• 瀏覽: 56,710
  • 回覆: 135
  • 追帖: 48
  • 分享: 7
+680
引用:
原帖由 teeniehung 於 2015-7-30 04:14 PM 發表
呢個景真係好正, 多謝分享.



引用:
原帖由 tucuxi 於 31/7/2015 15:09 發表

呢個景真係好正, 多謝分享.
呢個係紅橋上,特登等開船果時影架



黎到九州遊中段,終於有得搭新幹線。JR Pass北九州版除左可以搭北九州JR外,仲包去熊本嘅新幹線。新幹線會使用另一個改扎口進出,八點九上到大堂,明顯比JR更大更豪華。



大堂仲有多間便利店、便當店,仲有好多未見過嘅特色便當。可惜剛才已買左早餐,如果知道一定會黎呢度選購。



上到月台更覺得新幹線實在好豪華,幾架長長嘅鴨咀獸就停泊喺月台。車身潔白光滑,配多多嘅鴨咀,就係日本子彈火車嘅特色。一心諗住帶上黑仔Hello Kitty同熊本熊鬥黑,而家就先同白雪雪嘅火車相輝映。




博多去熊本好似距離好遠,但憑新幹線時速300km運行,三十五分鐘就黎到熊本。搭上9:09把握呢半個鐘時間完成我地嘅早餐。剛才喺博多站中央商店買左呢款車站人氣No.1「長崎街道便當」 (¥930),一試究竟。


便當主題係「豊前國小倉常盤橋」至「肥前國長崎」嘅風光,用上沿線各區嘅著名食材,整合成高級豐盛嘅料理。便當中間正係博多常見嘅かしわめし三色飯,係甜醬之上舖滿紫菜、蛋絲同雞肉鬆,入口香甜,配餸式單食亦得。右下角係穂先筍煮配豆菜、冬菇、蓮,用上甜甜嘅醬汁醃煮,平時唔食竹筍,試過就覺得竹筍煮得非常入味,少食一啖都無所謂啦。右上角有肉丸燒賣、南瓜配海茸粕漬,好似芥辣味嘅海鮮類茸,味道怪怪地。左上角係主食有鹽燒三文魚,相當鮮味,味道唔錯。仲有醬煮牛肉,煮到入晒味,非常下飯。而蝦新鮮不特此,仲已經細心去殼,食起黎相當方便。紅色同綠色嘅小丸子原來係魚蛋,甜甜地口感幾彈牙。最後左下角係飯後甜品,有紅豆羊羹、枇杷等。部份食材好獨特,唔常見,志在一試都OK呀!



食完個早餐話咁快九點九就到熊本,車站用台更新淨豪華。落到大堂真係好靚,改札口外仲有大大間地產店,十足一個新型大商場咁。出閘後先去觀光案內所買票,今日會用上電市一日券同熊本城湧湧座共通入場券。



四月一日黎熊本黎得正好,剛好熊本交通局新發行左一張市電専用の1日乗車券 (¥400),可以一日放題乘搭兩線市電,電車每程要¥150,三程已有賺,實在太感恩。早前多數旅人會選用可以搭市電加巴士嘅「わくわく1 Dayパス」,四月一日後加價¥200至¥700。如果只需要上電市已經去到想去嘅景點,一張市電專用券係最好嘅選擇。就係咁,兩個人又慳左¥600,幾乎夠食一碗拉麵。


另外,又買多埋熊本城、湧湧座共通入場券 (¥600)。買嘅時候服務員小姐好似怕我地唔知市電券有優惠,唔想賣票俾我地。但一早計過數市電券景地門券有八折優惠,熊本城折後價¥400,湧湧座折後價¥240。但呢款共通入場券只要¥600,呢¥40都可以慳埋。



熊本係呢隻黑熊くまモン熊本熊嘅主場,去到邊都見到呢隻肥野。離開新幹線站過隧道去番JR車站,連樓梯仲有呢隻肥野。JR駅二樓有幾間餐廳、店舖,樓下有土產店等,行一陣就繼續前進。




