• 瀏覽: 56,713
  • 回覆: 135
  • 追帖: 48
  • 分享: 7
+680
長崎一日遊市內移動主要靠路面電車、巴士同散策。計劃行程時,知道景點與景點之間距離唔遠,好多時靠對腳已經可以到達,未必經常搭車。就好似電車一程¥120,一日券要¥500,足足五程先回本,絕對唔化算,所以決定唔買交通券捆綁行程。研究行程時知道長崎最出名長棒麵同土耳其飯,同豪斯登堡想食嘅野差唔多,為左令七日遊食事更多元化,決定以台灣旅人認為長崎必食嘅名店作為長崎第一餐。


十二點未夠到達觀光通,就喺商店街轉角,就有一間始創於1866年、非常古色古香嘅食肆。Tabelog 3.54,為長崎排隊名店。


兩層木造嘅建築物,食店裝潢都好有傳統和式風味,似足日本時代劇傳統食店。入店後要先除鞋,除鞋係為全店使用榻榻米。除鞋後侍者大哥會大力敲打木板,通知二樓嘅服務員接應安排入座。用餐區分為兩邊,一邊係和式席地而坐,亦可選擇洋式小矮櫈。黎得日本,當然要感受最傳統嘅方法啦!



吉宗係日本第一間販售茶碗蒸嘅店鋪,絕對係茶碗蒸元祖。好多本地人同旅人慕名而黎都係為左一碗蒸蛋,是日柯打一定非點不可。選擇左一客人氣御一人前、同日替角煮定食作為午餐。


御一人前 ¥1350
定食包括一碗茶碗蒸及三色飯,賣相非常靚。主角茶碗蒸好幼滑,表面同中間都無氣泡,成碗都蒸得好靚。入口更加不得了,蒸蛋雖然呈固體狀,但佢嘅柔軟度直情近似於濃湯。入口即化,蛋液自然滑入喉嚨,口感就好似薑汁撞奶一樣。食得出蒸蛋用上好多高湯,湯頭非常鮮味濃郁,無添加過份調味。加上好多高級配料,如白肉魚、雞肉、香菇、木耳、蝦、銀杏、魚板、烤星鰻等,非常豐富。無諗過茶碗蒸可以如此講究,如此美味。至於三色飯,三色配料係蛋絲、櫻花蝦鬆同雞肉鬆。賣相吸引不在話下,仲相當好味。味道偏甜,正好下飯。


角煮定食 ¥1080
特價嘅日替定食相當豐富,包括幾款前菜、沙律、一客細茶碗蒸、麵豉湯、豚角煮配白飯,仲有兩款甜品。豚角煮已經燉到入口即化嘅程度,雖然三層肥瘦相間,但係唔覺油膩感。豬肉本身甜味好足夠,加上鹹鹹甜甜嘅醬汁,正好下飯,加一點芥末仲可以增加層次感。



此餐埋單¥2430,港幣百幾蚊一餐已經感到相當豪華。此行一大得著係,完全顫覆左對茶碗蒸嘅傳統概念。再唔係定食嘅配菜,而係可以上枱作為主角一味。的確,仲相當飽肚滿足。



[ 本帖最後由 teeniehung 於 2015-7-29 01:51 PM 編輯 ]



一點鐘食得飽飽,繼續下午嘅旅程。就係觀光通閒逛,沿路行去長崎另一個景點眼鏡橋。


就係不遠處,已經見到河邊有幾座石橋,其中一條橋有兩個拱圓,加上水面倒影,形成好似眼鏡嘅畫面。眼鏡橋係日本最古老嘅石橋,所以都相當出名。其實只係到此一遊,無乜特別,但見河水好清,仲有好多小朋友係岸邊玩,都不妨黎Hea下時間。




眼鏡橋另一特色,就係玫瑰花雪糕。婆婆們會推住一架流動雪糕車,喺橋附近擺檔。雪糕整成玫瑰花型相當特別。一枝¥150,淡淡嘅奶味、蜜糖味,口感似雪葩,口味一般,志在影相。


離開眼鏡橋時,唔覺意見到呢間得意餐廳,一間裝修以路面電車為主題嘅土耳其飯人氣店。


兩點左右離開觀光通,沿路行去築町搭石橋方面電車,向哥巴拉花園進發。



謝謝推介~
等我睇下BOOK唔BOOK到先
引用:
原帖由 teeniehung 於 2015-7-28 09:52 PM 發表
今日七日遊選擇入住Hakata Green Hotel Annex。用後感覺非常良好,絕對值得推薦。

地點方便
今次旅程以博多為中心點,採取放射式移動,住博多周邊酒店係必然之選。初頭都有幾間酒店在候選之列,評估過後,都決定 ...



