肚餓，就唔可以死頂唔食野！就算你頂到一個鐘，都唔可以頂到一日，就算你頂到一日都唔可以頂到一個禮拜。更何況行 168 行足一世？咪玩啦！所以我要成功一世 168，先要解決由晚上 8:00 到第二日早上 11:30 仍然會感到飢餓嘅問題。要解決問題，就要搵出問題根源，就係叫個腦唔好再分泌一種物質話俾你知“好肚餓”！如果個腦唔話俾你知，要你感到肚餓，你咪唔洗咁痛苦成日感到肚餓囉！唔肚餓就可以有權選擇 "食野" 定還是 "唔食野"。記住，肚餓/飢餓感到達時，你係無選擇權嘅，你唯一可以選擇就係 "食野"。就算你呢一刻頂到唔食，下一刻都唔會頂得到！到你頂唔順嘅時後就會發晒狂係咁食，食到個份量重衰過以前，所以10 個減肥人仕 9 個失敗！(係到，先多謝許志忠教授、李維恩教授、宋晏仁醫師、Dr Berg及大隅良典教授)

[[i] 本帖最後由 魔鬼班長 於 2022-12-26 20:09 編輯 [/i]]

加油，大家都係糖友，我都係168飲食，1日食2餐，戒澱粉戒糖。

要長期 168 (或者做更長期斷食)，必需要解決飢餓感嘅問題，咁就要個腦唔再分泌一種令你感到飢餓嘅物質出黎。到呢個時後你就有權選擇 "食野" 或者 "唔食野"。而要叫個腦唔再分泌呢種物質，就需要戒澱粉質/高精製食物 (包括：粉、麵、飯、麵包、餅乾....等等)及所有甜食。呢個亦都係糖尿病患者必需要做嘅事情 (除非你想病情越黎越嚴重，食藥食一世，甚至打一世胰島素針，糖尿上眼或者糖尿落腳啦！)

假如你 168 斷食，兩餐都仍然進食澱粉質/高精製食物，除左減肥效果會無咁明顯/無咁好。同時亦唔可能做到掌握 "飲食控制權"。最終減肥會隨著頂唔順 168 斷食所產生嘅飢餓感，而導致減肥最終失敗。因此要訓練到食同埋唔食都完全由自己控制！要食嘅時後就食，要唔食嘅時後就可以 24 小時都唔進食 (都唔會感覺有半點飢餓感)，咁你就可以隨時控制自己血糖同埋身型............................待續！

:smile_o13:add oil

其實要戒高炭水化合物/高精制食物同埋甜食，初期除左要有定力之外，重要有方法。有方法就可以容易 D 渡過呢段適應期，由一個原本吸收開炭水化合物(葡萄糖做燃料)嘅人，轉去用 Keto (酮) 做身體燃料。
我其實最初係因為血壓高 188/106，食左降血壓藥都降唔到去理想血壓水平，所以嘗試下 168 斷食法，睇下幫唔幫到手降血壓，點知 OK，所以要諗方法長期行到 168。所以要低炭/甚至無炭飲食。
簡單 D 講，一個人長年累月食開高炭水化合物(例如：粥、粉、麵、飯、麵包、餅乾)做主要食糧，身體自不然習慣左呢個飲食方式，當你要改變呢個飲食方式就會唔適感，呢個係好自然嘅事！最弊嘅就係你個大腦亦都習慣左吸收高炭水化合物作為身體燃料，所以當你唔食炭水化合物，個腦就會分泌一種物質話俾你身體知道你好肚餓，要食野！咁就出事啦！而要令個腦唔再分泌呢種物質，就需要一段時間自我訓練。而肚餓難頂點去解決呢，就係 168 兩餐中要食 D 肥野！係，減肥係要食肥野 (例如：東波肉、德國咸豬手、梅菜扣肉、牛扒要連肥、雞要連皮食、煙肉..........等等肥野) [但千萬千萬千萬千萬唔好食叉燒，因為叉燒落左好多糖上去燒，成舊叉燒"糖化"得好厲害，唔想老得快就要盡量減慢自己本身糖化速度]。另外，食隻雞蛋都可以頂到肚餓。尤其事夜晚 8:00 果一餐，你食一隻烚蛋 (要連蛋黃一齋食晒) 都可以頂到肚。一、兩個禮拜當身體習慣左之後，你就唔會再感到肚餓。到時後你就可以囉番個飲食控制權，要幾時食就幾時食，幾時唔食就幾時唔食。

