註冊 登入



打印

[其他] 【遊記分享】廣西 龍脊梯田﹑陽朔 4天遊

【遊記分享】廣西 龍脊梯田﹑陽朔 4天遊 E-mail 此主題給朋友

[隱藏]
「上年呢個時候曾經去到龍脊梯田,欣賞梯田美景;今年又到左欣賞梯田既好時間,所以想係呢道同大家分享一下呢篇小小既梯田遊記,希望大家會喜歡啦^^」

平時見到既田大多數都位於平地,易於耕種;但中國西南地方好似廣西﹑貴州等等,好多地方都係高山,平地少,農民就要係山上開闢梯田耕種,所以呢d地方四周圍都可以發現梯田,上年同一大班朋友去過貴州加榜梯田,而今次就唔去貴州,去左比較近香港既廣西龍脊梯田,龍脊因為梯田規模大,梯田又多又高,係廣西比較罕見,所以就有「世界梯田之冠」稱號;龍脊梯田最靚既時候係春天放水同中秋金黃色時間,但好可惜今次去早左十日,所以見唔到最靚既灌水梯田,最靚時間應該農歷四月十五之後,梯田會放滿水,今次有小小美中不足......


短短4日半行程:
Day 1
香港 - 廣州 - 桂林             (宿:火車上)
Day 2
桂林 - 龍脊梯田                (宿:龍脊美景樓)
Day 3
龍脊梯田 - 桂林 - 陽朔         (宿:陽朔花滿樓青年旅舍)
Day 4
陽朔 - 興坪古鎮 - 陽朔 - 深圳  (宿:巴士上)
第五天上午順利返到香港


16/5/2013

第一天

旅程由廣州火車站出發,先坐火車到桂林,再轉車到龍脊;點解會由廣州上車而唔係深圳上車呢?因為深圳開車既時間唔太方便,5點半開車,放工就一定趕唔到,與其都要用一日假期不如早D去廣州行山食下野仲好啦,所以一早就去左廣州,最後都係搭返深圳開出個班車~


有人話廣州火車站係中國最危險既地方,係唔係最危險就冇去深入研究,只係覺得呢道係我見過既最污漕﹑最混亂既火車站,人又多空間細,可能
廣州站已經舊啦...


乘坐既K952列車由深圳開出,但未上車就delay,估唔到佢只係第一個站就可以遲咁多,傳聞話係因為粵北大雨影響,當日經廣州北上既列車全部都delay幾個鐘,又會咁唔好彩既...


原本以為遲個半鐘已經好好,排隊時又突然轉牌要遲兩個幾鐘,明年早上仲要趕下班車架



其實係廣州火車站排隊係完全冇用,排第一只會令你最遲上車,因為上車要由候車室後面行返去中間大堂,好彩發現左呢樣野,唔去同人迫lu,企係後面等上車仲好


今次見好耐未試過就坐硬座,十幾個鐘時間又唔係長,所以就硬座一下;當然硬座冇床位咁舒服,而且仲十分迫,坐係道都會頂腳,不過勝在夠平,廣州去桂林只係115蚊,而且仲見到好多唔同既訓覺方法,有坐係地下訓,有趴係道訓,有捐入椅套訓......一次難得既體驗;夜晚每個鐘都會醒一次,每次望到個時間,心諗:咁耐都仲未天光架......

第二天

最後十一點半先去到桂林,比原定時間遲左4個鐘,已經上唔到九點開去龍脊既車,唯有坐下一班車啦...一朝早部車仲係湖南飄緊時已經打電話改巴士時間,但為時已晚,下一班車已經冇位,但冇計都要上




落車後先找地方食午餐,來到桂林就緊係食我最鐘意既桂林米粉,4.5一碗



食飽再返去火車站出面,上美景樓提供開去龍脊既直達車



坐呢D由旅館提供既車雖然要50蚊比坐巴士貴,但比巴士方便好多;如果坐普通巴士,要先去汽車站坐開去龍勝既車,去到龍脊路口再轉車入梯田,今次已經冇咩時間,唔轉來轉去lu


一早都知部車full左,我就係坐係司機位後面個塊紅色野上面,坐足3個鐘



條路好爛拋到暈



去到梯田啦

龍脊梯田主要分3部份,大寨梯田、平安寨梯田、古壯寨梯田;而我今次去既就係大寨金坑梯田,門票大寨+平安寨80元


一落車就會有好多瑤族婦女幫手背行李上山,我當然冇咁做啦,一個後生仔請aunite背行李會比人笑架?龍脊瑤族屬於紅瑤,瑤族其一個分枝,紅瑤最易認就係佢地鐘意著紅色民族服飾


新整左纜車上3號景點金佛頂...


