• 瀏覽: 2,079
  • 回覆: 5
  • 追帖: 1
[隱藏]
希望可以日後在這裏分享一些滑浪風帆的基本技術和心得,大家有問題亦可提問,我會盡力解答,希望可以幫助大家多些參與水上活動!


目錄
#2 學習者具備條件及注意事項
#3 rig帆
#4 板
#5 自救法及開始姿勢
#6 180度轉、航行姿勢、改變航向


我自己係前滑浪風帆港隊成員,現時亦參與一啲本地及海外直立板比賽,平時兩樣運動都會玩下,再加跑步做尖操番下體能。

[ 本帖最後由 himsonwong 於 2019-3-29 12:23 PM 編輯 ]



捕風一族好好玩

回覆 引用 TOP

熱賣及精選
第一個Topic係學習前既條件及注意事項

一、最重要係識游水

唔係好叻游水都唔緊要,但係要識踩水,最好緊係游到五十米啦!

二、最低既參加年齡係六歲

依家既器材有吹氣帆,所以體力基本上唔係問題!六歲都係主要說明小朋友可以聽得明同可以跟從基本指示就玩得喇

三、學習時數,最短可以低至兩三小時

只要環境、海面情況平靜、有微風,初學者最快兩至三小時課程已經可以在教練監督情況下自己航行,
當然每個人學習進度都有所不同,海面狀況亦經常有變化,不能夠一概而論,但係初學者黎講,一對一教學進步速度會較一對二人或以上進度快,一般初學者教學比例最大為一對五

四、最佳學習天氣狀況為兩至三級風

對初學者而言,一般最佳的學習環境風力為二至三級風,值得留意是雖然天文台預報風力有時候高達四至五級,但實際風力可能會較低。最好是查看天文台的實時風力報告或向相熟水上活動中心查詢當日風力是否適合上課

五、預備落水衣服及鞋

要帶防曬衫褲、帽、太陽油,如果有保暖衣(wetsuit)都最好帶定,當然一些水上活動中心亦提供保暖衣借用。
落水鞋雖然都有機會可以借用,但係考慮到尺碼同衛生,最好都係自備


[ 本帖最後由 himsonwong 於 2019-3-20 04:16 PM 編輯 ]



捕風一族好好玩

回覆 引用 TOP

第二部分係介紹如何預備好張帆

雖然有一啲水上活動中心係可以幫你rig好張帆,但係rig帆都係一個好重要既技術,了解你既器材對之後學習有好大幫助

下圖見到有一張帆,完全未rig起,只係一張帆布咁,旁邊有boom(橫桿)、mast(維桿)等器材


rig帆首先要張mast由帆既底部穿入mast pocket,直到頂起帆頂,再如下圖裝上extension(延長器)及穿好繩並拉緊downhaul(下拉繩)。

拉好downhaul之完成圖


第二部份係要裝boom
如下圖所示將帆及mast一同套入boom,留意uphaul(起帆繩)要向下

套入之後要將inhaul繩包圍mast並扣好,調較好boom的高度約在肩膊高度左右便可鎖緊

鎖緊後如下圖

然後到帆的另一邊穿好outhaul繩,並拉緊

拉緊後如下圖

有帆骨亦需要確保每條帆骨有拉緊

最後完成後可看到帆的outhaul及downhaul都適當地拉緊,沒有明顯的直紋或橫紋出現便完成,如果風力較大,outhaul及downhaul需要拉得緊一些讓帆的窩位變小;相反風力較弱時可鬆一些,讓帆的窩位變大


[ 本帖最後由 himsonwong 於 2019-3-27 10:17 PM 編輯 ]



捕風一族好好玩

回覆 引用 TOP

第三部份係介紹下塊板
例如好似見到下圖塊板,我地要識分板頭同板尾,板底有fin(尾鰭)一邊就係板尾,fin既用途係幫塊板行條直線,所以要好好保護,唔好企上去或者撞石

板中間有mast track(維桿路軌),用黎放power joint(接頭)落去,好似下圖咁將joint頭既絲母對準個窿再跣入mast track中間

初學者黎講前啲就易行直線一啲,後啲就易轉彎一啲,較啱位就順時針方向擰緊

板底會見到有centre board定水板同尾鰭


定水板係可以收起同放低,板面就係用呢個腳掣操控,依家係落左:


咁樣係收起:


定水板既作用係幫塊板航行既角度可以同風形成45度或以上,亦都可以隱定塊板

定水板收起既時候板底就係咁樣,而尾鰭就無得郁既,除非拆鏍絲

檢查完塊板就可以裝張帆落塊板到,首先要將mast同板形成90度角咁放好,同時mast底對準joint頭。
跟住將板抬起90度將joint頭插入extension底個窿直至頂手,再按extension粒掣,直至joint頭完全插入粒掣彈番出黎

完成圖

咁就成套器材預備好


[ 本帖最後由 himsonwong 於 2019-3-28 11:53 PM 編輯 ]



