• 瀏覽: 868
[隱藏]
古典結他VS民謠結他VS電結他,究竟有乜分別,學邊種好呢?🤔

我相信呢個問題有好多人初接觸結他時都會諗過。究竟3種有咩唔同呢?學起黎係咪一樣呢?🤔 我就大概講解一下啦。
首先如果以左手基本功上係差不多,不過要注意右手方面,古典結他主要用手指頭或手指甲彈、民謠結他和電結他會用手指+Pick去彈奏。所以一開始先了解清楚自己想玩咩音樂類型就唔怕兜大圈啦🤦🏻‍♂️
學電結他要先學木結他,上手會易D?🤔呢個問題有好多人持不同意見,好難講最正確果個,我只好講我自己觀點。如果你係想學電結他,本身電結他線比較易㩒,咁又何需先彈木結他呢?而且木結他同電結他響音色控制上都有不同之處,我個人就唔覺得先彈木結他再彈電結他會「上手D」。
但係如果你一開始就想彈木結他就要注意喇,因為對新手黎講彈木結他係好痛苦既事,㩒極都㩒唔實/手指總係掂到其他線/練到個姿勢又做唔到實際。好多人會於呢個過程就放棄,只能夠講請教一下前輩心得或是搵老師協助。都可以換最幼既木結他線,令手指負擔減輕一點。
古典結他用尼龍線,線身粗但比較軟身,所以手指負擔都算輕,不過古典結他琴頸比較闊同粗,對於手細既人又係另一種負擔。(當然有好多左手擴展練習,可以逐步適應),建議多做擴展練習,令左手靈活一點,力度也會有所提升。
此外古典結他主要睇五線譜,俗稱「豆豉」。民謠結他同電結他主要睇六線譜同簡譜(當然都可以學識睇全部譜啦)。
但係我要講講學習中期之後既問題,古典音樂講求指法、對位,基本上對指法係十分嚴謹,睇譜能力絕對有保證。民謠結他同電結他多用在流行音樂當中,流行音樂中又包含了即興演奏(古典音樂係唔講即興架)。其中民謠結他普遍用於自彈自唱或Fingerstyle、電結他用於夾Band當中。而流行音樂有別於古典音樂,流行音樂對指法要求比較放鬆,對於喜歡自彈自唱或是創作流行音樂既人黎講比較適合。

但係以上講法又完全無絕對,關鍵在於學果個人諗法姐。我只係大概歸類以上3種結他分別出黎,方便大家可以考慮清楚。無論玩邊種都可以彈得好好既。

再簡單D去總結一下:你喜歡聽古典音樂咪彈古典結他囉;喜歡流行音樂或自彈自唱既咪彈民謠結他同電結他囉。😀
順便一提,小弟最近攪左個IG & FBPOST教學心得&VIDEO,希望大家有興趣就FOLLOW同比LIKE。如果有音樂問題可以私訊問我。謝謝
IG:TAKEABREAKMUSIC
FB:TAKEABREAKMUSIC

[ 本帖最後由 breakmusic 於 2019-1-12 03:52 AM 編輯 ]



回覆 引用 TOP

[按此隱藏 Google 建議的相符內容]