4月北九州賞櫻七日六夜（已完成） - 日本旅遊 - 香港討論區 Discuss.com.hk

瀏覽: 56,714
回覆: 135
追帖: 48
分享: 7

+680

列印

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#61

樓主發表於 2015-8-1 21:10

今日係門司港、小倉遊，雖然天氣唔好，仲落大雨，但門司遊係唔可以改期，因為此行美食重點係唐戶市場，只有星期五、六、日放開，就算落住雨都堅持要去!
早餐可以輕食，選擇左MOS Burger。呢度有輕食早餐，每客¥320，有一個包加一杯野飲。選擇左雞蛋火腿包，因為新鮮即製，又等左一陣。

其實由博多去門司，要先去小倉再轉區間車，JR Pass唔可以搭山陽新幹線，但可以免費搭Sonic號。趕得切搭上09:02嘅米奇老鼠Sonic，但差啲坐錯去Green Car，行番轉頭就搵到位。

坐好就開餐，有大半個鐘時間慢慢食。呢個日本嘅腿蛋治同香港好唔同，麵包好香好甜，而且質地極度柔軟，非常腍身軟熟。餡料有火腿、蛋，仲有酸甜番茄醬。

09:46黎到小倉，就行過對面月台，可以搭上去門司港嘅區間車，仲要即時開出，十零分鐘就到終點站門司港。「0哩」紀念碑，代表鹿兒島本線嘅起點。行下門司港呢個復古車站先。

提早左到達，咁可以先去九州鐵路博物館。離開呢個充滿大正時代風情嘅復古車站，沿路有工作人員指示去博物館嘅路線。出示JR Pass，仲有優惠，折實¥240一張門票。

博物館分別兩個大部份，一邊係戶外車輛展示場，行上去仲有室內展覽館。車輛展示場停泊左九架退役火車。每架車都有佢嘅歷史，部份仲可以行入去參觀。

經樓梯上去到一座古老建築物，原來係1891年九州鐵路嘅辦公室，而家改建成為博物館。進入本館，除左有迷你鐵路模型，仲有模擬揸火車遊戲。

二樓就展出左好多鐵道歷史實物，唔同年代嘅車票、控制台、鐵路便當盒等。

行左半個鐘左右，臨走前仲喺紀念品店睇左一陣，好多產品都好吸引。

離開本館，經過迷你鐵路公園，可以自費駕駛超迷你鐵路行一個圈，雖然落住雨，都有唔少小朋友玩，架車仔真係好得意。公園外，仲有三架火車頭，保留住控制版，原汁原味。行到十一點度完成第一站，呢個博物館雖然唔算大，但比想像中多野睇，鐵路迷一定要黎。

[ 本帖最後由 teeniehung 於 2015-8-1 09:11 PM 編輯 ]

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#62

樓主發表於 2015-8-1 21:13

十一點零睇完火車，安排食一個早午餐，以便一陣可以食個豐富下午茶。黎得門司港，點可以唔一試名物焗咖哩飯。就係門司港都有好多間人氣名店，其實間間都各具特色。左睇右睇，最後揀左呢間Bear Fruit，因為係當紅火熱人妻上戶彩最愛。Bear Fruit就喺門司港駅出面，很好找。店仔細細，原來咁早已經有人開緊餐。

小店得清一式焗咖哩飯，但提供多類前菜配搭套餐。選擇左一客原味焗咖哩飯跟湯同沙律嘅套餐 (¥1200)，另加一客牛肉焗咖哩飯單品(¥1050)。湯似係洋蔥湯，相當清爽清甜。沙律加上大量粟米，蔬菜都好新鮮。

焗咖哩飯送到，長方型碗裝滿咖哩飯，因為需要烤焗，再上大量芝士，多到好似唔洗錢咁，上台時芝士同咖哩汁仍在興奮狀態，不停冒出氣泡，真係睇見都流口水，真係有想拍片嘅衝動，狂拍左幾段。

面層嘅芝士焗得輕微焦焦，多一分焦脆感。咖哩汁本身好香甜，應該用上好多水果蔬菜，再加埋勁濃芝士，點會唔好味。飯已經被咖哩汁充分覆蓋，每粒米都有咖哩汁包圍，配料仲加入蛋黃、青椒、洋蔥，正係配咖哩最好嘅材料，可謂色香味俱全，惹味至極。

