查看完整版本 : 18/05新加坡克蘭芝一哩賽日重心—林家准將勢不可擋 (已詳細分析,#2-6)

tipsmaster 2024-5-15 22:31

SG (18/05)

WP 推介: R10 4 大哥

冷門推介: R7  8 天官

R1  4 美味人生 9 國金電訊 2 獵鷹七月 1 飛馬六一
R2  6 影刺客 8 施奈德 2 聖令 5 陽光型男
R3  11 藍色鳴唱 3 一哥 1 黃金八一 9 十一太保
R4  4 林家酒脫 1 加利寶 5 國金星際 2 哈利神馬
R5  3 巴吉爾 2 林家號角 1 鑽石皇牌 5 掘金者
[color=#FF0000]R6  1 格雷男孩 8 小旋風 4 水壩 6 太平西洋[/color]
R7  8 天官 9 縱橫至尊 6 超能寶寶 1 太平寶貝
R8  3 一桿進洞 1 趙子龍 6 桑迪諾 4 納瓦利
R9  1 林家准將 > 2 金猴 8 獵鷹騎兵 3 致敬者 5 街頭夢想
[color=#FF0000]R10 4 大哥 2 智慧神駒 6 精神寶寶 3 太平蝠王[/color]
R11 4 將門虎子 1 幸運王者 7 舞聖 6 太平洋金

WP 3x7
R6  1 格雷男孩
R8  3 一桿進洞
R10 4 大哥
 
:smile_o01: :smile_o01:

[[i] 本帖最後由 tipsmaster 於 2024-5-16 18:44 編輯 [/i]]

tipsmaster 2024-5-15 22:32

[b]克蘭芝一哩賽  R9  林家准將勢不可擋[/b] 
曾幾何時,新加坡嘅國際賽吸引一堆頂級嘅馬參戰,由早年新航嘅「易搏來」、「冠軍風采」;KrisFlyers嘅「火箭人」力拼「蓮華生輝」,到之後克蘭芝一哩「川河尊駒」輕鬆連霸,過去廿幾年都有唔少精彩嘅對決。可惜就係今年既係新加坡賽馬180週年,亦將會係新加坡賽馬嘅最後一季。呢個星期六克蘭芝一哩賽日,除咗主題賽事,亦有新加坡三歲馬系列尾關新加坡堅尼,戲碼唔錯。場地會點,一向都睇天氣,當日就知會唔會狂風暴雨,而家講無乜意義。既然係歷史上最後一屆克蘭芝一哩,當然都要分析留個紀念。先講克蘭芝一哩,馬王「林家准將」出擊當然機會甚高,其他馬匹能力接近,好睇陣上互動,我就較秤先2,3,4,5,8。 
[b]1「林家准將」[/b]唔洗多講,上屆此賽冠軍能力高強,之後縮落獅城盃一樣睇住「金猴」嚟食,萊佛士盃再捷後於英女皇盃遇上「超霸神駒」大逃僅僅追唔切;之後金盃重磅不利氣走「追風寶駒」,來港跑一哩錦標其實唔差。今年復出兩戰全勝,上次巴克錦標讓其他馬磅,同主廄侶「林家酒脫」輕磅領放入直路憑鬥心追贏。今次回師首本千六、平磅,預計冇馬走佢可以擺前自己嚟,跑出水準對手難越雷池。 
[b]2「金猴」[/b]正路之選,明星馬歷來只一次冇前四,上屆四歲系列食住「致敬者」捧走埋新加坡打吡,但之後對住馬王確認係唔夠鬥,前次委員獎直路塞車,上次打開晒卻被頭二馬彈甩,史卓豐再次壓陣排個十檔冇pacing ,我覺得佢會選擇縮到尾鬥爆一段睇下點,三甲唔敢飛但贏唔到。 
[b]8「獵鷹騎兵」[/b]一路奇兵,呢匹澳紐馬來星前於智朗經典賽氣走「個性十足」,之後表現反覆唔強;賣到新加坡後一出千四即勝,之後上千八即跑打吡欠運才敗;今季休到足才復出,千四稍短輕描淡寫衝入殿軍,上次上千六濕地重現真身反勝「崛起六一」,今次當然越級挑戰,但未見盡嘅馬配上馬雅人馬已有默契,二檔可攻可守,仍有憧憬。 
3,5都係半冷門,先講[b]3「致敬者」[/b],無疑已證明呢個分已難再贏,但忠心馬往往撲近,上次其實出閘慢一慢,轉彎取位又check一check,直路有點大勢已去嘅感覺,之前跑千四其實同「金猴」接近,今次有四檔佢係其中一隻有權主動嘅馬,因為上次輸得遠而退熱,有權憑忠心施回馬槍。 
[b]5「街頭夢想[/b]」上年當起銳勢難擋,連場輕取「青蛙王子」、「超霸神駒」,之後跑克蘭芝一哩卻不良於行兼喘鳴可抹去;休半年後今年復出循序漸進,委員獎輸俾受讓嘅「爆款」而壓倒「金猴」,無疑有少少群駒密攏,但確認跑得返水準。上次全程外遊輸唔完,今次一定成冷,跑出水準爭位置唔難。 
[b]4「無敵大亨」[/b]都係上年四歲精英,四歲系列一再輸俾2,3一對,忠心馬會衝近但已難贏,前次委員獎表現回勇上次卻一步都冇,顧偉樂人馬合拍但對此群若欠神勇演出限於三至五名。 
[b]9「虎嘯」[/b]健康嚴重影響成就,根本好早期已憑強橫後勁贏到「衣錦榮歸」無得跑,轉倉休養年半後復出兩場都肯追,如果跑得出水準健康頂得住,贏晒都唔會覺得奇。 
[b]7「追風寶駒」[/b]上屆新加坡金盃大冷鬥到最後一刻影輸,之後卻時好時壞,計級數證明稍下風,搵到薛凱華邊線。 
[b]6「太平帝王」[/b]已一再證明千六唔到。[b]10「崛起六一」[/b]忠心但質素距離此群差一皮。