離開熊本駅,站外就已經見到電車站。熊本旅遊主要靠電車就夠,分A、B兩線,可算去得晒著名嘅景點。班次都幾密,只係行車速度比較慢。就黎個慢遊熊本吧。





由熊本駅坐電市,七個站大約二十分鐘就到市役所前。落車後就見到城牆,沿城牆行,河邊開滿櫻花,正值熊本櫻滿開期。今日天陰陰閒時落住毛毛雨,配上櫻滿開、遍地落櫻,其實幾有意境。沿住路牌行上斜路,馬路兩旁都開滿櫻,黎得正合時。



十一點未夠黎到熊本城第一站係桜の馬場城彩苑。有桜の小路土產街同湧々座。進入城彩苑已經被佢嘅裝修吸引,木製屋仔配上紅雨傘,好有武士年代感。櫻之小路有多間食肆、土產店。雖然時間尚早,好多小店已經開始營業。



橫掂黎到,就買幾款小食試下,當做Brunch。竹輪芝士卷 (¥360) 竹輪內加入芝士,再整條沾粉漿炸脆,食起黎芝士味極濃。菅乃屋係創業二百年嘅馬肉名店,此行無特別安排馬肉料理,就以一條馬肉香腸 (¥120) 試下味,色水同味道都好似牛肉,唔覺得有乜特別啦。


好多旅人推介櫻之小路惕食天海草食嘅海膽可樂餅,原來海膽可樂餅都有幾款,係海膽嘅份量不同,呢款三倍份量海膽係城彩苑限定,一個¥390。可樂餅新鮮炸好熱辣辣,外皮鬆脆無過份油量,薄薄嘅炸皮下就係薯蓉,非常奶滑無粒粒,咬深一點就有橙黃色嘅海膽蓉唧出黎,可以用爆漿黎形容。味道好香,海味濃郁,質感滑到不得了,認真不錯。


食飽飽行入旁邊嘅湧湧座,呢度係一座兩樓高嘅歴史文化體驗設施。一樓係熊本今昔絵巻,以多媒體投影、動畫、互動遊戲介紹西南戦爭時期歷史,講解熊本城今昔。二樓係ものがたり御殿,指定時間會有表演劇場,仲有換衫Cosplay,岩晒小朋友。



離開湧湧座到達中庭表演場地,碰上武將隊出巡,仲有可愛嘅卡通熊本城。


臨走前食埋個阿蘇牛奶軟雪糕 (¥300),奶香味勁濃,仲好有膻味,香到直情好似牛油味咁,似忌廉感覺,口感幼滑,係食過最好味嘅牛奶雪糕。


不知不覺,原來係城彩苑已經玩左一個鐘,係時候向熊本城出發。繼續沿住櫻花馬路向上行,沿路都見到開滿櫻花,慢慢行上斜路,終於黎到熊本城頰當御門。係櫻花影襯下拍到天守閣,畫面相當靚。熊本城和大阪城、名古屋城並列日本三大名城,上年去過大阪城,今次儲得第二張閃卡。





通過本丸御殿下嘅闇り通路,上到天守閣平台廣場,終於黎到天守閣入口。


廣場中間有可愛嘅卡通熊本城,放係最佳攝影位置前。大天守足足有六層,每層展示左好多歷史文物,模型,城主芳名等。從天守閣頂層望落去,可遠眺熊本市。



熊本城又叫銀杏城,當年建築熊本城時同種植銀杏有段故事。是次拍唔到銀杏,但以櫻花相襯有另一種優美。旁邊仲有好多人會遺漏嘅小天守。


天守閣對面係本丸御殿,因為價值太貴重,所以要除鞋進入。御殿內開放茶室、大台所等地方,修葺得非常靚。係大御台所,即係廚房仲見到當時煮食嘅爐具同藩主嘅料理模型。台所有極高挑木造樓底,可見其高超建築技術。