另一客加左牛肉粒，牛肉好似牛腩咁，肉質好腍，仲好有肉味，令整個飯提香不少。的確係上戶彩大絕讚推介。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#63

樓主發表於 2015-8-1 21:15

食完超好味嘅焗咖哩飯，開始門司港散策。可惜今日天氣唔好，雨越落越大，就返去車站借傘，日本人服務真好，唔需任何按金登記，只求自律。由車站行去関門海峽ミュージアム大約十分鐘，十二點鐘黎到。地下係同一樓係海峽レトロ通り，可以免費入場。

場館以關門海峽海底世界為主題，展示左關門海峽嘅過去同現在。場館重現大正時代嘅門司港情境，有好多舊門司港建築，有電車，商店街等，講述海峽歷史，可以了解港灣一帶當年嘅生活情景。略為行過兩層大約十五分鐘就去下一站。

離開博物館，準備搭潮風號。呢架觀光小火車價值¥300，搭上12:40嘅火車進發。潮風號前身係貨運路線鐵路，而家改造成為懷舊觀光列車。

由九州鐵道記念館站出發，經過出光美術館、諾福克廣場到達關門海峽和布刈站總共4站，全程行走2.1公里，大約10分鐘。列車仲會及出鳴笛聲，好有Feel。臨到終點站前會經過隧道，喺漆黑嘅環境，工作人員即該開著螢光彩繪，兩架圖案都唔同，幾有特色。

落車後，搵岩方向就行去過海。今日咁大霧周圍好似仙境咁，沿路無乜人，真係要睇清楚地圖先行。大約行十五分鐘就到達關門人道入口。

一點鐘到達入口，先搭電梯落地底。關門人道係一條來回福岡縣門司港及山口縣下關嘅行人及單車海底隧道。

地底隧道通風十分好，有唔少人特登黎呢度跑步。大約十鐘就到達福岡縣同山口縣嘅交界。即時諗起，四月一號一單「新聞」。位於日本本州最西部的山口縣，今天宣布正式從日本獨立，成立「山口國」，並且同時公布新國旗、新首都，以及往後進出山口國需要辦理的簽證注意事項。原來係愚人節玩笑，玩咁大好搞笑。

隧道都幾長，差不多二十分鐘先到終點。到終點就可以集齊兩個半印合體成為一個圓型。

一上山口縣就見到馬關開港紀念公園，有好多石像，講述歷史。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#64

樓主發表於 2015-8-1 21:21

黎到山口縣獨立國，選擇沿海邊行去唐戶開餐，沿路經過赤間神宮。

赤間神宮烏居後方係著名嘅「水天門」，其造型係仿造童話故事中龍宮城嘅城門，真係幾有西遊記Feel。

再經過春帆樓，春帆樓係一間有悠久歷史的河豚料理旅館，中日甲午戰爭、清朝失敗後，李鴻章和伊藤博文就在此簽訂了割讓台灣嘅「馬關條約」。

兩點未夠終於都到達唐戶市場，臨近三點收檔，真係好熱鬧好多人。市場有好幾檔售賣壽司等食物，把握減價機會開餐啦!

每檔都採用自助形式，拎個盆揀選鍾意嘅壽司。壽司都多款式，款款都好吸引，真係花多眼亂。

最後揀左幾款野食，樣樣都好新鮮，每件壽司約為¥100至¥500，仲有最後減價，全店半價，好多款都係¥100有交易。好出名嘅柳川水產，特價大部份每件都係¥100。大大隻炸蝦都係¥300。吞拿魚腩要¥300肥美軟腍，三文魚子好鮮甜，連海膽都好好味，總之樣樣都好新鮮好好食。總消費大約¥2500，食左好多款，真係平靚正。拎上樓上坐低慢慢食。

唐戶海邊

食飽就要回程返門司港，由唐戶回程可以搭五分鐘船，片道¥400。

[ 本帖最後由 teeniehung 於 2015-8-1 09:27 PM 編輯 ]

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#65

樓主發表於 2015-8-1 21:28

三點喺碼頭落船，漫遊門司懷舊區。經過三井俱樂部，係愛因斯坦紀念館。舊門司稅關其實都係免費入場，不過要行遠啲所以就此略過。遠望仲見到門司港懷舊展望室同藍翼門司大橋。