樓主係眼鏡橋搵唔搵到舊心形石呀???

我上次去睇住本書都搵唔到..XDDD



引用:
原帖由 fof 於 29/7/2015 15:18 發表
樓主係眼鏡橋搵唔搵到舊心形石呀???

我上次去睇住本書都搵唔到..XDDD
見到有個位好多小朋友、遊客係度影相,應該係果度,但冇特登落去影相,廢事排隊。



下一站グラバー園。


貫徹慳家性格,搵到原來買預售券有優惠。原價¥610,優惠價¥510。先喺觀光通Family Mart用購票機買票。


幸好無白廢學左咁多年日文,成功用到Famiポート購票。兩點零鐘,坐電車到達終點站石橋,步行往登山自動電梯。知道哥巴拉花園喺山上,為左不走回頭路,選擇喺石橋站上山,仲可以搭電梯,唔洗自己爬上山。




登山電梯中段,有平台可以望到長崎市內。今日天氣都好好,風景唔錯。







長崎櫻花發現!



到達後門入口換票入場。入到去先發現原來公園係依山而建,更加興幸採取逆行方法遊覽,沿路下山更加舒服。


日本開放鎖國政策後,哥巴拉公園一帶是洋人嘅住宅區 「外國人居留地」。公園充滿著西洋風情,可眺望長崎港。園內有日本最古老嘅木造洋館,哥拉巴宅邸等九棟西洋風建築。蘇格蘭出身的貿易商哥拉巴(Glover)對於日本產業近代化具有相當貢獻,公園內洋館建築有三棟已被日本指定為國家重要文化財,可以讓人了解長崎居留地時代嘅軌跡。園內風景唔錯,閒時有櫻花、水池,影相一流。








行左一個鐘就離開,再喺下山路口嘅大浦天主堂門外影相。不裹處仲見到好得意嘅長崎蛋糕神社。



漫步商店街,見到有土產店,多間長崎蛋糕名店。沿商店街落山,已經試過唔少長崎名產。



四點鐘夠鐘食下午茶。角煮饅頭亦係長崎名物,岩崎本舖更係名店,更得到長崎特產最優秀獎,長崎市內總有一間喺左近。就算想買,都可以試食,一人一舊,試食嘅份量都幾乎有四份一個包。咁試完好食又唔怕再消費,買一個角煮饅頭 (¥400) 當下午茶。新鮮熱辣到燙手絕對無得頂,包係好似饅頭咁,再軟身濕潤一啲。中間夾住一塊厚切豚角,幾乎比包皮還大。三層豬腩層次分明,滷到入晒味,甜甜嘅醬油充滿住成塊豚肉,肉質鬆軟到入口即溶,又唔會過份油膩,食完一件更加開胃。




到達山腳就見到另一間名店,就係長棒麵始創店四海樓,可算係旅人必去食肆。但怕遇上團體客閉店或久等,又希望令行程更加順暢,惟有放棄,長棒麵留待豪斯登堡再食吧。




[ 本帖最後由 teeniehung 於 2015-7-29 10:05 PM 編輯 ]



離開哥拉巴園,繼續散策之旅。下一個目標係長崎新地中華街,由哥拉巴園經荷蘭大道就可以行去中華街,腳程大約十多分鐘。


日本有三大中華街,有橫浜中華街、神戶南京町同長崎新地中華街。早前已經唔覺意去過神戶南京町,今次黎到長崎儲第二張閃卡。長崎新地中華街特別之處,係街道呈十字型,東南西北四方入口都有紅色牌樓,原來係代表「東青龍」、「西白虎」、「南朱雀」、「北玄武」。中華街內有幾十家中式國菜館,有經營長崎特產雜燴麵、碗麵等,名店有如「江山樓」,係馳名中外推介店。亦有售賣中國雜貨商品。可能係時間問題,街道上無乜人,而且食店好似正落場,談不上熱鬧。