數最深刻印象係昭君之間。呢間房間由牆壁到天花都舖滿金箔,壁畫同天花畫得好靚,展出昭君出塞嘅故事。


今期仲有開放限定嘅七間櫓。



不知不覺原來已經玩到一點幾。一早都預左熊本城好大,無諗過原來咁多野睇,仲可以玩咁耐,¥600玩足一個上午,真係抵俾。



玩左兩個幾鐘,又到午飯時間。係熊本城不遠處,就有呢間物產館,售賣好多熊本特產,仲有要過黎朝拜嘅熊本熊像。


沿住下通行去搵飯食,就係新市街,有一間旅人熱推嘅吉列豬扒名店。Tabelog 爆四嘅名店,係此行評價最高嘅食肆。一點半黎到,怪不得排隊排到出門口,等左大約半個鐘終於有得入場。原來內裡都幾大,上下兩層,後方仲有半包箱形式嘅榻榻米座,每枱仲有布簾隔住,既舒適又夠私隱度。此行真係幸福,被安排到四人榻榻米座,行完兩個幾鐘熊本城正可以好好嘆番餐。



午餐時份黎度仲有特價午餐。柯打左一客ロースカツ定食同日替定食ひれかつと海老フライ定食。枱上有幾款調味料揀,配吉列炸物一定要用上芝麻,醬汁可選甜醬油味濃嘅和風醬,以及加量蕃茄醬酸味較重嘅洋風醬。自行將芝麻磨碎再加入豬扒醬,準備好靜候名物到來。


ロースカツ定食 ¥880
食物送上真係哇一聲,吸引到極點嘅吉列真係好引人胃口。豬扒包住金黃酥脆嘅外皮,炸皮同豬扒緊貼,融為一體無任何鬆脫。外皮炸得乾身,完全無多餘油份,就炸物黎講已經係高水平之作。里肌肉排有相當厚度,從切面可見豬肉仍保持肉汁同油脂,肉質非常柔軟,根本唔需要太多咀嚼。肉質新鮮,本身已有香甜鮮味,配合適量油脂更覺香味。不得不佩服炸物雖經油炸,但完全唔覺熱氣。沾上芝麻醬汁,多份芝麻香同甜酸味,真係好下飯。閒時夾一口鮮甜嘅高麗菜,增加清爽口感。香甜煙韌嘅白飯銷價不錯,可算係全程食白飯食得最多嘅一餐。麵豉湯亦非常濃甜,正好餐後一飲而盡。


ひれかつと海老フライ定食 ¥1080
炸蝦亦係高水準之作,大大隻蝦新鮮不在話下,食起黎鮮甜無比,非常美味。呢款配上豬肉好似有啲唔同,油脂略為少,但肉質仍然鬆軟,真係非常好味。


埋單外稅總計¥2116,百四蚊港紙實在超乎水準。無諗過吉列炸物係可以如此好味,炸物可以完全唔熱氣。食完咁豐富嘅一餐,完全唔覺喉嚨不適,可見其功力。Tabelog 爆四嘅質素的確相當吸引,真係好滿足難忘嘅一餐。



食過滿足嘅一餐,喺辛島町站搭電車去水前寺。熊本市電同香港電車真係差不多,行車速度唔快,搖搖晃晃大約廿幾分鐘就到水前寺公園站。落車後轉入小路就見到公園前嘅商店街,三點半未夠好似人流唔多,幾冷清。入口旁嘅土產店行過就算,反正都係做團體旅客生意嘅大賣場。正式購票入場,有市電嘅八折優惠,門票折實¥360。


水前寺成趣園結合左日本多處名勝,營造出富士山、琵琶湖等意境,係桃山式池泉迴遊庭園。而命名就引用自陶淵明「歸去來辭」中的一節「園日涉以成趣,門雖設而常關」。現時仲係日本國家天然紀念物,國家名勝,指定史跡。