再黎到海峽廣場進行濕平活動。廣場係一個集雜貨店、美術館、餐飲店為一體嘅綜合性購物娛樂設施。有各式各樣土產店，出售北九州的土特產、和式點心、工藝品、紀念禮品等旅遊商品。

廣場門外仲有著名嘅香蕉先生。門司港最出名係香蕉手信，所以喺度狂買左好多。

廣場地下仲有一間蜜糖專門店。

試左一杯蜂蜜軟雪糕 ¥360。質地非常滑，牛奶味同蜂蜜味配合得好，底下係蜂蜜粟米片，整體幾好味。買完手信就繼續下站，搭番JR去小倉。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#66

樓主發表於 2015-8-1 21:29

由門司港黎小倉真係好快，四點就到小倉駅。小倉駅最特別嘅係高架單軌列車。離開車站穿過商店街去小倉城進發。商店街細細條，主要係便利店、雜貨、服裝等生活用品，非常地道。

由車站去小倉城，沿過都有指示，慢行大約二十分鐘就到達城堡。呢個城細細的，但有櫻花影襯都唔錯。由於行過唔少城，個個內部都係差唔多，就此唔再入場，只係城外留影。

城外就係複合商場River Walk。商場中間有地面水舞湧泉，以時尚服飾類為主，其次是雜貨，並有北九州藝術劇場、北九州市立美術館分館、西日本工業大學、NHK北九州放送局等，都幾大，但人流好少，有啲冷清。

簡單行過小倉城同River Walk，就回程返車站。特登小繞路去一去魚町銀天街同旦過市場，其實真係好地道市民嘅街市。繼續經商店街行番車站，經過便利店，買到期間限定嘅Haagen Dazs。

Blueberry Cheesecake ¥284，非常十分極之好味。外層係焦糖脆皮，有芝士味。中間雲尼拿芝士味雪糕配流心藍梅醬，正。

另一款Strawberry Crunch ¥294更勁。士多啤梨脆脆外皮，好似feel到有果肉咁，味道香甜，同間係牛奶味雪糕，再配流心士多啤梨醬，絕頂。

小倉原來無乜特別野岩睇，五點幾行晒可以提早返歸。再去JR綠色窗口劃位，改搭18:05回程，可惜因為人太多，仲無孖位坐。不過車程尚短，18:47返到博多。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#67

樓主發表於 2015-8-1 21:31

安排左今餐試福岡著名料理牛腸鍋，牛腸鍋係用湯頭燉煮牛腸、高麗菜、韭菜等蔬菜，加入辣椒、大蒜提味嘅重口味鍋，湯頭多用上麵豉或鹽味。就咁一個火鍋本來無乜興趣，但試過就真係好驚喜，係全個旅程最深刻嘅一餐。
七點未夠黎到博多駅，直上AMU Plaza，九至十樓係美食廣場，每層都有好多家出名嘅料理。上到黎十樓，喺盡頭就見到笑樂。笑樂係福岡牛腸鍋名店，Tabelog 有3.56分，係旅人黎到九州必食之選。唔怪得有咁多人排緊隊，見未肚餓，落樓下行陣先。行左一陣，見人龍未減，都係乖乖地排隊吧啦。

到八點幾終於入到場，安排左面壁位，再睇睇有咩食。首先一定要點牛腸鍋，一人前¥1180，最少兩人起鍋，湯底可以選擇味噌、鹽、醬油。試得最地道嘅，當然要揀味噌湯啦。就先叫一份，再睇下加啲咩配料。鍋好快就送到，見到下面有好多菜，上面有好多韭菜，賣相仍然未有衝擊力。服務員幫我地開左爐後，話由佢慢煮十分鐘先食。