另一邊既平安寨係壯族梯田,因為比較早發展,好多旅行團都會去,所以平安寨比較多人同商業化;而呢道大寨係瑤族梯田,比平安寨更深入山中,去既人冇平安寨咁多(而家有纜車好難講),而且大寨梯田比平安寨更多更壯觀


用作山上運輸既馬



跟隨當地人上入住既美景樓,佢地幫人背行李上山,收費大約30-40,辛苦晒







首先去到最低既大寨,有食﹑住既地方,不過來到呢就冇理由住係山腳既





一個外國人踩單車來到,係車上都見到佢估唔到咁快就追上我地,第二日又見到佢踩返去桂林,勁!!


全個山都係梯田,梯田自當地小數民族搬入開始,由元朝一路起到清朝,終於變成今日既樣子,垂直落差有500米,其實唔好話耕田,只係行上去我都覺辛苦




[ 本帖最後由 平凡人~~ 於 2014-5-20 07:09 PM 編輯 ]



回覆 引用 TOP

熱賣及精選
今日天氣唔好,灰朦朦一片,又好大舊雲











因為梯田未放水,冇陽光又灰朦朦,睇落唔係咁靚



不斷向上行,上到另一個村寨,平時懶少做運動,有D辛苦





望上山見到住既客棧,真係好高,有排行



有少少慶幸唔係住全景樓,因為佢係最高


呢道好興竹筒飯,見到都想食,但要趕路,有得睇冇得食



呢道耕田又危險又辛苦,唔小心差錯腳就可能...





上到中間既田頭寨,有YHA可以住


要繼續努力向上行,越行越高





行左一個鐘,終於望見美景樓,即刻衝上去休息一下



突破,山上開始起霧



上到來都接近六點,先放低行李,順便叫定今晚飯餸;唔知點解check in時完全唔洗我地出示證件,又唔洗先交房費同按金,就咁比條鎖匙我地就入住,真係第一次,竟然咁信我地唔怕走數?


放低行李,出來見到咁,唉...好大霧咩都見唔到





出去向山上方向行下,霧時大時細,不過都係唔清楚架啦





狗仔腳印好得意



回望美景樓


最新最靚既全景樓


如果梯田放左水既話會靚100倍



去到一號觀景台--西山韶樂,望落去本應係好高好壯觀既梯田,不過而家就咩都見唔到,冇計啦太大霧,寄望明天有好天氣啦,希望在明天丫ma







都冇野睇,落山返去食晚餐啦



行落D又少D霧,咁奇怪既?




一餐豐富晚餐,上山上得咁辛苦,緊係要食好D

山上面既野預左比較貴,所以都冇計較價錢,最重要係食得開心;土雞一隻分開煮兩個餸,108蚊,又滑又好食~




竹筍炒臘肉,50蚊


炒菜二十幾蚊


竹筒飯20蚊一筒,等左你好耐啦



辛苦左一日,慢慢享受一餐豐富晚餐,3個人都食得好飽;唔知點解老闆娘又係唔收我地錢住,話明天先一次過比,但又見到其他人要比錢bor,都唔知算好呢?


