• 瀏覽: 332,789
  • 回覆: 172
  • 追帖: 267
[隱藏]
[有少少福崗配眼鏡資訊更新在#566,方便收藏咗嘅朋友參考]


間中喺度見到有朋友問日本配眼鏡啲嘢,由最初我都唔識到而家呢幾年都配咗差不多十副,由近視鏡帶到漸進鏡,不如分享吓啲經驗等有興趣去日本配眼鏡嘅朋友有啲凖備。基本在日本配眼鏡真係唔貴,由幾百(近視鏡)到過萬(漸進鏡)都有,睇吓你自己想要咩。

時間上,一般普通近視眼鏡即日都有,但真係普通嗰啲,想要超薄例如1.74好多都要等幾日。如果唔係太深,1.56或1.67都接受到,咁就得。如果要求超薄,又加變色,防藍光等,咁最好到步當日就去配,預返最少5日時間攞。如果漸進鏡,最好預夠7日。唔夠時間點算?好多鋪頭都可以郵寄日本各地,價錢大概500至600yen,你可以之後用集運返香港。有部分店可以直接寄香港,大概1200-1500yen,要問清楚。

至於邊d鋪頭配,以下經驗比大家參考。我主要分兩類,一般連鎖同高級連鎖。

一般連鎖就包括比較多人熟悉的Jins, Zoff. 其實仲有好多,例如ALook, Coolens等。呢幾間的分別係:

Jins - 大部分為自家品牌,框多數中國做(質量麻麻),鏡片用Hoya,所以好平,但都有日本做嘅框。既然去到日本配,梗係起碼配副日本做啦,好好多。

Zoff - 都係大部分自家品牌,框都係中國做多,但其他牌子比Jins多,鏡片有Nikon。個人覺得OK。

Alook - 除自家品牌,都幾多外國牌子,例如大路牌子Gucci,Ray Ban,少見d如Tom Ford,鏡片用Zeiss (當然唔係最靚個級啦)

Coolens - 除自家品牌,都有外國牌子,如Victor and rolf,Oakley, Gucci等,鏡片用Nikon。

以上幾間都差不多,比較大眾化,價錢相宜。就算配漸進鏡都得,不過要5-7日,同埋最多做1.67鏡片,你想1.74都唔得,不過價錢平,加埋防藍光,大概20000yen樓下有交易。當然呢d漸進鏡只係入門級別,不過無特別要求其實抵玩,同平過香港配。不過唔同分店有可能在選擇上及服務有差別,建議去大d的分店睇

高級鋪頭 (其實只係相對更多選擇,包括牌子及鏡片),同埋推薦比鍾意配眼鏡及比較高要求的朋友,就有金子、Poker Face、富士等。我只係講一d我去配過的店,日本重有好多高質眼鏡舖我無寫出來,我寫多數比較多分店及易搵。

金子 - 如果熟悉眼鏡就知好嘢,框同鏡及服務都一流,當然價錢比較貴。框主打金子品牌及好多日本職人造既框,絶大部分都係日本手工制,價錢由3萬幾yen起跳,加埋近視鏡鏡片,大概50000-80000yen,已經平香港大截。如果配漸進鏡片,價錢當然更貴,高級d嘅漸進鏡淨鏡片大概70000-180000yen都有。鏡片可選Nikon,Zeiss。

Poker Face - 多高質大牌,例如Tom Browne, Dita, Oliver People等,又有日本職人做的眼鏡,基本都係全日本手做,價錢無金子貴,但質素差不多。鏡片多數用Nikon, HOYA,喜歡配眼鏡及有要求嘅建議去行下。

富士 - 呢個只適用於北海道地區,因為富士眼鏡係北海道地膽,仲要係去狸小路總店。非常多大牌子,價錢同Poker Face差不多,但選擇更多。如果去開北海道旅行又想配靚眼鏡,必去。