時間差不多到，服務員將所有材料撈埋，終於見到啡黃嘅味噌湯底。味噌嘅香味開始湧上，湯底煮到出氣泡，成件事開始吸引。菜都煮到腍晒，可以開餐。湯底的確正，味噌勁香，好濃郁，鹽甜度調中，加左少許辣椒，令湯底更加惹味。鍋內有大量椰菜，菜煮到腍晒，菜本身好甜，仲吸收晒味噌嘅香味，更加好味。日本嘅韭菜又正，草青味唔重，仲好甜，撈埋味噌又係一流。主角牛腸都俾得好足，份量唔少。牛腸有一層腸皮包住白雪雪嘅脂肪，本來睇見好似好油膩，但食落真係上癮。牛腸味道好腥，牛味勁重，完全無腥臭。腸皮煙韌，脂肪入口即溶，仲好有油香甜味，吸晒味噌汁真係好正，無估到咁正。除左牛腸外，仲有其他牛雜，一樣好味。

食到水尾，發覺湯底越煮越濃，就學下大家，追加一份椰菜(¥300)同長棒麵(¥300)，掃盡每一啖湯。生麵喺濃郁嘅湯內煮成熟，吸盡湯底精華，有乜辦法唔好食。麵條本身帶甜味，質地煙韌，，認真唔錯。食到最後，湯真係所剩無幾。埋單今餐¥2960，二百零港幣食得飽飽，仲要咁好味，真係正。無估到牛腸鍋可以咁好食，真係九州必食之選。

返歸後去便利店買甜品，一個日本地道牌子和風宇治綠茶雪糕(¥198)，綠茶味正常，一般啦。另一個燒布丁 (¥113)，蛋味幾香，面皮燒過，幾特別，但都係鍾意幼滑版。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#68

樓主發表於 2015-8-1 21:33

最後一日行程較輕鬆，9點零出門口，落樓下Check Out，交低房卡就走得，完全唔Check任何野，真係快到無人有。前幾日都係博多搵早餐，又無乜特別野想食。橫掂今日會買地鐵一日券，決定先喺天神落車，去地下街食地道日本M記快餐Lotteria。

之所以選擇Lotteria，係因為佢出名搞花臣，出過五層炸蝦堡、拉麵漢堡、進撃の巨人等神奇包，雖然今期無特別包，但都好想試下。早餐有包同飲品，柯打左一客煙肉蛋漢堡餐(¥450)，另一客名物炸蝦漢堡餐(¥450)，另外加左一份炸薯角(¥80)。

煙肉蛋漢堡正常，煙肉夠好味。明顯炸蝦漢堡係突出好多，炸蝦係用薯蓉包住，好似可樂餅咁。薯仔好甜，蝦好爽口，外皮又炸得脆，不錯吃。而追加嘅薯角係新鮮炸起，都唔錯呀。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#69

樓主發表於 2015-8-1 21:36

食完早餐，由天神駅搭地鐵至大濠公園。第一日已經黎過呢度，今日會改北行去西公園。出左站之後行無耐，盲見到一條大斜路，路上開滿櫻花，路旁擺左小食、遊戲攤檔。十一點未夠，時間尚早，店舖都未開。

西公園係福岡賞櫻熱點，係「日本櫻 100 選」其中一個賞櫻名所。園內種植了約 1,300 棵櫻花，櫻花的確多，仲遇上滿開時期。公園有個展望台，可以望到福岡市街、博多灣，及遠至志賀島。

公園真係超級大，周圍行到蕩失路。行行下見到個打卡點。最後行左差不多半個鐘，決定加遊Yahoo Dome。

離開公園都要行多二十分鐘，遠望就見到Yahoo Dome。

今日應該係日本四葉草開演唱會，好多歌迷都著晒制服，好似五星戰隊咁。呢度真係好多人好熱鬧，好有氣氛。

其實Yahoo Dome都只係黎開下眼界，睇下有幾宏偉。簡單行過就叫旁邊嘅Hawks Town，商場有幾間餐廳，小小店舖，HKT48劇場，其實都冇乜野行。唯一重大收獲係，喺Seria買左兩套Hello Kitty鐵叉同匙，全部Made in Japan，仲要每件¥108，勁抵！行到十二點，回程返博多。

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#70

樓主發表於 2015-8-1 21:38

12:45返到黎博多駅，先去醫肚。今行福岡最後一個正餐，選擇以拉麵作結。DEITOS2樓係「博多めん街道」，有成十間知名拉麵店，除左博多一幸舍，亦有一間長浜拉麵好多人推介。最後選擇試試九州鹿児島ラーメン豚とろ。先喺售票機買票，柯打左一個玉子拉麵，加一個拉麵炒飯套餐。

