星矢聖衣大系 2024-9-19 17:40
今個月29號於日本中山競馬場舉行嘅1200米一級賽短途馬錦標，兩匹香港短途好手「維港智能」、「綠族無限」已落實參戰，日前已飛往日本，為呢場賽事備戰，而前駒更找到莫雷拉執韁，「綠族無限」則由田泰安策騎。
雖然近年日本短途陣營唔算太強，但上月底於札幌競馬場攻下G3堅蘭盃嘅Satono Reve，已落實繼續交由澳洲好手連達文出戰短途馬錦標，肯定成為港隊嘅最強攔路虎。現年5歲嘅Satono Reve，由香港馬迷熟悉嘅堀宣行訓練，至今9次上陣，除了在一場1400米賽事得殿軍，其餘8場得7冠1亞，上月底正正由連達文建功贏G3，呢位好手亦給予馬兒極高評價，難怪佢亦願意月尾去日本客串一天，為Satono Reve效力，睇吓兩匹香港賽駒「維港智能」、「綠族無限」能否擊敗呢匹冒起中嘅日本短途好手啦。
原文網址：再配連達文 征日雙雄最強攔路虎？ | on.cc東網 | 馬經 | 新聞專欄 [url]https://racing.on.cc/news.html?articleId=bknrac-20240919132226884-0919_01002_001[/url]