配眼鏡流程方面,其實唔駛擔心,好多店都有店員可以講普通話及簡單英文,如果要驗眼,你都係跟住做同用簡單英文答就得,無問題。如果你本身有眼鏡度數卡,同埋唔想改度數,最好帶埋去,甚至連驗眼都可以慳返,咁就最方便。

以上提度的鋪頭多數日本各地都有分店,唔難搵。

我自己多數去金子、Poker Face,不過剛剛前兩個月去北海道時去咗富士配副TB, 真係好正。平價眼鏡我會去Alook或Coolens, 因為Jins的質素我覺得一般。不過無論點,最重要相同質素眼鏡及鏡片價錢真係比香港配平唔少。

有問題歡迎交流。

-—————————-—————————————————————————

再分享多少少資料,嚟緊應該有幾多朋友會去日本玩,都有機會會去outlet, 有幾個熱門outlet其實都可以配眼鏡,同埋有機會會比市區平少少。

1. 東京木更津outlet
入面有間Jins,都算大大地,上次去都幾平同多優惠,同幾多運動款,鏡片一樣係Hoya。但一樣只寄國內。

2. 北海道札幌三井outlet
入面有Alook,唔算好大,但都算多唔同牌子,同埋價錢比市區平少少,鏡片用Nikon,架連鏡一個價。上次問話可以寄香港。

3. 大阪機場附近Rinku Premium Outlet
呢個Outlet去開大阪都多人會去,入面有間眼鏡舖幾特別,唔係出面d連鎖,而係專賣Oliver Peoples 同 Paul Smith (因為於日本係同一間廠做,所以一齊賣),有d款幾好同classic,仲要比市區平。如果喜歡呢兩個牌子都好值得望望,睇下有無好嘢。如果近視唔深,佢哋一樣可以即刻配,過一陣攞,方便遊客。如果即係唔得,你可以叫佢地寄香港,上次去有位店員可以講普通話,好helpful. 就算唔配鏡片,淨買副Oliver Peoples架都抵。呢度鏡片用Nikon。

想配漸進唔使唸,一定唔會係度配,除非你過幾日去多次Outlet,或者唔介意集運或寄香港。如果見到有啱嘅架,唔好唸咁多,即配,因為入面有出面未必有。我喺Alook見到副Tom Ford, 無配,返到市區想配都搵唔到,去埋東京睇都無,所以啱心水就唔好唸啦。

應該仲有其他Outlet都有眼鏡舖,不過我無去過。輕井沢Outlet有間店有眼鏡賣,不過無得配,但係d架幾靚。

希望再幫到大家。

[ 本帖最後由 nightporter 於 2018-6-2 01:16 PM 編輯 ]



熱賣及精選
唔會,一個星期應無問題,上次配漸進加變色都係5日,一間要6日。不過安全預夠7日。


引用:
原帖由 gogoing 於 2017-10-22 06:43 PM 發表

多謝樓主分享 如果想配副冇度數既
Jins alook coolens邊間好呀? 想平時番工望落專業可靠啲
利申:年輕男子
😄其實日本鋪頭d款都modern,間間大同小異,想質量好d就搵made in Japan嗰啲啦。建議搵間近你酒店,配同攞都方便。我會建議去ALook睇吓先,多d牌子選擇



係呀,其實最正係d鏡片,我個人覺得Nikon最好,Zeiss都好好不過高級的真係好貴。


[隱藏]
引用:
原帖由 koka889 於 2017-10-22 08:45 PM 發表

大板有冇alook?
大阪有,心齋橋,難波,梅田已經有。京都四條都有。



引用:
原帖由 KSC1975 於 2017-10-22 09:00 PM 發表


用過Nikon就不會用Hoya。我近視有600度所以一定用1.74。還有日本的鏡架也不錯,最近配了一副H Fusion加Nikon 1.74,感覺很好。
完全同意。Ching呢副好嘢。我都係鍾意Nikon。