食飽行出門外,冇晒霧視野好清晰,估唔到夜晚先散霧;最右手最高個間就係全景樓,好慶幸冇揀住佢,行都行餐飽,旁邊既唔記得係唔係觀景樓,而最左既係萬景樓;原本開頭係揀左住萬景樓,但咁岩佢冇晒三人房,所以就住左係呢道美景樓,美景樓都唔錯啦~


138蚊既三人房,平靚正,廁所都算清潔,最重要係有座廁,花灑又夠力



香港有30度,但呢道好清涼,雖然冇冷氣,但涼到好似開左冷氣咁,蓋住綿被訓好舒服



住既呢間房好特別,係一個緊急出口,廁所有門口可以直接出到去客棧後面,走左都冇人知,當然我唔會咁做啦~


未來到既時候仲以為山上住宿會比較簡陋,但又唔係bor,住係呢道好舒服,床﹑被鋪等等都好滿意,完全係出乎意料,今次真係冇揀錯住呢道~



[ 本帖最後由 平凡人~~ 於 2014-5-21 11:21 AM 編輯 ]



回覆 引用 TOP

第三天

夜晚訓得好舒服,好唔捨得呢個溫暖被窩;相比起前一晚火車上,完全係天堂與地獄,下次坐硬坐之前都係要諗清楚,唔係必要都真係唔好坐座位,始終有張床係舒服好多好多~
一早五點幾起身睇下有冇日出睇先,但見到咁既情況...都係訓多陣算啦



六點幾﹑七點幾都有望過天氣,依然咁大霧,唉...心諗今次唔通咩都見唔到就要走?



無論點都好都要離開啦,走之前食返碗桂林米粉先



好大霧好大霧,好小心一步一步落山





馬仔自己一個企係大霧入面唔驚既咩?如果我自己一個係道就驚到震啦





雖然咩都見唔到,一場來到都係去千層天梯睇睇,山長水遠去到冇理由就咁就落山既,萬一將來有朋友問起呢道有咩睇既時候唔識答咪大獲,都係去望望,希望有奇蹟出現


龍脊呢邊既正宗瑤族房屋有多層設計,最低層用來養動物,上面起居生活;不過行過時動物味道有D難聞...


繼續在霧中前進






去到千層天梯所在地,千層就唔見到啦,幾層都仲見到既



人地影相影到好壯觀架...琴日又話希望在明天,而家明天到啦,咪又係要失望,電視廣告呃人既


離開千層天梯繼續落山,突然有發現,好似有風吹散D霧?



嘩...等一等大霧真係比風吹散左好多,即刻有D野睇





隱約見到下面村寨,原來琴日上到咁高,比個叻自己先~








望返上山,冇陽光視野始中唔太清晰,不過有得睇已經好好,唔要求咁多啦


對面應該都有好多梯田,但就比霧遮住晒


山下既壯界,一陣會經過,都係居高臨下睇正好多;原來廣告係冇呃人,聽日一定會好天既,希望在明天丫ma~




見機不可失,即刻返轉頭去千層天梯望望先



個人覺得好似一舊舊便便




大約20分鐘,所以野又再次被大霧覆蓋;其實我覺得自己好幸運,原本已經打定輸數咩都見唔到就要落山,真係好好彩,雖然只係短短既時間,最少都比我地欣賞到呢個咁靚既梯田,總算冇白來呢個地方






離開呢道繼續向山下走,好多梯田約隱約現







壯界呢邊,好多梯田已經放左水,農夫們努力工作






回覆 引用 TOP

嘩...又散霧啦,點解咁好彩架,心情就好似中獎咁,以為冇機會,機會可以突然係面前出現,以為機會已經走左,又會有下一個機會等緊你,哈哈~旅行中總會遇到好多驚喜,總會有好多意想不到既事發生




一路行一路影相,唔經唔覺就快去到最低既大寨



可以遠離城市繁囂,忘記城市中所有煩惱,安心享受一晚寧靜既田園生活,係香港用幾多錢都唔會感受到,不枉咁辛苦坐十幾個鐘車來到呢道,就算只係一晚都已經心滿意足




寨中見到有人燒炮仗,又有人湯豬,心諗今日唔通係節日?但真係好對唔住,問村民先知原來唔係節日,係有人過身...







離開龍脊前先食個午餐,由於時間唔多,簡簡單單食個竹筒飯,呢個竹筒飯比起琴晚材料更多更好食,而且只係15蚊咋


新鮮煮好太熱,要涼一涼先,將竹筒擘開就有得食





食完就要趕住走啦,乘坐12:30車返桂林





龍脊行程好快就完lu,雖說天氣唔好,又落雨又大霧又冇陽光,不過可以呼吸清新空氣,可以享受田原風光,又可以食到農家飯,對於我地幾個城市人黎講呢D機會真係好難得,而且旅程中又有好多意外驚喜,大家都好享受今次短短既旅程;離開龍脊就要去下一個目的地陽朔啦!



