打印

[遊記分享] 石垣島6日5夜の「無」自駕親子遊 (完,已加index)

石垣島6日5夜の「無」自駕親子遊 (完,已加index) E-mail 此主題給朋友

[隱藏]
其實親子旅行唔係第一次,但因為今次去嘅地方係日本沖繩石垣島,好多人都知道呢度嘅公共交通只有巴士,而且班次好疏,一般人黎都會係自駕遊,但因為我唔識揸車,而且得三個人包車好唔抵,所以只好選擇島上唯一公共交通 - 巴士(唔計的士同船),所以我好想喺度分享一下今次嘅旅程,等一D唔識揸車嘅朋友都可以容易D計劃石垣島旅程。


首先,要介紹一下石垣島。其實石垣島係屬於八重山群島嘅一部分,而石垣島就係整個八重山群島裡面政治、經濟和教育嘅中心。石垣島地形多變,而且島上多被森林所覆蓋,整體黎講係一個主要黎感受郊外清新空氣嘅好地;而八重山群島位於日本沖繩西南方,由那霸搭坐國內線飛機出發大約需要40-45分鐘;但係其實喺台灣出發,搭乘國際線飛機六都只係需要40-45分鐘就可以抵達石垣機場,而喺香港飛過去,都只係需要2個鐘多少少。



今次旅程嘅成員包括:婆婆 + 姨媽 (即係我) + 8歲姨甥女,由於三個都唔識揸車,所以只可以靠島上嘅公共交通工具,所以喺進入旅程之前,要先同大家分享一下有用嘅連結:



石垣島巴士線資料:http://www.cosmos.ne.jp/~bus/azu_hp4-rosen.html


石垣島往外島渡輪資料:http://ishigaki-dream.co.jp/languages/c_tp.html#竹富



對於唔識日文嘅我,最初一打開上面嘅連結真係頭都痛埋,但其實當你用Google map輸入要去嘅地方,選擇路線規劃及乘坐公共交通工具,Google map係可以顯示埋每一個巴士站嘅名稱同埋你嘅定位,咁就可以知道自己去到邊同邊個站落車喇!而且我今次發現Goolge map另一功能,原來我輸入中文,佢都可以搵到佢喺日文嘅位置,所以係非常方便。而且石垣嘅巴士係好準時,基本上唔會遲多過2分鐘,所以只要搵岩巴士站位置而你早過巴士到達時間去到,基本上你就可以上到車。


其實石垣機場唔大,一出國際航線嘅出口直行兩步,向右手邊行已經見到巴士站,而一般從機場去返石垣市中心,係可以坐#4或者#10巴士線,其實兩條線嘅終於站都係石垣巴士總站,只係中間途經嘅地方會有少少唔同,所以就要視乎你酒店嘅位置而決定坐邊班巴士。另外一個重點,就係大家一定要買坐巴士嘅5 days pass,成人2000yen,小朋友1000yen,一上巴士就可以同司機講要買呢個pass,咁黎緊咁多日就可以靠坐巴士周圍走。





PS. 可能大家都會問:「你去6日wor!咁最後一日咪要自己俾錢坐車?」其實當初我都諗住係咁,但到最後一日先發現,原來呢個5 days pass係非常好,因為佢所指嘅「5 days」,即係240小時,係由你上車果刻先開始計架!我係19/4中午12點買呢個pass,所以係可以用到24/4中午12點,真係超讚!!!



我地嘅行程如下(19/4 - 24/4):


Day 1 - 香港→石垣→民宿check in→午餐(日本家庭式餐廳)→公設市場→預約浮潛→晚餐(金牛)→Family Mart #2
#8


Day 2 - 早餐(比嘉豆腐)→小濱島→竹富島→晚餐(一魚一會)→海鹽專門店(食雪糕) #18

Day 3 - 早餐(Yakiniku Parlor)→平久保崎燈臺→玉取崎展望台→西松屋→晚餐(Coco Curry House)→MaxValu、Daiso(100yen店)、藥妝店 #21 #22


Day 4 - 早餐(杯麵)→川平灣→午餐→八重山民俗文化村→晚餐(七輪燒雞)→西松屋、Daiso(100yen店)、Mori #41 #43


Day 5 - 早餐(Family Mart)→幻の島浮潛、午餐(Hamburg Burger Shopきたうち牧場ハンバーガー店)→茶點(鮨人回轉壽司)→メイクマン石垣店→晚餐(石垣屋)→放煙花(Tadahama)→MaxValu→Family Mart #48


Day 6 - 早餐(麵包)→機場 #48



今日先講到呢度,黎緊會同大家繼續分享我地點樣坐巴士同埋旅程嘅經歷。




[ 本帖最後由 Tear淚 於 2017-5-4 12:18 PM 編輯 ]



Day 1 - 午餐(日本家庭式餐廳)→公設市場→預約浮潛→晚餐(金牛)→Family Mart
喺民宿放低行李,休息左一陣我地就諗住出去搵野食,其實我只需要選岩時間去返日航八重山呢個站,其實係可以坐返#10空港線去石垣巴士總站,即係到達市中心,不過因為想睇下附近嘅環境,所以我地選擇左行出去。

