打印

[遊記分享] 4月北九州賞櫻七日六夜(已完成)

4月北九州賞櫻七日六夜(已完成) E-mail 此主題給朋友

[隱藏]

2015年4月完成我同老公嘅蜜糖月,終於整理好遊記同大家分享下。


3/29 - 4/4,7日6夜精華遊,全程六晚住Hakata Green Hotel Annex。


以博多為基地,自遊行,遊走博多、長崎、柳川、太宰府、熊本、豪斯登堡、門司港、小倉。



第一日 博多
  • [1.1 福岡到著] #2
  • [1.2 第三名拉麵 博多一幸舍] #6
  • [1.3 福岡夜。櫻 ] #8
  • [1.4 日式健康雞煲華味鳥] #13
  • [1.5 福岡夜食] #15
  • 後記 [酒店總評] #29


第二日 長崎
  • [2.1 長崎鐵道上的朝食] #30
  • [2.2 始創於1866年的茶碗蒸] #31
  • [2.3 長崎眼鏡] #32
  • [2.4 園遊哥拉巴] #36
  • [2.5 中華vs土耳其] #37
  • [2.6 千萬美金之夜] #38


第三日 柳川、太宰府
  • [3.1 柳川行] #40
  • [3.2 四百年元祖鰻魚飯] #41
  • [3.3 水鄉泛舟] #42
  • [3.4 拜見學問之神] #43
  • [3.5 九州拉麵第一位] #44
  • [3.6 天神排檔夜食] #45


第四日 熊本
  • [4.1 くまモン主場到著] #48
  • [4.2 意想不到熊本城] #49 #50
  • [4.3 驚為天人勝烈亭] #51
  • [4.4 遊園以成趣] #52
  • [4.5 くまモン探班記] #53
  • [4.6 熊本黑拉麵] #54
  • [4.7 無敵阿蘇布丁] #55


第五日 豪斯登堡
  • [5.1 走進荷蘭] #56
  • [5.2 漫遊娛樂城] #57
  • [5.3 海賊王に 俺はなる] #58
  • [5.4 顫慄冒險之旅] #59
  • [5.5 浪漫光之王國] #60


第六日 門司港、小倉


  • [6.1 九州鐵道歷史之旅] #61
  • [6.2 大絕讚門司港咖哩] #62
  • [6.3 潮風海峽遊] #63
  • [6.4 山口縣獨立國] #64
  • [6.5 蜂蜜香蕉廣場] #65
  • [6.6 小小倉] #66
  • [6.7 福岡肥腸鍋] #67


第七日 博多


  • [7.1 早晨羅妮] #68
  • [7.2 遊公園行劇場] #69
  • [7.3 重口味拉麵與甜品] #70
  • [7.4 再見福岡] #71


足本連結
http://www.letseatoutdiary.com/search/label/%E4%B9%9D%E5%B7%9E



[ 本帖最後由 teeniehung 於 2015-8-26 10:23 PM 編輯 ]



回覆 引用 TOP

第一日 [1.1 福岡到著]

期待以久嘅九州之旅終於黎啦! 話說原定十一月去睇紅葉,但豪斯登堡嘅千陽號五月關門大吉,的起心肝要提早去,左度右度,終於決定三月尾出發。今次帶左七小B出發。


第一次兩公婆同步出發外遊。將行李寄艙後,就過關,全個過程相當順利,唔算多人。完成出境手續,去食個早餐先。試左呢間新野,外國炸雞專門店。普普通通,無乜特別。


登機係45號閘口,打卡是指定動作。


是次九州行乘坐港龍航空,航班算唔錯,早起晏返。去程KA380(11:20 - 15:40),三個零鐘時間過得好快。上機無耐就送餐,睇一陣電視就落機。港龍嘅飛機餐都算唔錯啦,最重要係有Haagen Dazs!!綠茶素麵、日式咖哩炸豬扒飯或魚柳配馬鈴薯及蜜糖豆。



日本時間四點前到達福岡機場。係國際航廈出發,先要搭免費穿梭巴士去番國內線航廈搵地鐵站。車程十幾分鐘,途中會穿過機場跑道,要開鐵絲網閘,都幾搞笑。終點站國內線航廈,落車後行前少少就見到地鐵站入口,福岡空港駅搭兩個站就係博多駅。趁假日買地鐵一日券¥520用盡佢! 適用於福岡全市三線地鐵,每程地鐵¥200起,搭到三程已經有賺!