採取由左由加順時針遊覽。入園嘅左方就係出水神社,穿過表參道鳥居,有一處來自阿蘇火山伏流嘅長壽之水。


水前寺成趣園佔地約七萬平方公尺,以阿蘇湧泉的水池為中心,引進阿蘇山伏流水,終年池水不涸,水池就係以日本第一大湖琵琶湖作形象。池嘅中央小山丘,正係以富士山意象打造成嘅「水前寺富士山」。



清澈嘅水池裡有好多好多鯉魚、烏龜、水鴨,真係多到好似動物園咁。從橋上影落水池,鯉魚色彩繽紛,悠遊自在,靚到可以做Wallpaper。


繞過出水神社,就黎到稻荷神社,神社外有迷你千木鳥居,又令我諗起京都之旅啦。神社旁有細川忠利公銅像。


黎到公園嘅最中間位置,就係一個相當大嘅空地。正值水前寺櫻花黎到十級滿開至吹雪程度,就係呢度附近逗留上好一陣子。櫻滿開固然靚,閒時風一陣吹,遇上吹雪情況真係不得不手機食先。青綠嘅草地舖滿粉紅櫻花瓣,令公園更添一份優美。寧靜、舒服得好似時間靜止般。



再行過能樂殿同茶居,但似乎無開放,相當冷清。行完一圈需時大半個鐘。園內人流極為單薄,雖然冷清,但正好感受公園嘅寧靜,細心欣賞庭園嘅雅緻秀麗,更能夠拍攝到絕佳角度。黎呢度真正有偷閒嘅感覺。


離開公園,再次經過小小商店街,購買熊本地道甜品「突然團子」いきなり団子 (¥110)。奶黃色粉皮透出紫色同黃色,正係紫薯同番薯嘅顏色。煙韌嘅外皮相當薄,除甜味外,仲帶丁點鹹味,包住大大舊番薯,甜品夠濃,口感綿密,好襯紅豆嘅甜味。




離開成趣園,搭上電車,四點半出番市區。黎得熊本,點可以唔去探一探くまモン班呢。就係鶴屋百貨東館一樓就係Kumamon Square,即係熊本熊嘅辦公室。未到門口已經見到呢隻肥野。


除左有好多土產、精品賣外,中間仲有一個幾大嘅空間,相信係俾小朋友同熊本熊互動交流學做體操。仲有售賣飲品同雪糕嘅小食檔。


盡頭就係熊本熊嘅辦公室。呢隻肥野無啦啦被降級做營業部長代理,就因為今年情人節食得太多朱古力,導致減肥失敗,熊本知事宣布,熊本熊被降為代理營業部長,進入觀察名單,要求改進。估唔到,日本人對一隻吉祥物都可以咁重視,細心加入故事,令佢更能打入民心。館內牆壁周圍都用上熊本熊嘅用品,反正全館任何一處都被呢隻肥野攻陷。館內仲不停播住熊本熊嘅體操歌,音樂好Hyper,令人都好開心。




鶴屋百貨係全日本面積最大嘅百貨公園,共有七個館。第一次搭百貨公司嘅電梯,真係由電梯小姐負責控制。黎到B1層,要買一個蜂樂饅頭試下先。一個¥100,有紅豆或綠豆兩款,選擇左白色嘅以北海道產大手亡豆製成嘅綠豆蓉餡。每一個都係新鮮現做,所以拎上手相當熱辣。饅頭外皮透出奶油香,餅皮煙韌,有甜甜蜜糖味。內餡紮實綿密,無顆粒感,豆味都係甜甜的,就好似港式雞蛋仔包豆蓉,甜味爆燈。


略為行過鶴屋百貨,五點半就黎到下通商店街。下通係熊本最旺嘅地段,係旅人黎熊本暴走放血必選地區。商店街有多間百貨公司、電器專賣店、藥妝店、仲有好多餐廳,算係一條內容非常豐富嘅大型商店街,同大阪心齋橋有得揮。優勝之處係,下通未被國強人攻陷,而且通道相當闊落,比大阪行得更舒服。各位旅人都比較過九州各大藥房,話熊本嘅價格最宜人,所以今行亦目標黎熊本掃貨。下通有三家大藥房,格過價後,發現街頭呢間果真最平。最後大量入貨,消費¥9150。受惠於日本新稅制,雖然稅率達8%,但連藥品、日用品都被列入可退稅項,買夠¥5000就可退稅,變相都慳到幾十蚊。