半熟煮玉子入り豚とろラーメン ¥830
拉麵好澎湃，材料多，香味強，賣相好吸引。湯底呈深啡色，已經預計到佢嘅濃度。以豚骨做基礎，輔以雞骨與鰹魚熬製，極之濃郁，味道相當重，頂唔順嘅會以「太咸」做評語，但對我黎講，係真正重口味，因為一個咸字並唔能夠形容到湯底嘅層次。咸中帶甜，帶豬骨同海味，再輔以金蒜提味，真係非常正。終於遇到一個真係重口味到飲唔晒嘅湯。拉麵煙韌，掛湯度不錯，每啖都有湯味。不得不提，配料並唔係用叉燒片，而係一舊舊豬肉，豬肉帶肥，正係招牌豚とろ嘅意思，所以口感軟嫩、入口即溶係預料之內。而豬肉相當甜，仲吸收晒湯汁，鹿兒島最著名嘅黑豚肉，真係相當出色。溏心蛋亦非常出色，熟成度一流，蛋白入晒味，蛋黃非常香甜，大愛。雖然湯底重口味，豬肉又肥，但整體黎講，完全無油膩感，係會令人上癮、念念不忘嘅九州重口味。

A餐 (豚とろラーメン、炒飯) ¥980
記得炒飯亦唔錯，炒得乾身，味道亦不錯，估唔到配拉麵都幾好。

鹿児島ラーメン豚とろ的確唔錯，鹿兒島拉麵比博多拉麵更加重口味，更加豪邁澎湃，有機會一定會去鹿兒島食過夠。
食飽後仲有時間，再趕緊掃貨，就去車站旁嘅名店百選Ming超市買博多甜王，埋單¥3550。見工作人員四處張羅打包用嘅工具，細心將幾盒士多啤梨包好，深深感受到乜野叫服務態度，真係辛苦晒。再去土產街，購入福岡人氣手信第一名博多通饅，試食真係唔錯。

臨走仲要歎多個甜品，就係黃金傳說人氣推介嘅博多石畳，Tabelog仲有3.58高分。原來此店已經由1942年開始營業，真係睇唔出。

櫥窗內放嘅甜品，顏色繽紛，非常吸引。最後買入一件朱古力原味石畳，承惠稅入¥432。

單買一件蛋糕，就配上華麗四正嘅包裝，感覺十分高級。石畳係方塊形狀蛋糕，有海綿蛋糕、朱古力蛋糕、忌廉等交疊而成，外層再用上微苦嘅朱古力粉包裹外層。朱古力味道真係好濃郁，係略帶苦味嘅特濃朱古力口味。雖然每層內容都唔同，味道上應該有微妙分別，但已經整整融為一體，味道配合得好好。蛋糕質地更係非常柔軟嫩滑，入口即溶，有慕思嘅口感，非常好味。以呢個價錢，喺香港絕對食唔到咁高質素產品。

食完呢件博多甜品，終於要面對現實，準備出發去機場。

[ 本帖最後由 teeniehung 於 2015-8-1 09:40 PM 編輯 ]

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#71

樓主發表於 2015-8-1 21:42

今早收到港龍通知，本班機會延誤半個鐘至17:15。真好，已經偷多半個鐘行街。由博多駅去機場，其實都好方便。拎左行李後，落地鐵站，由博多搭車去福岡空港只係十分鐘時間，出左地鐵站，就係國內線航廈。因為時間尚早，決定參觀下國內航廈，有幾間土產店，餐廳等。無耐，又收到港龍通知，班機再延至17:45，時間更充裕。行左一陣，就搭穿梭巴士去國際線航廈，三點未夠就到，真係守時嘅好旅客。國際線航廈有巨型山笠模型，喺大堂行下土產店，買左少少手信。

網友講到話福岡空港係排隊排隊再排隊，已經有心理準備，Check In要先排隊過行李X光。但旅客唔多，都唔洗點排隊，過程非常流暢。時間太多，周圍行下，國際廈比較多餐廳，可能人真係唔多，空間好廣闊。