提早五點食晚飯,由中華街行去思案橋都係幾分鐘,黎到呢間創業於1925年、九州最古老嘅喫茶店ツル茶ん食元祖土耳其飯。呢度好耐之前係報社,創辦人同國父有淵源,所以門口亦寫住「孫文先生故緣之地」。店裡面貼左好多坂本龍馬跟同中山先生嘅資料,亦有好多明人到訪嘅留影同簽名。店內有復古裝修,亦保留好多舊有擺設,另有一番風味。





昔なつかしトルコライス ¥1080


土耳其飯的確係Fusion菜,飯、意粉、沙律放喺同一碟。呢款招牌菜係咖哩吉列豬扒配番茄拿破崙意粉。勝在顏色鮮艷,賣相吸引,而且美味都唔錯。咖哩汁香得黎帶甜,豬扒炸得香脆,肉質不錯,唔鞋仲有肉汁。意粉汁番茄味勁濃,酸甜醒胃。而飯並唔係普通白飯,而係拌入牛油、洋蔥同粟米嘅有味飯,淡得黎有味,正好緩和口味。




フリカンデルトルコ ¥1080


另一味選擇左漢堡配黑椒意粉。牛肉漢堡非常唔錯,切開漢堡仲見到肉汁,而且肉質鬆軟有肉味,配上微酸嘅ドミグラスソース牛扒醬,不錯吃。而意粉就簡單用黑椒調味,不過不失。




埋單港幣$140有找,味道未算驚為天人,但勝在配搭有趣。看似九唔搭八,但正好感受長崎和洋融合嘅感覺。


食飽呢個早晚餐,開始向稻佐山進發。途中黎到呢間長崎蛋糕名店「福砂屋」嘅總本店,心想買幾條長崎蛋糕做手信,但得知食用期限得一星期,惟有稍後再掃貨。




[ 本帖最後由 teeniehung 於 2015-7-29 10:07 PM 編輯 ]



黎到長崎,有一個景點真係非去不可,就係價錢千萬美金嘅稻佐山夜景。與神戶、函館並稱日本三大夜景,今次黎到儲第二張閃卡。上山方法選擇左搭登山纜車,前往纜車站嘅方法都有好多。晚間時份仲有免費穿梭巴士,但因為時間較夜就唔太適合。經過細心研究,決定喺中華街巴士總站搭巴士到纜車站。黎到巴士站完全唔明白玩法,睇唔明站牌想表達啲乜,就好似巴士路線圖睇極都唔明咁。幸好知道要搭幾號巴士,上車前問問車掌先生,就安全搵岩車。車程約二十分鐘,收費¥150。





六點零落車,行經淵神社牌坊,如傳聞所講,鼓起勇氣行上去,再穿過櫻花隧道,就見到神社旁嘅纜車站。





此路纜車算小規模,只有兩架纜車來回行走,每程約五分鐘。今早買好票,可以掂行掂過直接上車。一車約有十多人,不消五分鐘就到山頂,車箱工作人員仲會介紹沿途風景,當然只用日文。






上到山頂,沿住天橋就可以去到展望台大樓。呢個展望台係免費開放,好多本地人會駕車上黎。展望台有迴旋走廊可以慢慢行上頂層,上到最高嘅戶外展望台,已經有好多人霸緊位。展望台係360度觀景,可以欣賞成個長崎港。六點半時間尚早,可以欣賞埋黃昏日落景都唔錯。一路等一路睇住天黑漸暗,市內慢慢著燈。





到七點零天色已黑齊,終於可以睇下山腳下萬家燈火,就好似鑽石般散發著璀璨光芒,正價值一百萬美金。




七點半落番山,怕等巴士太耐,選擇步行二十分鐘去長崎車站。趁未夠鐘上車,去長崎Amu Plaza地下嘅西友超市買宵夜。超市臨關門有特價大平賣,總數¥1000有找,豐富的一餐。搭上20:23嘅かもめ回程番博多,大約十點三到達,有兩個鐘時間慢嘆宵夜。