再周圍逛下,買下杯Starbucks。Almond Milk (¥604),杏仁味濃,牛奶重,好一杯杏仁奶,仲要加忌廉,滑到爆。



熊本嘅晚餐繼續拉麵之旅。熊本拉麵同博多拉麵唔同,喺濃郁嘅豬骨湯基礎上,著重入加蒜作調味。熊本有幾間拉麵名店,而今晚選擇左黑亭,就係熊本駅下一個電車站落車,穿過一條人影都唔多嘅小巷,原來隱藏左一間高朋滿座嘅拉麵名店。


七點零黎到時都要稍為等位,仲遇上一位老伯伯轉贈該店嘅¥50現金券,可以慳番幾蚊,真係感動。


豚そぼろ丼可算係日式肉臊飯,任何惠顧拉麵加¥230就有一客。甜甜嘅白飯上舖滿肉臊,肉臊煮得入味,味道微甜帶肉香,加些少青蔥提味。值得一提旁邊紅色嘅醬瓜,酸酸辣辣,送飯更加正。

玉子入りラーメン ¥900
店方人氣菜式係加入生蛋黃嘅拉麵,係拉麵界的確少見加入生蛋。拉麵有四片叉燒、兩隻生蛋黃、海苔、青蔥、芽菜,實在非常豐富,賣相亦算係咁。從湯底色澤可見有別於一般豚骨湯,湯較深啡色,仲有點點啡黑嘅炸蒜蓉。呷一口湯,豚骨味給比下去,蒜味比預期還要強勁。此店強調用自家製蒜頭作湯底,蒜頭經過油炸,多一份焦香味,令成個湯更加濃郁具層次。但飲多幾口,會發覺蒜味炸得太過份,焦香仲有一點苦澀。可能正係選用生蛋會配料嘅考思,鮮橙嘅半生熟蛋黃,本身蛋味勁濃,不帶一點蛋腥味。將蛋拌入湯內,湯頭頓時變得柔和,飲起黎更順口。麵方面算唔錯,直細麵帶蛋香,口感煙韌。叉燒略瘦,不帶一點油份,質地較實,軟嫩程度一般。其他配料亦不過不失,總體黎講,係一碗好飽足嘅拉麵,口味較獨特。



ラーメン ¥680




埋單用上老伯俾嘅優惠券,折實¥1710,港紙都係$120唔洗,實在太抵食。離開後,口中嘅蒜味久久未能消退,可見蒜嘅份量有幾重。



八點零行返番熊本駅,見土產店仲未關門就周圍八下。見到有新出品熊本熊蛋卷,真係好得意,但價錢唔平,影張相就算。最後買左兩杯布丁,一款係旅人推介熊本必食阿蘇牛奶布丁,另一款係雞蛋布丁。


因為今日提早一個鐘完成行程,去JR綠色窗口重新訂位,坐提早20:33開車嘅JR みずほ。



把握三十五分鐘係車上嘆甜品。
阿蘇練乳プリン ¥324
あそりんとうプリン ¥324
布丁雪得勁凍,入口仲有冰感,稍為融化後,就食到布丁嘅幼滑。阿蘇牛奶出名勁濃,今早食過雪糕已經覺得好正,呢個布丁亦有濃郁奶味,仲加左煉奶,甜味好到位。另一款係Custard Cream,加重左蛋味,不錯吃。


九點半返到博多,見時間當早,決定行去Gourmet City超市掃貨,準備明天去豪斯登堡。




行程第五日會喺豪斯登堡Hea一日。九點零落到博多駅,剛好名店博選已經開左門,就去超市買早餐。超市內外都有好多便當、壽司、小食,雖然比唔上正式鐵路便當咁豪華,但樣樣都好色彩繽紛,真係花多眼亂。最後買左一客便當、兩條壽司,再去喺中央便當店買多一客炒麵。