由於港龍班機延誤，航空公司送上每人¥500補償，可以喺登機大堂內嘅餐店使用。

最後Hea到四點左右，進入登機大堂。裡面有更多免稅店，規模幾大，幾多野買，唔怪得呢度多人咁多。掃貨之前，先去醫醫肚，就用¥500現金券，補少少錢，換左一客熱狗同一枝蘋果汁。熱狗味道正常，蘋果汁幾好飲。

之後黎過瘋狂大掃貨。買左好多Royce朱古力、補充九州人氣土產、又買左啲Hello Kitty精品。最後用埋果張現金券，¥510買左一杯軟雪糕。呢個雪糕喺長崎哥拉巴公園見過，唔知有乜特別，當時無試，咁岩又有機會試，原來都唔錯。軟雪糕真係非常軟，軟到近溶嘅質地，忌廉感好重，奶油味重，非常香。最特別嘅原來係個筒，係蛋白餅，又香又脆，不錯吃。

到17:15終於有得登機，要同福岡さようなら。飛唔夠一陣，又到開餐時間。呢個航程真係非常緊密。

味道一般啦，記得去程果餐好似好味啲。可能呢班係加班機原故，好多材料都唔齊，飲品又唔齊，似乎都得罪好多客人，延誤真係麻煩。

三個半鐘嘅航程完成，返到香港。終於完成七日蜜月之旅。一時唔係太適應香港又熱又濕嘅天氣，好想好想留喺日本耐啲。日本，的確係一個百去不厭嘅地方。

回覆引用 TOP

nosenose124 高級會員帖子 498 積分 510 註冊 2005-6-16 發短消息加為好友	#72 發表於 2015-8-1 22:27 只看該作者大中小繁簡十卜! 九州係日本遊中算比較少購物既!! 我鍾意呢個地方既寧靜~ 上年七月去完, 十月又再出發~ 岩岩好呢個遊記好値得參考~~
UID 452291 帖子 498 精華 0 積分 510 金幣 0 閱讀權限 40 在線時間 2083 小時註冊 2005-6-16 最後登錄 2018-10-28 查看詳細資料	回覆引用 TOP

肛交所高級會員帖子 881 積分 636 註冊 2015-5-28 發短消息加為好友	#73 發表於 2015-8-1 22:38 只看該作者大中小繁簡想請教樓主，8月尾我都會去九洲，諗住到搏多買全九洲jr pass，想問係咪一買左就可以即刻劃埋位？會吾會好麻煩？(因第一次用jr pass,怕劃位時候會雞同鴨講，所以想問清楚,thx 樓主)
UID 5645130 帖子 881 精華 0 積分 636 金幣 401 閱讀權限 40 在線時間 2732 小時註冊 2015-5-28 最後登錄 2022-7-2 查看詳細資料	回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#74

樓主發表於 2015-8-1 23:11

引用:

原帖由 nosenose124 於 1/8/2015 22:27 發表
十卜! 九州係日本遊中算比較少購物既!!

我鍾意呢個地方既寧靜~ 上年七月去完, 十月又再出發~ 岩岩好呢個遊記好値得參考~~

我都鍾意九州可以行下公園睇風景，靜靜地感受日本生活。諗住十月去邊玩呀？

回覆引用 TOP

teeniehung

貓貓

VIP

帖子: 3771
積分: 4178
註冊: 2012-11-12

發短消息

加為好友

#75

樓主發表於 2015-8-1 23:26

引用:

原帖由 肛交所 於 1/8/2015 22:38 發表
想請教樓主，8月尾我都會去九洲，諗住到搏多買全九洲jr pass，想問係咪一買左就可以即刻劃埋位？會吾會好麻煩？(因第一次用jr pass,怕劃位時候會雞同鴨講，所以想問清楚,thx 樓主)

http://i.discuss.com.hk/d ...

出發前，你可以搵個excel寫低搭JR既日期、班次、目的地等資料。去到博多站綠色窗口，記得排最左邊「外國語應對窗口」，同櫃台姐姐講你要邊款pass，順手俾埋張excel表佢，佢就會幫你開pass同即場劃位，全程都唔洗點講野。就算要講，簡單英文就ok。我買果日，查詢櫃台仲有兩個講國語既中國服務員，有咩唔明都可以問。唔洗怕架，祝你成功！

[ 本帖最後由 teeniehung 於 2015-8-1 11:28 PM 編輯 ]

回覆引用 TOP