福岡機場最出名嘅係機場同城市嘅距離係近到想像唔到。的確! 由機場出發,穿梭巴士連地鐵都係半個鐘唔洗。到達博多駅後,喺築紫口一出,過對面馬路就到酒店,真係超級方便。五點Check in 酒店Green Hotel Annex,再換上輕便行裝,正式開始九州之旅。第一件事係醫肚。



[ 本帖最後由 teeniehung 於 2015-7-28 08:57 PM 編輯 ]



回覆 引用 TOP

支持,有冇多d相



回覆 引用 TOP

引用:
原帖由 figochun2003 於 27/7/2015 22:30 發表

支持,有冇多d相
多謝支持先。有呀,好多相,所以會分好多段慢慢UP。。



回覆 引用 TOP

[隱藏]
期待中,可以參考一下



回覆 引用 TOP

第一日 [1.2 第三名拉麵 博多一幸舍]

九州係拉麵王國,計劃行程時點少得試試當地拉麵名店。第一間選擇去博多駅前嘅博多一幸舍。Tabelog 3.6,係博多區拉麵第三名。小店就係博多駅前,係正門出,過馬路進入商業區,就係某條小巷轉入去就見到。店仔細細,約有三十個位,五點幾時份可算係無乜客。喺自動售賣機買票,揀左一個黑ラーメン、一個味玉入り塩豚骨ラーメン。



味玉入り塩豚骨ラーメン ¥800


塩豚骨拉麵白湯非常清,豬骨味重,鹽味亦非常突出,但唔會過咸。雖然湯底唔算好忌廉咪,但足見膠質相當重,放一陣已經結成薄皮。值得一讚湯底可算係零份油份,細碎嘅蔥花正好作為提味,係一款濃而清爽香甜嘅湯頭。拉麵係幼身直麵,落單已無特別要求麵質硬度,估計送到時係普通軟硬。但食得出麵條相當幼滑,彈牙度已經不錯。叉燒半肥瘦,似薄切豬扒,白煮無特別調味,正正食到豬肉本身的甜味已經非常足夠。至於蛋係非常出色嘅溏心,雖然未經醬油煮過,但白洽蛋本身已帶咸味,好能突顯到蛋黃本身嘅味道。




黑ラーメン ¥750
黑拉麵湯被一層黑油蓋住,熱力充滿碗內。黑油似乎係黑蒜、麻油嘅混合體,芝麻味相當濃,完整蓋過左豬骨本身嘅味道,為重口味湯頭,個人較為喜歡前者。



兩碗拉麵各有特色,亦非常出色。完食。

[ 本帖最後由 teeniehung 於 2015-7-28 09:05 PM 編輯 ]



回覆 引用 TOP

好緊湊。


回覆 引用 TOP

第一日 [1.3 福岡夜。櫻 ]

食飽飽充滿能量,就番博多駅買埋JR Pass,解決明天之後五日嘅交通安排。還好外國人專用櫃檯唔算多人,又有專責服務員招呼,好快就完成整個購買過程。先寫好訂購表格,再寫埋指定席班次時間。講起就失策,竟然唔記得印JR班次表,好彩我係每日嘅行程開頭,已經寫好當日嘅班次,抄番出黎都唔洗好多時間。到櫃枱買好兩份JR九州鐵道周遊券(北九州五日版¥9260) ,核對清楚,確定黎緊五日行程都有位坐。


第一日行程只有半日,只能夠去一啲近近地嘅景點。適逢櫻花期,第一日就去福岡嘅大濠公園睇過夠。一入福岡地鐵就有種似曾相識,的確同大阪地鐵系統好相似。搭地鐵由博多出發,只需五個站就到達大濠公園駅,再行一短小路就到公園範圍。大濠公園係一個比大更大嘅公園,好多小朋友放假都會黎玩。櫻花季節仲有唔少攤檔,有燒麵、章魚燒等美食,仲有好搞笑嘅朱古力香蕉人、撈波波遊戲等,氣氛唔錯。
  




公園後方就係福岡城跡,剛好遇上櫻花祭有夜間開放實在太幸運。特別將行程編黎第一晚,正好善用夜晚時間欣賞夜櫻。福岡城跡唔少地方都掛上燈泡,櫻花都開得唔錯。櫻花祭期間,城內有三個景點係有料開放,當然櫻花同燈光效果會靚好多啦,但之前已經睇過史上最靚嘅二条城夜櫻,在此就無需特別花費,志在重拾賞夜櫻氣氛。



大約行左一個鐘左右,嘆完夜櫻就搭地鐵去福岡嘅最旺區天神。
第一站係天神地下街,係旅行團必去景點。其實呢條街都好出名,可算係福岡必到。黎到天神地下街大約八點,好多商店都準備關門。得知地下街有傳說中全日本得三間嘅Hello Kitty Store,最後搵唔到呢間,只搵到一間Sanrio Vivitix,唔知係唔係變左身。見商店都關門,就沿電梯上地面,行下Solaria Stage同Parco。


Solaria Stage 三至五樓係Incube家庭用品雜貨、地下層有Reganet超市,非常多野買。
Parco 一樓有The天神地產店,搵到九州限定Hello Kitty士多啤梨歐蕾。八樓有Kiddy Land鬆弛熊專門店。



係Mr. Donut買左一個期間限定ポン・デ・いちごミルク士多啤梨冬甩(¥151),賣相幾吸引,同宣傳海報差唔多。食落口感好有趣,唔係麵包,係煙煙韌韌好似麻糬嘅質地,配上麵包嘅味道。冬甩面塗上士多啤梨朱古力,味道好濃。兩層冬甩皮中間仲夾左士多啤梨牛奶醬,非常士多啤梨,不錯吃。



[ 本帖最後由 teeniehung 於 2015-7-28 09:22 PM 編輯 ]



回覆 引用 TOP

自駕定5day pass
全程住博多?