回覆 引用 TOP

[隱藏]
第三天(續)
離開龍脊梯田回到桂林,事不宜遲繼續前往下一個目的地--陽朔



陽朔呢個地方都唔洗多講,我諗好多人都知道陽朔山水風景好靚好靚,雖然今次係第3次去陽朔,但陽朔仍然係咁吸引;由桂林去陽朔最方便就係係桂林汽車站坐開去陽朔既直達車,中途唔會停站大約個半鐘可以到達;桂林汽車站真係好多拉客既人,煩到暈,去到車站最好就係咩都唔好理,無論發生咩事有咩人阻住你都好,都要一枝箭衝入去買票上車,唔好係出面糾纏咁耐



到陽朔時間已經唔早,要把握時間出去四處走動一下



首先到陽朔公園,次次來到陽朔都會經過陽朔公園n次,但就次次都冇入去,所以今次再來到就入去睇下啦;以前會覺得呢個公園平平無奇,公園就只係一個公園,得D花花草草,但我錯啦,陽朔公園係望陽朔風景既一個好地方,可以上一個山仔由山上望見陽朔全景,比起由地下望又有另一種感覺


一路行上去,越高風景越靚





由另一個角度睇陽朔,感覺同平時好唔同;呢道望到全陽朔都被山包圍,就好似置身係山中,人都輕鬆好多








空氣唔太好,望出去有少少朦查查;呢個小山丘好矮,好快就可以行到頂唔覺辛苦,好值得上來睇風景


落山既時候已經天黑,又到食飯時間,係時候去搵食



西街有好多餐廳,想食咩都有得食,但就太多人啦,最怕就係同人迫,所以食野最好都係離開西街;今次又上返上年食過既餐廳,食開有感情~呢間依然都係咁旺,雖然係多人,但有既係熱鬧而唔係西街既擠迫,環境都好配合陽朔,望出去就係一座山


簡單幾個小菜,上年都有食過架





如果係西街餐廳食野,附近有好多人行來行去,好有壓迫感,而且D店員好煩,都係唔鐘意呢道,我食個間感覺市井D﹑地道D,食都食得開心D


陽朔西街超級多人,同行年宵差唔多,係超級市場買完野都係要盡快逃出呢個地方



呢段時間都唔係長假期,如果係黃金周既西街真係不敢想像係點情況



上年係間大超級市場,今年變左啤酒魚,唉...我又唔食魚又唔飲啤酒......



除左超級市場,另一個有興趣既地方就係明信片店,其他酒吧個D完全冇興趣







行到漓江邊,夜晚咩都見唔到,但就發現好多串燒檔,即刻幫襯一下,買左好多串菜;呢幾日食左好多肉,好似冇點食菜,要食多D先



呢道好似唔興用火燒串燒,全部都係用水碌,望落好似健康D?



坐低慢慢食,食飽就返Hostel訓覺






回覆 引用 TOP

第四天

今次住既Hostel,陽朔花滿樓青年旅舍







間房唔錯,好抵只係90蚊,45一個人咋,同床位一樣咁平,最衰間房係最高既6樓,行餐飽



早餐又可以食到超正桂林米粉,連續三年都要幫襯佢,冇計啦真係好好食

不過今年加左價,由6蚊加到8蚊,加幅33%,早兩年都冇加過價今年突然加咁多...不過都係咁好食就唔緊要啦;以前第一次食係由龍兄帶去,當時都唔知道呢間米粉係陽朔都算有少少名氣,之後先知道好多旅遊攻略都有介紹


究竟食桂林米粉應該要落湯定唔落好D呢?

好多人都話唔落湯食好正,但今次手快落左...下次一定要記住唔好落湯先得,不過我諗落唔落都係咁好食




成朝都落住大雨,以為會停雨,但食食下又落...唔敢踩單車玩啦,唯有周圍行下...最後去左興坪


個幾鐘車程來到興坪,興坪古鎮感覺上比其他古鎮更古鎮,冇點經過修葺,建築原汁原味











唔知邊道走左隻蟹仔出來



興坪呢間Hostel環境好靚,古色古香,common area好舒服好適合食野傾計,下次有機會去要試下住呢道先


一家人來玩咁開心?