[ 本帖最後由 teeniehung 於 2015-7-30 01:33 PM 編輯 ]



支持九州遊記


計劃行程時,曾經掙扎黎唔黎柳川,因為黎得柳川只得兩件事可做,一是遊船,二是食饅魚飯。如果遇上落雨,遊船係無意義的。所以直情寫定後備方案,如遇惡劣天氣,與柳川只會係有緣無份。幸好日本嘅天氣預報以準確見稱,當日查天氣時,知道今日多雲黃昏開始有雨,既然黃昏先落雨當然唔希望出動到後備方案,決定繼續柳川上午遊。


去柳川用不著JR,為左慳旅費,搵到好多唔同嘅旅遊套票,最後都貫徹不走回頭路,慳盡每一蚊,決定去二日市轉車。其實去柳川好多人會選擇直接喺福岡天神搭西鐵,考慮到博多去天神又要一程車,而旅遊套票亦唔岩用,決定唔跟。另一方法就係喺由博多搭JR去二日市,再步行至西鐵二日市站搭西鐵。呢個路線可以善用JR Pass去二日市,又要可順路行下二日市,而買柳川套票來回二日市站更可以平少少,當然最Prefect!今日提早左左起身八點就出門口,搭上去佐世保嘅JR,途經中途站二日市落車,車程只需十幾分鐘。





因為車程短,所以選擇速食三文治做早餐。就喺博多站一間好多人幫襯嘅麵包店買左一客雜錦炸蝦三文治(¥349)。賣相非常吸引,材料好豐富,有碎蛋沙律、生菜、大大件炸蝦,絕對唔係奸商將材料集中喺個橫切面度,而係切切實實材料多到湧出黎。味道亦唔錯,炸蝦餅皮仍然鬆脆,蝦肉彈牙,蔬菜新鮮爽脆,沙律酸甜醒胃,成個三文治配合得宜,屬高水準之作。




8:45黎到JR二日市落車,睇住地圖,亦跟住前面嘅大媽,穿過未開市嘅中央通商店街,步行約十五分鐘就見到一個稱得上簡陋嘅西鐵站。





喺西鐵站售票處購買套票,柳川同太宰府有多款合作套票,有來回景點加小食套票等。比較過後,覺得柳川特盛きっぷ (¥4870),包含日式料理呢款最抵。套票包裝得好靚,一個信封裝住簡介說明、使用券同地圖。使用券內容包括柳川來回發賣駅二日市嘅西鐵車票、柳川泛舟票、指定食肆嘅和食套餐、仲有免費調味料包、的士折扣等優惠券。買到券就到月台乘車,搭上09:15開車、大牟田方面嘅西鐵。



西鐵沿路都係大塊田、樹,感覺到好似去左鄉郊咁,半個鐘車程終於到達西鐵柳川駅。一出閘就有驚喜,原來柳川駅剛剛改建,由原本好簡陋嘅小站,而家變得好高級時尚,車站亦比之前大上好多,改札口附近仲放滿女兒節裝飾,謀殺好多Mb。可見柳川銳意發展成為一線旅遊區。




惟一一樣無變,就係閘口外仍有乘船公司嘅職員做宣傳,接待旅客去上船站。我地一心諗住食飯先,所以就此繞過。一件小插曲係,有公司職員見到我地行過左上船處,主動落車問我地係咪唔識路,可見拎住呢份柳川Pass,已經代表住會得到最殷切嘅照顧。




[ 本帖最後由 teeniehung 於 2015-7-30 02:37 PM 編輯 ]



柳川特盛きっぷ 包一餐和食,黎得柳川一定要試地道嘅鰻魚飯。套票包括幾家柳川出名嘅鰻魚飯名店,此行嘅目標係本吉屋。睇住地圖,由柳川駅行去本吉屋約十分鐘時間,沿路有指標牌引路。十點鐘黎到原來還在準備中,店員話十點半先開放入座,所以惟有行番轉頭,周圍影下相。「元祖本吉屋 本店」外型好特別,好似田野間一間稻草搭成嘅屋咁。