今行可以直接豪斯登堡號,上到月台,仲見證到兩架火車接合過程,當然要影底佢。原來呢架火車係雙架車相連,上錯車就會去錯地方。搭上09:31嘅JR,車程一個鐘九個字,可以慢嘆早餐。




一客家常便當¥360,有前菜、蛋炒飯、炸豬扒、酸甜排骨同福袋。其實每樣都唔錯,味道夠濃,非常醒胃,好送飯。便當雖簡單,賣相同材料唔及鐵道便當咁豪華,但勝在價錢平,質素又正常。另一樣係大阪炒麵¥230,好鍾意大阪嘅炒麵嘅燒汁味道酸酸甜甜,呢客平平地但絕唔失禮,麵條夠煙韌,醬汁夠濃味,配埋紅薑相當好味。最後有兩條壽司,¥400。一條係穴子、一條係香蔥吞拿魚,似乎係幾新鮮,紫飯仲脆脆的,不錯吃。值得一提,昨晚喺超市買嘅正宗日本版CC Lemon都係超好飲,好台灣版完全唔同,根本就係一枝濃縮檸檬汁。



到站落車,就感受到樂園氣氛。十一點半黎到豪斯登堡,已經有唔少大人細路同行,相當熱鬧。出站後,沿天橋通道行入樂園,唔好講笑,路程都幾遠。沿路會經過酒店、倫敦巴士等。






今期樂園主題係仮面舞會,售票處已經加上好多舞會裝飾,工作人員都著晒舞會裝,仲戴晒面具。豪斯登堡有幾款票種,我地買左¥6200一日任玩套票。園內有好多場館遊戲係套票已經包括在內,只有少量場館再需要額外付費。亦有唔少人會購買散策券,只包入場,場館要逐一付費。考慮到決定留足一日,俾左¥2000玩盡佢,相當化算。




[ 本帖最後由 teeniehung 於 2015-8-1 01:08 PM 編輯 ]


豪斯登堡譯名又叫「森林之家」,係一個模仿荷蘭街道所設立嘅主題公園,公園貫徹荷蘭、歐洲主題,每一個角落都係歐洲風味。聽人講豪斯登堡係一個勁大嘅公園,所以事前都有做好功課,挑選左幾個必玩嘅場館。入場後就先跳過入境區嘅Teddy Bear Kingdom、冒險公園、風車區,直奔娛樂設施城。



必玩人氣推介有「ONE PIECE ライドクルーズ~FOR THE NEW WORLD~」,排左三十分鐘,十二點幾先入到場。


排隊到到等候區裡面,先睇一段動畫,就係講「頂上對決」背景。睇完動畫後準備上船。樂園細心安排兩人坐一架船,玩得更投入。船一路行,講「頂上對決」到「艾斯之死」,最後Luffy決心要變強,定下兩年之約,最後重遇上隊友繼續旅程。小船輕微搖擺就好似喺海上航行咁,每經過一個場景,都有動畫同公仔模型出現,真係好似親歷其境。去到最尾就係互動遊戲要打海軍艦隊,最後以得分換取紀念卡。


玩完出黎十二點半,繼續下一個場館,同樣係受人推薦嘅劇場「洪水來襲冒險館」。係一個劇場,可以親身體驗實際大洪水威力。故事講小朋友浪費食水,夜晚發惡夢,舞台呈現出洪水嘅恐怖,有特殊裝置製造霧、雷、波浪、豪雨、龍捲風等,觀眾席仲會郁動,都幾得意。