當然，假如你又去食番高炭水化合物(例如：粥、粉、麵、飯、麵包、餅乾)，你又會走番去回頭路，成為一日 3 餐或一日 5 餐嘅奴隸，年年減肥，但減極都咁肥嘅人 (雖然我唔反對人肥)，但肥始終對身體唔好，會導致高血壓、糖尿病、心臟病.........。我都希望大家身體健康。

可能有人會話，你高炭水化合物(例如：粥、粉、麵、飯、麵包、餅乾)，所有甜食都戒走晒，無晒人生樂趣啦！都唔係嘅，其實重可以食魚、蝦、蟹、海鮮，豬、牛、羊、雞、鴨、鵝，各種各樣嘅蔬菜，一日都重可以食一個萍果，個天都對得我唔錯架喇！重點係，第一你食少左一餐，你省下一餐嘅錢，可以用落中午或晚餐上，可以揀好食嘅野黎食。好似我咁，中午原本 $6X ~ $7X budget，因為省左早餐 $4X，所以我中午果餐食到過百蚊都面不改容！而家總之就要食好 D！假如真係要食甜野，就要食最最最最最最好食嘅甜野！一般嘅甜食通通都唔再食！咁你就會食得健康，食得開心！

而家，我嘅體重大約 146~148磅左右！比起 10月尾時輕左大約 16~18磅左右。我之所以 168 其實目的只係為左身體健康，唔好人到中年之後咁多病痛，到退休無左公司醫療福利之後，唔想太多醫療支出，所以要令自己身體健康 D。168 斷食最最最最最最最最最吸引我嘅原因，就係佢 "細胞自噬" 功能 (自己 Google 一下就知道)。同時用響自己身上又有效果 (自己多年來嘅膝痛都可以不藥而癒)。而家我一個禮拜都會有一日 231 斷食 (即一日只食一餐)，其餘 6 日都 168 (因為唔想太過影響老婆大人)。而家差不多隔日，我就會篤手指，睇下血糖指數，餐前大約 6.8mmol/L，而餐後 2 小時大約 7.8mmol/L。希望下次見醫生，醫生會減我藥啦！ :loveliness:

[[i] 本帖最後由 魔鬼班長 於 2022-12-27 16:22 編輯 [/i]]

送俾每一位糖友！保重身體。
[url]https://www.youtube.com/watch?v=2atYFCShMOs[/url]

可以簡單介紹平時午餐及晚餐吃什麼？因午餐在外邊吃！🙏🙏

番薯粟米等等，是否同樣介了？

[quote]原帖由 [i]042MAGGIE[/i] 於 2023-1-24 06:39 發表 [url=https://www.discuss.com.hk/redirect.php?goto=findpost&pid=555459076&ptid=30919458][img]https://www.discuss.com.hk/images/common/back.gif[/img][/url]
可以簡單介紹平時午餐及晚餐吃什麼？因午餐在外邊吃！🙏🙏 [/quote]
先回覆番 042MAGGIE 先，我平時中午午餐都係去番同一間泰國餐廳食晏。叫嘅都係不外乎兩款食物，其中一款食得比較多嘅係 "[attach]13980492[/attach]"！其次次係泰式炒粉絲。係呀，係粉絲呀。數番日子，都差不多 3 個月，減磅已有 25 磅。 :loveliness:

[quote]原帖由 [i]042MAGGIE[/i] 於 2023-1-24 06:42 發表 [url=https://www.discuss.com.hk/redirect.php?goto=findpost&pid=555459091&ptid=30919458][img]https://www.discuss.com.hk/images/common/back.gif[/img][/url]
番薯粟米等等，是否同樣介了？ [/quote]
番薯差不多一個月食 3 細條左右，栗米戒左。

先 Update 一下早幾日 31/1 去做 body check 結果先！中午去做 body check 晚上 8 點幾有護士打黎間接俾個 body check 結果俾我，當時要求我立刻入院再 check 一次血鉀！因為報告顯示我血中含鉀太過高！6.5mmol/L (正常人 5.5mmol/L) 後來我有入廠，不過同糖尿無關所以唔講住。講番個報告同糖尿有關指數！

去年11月初得知自己成為"糖友"，當時 HbA1c 13.8% (正常人 5.6%)，醫生建議我打胰島素降血糖，但我拒絕了醫生打胰島素的建議。反而積極減肥。即時戒晒所有中國四大發明包括粥、粉、麵、飯及麵包、餅乾等等精製澱粉質食物，只食魚、菜、肉、蛋原型食物，改用橄欖油煮食，用海鹽，一日只食兩餐(中午 12 點至到晚上 8 點前進食)，餐與餐之間絕對唔再食任何食物，只飲水、茶或齋啡。結果 3 個月減左 25 磅左、右 (現時太約 140 磅)，糖化血紅素降到去 HbA1c 6.6% ，最最最最神奇嘅就係我嘅總膽固醇由 7.2mmol/L 降到去 6.1mmol/L，LDL-C 由 4.9mmol/L 降到去 4.5mmol/L，HDL-C 由 1.1mmol/L 升上 1.2mmol/L。三酸甘油脂由 2.6mmol/L 降到去 0.9mmol/L

因此，唔好再相信，食肥野會令體內膽固醇積累！導致體內膽固醇積累嘅原凶其實就係精製澱粉質食物，即是糖呀！重有，減肥唔一定要崖肚餓架！減肥唔一定要食果 D 白烚、水煮嘅唔好食、難入口嘅食物架！我食豬一定食最肥，一個禮拜總有一日食梅菜扣肉，德國咸豬手(成隻食晒，當然連皮食)，食雞、食鵝都一定連皮食！當然，食野唔會食過量，食到剛剛好就最好，慢慢食，唔好食完有餓住個肚嘅感覺 (最最最最反對 D 人話減肥要食到 7 成飽，7 成飽即是唔飽啦！即是食完都重係餓啦！依 D 減肥法，真係唔會長久架！)

[[i] 本帖最後由 魔鬼班長 於 2023-2-5 00:57 編輯 [/i]]

今日又有新發現，係無意中發現嘅，所以想同大家糖友分享一下。
 
小弟確診成為糖友都有 3 個半月。一直都有按照醫生吩咐按時食藥 (除非食左自己覺得有唔妥，先至會停完再同醫生講！)
而家食開果兩隻糖尿藥為 Metformin 同埋 Sitagliptin。一直食都相安無事 (都食左 Metformin 3 個月，Sitagliptin 1 個半月)，但係早幾日，因為自己大意食完晏先正知到自己無帶藥 (呢次福佳了)，無辦法之下，唯有無食藥。晚上因為要返 part-time，所以又無得返屋企囉藥食，所以自己決定全日唔食藥，但晚餐照食 (都係無澱粉質，只有肉、菜、魚之類！)同時自己餐前餐後加上 8 小時空腹後再 check 血糖，發現我個血糖響無食藥之下都好似正正地常！
餐前 5.6mmol/L，餐後兩小時 6.4mmol/L，空腹血糖 5.4mmol/L。
當然，D 藥我會 keep 住照食，直到兩個禮拜後再見專科醫生，希望可以黎緊減藥啦！ 祝 各位身體健康。