元祖本吉屋創業四百年,係一間本地人都係慕名而黎嘅排隊名店。傳統蒸籠鰻魚飯就係始創於1615年,直至而家都保留住初代師傅傳承落黎嘅獨家醬汁同料理技術。



十點半入店,已經聞到香香嘅鰻魚味,進入用餐區,坐上榻榻米,靜候四百年歷史嘅鰻魚飯。喺咁優美嘅用餐區,周圍影下相。室內仲擺放左女兒節裝飾,真係好靚。室內裝修雅緻,室外有修剪得整齊嘅庭園,黎到呢度食飯真係賞心樂事。




套票包括一客指定料理,就憑款式份量,得知呢客鰻魚料理正價¥3500。套票已包括呢份定食,實在太抵。せいろ蒸し定食有一客醬菜、籠蒸鰻魚飯同鰻魚肝湯。設計出四百年歷史嘅籠蒸鰻魚飯,係想讓客人同時品嚐到熱騰騰嘅白飯同鰻魚。做法係喺塗滿醬汁的白飯上,加一層剛烤好嘅蒲燒鰻魚,然後再蒸熱,最後加上蛋絲即成。咁樣料理嘅鰻魚飯邊有可能唔好食。



上菜時睇完蒸氣熱騰騰,已經好吸引。用紅色竹籠箱裝住,有滿滿一層鰻魚,配上金黃色蛋絲,睇見已經流口水。雖然係使用優惠套票,但眼見同其他食客相比,份量一樣咁多,絕無偷工減料。先講鰻魚,真係用心烤製,鰻魚外皮焦脆,有炭燒香味。鰻魚肉質肥厚,鬆化到入口即溶。咬開魚肉,就見到閃閃發光嘅油脂,魚味濃郁無腥味。鰻魚經多次浸潤於醬汁,鰻魚已經充分入味。加些少山椒,襯上微微椒香辣味,變成另一種美味。鰻魚底下嘅白飯已經唔係白飯,而係吸收晒濃甜醬汁同鰻魚汁嘅有味飯,每一啖都滋味無窮,而飯粒蒸得透,仍保留日本米煙韌嘅口感,同鰻魚簡直係絕配。閒時加一口酸甜嘅黃瓜,飲一啖清爽嘅魚肝湯,配一口日本綠茶,非常豐富滿足嘅一餐。絕對係有生之年食過最好食嘅鰻魚飯。


離開食店,繼續聞到廚房傳出濃烈嘅鰻魚味,實在回味無窮,真教人捨不得。



[ 本帖最後由 teeniehung 於 2015-7-30 04:16 PM 編輯 ]



從本吉屋行番乘船處,已經感受到水鄉氣氛,河上停泊左好多條船。


  




柳川被稱為世界著名水鄉之一,呢條人工河喺柳川市內縱橫交錯,有六間船公司營運泛舟服務。各路線、行程都略有不同。今次特盛套票係包左柳川観光開発株式會社嘅船程,上船處係松月文人館,經過兩旁長滿櫻花嘅紅橋,就見到碼頭。從松月碼頭到沖端終點,全程約4.5km,需時七十分鐘,正價收費要¥1500。





出示乘船券後就安排上船,同船嘅除左一位外國小姐外,都係一班日本公公婆婆本地遊。船長係一個五十來歲非常友善嘅叔叔。船長先生會全程一路介紹沿途風景,閒時仲會唱幾首歌,呢位船長先生歌喉都唔錯架。正因為全船日本婆婆,大家常有問有答,一齊唱歌,相當互動。還好叫做算聽得明大家嘅說話,了解左唔少柳川嘅風土人情。




原來呢條人工河對柳川鄉民黎講非常重要,可以暫防雨水防河水氾濫,好多鄉民仲用黎做農業灌溉,所以見唔少民居嘅花園前,都種上好多花同水果。行程中會穿過唔少橋同水門,遇上稍矮嘅橋,各人仲有烏低頭。沿河兩岸仲不時見到櫻花盛開,喺河上賞櫻係另一種風味。