捕風一族好好玩

回覆 引用 TOP

[隱藏]
第四部分係自救法和開始姿勢

自救法有好多種,但係初學者最常用既係蝴蝶式自救法。做法係先將帆好似下圖咁放好喺板尾,令帆完全離開水面


然後個人就扒上塊板到,心口放板前方,雙腳壓住將帆唔好俾佢跌番落黎,咁就可以用雙手划出去你想去既地方,或者離開岸邊,離開危險物或者障礙物等
初學者亦都需要用呢個方法划出深水區練習


自救法非常重要,因為出得海玩就要有能力自己番埋岸,如果航行唔到就要用自救法喇。
但係呢個自救法都有好多限制,例如要好多氣力,有四級風以上基本上都無乜可能划得到向上風等。

跟住落黎就係將定水板放到最低再起帆,我就skip左點爬上塊板喇,先將對腳放喺板既中線,靠近板頭既係前腳,最好靠近mast foot,後腳打開大約膊頭咁闊


然後用起帆繩拉起張帆,記得要挺直條腰,用腳同身體既力拉起張帆一半,等啲水溜走曬先用手力。

起帆既時候,另一樣要留意既係風向,當起帆既時候,最好係背向風,面對板同帆,如果面對風同帆,就要將帆拉去板既另一邊,或者將帆拉起一半等板同帆轉方向


起完帆,背向風就可以做開始姿勢。開始姿勢要到以下三點:
1. 雙腳企中線,前腳泊貼mast foot,後腳自然分開企,大約膊頭咁闊

2.保持帆板90度,咁樣可以確保風由你既背面吹黎,同時板頭同風成90度。咁樣會容易保持平衡,而且較容易進入之後會學既航行姿勢


3. 雙手揸mast,而且要保持身體同mast形成V字形,V字形角度越大,就越易保持平衡,所以如果喺水真係保持唔到平衡,暫時揸起帆繩都可以


呢兩個動作可以先喺岸上練習,然後再喺水實習,先用自救法划出去深水區同無障礙物既地方,然後起帆做開始姿勢。
喺水到做開始姿勢可以話係起左帆之後,最容易平衡既動作,如果平衝到就可以進入下一個動作

[ 本帖最後由 himsonwong 於 2019-3-29 12:22 PM 編輯 ]



捕風一族好好玩

回覆 引用 TOP

做到開始姿勢之後就要做180度轉

180度亦即係tacking逆風轉向既easy版,因為逆風轉比較重要,所以暫時唔講順風轉。
點解呢個轉向咁重要?因為首先你塊板無理由一路指出海,唔識番埋岸;第二,如果板頭有障礙物要識及早掉頭;第三,用風力推動既所有帆船都唔可以直指個風黎行,要靠之字形咁向上風進發,呢點遲啲再講多啲。

180度轉做法:

首先做番開始姿勢,然後將後腳泊貼mast foot咁企如下圖:



跟住將帆移向板尾,期間張帆越貼近水面就越轉得越快同有效率,同時亦要保持身體同mast有個V字形,一路轉帆,身體亦都相應移向板頭一方。
如果真係覺得難平衡,亦都可以揸住起帆繩黎做,V字形會較大,帆亦都較易貼近水面。


當感覺到板頭對住風,就可以再移塊帆去板既另一邊做番開始姿勢,可以留意到下圖完成既時候,依家板頭方向由指向沙灘變成指向海,同時間前手亦都變成有戴錶既手。
依家如果再做180度轉,記住要同樣地,將帆移向板尾,唔好攪錯移向板頭!


當兩邊180度轉都成功做到就可以再做下一個動作:航行姿勢

(呢到我將一般初班會教既方法簡化左,無講到丁字腳、轉腰、望窗門等動作,因為呢啲動作順風行先會做,暫時初學者黎講集做到橫風同逆風先的話比較有利)

航行姿勢第一步係做開始姿勢既同時用前手指一指板頭對住既目標物,例如下圖我對住隻舢板。記住要搵樣明顯而唔會郁既目標物。


第二步係用後手揸boom


第三步將帆拉埋板邊,咁就會開始向前行。
(期間要保持身體同張帆有個V字形,風大可以將後腳移向板尾多啲,用身體重量向後挨黎平衡。如果平衡有困難可以鬆後手,放番張帆出去,做番開始姿勢)

第四步就係確保板頭一路對準目標黎行


咁點樣可以調整方向呢?咁就要理解兩個動作:
bear away(順風轉)
將mast移向板頭,同時保持後手拉住張帆兜風,完成後要回番mast去行直線既位置
幻想下將帆移前之後,板頭多左力兜風,自然板頭會順住離開風咁轉啦,下圖風由左至右吹,所以板頭你覺得會轉邊一邊呢?


另一個動作係luff up逆風轉

做法同頭先掉番轉,將mast移向板尾,同時後手保持張帆兜風,不過張帆唔好拉過中線,完成後記得將mast移番去行直線既位置

幻想一下今次張帆移去板尾,板尾俾風推向下風,板頭就自然係指向上風啦


上面演示既都係用戴錶隻手做前手,理解左之後就要轉180度,向相反方向既時候,用無戴錶隻手做前手黎練習喇!

今次呢部份係較難理解同掌握,有唔明最好都係搵教練上堂



捕風一族好好玩

回覆 引用 TOP

[按此隱藏 Google 建議的相符內容]