排錯隊走左去「闇の王國」,講到明要識日文先入得,但剛好滿場要等下場就算。Muse Hall有歌唱表演。


一點鐘去埋另一個近期新開嘅場館「朱古力伯爵館」。


整間場館都係朱古力裝修,內有好多朱古力精品飾物,仲有即場製作朱古力同食甜品嘅櫃枱。


簡單行過朱古力館後,排隊參加「偉大航程」。入場後要掃瞄每個人嘅面部,再入場睇電影,原來每位觀眾都已經成為電影嘅登場人物。故事講遙遠嘅未來,生態系統大崩潰,人類要搵另一個地方居住嘅冒險旅程。雖然核核突突,睇下自己上鏡都好搞笑。




喺呢區周圍行,玩到近兩點,開始覺肚餓,要向海灣區進發。穿過阿姆斯特丹市,有長崎蛋糕專門店等,好多精品小食賣。




兩點鐘出左樂園,黎到免費進出嘅海灣區。一黎到就見到一架復古大船,停泊係木製碼頭旁,都幾有魔盜王Feel。


入到English Square,已經聞到陣陣One Piece味,到處都有各個人物嘅紙板。


仲有新世界男神Law嘅人物模型,超型! 而Franky就變左空氣彈床。


黎到海邊,終於都見到千陽號,真係心心眼。呢架一比一嘅賊船就在眼前。行近望過去,放左四年嘅千陽號仍然保養得好好,造工好精緻,同動漫一樣!


買好船票¥1100,搭上14:20嘅班次,開始新世界之旅。


船程十分鐘真係好忙,先落船下層參觀,係山治嘅廚房同水族箱。旁邊有騙人布工場同索柏嘅Chopper醫務室。



食餐區有Sexy Nami。牆壁上可以看到漫畫人物的設定稿。


船艙有紀念品店,有船上獨賣限定。上到船面,真係完全感受到同動漫一樣。 Luffy就係船頭揸旗。




船程十分鐘,真係融入左One Piece世界裡面,熱血到極點。千陽號旁仲有迷你梅利二號。


落船後,碼頭旁邊有間專賣店,所有產品都好吸引。



店內仲有角色人物嘅服裝,可以即場Cosplay。



黎得呢度,一心諗住搵One Piece餐廳做午餐。喺海灣區行左好耐都搵唔到,問工作人員先知,原來餐廳已經關門大吉,真係無限殘念,惟有搵其他野食。



食唔到山治廚房真係可惜,惟有喺附近搵食。見到呢間漢堡店ビッケンビッケン Biken Biken,都係佐世保漢堡認可店。 柯打左一客芝士漢堡套餐(¥1000),另一個照燒雞扒漢堡單品(¥700)。全部漢堡都係新鮮即製,拎上手真係熱辣辣。漢堡賣相好吸引,內容亦好豐富。漢堡包夾埋生菜、大大塊扒、芝士,仲有多到漏出黎嘅醬汁。漢堡扒肉汁勁多,肉味亦濃,非常唔錯。醬汁仲好濃,加埋芝士香味,配搭非常開胃。亦一個照燒雞扒漢堡都好正,雞扒肉嫰多汁,照燒醬非常濃味,味道入晒雞肉內,不錯吃。至於薯條就一般啦,唔算好熱辣嘅。


食飽後,行番去園中間,先行下視覺錯覺館。館細細唔算特別,可能喺香港已經睇得夠多啦。


睇完之後,進入顫慄城。



豪斯登堡嘅鬼屋都係出晒名,但真在太膽小唔敢去,只好參加一個連孕婦使用可嘅場館。係5D Miracle Tour,都算係近期新開嘅場館。入場時一人要拎一隻洋娃娃,劇場中公仔會發光、震,配合電影劇情。唔算恐怖,反而有啲搞笑。


跟住再去玩一個Dome Shotting 360射擊遊戲。故事主題係打宇宙怪獸,全場一齊射擊,係坐喺度不停手槍按制打怪獸,玩完好鬼累。之後再進入冒險公園,呢度真係有好多小朋友黎玩空中吊索、爬上爬落。仲有一個逃出恐龍島,要付費入場,但似乎幾好玩。