途中路經「鰻魚供養牌」。仲有一期一會,河上商店,售賣各式飲品、雪糕小食。




閒時會遇上另一個船公司嘅船,有啲仲會安排船上食事,相當豪華。




真係足足一個鐘有多,先黎到終點站。落船後周圍行下,附近有幾家鰻魚飯名店同小食店。人流唔多,商業味亦唔濃。正因為無乜野睇,就決定離開了。




回程去番柳川駅嘅方法係可以搭免費穿梭巴士,但只適用於下午時間,且班次唔多。亦可以善用套票送嘅¥50優惠券搭的士,約¥1000。最後決定搭巴士,但因為巴士班次少得可憐,最近喺御花上車嘅西鐵巴士,一個鐘先有一班,所以研究路線時都額外搵定一啲遠啲上車嘅巴士線。




離開時間約一點半,剛好搭到御花呢班巴士(¥210),十零分鐘就返到柳川駅。柳川紀行其實都值得一去,無錯,只係一去,花過半天亦無傷大雅,但回頭機會不大。而家柳川繼續發展旅遊服務,其實有好多進步空間。單係回程嘅交通安排,實在需要嚴重加強,商店街亦可以發展得更多元化。如果呢套嘅配套做得好啲,相信日後一定有更多人黎旅遊。



[ 本帖最後由 teeniehung 於 2015-7-30 04:15 PM 編輯 ]



安排柳川行其實仲有一個巧思,就係好多人會將柳川同太宰府放埋一齊,反正車程亦順路。兩點左右,回程去番二日市,利用套票車票出閘,再買番一程由二日市去太宰府嘅車票(¥150)。今行仲遇上旅遊列車旅人號,車身顏色為淺粉色,非常可愛。





車箱外印上太宰府名勝,每卡車箱內都有唔同主題祝願,分別為「學業有成、健康長壽、辟邪、平安分娩、闔家安康、喜結良緣」。上至牆紙,下至座位都用上唔同顏色圖案,非常吸睛,仲可以收集祝願卡片,相當卡哇兒。第三卡有紀念蓋章同介紹太宰府土特產品嘅櫃檯空間,當然要黎啦。短短五分鐘車程,由車頭行到車尾不停影相,實在太充實好玩。





興幸剛才無驚無險喺柳川渡過一個中午,三點黎到太宰府終於落起雨。一出車站就見到表參道商店街,有幾家賣梅枝餅嘅小店、有賣雪糕、工藝品、亦有唔少賣土產零食。開始覺肚餓,就試下太宰府名物梅ヶ枝餅。





見人龍咁長,呢間かさの家真係名店,就買一個黎試下 (¥120)。可以從門外玻璃窗見證梅枝餅製作過程。先用米糰包入紅豆餡,再兩面烤焗,表皮烤得微焦,餅皮上仲見到印上梅花圖案。新鮮出爐熱得燙手,外皮有啲似較為綿密煙韌嘅麻糬,薄薄嘅餅皮包住內餡,用上日本紅豆點都無得輸,味道好香甜,配茶正好。





見商店街有咁多間梅枝餅,想試下唔同家嘅出品,見呢間かのや都有唔少本地婆婆幫襯,又買一個黎試下 (¥120)。呢間唔同嘅係,的確係純手工製作,所以等候時間長些少。呢間嘅出品較為皮脆粉厚,豆餡亦算唔錯,但較鍾情於前者。




連龍貓都著起雨褸,好得意。黎到呢間特色星巴克,點都要留影。設計概念係「以自然素材為本,展現傳統與現代的融合」,所以係用上木材搭建出黎。





穿過表參道盡頭嘅鳥居,踏上心宇池上嘅太鼓橋,正式進入天満宮範圍。太宰府天滿宮係祭祀被稱為日本學問之神嘅官原道真。可算係遊九州必到之處,天滿宮嘅樓門更加係重要文化遺產。宮內有寶物殿、菅公歴史館等,此行無特別花費進場,只係到處留影。





