生果轉貼員 2024-1-22 22:41
祝爵安生日快樂🎂繼續開開心心😆發放正能量俾呢個世界，傳遞大愛嘅信息❤️ [attach]14980745[/attach] [url]https://m.facebook.com/story.php?story_fbid=pfbid023V82HczFkKet8LLG8WhpkVzaw1QAMfXR8pF9ZHCocdUgzd7Pd4waptAGAuNTrf3nl&id=100079177552273&mibextid=Nif5oz[/url]
MIRROR演唱會第六場
呂爵安牛一 萬人合唱生日歌
十孩之母經歷喪夫之痛 再發現患癌
邀Edan錄打氣bite安慰女兒
爵安獻《Again》鼓勵勿放棄
「回憶多黑 都要再多一次期待的資格」
「26歲原來都做咗好多嘢，經歷咗好多嘢。27歲，繼續努力，繼續希望可以畀到到力量大家，亦都祝大家可以一齊『繼續再浪漫』。」Edan 呂爵安 27歲生日在亞博ARENA度過，所以這晚MIRROR演唱會 彩蛋主角也是他。
是日大批爵屎一早齊集Hall 3影大合照，一片全藍的爵安燈海。附近的FC（Jer哥 柳應廷 及Jeremy 李駿傑 ）也讓出前排空間，讓爵屎大合照。三個fc影大合照時間相若，UNICORNSSS、柳炒先影完，但因為爵屎太多，結果大家都「走唔到」，齊齊坐低；附近「鄰居」包括大表哥 邱士縉（Stanley）、Lokman 楊樂文 跟皮皮 陳瑞輝 的booth也坐滿爵屎，場面壯觀。
【「呂」布仙尼唱happy birthday to me】
彩蛋環節，爵安甫出場便笑：「Edan生日，佢已經返咗酒店，所以今日嘅彩蛋就係呂爵安本人！」一上台便唱歌，「恭祝你福壽與天齊 慶賀『我』生辰快樂…」之後轉唱英文，岩布仙尼2024年版本，「Happy Birthday to me…」
爵安提出請求謂：「我可唔可以錄低你哋？我未試過成萬人唱生日歌畀我聽。」說時已從褲袋掏出電話，拍下全場合唱生日歌的場面。「好聽好聽，好多謝大家今日嚟同我慶祝我27歲生日，多謝大家！」作為一個對生日都冇乜大感覺嘅人，你哋令我對生日好有感覺（笑）。」
爵安又說：「多謝爹哋媽咪27年前生咗我…有啲怪，我阿爸應該冇份生嘅。今日佢哋都有嚟到，多謝你哋。多謝你哋27年嚟嘅栽培。」有fans大叫爵安靚仔，他笑：「靚仔呢個都關爹哋媽咪事嘅。」續說：「多謝你哋畀咗個好好嘅生活環境我，咁愛錫我，好支持我做所有嘢。如果唔係佢哋嘅栽培同教導，我都好難今日企喺度，所以送啲掌聲畀我嘅爹哋媽咪，同埋都要多謝 小如豬 啦。」向台下派心甜笑：「Love you妹妹。」
【錄音的力量】
講經環節。「其實我間唔中都會收到啲dm…」邊行邊向觀眾派飛吻，引來一片尖叫聲，他叫道：「好喇好喇，聽我講經聽我講經！OK？」明明係你引人先嘅…
「好多時有啲粉絲嘅朋友，或者粉絲嘅親人同我講，『我嘅好朋友／另一半／小朋友，或好親嘅人，身體有啲問題，你可唔可以錄音畀佢，同佢打氣、加油呀？』每次收到呢啲訊息我都會即刻錄，錄音對我嚟講好簡單，錄個音就可以幫到人、畀到力量人。可能佢哋要打針，要抽血，做化療，要做好多好痛苦嘅嘢。佢哋就話，因為嗰位人（患者）係爵屎嚟嘅，所以你小小嘅錄音都幫到佢好多、畀到好多力量佢﹐所以我都會即刻做。」
「但係每一次錄音，我都會好唔舒服…我唔知點講。好多次會錄好多take，唔知點安慰人。點解呢個世界上發生咁多控制唔到嘅事，咁多苦難，點解人要面對呢啲嘢？」
【10子之母的故事】
半年前他客串了一部電影，有位小演員也是爵屎，小演員的母親跟爵安談到自己有10個小朋友，嚇了爵安一跳。兩人便開始聊，母親分享照顧10個小孩的趣事瑣事，令爵安印象很深。
「直到差唔多四個月前，呢個媽媽突然dm我，佢先生突然過咗身，囡囡心情好差，問可唔可以錄個音，畀力量佢。我嗰刻反應係，WHAT THE HELL？會唔會太黐線呢個世界？」這位母親還跟他說，她也驗出患癌，第三期。
「我不能想像如果發生喺我身上，我感受會係點。我一定會係咁問，點解會係我，我做錯啲乜嘢？點解個天揀係我？我一定覺得好難受。」盡力安慰，並邀請他們來欣賞今次團con。
【「回憶多黑 都要再多一次期待的資格」】
最近這位母親跟爵安說，病情沒有好轉，料自己時間也不多，很希望跟小朋友一起看MIRROR團con，留下一些快樂回憶，爵安馬上請公司安排，是夜他們也在席上欣賞。「佢有同我講覺得好辛苦，甚至唔想再堅持落去。我想分享嘅係，我自己啦，呢一兩年我都諗好多人生嘅嘢，開心真係唔係咁容易。點解咁多人生活喺苦難中？面對咁多挑戰困難呢？甚至我都會…覺得好攰喇，唔好堅持，算啦！
「呢件事remind咗我，好想同呢位媽媽講，我好幸運，原來我或者我兄弟嘅一舉一動，一言一行，或者做嘅作品，原來可以畀到力量同支持。只要有一日你哋仲需要我哋，而我哋又畀到力量你嘅話，我哋都一定堅持落去。所以我都希望你一齊堅持落去。」
「呢個世界真係有好多人遇到不幸嘅事，或控制唔到嘅事。我哋唔好向命運低頭，我哋一定要加油，繼續堅持落去。我今日好想同每一位過得唔好嘅人，以及同呢位媽媽講一聲，『回憶多黑 都要再多一次期待的資格』（《Again》），我想大家一齊送呢首歌畀佢哋。」說畢獻唱一曲《Again》。
天多黑﹐都要再光一次如盛夏。逆境盡頭，溫暖的陽光在那兒靜候。
娛壹