加油支持你

Update 番我個糖尿病情先！
早幾日去見專科醫生，因為醫生要同我講番我個報告。佢話我個血糖有明顯改善，叫我繼續 Keep 住 168 加減少炭水化合物吸收。藥就唔減住，因為想我食住藥，讓我個肝、胰臟都可以進一步休息一下。同時 check 過我胰島素 6.4mcIU/mL ，SI Unit Conversions 44.5pmol/L 都屬於正常水平，肝、腎功能都正常，亦無蛋白尿，但係覺得我個總膽固醇 6.1mmol/L，同埋 LDL-C 4.5mmol/L，都重係未達標，因此建議我食降膽固醇藥 "冠脂妥" 5mg。其實我個人唔係好想食降膽固醇藥，因為人體內 80% 膽固醇由自己身體製造出來，只有 20% 膽固醇是由飲食轉化出來。因此我絕對相信膽固醇是自身需要的重要物質 (人體大大小小的細胞的細胞膜主要原材料就是膽固醇，無左或者缺乏膽固醇，會做成身體各個器官功能受損，尤其是腦部，因為人的腦部只佔身體 2~2.5% 重量，但就佔我們身體 20% 膽固醇，因此，說膽固醇是一種壞嘅物質，要減少它我並不同意)，身體自然因應自己需要生產出來的物質。要以食藥來控制它最終只會適得其反！我相信只要控制減低 LDL 氧化，就會減低血管內粥樣硬化，從而減低心血管疾病。因此重點不是減低膽固醇而是要減低 LDL 的氧化。但係我仍然尊重醫生建議，先食幾日 "冠脂妥" 再睇下身體有無不良反應。 :loveliness:

繼續做番我自己糖尿病日誌先。
今日放工後將會第三次覆診見見內分泌專科醫生，睇下我個病況。
其實，現在距離我確診成為糖友都有大約都有 5 個月，響呢 5 個月裡面確實都有好大嘅轉變，包括飲食習慣。
以前，未知有糖尿病之前，每日必定食個豐富早餐先至返工。假如無早餐食，就會好容易發皮四！依家，就無再食早餐，但都習慣左，無話心情不穩會發皮四！因為都知道 fasting 其實係對自己身體好嘅。以前腳痛要經常食止痛藥，而家 5 個月都未有再腳痛，重可以追車快跑添。:smile_44: 
就係因為今日要見醫生，所以我呢個星期都有 Keep 住每日 check 住血糖指數。同時我亦都嘗試一下食番少少甜野同澱粉質食物，睇下血糖會唔會不受控。發現平時一日兩餐，無澱粉質，空腹血糖指數為 5.2~5.8mmol/L (早上 8:30) ，餐後血糖 6.5~7.2 mmol/L。但假如進餐時有食 3 大粒糯米糍，餐後血糖會上到 8.8mmol/L。上星期日食自助餐，餐後食左 D 甜品包括雪糕，果一餐嘅餐後血糖就上到 9.2mmol/L。所以，我知道，我而家嘅情況，唔可以食得太多甜野。另外，我有幾日，中午及晚餐時，都食米線，但餐後血糖都係維持響 6.8~7.8 mmol/L 到，我相信米線呢 D 對我黎講，應該食得。最後 update 一下體重，現時體重 136磅，比起上年 11月未實行 168 前減左足足 30 磅。BMI 亦重回正常水平。
 
祝各位糖友，早日康復。

見專科醫生，點解要見專科，樓主去邊度覆疹開？

因為位內分泌科專科醫生跟開我個糖尿病，所以每次覆診都會見番佢囉！

昨日見完醫生，我稟報完我近日血糖指數之後，醫生都好滿意！
今次醫生俾住兩個月藥我，並叫我可以嘗試一下，將 Metformin 減少一半份量，再檢查下血糖會否異常高左，假如 Metformin 減少一半而血糖指數無明顯高左，就可以繼續 Keep 住一半份量 Metformin。但隻 Januvia 就唔好減住。兩個月後再驗 HbA1c 及肝、腎功能。
Yes，好開始！  :smile_43:

[[i] 本帖最後由 魔鬼班長 於 2023-3-30 13:50 編輯 [/i]]