離開天滿宮就去附近嘅九州國立博物館行下,就係天滿宮後方有小路前往。呢個入口會經過一條好長嘅幻影電梯「虹之隧道」,就好似時光隧道咁,盡頭就係九博大樓入口。




山頭中間係一個天地,真係別有洞天。進入九博接待大堂,空間真係大到不得了,而人又唔多,可用冷清黎形容。知道九博主要展覽歷史文物,今行目的不在此。志在欣賞呢個咁巨型嘅建築,順道玩下一樓免費入場嘅「亞洲樂園」。呢度有好多亞洲各國嘅民族服飾同樂器、玩具等,都幾得意。





略為參觀過九博就原路回程去番太宰府,今日嘅行程已經行到四點半,又係時候要醫肚。



[ 本帖最後由 teeniehung 於 2015-7-30 04:56 PM 編輯 ]



今次九州拉麵之旅,希望嘗盡九州各種特色拉麵。特意搜尋好多拉麵排名榜,呢間暖暮就係重點之一,全因佢得到「九州拉麵總選舉第一位受賞」呢個殊榮。比再要出名嘅一蘭、一風堂排名更高,點可以唔試,就決定五點鐘黎個黃昏餐。


先喺自動售賣機買食券,因為人唔多,師傅直情走過黎問我地拉麵嘅選擇喜好,直接幫我地填表落單。小店細細,全店只有十多個吧枱位。一向鍾意避開人流高峰時段,呢個時間黎同場只有兩位客人,幾乎可以包場。暖暮有一位四十來歲嘅師傅坐陣,坐喺吧枱位,可以近距離欣賞到師傅煮麵嘅功架。


半熟煮玉子ラーメン ¥730
拉麵送上時,已聞到香噴噴,賣相吸引,再加上熱騰騰嘅蒸氣,真係食慾大增。相機食過後,湯底仍然熱得燙口,值得加分。白滑嘅豬骨湯講得上好忌廉咪,但可見膠質頗重,極之幼滑柔軟。呷一口湯頭,果真不得了。湯底味道極濃,有著濃郁豬骨味,豬骨嘅香甜盡現,沒帶一點腥味。味道濃郁得正好,重口味得黎無過份咸。湯頭帶輕量油份,但仍算相當清爽油膩。拌入青蔥令湯頭多一味香味,配合得正好,達到點睛之效。

至於麵條方面,係直身幼麵,麵條本身已相當幼滑,師傅亦做到硬身要求,相當煙韌彈牙。拉麵有兩片薄薄嘅叉燒,半肥瘦全白肉,無經過醬汁滷煮,但浸泡喺湯底一段時間後,叉燒已經吸盡湯汁嘅精華,令本身已鮮甜嘅肉片,變得更加滋味。溏心蛋更加不得了,賣相討好不在話下,溏心程度亦控制得好好,保持到蛋嘅柔軟度,亦做得到出色嘅溏心啫喱效果。從色澤所見,已睇得出入味程度,蛋內外都食得出香甜醬油味,可算係試過最好食嘅味蛋。


ネギごまラーメン ¥680
呢款拉麵係人氣推介之選,喺拉麵嘅基礎上加入大量芝麻同青蔥,湯底頓時變得更具層次感。豬骨湯配上芝麻更加濃厚,再加上青蔥提香,配合得恰到好處。


好多人話暖暮同一蘭好似,的確佢地有幾分似,都係以濃而不膩嘅湯頭作賣點,再加入自家醬辣醬提味。但個人認為暖暮嘅出品較一蘭黎得細緻,每一款配料都有效提升拉麵嘅質素,真係非常出色,教人回味無窮。價錢方面更加感恩,區區七百日元就可以有如此高質素出品,實在抵讚。暖暮拉麵係此行最欣賞亦最鍾意嘅拉麵,絕對係博多推介之首選。「九州拉麵受賞第一位」實在名副其實,當之無愧。