回覆 引用 TOP

引用:
原帖由 dennis1120 於 2017-10-22 09:00 PM 發表

我都有個經驗想分享下 今年8月尾去左東京上野jins 配藍光鏡 大概5xx近視 200散光  鈦金屬框made in japan  無驗眼 用舊眼鏡配對 即時有得取。但問題來了 感覺焦距吾太岩 因舊眼鏡係醫院配時 驗光師曾經提出過我再對上 ...
多謝師兄分享,呢個資訊對有特別要求的朋友非常有用。



回覆 引用 TOP

引用:
原帖由 d40 於 2017-10-22 09:13 PM 發表

前年响JINS配過一副普通近視眼鏡 都幾滿意
嚟緊12月會去東京10日, 想配副漸進,藍光同全視線
請教CHING 10日內可以配到嗎? 係咪ZOFF價錢會大眾化D但又比JINS好呢?
感謝!
如果Jins滿意,Zoff都係差不多。10日夠啦,我上次都係6日配起。但注意呢D連鎖的漸進鏡都係一般級數,唔好有太高要求。唔知師兄有無帶開漸進?



引用:
原帖由 reddogdog 於 2017-10-22 09:00 PM 發表


師兄可否講多漸進鏡片?
我知Hoya有分級數,唔知係咪超薄級數1.6,1.7之類,
Hoya漸進鏡大概乜價位?
Nikon,Zeiss又係乜價位?

去配漸進鏡有冇乜野需要同佢地溝通?
漸進鏡片有分級數,例如Hoya有分5級,每個級都可再配1.67, 1.74等,但價錢就差幾萬yen. 自己經驗係中間個級即係第3級,再加1.67已經好好,價錢7萬幾yen,連埋變色。如果選1.74,要11萬yen.  Nikon漸進價錢同Hoya差不多,Zeiss就再貴d.

配漸進無唔同,最好一開波就講明配漸進,佢哋就會同你講要幾耐先配好。



[隱藏]
引用:
原帖由 cp238238 於 2017-10-22 09:32 PM 發表

想請教樓主,去Jins或Alook係咪配唔到超薄鏡(上文個人理解)?小弟近視超過900度
可以,但多數即日攞唔到,可能要等5-7日。



引用:
原帖由 ahsgrimm 於 2017-10-22 09:26 PM 發表

想問吓去北海道富士有無寄香港服務?
上次北海道札幌狸小路總店有得寄香港,好似1200定1500yen. 有位店員識普通話。



引用:
原帖由 d40 於 2017-10-22 09:37 PM 發表



我平時帶CON多 眼鏡只係後備
未帶過漸進鏡
咁建議配副普通試下先,20000yen樓下有交易,抵試



引用:
原帖由 d40 於 2017-10-22 10:02 PM 發表



我2年前已經配過普通鏡
CHING唔建議配漸進?
我帶CON有漸進
Sorry, 我寫得唔好,建議配副普通漸進,因為唔知眼鏡漸進同con漸進有無大唔同。我自己本身唔帶con的。所以建議配副普通試下,但如budget許可又覺得漸進適應到,就即刻配副好dd啦,用過真係有分別㗎。



引用:
原帖由 rk_ggt 於 2017-10-22 10:14 PM 發表

師兄 請問yellow plus 日本多地方有嗎?
最近想買幅日本handmade budgets $3000 考慮緊999.9 or yellow plus 啲款
Yellow plus唔係好多地方有得配,知道大阪梅田、南崛江間 G B Gafas有,之前睇過但當時d款麻麻,最後無配。999.9最近多咗人配,d款幾好,Poker Face見過有。3000budget可能有d緊,一般框起碼30000幾yen起跳,普通近視鏡片預20000yen,多數要過3000。



[隱藏]
引用:
原帖由 d40 於 2017-10-22 10:31 PM 發表



感謝樓主解釋
請問日文 漸進 藍光 全視線 點講?
其實我都唔識日文㗎,你入去講英文話配近視或漸進,應該跟手好快會比個中文或英文或有漢字嘅價目表比你睇。有d大分店可能會搵個可以講普通話同事招呼你。



回覆 引用 TOP

提示:支持鍵盤翻頁左 右
[按此隱藏 Google 建議的相符內容]