黎呢個冒險公園主要目標係戶外木造迷宮The Maze。睇外型唔討好,初頭唔係太想入,但見好多小朋友爬上爬落,橫掂有時間就照入去玩,點知原來喜出望外。迷宮全木造,原來有成五層,用木條砌出好多門、機關、樓梯,又要爬上爬落,又要捐出捐入,都幾累。目標係要搵到「龍玉」,全程有五個方法去終點,但搵到龍玉只有兩個方法。只要跟住小朋友行,就好快龍玉,之後再去終點。真係好累,但幾好玩,驚喜之作。



玩到六點,就趁未入夜,搭架免費遊船先。因為有夜間有光之王國主題,入夜後上船就要收費。黃昏前就係套票免費乘搭。喺入國口附近上船,終點站係高塔前街。沿途會經過風車園,花園,可以用另一個角度睇到。


天氣漸暗,園內建築物開始著燈,呢個時候黎都唔錯。落船後,正好可以上高塔觀景。高塔唔算太高,展望台高八十米,但正好可以睇晒豪斯登堡全貌。


六點半左右,開始亮燈,仲睇到光之王國嘅展示場地。


六點九去完高塔,就要盡快搵食,之後就要去睇夜間巡遊。晚餐選擇左去悟空,呢間餐廳主售長崎名物ちゃんぽん,好多旅人都推介一試。柯打左一個ちゃんぽん (¥1050)、一個皿うどん (¥1050)。兩個都係中華式變化出黎嘅麵,長棒麵湯底雞味濃,好厚好幼滑忌廉咪。配上煙韌嘅麵條,仲有好多配料,有好多椰菜、魷魚、蝦、獅子狗、蛋絲,味道都唔錯。另一個雖然叫烏冬,其實係中華炒麵,麵條絲身啲,仲經過油炸,好香脆。配料都係差唔多,但醬汁比較杰身,真係日式嘅中華炒麵咁。


食到七點幾,趕緊去睇唔同嘅表演。七點十分喺顫慄城有3D Illumation,話係世界最大級表演。另外,有巨大版太鼓之達人,投影去河對面嘅建築物外場,真係好得意。


七點鐘開始就有巡遊,今期光之王國,所以巡遊花車加左好多燈泡裝飾都幾靚。隊尾仲有旅客踏單車參與,唔怪得係全日本最長嘅夜間巡遊。




除左有夜間巡遊,河上遊艇仲有夜間特別版。船會著燈之外,河兩邊仲會噴水,河面仲有唔同燈泡色彩,非常靚。


光之王國嘅重點係藝術花園夜間開放。早上一片花海加上燈泡變成另一個美。影相真係好靚,影到到唔捨得走。光影花園真係必遊推介,真係興幸堅持要留到夜晚先走。



渡過好忙嘅晚上,個零鐘時間影左好多相。到19:45差不多要離場之前,去埋入國口嘅Teddy Bear Kingdom。場館展出左好多泰迪熊公仔、歷史故事等。出口仲有一隻全世界最大嘅泰迪熊,非常配合主題地,仲著上仮面舞會裝。




玩到八點,終於要離開呢個歐洲公園。由於直線嘅豪斯登堡號只營運到五點幾,為左玩盡光之王國,決定留到八點,所以搭車回程係要麻煩少少,不過真係絕對值得。搭上20:20,五分鐘時間到達早岐,轉乘另一線路,21:21到達肥前山口駅。趁仲有時間,出閘再劃指定票,搭上21:32 かもめ48,22:22終於返到博多。全程換乘兩回,需時兩小時左右,比直線多十幾分鐘,但可以玩到八點,都無所謂啦。

今日宵夜就係Family Mart揀左兩個布丁,參考網評,買左人氣頭幾名嘅布丁一試。一個係雲尼拿奶凍,入口非常滑,腍到好似溶化咁。奶味好出好香,面層有勁焦嘅焦糖醬提味,不錯吃。另一個係森永雞蛋布丁,蛋味濃,幾香甜。




伸延閱讀
[按此隱藏 Google 建議的相符內容]