tipsmaster 2024-5-15 22:33

[b]新加坡堅尼  R5  巴吉爾上千六補中[/b] 
今年嘅新加坡三歲馬系列未有三冠王,今年突出嘅三歲馬唔多,呢場堅尼擺明都係1,2,3呢三隻明星馬再次對決,拉上千六我覺得對「巴吉爾」可能考驗稍細,搏佢呢場反勝對手,邊線份子都係5,6,形勢應該相當明朗。 
[b]3「巴吉爾」[/b]上年一出即勝後即挑戰金蹄鐵錦標得殿軍,今年復出後表現躍進,休出四班千二輸俾其後再捷嘅「旗開得勝」並不失禮,之後上千四狂勝;前次縮落去跑三歲系列首關,早段check一check後外遊都P,上次上千四新加坡三歲經典賽轉彎兜出外面衝,末段得佢一隻追住「林家號角」僅僅追唔切,今次上千六睇走勢、跑法應該都扳得到,七檔如埋到二疊三四位相當唔錯,可以補中。 
[b]2「林家號角」[/b]新一匹林家系明星馬,初出入P後直落掃四場,前次由膠沙轉戰草地仍能氣走「旗開得勝」,上次決定跑三歲系列自己帶,頭兩段57秒85其實相當快,末段得「巴吉爾」可以追得到佢而拋甩群駒,屬單打獨鬥、賽績優秀。今次上千六有點考驗,計跑法同性能佢爆發力未算強,預計上程會繼續自己操控步速,埋門試閘外遊追上方興未艾,林家系大軍壓境,坐二望一。 
[b]1「鑽石皇牌」[/b]當然都係三歲精英,上季尾連取三場,今年復出上千四頭兩戰都P,三班個場實屬高水準賽事,無疑輕磅有利但拍住另一匹明星馬「馬金」而壓倒「大哥」,說服力夠;之後縮落跑三歲馬系列首關入直路已經急不及待湧過補中。上次再戰千四,個第三全程被頂外面,入直路又被「巴吉爾」冚一冚影響,大勢已去其實冇再逼,Swiss Ace子嗣再上千六當然係問號,睇下質素搭夠到幾多。 
[b]5「掘金者」[/b]一出正正輕取「鑽石皇牌」,其後卻表現反覆;季內三歲系列兩戰都係恰可,今次再上千六我覺得一檔可能有助佢提升表現,如果唔理1,2,3,其實只係一組水準好弱嘅四五班賽事,佢係呢組較有能力嘅馬,可以再闖入前四。 
[b]6「林家神秘」[/b]上次捉到尾直路理應可逼更近,稍為失望,千六佢贏過無需懷疑長力,質素、進度當然唔及1,2,3,但換上史卓豐可能提升能力,邊線預返。 
[b]7「獵鷹十月」[/b]睇父系千六只會有利無害,今次如果改變跑法擺前走,要留神。 
[b]8「董事會」[/b]上次上程自己造pacing輕勝而回,計能力證明未夠但比其他馬已稍好。 
[b]9「獵鷹六月」[/b]強配千六都好,前一次受阻個第五算可以,上次就唔夠競爭力。 
[b]4「太平司令」[/b]膠沙較好而路程實屬大問號。 
[b]10「國金霹靂」[/b]千六不成疑問但季內只贏「好小子」。 
[b]11「木星海洋」[/b]、[b]12「海豹精英」[/b]五班馬如跑近無話可說。