PS. 順帶一提,日航八重山呢個站比較特別,基本上所有巴士會途經呢個站嘅基本上都係喺酒店門口上車,所以就算你見到要坐果架巴士,為左唔坐錯方向,最好先問一聲司機。

基本上我地係想去行公設市場,諗住順便喺附近搵野食,所以只需要喺Google map設計目的地係「公設市場」,選擇步行,就可以搵到合適嘅路線。而基本上都係一D直路,所以對大人小朋友都好方便。



去到公設市場附近,隨意搵左間餐廳食午飯,由於過哂午飯時間,食客唔多,而呢間餐廳雖然冇英文餐牌,但圖文並茂,非常方便,餐廳老闆係以家庭式經營餐廳,家中兩個小朋友都喺餐廳入面玩,非常可愛。






食飽之後行過隔黎已經係公設市場,呢到可以買到好多石垣嘅特產、手信、甚至係生嘅石垣牛,不過除非有郵輪泊岸,否則平日嘅公設市場都幾冷清。

公設市場詳細介紹:https://nurseilife.cc/yaeyama/

由於只係第一日,我地只係行左一陣公設市場,跟住就去左石垣碼頭果邊諗住報名過兩日嘅幻島浮潛活動,同樣地用Google輸入石垣碼頭,就可以搵得到正確位置。




其實去浮潛可以話係好多人會選擇嘅行程之一,而除左浮潛外亦可以選擇好多唔同嘅外島活動,如果唔想煩要去邊度當你黎到石垣碼頭都有好多one day / half day tour俾你選擇。

而另外要提提大家,由於好多時為左招呼外地遊客,佢地要安排英文導遊俾大家,而且未必每日嘅團都有英文導遊,所以建議第一日去到石垣島就要黎報名,以便安排之後嘅行程。另外如果你本身玩過浮潛,可能你會話反正去到都係自己玩,只係需要佢地接你地出去日文導遊都唔怕,但當地安排旅行團嘅公司並唔會咁諗,因為佢地為左保障每一位旅行安全,所以係必須有英文導遊嘅團先俾你地報名,至少當有咩事隨團都有人識同你溝通。

報完名,我地就順路喺碼頭出面個巴士站上#10往石垣空港嘅巴士,去返日航八重山站,返酒店休息一下,夜晚就同樣坐#10往石垣巴士總站方向嘅巴士,去返石垣市中心搵晚餐。(其實石垣巴士總站嘅位置就係上圖紅色星星所標示果個位,都好近石垣碼頭架!)

晚餐我地去左「金牛燒肉」食石垣牛,鍾意食牛嘅朋友推介你地去試下。(巴士總站行過去好方便)



金牛燒肉:https://tabelog.com/tw/okinawa/A4705/A470501/47001395/

喺睇地圖時無意中發現金牛附近其實已經有間Family Mart便利店(紅圈位置),所以食完飯就順路入去行下,日本嘅便利店除左飲飲食食其實仲有好多野睇,所以入到去都見到好多人係到流連,我地買左D杯面零食野飲同埋小朋友貼紙簿,由於已經過左#10開往石垣空港嘅尾班車(19:45),所以我地只好行返去酒店喇!

TO BE CONTINUOUS



回覆 引用 TOP

支持分享呀
等你再UPDATE



回覆 引用 TOP

Thank you!
非常仔細的遊記。



回覆 引用 TOP

[隱藏]
支持分享.
thank you.



回覆 引用 TOP

http://www.azumabus.co.jp/localbus/
石垣巴士轉左新網址



回覆 引用 TOP

支持分享!


回覆 引用 TOP

原來我忘記左post去到機場同去民宿果part就直接去左食飯~~ hahahaa,,,, 等我補返先

Day 1 - 香港→石垣→民宿check in
UO666 香港→石垣

香港時間7:45am起飛,大概日本時間11:00已經到達石垣(日本比香港快一個鐘),由於石垣空港國際線其實好細,基本上處理入境嘅櫃位唔多(印象中好似得2個),所以入境都需要一D時間,而過左海關基本上已經見到行李帶(去到已經有好心人將我兩件行李放左上地),然後就已經係門口。

PS. 入境日本係要填寫表格及物品申報表,飛機上會派發,所以最好出行時準備定一支筆喇!



一出機場其實已經見到一個好大嘅停車場,我估大部分都係租車公司所泊嘅車黎嘅,行前兩部望向右手邊,已經可以見到巴士站,由於我住嘅民宿鄰近日航八重山酒店,所以我直接選擇左#10巴士。

#10空港線:http://www.cosmos.ne.jp/~bus/route10_timesche_271001.pdf


當初我睇到上面呢個路線資料好疑惑,點解石垣空港有兩個時間嘅?唔通有兩邊唔同嘅站?咁究竟我要去邊個站呢?其實#10空港線巴士係由石垣巴士總站開往石垣空港,然後再由石垣空港開返去石垣巴士站,中間係會好似香港巴士到總站後俾司機有小小嘅休息時間,所以上面所示嘅兩個石垣空港時間,其實係到達時間同埋之後開出嘅時間。

另外有一個重點大家係需要留意,#10空港線由石垣空港開去石垣巴士總站,佢地係會卡啦卡啦咁有班次係會中間飛左一D站,所以除非你間酒店並唔係喺果D飛站附近,否則你上車前一定要睇清楚你黎緊坐果班車會唔會飛站,如果會咁你就要等下一班。(由石垣巴士總站去石垣空港同樣有咁嘅情況,記得留意啊!)