離開太宰府,搭西鐵番福岡天神,自購車費需要¥400。大約六點鐘就返到,遇上本地人放工嘅大人潮,但不及大阪梅田般壯觀。今日黃昏嘅行程係閒遊天神區、中洲區。



行過天神附近嘅新天町商店街。經過西中洲嘅博多季楽,係佐賀牛名店,呢個時間已經有客人光顧。西中洲河邊兩岸已經開滿櫻花,喺橋上影過去,有一番風味。



到達另一個Check Point,就係一蘭總本店。雖然今行決定唔食一蘭,但黎得博多,點可以唔拜會下呢座旅人皆知嘅拉麵名店。黃昏時份,大樓著起紅燈籠,襯托起大紅招牌,喺街道上更覺顯眼。



去到中洲川端站,行下廿四小時開放嘅激安殿堂。值得一提,原來中洲係博多嘅紅燈區,街頭有好多間「無料案內所」,明眼人就知識其實係黃色事業。用得呢個名作招徠,實覺有啲搞笑。中洲川端站前有上川端商店街,睇落比較傳統,多賣民生用品,而且時候唔早,好多店舖陸續收舖。穿過靜清清嘅上川端商店街,黎到博多總鎮守櫛田神社。神社中最著名嘅,就是呢個超巨型山笠。



櫛田神社旁就係團體客必到Canal City博多運河城。呢度係博多著名嘅複合型商業設施。有酒店、劇場、電影院、商店、餐廳等,面積相當大。特別之處就係環型嘅商場下有噴水池表演平台。五樓仲有拉麵競技館 ラーメンスタジアム,有八家日本各區嘅拉麵名店。此行食拉麵已經夠多,志在上黎參觀下。亦有九州最大「無印良品」,服飾、生活雜貨到傢具、家電通市有售,的確幾大間。黎Canal City目標相當名確,就係去agnes b. 買銀包,付款時即場做埋免稅,只需出示護照,記錄有關購物資料,連埋俾錢幾分鐘搞掂,真係好方便。



買完禮物係時候去屋店搵食。


黃昏時間行經屋台,好多店舖仍在準備中,黎到八點,相信正營業得如火如荼。因為屋台無地址,亦無確切地圖,好多時係行過見到得一間,都幾難搵。就係中洲河岸見到幾檔,可惜幾檔都唔太吸引,亦未見過有人介紹,決定行番去天神屋台區。就係大丸前,有幾間屋店已經企左人排隊,就決定去呢間廣有人介紹嘅小店一試。




屋台就好似一間臨時搭建嘅木造車仔檔,每間約有十零個座等位。等左差不多半個鐘,終於有得入座。此店菜單有英文對照,價錢寫得清晰,就係好多旅客揀選嘅原因。店主係一個四十歲左右嘅肥哥哥,見到我地影相仲好合作擺Pose。



點餐叫左一客明太玉子燒¥650、炒拉麵¥750、仲有一支Asahi¥500,埋單¥1900。為左應景,黎屋台點都要啤番杯。不得不佩服,戶外嘅臨時小攤除左可以煮到多樣料理外,仲有雪得超級冰凍嘅啤酒,讚。明太子蛋卷係博多屋台名物,好多店舖都有賣,而更係呢間小店嘅推介料理。蛋卷包著明太子,再唧上蛋黃醬,賣相好吸引。蛋皮煎得香,但內裡仍然相當嫰滑,明太子有海味帶微辣,兩者配合得宜,加上微酸蛋黃醬正好提味,不錯吃。至於另一味炒拉麵,係另一個屋台名店小金始創料理。博多出名拉麵,除左湯煮之外,更有一種炒麵食法。麵條仍然保持煙韌,有好多椰菜做配料,略嫌醬汁落得唔夠多,味道略未到喉。




屋台的確係博多獨有飲食文化,係上班族落班嘅最好消遣。作為旅客亦有意感受氣氛,至於值唔值得,就體驗黎講,係值得嘅。喺路邊食飯,把酒言歡過一晚係的確幾有趣。但論環境、價錢、料理質素未算突出,比佢更平靚正的大有,總叫一試無妨吧。


返歸前買左甜品,神戶奶凍ロイヤルカスタードプリン真係好正,不愧為2015年Monde Selection最高金賞受賞。Haagen Daze Caramel Crush又係期間限定,口感非常過癮。




[ 本帖最後由 teeniehung 於 2015-7-31 01:52 PM 編輯 ]



伸延閱讀
[按此隱藏 Google 建議的相符內容]