tipsmaster 2024-5-15 22:33

[b]R4  林家酒脫勢如破竹[/b] 
大賽日好多馬都跑克蘭芝一哩,所以呢場克蘭芝A級賽戲碼淡薄,小貓七隻,1,4明顯技高一籌,其餘再諗已經係5,馬膽當然信受讓嘅「林家酒脫」,明星馬上次同馬王鬥到最後先輸,今次仲繼續輕磅,對手頂唔住佢升勢,我嘅範圍就係1,2,4,5。 
[b]4「林家酒脫」[/b]六戰5W1Q,上年年尾初級賽氣走「豐盛」,後駒三班再捷已到香港作賽;今季於膠沙輕勝後上千四繼續easy win,上次大幅越級跑巴克錦標自視甚高,雖然賺輕磅但對手極強,自己操控一個唔慢嘅步速,直路一直拍住馬王「林家准將」鬥到最尾先輸,雖敗猶榮。今次選擇縮程有少少意外,但馬房話想安排此駒循序跑四歲系列,所以選擇縮落千二而非進攻克蘭芝一哩賽,跑出水準又係表演賽。 
[b]1「加利寶」[/b]係唯一一隻銳勢能同「林家酒脫」相比嘅馬,近期嘅賽績都係膠沙加分上嚟,但此駒上年已於草地贏千二千四,失準個場皆因閘前衝閘,上次膠沙千一直路一擺正已經狂勝,埋門試閘對辦,對手唔強轉戰草地坐亞望冠。 
[b]5「國金星際」[/b]三選,上年兩連勝氣走「查明頓」、「尼彭伯格」甚為出色,今季三班千二個場頭馬氣走「大哥」、「雅志」,水準唔錯。近兩場一場上千四,上次則外遊,今次越級但對手除1,4其他絕不特別,如前兩駒有失佢補上唔奇,正路位置。 
[b]2「哈利神馬」[/b]以往千二專家但已退化,上次千四就唔洗理,前次外遊都衝入Q輸俾「林家准將」,今次勝在執個一檔,力短馬慳埋慳埋冇pacing場合鬥爆未必下風,冷勿盡忘。 
[b]3「智慧奇才」[/b]流鼻血後表現落差大,休出唔信。[b]6「太平飛船」[/b]縮程明智但膠沙遠優於草。[b]7「林家創世」[/b]路短或近。

tipsmaster 2024-5-15 22:34

[b]R10  大哥深慶得人[/b] 
呢個賽日除咗三場級際/高班賽水準唔錯,呢場三班千四屬近期少有水準出眾嘅賽事,大家都係會瞄住2,3一對,我就覺得「大哥」換人可重現真身,睇近期表現有餘未盡,有權反底,2,3,4,6係核心範圍,冷門小心「鹹蛋馬克」,冷人冷馬大樹遮蔭隨時又出擊。 
[b]4「大哥」[/b]上年尾出道,熱身後跨季三連捷,擺頭走嘅馬往往越走越勁,二月尾初上三班兼增程跑千四,入到直路頂到最後一百先被「鑽石皇牌」及「馬金」趕過,確認進步;前次平頭冠軍其實因為高德發甚唔硬淨,軟手軟腳仍頂得住;上次上千六可能現階段太急,今次回歸基本步,跑返千四,換上冠軍騎師冼文諾,戰力大幅提升,呢隻馬10檔外面盡展步伐殺埋嚟放可能更妙,大賽日可以補中。 
[b]2「智慧神駒」[/b]前香港馬贏唔到後運到新加坡,插四班揀膠沙千二即勝,其後逐漸增程再取2W1Q,之後跑金盃其實唔算太差。今季慢慢做起試夠閘先復出,無疑上季尾同「春風得意」互有勝負、上千八賺盡慢步速贏馬唔算超特別,現時五月先出擊賺咗體力,11檔用此系愛將潘曉朗志不在小。 
[b]6「精神寶寶」[/b]三選,上季四班贏千六後有點徘徊,今年熱身後於四班連贏兩場,之後升班慢閘,上次千六轉彎入直路可能因為騎師唔熟馬性而略嫌早走咗,結果埋門叮噹影輸俾「沙巴皇牌」。今次選擇縮程,換上馬雅應該更妙,希望逼得起早段,忠心馬五檔相當好跑,半冷要尊重。 
[b]3「太平蝠王」[/b]不敗之師當然唔敢輕視,嚟到新加坡插班兩戰全勝,上次升班、增程跑千二,頭兩段46秒06甚快,入直路拉住如入無人之境狂勝另一匹明星馬「雅志」,大把在手。今次再上程難度唔細,連同外地未跑過,加上陣上仍見佢有啲鬥口較心急,睇血統千四一定到,今次睇睇臨場情緒,如太熱就唔值搏。 
[b]10「鹹蛋馬克」[/b]最佳冷門,上年於此程跑二級賽同「聖十字」衝近,今季咩路程都撲近,70分已經係有晒迴旋餘地,高君濤嚟到新加坡後獲羅瑾夫人支持,暫時得一個P唔收課,冷門蠢蠢欲動。 
[b]5「高大上」[/b]現時神出鬼沒,同高德發人馬超夾,搭啱條線隨時又殺晒。 
[b]8「飛魚駿」[/b]其實呢隻係三班頭馬,近兩場就頗為失望,埋門試閘就冇問題,睇下適應咗兩場步速換人退熱會唔會變身。 
[b]1「金星」[/b]級數最高,但八歲馬上年尾起退化甚快,好檔都唔爆幾失望,今次強配四檔睇下點。 
[b]7「永結同心」[/b]三班、草地仲要千四,劃走。[b]9「舞蹈之光」[/b]仗好仗劣難測,三班千四揀唔到。[b]11「開路先鋒」[/b]評分仍偏高,減多幾分等四班。[b]12「太平英雄」[/b]有前無後。