由於我住嘅民宿係要喺日航八重山站落,飛站唔會有影響,所以我出左機場直接可以坐11:45開出嘅巴士,石垣巴士唔係上車就要俾錢,你會喺司機位隔黎見到有部機俾你拎飛仔,落車嘅時候就係拎住呢張飛仔去返司機位俾錢(上落車同一個門口);咁因為我係買5days pass嘅關係,所以先至要一上車就向司機購買,雖然咁岩個司機唔係好識英文,幸好站頭其實都會有其他司機喺度,所以有另一個司機幫手翻譯。

石垣嘅巴士(尤其係空港線)其實都有英文廣播到站提示,但由於我地唔清楚所到嘅站嘅英文名,所以幫助都唔大,呢個時候就要靠Google map,我只要用中文輸入終點站「日航八重山」同埋起點「石垣空港」,並選擇公共交通工具,佢已經可以準確轉化成當地所用語言及顯示路線,而令我最驚喜嘅係,Google map竟然可以顯示埋我坐緊果架巴士黎緊所到嘅站名,所以我能夠好清楚自己去到邊同埋幾時要按鐘落車。





根據巴士時刻表(即係上面巴士班次果條link),我係12:17會到達日航八重山,由於中間途經位置都幾多人落車,所以實際到站時間係12:25,達左7分鐘,不過呢次係例外,因為平時石垣巴士係相當準時架!最多都係遲2分鐘,所以睇實時刻表基本上都冇錯,亦千其唔好遲到啊!落左車只係行3分鐘,就已經到達我地嘅民宿。

Hostel Churayado Cocochan:https://www.agoda.com/zh-tw/hostel-churayado-cocochan/hotel/okinawa-jp.html





其實當初選擇呢間民宿,係冇留意到佢咁近日航八重山呢個站,但後來plan行程時發現呢一點後覺得非常重要,因為基本上黎緊幾日我地去邊都好大部分都可以喺呢個站上車,所以建議大家搵酒店/民宿,最好附近都可以上到巴士。另外呢間民宿其實都可以行到出去市中心,雖然夜晚條街確實有D黑,不過相對黎講其實呢間真係好方便。


因為石垣話大唔大,所以5晚我地都住喺呢度,價錢方面,佢係以人頭去計嘅,詳列如下:
15000yen for 1 for 5 nights,total 45000yen
而一間房係有2張床,所以三個人佢係俾左兩間房我地,出面嘅飯廳、廚房、洗手間、沖涼房其實係public area share黎用嘅,而呢到其實係有3間房,所以就算hot season住滿要share黎用都唔會好迫,不過咁岩我地去呢幾日唔係hot season,再加上冇其他人book,基本上我地係好似book哂佢成間屋(當然有間房係lock左我地入唔到去,haha)。PS. 平時要book哂佢一間屋係要18000yen/一晚架!所以呢幾日真係好抵住

民宿有提供沖涼洗頭所需嘅物品,同時有齊廚房、雪櫃、洗衣機,可以自己煲水煮野食同洗衫,洗衣機要用嘅話200yen一次,入左錢後就可以開著電源洗衫,洗完露台位仲有得曬衫,另外開冷氣都係要俾錢,100yen三個鐘,不過你出街果陣只要熄左冷氣就唔會計時,返黎再開返先繼續計。






TO BE CONTINOUS



回覆 引用 TOP

好詳盡報導,我下星期出發,都係去六日非自駕


回覆 引用 TOP

[隱藏]
民宿似乎住唔起咯,

多謝資料詳細,
下月去.



回覆 引用 TOP

石垣我有興趣呀!我都唔識揸車架!
留名支持!學野



回覆 引用 TOP

引用:
原帖由 Tear淚 於 2017-4-28 11:22 AM 發表

其實親子旅行唔係第一次,但因為今次去嘅地方係日本沖繩石垣島,好多人都知道呢度嘅公共交通只有巴士,而且班次好疏,一般人黎都會係自駕遊,但因為我唔識揸車,而且得三個人包車好唔抵,所以只好選擇島上唯一公共交 ...
十卜石垣



回覆 引用 TOP

過往都冇留意呢個地方, 但睇完樓主報告又有啲興趣, 繼續追看, 樓主努力!


回覆 引用 TOP

好詳盡呀 支持

民宿一個人都成千一晚,好貴喎



[隱藏]
想問下浮潛幾錢?


 提示:支持鍵盤翻頁 ←左 右→
[按此隱藏 Google 建議的相符內容]






重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。