回覆 引用 TOP

[隱藏]
引用:
原帖由 figochun2003 於 27/7/2015 22:47 發表

自駕定5day pass
全程住博多?
全自由行,博多為基地,全程住博多Green Hotel Annex,JR出入,買左5 DAY PASS。



回覆 引用 TOP

好掛住九州呀


回覆 引用 TOP

nice place. Support



回覆 引用 TOP

第一日 [1.4 日式健康雞煲華味鳥]

水炊き係著名博多鄉土料理之一,係有將近百年歷史嘅福岡鄉土火鍋料理。用帶骨雞肉熬出嘅高湯作為湯底,將雞肉嘅甜美充分溶入湯頭內,滋味清爽。配合高麗菜同菇類,係一款好健康嘅火鍋。最後亦可以最後放入白飯煮成雜炊完食。



黎到福岡第一餐就決定試下呢個九州版雞煲。網上搜尋過,知道「博多華味鳥」係水炊鍋名店,好味唔在講,論餐廳環境同服務都係無得頂,每席有專人負責料理。華味鳥之所以咁出名,係自設雞場,能夠培養優質「華味鳥」。但正宗水炊き料理一人前索價可高達¥5000,實在唔捨得。



原來呢間仲有兩間輕食分店「とり割烹 博多華味鳥」,就決定去天神分店一試。店面明顯無正店咁大咁豪華,但都充滿日式風味,志在一試博多嘅華味鳥絕對無問題。菜單除左水炊鍋外,仲有好多其他嘅雞肉料理,價錢仲非常親民,就算係豐富嘅套餐,價錢都係¥1000上下。






水たき華御膳 ¥1650

御膳包括前菜、水炊小鍋、雞唐揚、自選丼飯、甜品,非常豐富。


水炊鍋雖然係一人前迷你版,但份量絕對交足貨。乳白色嘅清雞湯內,有兩大舊雞,仲有雞肉丸子、雞內臟、豆腐、蔬菜同菇類等。介紹話湯底係用上雞骨熬製五小時嘅雞湯,雞湯相當清甜,有別於九州乜都要濃郁嘅印象。雞肉非常新鮮,雞味濃郁,肉質細滑,沾些酸醋豉油更加能夠提出鮮味。由於雞無濃烈調味,好與壞一食就知,所以好強調雞本身嘅質素,華味鳥的確不錯吃。不得不提高麗菜吸盡湯汁非常清甜。自選該店名物親子丼,雞肉非常奶滑彈牙,加上蛋又煮得不錯,值得一吃。幸好雞唐揚唔會過份乾柴,可見雞肉品質唔錯。甜品似係柚子奶凍,非常清甜,奶味同柚子味平衡得宜。







チキン南蛮御膳 ¥890


因為華御膳已經嘆盡兩款名物,知道南蠻雞係宮崎必食,見呢度都有,又可以一試究竟。原來南蠻雞係炸雞扒配上他他汁,雞肉始終無水炊實肉,還好唔算鞋,而他他汁有非常多洋蔥,配上蛋白醬微酸,係好適合配飯。




呢餐全雞宴平平地算唔錯,水炊鍋的確值得一試,用最簡單嘅煮法,突出雞嘅優點。而親子丼亦的確唔錯,抵食!



[ 本帖最後由 teeniehung 於 2015-7-28 09:29 PM 編輯 ]



回覆 引用 TOP

支持分享油雞,其待更新



回覆 引用 TOP

第一日 [1.5 福岡夜食]

[隱藏]

離開天神返歸,經過博多駅研究下搭車安排,為聽日行程做好準備。



臨走時,見到超人氣牛角包做緊減價促銷,即刻趁墟排隊。呢間il Fon del Mignon的確係超超超人氣,任何時候都有長長人龍,幸好夜晚促銷人唔算多,又有減價,當然要把握機會。促銷方式係一袋五個為單位,以秤重來計價錢,正常價錢大約每100g ¥190,夜間特價300g ¥300。有別於一般牛角包嘅口感,唔係香脆,而係好煙韌鬆軟,亦有點濕潤。朱古力味幾香,唔錯。




得知日本Haagen Dazs出名多款,此行目的希望試試唔同口味、又期間限定嘅Haagen Dazs。就係酒店附近嘅Family Mart買到オペラ(¥420)。面層朱古力醬加上金箔,相當豪華名貴。中間係朱古力、咖啡、蛋糕嘅夾層,仲有流心朱古力醬。味道認真濃郁,仲好幼滑,非常出色。




係天神超市買左佐賀士多啤梨,半價約¥160。一盒三粒志在試下,賣相雖好,但味道較酸。呢個就係我地豐富嘅宵夜啦。






[ 本帖最後由 teeniehung 於 2015-7-28 09:34 PM 編輯 ]



回覆 引用 TOP

 提示:支持鍵盤翻頁 ←左 右→
[按此隱藏 Google 建議的相符內容]






重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。