tipsmaster 2024-5-15 22:35

[b]R6  格雷男孩鬥小旋風[/b] 
講完幾場高水準賽事,其餘賽事就無乜特別只係揀幾隻講,先講第六場四班拆組千二,核心範圍就係1,4,8,[b]1「格雷男孩」[/b]級數最高,上季初出即勝後於三級賽金蹄鐵錦標輕取其後三班easy win之「豐盛」,上兩場都係跑新加坡三歲系列,上次跑落覺得唔到千六,選擇跑返四班縮落首本千二,埋門試閘保持勇態,憑級數加埋史卓豐壓陣,重磅應讓得起。最強對手最忌[b]8「小旋風」[/b],質新馬近期全入三甲,前仗於未奪標賽開齋,再受惠近年改制可以插落五班再easy win,今次升班但對手甚弱,埋門試閘輕鬆餘勢甚好,輕磅擺前走威力特強。[b]4「水壩」[/b]插四班後能跟能放,上次贏得險最尾幾步近乎停晒皆因放得超快,今次由13檔變6檔應該唔需要用力放快咗,正路選擇。 
 
[b]R8  執好檔要一桿進洞[/b] 
八場跑初級千二,馬膽必定係冼文諾嘅座騎[b]3「一桿進洞」[/b],質新馬第二仗贏馬後長近但未再贏,今次降班跑對手減弱,上月尾試閘甚出色,直路被高分馬「智慧神駒」外面壓住仍能穿上,餘勢甚佳,上週本身book定冼文諾跑但後備一未能補出,第二日匆匆即報名,執個二檔好跑到暈,黃金機會都把握唔到就可以放手。

tipsmaster 2024-5-15 22:36

可能係最後一個轉播嘅新加坡賽日
喺度留個記錄/紀念

大暉 2024-5-16 07:39

支持大叔

tipsmaster 2024-5-16 12:01

[quote]原帖由 [i]大暉[/i] 於 2024-5-16 07:39 發表 [url=https://www.discuss.com.hk/redirect.php?goto=findpost&pid=566498566&ptid=31575120][img]https://www.discuss.com.hk/images/common/back.gif[/img][/url]

支持大叔 [/quote]
多謝暉哥;P;P;P

tipsmaster 2024-5-16 20:31

馬會改咗唔播R4播埋尾場

韋恩 2024-5-18 09:37

[quote]原帖由 [i]tipsmaster[/i] 於 2024-5-15 22:31 發表 [url=https://www.discuss.com.hk/redirect.php?goto=findpost&pid=566494476&ptid=31575120][img]https://www.discuss.com.hk/images/common/back.gif[/img][/url]

SG (18/05)

WP 推介: R10 4 大哥

冷門推介: R7  8 天官

R1  4 美味人生 9 國金電訊 2 獵鷹七月 1 飛馬六一
R2  6 影刺客 8 施奈德 2 聖令 5 陽光型男
R3  11 藍色鳴唱 3 一哥 1 黃金八一 9 十一太保
R4  4 林家酒脫 1 加利寶 5 國金星際 2 哈利神馬
R5  3 巴吉爾 2 林家號角 1 鑽石皇牌 5 掘金者
R6  ... [/quote]
支持Tips兄:loveliness:

tipsmaster 2024-5-18 10:16

[quote]原帖由 [i]韋恩[/i] 於 2024-5-18 09:37 發表 [url=https://www.discuss.com.hk/redirect.php?goto=findpost&pid=566537386&ptid=31575120][img]https://www.discuss.com.hk/images/common/back.gif[/img][/url]

支持Tips兄:loveliness: [/quote]
多謝!很久不見😂
頁: [1]
查看完整版本: 18/05新加坡克蘭芝一哩賽日重心—林家准將勢不可擋 (已詳細分析,#2-6)