請問有關師兄/姐依家住在新加坡？
我想依家MRT係咪已經唔賣單程票，個個人都要用儲值卡(EZ Link/ Net Flash)？
機場的地鐵站是否隨時可買到ezlink，我不想買day pass，只係轉機留十個鐘，出去送小小手信俾個朋友

前言/廢話︰話咁快又兩個星期，22~23年度港超又開始進入尾聲，由於季初因為疫情關係，今季不設降班，不過老老實實深水埗嘅成績真唔掂，暫時只係贏過兩場U23，而且兩次都係小勝一粒，真係無乜值得高興！
今年睇咗咁多場比賽，但有兩隊我仲未見過，分別係南區同流浪，咁啱三月兩場主場就對呢兩隊！上星期英菁杯對南區，半場守得唔錯無失波，點知下半場突然崩圍連失五球，到今個星期再對南區，深水埗話要復仇，睇吓點！？
.

門票︰正價80蚊，中佬本身係季票會員，所以今場係包在季票之內。

上半場︰上半場開波今日又有變陣，朱偉鈞後備，陳灝正選。可能由於上星期菁英杯比賽中南區被深水埗半場守和，今日希望可以速戰速決，一開波就壓住半場嚟踢，而深水埗基本上退守半場。不過當大部份人都喺深水埗半場，南區又唔能好易唔去撕破深水埗防線，喺上半奧力斯受嘅壓力唔算太大。去到成22分鐘，南區先有一腳正式射門，而一分鐘之後24號一腳射門就比較有威脅，不過都係越楣而去。29分鐘南區圍住深水埗攻，不過真係好有威脅的射門又欠奉，半場未能攻破深水埗大門。
而深水埗攻勢就更加少，上半場最有威脅係陳灝開波無耐嘅射門，不過未考驗到南區守門員，就被南區後衛解圍。
.
下半場：下半場一開波南區就進攻，立即就搏到一個角球，點知上半場防守死球表現唔錯下，下半場呢次角球就比南區杜馬斯衝頂入網！又一次喺開波後唔夠集中，中佬搖頭上半場嘅努力又沖鹹水海！

前言/廢話︰自從1月14日喺將軍澳運動場反客為主擊敗U23後，之後幾場比賽深水埗又出現故態復萌，對理文、晉峰同港會三場波，後防唔係出錯，就係對方入世界波，去到對港會一場，前鋒踢出今季組織最好一場，點知又主柱又中楣，再唔係就俾狀態大勇費查左飛右撲，全部救晒！ 

好唔容易呢一場終於又到對U23，但唔好以為U23就食硬，上次都差少少臨尾香被追和！對於U23嚟講，今季有無機會贏波，最好機會就係喺深水埗身上搶分，講衰句大家都係揸住個乞兒兜，大家都想喺對方個兜攞飯食！
門票︰正價80蚊，中佬本身係季票會員，所以今場係包在季票之內。

上半場︰
一入場竟然發現深水埗打氣區內，「港超名人」俊立竟然在場！佢唔駛去跑馬地撐傑志咩？上次見佢又係對U23喎！我淨係聽聞佢同理文有啲恩怨，乜同U23又有過節？ 
一開波深水埗就憑主場球迷打氣之下，經過兩三場磨合之後，深水埗前線開始同朱偉鈞有較好合作，一開波就傳個波去前面由朱偉鈞去帶動進攻，開波無耐就迫到一個角球，開出角球就比朱偉鈞接應頂入，估唔到7分鐘都唔夠，深水埗就攻入今季主場第一個入球，亦都係朱偉鈞加入深水埗後第一個入球！ 
咁早就領先，深水埗當然希望乘勝追擊，三分鐘後又係朱偉鈞喺左邊攪攪陣，禁區內出個波去尾柱，劉浩霖接應勁射緊緊越楣而去，可惜未能拉開紀錄。之後深水埗仲有幾個機會，朱偉鈞試過頂中龍被龍門接住，羅港威亦試過射門柱邊出界，但始終未能入到第二球。
而U23今日當然都係求勝心切，但係實力有限所以唔算好有威脅，不過唔知係咪壓力太大，班小朋友好似愈踢愈燥，上半場好明顯U23同深水埗爭波之時，「唔收腳」同「毛手毛腳」次數都非常多，而且今日個球証對呢啲小動作走漏眼的比率非常高！中佬覺得球証唔係偏幫U23，而係佢真係睇漏，由於U23超技術較多，所以深水埗球迷都非常不滿，如果下半場尾段仲係咬住拉唔開，大家心急下去得更盡，球証又做唔到明察秋毫，分分鐘會引致「開片」都唔奇！

前言/廢話︰繼上星期同同級對手晉峰比賽之後，今個星期作客對手亦都係同級嘅港會，雖然對上一次兩隊對陣港會5:1，但係菁英杯未必能作準，而且之後深水埗陣容都有大幅度改變，所以今場都有機會搶分。
門票︰正價80蚊，今場中佬好多謝深水埗球迷會送出客場飛俾我參觀下呢一個所謂地獄球場！

題外話——香港會球場：第一次嚟到港會主場，入口真係有啲難搵，好易行錯咗去馬場嗰邊！不過當我入到去之後，又發覺呢個場其實唔係好地獄。
首先作為港超十隊中唯一唔喺康文暑球場作為主場，港會場本身可容納嘅人數係2750人，比起幾個港超球場都仲要多，不過由於中間無跑道隔開，所以驟眼望落以為好細。
至於佢哋自稱為地獄主場，其實有啲誇大，同其他港超球場最大嘅分別，係草面用咗仿真草而唔係天然草。不過好多香港次級聯賽都係用仿真草場，所以對於上一季仲係港甲嘅深水埗，要適應應該唔難。呢個場可能因為比較新，所以雖然同為仿真草，但草面嘅狀況比蒲崗村嗰種崩塌狀態完全唔同！
唔用地獄嚟形容，反而中佬覺得呢個場有啲似外國低組別聯賽啲小型球場，再加上開波之前PA全程講英文，更加感覺似去咗外國！

上半場︰
開波前公佈陣容！嘩！深水埗居然收埋兩件韓援，擺明留力下半場搏殺。雖然少咗兩件韓援，但開波初段時間深水埗形勢上唔輸俾主場嘅港會，中場控球指數稍高，直接攻門考驗費查啲次數更多！