由古鎮行出去漓江邊,美麗的山水風景就在眼前,可以坐竹筏去唔同地方;但今次就冇時間慢慢坐竹筏,漂一漂就要幾個鐘,唔知下次有冇機會漂下呢?不過竹筏個D拉客好好好好好煩,由落車跟到入古鎮,由古鎮跟到入Hostel,入左Hostel仲要係門口等,完全唔知佢想點...我要坐竹筏一早就會book定啦,book左平D又可以選擇有信譽既竹筏師傅,就算真係冇book都會自己搵來坐,冇咁易會比你呃到......














行下Hea下,玩左幾個鐘就要迫車返陽朔,好彩係總站上車,部車可以迫滿好多人



來到興坪其實好想上老寨山,山上面可以睇到漓江全景,日落景色更加超靚,不過今次冇時間又落雨冇得上去啦,有機會再去




又搖左個幾鐘(有段路超爛),返到陽朔又可以開餐,食飽就要上車返屋企lu







終於食到我既最愛番茄炒蛋



食飽就返去Hostel拎行李,再去汽車站坐巴士返深圳;今次部車比起上次靚好多,床位都長好多,而且冇超載(上次部車連走廊都可以坐滿人),司機都好好幫人編位,唔洗好次上次咁鬥快衝上去霸位


第五天

訓最舒服既頭位,訓醒既時候,部車已經返到深圳啦

不過上次6:30就到深圳,今次8:30先到,仲要停銀湖汽車站,原因係半夜部車冇啦啦停左兩個幾鐘,3個司機係道訓覺...又有高速公路唔行行小路,行行下高速公路又落左去D小路拎左D唔知咩上車,結果原本趕住上午返工既朋友就集體遲到啦,哈哈(傳聞話係而家政府規定客車半夜某段時間唔可以係高速公路行車,強制司機休息,所以就要中途停車等夠鐘先可以再起行)


幾日旅程好快完結,好彩呢幾日天氣都唔熱好涼爽,如果熱就冇心機玩啦;雖然去過陽朔幾次,但呢個地方依然咁靚,我相信將來一定會再來到呢個咁靚既地方

< 龍脊梯田﹑陽朔4天遊 >


< 完 >






回覆 引用 TOP

平凡兄都出油雞啦,小弟當然要做第一個支持啦



回覆 引用 TOP

回覆 #1: 【遊記分享】龍脊梯田、陽朔4天遊

又話Mo唔約埋你去睇梯田,原來自己都同班老友去左廣西



回覆 引用 TOP

引用:
原帖由 littletomboy 於 2014-5-20 09:13 AM 發表

平凡兄都出油雞啦,小弟當然要做第一個支持啦
TB兄早晨估唔到你咁快就見到,多謝支持



回覆 引用 TOP

[隱藏]
引用:
原帖由 azazpang 於 2014-5-20 09:13 AM 發表

又話Mo唔約埋你去睇梯田,原來自己都同班老友去左廣西
其實呢個係上年既事,都唔係今年去



回覆 引用 TOP

引用:
原帖由 平凡人~~ 於 2014-5-20 10:22 AM 發表


其實呢個係上年既事,都唔係今年去
喔~見你寫「上年去加榜,今次唔去貴州去廣西」仲以為係上星期去添,因為你喺Mo個帖度話你上星期去左第二道

上星期我第一次去陽朔,但感覺唔多好,人太多,好吵好擁擠,周邊嘅景色我覺得冇啲人講到咁靚,當地人叫我去西街玩,話好好玩,但我唔喜歡酒吧

可能係我只喺嗰度半日,冇去到啲靚嘅地方



回覆 引用 TOP

提示: 作者被禁止或刪除 內容自動屏蔽
硬座 ?  


回覆 引用 TOP

多謝分享詳細遊記及相片!

"硬座"....有冇軟墊及椅背係唔係又硬又好直呀?



回覆 引用 TOP

[隱藏]
這遊記實在太差



回覆 引用 TOP

 提示:支持鍵盤翻頁 ←左 右→
[按此隱藏 Google 建議的相符內容]




重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。